Beynəlxalq Səhiyyə “BIHE 2017” sərgisi keçiriləcək

22 Sentyabr 2017 12:20

Xəbər 161 dəfə oxunub

Xəbər verildiyi kimi, sentyabrın 28-29-da 23-cü Azərbaycan Beynəlxalq Səhiyyə “BIHE 2017” sərgisi keçiriləcək.Azərtac xəbər verir ki, sərgi çərçivəsində ilk dəfə olaraq həkimlər üçün günün ən aktual mövzularını əhatə edən konqres təşkil ediləcək. Konqresdə səhiyyənin müxtəlif sahələrində çalışan aparıcı həkimlərin iştirakı ilə bir neçə panel müzakirəsi aparılacaq.Konqres bütün həkimlər üçün açıq olacaq və “Yeni doğulmuşlarda sarılıq”, “Qadın sağlamlığının müxtəlif dövrlərində magneziumun əhəmiyyəti”, “Ultrasəs muayinəsində ən son yeniliklər və imkanlar”, “Diyet proqramlarında ən çox təkrarlanan səhvlər. Diyet proqramların uğursuzluqlarının və itirilmiş kiloların geri qayıtmasının əsas səbəbləri. Yo-Yo effekti”, “Fərdi diyetoloji proqramları hazırlamaq üçün bir proqram-aparat kompleksində 4 klassik diaqnostik metoddan istifadə zamanı yarımavtomat çarpaz təhlil metodikası”, “Depressiyanın diaqnostikası və müalicəsi üzrə müasir aspektlər”, “Bioloji təbabət nədir?”, “Almaniyanın Essen şəhərində yerləşən Müqəddəs Elizabet adına çoxprofilli akademik xəstəxananın iş təcrübəsi – tibbi inkişaf, işin keyfiyyəti, humanizm. Beynəlxalq pasientlər üçün tibbi xidmət imkanları”, “Gözəlliyin inkişafı. Üzün orta 1/3 hissəsi gəncliyin əsasıdır. Üzün orta 1/3 hissəsinin 3D modelləşdirilməsi. Dolğu və tredliftinqin köməyi ilə burun və yanaqların skulpturizasiyası və əməliyyatsız plastikası” mövzularında müzakirələr aparılacaq.xeber100.com

Reklam

Tibb Universitetinin məlumatına görə…

Azərbaycan Tibb Universitetində (ATU) Tələbə Elmi Cəmiyyətinin təşkilatçılığı ilə ictimai sağlamlıq və səhiyyənin təşkili kafedrasında elmi-praktik konfrans keçirilib.Universitetdən Azərtac-a bildiriblər ki, tədbirdə çıxış edən ATU-nun ictimai sağlamlıq və səhiyyənin təşkili kafedrasının müdiri, professor Rafiq Çobanov bu, ali tibb müəssisəsində uzun illərdir ki, tələbə elmi cəmiyyətinin fəaliyyət göstərdiyini qeyd edib. O, son bir il ərzində kafedrada təxminən 50-dən çox tələbənin elmi işlər gördüyünü və nəticələrinin cəmiyyətə təqdim olunduğunu deyib. Tədqiqata cəlb edilən tələbələrin müxtəlif mükafatlar, sertifikatlar aldığını xatırladan kafedra müdiri bugünkü konfransda da maraqlı məruzələrin səslənəcəyinə əminliyini bildirib.Sonra tədqiqatçı tələbələrin “Tibb Universitetinin tələbələri arasında emosional-stress təzahürlərinin yayılması səviyyəsinin qiymətləndirilməsi”, “Ali təhsil müəssisə tələbələrinin kontraseptiv vasitələr barədə məlumatlılıq səviyyəsinin təhlili”, “+1 xromosoma”, “Uşaq travmatizmin bəzi sosial-gigiyenik aspektləri” mövzularında məruzələri dinlənilib.Konfransda iştirak edən professor-müəllim heyəti ayrı-ayrı müəssisələrdə, müxtəlif regionlarda aparılın araşdırmalar əsasında hazırlanan məruzələri qənaətbəxş qiymətləndirərək gənc tədqiqatçılara öz tövsiyələrini veriblər.xeber100.com

Aprel 25, 2018 13:50

IV Beynəlxalq Cərrahiyyə Konfransı öz işinə başlayıb

Aprelin 20-də Bakıda Azərbaycan-Türkiyə IV Beynəlxalq Bariatrik-Metabolik Cərrahiyyə Konfransı öz işinə başlayıb. Tədbir Tibb Universitetinin Tədris Cərrahiyyə Klinikasında keçirilir. İki gün davam edəcək konfrans Türkiyə Bariatrik Cərrahlar Dərnəyi və Azərbaycan Bariatrik və Metabolik Cərrahlar Assosiasiyasının birgə təşəbbüsü ilə baş tutub.Azərtac xəbər verir ki, tədbirdə dünyanın yeddi ölkəsindən olan 14 alimin məruzələri dinləniləcək.Konfransda çıxış edən klinikanın direktoru Surxay Hadıyev tədbirin əhəmiyyətini vurğulayıb. Bildirilib ki, hazırda cəmiyyətdə ən aktual problemlərdən biri də piylənmədir. Bu problemin ölkəmizdə yayılmasınının qarşısını almaq, o cümlədən sağlam qidalanma, piylənməyə yol açan amillərlə mübarizədə əhalinin maarifləndirilməsi baxımından bu cür tədbirlərin keçirilməsi çox vacibdir.Tibb Universitetinin I cərrahi xəstəliklər kafedrasının əməkdaşı Taryel Ömərov konfrans barəsində jurnalistlərə məlumat verib: “Konfrans artıq beşinci ildir ki, Azərbaycanda keçirilir. Birinci il milli konfransımız olub, bu isə keçirdiyimiz dördüncü bariatrik-metabolik konfrasdır. Tədbir təbabətin ən müasir nailiyyətlərindən biri olan metabolik cərrahiyyəyə həsr olunub. Tədbiri keçirməkdə əsas məqsədimiz dünyada aparılan əməliyyatların və tibb yeniliklərin Azərbaycanda da tətbiq edilməsinə dair ən müasir protokollarla həkim və tələbələrimizi tanış etməkdir".xeber100.com  

Aprel 20, 2018 09:46

IV Azərbaycan-Alman-Türk Tibb Konqresi keçiriləcək

Aprelin 26–29-da Bakıda Azərbaycan-Almaniya Tibbi Əməkdaşlıq Cəmiyyəti, Səhiyyə Nazirliyinin Milli Onkologiya Mərkəzi və M.Topçubaşov adına Elmi-Cərrahiyyə Mərkəzinin təşkilatçılığı ilə IV Azərbaycan-Alman-Türk Tibb Konqresi keçiriləcək.Artıq dördüncü dəfədir ki, Bakıda keçirilən bu konqres cərrahiyyə, qastroenterologiya, radiologiya, onkologiya, urologiya və reanimasiya, intensiv terapiya və ginekologiyanın ən aktual problemlərinə həsr olunmaqla Avropa mərkəzləri tərəfindən davamlı tibb təhsili verən beynəlxalq tədbir kimi tanınmış və bu il region ölkələrində ilk dəfə 30 CME kredit balı ilə qiymətləndirilib. Həmçinin bu il Konqres və təlimlər Azərbaycan Respublikası Səhiyyə Nazirliyi tərəfindən də akkreditasiya olunaraq davamlı tibb təhsil üzrə 34 davamlı tibb təhsili balı ilə qiymətləndirilib.Onu da qeyd edək ki, konqresin ilk günü böyük azərbaycanlı alim-cərrah, akademik Böyükkişi Ağayevin anadan olmasının 90 illiyinə həsr ediləcək.Konqreslə eyni zamanda beynəlxalq statuslu III Bakı Beynəlxalq Tibbi Təlim Günləri də keçiriləcək. Bu tədbir çərçivəsində tələbə, rezident və həkimlər üçün 12 ixtisas üzrə (laparoskopik və ümumi cərrahiyyə, endoskopiya, ultrasonoqrafiya, radiologiya, urologiya, ginekologiya, histeroskopiya, kardiopulmonar reanimasiya, EKQ kursu, tibb bacıları üçün tibbi vərdişlər kursu və s.) Avropada tanınmış Davos Tibb Kursları və digər tanınmış proqramlar əsasında beynəlxalq səviyyəli təlim təşkil ediləcək. Təlimlər Avropada həkim və tələbələrə xüsusi peşə vərdişlərinin öyrədilməsi məqsədilə tədris edilən texnikalardan istifadə edilməklə ən müasir tibbi modellər üzərində aparılacaq.xeber100.com

Aprel 18, 2018 13:44

Dünya Səhiyyə Təşkilatının təşəbbüsü ilə…

Hər il aprelin 17-si Dünya Səhiyyə Təşkilatının və Dünya Hemofiliya Federasiyasının təşəbbüsü ilə Ümumdünya Hemofiliya Günü keçirilir. Həmin tarixin seçilməsi heç də təsadüfü deyil. Bu, Dünya Hemofiliya Federasiyasını yaratmış Frenk Şnaybelin doğum günü ilə əlaqədardır.Azərtac xəbər verir ki, həmin günün təsis edilməsinin və qeyd olunmasının məqsədi qanın laxtalanması prosesinin pozulması ilə əlaqədar irsi xəstəlik olan hemofiliyadan əziyyət çəkənlərin hər gün üzləşdiyi problemlərə dünya ictimaiyyətinin və səhiyyə işçilərinin diqqətini cəlb etmək, bu barədə onların məlumatını artırmaqdır.anın laxtalanması prosesinin pozulması ilə əlaqədar irsi xəstəlik olan hemofiliya X xromosomunda cəmi bir genin konfiqurasiyasının dəyişməsi nəticəsində yaranır. Xəstəliyin əlamətləri demək olar ki, bütün hallarda erkən uşaqlıq dövründə, çox vaxt körpənin həyatının 4-5-ci gününə qədər özünü göstərir. Bəzi məlumatlara görə, hazırda dünyada hemofiliya xəstələrinin sayı 400 min nəfərə çatır.Hemofiliyanın müalicəsi olmasa da, xəstənin orqanizmində çatışmayan qanın laxtalanması amilinin inyeksiya edilməsi yolu ilə xəstəliyin gedişinə tamamilə və uğurlu şəkildə nəzarət edilir. Bu məqsədlə istifadə edilən laxtalanma amili əksər hallarda donor qanından götürülür.Kifayət qədər dərman vasitələri ilə təmin ediləndə hemofiliyalı xəstələri normal həyat yaşaya - oxuya, işləyə, ailə qura, yəni cəmiyyətin tamhüquqlu üzvü ola və öz ölkəsinə xeyir verə bilərlər. Lakin xəstəlik əleyhinə preparatların yetərli qədər olmaması ilk növbədə hemofiliyadan əzab çəkən uşaq və gənclərin erkən əlilliyinə səbəb olur.xeber100.com  

Aprel 17, 2018 13:08

Tibb Universitetində tibbi müayinə aksiyası keçirilib

Azərbaycan Tibb Universitetinin (ATU) Tədris terapevtik Klinikasında uşaqlar üçün ödənişsiz tibbi müayinə aksiyası keçirilib.Universitetdən Azərtac-a bildiriblər ki, klinikanın, eləcə də “Pediatrik kardiologiya və revmatologiya” İctimai Birliyinin təşəbbüsü ilə keçirilən aksiyanın əsas məqsədi uşaqların erkən tibbi müayinələrə cəlb edilməsini təbliğ etmək və valideynləri maarifləndirməkdir.Aksiyada iştirak edən professor, pediatr-kardioloq İbrahim İsayev son illər Azərbaycanda səhiyyə sahəsindəki inkişafdan və tibbi sığortanın ölkəmizdə tətbiq olunmasının əhəmiyyətindən danışıb. Həkim uşaqlar arasında kardioloji problemlərin artdığını bildirib: “Uşaqlar arasında bu kimi problemlərin artması və valideynlərin uşaqları vaxtında müayinə etdirmələri istiqamətində maariflənməsi baxımından bu cür aksiyalar çox vacibdir. Bundan əlavə bu aksiyalar çox gözəl nəticələr verir. Bəzi hallarda hətta valideynlərin özlərinin bilmədiyi və şübhələnmədiyi problemlər də müayinə zamanı ortaya çıxır”.Yeni yaranmış “Pediatrik kardiologiya və revmatologiya” İctimai Birliyinin sədri, pediatr Sveta Rəfiyeva bildirib ki, bütün dünyada uşaqlar arasında ürək və qeyri infeksion xəstəliklər getdikcə artır: “Məqsədimiz valideynlərin vaxtında övladlarını həkimə gətirməkdən çəkinməməsini təmin etmək və onlar arasında maarifləndirmə işlərini genişləndirməkdir”.Pediatr-endokrinoloq Ləman Sultanova valideynlərə övladlarının düzgün qidalanması, fiziki aktivlik və gün rejiminin düzgün bölünməsi ilə bağlı məsləhətlər verdiyini qeyd edib. Həkim müraciət edənlərin əsasən boy qısalığı və artıq çəki kimi endokrin patologiyalardan şikayət etdiklərini bildirib.Aprelin 21 və 28-də növbəti aksiyanın keçirilməsi nəzərdə tutulur.xeber100.com

Aprel 16, 2018 15:09

“Mövsümi allergiyalar” mövzusunda tədbir keçirilib

Aprelin 13-də Azərbaycan Tibb Universitetinin (ATU) Tədris Terapevtik Klinikasında "Mövsümi allergiyalar" mövzusunda tədbir keçirilib.Azərtac xəbər verir ki, klinikanın elm və tədris işləri üzrə direktor müavini, dosent Adil Nuriyev bildirib ki, allergiya əsasən selikli qişanın güclü qaşınması və dəri səpgiləri, ümumi zəifliklə özünü büruzə verir.Tədbirdə çıxış edən Səhiyyə Nazirliyinin baş allerqoloqu Cəbrayıl Məmmədov yazda meydana çıxan allergik problemlər haqqında danışıb. Bildirilib ki, bir sıra ağacların yaz fəslində tozlanması allergiyaya həssas insanlarda bu problemin əlamətlərinin baş qaldırmasına səbəb olur. Bu səbəbdən baharın gəlişi ilə allergik xəstəliklər özünü daha qabarıq büruzə verir.Baş allerqoloq bu problemlərlə əlaqədar meydana çıxan bir sıra xəstəliklər barəsində də danışıb. Bildirilib ki, bu problemlər arasında Azərbaycanda ən çox yayılmış olanı bronxial astmadır ki, buna əhalinin təxminən 5-8 faizində rast gəlinir. Baş allerqoloq bu problemin əsasən irsi olduğunu və ya yüksək rütubətlik şəraitində yaşayanlarda daha çox meydana çıxdığını deyib. Bildirilib ki, allergiya əsasən selikli qişanın güclü qaşınması və dəri səpgiləri, ümumi zəifliklə özünü büruzə verir.Bildirilib ki, gələcəkdə bu istiqamətdə daha ağır xəstəliklərlə üzləşməmək üçün problemin qarşısının zamanında, yəni kiçik yaşlarda alınması mütləqdir.Allergiyanın əmələ gəlmə səbəbləri haqqında danışan A.Əyyubova burada irsiliyin də vacib rol oynadığını qeyd edib. Bildirilib ki, valideynlərdən birində allergik xəstəlik və ya reaksiyanın olması uşağın bu növ xəstəliklərə meyillilik riskini yüzdə əlli, hər ikisində olması isə 75 faiz artırır: “Altı aylığa qədər olan uşaqlarda allergiyanın əmələ gəlməsinə əsasən qida məhsulları səbəb olur. Allergik reaksiya özünü səpki, öskürək, asqırıq, boğulma və bir sıra digər hallarla büruzə verir. Xəstəlik və reaksiyalar mərhələli davam edir. Yeni doğulmuş körpələri ananın immun sistemi qoruyur.xeber100.com

Aprel 13, 2018 13:35

İnsan üzərində aparılan tədqiqatların nəticəsinə əsasən…

20 yaşında baş vermiş kəllə-beyin zədəsi özünü 50-60 yaşlarında demensiyanın inkişafı riskinin artması ilə göstərir. Üç milyona yaxın insan üzərində aparılan tədqiqatların nəticəsi bunu sübut edir. Müəyyən olunub ki, baş beyin zədəsi alan kişilər qadınlara nisbətdə (30 faiz 19 faizə qarşı) demensiya ilə daha tez qarşılaşır.“Meddaily” saytı xəbər verir ki, kəllə-beyin zədələri gənclər arasında daha geniş yayılıb və zədə alan insanlarda demensiyaya tutulma riski digərlərinə nisbətdə 24 faiz daha çoxdur. Bir dəfə ağır zədə almaqla demensiya riski 35 faiz, orta zədə və ya adi silkələnmə nəticəsində isə 17 faiz artır. 2 və 3 dəfə baş beyin zədəsi almış insanlarda demensiya riski 33 faiz, 4 zədə alanlarda isə 61 faiz yüksəkdir. Əgər baş beynin 5 və daha çox sayda zədəsi qeydə alınıbsa, o zaman risk 183 faiz artır.Bununla yanaşı, zədədən sonra demensiyanın qaçılmaz olduğunu düşünmək lazım deyil. Əgər spirtli içki və tütünün istifadəsini azaltsanız, mütəmadi olaraq məşq və çəkinizə nəzarət etsəniz, hipertoniya, diabet, depressiya ilə mübarizə aparsanız, demensiyanın əmələ gəlmə riskini aşağı sala bilərsiniz. Yeri gəlmişkən, hazırda dünyada 47 milyon insanda demensiya müşahidə olunub və yaxın 20 il ərzində bu rəqəmin iki dəfə artacağı gözlənilir.xeber100.com

Aprel 13, 2018 13:32

Bu gün Ümumdünya Qlaukoma ilə Mübarizə Günüdür

Qlaukoma ən geniş yayılmış və təhlükəli oftalmoloji xəstəliklərindən biridir və təəssüf ki, praktik olaraq heç kəs ondan sığortalanmayıb. Beynəlxalq miqyasda Qlaukomayla Mübarizə Günü 2008-ci ildən Ümumdünya Qlaukoma Cəmiyyətləri və Ümumdünya Qlaukomalı Xəstələr Assosiasiyalarının təşəbbüsü ilə keçirilir.Azərtac xəbər verir ki, qlaukoma gözdaxili təzyiqin artması ilə səciyyələnən xəstəlikdir. Əvvəlcə simptomsuz başlasa da, xəstəliyin vaxtında müalicəsi aparılmayanda görmə dairəsi tədricən daralır, getdikcə gözün nuru zəifləyir və korluğa aparıb çıxarır. Qlaukoma nəticəsində itirilən görmə qabiliyyəti bərpa olunmur.Qlaukoma xəstəliyi hər yaşda yarana bilər, lakin xəstəlik 40 yaşdan sonra daha çox yayılır. Statistikaya görə, dünyada 100 milyon qlaukoma xəstəsi var və onlardan hər beşindən biri göz nurunu tamamilə itirir.Mürəkkəblik ondadır ki, qlaukoma yalnız yüksək dərəcədə inkişaf edəndən sonra üzə çıxır və müalicəyə çətin tabe olur. Ümumdünya Qlaukomayla Mübarizə Gününün qeyd olunması həm də xəstəliyinin yaranması, risk amilləri, profilaktikası və diaqnozu barədə ictimaiyyətin maariflənməsinə xidmət edir.Qlaukomanın vaxtında başlanılmış müalicəsi yalnız gözdaxili təzyiqi aşağı salan damcıların tökülməsindən ibarətdir. Xəstəliyin daha ağır hallarında isə lazer cərrahiyyəsinə və ya operativ müdaxiləyə üstünlük verilir. Bütün hallarda müalicə forması xəstəliyin tipi, dərəcəsi və xəstənin yaşını nəzərə alınaraq aparır. Müasir texnologiyalar müalicə prosesini maksimum dərəcədə təhlükəsiz və uğurla aparmağa imkan verir. Hətta əksər hallarda onun müalicəsi üçün stasionar şəraitdə qalmaq tələb olunmur.xeber100.com

Mart 6, 2018 14:14

Dünya Səhiyyə Təşkilatının məlumatı

Avropa ölkələrinin bir çox sakini mövsümi qripə qarşı peyvənd olunmur. Dünya Səhiyyə Təşkilatına (DST) üzv olan Avropa regionu ölkələrinin yarısında yaşı 65-dən yuxarı olan sakinlərin üçdəbirindən azı vaksinləşdirilib. Bununla yanaşı, mövsümi qrip nəticəsində əmələ gələn respirator xəstəliklərdən ildə təxminən 44 min insan dünyasını dəyişir. Ölüm hallarının təqribən 75 faizi yaşlı nəslin payına düşür.Azərtac DST-yə istinadla xəbər verir ki, son 7 il ərzində yüksək risk qrupuna daxil olan insanların – yaşlıların, uşaqların və xroniki xəstəlikləri olan sakinlərin qripə qarşı vaksinləşdirilməsi xeyli azalıb.Ekspertlər ehtiyat edirlər ki, Avropada mövsümi qripə qarşı vaksinləşdirməyə tələbatın azlığı pandemiya halında ciddi mənfi nəticələrə gətirib çıxara bilər.DST-nin Avropa Regional Bürosunun direktoru bildirib ki, vaksinləşdirmə qrip virusunun əmələ gətirdiyi ağır xəstəliyə qarşı daha effektiv üsuldur. Lakin apardığımız tədqiqatlar göstərir ki, Avropa regionu ölkələrinin bəzilərində vaksinləşdirməyə tələbat azalır. Ekspertlər narahatdırlar ki, ölkələrin bəzilərində həm qripə qarşı peyvənd olunmaq istəyənlərin sayı, həm də vaksin ehtiyatı azalıb. Çünki alınan vaksinlərin həcmi tələbdən asılıdır.Bununla belə, 2017/2018-ci qrip mövsümü özünün pik nöqtəsinə Qərbi Avropada çatıb, bəzi ölkələrdə ağır halların çox sürətli artımı müşahidə olunur. Ölkələrin bəziləri yaşlı insanlar arasında anomal yüksək ölüm hallarının olması barədə xəbər verirlər.xeber100.com

Fevral 9, 2018 15:38

İcbari sığorta sisteminin tətbiqi ilə bağlı müzakirə aparılıb

Avropa İttifaqı “Azərbaycanda icbari tibbi sığorta sisteminin tətbiqinə dəstək" tvinninq layihəsini icra edir. Bu geniş proqramın reallaşdırılması çərçivəsində layihənin təmsilçiləri Azərbaycan Tibb Universitetinin (ATU) qonağı olublar.Universitetdən Azərtac-a bildiriblər ki, görüşdə ATU-nun rektoru, professor Gəray Gəraybəyli qonaqlara rəhbərlik etdiyi universitetdəki tədris-təhsil sistemi və burada fəaliyyət göstərən klinikaların fəaliyyəti haqqında məlumat verib. G.Gəraybəyli Azərbaycanda icbari tibbi sığortanın tətbiqinin mühüm məsələ olduğunu, bu məqsədlə dövlət tərəfindən əhəmiyyətli addımların atıldığını vurğuladı.Rektor bildirdi ki, ATU-nun klinikalarında bəzi qurumlardan göndərilən sığortalı xəstələrə xidmət göstərilir. Lakin bu imkandan bütün əhalinin istifadəsi insanların sağlamlığının müdafiəsində ciddi rol oynayır. G.Gəraybəyli Avropa İttifaqının dəstəklədiyi bu layihənin ölkəmizdə icbari tibbi sığortanın tətbiqində və islahatların aparılmasında böyük rol oynayacağından əminliyini vurğulayıb.Avropa İttifaqının “Azərbaycanda icbari tibbi sığorta sisteminin tətbiqinə dəstək” tvinninq layihəsinin rezident tvinninq müşaviri Qediminas Çerniauskas isə layihənin məqsədləri haqqında ətraflı məlumat verib. O, iki il ərzində Avropa ölkələrinin müvafiq istiqamət üzrə böyük təcrübəyə malik mütəxəssis və ekspertləri Avropanın qabaqcıl təcrübəsinə əsaslanaraq İcbari Tibbi Sığorta üzrə Dövlət Agentliyinə dəstək verəcəyini bildirib.xeber100.com  

Fevral 5, 2018 15:23

Dərman vasitələrinə reseptlərin yazılması qaydası təsdiqlənib

Resept blanklarında hər hansı düzəliş edilməsi qadağan edilib.Azərbaycanda dərman vasitələrinə reseptlərin yazılması qaydası təsdiqlənib.Apa-nın məlumatına görə, bu, Səhiyyə Nazirliyinin Kollegiyasının təsdiq etdiyi və yanvarın 23-dən qüvvəyə minən “Aptek təşkilatlarına dair tələblər və aptek təşkilatlarından dərman vasitələrinin buraxılması qaydaları”nda əksini tapıb.Qaydalara əsasən reseptlər təşkilati-hüquqi və mülkiyyət formasından asılı olmayaraq bütün tibb müəssisələrində çalışan, həmçinin özəl tibbi praktika ilə məşğul olan resept yazmaq hüququna malik tibb işçiləri (həkim və tibb məntəqələrinin feldşerləri) tərəfindən tibbi göstərişlər əsasında yazılır. Dərman vasitələrinə reseptlər “Resept blankı forması” və “Ödənişsiz resept blankı forması”nda, optik ləvazimatlara isə “Optik ləvazimatlara resept blankı forması”nda yazılır. Resept dərman vasitələrinin beynəlxalq patentləşdirilməmiş adı, buraxılış forması, dozası və istifadə qaydaları qeyd olunmaqla yazılır. Təyin edilmiş dərman vasitəsinin beynəlxalq patentləşdirilməmiş adının olmadığı hallarda (3 və daha artıq tərkibli, bioloji oxşar dərman vasitələri qrupuna aid olduqda) resept blankında onun ticarət adı yazılır. Resept blanklarında hər hansı düzəlişə yol verilmir.Dərman vasitələrinin tərkib hissələri resept blankında latın və ya ingilis dillərində, dərman forması, hazırlanması və müvafiq buraxılış qaydaları latın dilində, reseptin siqnatura hissəsi (dərmanın istifadə edilmə qaydası) isə Azərbaycan dilində yazılmalıdır. Ambulator şəraitdə müalicə alan xəstələrə resept blankında yazılmış dərman vasitəsi haqqında məlumatlar ambulator xəstənin tibbi kartında və elektron sağlamlıq kartında qeyd edilir. Stasionar şəraitdə müalicə alan xəstələrə dərman vasitələri tibb müəssisəsinə ayrılan dərman vasitələrinin siyahısına uyğun olaraq resept yazmadan təyin edilir.Tibb müəssisəsinə ayrılan dərman vasitələrinin siyahısında olmayan dərman vasitəsinin xəstəyə təyin olunmasına tibbi göstəriş olduqda müalicə həkiminə dərman təyinatını tibb müəssisəsinin rəhbəri və ya onun bu məqsədlə təyin etdiyi məsul şəxslə, təcili-təxirəsalınmaz hallar zamanı isə cavabdeh növbətçi həkim ilə razılaşdırmaqla reseptin yazılmasına icazə verilir.Dərman vasitələrinin ödənişsiz alınması üçün nəzərdə tutulan reseptlər yalnız dövlət müalicə-profilaktika müəssisələrinin həkimləri tərəfindən, Səhiyyə Nazirliyi tərəfindən təsdiq olunmuş siyahıya uyğun yazılır. Ödənişsiz şərtlərlə dərman almaq hüququna malik olan şəxslərə dərman preparatı yazmaq üçün istifadə olunan ödənişsiz resept blanklarının qeydiyyatı aparılır.xeber100.com

Yanvar 28, 2018 21:38