Ədəbi müsabiqəyə start verilir

“Mədəniyyət” kanalı ilə Yazıçılar Birliyinin birgə layihəsi olan yeni ədəbi müsabiqəyə start verilir.Azərtac xəbər verir ki, “Mədəniyyət” kanalının direktoru R.Qasımovun sözlərinə görə, müsabiqənin əsas məqsədi ölkəmizin müasir iqtisadi-mədəni inkişafının poetik müstəvidə işıqlandırılmasını təmin etmək, eyni zamanda, yüksək səviyyəli poeziya nümunələrini geniş tamaşaçı kütlələri arasında təbliğ etməkdir.Müsabiqəyə “Vətənpərvərlik”, “Azərbaycan bayrağı”, “Doğma Bakı” və “Milli həmrəylik” mövzularında poeziya nümunələri qəbul olunur.Ramil Qasımov qeyd edib ki, Azərbaycan Televiziyası öz fəaliyyətində gənc nəslə vətənpərvərlik, qəhrəmanlıq ideyalarının təbliğini, xalqa, millətə, bayrağımıza, doğma Bakımıza, Azərbaycanımıza hörmət və sevgi hisslərinin aşılanmasını hər zaman əsas missiya kimi yerinə yetirir. Gənc nəslin maariflənməsi Azərbaycan Televiziyasının əsas məqsədlərindəndir. Bu baxımdan belə müsabiqələrin keçirilməsi təqdirəlayiqdir.Müsabiqənin sonunda hər mövzu üzrə 3 şeir nümunəsi ekspertlər tərəfindən qalib elan ediləcək. Bu şeirlərə musiqi yazılacaq və “Mədəniyyət” kanalı vasitəsilə yayımlanacaq. Bu isə istər poeziya həvəskarlarına, istərsə də musiqisevərlərə “Mədəniyyət” kanalının bir töhfəsi olacaq. Qalibləri əlavə pul mükafatı da gözləyir.xeber100.com

Uolthamstou Sentral Kitabxanasında Azərbaycan bölməsi yaradılıb

Bu günlərdə Londonun Uolthamstou Sentral Kitabxanasında (Walthamstow Central Library) Azərbaycan ədəbiyyatı bölməsi fəaliyyətə başlayıb. Bakı Dövlət Universitetinin professoru Vaqif Sultanlının təşəbbüsü ilə yaradılan bölmədə klassik və müasir ədəbiyyat örnəkləri oxucuların mühakiməsinə verilib.Azərtac xəbər verir ki, Azərbaycan dilində bədii və elmi-publisistik əsərlərdən ibarət bölmənin yaradılması Bakı Dövlət Universitetinin və AMEA-nın Elmi Kitabxanası, “Xan” nəşriyyatı, həmçinin ayrı-ayrı yazıçı və alimlərin dəstəyi ilə gerçəkləşib.Kitabxananın dünya dillərində bədii ədəbiyyatın sərgiləndiyi böyük salonunda yerləşən bölməyə indiyədək 300-ə yaxın kitab göndərilib. Bölmədə Nizami Gəncəvi, Məhəmməd Füzuli, Mirzə Kazım bəy, Mirzə Ələkbər Sabir, Əli bəy Hüseynzadə, Əhməd bəy Ağaoğlu, Yusif Vəzir Çəmənzəminli, Hüseyn Cavid, Ceyhun Hacıbəyli, Məhəmmədhüseyn Şəhriyar, Əli Kərim, İsmayıl Şıxlı, İsa Muğanna, Əzizə Cəfərzadə, Sabir Əhmədli, Xəlil Rza Ulutürk, Məmməd İsmayıl, Sabir Rüstəmxanlı və başqa müəlliflərlə yanaşı, gənc yazarların əsərləri, habelə “Kitabi-Dədə Qorqud”, “Koroğlu”, “Qaçaq Nəbi” dastanları, nağıllar və lətifələrdən ibarət folklor materialları da yer almaqdadır. Bölmədəki bütün kitablar kataloqlaşdırılıb, hissə-hissə oxuculara təqdim olunması nəzərdə tutulub.Qeyd edək ki, Uolthamstou Sentral Kitabxanasında açılan Azərbaycan dilində ədəbiyyat fondu postsovet respublikaları içərində Rusiyadan sonra yaradılan ikinci bölmədir.xeber100.com

“Türkoloji və filoloji problemlər” kitabı təqdim olunub

Mayın 8-də Azərbaycan Yazıçılar Birliyinin (AYB) “Natəvan” klubunda professor Tofiq Məliklinin “Elm və təhsil” nəşriyyatında çap olunmuş “Türkoloji və filoloji problemlər” kitabının üçüncü cildinin təqdimat keçirilib.Xatırladaq ki, T.Məliklinin əsərlərinin 3-cü cildində türkologiya, ədəbiyyat, dil və digər məsələlər haqqında yazdığı məqalələr, çoxsaylı müsahibələr, əsərlərinə yazılmış rəy və tənqidi yazılar yer alıb.xeber100.com

Mədəniyyət və Turizm Nazirliyi təqdim edir

Azərbaycan kitabının tanıdılması və dünyəviləşdirilməsi məqsədilə 2016-cı ildən etibarən Mədəniyyət və Turizm Nazirliyi tərəfindən “Azərbaycan Kitabının Dünyada Tanıdılması” (AKDT) layihəsinə başlanılıb. Layihə çərçivəsində Türkiyədə fəaliyyət göstərən “Sevinç Fırat Zengin Yayıncılık” nəşriyyatı ilə əldə olunmuş razılığa əsasən, ilkin mərhələdə seçmə Azərbaycan ədəbiyyatı nümunələrinin tərcüməsi, çapı və Türkiyədə yayılması işi həyata keçirilməkdədir.xeber100.com    

Yazıçılar Birliyinin məlumatına görə…

Yazıçılar Birliyində şair Sabir Zamanlının “Ömür məndən inciməsin” adlı şeirlər kitabının təqdimatı olub.Yazıçılar Birliyindən Azərtac-a bildirilib ki, tədbirdə şair-tənqidçi Balayar Sadiq şairin yaradıcılıq yolundan danışıb.Təqdimat mərasimində şairin qələm dostları kitabındakı şeirləri hərtərəfli və geniş şəkildə xarakterizə edərək onun zəhmətkeşliyi ilə yanaşı, tənqidə açıq olduğunu bildiriblər.xeber100.com

“Nadir kitab fondunun inciləri” təqdim olunub

Milli Elmlər Akademiyasının Mərkəzi Elmi Kitabxanasında (MEK) “Nadir kitab fondunun inciləri” təqdim olunub.MEK-dən Azərtac-a bildiriblər ki, tədbirdə kitabxananın direktoru Leyla İmanova belə təqdimatların keçirilməsinin əhəmiyyətini vurğulayıb. O, “Azərbaycan tarixi dünya rəssamlarının əsərində" albomunun çapa verildiyini və bir neçə ay ərzində istifadə olunacağını qeyd edib.Bildirilib ki, hazırda nadir fondda 15 min 37 kitab qorunub saxlanılır. Bunlardan 759-u XX əsrin 30-cu illərində Azərbaycan dilində nəşr olunmuş ədəbiyyatdır. Fondun tərkibini nəşr tarixinə, ölçülərinə görə incilər sayılan kitablar təşkil edir. Fondda nəşr tarixinə görə ən qədim kitab 1508-ci ildə qədim latın dilində çap olunmuş “Aristotelin iqtisadiyyatına dair Leonardo Aretininin fikirləri” adlı ədəbiyyatdır. Nadir fondun həcmcə ən iri kitabı (54x64 sm) Edvard Stebbinqin “The Holy Carpet of the Mosque at Ardebıl – London, 1893” əsəridir. Ən kiçik kitab (3,5x4,5 sm) Belarus şairi Yanka Kupalanın şeirlər məcmuəsidir. Fondda tərtibatı ilə xüsusi olaraq seçilən ədəbiyyat isə firuzə qaşlarla bəzədilmiş “Ebers G.Aegypten: İm Bild und Wort. – Stutgart; Leipzig, 1879” kitabıdır.Qeyd olunub ki, “Azərbaycan miniatürləri”, “Azərbaycan tarixi muzeyinin sikkə kolleksiyası” və “Azərbaycanın sikkələri” kimi nəşrlər də fondun incilərindən sayılır.xeber100.com

Şuşa şəhər kitabxanasının 120 illiyinə həsr olunmuş tədbir keçirilib

Fevralın 27-də Milli Kitabxanada Şuşa şəhər kitabxanasının 120 illiyinə həsr olunmuş tədbir keçirilib.Azərtac xəbər verir ki, əvvəlcə tədbir iştirakçıları Şuşa şəhərinin tarixinə, mədəniyyətinə və görkəmli şəxsiyyətlərinə aid fotolardan və kitablardan ibarət sərgi ilə tanış olublar. Həmçinin Şuşa şəhərinin görüntülərindən ibarət videoçarx nümayiş edilib.Tədbirdə çıxış edən mədəniyyət və turizm naziri Əbülfəs Qarayev kitabxananın keçdiyi tarixi yola nəzər salıb, bu mədəniyyət ocağının neçə-neçə insanın kamil şəxsiyyət kimi formalaşmasındakı rolunu qeyd edib.Sonra Şuşa rayon Mərkəzləşdirilmiş Kitabxana Sisteminin bir sıra əməkdaşlarına nazirliyin “Fəxri mədəniyyət işçisi” döş nişanı və fəxri fərmanlar təqdim olunub.Şuşa Rayon İcra Hakimiyyətinin başçısı Bayram Səfərov da 120 illik tarixi olan kitabxana tərəfindən görülən işləri, reallaşdırılan layihələri yüksək qiymətləndirib.Sonda Şuşa musiqi məktəbinin şagirdlərinin ifasında konsert proqramı təqdim edilib.xeber100.com

Mərkəzi Elmi Kitabxanada tədbir keçirilib

AMEA-nın Mərkəzi Elmi Kitabxanasında (MEK) akademik Ziya Bünyadovun həyat və fəaliyyətinə həsr olunan tədbir keçirilib.Tədbiri açan MEK-in Beynəlxalq və İctimaiyyətlə Əlaqələr şöbəsinin müdiri Mübariz Göyüşlü akademik Ziya Bünyadovun elmi irsi, həyatı və şəxsiyyəti barədə fikirlərini səsləndirib. Tədbirdə MEK-in İstifadəçilərə xidmət və nəzarət bölməsinin rəhbəri Ofeliya Yunusova təqdimatla çıxış edib. Ziya Bünyadovun alimlik dərəcəsi alıncaya qədərki təhsil mərhələlərindən, İkinci Dünya müharibəsi cəbhələrində göstərdiyi igidlik və qəhrəmanlıqlara görə təltiflərindən,  elmi və ictimai fəaliyyətindən söz açıb: “50-ci illərin ortasından öz taleyini həmişəlik Akademiyaya bağlamış Z.Bünyadov AMEA-nın vitse-prezidenti vəzifəsinə qədər uzun illər A. Bakıxanov adına Tarix İnstitutunda və Şərqşünaslıq İnstitutuna müxtəlif vəzifələrdə çalışıb. Tarix elmini öz samballı tədqiqatları ilə zənginləşdirmək istiqamətində fəaliyyətinə görə Ziya müəllim 1967-ci ildə Akademiyanın müxbir üzvü, 1979-cu ildə isə həqiqi üzvü seçilib”.Tədbirdə akademik Ziya Bünyadovun müəllifi olduğu kitablardan danışılıb. Bildirilib ki, alimin əsərləri Fransada, İraqda, Rusiyada, Türkiyədə və bir sıra başqa ölkələrində nəşr olunub. Dünyanın tanınmış alimlərinin əsərləri onun tərəfindən ingilis, ərəb, rus və türk dillərindən tərcümə edilib. Alimin ən yaddaqalan töhfəsi isə akademik Vasim Məmmədəliyevlə birlikdə “Qurani-Kərim”i Azərbaycan dilinə tərcümə etməsi olub.Təqdimatda Ziya Bünyadovun kitablarından ibarət slayd və onun haqda film təqdim edildi.xeber100.com

Milli Kitabxanada kitab sərgisi açılıb

Milli Kitabxanada akademik Ağamusa Axundovun anadan olmasının 85 illiyi münasibətilə “Ağamusa Axundov-85” adlı kitab sərgisi açılıb.Kitabxanadan Azərtac-a bildirilib ki, sərgidə alimin elmi əsərləri, haqqında yazılmış Azərbaycan və rus dillində olan kitablar və dövri mətbuat materialları nümayiş olunur.Hər kəsin ziyarət edə biləcəyi kitab sərgisi bir həftə davam edəcək.xeber100.com  

Yaradıcılıq gecəsi keçirilib

Kukla Teatrında XX əsr Azərbaycan ədəbiyyatının görkəmli nümayəndəsi Mikayıl Müşfiqin yaradıcılıq gecəsi keçirilib.Azərtac xəbər verir ki, layihənin rəhbəri N.Həsənzadə tədbirin böyük şair Mikayıl Müşfiqin anadan olmasının 110 illiyinə həsr edildiyini və bu axşam şairin yaradıcılığından bəzi nümunələrin Dövlət “Yuğ” və Pantomima teatrlarının aktyorlarının ifasında səsləndiriləcəyini bildirib.Gecədə şairin yaradıcılıq nümunələri əsasında hazırlanmış ədəbi-bədii kompozisiya və Mikayıl Müşfiqə həsr edilmiş film nümayiş olunub.xeber100.com