İqtisadiyyat naziri vətəndaşları qəbul edib

Azərbaycan Respublikası Prezidenti İlham Əliyevin dövlət qurumları tərəfindən vətəndaşların müraciətlərinə hərtərəfli şəkildə qayğı və həssaslıqla yanaşılması barədə tapşırıqları İqtisadiyyat Nazirliyi tərəfindən daim diqqətdə saxlanılır, mütəmadi olaraq müxtəlif bölgələrdə vətəndaşların qəbulu davam etdirilir, onların müraciətləri dinlənilir. Sentyabrın 23-də iqtisadiyyat naziri Şahin Mustafayev Şəmkirdə Tovuz, Gədəbəy və Şəmkir rayonlarından olan vətəndaşları qəbul edib. İqtisadiyyat Nazirliyinin mətbuat xidmətindən Azərtac-a bildiriblər ki, nazirliyin aidiyyəti struktur bölmələrinin rəhbərlərinin iştirakı ilə keçirilmiş qəbulda vətəndaşların müraciətləri nazir Şahin Mustafayev tərəfindən diqqətlə dinlənilib, bir sıra məsələlər yerindəcə həll edilib, digər müraciətlərin operativ araşdırılması və qanunvericiliyə uyğun həlli üçün nazirliyin müvafiq struktur bölmələrinə konkret tapşırıqlar verilib. İqtisadiyyat Nazirliyinin səlahiyyətlərinə aid olmayan məsələlərlə bağlı müraciətlər barədə vətəndaşlara ətraflı izahat verilib, icrası nəzarətdə saxlanılmaqla aidiyyəti strukturlara çatdırılacağı bildirilib.xeber100.com

Əmək yarmarkası keçirilib

Astara Rayon Mərkəzi Kitabxanasında ənənəvi əmək yarmarkası keçirilib. Azərtac xəbər verir ki, Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti və Astara Rayon İcra Hakimiyyətinin birgə təşkilatçılığı ilə keçirilən yarmarkaya rayonun 21 idarə, müəssisə və təşkilatından 189 boş (vakant) iş yeri çıxarılıb. İşaxtaranlara dövlət müəssisələrində 158, özəl müəssisələrdə isə 31 boş iş yeri təklif olunub. 250 nəfərə yaxın işaxtaran vətəndaşın iştirak etdiyi tədbirdə 25 nəfər müxtəlif ixtisas və peşə sahiblərinə idarə və müəssisələrdə, 10 nəfər peşə hazırlığı keçən gənclərə işə düzəlmək məqsədilə göndərişlər verilib.xeber100.com

Referenduma hazırlıq işləri başa çatıb

İmişlidə Azərbaycan Respublikasının Konstitusiyasına əlavə və dəyişikliklərlə bağlı sentyabrın 26-na təyin olunan ümumxalq səsverməsinə (referenduma) hazırlıq işləri başa çatıb. Azərtac xəbər verir ki, 79 saylı İmişli seçki dairəsində 43 seçki məntəqəsi təşkil edilib. Seçici siyahıları dəqiqləşdirilib və 40 min 325 seçicinin adı siyahıya daxil edilib. Dairə üzrə ümumxalq səsverməsində 286 gənc ilk dəfə səsvermə hüququndan istifadə edəcək. Səsvermə günü yaşı 100-dən yuxarı 2 seçici səsvermədə iştirak edəcək. Dairənin əhatə etdiyi bütün məntəqələr zəruri texniki və metodik vasitələrlə, elektrik enerjisi, rabitə və yanğın təhlükəsizliyi ilə təchiz olunub. Maarifləndirici plakatlar və seçici siyahıları məntəqələrdə hamının tanış ola biləcəyi yerlərdən asılıb. Seçicilərin ümumxalq səsvermə günü öz mövqelərini sərbəst şəkildə bildirilməsi üçün məntəqələrdə kabinələr qoyulub. Dairə və məntəqələrdə seçki komissiyası üzvlərinin maarifləndirilməsi və səriştələrinin artırılması üçün lazımi işlər aparılır.xeber100.com  

Məhsul yığımı kampaniyasına start verilib

Üzümçülük İsmayıllı rayonunda aqrar iqtisadiyyatın prioritet sahələrindəndir və hazırda bir neçə gündür ki, bölgədə məhsul yığımı kampaniyasına start verilib. Rayon icra hakimiyyətindən Azərtac-a bildirilib ki, üzümçülüyün inkişafına göstərilən dövlət qayğısının, bununla bağlı qəbul edilən Dövlət Proqramının nəticəsi olaraq rayonda plantasiyaların sahəsi 1000 hektarı keçib. Bunun da 800 hektardan çoxu bar verəndir. Hazırda məhsul yığımında hər gün orta hesabla 180-200 nəfər işçi qüvvəsi iştirak edir. Az vaxtda 100 tondan artıq üzüm yığılıb. Yığılan məhsul əsasən süfrə sortudur. Odur ki, üzüm birbaşa istehlakçılara göndərilir. Rayonun Kürdmaşı, Hacıhətəmli, Mollaisaqlı icra nümayəndəliklərində, İvanovka kolxozunda məhsul yığımına daha ciddi hazırlıqla başlanılıb və bu mühüm kampaniyanın vaxtında, itkisiz başa çatdırılması üçün bütün qüvvələr səfərbər edilib. İsmayıllıda cari mövsümdə bağlardan 2500 tondan çox üzüm yığılacağı gözlənilir.xeber100.com

“Sən də bir həyat ver” devizi altında qanvermə aksiyası başlayıb

Naxçıvan Muxtar Respublikası Səhiyyə Nazirliyi irsi qan xəstəliklərindən əziyyət çəkən və qan köçürülməsinə ehtiyacı olan xəstələrin müalicəsində istifadə olunmaq üçün qanvermə aksiyalarının təşkilini davam etdirir. Belə humanitar aksiyalardan biri Naxçıvan Muxtar Respublikası Dövlət Təhlükəsizliyi Xidməti əməkdaşlarının iştirakı ilə Naxçıvan Diaqnostika-Müalicə Mərkəzində keçirilib. Azərtac xəbər verir ki, donorların müayinəsini və qan götürülməsini həyata keçirən qan bankının həkimi Məmmədəli Həsənov ölkəmizdə qan köçürülməsinə ehtiyacı olan xəstələrin müalicəsinə göstərilən dövlət qayğısından, bu sahədə reallaşdırılan layihələrdən danışıb. Bildirib ki, müasir təbabətdə həkimlərin əlində çoxlu müalicə vasitələri olmasına baxmayaraq, ən ağır vəziyyətlərdə xəstələrin həyatlarının xilas edilməsi üçün əvəzsiz rol oynayan canlı dərman donor qanıdır. Hemofiliya və talassemiya xəstələrinin müalicəsində qan komponentlərinin və preparatlarının istənilən vaxtda əlçatan olması çox vacibdir və donor qanına tələbatı artırır. Bu baxımdan muxtar respublikada qanvermə aksiyaları ardıcıl olaraq həyata keçirilir. Sonra xidmətin əməkdaşları “Sən də bir həyat ver” devizi altında qanvermə aksiyasına qoşulublar. Əvvəlcə donorlar müayinə olunublar. Bir neçə saat davam edən aksiyada 33 nəfər könüllü qan verib. Donorlardan götürülən 16 litr qanın qrupları müəyyənləşdirilərək mərkəzin qan bankına təhvil verilib. Hazırda qan bankında xəstələrə köçürülmək üçün kifayət qədər ehtiyat yaradılıb.xeber100.com

Prezidentin Sərəncamına uyğun olaraq…

Salyan rayonunun Çuxanlı-Gəncəli-Piratman-Parça Xələc-Seyidan avtomobil yolunun tikintisi ilə bağlı Azərbaycan Respublikası Prezidentinin Sərəncamına uyğun olaraq “Azəravtoyol” ASC tərəfindən işlər davam etdirilir. “Azəravtoyol” ASC-nin mətbuat katibliyindən Azərtac-a bildirilib ki, sözügedən avtomobil yolunun uzunluğu 19 kilometrdir. Avtomobil yolu 2 hərəkət zolaqlı olmaqla 4-cü texniki dərəcəyə uyğun olaraq yenidən qurulur. Zəruri olan yerlərdə yol yatağının yararsız qruntu qazılaraq çıxarılıb. Bunun əvəzinə karbonat materialı tökülərək yenidən kipləşdirilib. Hazırda qum-çınqıl qarışığı və optimal qırmadaş qarışığından ibarət yol geyiminin əsasının tikintisi işləri aparılır. Buna paralel olaraq yola 2 qat olmaqla asfalt-beton örtüyü döşənir. Ümumilikdə 115 min kvadratmetr ərazinin asfaltlanması nəzərdə tutulub. Layihəyə uyğun olaraq yol yatağının eni 10 metr təşkil edir. Bura 6 metr yolun hərəkət hissəsi və hər bir istiqamət üzrə 2 metr olmaqla çiyinlər daxildir. Yenidənqurma işləri çərçivəsində zəruri olan yerlərdə suötürücü boruların tikintisi də aparılır. Bütün işlər “Azəravtoyol” ASC-nin rəhbərliyinin nəzarəti altında tərtib olunmuş qrafikə uyğun və yüksək keyfiyyətlə aparılır. Bunun üçün əraziyə lazımi sayda qüvvə cəlb olunub. Tikinti işləri bitdikdən sonra hərəkətin normal təşkili üçün zəruri olan yerlərdə yol nişanları quraşdırılacaq, yolun üfüqi nişanlama xətlərinin çəkilişi işləri aparılacaq. Qeyd edək ki, Çuxanlı-Gəncəli-Piratman-Parça Xələc-Seyidan avtomobil yolunun tikintisi 5 mindən çox əhalinin yaşadığı 5 yaşayış məntəqəsini birləşdirərək yük və sərnişin daşımasını xeyli yaxşılaşdıracaq, yetişdirilən məhsulların rahat şəkildə rayon mərkəzlərinə daşınmasına imkan yaranacaq.xeber100.com

“ASAN festival” keçirilib

Sentyabrın 17-də Masallı şəhərindəki “ASAN həyat” kompleksində Heydər Əliyev Mərkəzi, Təhsil Nazirliyi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə təşkilatçılığı ilə “ASAN festival” keçirilib. Azərtac xəbər verir ki, tədbirin keçirilməsində məqsəd gənclərin asudə vaxtlarının səmərəli keçirilməsi, onların intellektual inkişaf, savad və dünyagörüşlərinin artırılmasına kömək göstərməkdir. Qeyd olunub ki, “ASAN həyat” kompleksi təkcə xidmət obyekti deyil, eyni zamanda, gənclərin istirahət və mədəniyyət mərkəzidir. Diqqətə çatdırılıb ki, “ASAN həyat” kompleksi sentyabrın 20-də fəaliyyətə başlayacaq.xeber100.com

Vətəndaşların müraciətlərinə əsasən…

Azərbaycan Prezidenti İlham Əliyevin tapşırığına əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin həllinə köməklik göstərirlər. Azərtac xəbər verir ki, Dövlət Sərhəd Xidmətinin (DSX) rəisi – Sərhəd Qoşunlarının komandanı, general-polkovnik Elçin Quliyev sentyabrın 15-də Zaqatala Sərhəd Dəstəsində Balakən, Oğuz, Qax, Qəbələ, Şəki və Zaqatala rayonlarından olan vətəndaşları qəbul edib. Vətəndaşların müraciətləri əsasən, DSX-də işə qəbul, sərhədboyu rejimdə təsərrüfat işlərinin görülməsi, sosial müavinətlərin verilməsi, tibbi yardımın göstərilməsi, mənzil şəraitinin yaxşılaşdırılması, sərhədyanı yaşayış məntəqələrində mövcud olan sosial-məişət problemlərinin həlli və digər məsələlərlə bağlı olub. Qəbul zamanı vətəndaşlar tərəfindən qaldırılan məsələlər araşdırılıb və əksər məsələlər yerindəcə həllini tapıb. Digər müraciətlərin isə hərtərəfli öyrənilməsi və qanunvericiliyə uyğun həlli üçün Dövlət Sərhəd Xidmətinin müvafiq bölmələrinə konkret tapşırıqlar verilib.xeber100.com  

Səyyar xidmət davam edir

Daxili İşlər Nazirliyi Baş Pasport, Qeydiyyat və Miqrasiya İdarəsinin təşəbbüsü ilə Xaçmaz Rayon Polis Şöbəsinin qeydiyyat və şəxsiyyət vəsiqəsi bölməsinin əməkdaşları sentyabrın 26-na təyin edilmiş ümumxalq səsverməsindən öncə vətəndaşların şəxsiyyət vəsiqələri ilə təmin olunması məqsədilə rayon mərkəzindən uzaqda yerləşən yaşayış məntəqələrində səyyar xidmət göstərir. Azərtac xəbər verir ki, növbəti səyyar xidmət Nabran inzibati ərazi dairəsinə daxil olan 8 kəndin sakinləri üçün təşkil olunub. Yaşayış məntəqələrində yaşı 18-ə çatan, seçki hüququ olan vətəndaşların şəxsiyyət vəsiqələri ilə təmin olunması, eləcə də etibarlılıq müddəti bitən vəsiqələrin yeniləri ilə dəyişdirilməsi üçün müvafiq sənədlər qəbul edilib.xeber100.com  

Bu il xarici turistlərin sayında artım müşahidə olunur

Qədim Şəki dünya əhəmiyyətli tarixi-memarlıq abidələri, milli mətbəxi ilə ilin bütün fəsillərində yerli və xarici turistləri özünə cəlb edir. Yay aylarında, xüsusilə bayram günlərində Şəkiyə gələn turistlərin sayında xeyli artım müşahidə olunur. Builki Qurban bayramı günləri də istisna təşkil etməyib. Son günlər bu qədim şəhərin qonaqlarının sayı nəzərəçarpacaq dərəcədə artıb. “Yuxarı Baş” Dövlət Tarix-Memarlıq Qoruğunun direktoru Təranə Abdullayeva Azərtac-a bildirib ki, bayram günlərində Şəkiyə gələn turistlərin ən çox üz tutduqları tarixi məkanlardan biri qoruğun ərazisi olub. Bu da təsadüfi deyil. Burada yerləşən Azərbaycan memarlığının nadir incilərindən olan Şəki xanlarının sarayı, V-VI əsrlərə aid Dairəvi Məbəd, XVIII əsrə aid tarixi-memarlıq abidəsi “Yuxarı Karvansaray” mehmanxana kompleksi, muzeylər, “Sənətkarlar evi”, həmçinin sənətkarların əl işlərinin, milli suvenirlərin satıldığı xırda dükanlar turistlərin diqqətini daim cəlb edir. Qoruğun direktorunun bildirdiyinə görə, yay aylarında Şəkiyə 50 mindən çox turist gəlib. Bu il xarici turistlərin sayında nəzərəçarpacaq artım müşahidə olunur. Qurban bayramı günlərində Şəkinin qonaqları arasında yerli turistlərlə yanaşı, İrandan, ərəb ölkələrindən gələn turistlər üstünlük təşkil edib. Mədəniyyət və Turizm Nazirliyinin tədbirlər planı əsasında həyata keçirilən pilot-layihəyə uyğun olaraq, yay aylarında qoruğun ərazisində turistlər üçün gündəlik mədəni proqramlar təşkil edilib.xeber100.com