Qaçqınlara 2,6 milyard avro ayrılacaq

Almaniya hökuməti bu il qaçqınların ehtiyacını ödəmək uçun federal torpaqlara əlavə olaraq 2,6 milyard avro ayıracaq. İnterfax informasiya agentliyi xəbər verir ki, hökumət bu qərarı federal torpaqların ilin əvvəlindən avqust ayınadək qaçqınlara xərclədiyi real vəsaitin məbləği barədə hesabatından sonra qəbul edib. Berlin ayrılacaq vəsaiti adambaşına ayda 670 avrodan götürəcək. Almaniya 2016-cı ildə bu məqsədlə ümumilikdə 7 milyard avro xərcləməyi nəzərdə tutsa da, bu vəsait yetərli olmayıb. Sonuncu əlavə də nəzərə alınsa, mühacirlərə çəkilən xərclər 9,5 milyard avroya qədər artıb. Hökumətin fikrincə, bu qərar Almaniyanın dövlət borcunun artmasına səbəb olmayacaq. Belə ki, ölkə büdcəsində qaçqınlarla bağlı xərclərə görə 6,1 milyard avro ehtiyat vəsait nəzərdə tutulub.xeber100.com

TASS informasiya agentliyinin məlumatı…

Braziliyanın Rio-de-Janeyro ştatının sakinləri çox vaxt zirehli avtomobillərə üstünlük verir. Bu tendensiyaya yüksək cinayətkarlıq səviyyəsi və küçələrdə atışmaların sayının artması səbəb olub. TASS informasiya agentliyi xəbər verir ki, Braziliyanın zirehli avtomobillər üzrə mütəxəssislər assosiasiyasının məlumatına əsasən, son aylar bu cür nəqliyyat vasitələrinə tələbat 43 faiz artıb. Yanvar ayından avqustadək Rio-de Janeyro ştatında 1922 nəfər öz avtomobillərini zirehlə təmin etməyə qərar verib. Keçən ilin analoji dövründə isə bu xidmət növündən 1342 nəfər faydalanmışdı. Avtomobilin zirehlənməsi azı 42 min reala (13 min dollar) və daha baha qiymətə başa gəlir. Zirehli avtomobillər üzrə ixtisaslaşmış “MF4 Blindagem” kompaniyasının direktoru Rodriqu Pereyra hər dəfə növbəti səs-küylü cinayətdən sonra müştəri axınına şahid olduğunu qeyd edir. Yüksək cinayətkarlıq səviyyəsi Braziliyanın üzləşdiyi əsas problemlərdən biridir. “Braziliyanın ictimai təhlükəsizlik forumu” qeyri-hökumət təşkilatının məlumatına əsasən, Cənubi Amerikanın ən böyük dövlətində keçən il ümumilikdə 58 min nəfərdən çox insan zorakılığın qurbanı olub. Başqa sözlə desək, ölkədə cinayətkarlıq səbəbindən hər 9 dəqiqədə bir nəfər, sutka ərzində isə 160 nəfər həyatını itirir.xeber100.com

Kanada Milli Müdafiə Nazirliyinin bəyanatında deyilir…

2017-ci ilin əvvəlində NATO batalyonunun yerləşdiriləcəyi Latviyaya Kanada 455 hərbi qulluqçu, aviaqrup və Hərbi Donanma Qüvvələrinin gəmisini göndərəcək. Bu barədə Kanada Milli Müdafiə Nazirliyinin bəyanatında deyilir. Nazirliyin bəyanatında açıqlanır ki, quru qoşunları qrupuna komandanlıq zabitləri, motopiyada bölüyü, dəstək və nəqliyyat xidmətləri daxildir. Bundan başqa, Latviyada altı “CF-18” qırıcı-bombardımançıdan ibarət aviasiya qrupu yerləşdiriləcək, ölkənin dəniz akvatoriyasında isə Kanada Hərbi Dəniz Qüvvələrinin freqatı daimi döyüş növbəsində olacaq.xeber100.com

“Reuters” agentliyinin məlumatı…

İraq qoşunları Mosuldan 800 metr məsafədədir və bir neçə saatdan sonra şəhərə girə bilər. Bu barədə “Reuters” agentliyi ordu komandirlərindən birinə istinadla məlumat yayıb. Xatırladaq ki, iki ilə yaxındır İŞİD terror qruplaşmasının nəzarətində olan Mosula genişmiqyaslı hücum oktyabrın 17-dən başlayıb. Hərbi əməliyyatlar İraq hərbçiləri və polis qüvvələri, həmçinin kürd dəstələri tərəfindən ABŞ başda olmaqla beynəlxalq koalisiya aviasiyasının dəstəyi ilə aparılır.İraqın hökumət qüvvələri qazanılmış nailiyyətləri möhkəmlətmək məqsədi daşıyan üçgünlük fasilədən sonra bazar ertəsi günü Mosul üzərinə hücumları bərpa edib.xeber100.com

Moldovada ilk dəfə birbaşa prezident seçkiləri keçirilib

Qeyd etdiyimiz kimi, oktyabrın 30-da Moldovada ilk dəfə birbaşa prezident seçkiləri keçirilib. Azərtac Moldova KİV-lərinə istinadla bildirir ki, Moldova Mərkəzi Seçki Komissiyası səsvermə bülletenlərinin 98 faizini işləyib. Məlum olub ki, İqor Dodon 48,72 faiz, Mayya Sandu isə 37,94 faiz səs toplayıb.xeber100.com

İqtisadi və Ticarət Sazişi imzalanıb

Avropa İttifaqı (Aİ) ilə Kanada arasında 7 il müzakirə edilən Əhatəli İqtisadi və Ticarət Sazişi (CETA) imzalanıb. Azərtac xəbər verir ki, sənədi Brüsseldə keçirilən Aİ-Kanada sammitində Avropa İttifaqı Şurasının prezidenti Donald Tusk, Avropa Komissiyasının başçısı Jan-Klod Yunker, Kanadanın Baş naziri Castin Trüdo və Avropa İttifaqına sədrlik edən Slovakiyanın Baş naziri Robert Fiko imzalayıb. Donald Tusk deyib: “CETA və Strateji Tərəfdaşlıq müqaviləsi imzaladıq və bununla qürur duyuram. Sərbəst ticarət və qloballaşma yüz milyonlarla insanı aclıq və yoxsulluqdan qoruyur. Sərbəst ticarətin müsbət təsirlərini insanlara dürüst və inandırıcı şəkildə izah etməliyik”. O bildirib k, saziş nəticəsində Kanada Bolqarıstan və Rumıniyaya tətbiq etdiyi vizanı 2017-ci ilin sonuna qədər ləğv edəcək. Avropa Komissiyasının başçısı Jan-Klod Yunker qeyd edib ki, Aİ və Kanada əhalisi üçün yeni bir dövr başlayır. CETA yarım milyarddan çox insana yeni fürsətlər təqdim edəcək.xeber100.com

7,1 bal gücündə zəlzələ baş verib

Oktyabrın 30-da yerli vaxtla saat 7:41-də (Bakı vaxtı ilə 10:41) İtaliyanın mərkəzi hissəsində güclü zəlzələ baş verib. “RİA Novosti” agentliyi xəbər verir ki, İtaliyanın yerli RAI TV kanalının məlumatına görə zəlzələnin maqnitudası 7,1 bal olub. Avropa Aralıq dənizi Seysmoloji Mərkəzinin saytında isə zəlzələnin ocağının 10 km dərinlikdə yerləşdiyi, yeraltı təkanların gücünün isə 6,6 bal olduğu qeyd olunur. Dağıntı və tələfat barədə hələlik məlumat verilmir.xeber100.com

Gürcüstan Mərkəzi Seçki Komissiyasının məlumatına görə…

Oktyabrın 30-da Gürcüstan parlamentinə keçirilən seçkilərin ikinci turu başa çatıb. Gürcüstan Mərkəzi Seçki Komissiyasının məlumatına görə, səsvermə sakit şəraitdə keçib və ciddi qanun pozuntusu qeydə alınmayıb. İkinci turda 100 namizəd deputat mandatı uğrunda mübarizə aparıb. Artıq səslərin hesablanmasına başlanılıb və səsvermənin ilkin nəticələri bir neçə saatdan sonra məlum olacaq.xeber100.com

Prezident postu uğrunda 9 namizəd mübarizə aparır

Bu gün Moldovada prezident seçkiləri keçirilir  “lemonde.fr” saytı bildirir ki, bu, Moldovada 1997-ci ildən bəri ümumxalq səsverməsi ilə keçirilən ilk prezident seçkilərdir. Bundan əvvəl prezident parlament tərəfindən seçilirdi. Prezident postu uğrunda 9 namizəd mübarizə aparır. Əsas mübarizə Rusiya ilə yaxınlaşma və Avropaya inteqrasiya tərəfdarları arasında gedir. Rusiya ilə yaxınlaşma tərəfdarı olan namizədlərdən sosialist İqor Dodon və Avropaya inteqrasiya tərəfdarı olan Fəaliyyət və Həmrəylik Partiyasının lideri Mayya Sandu əsas favoritlərdən hesab edilir.xeber100.com

“Apple” korporasiyası təqdim edir

ABŞ-ın “Apple” korporasiyası Kaliforniya ştatının Kupertino şəhərində ikinci payız təqdimatını keçirərək. yenilənmiş “MacBook Pro” noutbuklarını ictimaiyyətə təqdim edib. Yenilənmiş “MacBook Pro” noutbukları 13 və 15 düymlük displeylərlə təchiz edilib. Cihazların korpusu alüminium materialından hazırlanıb, qurğular daha nazik və yüngül olub. On üç düymlük noutbuk modelinin qalınlığı 14.9 millimetr təşkil edir, halbuki əvvəlki nəsil modelin qalınlığı 18 millimetr idi. Bundan başqa, noutbukun ölçüsü 23 faiz, çəkisi isə 200 qram azalıb. İndi 13 düymlük leptopun çəkisi 1,35 kiloqramdır. On beş düymlük “MacBook Pro” noutbuk modelinin qalınlığı isə indi 15 millimetrdir. Bu noutbukun ölçüsü 20 faiz, çəkisi isə 200 qram azalaraq 1,8 kiloqram təşkil edir. “newsru.ru” saytı xəbər verir ki, noutbukların ekranı 67 faiz daha parlaq və daha kontrast olub və 25 faiz daha çox rəng əks etdirir. Həmçinin şirkətin rəsmiləri bildiriblər ki, displeylərin enerji sərfiyyatını 30 faiz azaltmağa da nail olublar. Yeni 13 düymlük modelin qiyməti 1499 dollardan başlayacaq, 15 düymlük “MacBook Pro” modelinin qiyməti isə 2399 dollar təşkil edəcək.xeber100.com