“Sumqayıt” futbol klubu növbəti futbolçunun keçidini reallaşdırıb

2020/2021 mövsümü üçün transfer çalışmalarını davam etdirən “Sumqayıt” futbol klubu növbəti futbolçunun keçidini reallaşdırıb.Azərtac xəbər verir ki, komanda son mövsümü Portuqaliyanın “Uniao Leyria” klubunda keçirmiş Hüseyn Cəfərovu heyətinə qatıb. 3 illik müqaviləyə imza atan 19 yaşlı gənc yarımmüdafiəçi komandada 15 nömrəli formada çıxış edəcək.xeber100.com

Portuqaliya millisi İsveç seçməsini 2:0 hesabı ilə məğlub edib

Sentyabrın 8-də futbol üzrə UEFA Millətlər Liqasının 2020-2021-ci illər mövsümünün ikinci turu çərçivəsində Portuqaliya millisi səfərdə İsveç seçməsini 2:0 hesabı ilə məğlub edib.Azərtac xəbər verir ki, oyunda hər iki qolun müəllifi olan Kriştiano Ronaldo milli komandanın heyətində 100-cü qolunu vurub.Bu nəticəyə əsasən Ronaldo milli komandaların heyətində ən çox qol vuran (109 qol) iranlı Əli Daei arasında fərqi azaldıb.xeber100.com

Azərbaycan Güləş Federasiyasının məlumatına görə…

Sentyabrın 8-də yeniyetmələr, gənclər və böyüklərdən ibarət qadın güləşçilərimiz çimərlik güləşi üzrə məşqlərə start veriblər.Azərtac Azərbaycan Güləş Federasiyasına istinadla xəbər verir ki, güləşin bu növü üzrə məşqlərin həftədə iki dəfə keçirilməsi nəzərdə tutulub. Çimərlik güləşi üzrə dünya çempionu Oyan Nəzəriani hazırlıq prosesində qadın güləşçiləri qaydalarla tanış edib. Daha sonra müxtəlif çəkilər üzrə sınaq xarakterli görüşlər keçirilib. Qarşılaşmalar maraqlı və gərgin idman mübarizəsi şəraitində keçib.Azərbaycan Güləş Federasiyası çimərlik güləşinin inkişafı üçün müxtəlif addımlar atır. Bunlardan biri də payız, qış və yaz aylarında məşq edə bilmək üçün qapalı məkanın istifadəyə verilməsidir. Artıq Olimpiya Güləş Mərkəzinin ərazisində çimərlik güləşi üzrə zal tam hazır vəziyyətə gətirilib. Dünya Güləş Birliyinin tətbiq etdiyi standartlara uyğun olaraq hazırlanan və yüksək keyfiyyətli qumla təchiz olunmuş çimərlik güləşi zalı karantin başa çatdıqdan sonra güləşçilərin ixtiyarına veriləcək.xeber100.com

UEFA Millətlər Liqası 2020-2021-ci illər mövsümündə

Sentyabrın 8-də futbol üzrə UEFA Millətlər Liqasının 2020-2021-ci illər mövsümünün ikinci turuna yekun vurulub.Azərtac xəbər verir ki, turun sonuncu oyun günündə A, C və D liqalarında ümumilikdə 9 qarşılaşma baş tutub.C liqasının 1-ci qrupunda yer alan Azərbaycan millisi səfərdə Kipr seçməsinin qonağı olub. Millimiz Nikosiyada Kipr komandasını minimal hesabla məğlub edib - 1:0. Oyunda yeganə qolun müəllifi 29-cu dəqiqədə kapitan Maksim Medvedev olub.Azərbaycan millisi növbəti oyununu Monteneqro yığmasına qarşı keçirəcək. Görüş oktyabrın 10-da baş tutacaq.Azərbaycan millisinin yer aldığı qrupun digər görüşündə Lüksemburq öz meydanında Monteneqro seçməsinə son dəqiqələrdə (90-cı) buraxdığı qolla məğlub olub.Günün ən maraqlı görüşü “Stad de Frans” stadionunda baş tutub. Sonuncu dünya çempionatının finalçıları Fransa və Xorvatiya yığmaları üz-üzə gəlib. Məhsuldarlığı ilə seçilən görüşdə fransızlar güclü olub - 4:2. Fransa millisinin heyətində Antuan Qrizman, Dominik Luvakoviç (avtoqol), Dayo Upamkano, Olivye Giru, Xorvatina seçməsinin isə Deyan Lovren və Yosip Brekalo fərqləniblər.Turun digər qarşılaşmalarında aşağıdakı hesablar qeydə alınıb: A liqası (3-cü qrup) İsveç – Portuqaliya - 0:2. A liqası (2-ci qrup) Belçika — İslandiya - 5:1; Danimarka — İngiltərə - 0:0. C liqası (2-ci qrup) Gürcüstan – Şimali Makedoniya - 1:1; Ermənistan – Estoniya - 2:0. D liqası (2-ci qrup) San-Marino – Lixtenşteyn - 0:2.xeber100.com

“Qəbələ” futbol klubu heyətini yeni müdafiəçi ilə gücləndirib

Futbol üzrə Azərbaycan Premyer Liqasının növbəti turuna hazırlıqları davam etdirən “Qəbələ” klubu heyətini yeni müdafiəçi ilə gücləndirib.Azərtac klubun saytına istinadla xəbər verir ki, “qırmızı-qaralar” xorvatiyalı Vinko Medimoreçin transferini gerçəkləşdirib. İyirmi altı yaşlı legionerlə bir il müddətinə müqavilə imzalanıb.Qeyd edək ki, peşəkar karyerasına ölkəsinin “Koprivinitsa” klubunda başlayan müdafiəçi 2014-2015-ci illər mövsümündə bu komandada çıxış edib. 2015-ci ildə “Slaven”ə keçən Vinko son 5 mövsümdə yüksək dəstə təmsilçisinin formasını geyinib. O, “Slaven”in heyətində 98 oyunda 4 qol vurub.Futbolçu 2015-2016-cı illər mövsümündə Xorvatiya kubokunun finalçısı olub.xeber100.com

Kikboksinq Federasiyasının idarə heyətinin onlayn iclası keçirilib

Azərbaycan Kikboksinq Federasiyasının idarə heyətinin onlayn iclası keçirilib.Azərtac xəbər verir ki, iclasda Orxan Əliyev qurumun yeni prezidenti seçilib. Federasiyanın əvvəlki prezidenti, Milli Məclisin vitse-spikeri Adil Əliyev isə qurumun fəxri sədri seçilib.Adil Əliyev yeni prezidentə inandığını bildirib və ona gələcək fəaliyyətində uğurlar arzulayıb.Orxan Əliyev isə göstərilən etimada görə təşəkkürünü bildirib və bu etimadı doğruldacağına söz verib: “Azərbaycan Kikboksinq Federasiyasının prezidenti seçilmək mənim üçün qürurvericidir. Mənə göstərilən etimadı doğrultmağa, federasiyanı daha da irəli aparmağa çalışacağam. Azərbaycan Kikboksinq Federasiyası ölkədə idmanın inkişafına töhfə verməyə davam edəcək”.Qeyd edək ki, O.Əliyev 1981-ci ildə anadan olub. O, 2002-ci ildə Bakı Dövlət Universitetinin Tarix fakültəsini bitirib və özəl sektorda uğurlu fəaliyyət göstərib. Müxtəlif beynəlxalq biznes forumları və konfranslarda Azərbaycanı təmsil edən O.Əliyev beynəlxalq idman yarışlarının təşkilatçısı və sponsoru olub. Azərbaycan, ingilis, türk və rus dillərini bilir.xeber100.com

“Qalatasaray” futbol klubu heyətinə yeni yarımmüdafiəçi cəlb edib

İstanbulun “Qalatasaray” futbol klubu heyətinə yeni yarımmüdafiəçi cəlb edib.Türkiyə mətbuatı xəbər verir ki, Super Liqa komandası İngiltərənin “Stok Siti” klubunun yarımmüdafiəçisi Oqenekaro Peter Etobonu heyətinə qatıb.Nigeriya millisinin yarımmüdafiəçisi “Qalatasaray”da icarə əsasında çıxış edəcək. İstanbullular 25 yaşlı futbolçunu birdəfəlik transfer etmək hüququna malik olacaqlar.“Qalatasaray” tezliklə bu keçidi rəsmən bəyan etməyə hazırlaşır.Qeyd edək ki, sentyabrın 17-də “Qalatasaray” UEFA Avropa Liqasının ikinci təsnifat mərhələsində “Bakcell Arena”da Bakının “Neftçi” komandası ilə qarşılaşacaq. Matç saat 20:00-da başlayacaq.xeber100.com

“İnter” klubunun müdafiəçisi karyerasını “Renn”də davam etdirə bilər

İtaliyanın “İnter” klubunun müdafiəçisi Dieqo Qodin karyerasını “Renn”də davam etdirə bilər.İtaliya mətbuatı xəbər verir ki, bu mövsüm Liqa 1-də yüksək yerlər uğrunda mübarizə aparan Fransa təmsilçisi artıq uruqvaylı futbolçunun agenti ilə danışıqlara başlayıb.Qodinin Milan klubu ilə müqavilə müddəti isə 2022-ci ildə başa çatacaq. Ötən mövsüm A seriyasında 23 oyun keçirən 34 yaşlı müdafiəçi 1 qol və 1 məhsuldar ötürmə ilə yadda qalıb.xeber100.com

“Barselona” futbol klubu yeni formasını təqdim edib

İspaniyanın “Barselona” futbol klubu yeni formasını təqdim edib.Azərtac klubun saytına istinadla xəbər verir ki, bir müddətdir Kataloniya təmsilçisinin rəhbərliyi ilə arasında problem yaşanan komandanın kapitanı Lionel Messi də təqdimatda iştirak edib. O, üçüncü formanı təqdim edib.Otuz üç yaşlı argentinalı hücumçu bir neçə gün əvvəl “Barselona”dan ayrılmaq istədiyini, ancaq klubunu məhkəməyə verməmək üçün fikrini dəyişdiyini açıqlayıb.Qeyd edək ki, Messi ötən mövsüm Kataloniya təmsilçisinin heyətində keçirdiyi 44 matçda 31 qolun müəllifi olub.xeber100.com

Futbol üzrə UEFA Millətlər Liqasının növbəti oyunları keçirilib

Futbol üzrə UEFA Millətlər Liqasının 2020-2021-ci illər mövsümünün ikinci turunun növbəti oyunları keçirilib.Azərtac xəbər verir ki, turun ikinci oyun günündə A, B və C liqalarında ümumilikdə 8 qarşılaşma baş tutub.Turun mərkəzi qarşılaşması “Yoxan Kroyff Arena”da stadionunda olub. Niderland millisi öz meydanında İtaliya seçməsini qəbul edib. Görüş italyanlıların 1:0 hesablı qələbəsi ilə başa çatıb. Oyunda yeganə qol matçın 45-ci dəqiqəsində vurulub. Ciro İmmobilenin cinah ötürməsini Nikolo Barella dəqiq baş zərbəsi ilə tamamlayıb.Birinci turda Niderland millisi Polşa komandasını (1:0) məğlub edib. İtaliya seçməsi isə ev oyununda Bosniya və Herseqovina millisi ilə heç-heçə edib – 1:1.Günün digər görüşlərində aşağıdakı hesablar qeydə alınıb: A liqası (1-ci qrup) Bosniya və Herseqovina – Polşa - 1:2. B liqası (1-ci qrup) Avstriya – Rumıniya - 2:3; Şimali İrlandiya – Norveç - 1:5. B liqası (2-ci qrup) Çexiya – Şotlandiya - 1:2; İsrail – Slovakiya - 1:1. C liqası (4-cü qrup) Qazaxıstan – Belarus - 1:2; Albaniya – Litva - 0:1. Qeyd edək ki, Azərbaycan millisi sentyabrın 8-də səfərdə Kipr seçməsinin qonağı olacaq. Yığma komandamız birinci turda Bakıda Lüksemburq yığmasına məğlub olub (1:2). Kipr isə səfərdə Monteneqro seçməsinə uduzub – 0:2.xeber100.com