Ukrayna Ermənistanın işğalçılıq siyasətini pisləyib

Ukraynanın İctimai Televiziyasında Ermənistanın saxta təbliğatı ifşa olunub və işğalçılıq siyasəti pislənilib.Azərtac xəbər verir ki, Azərbaycanın Ukraynadakı səfiri Elmira Axundova bu telekanala müsahibəsində Ermənistanın yaydığı feyk xəbərlərə toxunaraq, Ermənistanın bu ölkədəki səfiri Tiqran Seyranyanın yalanlarını üzə çıxarıb.Azərbaycanın Ermənistanın işğalçılıq siyasətinə qarşı mübarizəyə başladığını deyən E.Axundova qeyd edib: “Azərbaycan Ermənistanın işğalçılıq siyasətinə, təhqirinə, təxribatına 30 il dözdü. Daha dözmək fikrimiz yoxdur, Azərbaycan əsgəri öz torpaqlarının bütövlüyü uğrunda vuruşur, şəhid olur. Azərbaycan Ordusunun guya Ermənistan ərazisini vurması barədə yayılan xəbərlər tamamilə yanlışdır. Bizim başqa ölkənin ərazisində gözümüz yoxdur, Azərbaycan mübarizəsini işğal altında olan ərazilərində aparır”.Guya Türkiyənin “F-16” təyyarəsinin Ermənistanın “Su-25” təyyarəsini vurması barədə erməni səfirinin iddialarını təkzib edən Elmira Axundova bildirib ki, müasir texnika dövründə “F-16”ların səmada uçuş aparmasını aşkarlamaq çox asandır.“Əgər bununla bağlı fakt yoxdursa, necə yalan söyləmək olar? Ermənistan pilotları gecə uçuşları həyata keçirə bilmirlər. “Su-25” təyyarəsi duman şəraitində öz dağlarına çırpılaraq qəzaya uğrayıb. Türkiyənin Azərbaycan ərazisində hərbi əməliyyatlarda iştirakına dair heç bir dəlil və ya fakt yoxdur. Əgər varsa, göstərsinlər. Ancaq Azərbaycan Livan terrorçularının işğal olunmuş ərazilərdə döyüşməsinə dair kifayət qədər fakt ortaya çıxarıb”, - deyə səfir vurğulayıb.xeber100.com  

Oktyabr 3, 2020 7:06

Xarici İşlər Nazirliyinin açıqlamasına əsasən…

Azərbaycan Ordusunun Ermənistan silahlı qüvvələrinin Azərbaycana qarşı hərbi təcavüzünün qarşısının alınması və təmas xətti boyunca sıx məskunlaşmış mülki vətəndaşlarının təhlükəsizliyinin təmin edilməsi məqsədilə həyata keçirdiyi cavab tədbirləri çərçivəsində Ermənistan öz silahlı qüvvələrinin məruz qaldığı ciddi itkiləri kompensasiya etmək niyyəti ilə xarici ölkələrdə yaşayan erməni mənşəli diaspora üzvlərini müvəqqəti işğal altındakı Azərbaycan ərazilərində qanunsuz yerləşdirilmiş hərbi birləşmələrinə cəlb etmək üçün addımlar atır.Azərtac xəbər verir ki, bu fikirlər Azərbaycan Respublikası Xarici İşlər Nazirliyinin Mətbuat xidməti idarəsinin açıqlamasında yer alıb.Açıqlamada deyilir: “Azərbaycan tərəfində olan məlumatlara, o cümlədən açıq informasiya mənbələrində yer alan xəbərlərə görə Suriya, Livan, Rusiya, Gürcüstan, Yunanıstan, Birləşmiş Ərəb Əmirlikləri və digər ölkələrin vətəndaşları olan minlərlə erməni mənşəli şəxsin döyüşlərdə iştirak üçün işğal edilmiş ərazilərimizə gəldiyi və ya gəlməyə hazırlaşdığı bildirilir.Nazirlik xatırladır ki, BMT Təhlükəsizlik Şurasının (TŞ) 2178 (2014) saylı qətnaməsinə əsasən “yaşadıqları və ya vətəndaşlıq mənsubiyyəti olan ölkələri tərk edərək terror əməlləri törətmək, planlaşdırmaq, buna hazırlıq və ya həmin əməllərdə iştirak etmək və ya silahlı münaqişələrlə əlaqəli vəziyyətlər də daxil olmaqla terrorçuluq təlimi keçmək və ya almaq məqsədilə digər ölkə ərazisinə səfər edən şəxslər” “əcnəbi terrorçu döyüşçülər” olaraq müəyyən edilir.BMT Nizamnaməsinə əsasən, icrası məcburi xarakter daşıyan yuxarıda istinad edilən qətnamənin və BMT Təhlükəsizlik Şurasının 2396 (2017) saylı qətnaməsinin müvafiq operativ bəndlərinə görə, BMT-nin üzvü dövlətlər başqa ölkələrdə davam edən silahlı münaqişələrdə iştirak məqsədilə ərazilərini tərk edən vətəndaşlarına və ya ölkəsində qanuni əsasda yaşayan digər şəxslərin sərhədkeçmələrinin qarşısını almalı və onlara münasibətdə cinayət qanunvericiliyinə uyğun olaraq müvafiq cəza tədbirləri görməlidirlər.Azərbaycan tərəfi həm ikitərəfli, həm də müvafiq beynəlxalq mexanizmlər çərçivəsində hüquqlarından istifadə etməklə beynəlxalq səviyyədə tanınmış ərazilərində və özünün mülki əhalisinə qarşı terror fəaliyyətinin təşkili və maliyyələşdirilməsinin qarşısının alınması və günahkarların ədalət mühakiməsinə verilməsi üçün bütün addımlar atmaqda qətiyyətlidir”.xeber100.com

Oktyabr 3, 2020 7:00

Polşada yaşayan azərbaycanlılar bəyanatla çıxış ediblər

Polşada yaşayan soydaşlarımız Ermənistan silahlı qüvvələrinin sentyabrın 27-si səhər saat 6-da Azərbaycan Ordusunun mövqelərini iriçaplı artilleriya qurğularından atəşə tutulması nəticəsində bölgədə vəziyyətin gərginləşməsi ilə əlaqədar bəyanatla çıxış ediblər.Diasporla İş üzrə Dövlət Komitəsindən Azərtac-a bildiriblər ki, Polşa Azərbaycan Evi və Polşa Azərbaycanlıları Assosiasiyası adından yayılan bəyanat bu ölkənin dövlət strukturlarına, beynəlxalq təşkilatlarının Varşavadakı nümayəndəliklərinə və yerli ictimaiyyətə ünvanlanıb. Bəyanatda deyilir ki, Ermənistanın işğal etdiyi Azərbaycan torpaqlarında cəbhəboyu yaşayış məntəqələrini atəşə tutması, uşaqlar da daxil olmaqla xeyli sayda dinc sakinin ölməsi və yaralanması, fərdi yaşayış evlərinin dağılması, inzibati binaların ciddi zərər görməsi ilə nəticələnib.Bəyanatda vurğulanır ki, Ermənistan tərəfinin beynəlxalq sənədlərdən irəli gələn öhdəlikləri yerinə yetirməyərək, “Müharibə zamanı mülki əhalinin müdafiəsi” haqqında Cenevrə Konvensiyasının, BMT-nin Uşaq Hüquqları Konvensiyasının, ümumilikdə insan hüquqları sahəsində digər mühüm sənədlərin müvafiq müddəalarını yerinə yetirməməsi növbəti dəfə beynəlxalq humanitar hüququn norma və prinsiplərini kobudcasına pozduğunu və müharibə cinayətlərini davam etdirdiyini sübuta yetirir.Bundan əlavə, qeyd edilir ki, BMT Təhlükəsizlik Şurasının “Azərbaycanın işğal olunmuş ərazilərindəki vəziyyətə dair” müvafiq qətnamələrinin qəbulundan təxminən 30 il ötməsinə baxmayaraq, bu sənədlər hələ də icra olunmayıb.Polşada yaşayan soydaşlarımız və Azərbaycanın diaspor təşkilatları dünya birliyini Ermənistan dövlətinə təcavüzkar siyasətini dayandırması və Azərbaycan işğal edilmiş ərazilərindən dərhal çıxması, Ermənistan hökumətinin beynəlxalq hüquq və normalara riayət etməsi üçün təsir göstərməyə çağırıblar.xeber100.com

Oktyabr 3, 2020 6:57

İsveçrədə Ermənistanın son hərbi təxribatları ilə bağlı çağırışlar edilib

Ermənistanın müharibə cinayətlərinin və ölkəmizə qarşı apardığı xain hücum siyasətinin ifşa edilməsi istiqamətində İsveçrə Xarici İşlər Nazirliyinə, İsveçrə parlamentinə, o cümlədən parlamentin Yuxarı Palatasının (Senat) Prezidenti Hans Stökliyə, Aşağı Palatasının (Konqresin) Prezidenti İzabel Moreyə, İsveçrə-Azərbaycan Parlamentlərarası Dostluq Qrupunun sədri, İsveçrə Parlamentinin Aşağı Palatasının üzvü, habelə Montrö şəhərini meri, tanınmış siyasətçi Loran Verliyə, İsveçrə Konfederasiyasının 26 kantonunun hökumət başçılarına (prezidentlərinə) Azərbaycan Respublikasının bu ölkədəki səfiri Xanım İbrahimova tərəfindən silsilə müraciətlər olunub, görüşlər keçirilərək İsveçrənin rəsmi olaraq Azərbaycanın ərazi bütövlüyünü, suverenliyini tanıdığını nəzərə almaqla Ermənistanın işğalçı siyasətinin və hərbi təcavüzünün qınanılması çağırışı edilib.Azərtac xəbər verir ki, müraciətlərdə Sovet İttifaqının dağılması ərəfəsində Dağlıq Qarabağda və Ermənistanda baş qaldırmış millətçi qüvvələrin Azərbaycana qarşı təcavüzə başladığı, hərbi təcavüz nəticəsində torpaqlarımızın təxminən 20 faizinin, o cümlədən Dağlıq Qarabağın və ətraf 7 rayonun işğal olunduğu qeyd edilib. Bu ərazilərdə Azərbaycan xalqına qarşı soyqırımı törədilib, bizim bütün tarixi abidələrimiz, qəbirlər, eləcə də məscidlər ermənilər tərəfindən dağıdılıb. Münaqişə ilə bağlı BMT Təhlükəsizlik Şurası 4 qətnamə qəbul edib və bu qətnamələrdə erməni silahlı qüvvələrinin bizim torpaqlarımızdan çıxarılması haqqında açıq-aydın müddəalar var. Digər beynəlxalq təşkilatlar – Qoşulmama Hərəkatı, İslam Əməkdaşlıq Təşkilatı, Avropa Parlamenti, Avropa Şurası və başqa təşkilatlar oxşar qərar və qətnamələr qəbul ediblər. Ermənistan bu qətnamələrə və qərarlara məhəl qoymur. Təəssüf ki, həmin sənədlər yerinə yetirilməyib və kağız üzərində qalıb. Müraciətlərdə, həmçinin Ermənistanın yuxarıda qeyd edilən beynəlxalq təşkilatların tələblərinə məhəl qoymamasının növbəti bariz nümunəsi kimi bu il sentyabrın 27-dən bu işğalçı dövlətin Azərbaycana qarşı başlatdığı məkrli və xain hərbi təcavüzü qeyd edilib.Bildirilib ki, yaranmış vəziyyətə və hadisələrin sonrakı inkişafına görə tam məsuliyyət Ermənistanın siyasi-hərbi rəhbərliyinin üzərinə düşür.xeber100.com

Oktyabr 3, 2020 6:55

Malayziya parlamenti Ermənistanın hərbi təxribatlarını pisləyib

Malayziya parlamentinin Nümayəndələr Palatasında Malayziya-Azərbaycan Parlamentlərarası dostluq qrupu tərəfindən Ermənistanın ölkəmizə qarşı davam edən hərbi təxribatlarını kəskin şəkildə pisləyən bəyanat yayılıb.Azərtac xəbər verir ki, sənəd dostluq qrupunun sədri Datuk Rosman Bin Datuk Haji İsli tərəfindən oktyabrın 1-də imzalanaraq Azərbaycanın Malayziyadakı səfirliyinə göndərilib.Bəyanatın mətnində deyilir: “Biz - Malayziya Parlamentində Malayziya–Azərbaycan dostluq qrupunun üzvləri sentyabrın 27-də Ermənistan silahlı qüvvələri tərəfindən Azərbaycana qarşı başlamış hücumları pisləyirik. Biz təcili olaraq Ermənistan hökumətinə çağırış edirik ki, beynəlxalq hüququn əsas qanunlarını, eləcə də beynəlxalq humanitar sənədlərdən irəli gələn fundamental tələbləri pozan hər bir cəhdini dayandırsın”.Sənəddə qeyd edilir ki, Ermənistan hökuməti gücdən istifadəyə etmədən, eləcə də diplomatik səyləri artıraraq Azərbaycanla münaqişənin sülh yolu ilə nizamlanmasına nail olmaq üçün ən qısa zamanda konstruktiv danışıqlara başlamalıdır.Bəyanatda, həmçinin deyilir: “Bizim dostluq qrupumuzun bütün üzvləri dərin təəssüf hissi keçirirlər ki, Ermənistanın yuxarıda qeyd olunan hücumları təkcə Cənubi Qafqazda sülh və rifaha qarşı deyil, eyni zamanda, bu il iyulun 23-də Malayziyanın BMT-yə üzv dövlətlərdən 171-nin səsini toplayaraq, beynəlxalq əməkdaşlığı və qarşılıqlı etimadı nəzərdə tutan “COVID-19 Pandemiyası dövründə Qlobal Atəşkəs üçün BMT Baş katibinin Müraciətinə Dəstək Bəyanatı” təşəbbüsünü də sarsıdıb”.Bəyanatın sonunda münaqişə nəticəsində həyatını itirən şəxslərin ailələrinə başsağlığı verilib, yaralananlara şəfa arzulanıb.Xatırladaq ki, sentyabrın 29-da Malayziya Xarici İşlər Nazirliyi Azərbaycanın ərazi bütövlüyünü dəstəkləyən bəyanatla çıxış edib.xeber100.com

Oktyabr 1, 2020 12:26