İşə qəbul üzrə müsabiqə elan edilib

Bakı Şəhəri üzrə Təhsil İdarəsinin (BŞTİ) tabeliyində fəaliyyət göstərən ümumtəhsil müəssisələrində təlim-tərbiyə işləri üzrə direktor müavini, tərbiyə işləri üzrə direktor müavini (təşkilatçı), psixoloq və kitabxanaçı vəzifələrinə işə qəbul üzrə müsabiqə elan edilib.BŞTİ-dən Azərtac-a bildiriblər ki, təhsil nazirinin müvafiq əmri ilə təsdiq edilmiş “Azərbaycan Respublikası Təhsil Nazirliyi sisteminə daxil olan ümumtəhsil müəssisələrində və peşə liseylərində müəllimlərə tələbatın müəyyənləşdirilməsi, pedaqoji kadrların işə qəbulu və yerdəyişməsi Qaydaları”na əsasən, müvafiq kadrların işə qəbulu və yerdəyişməsi tabelik üzrə təhsili idarəetmə orqanının müəyyən etdiyi qaydada həyata keçirilir.xeber100.com

“GulfNews” nəşrinin məlumatına görə…

Birləşmiş Ərəb Əmirlikləri (BƏƏ) 71-ci Beynəlxalq Astronavtika Konqresinə (BAK) ev sahibliyi etmək hüququ qazanıb. “GulfNews” nəşrinin verdiyi məlumata görə, Konqres 2020-ci ildə Dubayda keçiriləcək.Azərtac xəbər verir ki, BƏƏ ərəb və islam dünyasında belə bir konqresin keçiriləcəyi ilk ölkə olacaq. Məlumatda bildirilir ki, BƏƏ-nin vəliəhd şahzadəsi və Silahlı Qüvvələrin Ali Baş Komandanının müavini şeyx Məhəmməd bin Zayed Al Nəhyan özünün Тwitter səhifəsində bildirib ki, belə bir tədbirin BƏƏ-də keçirilməsi dünyada bu ölkənin potensialına etimad göstərilməsinə daha bir sübutdur. Milli səviyyədə uzlaşdırılmış səylərin nəticəsi olan bu nailiyyət BƏƏ sakinlərinin qürur hissi keçirməsinə əsas verir.xeber100.com

Hazırlıq kursları təşkil olunacaq

Dövlət İmtahan Mərkəzi (DİM) yeni təhsil proqramı (kurikulum) əsasında qiymətləndirmə vasitələrinin işlənməsi və onların meyarlar əsasında yoxlanılmasına dair hazırlıq kursları təşkil edir.Oktyabrın 18-dən başlanacaq ikiaylıq kurslarda iştirak etmək istəyənlər üçün qeydiyyat oktyabrın 16-da saat 23:59-da başa çatacaq. Həmin tarixdən sonra qeydiyyatdan keçənlər 2018-ci il yanvarın 9-da başlanacaq kurslarda iştirak edəcəklər.Xatırladaq ki, kurslarda yalnız Azərbaycan dili, rus dili, riyaziyyat, kimya, fizika, biologiya və coğrafiya fənləri üzrə yeni proqramlar (kurikulum) haqqında məlumatlı olan, ixtisası müvafiq fənlərə uyğun olan müəllimlər, metodistlər, pedaqojiyönümlü ali təhsil müəssisələrinin bakalavriat səviyyəsinin müvafiq fənn üzrə təhsil alan axırıncı kurs tələbələri və həmin müəssisələrdə təhsil alan magistrlər iştirak edə bilərlər. Kursda iştirak etmək istəyən şəxs ixtisasına uyğun fəndən qeydiyyatdan keçə bilər. Bir neçə fənn üzrə qeydiyyatdan keçənlərin yalnız müvafiq fənn üzrə qeydiyyatı nəzərə alınacaq.xeber100.com

XI Azərbaycan beynəlxalq təhsil sərgisi keçiriləcək

Oktyabrın 6-dan 8-dək Bakı Ekspo Mərkəzində Təhsil Nazirliyinin rəsmi dəstəyi ilə XI Azərbaycan beynəlxalq təhsil (“Education 2017”) sərgisi keçiriləcək.Nazirlikdən Azərtac-a bildiriblər ki, sərgi “İnsan kapitalı sərvətimizdir” devizi altında təşkil ediləcək. Tədbirdə son illər Təhsil Nazirliyi tərəfindən həyata keçirilən yeni layihələr və mövcud təhsil imkanları təqdim olunacaq. Ötən illərlə müqayisədə Təhsil Nazirliyinin stendləri bu il daha geniş sahəni əhatə edəcək. Ümumilikdə, sərgi çərçivəsində iştirakçılara bakalavriat, magistratura, o cümlədən xarici dil kursları, təcrübə və təlimlər üzrə proqramlar təqdim ediləcək. İştirakçılar bilavasitə sərgidə aparıcı ali təhsil müəssisələrinin nümayəndələri ilə ünsiyyət quraraq qəbul prosesi, təhsil haqqı və digər məsələlərlə bağlı onları maraqlandıran suallara cavab almaq imkanı əldə edəcəklər.Sərgi haqqında ətraflı məlumatı, eləcə də elektron dəvətnaməni www.eduexpo.az saytından əldə etmək mümkündür. Tədbirin baş sponsoru respublika fənn olimpiadalarının təşkilinə və “Azərbaycan üçün öyrət” proqramının həyata keçirilməsinə dəstək göstərən “Kapital Bank”dır. Həmçinin Azərbaycanda İxracın və İnvestisiyaların Təşviqi Fondu və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası sərginin reallaşmasına dəstək göstərəcək. Tədbirin təşkilatçısı isə “Caspian Event Organisers (CEO)” şirkətidir.xeber100.com

Dövlət İmtahan Mərkəzi TOEFL imtahanı keçirib

Sentyabrın 30-da Dövlət İmtahan Mərkəzi (DİM) növbəti TOEFL imtahanı keçirib.DİM-dən Azərtac-a bildiriblər ki, imtahan bu qurumun inzibati binasında təlimata uyğun təşkil olunub. İmtahanın gedişi zamanı iştirakçılara bilik və bacarıqlarını nümayiş etdirmələri üçün zəruri şərait yaradılıb.Qeyd edək ki, növbəti TOEFL imtahanının oktyabrın 28-də keçirilməsi nəzərdə tutulur. Bu imtahanda iştirak etmək istəyənlərin qeydiyyatı artıq başlanıb və oktyabrın 23-dək davam edəcək.xeber100.com

“Danışıq klubu” fəaliyyətə başlayıb

İqtisad Universitetinin (UNEC) Beynəlxalq İqtisadiyyat Məktəbində birinci kurs tələbələri üçün ənənəvi “Danışıq klubu” fəaliyyətə başlayıb.UNEC-dən Azərtac-a bildirilib ki, “Mən UNEC tələbəsiyəm” mövzusuna həsr olunmuş ilk dərsdə birinci kurs tələbələri universitet haqqında ilk təəssüratlarını bölüşüblər. Müəllimlərindən söz açan tələbələr onları savadlı, işinə rəğbətlə yanaşan, fərqli düşüncə tərzinə malik yüksək intellekt sahibləri adlandırıblar.Əcnəbi tələbələrin də qatıldıqları “Danışıq klubu” birinci kurs tələbələrinin dil baryerinin qısa zamanda aradan qalxmasına və ingilis dili biliklərinin təkmilləşməsinə kömək edəcək. UNEC-in mübadilə proqramlarında fəallıq göstərən yuxarı kurs tələbələrinin təşkil etdikləri danışıq klubları hər həftənin şənbə günü keçiriləcək.xeber100.com

XVI Bakı yapon dili natiqlik müsabiqəsi təşkil olunub

Bakı Dövlət Universitetində (BDU) XVI Bakı yapon dili natiqlik müsabiqəsi təşkil olunub.Azərtac xəbər verir ki, müsabiqədə tələbələrlə yanaşı, orta məktəb şagirdləri də iştirak ediblər.Müsabiqə ilə əlaqədar keçirilən tədbirdə BDU-nun rektoru A.Məhərrəmov bildirib ki, universitetin təhsil sahəsində əməkdaşlıq etdiyi ölkələr arasında Yaponiya xüsusi əhəmiyyət daşıyır. Yapon dili və ədəbiyyatı Azərbaycanda ilk dəfə BDU-da tədris edilməyə başlayıb. Eləcə də BDU ilə Yaponiyanın Qunma Universiteti arasında tələbə mübadiləsi haqqında müqaviləyə əsasən 15 azərbaycanlı gənc bu ölkədə təcrübə keçib.Rektor universitetdə hazırda 100-dək tələbənin yapon dilində təhsil aldığını diqqətə çatdırıb.Vurğulanıb ki, Azərbaycanda yapon dilinin tədris olunduğu orta məktəblər də var.Müsabiqənin qalibləri növbəti yarışmaya qatılmaq üçün Rusiyanın paytaxtı Moskvaya, sonra isə Yaponiyaya səfər edəcəklər.xeber100.com

2018-2023-cü illər üzrə təqaüd proqramı elan edilib

Koreya Respublikası 2018-2023-cü illər üzrə təqaüd proqramı elan edib.Təhsil Nazirliyindən Azərtac-a bildiriblər ki, təhsil bakalavriat səviyyəsi üzrə aparılır. Təqaüd proqramı üçün 25 yaşadək gənclər (doğum tarixi 1993-cü il martın 1-dən sonra olanlar) müraciət edə bilərlər.Aylıq təqaüd, təhsil haqqı, dil kursu, yol xərci, sığorta xərci və s. xərclər Koreya tərəfdən ödənilir. Namizədlər sənədləri 2017-ci il oktyabrın 20-dək Koreya Respublikasının Bakıdakı səfirliyinə təqdim etməlidirlər.xeber100.com

Təhsil Nazirliyində brifinq keçirilib

Sentyabrın 28-də Təhsil Nazirliyində təhsildə inkişaf və innovasiyalar üzrə birinci qrant müsabiqəsinin yekunu ilə bağlı brifinq keçirilib.Azərtac xəbər verir ki, nazirliyin təhsilin inkişafı proqramları şöbəsinin müdiri Emin Əmrullayev müsabiqənin dövlət ümumi təhsil müəssisələri və bu qurumlarda çalışan pedaqoji işçilər üçün elan edildiyini xatırladıb. Bildirilib ki, müsabiqə çərçivəsində ümumi təhsil müəssisələri kateqoriyası üzrə 78, fərdi kateqoriya üzrə 213 layihə təklifi daxil olub. Təşkilat Komitəsi ekspert qrupunun rəyi əsasında ümumi təhsil müəssisələri kateqoriyası üzrə 37, fərdi kateqoriya üzrə 83 layihənin dəstəklənməsini məqsədəuyğun hesab edib. Barələrində müsbət qərar qəbul olunmuş 120 layihənin maliyyələşdirilməsi Təhsil Nazirliyi tərəfindən təsdiqlənib.xeber100.com

Milli Elmlər Akademiyası müsabiqə elan edir

Milli Elmlər Akademiyası (AMEA)Azərbaycan dilinin qloballaşma şəraitində zamanın tələblərinə uyğun istifadəsini təmin etmək, gənc alimlərdə ana dilinə sevgi və hörmət hissini artırmaq, yazıda və şifahi nitqdə ədəbi dilin normalarına ciddi əməl olunmasını təşviq etmək məqsədilə “Ana dilimiz – milli varlığımızdır” müsabiqəsi elan olunur.Müsabiqədə hazırda AMEA-da təhsil alan magistrant və doktorantlar iştirak edə bilərlər.xeber100.com