Topaz Premyer Liqasının XV turuna start veriləcək

2 Fevral 2019 10:57

Xəbər 114 dəfə oxunub

Fevralın 2-də qış fasiləsindən sonra Topaz Premyer Liqasının XV turuna start veriləcək.Azərtac xəbər verir ki, iki günü əhatə edəcək XV turun ilk oyunu Zirə İdman Kompleksinin stadionunda baş tutacaq. “Zirə” komandası “Sabah”ı qəbul edəcək. Rauf Cabbarovun idarə edəcəyi oyun saat 16:30-da başlayacaq.Bu komandalar cari mövsümdə iki dəfə üz-üzə gəliblər. Hər iki oyunda “Sabah”a məğlub olan Samir Abasovun yetirmələri bu dəfə qalib gələrək sonuncu pillədən qurtulmağa çalışacaqlar. Elşad Əhmədovun yetirmələri əvvəlki iki görüşdə “Zirə”ni iki qolla məyus edə bilib. Hazırda “Sabah” 17 xalla turnir cədvəlində dördüncü, “Zirə” isə 10 xalla səkkizinci pillədə qərarlaşıb.“ASK Arena”da keçiriləcək digər oyunda “Keşlə” komandası “Səbail”i sınağa çəkəcək. Komandalar indiyədək Premyer Liqada 6 dəfə qarşılaşıblar. Bu oyunların üçündə “Keşlə”, ikisində isə “Səbail” qələbə qazanıb. Digər görüşdə isə qalib müəyyənləşməyib. Top fərqində də “Səbail” öndədir – 6:5. Autsayderlər sırasından uzaqlaşmaq istəyən “Keşlə” son iki oyunda Aftandil Hacıyevin komandasına 1:2 hesabı ilə uduzub. Tərlan Əhmədovun rəhbərlik etdiyi kollektiv “Səbail”ə qarşı keçirdiyi son dörd qarşılaşmada meydanı qolsuz tərk etməyib. “Səbail” hazırda 21 xalla üçüncü, “Keşlə” isə 12 xalla yeddincidir. Rəhim Həsənovun idarə edəcəyi oyun saat 19:00-da start götürəcək.Turun digər qarşılaşmaları isə fevralın 3-də keçiriləcək. Günün ilk oyunu saat 14:00-da Qəbələ şəhər stadionunda başlayacaq. Meydan sahibləri “Sumqayıt” ilə qarşılaşacaqlar. Matçı Əliyar Ağayev idarə edəcək.XV turun sonuncu və mərkəzi qarşılaşmasında isə “Qarabağ” və “Neftçi” komandaları üz-üzə gələcəklər. Saat 18:30-da başlayacaq qarşılaşmanın idarə olunması Rəvan Həmzəzadəyə tapşırılıb. Oyun Tofiq Bəhramov adına Respublika stadionunda keçiriləcək.Hazırda 33 xalla çempionata liderlik edən “Neftçi” qalib gələcəyi təqdirdə ikinci sıradakı “Qarabağ” ilə xal fərqini 6-ya çatdıracaq.xeber100.com

Ukraynanın paytaxtı Kiyevdə təşkil olunacaq beynəlxalq turnirdə

On yeddi yaşadək futbolçulardan ibarət Azərbaycan yığma komandası avqustun 24-dən 31-dək Ukraynanın paytaxtı Kiyevdə təşkil olunacaq beynəlxalq turnirdə (Viktor Bannikov turniri) iştirak edəcək.Azərtac AFFA-ya istinadla xəbər verir ki, avqustun 20-dən 24-dək Bakıda təlim-məşq toplanışında olacaq yığmamız Viktor Bannikov turnirində Ukrayna, Latviya və İsrail komandaları birgə “A” qrupunda mübarizə aparacaq.Millimiz avqustun 26-da İsrail, bir gün sonra Ukrayna, ayın 29-da isə Latviya yığması ilə qarşılaşacaq.Hazırlıq prosesinə Elgün Bayramov (“Neftçi”), Eldar Tağızadə (“Fundacion Marcet”, İspaniya), Amin Ramazanov (“Lokomotiv Moskva”, Rusiya), Rəşad Həsənov (“Keşlə”), Cəlal Hüseynov (“Zirə”), Raqib Abışov (“Sabah”), Samir Həsənov (“Rubin Kazan”, Rusiya), Nikita Pesotski Çertanovo (“Moskva”, Rusiya), Ülvi Mədətov (“Qəbələ”), Zöhrab Əsədov (“Qarabağ”), Mirəli Əhmədov, Nihad Cəfərov (hər ikisi “Neftçi”), Elnur Mirzəyev (“Zirə”), Rauf Rüstəmli (“Qəbələ”), Əbil Əbilov (“Keşlə”), Vüsal Qəmbərov (“Sabah”), Musa Musazadə (“Qarabağ”), Arif Məmmədov (“Səbail”), Vüsal Əliyev (“Zirə”), Kamal Kazımov (“Keşlə”), Nicat Quliyev (“Səbail”), Nurəli Nurəliyev (“Zirə”), Mirmövsüm Canıyev (“Qarabağ”) və Vaqif Həsənov (“Keşlə”) dəvət olunub.xeber100.com  

Avqust 20, 2019 14:11

Braziliyalı yarımmüdafiəçi “Bavariya” klubunun heyətində çıxış edəcək

Braziliyalı yarımmüdafiəçi Filippe Koutinyo cari futbol mövsümünün sonuna qədər Münxenin “Bavariya” klubunun heyətində çıxış edəcək.Azərtac klubun saytına istinadla xəbər verir ki, “Barselona”dan icarəyə götürülən futbolçu tibbi müayinələrdən sonra “Bavariya” ilə 2020-ci il iyunun 30-dək qüvvədə olan müqavilə imzalayıb. “Bavariya”nın birillik icarə üçün “Barselona”ya 8,5 milyon avro ödədiyi bildirilir.F.Koutinyo bu barədə deyib: “Avropanın ən böyük klublarından birinin heyətində çıxış etmək mənim üçün yeni çağırışdır. Qarşıdakı dövr mənim üçün ciddi əhəmiyyət daşıyır. “Bavariya” klubu kimi mənim də böyük hədəflərim var və yeni komandamla birlikdə onlara nail olacağıma inanıram.“Bavariya” klubunun baş icraçı direktoru, əfsanəvi futbolçu Karl-Haynts Rummeniqqe isə bu barədə bildirib: “Çox şadıq ki, bu transferi başa çatdıra bildik. Transferlə bağlı razılığa görə “Barselona” klubuna minnətdaram. Filippe yaradıcılığı və qeyri-adi bacarığı ilə bizim hücum xəttimizi dərhal gücləndirə biləcək bir futbolçudur”.Braziliyanın “Vasko da Qama” komandasında yetişən futbolçu Avropada daha əvvəl “İnter”, “Espanyol” və “Liverpul” klublarında forma geyinib. O, 2018-ci ilin yanvarında 145 milyon avroya “Liverpul”dan “Barselona”ya transfer edilib. F.Koutinyo “Barselona”nın heyətində ardıcıl iki dəfə İspaniya çempionatının, bir dəfə Kral Kubokunun və İspaniya Super Kubokunun qalibi olub. Braziliya millisinin heyətində 55 dəfə meydana çıxan futbolçu 15 dəfə fərqlənib. O, bu il Braziliyanın “Kopa Amerika” turnirinin qalibi olmasında mühüm rol oynayıb.xeber100.com

Avqust 19, 2019 13:06