İtaliyada ictimai nəqliyyat və aviasiya sənayesinin işçi heyəti milli tətil edib

İtaliyada ictimai nəqliyyat və aviasiya sənayesinin işçi heyəti milli tətil edib. Bu sahədə fəaliyyət göstərən həmkarlar ittifaqlarının qərarı ilə ölkədə bütün ictimai nəqliyyat növləri üzrə işçilər və hava limanlarının yerüstü işçi heyəti 4 saatlıq tətil ediblər. Buna səbəb kimi işçilərin müqavilələrinin yenilənməməsi göstərilir. Paytaxt Romada, eləcə də digər böyük şəhərlərdə avtobus, metro və tramvay xətlərinin hərəkətində fasilələr yaranıb. Bu, sərnişinlər arasında narahatlıq və təşvişə səbəb olub, ictimai nəqliyyatın hərəkətinə mənfi təsir göstərib. Aviasiya sənayesinin işçi heyətinin tətilinə bəzi hava yolu şirkətləri də qoşulub. Nəticədə ölkədəki hava limanlarında yüzlərlə daxili və beynəlxalq aviareys ləğv edilib, uçuşlarda gecikmələr olub.xeber100.com

ABŞ Konqresinin Nümayəndələr Palatası yeni yardımı böyük səs çoxluğu ilə təsdiqləyib

ABŞ Konqresinin Nümayəndələr Palatası Ukraynaya 300 milyon dollar məbləğində yeni yardımı böyük səs çoxluğu ilə təsdiqləyib. Xarici KİV-lər xəbər verir ki, vəsait əvvəlcə Müdafiə Departamentinin 2024-cü maliyyə ili üçün maliyyələşdirmə qanunvericiliyinə daxil edilib və bu, bəzi respublikaçıların etirazına səbəb olub. Bundan əvvəl Nümayəndələr Palatasında Respublikaçılar Partiyasının liderləri Ukraynaya həmin məbləğdə yardımı Pentaqonun maliyyələşdirmə qanun layihəsindən çıxarıblar. Nümayəndələr Palatasında Ukraynaya dəstək qızğın müzakirə olunur, bəzi qanunvericilər Kiyevə yardımı azaltmağa çalışır, digərləri isə ABŞ-ın müttəfiqini dəstəkləməli olduğunu deyir.xeber100.com

Birləşmiş Millətlər Təşkilatının müstəmləkə altında olan 17 ərazini tanıyır

BMT-nin 78-ci Baş Assambleyası çərçivəsində təşkil edilmiş konfransda anti-müstəmləkəçi təşkilatlar Qvadelupanın müstəmləkəsizləşdiriləcək ölkələr siyahısına daxil edilməsini tələb ediblər. BMT müstəmləkə altında olan 17 ərazini tanıyır. Bu siyahıda 2 dənizaşırı ərazi olsa da, Qvadelupanın adı yoxdur. Birləşmiş Millətlər Təşkilatının (BMT) Nyu-Yorkdakı mənzil-qərargahında keçirilən 78-ci Baş Assambleyasına qatılan Qvadelupa nümayəndə heyəti Qvadelupa Milli Alyansı (ANG), Təzminat üçün Beynəlxalq Hərəkatı (MİR), Alternativ Siyasi Layihə Təşəbbüs Komitəsi (CIPPA), Qara Xalqlar Beynəlxalq Komitəsi (CIPN), Qvadelupa Qurtuluş Xalq Birliyi (UPLG), Qvadelupa Milli Azadlıq Cəbhəsi (FKNG) və Qvadelupa Xilas Kollektivi (KSG) kimi yerli siyasi təşkilatların nümayəndələrindən ibarətdir. Qvineya və Martinikdən olan həmkarları da Qvadelupa nümayəndə heyətinə qoşulub. Natali Mintaçi (Nathalie Minatchy, ANG) və Jan-Jakob Bisep (Jean-Jacob Bicep, UPLG) iclasda çıxış edərək, qvadelupalılar adından danışıblar. Qeyd ediblər ki, nümayəndə heyətinin tələbi Qvadelupanın müstəmləkəsizləşdiriləcək ölkələr siyahısına daxil edilməsidir. UPLG-nin baş katibi Jan-Jacob Bicep çıxışında Qvadelupanın BMT-nin müstəmləkəsizləşdiriləcək ölkələr siyahısına daxil edilməsini tələb etməklə yanaşı, təzminat ödənilməsini “dekolonizasiyanın əsas sütunu” kimi təqdim edib. “Dekolonızasyon: Sakit inqılab” adlı tədbirin yekun bəyannaməsi BMT-nin rəhbər orqanlarına göndərilib. Qvadelupanın UPLG siyasi təşkilatı ölkəsinin və Fransanın digər koloniyalarının müstəmləkə vəziyyətini beynəlxalq diqqət mərkəzinə gətirən və onları mövcud təcriddən çıxarmağa kömək edən bu böyük təşəbbüsü alqışlayıb. Xatırladaq ki, BMT-də faktiki olaraq dekolonizasiya üzrə Xüsusi Komitə mövcuddur. O, bütün dünyada öz suverenliyinə can atan və hələ də müstəmləkə altında olan ərazilərin tələblərini dəstəkləmək üçün məsuliyyət daşıyır. Bu günə qədər BMT iki milyona qədər insanın yaşadığı 17 ərazini hələ də müstəmləkədə olan ərazilər hesab edir. Fransanın dənizaşırı müstəmləkəsi olan - Qvineya, Polineziya və Yeni Kaledoniyanın da bu siyahıya əlavə edilməsi tələb olunur.xeber100.com

Almaniya pilotsuz uçan aparatlar tədarük edəcəyini açıqlayıb

Almaniya Müdafiə Nazirliyi Ukraynaya 50 pilotsuz uçan aparat tədarük etmək niyyətində olduğunu bildirib. Bu barədə Bundesverin saytında yerləşdirilən məlumatda qeyd olunub. Cihazların ilk partiyası ən qısa zamanda Ukraynaya göndərilməlidir. Bundan əlavə, Berlin Kiyevə təxminən 400 milyon avro dəyərində geniş dəstək paketi vəd edib. Buraya “Gepard” özüyeriyən zenit qurğusu, IRIS-T orta mənzilli raketləri, hərbi nəqliyyat maşınları üçün ehtiyat hissələri, həmçinin mərmilər, minalar və digər zirehli texnikalar daxildir.xeber100.com  

Sinqapurun Çanqi aeroportu turistlərə pasportsuz səyahət imkanı təqdim edəcək

Dünyanın ən yüklənmiş hava limanlarından biri – Sinqapurun Çanqi aeroportu turistlərə pasportsuz səyahət imkanı təqdim edəcək. “USA Today” qəzeti xəbər verir ki, bu yaxınlarda Sinqapurda 2024-cü ilin ilk yarısında sərnişinlərə pasportsuz səyahət imkanı verən yeni qanun qəbul olunub. Çanqi hava limanında pasport əvəzinə Sinqapurdan uçan sərnişinlərin üzlərini tanıya biləcək biometrik texnologiyalardan istifadə ediləcək. Çanqi aeroportu təkcə avqust ayında 5,15 milyon sərnişinə xidmət göstərib. Yeni terminalın inşası ilə əlaqədar turistlərin sayının artmağa davam edərək pandemiyadan öncəki səviyyəyə çatacağı gözlənilir. Sinqapurun immiqrasiya sistemi ölkənin təhlükəsizliyini təmin etmək şərti ilə gömrük nəzarətini tez bir zamanda həyata keçirərək artan turist axınının öhdəsindən layiqincə gəlməlidir. Artıq Çanqi aeroportunun bəzi nəzarət-buraxılış məntəqələrində üztanıma sistemlərdən istifadə olunur. Biometrik texnologiyalar ABŞ-ın bir sıra aviakompaniyalarında və aeroportlarında da tətbiq edilir. Eyni zamanda, bu il Dubay aeroportlarının turistlərə pasportsuz səyahət imkanı yaratması gözlənilir.xeber100.com  

ABŞ-nin Geoloji Xidməti: Kanada sahilində 5,6 maqnitudalı zəlzələ olub

Kanada sahilində 5,6 maqnitudalı zəlzələ olub. Bu barədə ABŞ-nin Geoloji Xidməti məlumat yayıb. Xidmətin verilənlərinə görə, yeraltı təkanların episentri əhalisi təxminən 2 min nəfər olan Port-Makneyll şəhərindən 228 km qərbdə yerləşib. Zəlzələnin dərinliyi 10 km dərinlikdə olub. Dağıntı və tələfat barədə məlumat verilməyib. Sunami təhlükəsi elan olunmayıb.xeber100.com

“Reuters”: Mərakeşdə 7 bal gücündə zəlzələ olub

Mərakeşdə 7 bal gücündə zəlzələ nəticəsində ölənlərin sayı 2862 nəfərə çatıb. Bu barədə “Reuters” Mərakeş dövlət televiziyasına istinadla məlumat yayıb. Bildirilib ki, yaralananların sayı 2562 nəfərdir. Müxtəlif ölkələrin axtarış-xilasetmə qrupları və təcili yardım xidmətləri binaların dağıntıları altında qalanların axtarışlarını davam etdirir. Sentyabrın 11-də 2681 nəfərin öldüyü, 2501 nəfərin yaralandığı bildirilmişdi. Qeyd edək ki, sentyabrın 8-də Mərakeş Krallığında güclü zəlzələ baş verib. Mərakeş Milli Geofizika İnstitutunun məlumatına görə, yeraltı təkanların episentri El Haouz əyalətində yerləşən İgil bölgəsində olub. Zəlzələ ocağı 8 kilometr dərinlikdə yerləşib.xeber100.com  

Avropa İttifaqı üzvlərinin əksəriyyəti embarqonun uzadılmasına qarşıdır

Avropa İttifaqı (Aİ) ölkələrinin əksəriyyəti sentyabrın 15-dən sonra Ukraynanın kənd təsərrüfatı məhsullarının idxalına qoyulan qadağanın davam etdirilməsinə qarşı çıxıb. Bu barədə “Politico”nun Avropa nəşri yazıb. Qəzet dörd avropalı diplomata istinadən yazıb ki, Aİ üzvlərinin əksəriyyəti Polşa, Macarıstan, Rumıniya, Slovakiya və Bolqarıstanla fikir ayrılığına düşüb. Bu beş ölkə Ukraynanın taxıl idxalına qoyulan yasağın 2023-cü ilin sonunadək uzadılmasının vacibliyində israrlıdır. Bildirilib ki, sentyabrın 6-da Aİ səfirlərinin görüşü baş tutub və orada əksəriyyət ya məhdudiyyətlərin uzadılmasına qarşı çıxıb, ya da təklifə “şübhə ilə yanaşıb”. KİV-in məlumatına görə, idxal qadağası Fransa və Almaniya nümayəndələri tərəfindən ciddi şəkildə tənqid edilib. Avropa səfirləri Ukraynanın taxıl idxalına görə bir sıra ölkələrin üzləşdiyi çətinlikləri nəzərə alırlar, ancaq assosiasiyanın əksər nümayəndələri Avropa Komissiyasından alternativ tədbirlər təklif etməyi istəyirlər.xeber100.com

TASS agentliyi: Kibertəhlükəsizliklə bağlı sanksiyalar siyahısı genişlənib

ABŞ kibertəhlükəsizliklə bağlı sanksiyalar siyahısını genişləndirib. TASS agentliyi xəbər verir ki, bu barədə ABŞ Maliyyə Nazirliyi məlumat yayıb. Rusiyadan olan 11 fiziki şəxs sanksiyalar siyahısına daxil edilib.xeber100.com

Milli Aeronavtika və Kosmik Tədqiqatlar İdarəsinin məlumatı əsasında…

Sentyabrın 12-dək Yerə beş asteroid yaxınlaşacaq. Bu barədə Milli Aeronavtika və Kosmik Tədqiqatlar İdarəsinin (NASA) saytında məlumat verilib. İlk, ev ölçüsündə olan asteroid sentyabrın 6-da Yerə ən yaxın, 5,11 milyon km məsafədən keçəcəyi gözlənilir. Təyyarə və avtobus ölçüsündə növbəti iki astronomik obyekt sentyabrın 8-də Yerə yaxınlaşacaq. Sentyabrın 10-da planetin yanından təyyarə ölçüsündə daha iki asteroid keçəcək. Onlarla Yer arasında minimum məsafə müvafiq olaraq 1,52 milyon və 2,66 milyon km olacaq.xeber100.com

ABŞ III ballistik raketinin sınağının keçirəcəyi ilə bağlı xəbərdarlıq edib

ABŞ Müdafiə Nazirliyinin sözçüsü Patrik Rayder bildirib ki, ABŞ Rusiya Federasiyasına sentyabrın 6-da səhər saatlarında Minuteman III ballistik raketinin sınağının keçirəcəyi ilə bağlı xəbərdarlıq edib. “Report” xəbər verir ki, raketin Vanderberq kosmodromundan buraxılması sentyabrın 5-i saat 23:47-dən sentyabrın 6-sı saat 5:47-dək (Bakı vaxtı ilə 10:47-dən 6 sentyabr 16:17-dək - Qeyd) ​​müddətə planlaşdırılır. Patrik Rayder vurğulayıb ki, raketin sınaq buraxılışında məqsəd ABŞ nüvə qüvvələrinin hazır olduğunu nümayiş etdirməkdir: “Bu sınaq adidir, planlaşdırılıb”.xeber100.com

Avropa İttifaqı Ukraynaya 1000-dən çox notbuk göndərib

“Ukrayna üçün notbuklar təşəbbüsümüz hesabına 1000-dən çox cihaz Ukraynaya çatdırılıb”. Bu barədə Avropa Komissiyasının rəhbəri Ursula fon der Lyayen “X” sosial şəbəkəsindəki hesabında yazıb. “Avropa İttifaqının (Aİ) hər yerindən insanlar Ukrayna ilə güclü həmrəyliyimizi bir daha təsdiqləyərək bunun baş tutmasına kömək etdilər. Bu, Ukraynada çətin vəziyyətə düşmüş bölgələrlə əlaqələrə kömək edəcək”, - paylaşımda qeyd olunub.xeber100.com

İsraildə məhkəmə islahatlarına qarşı kütləvi etirazların yeni dalğası başlayıb

Şənbə günü axşam İsraildə Baş nazir Benyamin Netanyahunun rəhbərlik etdiyi hökumətə və onun davam edən məhkəmə islahatlarına qarşı kütləvi etirazların yeni dalğası başlayıb. TASS xəbər verir ki, ənənəyə görə, on minlərlə israillinin qatladığı əsas nümayiş müxalif əhval-ruhiyyəsinin ən güclü olduğu Tel-Əvivdə keçirilib. Təl-Əvivdəki mitinq əvvəlki kimi, şəhərin şərqindəki hökumət binaları kompleksinin yaxınlığında təşkil olunub. Etirazçılar hökumət əleyhinə şüarlar səsləndirərək, İsrail demokratiyasının müdafiəsini tələb edib, çoxlu sayda İsrail bayraqları etirazçıların başı üzərində dalğalandırılıb. Nümayiş təşkilatçıları şənbə günü səhər Təl-Əvivin cənub rayonlarında baş verən iğtişaşlara baxmayaraq, nümayişi keçirməkdən imtina etməyiblər. Etirazlar zamanı iğtişaşlar baş verib, 170-ə yaxın insan, o cümlədən 49 polis yaralanıb.xeber100.com

Albaniya Birləşmiş Millətlər Təşkilatının Təhlükəsizlik Şurasına sədrlik edəcək

Albaniya sentyabrın 1-dən 30-dək Birləşmiş Millətlər Təşkilatının Təhlükəsizlik Şurasına (BMT TŞ) sədrlik edəcək. Albaniyanın Avropa və xarici işlər naziri Olta Xaçka ölkəsinin müttəfiqləri və tərəfdaşları ilə sıx məsləhətləşmələr əsasında TŞ-nin sentyabr gündəliyini müəyyən edəcəyini bildirib. O.Xaçka Albaniyanın BMT TŞ-yə sədrliyi dövrünün bütün dünyada humanitar yardımların paylanması üzrə əməkdaşlıq platformasının yaradılması və Rusiya-Ukrayna müharibəsi kimi mühüm məsələni əhatə etdiyini vurğulayıb. Qeyd edib ki, Albaniyanın TŞ-yə sədrliyi, həmçinin Ukraynadakı müharibə fonunda baş verən ərzaq böhranından tutmuş Rusiyanın yürütdüyü siyasət, Yəməndə, Sudanda və ümumən Yaxın Şərqdə hökm sürən ərzaq təhlükəsizliyi kimi ciddi böhranlar və münaqişələr dövrünə təsadüf edir.xeber100.com

“SpaceX” artıq bu peyklərdən 4,9 mindən çoxunu orbitə çıxarıb

“Falcon 9” daşıyıcı raketi “Starlink” sisteminin qlobal internet əhatə şəbəkəsinin orbital bürcünü artırmaq üçün 22 mini peykdən ibarət daha bir partiya ilə orbitə çıxıb. Bu barədə “SpaceX” şirkəti məlumat yayıb. Bu, “Starlink” layihəsi çərçivəsində 2019-cu ilin may ayından etibarən internet peyklərinin 103-cü, bu ilin əvvəlindən isə 34-cü buraxılışıdır. “SpaceX” artıq bu peyklərdən 4,9 mindən çoxunu orbitə çıxarıb. Onlardan bəziləri uğursuz olub. Orbitdə, təxminən, “SpaceX” ə məxsus 4,6 min cihaz işlək vəziyyətdə qalır.xeber100.com

Cənubi Qafqazda və Qara dəniz regionunda təhlükəsizlik məsələləri müzakirə edilib

Gürcüstan parlamentinin Xarici əlaqələr komitəsinin sədri, parlamentin Yaponiya ilə dostluq qrupunun rəhbəri Nikoloz Samxaradze Tokio Geo-İqtisadiyyat İnstitutunda Cənubi Qafqazda və Qara dəniz regionunda təhlükəsizlik məsələlərindən danışıb. Bu barədə Gürcüstan parlamentinin mətbuat xidmətindən məlumat verilib. Bildirilib ki, N.Samxaradze institutda Qara dənizin təhlükəsizliyi məsələlərinə dair seminar keçirib. Seminarda o, Qara dəniz regionunda mövcud vəziyyətin səbəblərinə nəzər salıb. “Seminarda biz Rusiyanın Gürcüstana və Ukraynaya təcavüzü, Ermənistan-Azərbaycan münaqişəsi və bu problemin həllində Gürcüstanın sülhsevər rolu, NATO və Avropa İttifaqının Qara dənizin təhlükəsizliyi məsələlərinə cəlb edilməsi və ümumiyyətlə, bu ölkənin təhlükəsizliyinin təmin olunmasının vacibliyi kimi mövzulara diqqət yetirdik. Avropada və qlobal təhlükəsizlik üçün Cənubi Qafqazda, Qara dənizdə sabitlik çox vacibdir”, – deyə Nikoloz Samxaradze vurğulayıb.xeber100.com

Kolumbiya sahillərində 6,3 bal gücündə zəlzələ qeydə alınıb

Kolumbiya sahillərində 6,3 bal gücündə zəlzələ qeydə alınıb. Bu barədə Amerika Geologiya Araşdırmaları Mərkəzi məlumat yayıb. Yeraltı təkanların episentri Cumaral şəhərindən 16 kilometr şimalda olub, zəlzələnin ocağı 10 kilometr dərinlikdə yerləşib. Tələfat və dağıntılar barədə məlumat yoxdur.xeber100.com

ABŞ Milli Meteoroloji Xidmətinin məlumatı əsasında…

ABŞ-ın paytaxtı Vaşinqtonun bəzi bölgələrində şiddətli tufan və daşqın olacağı barədə əhaliyə xəbərdarlıq edilib. Bu barədə ABŞ Milli Meteoroloji Xidməti məlumat yayıb. Məlumatda tufan nəticəsində yarana biləcək dağıntıların vətəndaşlar üçün təhlükəli ola biləcəyi qeyd edilib. Milli Meteoroloji Xidmət vətəndaşları hava şəraiti normallaşanadək sığınacaqlardan istifadə etməyə çağırıb.xeber100.com

“OPEC+” ölkələrində neft hasilatının artacağı proqnozlaşdırılıb

Bu il “OPEC+” ölkələrində neft hasilatının sutkada 1,5 milyon barel artacağı proqnozlaşdırılıb. OPEC-in aylıq hesabatına istinadla xəbər verir ki, ümumi hasilat sutkada 67,3 milyon barel səviyyəsində olacağı gözlənilir. Təşkilat proqnoza yenidən baxılmasını Kanada, İqtisadi Əməkdaşlıq və İnkişaf Təşkilatı (OECD) ölkələri üzrə göstəricilərin azalması ilə əlaqələndirir. Bu isə Rusiya və ABŞ üçün proqnoz göstəricisinin artımı ilə kompensasiya edilir. Ötən ay “OPEC+” ölkələrində neft hasilatının gündəlik 1,4 milyon barel artaraq, sutkada 67,1 milyon barel olacağı proqnozlaşdırılırdı. 2023-cü ildə neft hasilatı artımının hərəkətverici qüvvəsi əsasən ABŞ, Norveç, Braziliya, Kanada, Qazaxıstan, Çin və Qayana olacaq. Eyni zamanda, hesabatda ilin qalan dövründə ABŞ-da şist neft hasilatı potensialı və planlaşdırılmamış texniki xidmətlə bağlı qeyri-müəyyənliyin davam etdiyi vurğulanıb. Həmçinin, OPEC-in hesabatında bildirilib ki, 2024-cü ildə qeyri-OPEC ölkələrində maye karbohidrogenlərin hasilatının əvvəlki illə müqayisədə sutkada 1,4 milyon barel artacağı və ötən aydakı proqnozla müqayisədə gündəlik orta hesabla 68,7 milyon barel olacağı gözlənilir.xeber100.com

İndoneziya sahillərində 5,7 bal gücündə zəlzələ baş verib

İndoneziya sahillərində 5,7 bal gücündə zəlzələ baş verib. Bu barədə Avropa-Aralıq dənizi Seysmoloji Mərkəzi məlumat yayıb. Bildirilib ki, yeraltı təkanların episentri Tual şəhərindən 157 kilometr cənub-qərbdə, ocağı 75 kilometr dərinlikdə yerləşib. Tələfat və dağıntılar barədə hələlik məlumat yoxdur.xeber100.com