İtaliya hökuməti fövqəladə vəziyyət elan edib

İtaliya hökuməti Venesiyada baş vermiş sel ilə əlaqədar şəhərdə fövqəladə vəziyyət elan edib. Yağan yağışlar və Adriatik dənizinin səviyyəsinin artması səbəbindən şəhəri su basaraq təhlükəli vəziyyət doğurub.Azərtac xəbər verir ki, İtaliyanın Baş Naziri Cüzeppe Konte şəhərdə vəziyyətin ciddi nəzarətə götürülməsi və ortaya çıxa biləcək xərclər üçün büdcədən 20 milyon avro ayrılması barədə göstəriş verib. Şəhərə əlavə xilasedici qüvvələr cəlb olunub. Evlərini su basmış əhaliyə hər ev üçün əlavə 5 min avro da yardım ediləcək.Mütəxəssislərin proqnozlarına əsasən, suyun səviyyəsi qalxmaqda davam edəcək.xeber100.com

İranda növbəti parlament seçkiləri keçiriləcək

İranda növbəti parlament seçkiləri gələn ilin fevral ayının 21-də keçiriləcək.Azərtac xəbər verir ki, bu barədə İranın Daxili İşlər naziri Əbdülrza Rəhmani Fəzli deyib. O, seçki məntəqəsinin açılışında bildirib ki, dekabr ayının 1-dən seçkilərdə iştirak etmək istəyən namizədlərin qeydiyyatına başlanılacaq.Xatırladaq ki, İranda namizədlərin qeydiyyatı, seçkiyə hazırlıq və seçkilərin keçirilməsi ölkənin Daxili İşlər Nazirliyi tərəfindən reallaşdırılır.xeber100.com

Kyodo agentliyinin məlumatı əsasında…

Noyabrın 9-da Yaponiyanın “Kansay” aeroportunun uçuş-enmə zolaqları ərazidə uçan drona görə növbəti dəfə bağlanıb.Azərtac xəbər verir ki, bu barədə Kyodo agentliyi məlumat yayıb.Xatırladaq ki, bu, həftə ərzində baş verən ikinci belə hadisədir. Belə ki, noyabrın 7-dən 8-nə keçən gecə beynəlxalq aeroportun operatoru naməlum uçan obyektə görə uçuş-enmə zolaqlarını bağlamaq məcburiyyətində qalmışdı. Həmin gün təqribən 30 reys ya təxirə salınmış, ya da digər aeroportlara yönəldilmişdi.Bildirilir ki, aeroportun təhlükəsizlik xidmətinin polislə birlikdə apardığı araşdırmalar hələlik heç bir nəticə verməyib. Eyni zamanda, həmin gün aeroportun təhlükəsizliyinin gücləndirilməsi ilə bağlı əlavə tədbirlərin görülməsi qərara alınıb.Qeyd edək ki, “Kansay” aeroportu “Narita” və “Haneda” aeroportlarından sonra Yaponiyanın üçüncü ən böyük beynəlxalq aeroportudur.xeber100.com

Qazaxıstan və Rusiya əməkdaşlıq müqaviləsi imzalayıb

Qazaxıstan-Rusiya XVI Regionlararası Əməkdaşlıq Forumunun birinci günü 40 milyon dollarlıq sazişlər imzalanıb.Azərtac xəbər verir ki, Qazaxıstanın Ticarət və İnteqrasiya naziri Baxıt Sultanov Omskda keçirilən Qazaxıstan-Rusiya Regionlararası Əməkdaşlıq Forumunun birinci günü barədə məlumat verib.Qazaxıstan naziri bildirib ki, forumun birinci günü ümumi məbləği 40 milyon dollar olan sazişlər imzalanıb. Belə biznes-forumlar, birbaşa əlaqələr sahibkarlar üçün əlavə imkanlar yaradır.B.Sultanov sahibkarları kooperasiya əlaqələri qurmağa dəvət edərək vurğulayıb ki, Çin bazarının açıldığı, Mərkəzi Asiyanın inkişaf etdiyi vaxtda belə əlaqələr yaratmaq xüsusilə əhəmiyyətlidir.B.Sultanov qeyd edib ki, regionlararası forumların keçirildiyi 16 il ərzində Qazaxıstan ilə Rusiya arasında əmtəə dövriyyəsi 3,5 dəfə artıb. Lakin ixracın əsasını xammal təşkil edib. Qazaxıstan qarşısında ixracda emal məhsulunun payını artırmaq vəzifəsi durur.xeber100.com

13-cü beynəlxalq müdafiə və təhlükəsizlik konfransı keçirilir

Gürcüstanın Acarıstan Muxtar Respublikasının Batumi şəhərində 13-cü beynəlxalq müdafiə və təhlükəsizlik konfransı keçirilir.Azərtac xəbər verir ki, konfransda bölgədə, o cümlədən Qara dəniz regionunda təhlükəsizlik, regional inkişaf məsələləri, eləcə də Gürcüstanın NATO-ya və Avropa İttifaqına inteqrasiya sahəsində əldə etdiyi uğurlar, ölkənin bu təşkilatlara üzvlüyünün perspektivləri, hibrid müharibə təhlükələri və s. məsələlər müzakirə olunur.Konfransda çıxış edən Gürcüstan Prezidenti Salome Zurabişvili ölkəsində həyata keçirilən islahatlar, mövcud problemlər və digər məsələlər barədə məlumat verib.Sonra parlamentin sədri Arçil Talakvadze Gürcüstan qanunvericiliyi, ölkənin NATO-ya və Avropa İttifaqına inteqrasiyasının hüquqi əsaslarından danışıb.Digər çıxış edənlər dünyada və regionda gedən proseslərdən söz açıb, qloballaşan dünyada təhlükəsizliyin təmin olunmasında irimiqyaslı enerji, nəqliyyat və logistika layihələrinin rolu barədə fikirlərini bölüşüblər.Azərbaycanı bu tədbirdə ölkəmizin Gürcüstandakı səfirliyinin hərbi attaşe aparatının rəhbəri polkovnik-leytenant Fuad İbrahimov və səfirliyin birinci katibi Sərxan İsmayılov təmsil edirlər.Polkovnik-leytenant Fuad İbrahimov konfransda iştirak edən həmkarları ilə keçirdiyi görüşlərdə Azərbaycanın regional və beynəlxalq təhlükəsizliyə önəm verdiyini diqqətə çatdırıb. O, Azərbaycanın təhlükəsizliyin təmin olunması üçün beynəlxalq təşkilatlarla əməkdaşlıqda maraqlı olduğunu bildirib.xeber100.com  

Türkiyə və Rusiya Suriyada ikinci patrula başlayıb

Türkiyə və Rusiya hərbçiləri Suriyanın şimal-şərqində yeni sərhəd rayonunda Kobani şəhərindən bir neçə kilometr məsafədə ikinci patrula başlayıb.Rusiya KİV-ləri xəbər verir ki, ilk dəfə olaraq birgə patrul yeni marşrut üzrə həyata keçirilir. Patrulda Rusiya hərbi polisinin “Tiqr” və Türkiyə sərhəd xidmətinin “Kirpi” zirehli avtomobilləri iştirak edir. Sərhəd boyunca 160 kilometrlik marşruta hər iki tərəfdən ümumilikdə səkkiz ədəd hərbi texnika və 50-yə yaxın hərbçi cəlb olunub. Patrulun hərəkətini “Orlan-10” pilotsuz uçan aparat izləyir.Bu, Türkiyə-Suriya sərhəd xətti boyunca həyata keçirilən ikinci birgə patruldur.Xatırladaq ki, birgə patrul oktyabrın 22-də Ankara və Moskva arasında imzalanmış memoranduma əsasən keçirilir. Sənəddə, həmçinin Türkiyənin başladığı “Sülh çeşməsi” əməliyyatı xaricindəki zonada Suriyanın hökumət qüvvələri və Rusiya hərbi polisinin 150 saat ərzində terrorçuların sərhəddən 30 kilometr dərinliyə çəkilməsinə yardım etməsi nəzərdə tutulur.Türkiyə Prezidenti Rəcəb Tayyib Ərdoğan bildirib ki, əldə olunmuş razılaşmaya baxmayaraq, təhlükəsizlik zonasında terrorçular hələ də qalmaqdadır. “Onlar oradan hələ tam çıxarılmayıblar, bizim hərbçilərə hücumlar edilir. Biz axırıncı terrorçu oradan çıxanadək mübarizəni davam edəcəyik”, - Türkiyə Prezidenti bu gün hakim partiyanın parlament fraksiyası qarşısında çıxışı zamanı belə deyib.xeber100.com

Türkiyənin Xarici İşlər Nazirliyinin açıqlamasına əsasən…

ABŞ-ın 2018-ci ilə dair terrorla bağlı hesabatında YPG terror təşkilatının adının çəkilməməsi Türkiyənin kəskin etirazına səbəb olub.Azərtac xəbər verir ki, bu barədə Türkiyənin Xarici İşlər Nazirliyinin sözçüsü Hami Aksoy açıqlama verib. Bildirilir ki, sözügedən hesabatda ABŞ tərəfi Türkiyənin İŞİD və PKK terror təşkilatları ilə mübarizəsini, eləcə də Beynəlxalq Koalisiya Qüvvələri ilə əməkdaşlığını yüksək dəyərləndirib. Həmçinin, hesabatda diqqətə çatdırılıb ki, xarici terror təşkilatları sırasında yer alan PKK 2015-2018-ci illərdə Türkiyədə polis, hərbçi və mülki şəxslər daxil olmaqla 1200-dən çox insanı öldürüb. Lakin təəssüf ki, hesabatda YPG terror təşkilatının adı çəkilmir. Bunun yerinə “PKK-nın Suriyadakı əlaqələri” ifadəsindən istifadə olunub. Bildirilir ki, bu hazırda YPG ilə əlaqələrini kəsən ABŞ-ın hüquqazidd əməlini gizlətmək cəhdidir.Bundan başqa, H.Aksoy hesabatda FETÖ-nün başçısının “sürgündə olan din adamı” kimi təqdim olunmasına da etiraz ifadə edib. Bildirilir ki, qeyd olunan yanaşma təkcə Türkiyə üçün deyil, təmsil olunduğu bütün ölkələr üçün təhlükə mənbəyi olan FETÖ-nün 2016-cı il iyulun 15-də dövlət çevrilişinə cəhd etməsini görməməzliyə vurmaq cəhdidir. Eyni zamanda, bu mövqe özünün ABŞ-da təhlükəsiz sığınacaq tapan FETÖ başçısına dəstək verməyin təzahürüdür. Diqqətə çatdırılır ki, 2016-cı il 15 iyulun tarixli dövlət çevrilişinə cəhd nəticəsində Türkiyədə 251 nəfər günahsız insan həlak olub.xeber100.com

Çin noyabrın 3-də orbitə “Gaofen-7” peykini buraxıb

Çin noyabrın 3-də yerli vaxtla səhər 11:22-də (Bakı vaxtı ilə 8:22-də) Yerin müşahidəsi üçün orbitə “Gaofen-7” peykini buraxıb.Azərtac Çinin Elm, Texnologiya və Milli Müdafiə Sənayesi Baş Administrasiyasına istinadla xəbər verir ki, peykin “Long March 4B” raketdaşıyıcısı ilə buraxılışı ölkənin şimalındakı Şansi əyalətindəki Tayyuan kosmodromundan həyata keçirilib.Peyk xəritələrin hazırlanması, təbii ehtiyatların tədqiqatı, yaşayış məntəqələrinin layihələndirilməsi, ətraf mühitin qorunması və təbii fəlakətlər barədə erkən xəbərdarlıq üçün istifadə olunacaq.xeber100.com

Yaponiyanın Hönşü adasının şimal-şərqində zəlzələ baş verib

Noyabrın 3-də Yaponiyanın Hönşü adasının şimal-şərq sahillərində 5,1 bal gücündə zəlzələ baş verib.Azərtac xəbər verir ki, bu barədə Yaponiya Meteorologiya Agentliyi məlumat yayıb.Yeraltı təkanların episentri Sakit okeanın Fukuşima prefekturası sahillərində, ocağı okean dibindən 30 kilometr dərinlikdə yerləşib.Dağıntılar və zərərçəkənlər barədə məlumat verilmir. Sunami xəbərdarlığı elan edilməyib. Yeraltı təkanlar qonşuluqdakı İvate, Miyaqi və Fukuşima prefekturalarında hiss olunub.xeber100.com  

Türkiyə və Rusiya Suriyadakı vəziyyəti müzakirə edib

Türkiyə Silahlı Qüvvələrinin qərargah rəisi general Yaşar Gülər rusiyalı həmkarı ordu generalı Valeri Gerasimov ilə telefon danışıqları aparıb.Anadolu informasiya agentliyi xəbər verir ki, danışıqlarda Suriyada hadisələrin inkişafı müzakirə edilib.Noyabrın 1-də Türkiyə və Rusiya hərbçilərinin Suriyada birgə patrul xidmətinə başlayacağı gözlənilir.Xatırladaq ki, oktyabrın 22-də Ankara və Moskva arasında Suriya ilə bağlı memorandum imzalanıb. Rəcəb Tayyib Ərdoğan və Vladimir Putin Soçi şəhərində altı saatlıq danışıqların yekununda Suriya Ərəb Respublikasının vahidliyinin və ərazi bütövlüyünün, Türkiyənin milli təhlükəsizliyinin tərəfdarı olduqlarını təsdiqləyiblər.Sənədə əsasən, Tell-Abyad və Ras-əl-Ayn şəhərləri arasındakı “Sülh çeşməsi” əməliyyatı rayonunda sərhəddən 32 kilometr məsafədə status-kvo vəziyyəti saxlanılacaq. Türkiyənin keçirdiyi əməliyyat xaricindəki zonada Bəşər Əsədə sadiq qüvvələr və Rusiyanın hərbi polisi 150 saat ərzində kürd separatçılarının və silahlarının sərhəddən 30 kilometr geri çəkilməsinə yardım etməlidir. Qamışlı şəhəri istisna olmaqla, sərhədin on kilometr dərinliyində Türkiyə və Rusiya hərbçilərinin birgə patrulu başlamalıdır.xeber100.com

“Pokrovskaya” Günəş Elektrik Stansiyası istismara verilib

Ukraynanın Dnepropetrovsk vilayətində gücünə görə Avropanın ikinci ən böyük “Pokrovskaya” Günəş Elektrik Stansiyası (240 MVt) istismara verilib. Azərtac yerli mətbuata istinadla xəbər verir ki, "Pokrovskaya” GES hər il 400 milyon kVt/saat yaşıl elektrik enerjisi istehsal edəcək. Bu da 200 min fərdi ev və ya mənzili elektrik enerjisi ilə təmin etmək üçün kifayətdir. Stansiyanın işi sayəsində atmosferə atılan CO₂ tullantıları ildə 420 min ton azalacaq.“Pokrovskaya” GES, “Bloomberg” reytinqinə görə, ən yaxşı günəş panelləri istehsalçılarının ilk üçlüyündə yer alan Risen (Çin) tərəfindən istehsal olunan 840 min günəş panelindən ibarətdir və 437 hektar ərazidə yerləşir.Stansiyanın yaradılmasına 193 milyon avro sərmayə yatırılıb.xeber100.com

ABŞ-ın Enerji İnformasiya Administrasiyasının məlumatı

Birləşmiş Ştatların xam neft ehtiyatları artır.Azərtac xəbər verir ki, bu barədə ABŞ-ın Enerji İnformasiya Administrasiyasının (EIA) məlumatında deyilir. Bildirilir ki, ötən hesabat həftəsində ölkədəki neft ehtiyatları 5,7 milyon barrel (1,3 faiz) çoxalaraq 438,9 milyon barrel olub. Bazar proqnozları isə ehtiyatların 490 min barrel artacağı istiqamətində idi. Əvvəlki həftə neft ehtiyatları 1,7 milyon barrel azalmışdı.ABŞ-ın strateji neft ehtiyatları isə 0,7 milyon barrel azalaraq 641,7 milyon barrel olub.Ölkənin benzin ehtiyatları hesabat həftəsində 3 milyon barrel (1,4 faiz) geriləyərək 220,1 milyon barrel təşkil edib. Bazar proqnozları ehtiyatların 2,1 milyon barrel azalacağı istiqamətində idi. Benzin ehtiyatları əvvəlki həftə 3,1 milyon barrel geriləmişdi.xeber100.com

ABŞ-ın Nümayəndələr Palatası növbəti qətnamə qəbul edib

ABŞ-ın Nümayəndələr Palatası 1915-ci il hadisələrini erməni “soyqırımı” kimi tanıyan 296 saylı qətnamə qəbul edib. Konqresdə bu məsələ işə bağlı müzakirələr ərəfəsində Türkiyənin Vaşinqtondakı səfiri Sərdar Kılıc qətnamənin Türkiyə ilə Birləşmiş Ştatlar arasında siyasi münasibətlərə xələl gətirəcəyi barədə xəbərdarlıq edib. Qətnamənin müəllifləri Kaliforniya və Floridadan olan konqresmenlər Adam Şiff və Qus Bilirakisdir.Azərtac xəbər verir ki, böyük səs çoxluğu ilə (lehinə 405, əleyhinə 11) qəbul edilmiş qətnamənin məcburi hüquqi qüvvəsi yoxdur. Nümayəndələr Palatası 1984-cü ildə də analoji qərar qəbul edib.Bir çox siyasi icmalçılar hesab edirlər ki, sözügedən qətnamə Türkiyə Silahlı Qüvvələrinin Suriyanın şimalında “Sülh çeşməsi” əməliyyatına başlamasından sonra Türkiyə hökumətinə təzyiqin gücləndirilməsi məqsədi daşıyır. Erməni lobbisinin qatı tərəfdarlarından biri olan konqresmen Adam Şiff Konqresdə açıq şəkildə bəyan edib ki, qətnamənin qəbul edilməsi Türkiyə ordusunun Suriyaya girməsi ilə əlaqədardır. ABŞ-da 200 minlik erməni icmasının maraqlarını təmsil edən və Los-Ancelesdə yaşayan bu konqresmen on illərdir ki, hökuməti qondarma “soyqırımını” tanımağa sövq edirdi, lakin NATO-nun müttəfiqi olan Türkiyə hökumətinin güclü mövqeyi qarşısında aciz qalmışdı.Bir neçə konqresmen, o cümlədən Nümayəndələr Palatasının Texas ştatından olan üzvü Maykl Bercess belə bir sualla müraciət edib ki, Konqresin daha təxirəsalınmaz işləri, o cümlədən Amerika hökumətinin maliyyələşdirilməsinə dair müddəti noyabrın 21-də başa çatan məsələlər olduğu halda palatanın 100 il əvvəl baş vermiş hadisələrlə bağlı mütləq qaydada qətnamə qəbul etməyə tələsməsi nə ilə bağlıdır.xeber100.com

Filippində təqribən 1 saat 40 dəqiqə ərzində dörd silsilə zəlzələ baş verib

Oktyabrın 29-da Filippində təqribən 1 saat 40 dəqiqə ərzində dörd silsilə zəlzələ baş verib.gtz.potsdam saytı xəbər verir ki, 6,6 bal gücündə birinci zəlzələ dünya vaxtı ilə saat 1:04 radələrində baş verib. Yeraltı təkanların episentri Kisante rayonundan 10 kilometr məsafədə, ocağı 15 kilometr dərinlikdə yerləşib.Bundan 24 dəqiqə sonra 5,1 bal gücündə ikinci, dünya vaxtı ilə saat 2:20-də 4,8 bal gücündə üçüncü, saat 2:42 dəqiqədə isə 5,8 bal gücündə dördüncü zəlzələ qeydə alınıb.Dağıntılar və zərərçəkənlər barədə məlumat verilmir. Sunami xəbərdarlığı elan edilməyib.xeber100.com

İraq hakimiyyəti Bağdadda komendant saatı tətbiq edib

İraq hakimiyyəti etiraz aksiyaları səbəbindən Bağdadda komendant saatı tətbiq edib.Al Sumaria telekanalı xəbər verir ki, Bağdad şəhərinin hərbi qarnizon komandanı briqada generalı Qeys-əl-Məhəmmədaui İraq paytaxtında komendant saatının yerli vaxtla saat 00:00-dan səhər saat 6-dək davam edəcəyini deyib. Generalın sözlərinə görə, komendant saatı həm nəqliyyatın, həm də şəhər sakinlərinin hərəkətinə aiddir.Al Arabiya telekanalının məlumatına görə, oktyabrın 28-də Bağdadda etirazçılarla güc strukturları arasında baş verən toqquşmalarda üç nəfər həlak olub, 100-dən çox insan isə yaralanıb.İraqda həyat şəraitinin yaxşılaşdırılması, səhiyyə, təhsil sahələrində, əmək bazarında, həmçinin korrupsiya ilə mübarizədə problemlərin həlli tələbi ilə oktyabrın əvvəlində başlayan etiraz aksiyaları nəticəsində indiyədək 200 nəfərə yaxın insan ölüb, təxminən 8 min nəfər xəsarət alıb.xeber100.com

Böyük Britaniyada növbədənkənar seçkilərin vaxtı müəyyənləşir

Böyük Britaniya Parlamentindəki İcmalar Palatasında Baş Nazir Boris Consonun növbədənkənar seçkilərin dekabrın 12-nə təyin olunması təklifi ilə bağlı səsvermə keçirilir.Azərtac xəbər verir ki, Leyboristlər Partiyası İngiltərənin Avropa İttifaqından (Aİ) razılaşmasız çıxmaq ehtimalının tamamilə aradan qaldırılacağı təqdirdə erkən seçkiləri dəstəkləyəcəklərini açıqlayıblar.Müxalif Milli Şotlandiya Partiyası və Liberal Demokrat Partiyası seçkilərin dekabrın 9-na təyin olunmasını təklif edirlər.Xatırladaq ki, sentyabrda Baş Nazir Boris Conson iki dəfə deputatlardan növbədənkənar seçkilərin təsdiqlənməsini istəsə də, onun tələbi rədd edilmişdi.xeber100.com

Serbiya hökuməti Azad Ticarət Zonası barədə sözləşmə imzalayıb

Serbiya hökuməti ilə Avrasiya İqtisadi Birliyi arasında Azad Ticarət Zonası barədə sözləşmə imzalanıb. Sözləşməyə əsasən Serbiya birliyə üzv ölkələr- Rusiya, Qazaxıstan, Belarus, Qırğızıstan və Ermənistan ilə azad ticari münasibətlər yaradacaq.Azərtac xəbər verir ki, sözləşmə Moskvada Serbiyanın Baş Naziri Ana Brnabiç tərəfindən imzalanıb. Avropa Birliyinə üzv olmaq üçün namizədliyini saxlayan Serbiya hökuməti, eyni zamanda, bildirib ki, üzv olacağı təqdirdə sözügedən sözləşmə ləğv olunacaq.Serbiya müvafiq sözləşməni Türkiyə və CEFTA (Mərkəzi Avropa Azad Ticarət Birliyi) ilə də imzalayıb.xeber100.com

“The New York Times” qəzeti yazır…

Pentaqon 10 milyard dollarlıq müqavilənin yerinə yetirilməsi üzrə tenderdə “Microsoft” kompaniyasının qalib gəldiyini elan edib.“The New York Times” qəzeti xəbər verir ki, tenderin nəticəsi son anadək məlum olmayıb.Əvvəlcə tenderin favoriti “Amazon” kompaniyası sayılırdı, lakin Prezident Donald Tramp özünün “Twitter” səhifəsində korporasiyanın rəhbəri Ceff Bezosun ünvanına dəfələrlə tənqid səsləndirib. Yerli KİV-lərin məlumatına görə, Donald Tramp sərfəli müqavilənin “Amazon”dan başqa istənilən digər kompaniyaya verilməsini arzulayırdı.ABŞ-ın yeni Müdafiə naziri Mark Esper tenderin şərtləri ilə yaxından tanış olmaq və əsas iştirakçıların imkanlarını öyrənmək üçün bir neçə ay vaxt istəmişdi. Bir qədər öncə isə Pentaqon rəhbəri oğlunun müqaviləyə iddialı kompaniyaların birində işlədiyi üçün bu işdən imtina etmişdi.1975-ci ildə sahibkarlar Bill Qeyts və Pol Allen tərəfindən əsası qoyulan “Microsoft” kompüterdən mobil telefonlara qədər müxtəlif qurğular üçün proqram təminatı istehsalı ilə məşğul olur. Mənzil-qərargahı Vaşinqton ştatının Redmond şəhərində yerləşən korporasiyanın bazar kapitalı 800 milyard dollardan çoxdur.xeber100.com

İtaliyada bir sıra həmkarlar ittifaqı tətil elan edib

İtaliyada nəqliyyat, təhsil, tibb və digər sahələrdə fəaliyyət göstərən bir sıra həmkarlar ittifaqı bütün ölkə ərazisində tətil elan edib.Sky TG24.it telekanalı xəbər verir ki, həm dövlət, həm də fərdi sektor işçilərinin etirazları ümumi şəraitlə və əmək haqlarından narazılıqla bağlıdır.Tətillərin nəqliyyatın işində çətinliklərə səbəb olacağı gözlənilir. Romada elektrik enerjisi təminatında, kommunal xidmətlərin işində problemlər yaranacaq. Aksiya metronun, yerüstü nəqliyyatın, təhsil müəssisələrinin və muzeylərin işinə təsir edəcək.İtaliyanın “Alitalia” aviakompaniyası 240 reysi ləğv etmək məcburiyyətində qalıb. “Ferrovie dello Stato” milli dəmir yolu kompaniyasının əməkdaşlarının tətilə qoşulması səbəbindən isə regional dəmir yolu reyslərinin bəzilərinin vaxtları dəyişdirilib, bəziləri isə ləğv edilib. Etiraz aksiyalarının sürət qatarlarının fəaliyyətinə təsir etməyəcəyi bildirilir.xeber100.com

Ukraynada yeni 1000 qrivna əsginası dövriyyəyə buraxılıb

Bu gündən Ukraynada yeni 1000 qrivna əsginası dövriyyəyə buraxılıb.Azərtac Ukrayna Milli Bankına istinadla xəbər verir, yeni əsginasın dövriyyəyə buraxılması minimum əməkhaqqının artım dinamikası ilə bağlıdır.Yeni əsginasın üzərində tanınmış Ukrayna alimi, Ukrayna Elmlər Akademiyasının ilk rəhbəri Vladimir Vernadskinin şəkli var.Qeyd edək ki, bundan öncə 500 qrivnalıq əsginas 2006-cı ildə dövriyyəyə buraxılıb.xeber100.com