Müstəqil Dövlətlər Birliyi İqtisadi Şurasının 100-cü iclası keçirilib

Moskvada Müstəqil Dövlətlər Birliyi (MDB) İqtisadi Şurasının 100-cü iclası keçirilib. Azərbaycanı iclasda Baş nazirin birinci müavini Yaqub Eyyubov təmsil edib. Qırğızıstan Respublikası Nazirlər Kabinetinin sədri, MDB İqtisadi Şurasının sədri Adılbek Kasımaliyevin sədrliyi baş tutan iclasda nümayəndə heyətlərinin başçıları MDB ölkələrinin iqtisadi sahədə əməkdaşlığının aktual məsələlərini müzakirə ediblər. Nümayəndə heyətlərinin başçıları əvvəlcə məhdud tərkibdə görüş keçiriblər. Sonra baş tutan geniş tərkibdə görüşdə MDB ölkələrinin ərazisindən keçən beynəlxalq nəqliyyat dəhlizlərinin inkişafına dair 2030-cu ilədək nəzərdə tutulmuş fəaliyyət planı, MDB ölkələrinin energetika sahəsində əməkdaşlıq planı, qarşılıqlı ticarət, intellektual mülkiyyət sahələrində qarşılıqlı fəaliyyət, milli nüvə infrastrukturlarının inkişafı üzrə baza təşkilatlarının yaradılması və bir çox digər məsələləri nəzərdən keçiriblər. Tərəflər, həmçinin MDB ölkələrinin hava hücumuna qarşı müdafiə sistemlərinin yaradılması və inkişafı, MDB-nin büdcə məsələlərinə dair sənədlər imzalayıblar. MDB-də sədrlik növbəti il üçün Qırğızıstandan Rusiyaya keçib. Rusiya hökuməti sədrinin müavini Aleksey Overçuk jurnalistlərə açıqlamasında qeyd edib ki, iclasda Rusiya MDB-də sədrliyinin əsas müddəalarını təqdim edib. O vurğulayıb ki, Rusiya sədrliyi dövründə energetika sahəsində təhlükəsizlik və qida təhlükəsizliyi sahələrinə üstünlük verəcək, nəqliyyat-logistika əlaqələrinin möhkəmləndirilməsi, ölkələrimizin məhsullarının qlobal Cənuba çıxması üçün “Şimal-Cənub” və “Şərq-Qərb” nəqliyyat dəhlizlərinin inkişafına önə çəkiləcək.xeber100.com

Azərbaycan Türkiyə iqtisadiyyatına 20 milyard dollara qədər investisiya yatırıb

Bu gün nəinki Türkiyənin Azərbaycana yatırmış olduğu investisiyalar, o cümlədən Azərbaycanın Türkiyəyə yatırmış olduğu investisiyalar xarici ölkələrə yatırılmış olan investisiyalarla müqayisədə birinci yerdədir. Azərbaycan Türkiyə iqtisadiyyatına 20 milyard dollara qədər investisiya yatırıb. O cümlədən Azərbaycanın qeyri-neft sektoruna ən çox investisiya yatıran Türkiyə şirkətləridir. Bu sözləri İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) İdarə Heyətinin sədrinin I müavini Natiq Həsənov bu gün Bakıda keçirilən "Heydər Əliyev-100 - Bir millət, iki dövlətin iş dünyası" mövzusundakı konfransda deyib. O bildirib ki, infrastruktur və digər sahələrdə olan ən strateji layihələrimiz bu göstəricilərin ortaya çıxmasında baza rolunu oynayıb. “Bu gün Türkiyə şirkətlərinin Qarabağa investisiya yatırması üçün 111 müraciət var. Bütün bunlar onu deməyə əsas verir ki, önümüzdə müəyyən olunan hədəflər böyük nəticələr əldə etməyə səbəb olacaq. Türkiyə şirkətlərinin sektoral və sahələr olaraq təşkilatda olmaq mədəniyyəti və təcrübəsi kifayət qədər yüksəkdir və biz bu təcrübədən gələcəkdə istifadə edəcəyik”, - deyə N.Həsənov qeyd edib.xeber100.com

Azərbaycanla Türkiyə arasında ticarət dövriyyəsi 7,5 milyard dollar olacaq

Azərbaycan və Türkiyə arasında bu ilin 10 ayında 6,7 milyard dollar dəyərində ticarət əməliyyatları aparılıb. Bu rəqəmi ilin sonunadək 20 faiz artıracağıq. Bunu Türkiyənin Azərbaycandakı səfiri Cahit Bağçı bu gün Bakıda keçirilən "Heydər Əliyev 100 - Bir millət, iki dövlətin iş dünyası" mövzusundakı konfransda deyib. Qardaş ölkənin səfiri bildirib ki, bu ilin sonunadək ölkələrimiz arasında ticarət dövriyyəsi 7,5 milyard dollar olacaq. C.Bağçı diqqətə çatdırıb ki, Azərbaycanla münasibətlər bütün sahələrdə inkişaf edir: “Bu münasibətlərdə iqtisadi əməkdaşlıq da xüsusi yer tutur. Əsas hədəfimiz Azərbaycanla ticarət dövriyyəsini 15 milyard dollara çatdırmaqdır və hazırkı rəqəmlər bu hədəfə gedən yolun yarısında olduğumuzu göstərir". Səfir, həmçinin Türkiyənin neft və təbii qaza olan tələbatının ödənilməsi baxımından qardaş ölkə Azərbaycanın birinci yerə yüksəldiyini və digər tərəfdən Azərbaycanın qərbə enerji ixracında Türkiyənin mühüm körpü olduğunu qeyd edib.xeber100.com

“Light” markalı neftin bir barelinin qiyməti 0,63 dollar azalaraq 73,44 dollar təşkil edib

Dünya birjalarında neft qiymətləri azalıb. Londonun ICE (“InterContinental Exchange Futures”) birjasında “Brent” markalı neftin bir barelinin qiyməti 0,72 dollar azalaraq 78,16 dollar olub. Nyu-Yorkun NYMEX (“New York Mercantile Exchange”) birjasında “Light” markalı neftin bir barelinin qiyməti isə 0,63 dollar azalaraq 73,44 dollar təşkil edib.xeber100.com

Neft Fondu tərəfindən ötən ay 234,7 milyon dollar məbləğində vəsait satılıb

Azərbaycan Respublikası Dövlət Neft Fondu tərəfindən ötən ay 234,7 milyon dollar məbləğində vəsait satılıb. Fondun yaydığı məlumata istinadən xəbər verir ki, bu, ötən ilin eyni dövrü ilə müqayisədə 42,7 faiz azdır. Ötən ilin noyabr ayında Dövlət Neft Fondu tərəfindən 410,2 milyon dollar məbləğində vəsait satılıb.xeber100.com  

Azərbaycan Yerüstü Nəqliyyat Agentliyi yol hərəkətinin təşkilində dəyişiklik həyata keçirib

Azərbaycan Yerüstü Nəqliyyat Agentliyi (AYNA) tərəfindən Səməd Vurğun küçəsinin Füzuli və Şəmsi Bədəlbəyli küçələri ilə kəsişmələrində, yol hərəkətinin təşkilində dəyişiklik həyata keçirilib. AYNA-dan bildirilib ki, həyata keçirilən işlər çərçivəsində Səməd Vurğun küçəsinin Şəmsi Bədəlbəyli və Füzuli küçələri ilə kəsişmələrində ikitərəfli hərəkət təşkil edilib. Geriyədönmə yerinin ölçülərini dəyişməklə Füzuli küçəsində yalnız sola hərəkətə icazə verən zolaqda düzünə və sola hərəkət təmin edilib. “Piyadaların rahat və təhlükəsiz hərəkətinin təmin edilməsi məqsədilə panduslar inşa olunub. Bundan başqa ərazidə müvafiq nişanlar quraşdırılıb və nişanlanma xətləri çəkilib. Görülən işlər Şəmsi Bədəlbəyli küçəsindən Səməd Vurğun küçəsinə şimal istiqamətində birbaşa çıxış imkanı yaradıb. Bununla da, kəsişmədə münaqişə nöqtələri minimuma endirilib, Rəşid Behbudov və Şəmsi Bədəlbəyli küçələrinin nəqliyyat yükü azalıb, yollarda təhlükəsizlik səviyyəsi yaxşılaşdırılıb”, - deyə məlumatda bildirilir. İnfrastruktur layihəsi nəticəsində Füzuli küçəsinin hərəkəti buraxma qabiliyyətinin 30 faizə qədər artacağı gözlənilir.xeber100.com

“Avrora” MMC “Tamstore” marketlər şəbəkəsi üçün işçi qəbulunu davam etdirir

“Avrora” MMC pərakəndə sektorunda fəaliyyətə başlamış “Tamstore” marketlər şəbəkəsi üçün işçi qəbulunu davam etdirir. Mağaza heyətinin tam formalaşdırılması üçün satıcı, kassir, fəhlə, qəssab, mühafizəçi və paketləyici vakansiyaları üzrə “Açıq Qapı” keçiriləcək. Karyerasını pərakəndə sektorunda qurmaq istəyənlər noyabrın 29-da saat 10:00-dan etibarən Avrora MMC-nin mərkəzi ofisinə (Nərimanov rayonu, Aşıq Molla Cümə 46C) yaxınlaşa bilərlər. Müsahibədən uğurla keçmiş namizədlər Bakı şəhərinin müxtəlif yerlərində (Badamdar, Bayıl, Binəqədi, Biləcəri, Xırdalan, Əmircan, Qaraçuxur, Xalqlar və Neftçilər metro stansiyası ərazilərində) yerləşən marketlərdə işlə təmin olunacaqlar. Mağazada 8 saatlıq növbəli iş qrafiki, bazar rəqabətli əməkhaqqı və nahar təmin ediləcək. Təcrübə tələb olunmur. Karyerasını qurmaq və inkişaf etdirmək istəyənlər üçün “Tamstore” tam işləmək istədiyiniz yer olacaq! Müsahibəyə gələrkən şəxsiyyət vəsiqəsi və kişi namizədlər üçün hərbi biletin təqdim edilməsi vacibdir.xeber100.com

“Light” markalı neftin bir barelinin qiyməti 0,58 dollar ucuzlaşaraq 76,52 dollar təşkil edib

Dünya birjalarında neft qiymətləri müxtəlif istiqamətlərdə dəyişib. Londonun ICE (“InterContinental Exchange Futures”) birjasında “Brent” markalı neftin bir barelinin qiyməti 0,04 dollar artaraq 81,46 dollar olub. Nyu-Yorkun NYMEX (“New York Mercantile Exchange”) birjasında “Light” markalı neftin bir barelinin qiyməti isə 0,58 dollar ucuzlaşaraq 76,52 dollar təşkil edib.xeber100.com

Azərbaycan Dəmir Yolları: Bakı-Ağstafa-Bakı marşrutu üzrə əlavə reyslər təyin edir

Azərbaycan Dəmir Yolları (ADY) artan sərnişin tələbatını nəzərə alaraq həftəsonuna Bakı-Ağstafa-Bakı marşrutu üzrə əlavə reyslər təyin edir. ADY-dən bildirilib ki, noyabrın 25-də saat 7:50-də Bakıdan yola düşən qatar saat 12:51-də Ağstafaya çatacaq. Noyabrın 26-da saat 16:30-da Ağstafadan yola düşən qatar saat 21:35-də Bakıya çatacaq.

Kosmos sahəsi üzrə əməkdaşlıq haqqında Anlaşma Memorandumu imzalanıb

Rəqəmsal İnkişaf və Nəqliyyat Nazirliyi yanında Azərbaycan Respublikasının Kosmik Agentlik (Azərkosmos) və Braziliya Kosmik Agentliyi arasında kosmos sahəsi üzrə əməkdaşlıq haqqında Anlaşma Memorandumu imzalanıb. “Azərkosmos”dan bildirilib ki, sənəd iki ölkə arasında kosmik elm, texnologiya və tətbiq sahələrinə dair əməkdaşlığı nəzərdə tutur və kosmik sahədə gələcək əməkdaşlıq üçün çərçivə yaratmaqda alət rolunu oynayacaq. Memorandum çərçivəsində tərəflər kənd təsərrüfatı, su ehtiyatları, şəhər və regional planlaşdırma, ətraf mühitin qiymətləndirilməsi, torpaq örtüyünün xəritəsi, fəlakətlərin monitorinqi, təbii ehtiyatların xəritələşdirilməsi, dəniz və yerüstü monitorinqi, geoməkan sistemləri, yerüstü peyk stansiyalarında kommunikasiyaya aid peyk görüntülərinin emalının nəticəsi olaraq, hər iki ölkədə sosial-iqtisadi inkişafı dəstəkləmək istiqamətlərini genişləndirəcək. Həmçinin kosmik elm, texnologiyalar və tətbiqlər sahələrində hər iki ölkənin peşəkarları üçün akademik və təlim imkanları araşdırılacaq. “Azərkosmos”un sədri Saməddin Əsədov kosmos sahəsində Braziliya ilə əməkdaşlığın vacibliyini vurğulayaraq qeyd edib ki, bu Memorandum və daha sıx tərəfdaşlıq nəticəsində Azərbaycanın kosmik sənayesi inkişaf etdiriləcək və kosmosla bağlı fəaliyyət genişləndiriləcək. Braziliya Kosmik Agentliyinin rəhbəri Marko Antonio Şamon bildirib ki, Azərbaycanın kosmik sektorda böyük potensialı var və ondan müxtəlif sahələrin, o cümlədən elmi tədqiqatlar, texnoloji innovasiyalar, təhsil və iqtisadiyyatın inkişafı üçün uğurla istifadə edilə bilər.xeber100.com

Mərkəzi Bank noyabrın 17-nə olan USD/AZN rəsmi məzənnəsini açıqlayıb

Azərbaycan Mərkəzi Bankı (AMB) noyabrın 17-nə olan USD/AZN rəsmi məzənnəsini açıqlayıb. AMB-dən bildirilib ki, bankın noyabrın 17-nə USD/AZN rəsmi məzənnəsi 1,7000 səviyyəsində müəyyən olunub.xeber100.com

“Azərsu” ASC: Binəqədi rayonunda içməli suyun verilməsində fasilə yaranacaq

Binəqədi rayonunda içməli suyun verilməsində fasilə yaranacaq. Bu barədə  “Azərsu” ASC-dən məlumat verilib. Bildirilib ki, magistral su kəmərində baş vermiş qəza ilə əlaqədar rayonun 7-ci və 8-ci mikrorayonlarına gün ərzində içməli suyun verilməsində məhdudiyyətlər olacaq.xeber100.com

Bakı-Qəbələ-Bakı marşrutu üzrə xəttə 10 əlavə qatar reysi təyin edib

“Azərbaycan Dəmir Yolları” QSC (ADY) bayram günlərində artan sərnişin tələbatının qarşılanması məqsədilə Bakı-Qəbələ-Bakı marşrutu üzrə xəttə 10 əlavə qatar reysi təyin edib. ADY-dən bildirilib ki, 8, 9, 10, 11 və 12 noyabr tarixlərində Bakı-Qəbələ-Bakı marşrutu üzrə qatar hər gün saat 07:30-da Bakı Dəmiryol Vağzalından Qəbələyə, saat 19:00-da isə Qəbələ Dəmiryol Vağzalından Bakıya yola düşəcək. Bundan başqa, Nazirlər Kabinetinin qərarına əsasən, iş və istirahət günlərinin ardıcıllığını təmin etmək məqsədilə noyabrın 4-ü iş günü sayıldığından həmin günə olan reys ləğv edilərək əvəzində noyabrın 5-də Bakı-Qəbələ-Bakı marşrutu üzrə qatar təyin olunub. Qeyd edək ki, hazırda Bakı-Qəbələ-Bakı sürətli sərnişin qatarı həftənin şənbə və bazar günləri hərəkət edir. Marşrut üzrə bir istiqamətə gediş haqqı standart sinif üçün 14 AZN təşkil edir. Biletləri dəmiryol vağzallarının kassalarından bəldə etmək mümkündür.xeber100.com

Avropa İttifaqı ölkələri qaz və elektrik enerjisinə qənaət etməyə davam etməli olacaqlar

Uzun müddət yüksək enerji xərcləri ilə üzləşəcək Avropa İttifaqı (Aİ) ölkələri qaz və elektrik enerjisinə qənaət etməyə davam etməli olacaqlar. Xarici KİV-lər xəbər verir ki, Avropa İttifaqına üzv ölkələrin keçən il enerji böhranı ilə əlaqədar həyata keçirdikləri təbii qaz istehlakının azaldılması, işıqların müəyyən vaxtlarda söndürülməsi və binalarda temperaturun aşağı salınması kimi müxtəlif qənaət tədbirlərini davam etdirmələri, həmçinin yeni tədbirlər görmələri gözlənilir. Keçən il başlayan Rusiya-Ukrayna müharibəsi ilə Rusiya Avropaya təbii qaz nəqlini dayandırdı, Aİ ölkələri isə enerji, xüsusilə təbii qaz və elektrik sahəsində böyük problemlər yaşadı. Avropa ölkələri xüsusilə ötən ilin əvvəlindən sürətlə artan təbii qaz və elektrik enerjisi qiymətləri ilə qarşılaşıb. Bu halda Aİ-nin enerji sahəsində Rusiyaya alternativi tez tapması mümkün olmadığından, yüksək enerji xərclərinin daha uzun müddət davam edəcəyi gözlənilir. Enerji qiymətlərinin qısa müddətdə azalmayacağı səbəbindən Aİ ölkələri qaz və elektrik enerjisinə qənaət etməyə davam etməli olacaq. Aİ ölkələri hər il təxminən 400 milyard kubmetr təbii qaz istehlak edir ki, bunun da 40 faizi Rusiyadan gəlir. Rusiyadan gələn axının kəsilməsi ilə Aİ ölkələri təcili olaraq təbii qaz istehlaklarını azaltmaq planını həyata keçirdilər. Bu çərçivədə Aİ ölkələri təbii qaz istehlaklarını son 5 ildə orta hesabla 15 faiz azaltmağa razılaşıblar. Bu plana fövqəladə hallarda istehlakın azaldılmasını məcburi edəcək maddələr də daxil edilib. Avropanın qaza tələbatın azaldılması planı qazdan alternativ yanacağa keçidin sürətləndirilməsi, istehlakın azaldılmasının təşviq edilməsi, isitmə və soyutmanın azaldılması kimi əsas elementləri əhatə edir. Qənaət tədbiri ilə yanaşı, təbii qaz çənlərinin qış mövsümünə qədər doldurulması üçün də hazırlıq işləri görülüb. Aİ ölkələrinin 110 milyard kubmetrə qədər təbii qaz anbarı tutumu var. Müharibənin başlaması ilə Aİ ölkələri yeraltı təbii qaz çənlərinin qış aylarına qədər doldurulmasını məcburi edəcək qanuni tənzimləmələr hazırladılar. Bu çərçivədə qaz çənlərindəki doluluğun qış dövrünə qədər 90 faizə çatdırılması planlaşdırılıb və həyata keçirilib. Bu məqamda boru kəməri qazından qat-qat baha başa gələn mayeləşdirilmiş təbii qazın (LNG) daşınması sürət qazanıb. Aİ-yə üzv ölkələrdə elektrik istehlakının 10 faiz azaldılmasını və pik saatlarda istehlakın məcburi olaraq 5 faiz azaldılmasını ehtiva edən fərqli bir plan hazırlandı. Bu çərçivədə Avropa ölkələri enerji qənaətini sürətləndirdi. Vətəndaşlardan və dövlət qurumlarından enerji qənaətinə diqqət yetirmələri istənilib. Avropa ölkələrində vətəndaşlara evlərində temperaturun aşağı salınması və işıqların söndürülməsi də daxil olmaqla enerjiyə qənaət tədbirlərinin həyata keçirilməsi çağırışları edilib. Aİ ölkələrində ictimai binalarda qış temperaturu azaldılıb və yayda soyutma səviyyəsi məhdudlaşdırılıb. Bəzi ölkələrdə iş yerlərində istilik sisteminin maksimum 19 dərəcə istilikdə işlədilməsi qərara alınıb. Gecələr mağaza vitrinlərinin işıqlarını yandırmaq qadağan olunub. Mağazanın işıqlandırılmasına yalnız müəyyən saatlarda icazə verilib. Bundan əlavə, ev təsərrüfatlarını enerjiyə qənaət etməyə təşviq etmək üçün ictimai xidmət elanları hazırlanıb. İctimai binalarda işıqlandırma saat 22:00-dan etibarən söndürülüb. Müəyyən dərəcədə uğurlu olan bu tədbirlərin əhəmiyyətli hissəsinin bu qış mövsümündə də davam etdirilməsi nəzərdə tutulur.xeber100.com

Dünya Bankı ilə əməkdaşlığın perspektivləri müzakirə edilib

Energetika naziri Pərviz Şahbazov ilə Dünya Bankının enerji və infrastruktur üzrə regional direktoru Çarlz Cozef Kormier arasında görüş olub. Nazirlikdən bildiriblər ki, görüşdə Azərbaycanın təbii qaz və bərpa olunan enerji sahələrinin inkişafına dair siyasətinin hazırkı vəziyyəti və planları çərçivəsində Dünya Bankı ilə əməkdaşlığın inkişafı müzakirə edilib. Xüsusilə Dünya Bankının apardığı təhlillər əsasında qaz tədarükünə tələbat və bu sahəyə investisiya cəlb olunmasının perspektivi, eləcə də Azərbaycanın enerji keçidi istiqamətində fəaliyyəti və bərpa olunan enerji mənbələrinin payının 2030-cu ilədək 30 faizə çatdırılması hədəfinin reallaşdırılması ilə bağlı fikir mübadiləsi aparılıb. Enerji təhlükəsizliyinin təminatında sabitlik aspektində diversifikasiya layihəsi Cənub Qaz Dəhlizinin genişləndirilməsinin əhəmiyyətindən bəhs edilib və bu xüsusda maliyyə institutları ilə əməkdaşlıq nəzərdən keçirilib. Həmçinin bərpa olunan enerji və enerji səmərəliliyi sahələrində Dünya Bankı ilə birgə icra edilən layihələrdən danışılıb. Bildirilib ki, hazırda Beynəlxalq Maliyyə Korporasiyası (IFC) ilə dənizdə külək enerjisindən istifadə üzrə Yol Xəritəsi çərçivəsində, eləcə də “Azərbaycan üçün Çevik Texniki Yardım Proqramının (AZTAF) enerji səmərəliliyi komponenti üzrə məsləhətçi xidmətlərinin göstərilməsi”, “Azərbaycanın enerji sistemində bərpa olunan enerji güclərinin genişləndirməsinə dəstək” layihələri üzrə əməkdaşlıq edilir. Eyni zamanda, qeyd edilib ki, 1862 MVt gücündə bərpa olunan enerji stansiyalarının şəbəkəyə inteqrasiyası məqsədilə elektrik enerjisi şəbəkəsinin gücləndirilməsi ilə bağlı Dövlət Proqramı hazırlanır. Söhbət zamanı “Gürcüstan-Rumıniya Qara dəniz sualtı enerji və rəqəmsal qoşulma xətti” layihəsinin texniki-iqtisadi əsaslandırılması prosesində iştirak edən Dünya Bankı ilə “yaşıl enerji”nin “Xəzər-Avropa İttifaqı Yaşıl Enerji Dəhlizi” və Naxçıvan üzərindən Türkiyə-Avropa xətti ilə ötürülməsi, həmçinin digər potensial istiqamətlər üzrə də əməkdaşlıq imkanları dəyərləndirilib.xeber100.com  

Qarşılıqlı əməkdaşlığa dair anlaşma memorandumunun imzalanması mərasimi keçirilib

“AzerGold” Qapalı Səhmdar Cəmiyyəti (QSC), “Azərbaycan İnvestisiya Şirkəti” Açıq Səhmdar Cəmiyyəti və Hindistanın “Devngi Innovations LLP” şirkəti arasında qarşılıqlı əməkdaşlığa dair anlaşma memorandumunun imzalanması mərasimi keçirilib. QSC-dən bildirilib ki, Ekologiya və Təbii Sərvətlər Nazirliyində keçirilən mərasimdə memorandumu “AzerGold” QSC-nin İdarə Heyətinin sədri Zakir İbrahimov, “Azərbaycan İnvestisiya Şirkəti” ASC-nin icraçı direktoru Ülvi Mansurov və “Devngi İnnovations LLP” şirkətinin səlahiyyətli nümayəndəsi Sanat Nareşkumar Vaviya imzalayıblar. Anlaşma memorandumunun imzalanmasında əsas məqsəd Azərbaycan-Hindistan tərəfdaşlığı əsasında ölkəmizdə sintetik (süni) almaz sənayesi, təbii almaz emalı infrastrukturunun qurulması imkanlarının öyrənilməsi, birgə şirkətin yaradılması və fəaliyyətinin təşkil edilməsidir. Z.İbrahimov qeyd edib ki, müasir nəqliyyat-logistika infrastrukturuna malik olan Azərbaycanın əlverişli coğrafi mövqeyi iqtisadiyyatın ən müxtəlif sahələrində beynəlxalq əməkdaşlıq əlaqələrini inkişaf etdirməyə imkan verir. Bu xüsusda dünyada sintetik almaz istehsalı sahəsində aparıcı ölkə hesab edilən Hindistanla əməkdaşlıq şəraitində yeni istehsal infrastrukturunun qurulması ölkə iqtisadiyyatı üçün geniş perspektivlər vəd edir. İdarə Heyətinin sədri təbii və sintetik almazların emalı proseslərinin oxşar olduğunu nəzərə alaraq, Azərbaycanın Kimberley Prosesinə üzv kimi qəbul edilməsi üçün aidiyyəti dövlət qurumlarına müraciət edildiyini və həmin qurumlar tərəfindən prosesə başlanıldığını bildirib. Z.İbrahimov Azərbaycanın bu Prosesə üzvlüyü təsdiqləndikdən sonra təbii almaz emalı sahəsinin qurulması istiqamətində də tərəflərin birgə səyləri ilə müvafiq addımların atılacağını qeyd edib. O əlavə edib ki, layihənin uğurlu icrası nəticəsində yeni istehsal sahələri, iş yerləri yaranacaq, yeni növ məhsulların ixracı, idxalı həyata keçiriləcək. Bu, qeyri-neft sektorunun Ümumi Daxili Məhsulda payının artmasına, ölkəmizin zərgərlik sənayesinin çoxşaxəli inkişafına da öz müsbət təsirlərini göstərəcək. Ekologiya və təbii sərvətlər naziri, Azərbaycan Respublikası və Hindistan Respublikası arasında Ticarət, İqtisadi, Elmi və Texnoloji Əməkdaşlıq üzrə Hökumətlərarası Komissiyanın həmsədri Muxtar Babayev isə ölkəmizdə sintetik almaz sənayesinin, təbii almaz emalının təşkili istiqamətində qurulan əməkdaşlığın Azərbaycan və Hindistan arasında mövcud iqtisadi əlaqələrin inkişafı baxımından mühüm əhəmiyyət kəsb etdiyini bildirib. Tədbirdə, həmçinin “Azərbaycan İnvestisiya Şirkəti” ASC-nin icraçı direktoru Ü.Mansurov, Ələt Azad İqtisadi Zonasının səlahiyyətli qurumunun İdarə Heyətinin sədri Valeh Ələsgərov, “Devngi İnnovations LLP” şirkətinin səlahiyyətli nümayəndəsi S.N.Vaviya çıxış edərək, ilkin mərhələdə sintetik almaz istehsalı üzrə Ələt Azad İqtisadi Zonasında yaradılması nəzərdə tutulan birgə müəssisənin fəaliyyəti ilə Azərbaycan üçün ənənəvi olmayan sektorun təməlinin qoyulacağına diqqət çəkiblər. Qeyd edək ki, Hindistanın “Devngi İnnovations LLP” şirkəti sintetik almaz sənayesində geniş təcrübəyə malik olmaqla, CVD (kimyəvi buxarçökmə texnologiyası ilə yetişdirilən sintetik almazlar) almazlarının istehsalçısıdır.

Dövlətlərarası Şurasının növbəti 46-cı sessiyası gələn il avqust-sentyabr aylarında Qazaxıstanda keçiriləcək

Müstəqil Dövlətlər Birliyinə üzv dövlətlərin Geodeziya, xəritəçəkmə, kadastr və Yerin məsafədən zondla tədqiq edilməsi üzrə Dövlətlərarası Şurasının növbəti 46-cı sessiyası gələn il avqust-sentyabr aylarında Qazaxıstanda keçiriləcək. İqtisadiyyat Nazirliyi yanında Əmlak Məsələləri Dövlət Xidmətindən bildirilib ki, Dövlətlərarası Şuranın Belarusun Vitebsk şəhərində keçirilmiş 45-ci sessiyasında onlayn iştirak edən qurumun rəis müavini Rüstəm Şahbazov iclasın əhəmiyyətindən danışıb. Sessiyada kadastr, daşınmaz əmlak üzərində hüquqların qeydiyyatı və daşınmaz əmlakın qiymətləndirilməsi, Məkan Məlumatları İnfrastrukturu, koordinat və hündürlük sistemləri və digər məsələlərlə bağlı məruzələr dinlənilib, müvafiq işçi qruplarının sessiyalararası fəaliyyəti üzrə müzakirələr aparılıb.xeber100.com

“Azərbaycan Respublikası Rəqabət Məcəlləsinin təsdiq edilməsi haqqında” qanun layihəsi təsdiq edilib

Milli Məclis Azərbaycan Respublikası Konstitusiyasının 94-cü maddəsinin I hissəsinin 15-ci bəndinə əsasən “Azərbaycan Respublikası Rəqabət Məcəlləsinin təsdiq edilməsi haqqında” qanun layihəsini ikinci oxunuşda təsdiq edib. Sənəd parlamentin oktyabrın 20-də keçirilən iclasının gündəliyində müzakirəyə çıxarılıb. Qeyd edək ki, 12 fəsil, 84 maddədən ibarət olan sənəd doqquz əsas istiqamət üzrə tənzimləməni özündə ehtiva edir. Məcəllədə haqsız rəqabətin formaları, rəqib təsərrüfat subyektini nüfuzdan salan, rəqibin sahibkarlıq fəaliyyətini təqlid edən, müştəriləri çaşdırmağa, yaxud aldatmağa yönəldilmiş hərəkətlərlə bağlı maddələr yer alıb. Sənəddə rəqabət siyasətinin prinsipləri, Məcəllənin tətbiq dairəsi, rəqabətin əhəmiyyətli dərəcədə məhdudlaşdırılması ilə bağlı müddəalar öz əksini tapıb. Rəqabət sahəsində bazar subyektlərinin vəzifələri və hüquqları ilə müddəaların yer aldığı qanun layihəsi rəqabət mühitinin tənzimlənməsi, inhisarçılıqla mübarizə məqsədilə hazırlanıb. Rəqabət Məcəlləsinin qəbul olunması ölkə iqtisadiyyatının inkişafı, biznes mühitinin əlverişliliyinin artırılması, azad sahibkarlığın təşviqi baxımından mühüm əhəmiyyət kəsb etməklə, ölkədə sahibkarların sağlam rəqabət şəraitində fəaliyyətinin hüquqi əsaslarını müəyyən edəcək. Yeni məcəllə, eyni zamanda, istehlakçıların hüquqlarının müdafiəsini, məhsul və xidmətlərin keyfiyyətinin daha da artırılmasını hədəfləyir. Məcəllənin qəbulu ilə “Antiinhisar fəaliyyəti haqqında”, “Haqsız rəqabət haqqında”, “Təbii inhisarlar haqqında” qanunlar ləğv edilir və bazar iqtisadiyyatında rəqabətlə bağlı digər hüquqi aktlar yeni, vahid hüquqi sənəddə birləşdirilir. Xatırladaq ki, qanun layihəsi əvvəllər Milli Məclisin plenar iclasında müzakirə edilsə də, üçüncü oxunuşdan keçməyib. Bu Qanun dərc edildiyi gündən 6 ay sonra qüvvəyə minəcək. Qanun layihəsi səsvermədən sonra ikinci oxunuşda qəbul edilib.xeber100.com

“28 May” və “Nərimanov” stansiyalarında ehtiyat nəzarət mexanizmləri tətbiq ediləcək

Azərbaycanın millisinin AVRO-2024-ün seçmə mərhələsində Avstriya yığması ilə keçirəcəyi oyunla əlaqədar axşam saatlarından başlayaraq Bakı metropoliteninin iş rejimində bəzi dəyişikliklər olacaq. “Bakı Metropoliteni” QSC-dən bildirilib ki, oktyabrın 16-da saat 20:00-da Tofiq Bəhramov adına Respublika stadionunda başlanacaq oyun ərəfəsində arenanın yaxınlığında yerləşən “Gənclik” stansiyasında gücləndirilmiş iş rejimi tətbiq olunacaq. Həmçinin “28 May” və “Nərimanov” stansiyalarında ehtiyat nəzarət mexanizmləri tətbiq ediləcək. Paytaxtda keçirilən kütləvi tədbirlərlə əlaqədar metropolitenin əməliyyat planına uyğun olaraq, oyun ərəfəsində sərnişinlərin səmti rahatlıqla müəyyən edərək arenaya yollanması məqsədilə xüsusi tərtib olunmuş növbətçilik cədvəli əsasında stansiyaya əlavə işçi qüvvəsi ayrılacaq. Gün ərzində qatarların hərəkəti qrafiki payız-qış iş rejiminin tələblərinə uyğun tənzimlənəcək. Lakin oyunla əlaqədar qrafik nəzərə alınmaqla müvafiq tənzimləmə mexanizmləri diqqətdə saxlanılacaq. Ehtiyac yaranacağı təqdirdə ehtiyat qatarlar xəttə buraxılacaq. Həmçinin oyun bitdikdən sonra da sərnişinlərin mənzil başına təhlükəsiz və rahat çatdırılması üçün ehtiyat qatarlar hazır vəziyyətə gətiriləcək. Bununla əlaqədar qatarların hərəkət cədvəli daha da intensivləşdirilməklə stansiyadan keçən qatarlar üçün xüsusi cədvəl əsasında interval azaldılacaq.xeber100.com

Milli Məclisin İqtisadi siyasət, sənaye və sahibkarlıq komitəsinin növbəti iclası keçirilib

Oktyabrın 13-də Milli Məclisin İqtisadi siyasət, sənaye və sahibkarlıq komitəsinin növbəti iclası keçirilib. Komitənin sədri Tahir Mirkişili iclasın gündəliyinə 5 məsələnin daxil edildiyini deyib. Gündəliyin birinci məsələsi - “Mühasibat uçotu haqqında” Qanunda dəyişiklik edilməsi barədə qanun layihəsi (birinci oxunuş) barədə məlumat verən komitə sədri diqqətə çatdırıb ki, bu sənəd layihəsi mühasibat uçotunu məcburi qaydada elektron formada aparacaq mühasibat uçotu subyektlərinin (hüquqi və fiziki şəxslərin) dairəsinin müəyyən edilməsi məqsədilə hazırlanıb. Bu dəyişiklik Vergi Məcəlləsində təsbit olunan elektron auditin aparılmasına dəstək verəcək, həmçinin layihədə qeyd olunan vergi ödəyiciləri tərəfindən müvafiq məlumatların aidiyyəti üzrə təqdim edilməsi sahəsində operativliyi artıracaqdır. Dəyişikliyə əsasən, vergi daxilolmalarında xüsusi çəkisi yüksək olan, məşğul olduqları fəaliyyət sahələri dövlət üçün strateji əhəmiyyət kəsb edən iri və orta sahibkarlıq subyektlərinin, qanunla təsdiq edilmiş hasilatın pay bölgüsü, əsas ixrac boru kəməri haqqında və digər belə sazişlər və ya qanunlar, o cümlədən neft və qaz haqqında, ixrac məqsədli neft-qaz fəaliyyəti haqqında qanunlar çərçivəsində fəaliyyət göstərən vergi ödəyicilərinin mühasibat uçotunun elektron qaydada aparılması təklif olunur. Bu qanunun 3.1-1.3-cü maddəsi Azərbaycan Respublikasının Mərkəzi Bankına şamil edilmir. Məsələ barədə çıxış edən komitə üzvləri Vüqar Bayramov, Elnur Allahverdiyev, Vahid Əhmədov, Mahir Abbaszadə, İqbal Məmmədov, Ziyad Səmədzadə qanun layihəsinin əhəmiyyətindən danışıblar, onun ölkə iqtisadiyyatının inkişafına töhfə verəcəyinə əminliklərini ifadə ediblər. Sonra iclasda iştirak edən maliyyə nazirinin müavini Azər Bayramov, Dövlət Vergi Xidmətinin rəis müavini İlkin Vəliyev deputatların suallarını cavablandırıblar, onların qaldırdıqları məsələlərə aydınlıq gətiriblər. Qanun layihəsi birinci oxunuşda Milli Məclisin plenar iclasında müzakirəyə tövsiyə olunub. Sonra İqtisadi siyasət, sənaye və sahibkarlıq komitəsinin sədri Tahir Mirkişili gündəliyin ikinci məsələsi olan “Ödəniş xidmətləri və ödəniş sistemləri haqqında” Azərbaycan Respublikasının 2023-cü il 14 iyul tarixli 987-VIQ nömrəli Qanununun icrası ilə əlaqədar Azərbaycan Respublikasının bəzi qanunlarında dəyişiklik edilməsi barədə qanun layihəsi (birinci oxunuş) haqqında məlumat verib. O, bildirib ki, bu qanunun icrası ilə əlaqədar 17 qanuna dəyişiklik təklif olunur. Dəyişikliklər ödəniş xidmətlərinin daha da təkmilləşdirilməsi üçündür. Bu qanun layihəsi də birinci oxunuşda Milli Məclisin plenar iclasında müzakirəyə tövsiyə edilib. Sonra iclasda ikinci oxunuşda olan “Dövlət rüsumu haqqında” Qanuna dəyişiklik edilməsi barədə iki qanun layihəsinə, həmçinin “Poçt haqqında” Qanuna dəyişiklik edilməsi barədə qanun layihəsinə təklif olunan dəyişikliklərə də baxılıb. Hər üç qanun layihəsi Milli Məclisin plenar iclasına tövsiyə olunub.xeber100.com