TBMM-nin sessiyasında yeni spikerinin seçkiləri keçirilir

Bu gün 28-ci çağırış Türkiyə Böyük Millət Məclisinin (TBMM) sessiyasında parlamentin yeni spikerinin seçkiləri keçirilir. Türkiyə KİV-ləri xəbər verir ki, artıq seçkilərin birinci turu başa çatıb. Birinci turun nəticələrinə görə, parlamentin sədri vəzifəsinə Millət İttifaqından namizəd Numan Kurtulmuş 317 səs, Cümhuriyyət Xalq Partiyasının namizədi Tekin Bingöl isə 131 səs toplayıblar. Ümumilikdə, spikerliyə 7 millət vəkilinin namizədliyi irəli sürülüb. TBMM-nin 30-cu sədri olmaq üçün namizədlərdən birinin 600 millət vəkilindən 400-nün səsini toplaması lazımdır. Onların ikinci turda da bu rəqəmə çatmadığı təqdirdə, seçkilərin üçüncü turu keçiriləcək. Sonuncu turda isə səslərin əksəriyyətini – 301-ni toplayan namizəd parlamentin yeni spikeri olacaq. Xatırladaq ki, son parlament seçkilərində hakim Ədalət və İnkişaf Partiyası 268, Cümhuriyyət Xalq Partiyası 169, İYİ partiya 43, Yeni Rifah Partiyası 5, Sol Yaşıllar Partiyası 61, Xalq Hərəkatı Partiyası 50 millət vəkili yerinə sahib olublar.xeber100.com

Pensiya islahatı əleyhinə etiraz nümayişləri davam edir

Fransada pensiya islahatı əleyhinə ümummilli etiraz nümayişləri davam edir. Həmkarlar ittifaqlarının çağırışı ilə bu gün fransızlar 14-cü etiraz nümayişinə çıxacaqlar. Ölkənin 250 şəhər və qəsəbəsində etirazçıların küçələrə axışacağı gözlənilir. Hökumət Parisdə 600 minədək, digər şəhərlərdə isə 70 minə qədər nümayişçi olacağını ehtimal edir. Paytaxtda nümayişçilər yerli vaxtla saat 14:00-da “İnvalides” muzeyin qarşısından “Place d'Italie” meydanına doğru irəliləyəcək. Etiraz aksiyaları bir çox sektorlarda, xüsusilə də nəqliyyat sektorunda böyük problemlər yaradıb. Parisdə bütün ictimai nəqliyyat vasitələri iflic vəziyyətindədir. Həmçinin Orly və Charles–de–Gaulles, eləcə də Lion, Marsel, Nitsa, Tuluza, Bordo və Nant kimi şəhərlərdə hava limanlarının dispetçerləri tətil etdiyi üçün bir çox uçuşlar ləğv olunub. Fransanın daxili işlər naziri J.Darmanən 4 mini Parisdə olmaqla, 11 min polis və jandarmın təhlükəsizliyi təmin etmək məqsədilə səfərbər olunduğunu bildirib. Ölkədə siyasi mübarizə aylardır davam edir. İslahatın tətbiqi, eləcə də pensiya yaşının mərhələli şəkildə 62-dən 64-ə qaldırılması ilə bağlı iki fərman artıq rəsmi jurnalda dərc edilib. Milli Assambleya iyunun 8-də qanun layihəsinin bəzi bəndlərinin ləğv edilməsinə dair Liot qrupunun təklifini müzakirəyə çıxaracaq.xeber100.com

Türkiyə dövlət başçısı 67-ci hökumətin tərkibini açıqlayıb

İyunun 3-də keçirilən andiçmə mərasimindən sonra səlahiyyətlərinin icrasına başlayan Türkiyə Respublikasının Prezidenti Rəcəb Tayyib Ərdoğan yeni hökumətin tərkibini elan edib. Anadolu agentliyi xəbər verir ki, Çankaya sarayında keçirilən tədbirdə dövlət başçısı 67-ci hökumətin tərkibini açıqlayıb. Yeni hökumətdə vitse-prezident vəzifəsini Cevdet Yılmaz tutub. Yılmaz Tunç ədliyyə, Mahinur Özdemir Göktaş ailə və sosial xidmətlər, Vedat İşıkhan əmək və sosial müdafiə, Mehmet Özhaseki şəhərləşmə və iqlim dəyişikliyi, Hakan Fidan xarici işlər, Alparslan Bayraktar energetika və təbii sərvətlər, Osman Aşkın Bak gənclik və idman, Mehmet Şimşək xəzinə və maliyyə, Ali Yerlikaya daxili işlər, Mehmet Nuri Ersoy mədəniyyət və turizm, Yusuf Tekin milli təhsil, Yaşar Güler milli müdafiə, Fəxrəddin Qoca səhiyyə, Mehmet Fatih Kacır sənaye və texnologiya, İbrahim Yumaklı kənd təsərrüfatı və meşə, Ömər Bolat ticarət, Abdulkadir Uraloğlu nəqliyyat və infrastruktur naziri vəzifələrinə təyin olunublar.xeber100.com

Rusiya Mərkəzi Bankının 200 milyard avrodan çox aktivi dondurulub

Avropa İttifaqı ölkələrində Rusiya Mərkəzi Bankının 200 milyard avrodan çox aktivi dondurulub. Bu barədə Avropa Komissiyasının mətbuat katibi Kristian Viqand Brüsseldə keçirilən mətbuat konfransında deyib. “Operatorlar və üzv dövlətlər Moskvaya qarşı 10-cu sanksiya paketinə uyğun olaraq, Rusiya Mərkəzi Bankının dondurulmuş aktivləri barədə komissiyaya məlumat verib. Yalnız Avropa İttifaqında dondurulan aktivlərin həcmi 200 milyard avrodan çoxdur” - deyə Kristian Viqand bildirib. Avropa Komissiyasının mətbuat katibi Rusiyanın dondurulmuş vəsaitlərinin Ukraynaya verilməsi planları barədə sualı isə belə cavablandırıb: “Bunun üzərində gərgin iş gedir. Biz Rusiyanın Ukraynaya vurduğu zərəri ödəməsini istəyirik”. Onun sözlərinə görə, Rusiya Mərkəzi Bankının aktivlərindən bu məqsədlə istifadə edilməsi üzv dövlətlərin təklif etdiyi variantlardan biridir.xeber100.com

Avropa İttifaqı “vizasız iqtisadi rejimi” daha bir il müddətinə uzadıb

Avropa İttifaqı Şurası Ukraynanın Avropa İttifaqına ixracatında daha bir il, yəni 2024-cü ilin iyun ayına qədər bütün rüsumların, kvotaların və ticarətin müdafiə edilməsi tədbirlərinin dayandırılması müddətini uzadan qərar qəbul edib. Bu barədə Aİ Şurasının mətbuat xidməti xəbər verir. Qərar giriş qiymətləri sisteminin şamil edildiyi meyvə və tərəvəzlərin ixracı və tarif kvotalarının şamil olunduğu kənd təsərrüfatı məhsulları və emal olunmuş aqrar məhsullara aiddir. Məlumatda deyilir: “Bu tədbirləri bərpa edərək, Aİ hələ də Rusiyanın səbəbsiz və əsassız hərbi təcavüzü ilə üzləşən Ukraynaya güclü siyasi və iqtisadi dəstəyini nümayiş etdirməyə davam edir”. Bu tədbirlərin Ukraynaya Aİ ilə ticarət münasibətlərinin sabitliyini qoruyub saxlamaqda və çox çətin şəraitdə iqtisadiyyatı dəstəkləməkdə kömək edəcəyi gözlənilir. Aİ Şurası əlavə edir ki, qərar əhəmiyyətli dərəcədə hərbi, maliyyə və humanitar dəstəklə birlikdə Ukraynaya uzunmüddətli bərpa prosesində yardımın göstərilməsində həlledici əhəmiyyət kəsb edir.xeber100.com

“Tayfun” ballistik raketinin yeni sınaqları keçirilib

Bu gün Türkiyədə ilk milli ballistik raketin - "Tayfun"un yeni sınaqları keçirilib. Bu barədə Türkiyənin müdafiə sənayesi naziri İsmail Demir tviter səhifəsində məlumat verib. O, raketin uğurla buraxıldığını bildirib. TRT telekanalının məlumatına görə, raket yerli vaxtla saat 06:44-də Qara dəniz sahilindəki Rize-Artvin hava limanı rayonundan buraxılıb. Buraxılış zamanı hava limanında və ətrafında gücləndirilmiş təhlükəsizlik tədbirləri görülüb. Türkiyə Prezidenti Rəcəb Tayyib Ərdoğan bir müddət əvvəl bildirmişdi ki, raketin 561kilometr olan uçuş məsafəsinin 1000 kilometrə çatdırılması planlaşdırılır. Roketsan kompaniyası tərəfindən hazırlanan “Tayfun” raketinin ilk sınaqları 2022-ci ilin oktyabrında da Qara dəniz üzərində həyata keçirilib. Raketin yaxın vaxtlarda Türkiyə ordusunun arsenalına daxil olması gözlənilir.xeber100.com  

ABŞ hökuməti yeni sanksiyalar tətbiqinə başlayır

ABŞ hökuməti Koreya Xalq Demokratik Respublikasının (KXDR) 4 qurumuna və bir fərdi şəxsinə ölkənin nüvə silahı proqramının inkişafı üçün qanunsuz kiber fəaliyyətə görə yeni sanksiyalar tətbiq edəcəyini açıqlayıb. Yonhap agentliyi xəbər verir ki, ABŞ-nin Xəzinə Departamenti həmin qurumları və şəxsi “qara siyahı”ya daxil edilib. Sanksiya tətbiq olunan qurumlar Baş Kəşfiyyat İdarəsi üçün kadrlar hazırlayan Pxenyan Avtomatlaşdırma Universiteti, idarənin nəzarətində olan texniki kəşfiyyat bürosu və onun kiber bölməsi, Çinyonq informasiya texnologiyaları əməkdaşlığı şirkətidir. Departamentin açıqlamasında deyilir ki, KXDR zərərli kiber fəaliyyət göstərir, Kim rejimini, onun qanunsuz kütləvi qırğın silahları və ballistik raket proqramları kimi prioritetlərini dəstəkləməkdən ötrü virtual valyuta da daxil olmaqla gəlir əldə etmək üçün informasiya texnologiyaları (İT) işçiləri vasitəsi ilə fırıldaqçılıq edir. ABŞ Xəzinə Departamenti hesab edir ki, texniki kəşfiyyat bürosu Şimali Koreyanın kiber hücum taktikaları və üsullarının inkişafı ilə məşğuldur. Çinyonq informasiya texnologiyaları əməkdaşlığı şirkəti isə Rusiya və Laosda cəlb etdiyi İT işçiləri vasitəsilə KXDR-in qanunsuz kiber fəaliyyətinə dəstək olur. Sanksiya tətbiq olunan fərdi şəxs isə sözügedən şirkətin Vladivostokdakı nümayəndəsi olduğu iddia edilən Kim Sanq-Mandır. Onun həmin ölkələrdəki işçilərin maaşlarının ödənilməsi ilə məşğul olduğu bildirilir.xeber100.com

Yaponiya hökuməti 7,6 milyard dollarlıq humanitar yardımlar ayırıb

Yaponiya hökuməti indiyə qədər Ukraynaya 7,6 milyard dollarlıq humanitar, ərzaq, maliyyə və digər yardımlar ayırıb. Yaponiyanın xarici işlər naziri Yosimaşa Hayasi yardımın həcmini parlamentin aşağı palatasının büdcə komitəsində çıxışı zamanı açıqlayıb. O, həmçinin ukraynalı minatəmizləmə mütəxəssislərinin hazırlanması xərclərinin də maliyyə yardımına daxil edildiyini söyləyib. Nazirin sözlərinə görə, Ukraynadan olan nümayəndə heyəti hazırda Yaponiyadadır və təbii fəlakətlərin nəticələrinin aradan qaldırılması, dağılmış infrastrukturun bərpası təcrübəsi ilə tanış olur. Tokio may ayında Kiyevə 100 hərbi yük maşını və əsgərlər üçün 30 min ədəd ərzaq rasionu vermək, həmçinin yaralı ukraynalı hərbçilərinin müalicəsini həyata keçirmək barədə qərar qəbul edib.xeber100.com

Türkiyə vətəndaşları üçün prezident seçkilərində səsvermənin vaxtı açıqlanıb

Türkiyədə prezident seçkilərinin ikinci turu ilə əlaqədar Ukraynada keçiriləcək səsvermənin vaxtı açıqlanıb. Türkiyənin Ukraynadakı səfirliyindən bildiriblər ki, səsvermə mayın 20-21-də keçiriləcək. Ukraynadakı Türkiyə vətəndaşları Kiyevdəki səfirliyin, həmçinin Odessadakı baş konsulluğun binalarında səs verə biləcəklər.xeber100.com

“Ford Motor Company” sərmayə yatırımını azaltmağı planlaşdırır

Amerikanın avtomobil istehsalçısı olan “Ford Motor Company” Çinin elektrik avtomobili bazarına sərmayə yatırımını azaltmağı planlaşdırır. “Financial Times” qəzeti bu barədə Amerika konserninin rəhbəri Cim Farliyə istinadla məlumat yayıb. Onun sözlərinə görə, qərb kompaniyaları Çinin avtomobil istehsalçıları - “BYD”, “Great Wall”, SAIC və “Changan” konsernləri ilə rəqabətə girə bilmir və “Ford” kompaniyasının gələcək strategiyası “daha məqsədyönlü sərmayələrə”, ilk növbədə kommersiya nəqliyyat vasitələrinə əsaslanacaq. Nəşrin məlumatına görə, Almaniyanın “Volkswagen” və “Mercedes-Benz”, həmçinin Amerikanın “General Motors” kompaniyaları da Çinin elektrokar bazarında mövqelərini itirirlər. 2016-cı ildən bəri “Ford” kompaniyasının Çin bazarındakı payı iki dəfə azalıb. Bir müddət öncə “Ford” nümayəndələri konsernin 2026-cı ilədək elektromobil istehsalına 50 milyard dollar yatırmaq niyyətində olduğunu bildiriblər. Hazırda kompaniyanın model cərgəsində yalnız bir elektrokar (Mustang Mach-E) var.xeber100.com

BBC News agentliyi: İlk pilotsuz avtobuslar marşruta buraxılıb

Şotlandiyada sərnişin daşımalarını həyata keçirəcək ilk pilotsuz avtobuslar marşruta buraxılıb. BBC News agentliyi xəbər verir ki, həmin avtobuslarda iki nəfərdən ibarət ekipaj üzvü çalışır. Onlardan biri yola və göstəricilərə nəzarət edir, digəri isə bilet satır və sərnişinlərə yardım göstərir. Şotlandiyanın paytaxtı Edinburqla Firth of Forth körfəzinin digər tərəfində yerləşən Fife dairəsi arasındakı 21 kilometrlik marşrut üzrə saatda 75 kilometrədək sürətlə hərəkət edən beş pilotsuz avtobus həftədə 10 min sərnişinə xidmət göstərəcək. O, ölkədə hökumət tərəfindən maliyyələşən və rəsmən qeydiyyatdan keçən ilk pilotsuz marşrut kimi tarixə düşüb.xeber100.com

BMT Təhlükəsizlik Şurası qətnamə qəbul edib

BMT Təhlükəsizlik Şurası aprelin 27-də yekdilliklə Əfqanıstanda qadınların Birləşmiş Millətlər Təşkilatında çalışmasına qoyulan qadağanı pisləyən qətnamə qəbul edib və “Taliban”ı qadın və qızların fundamental azadlıqlarını məhdudlaşdıran siyasət və əməlləri “tezliklə dayandırmağa” çağırıb. BMT-nin rəsmi saytı xəbər verir ki, Şuranın qeyri-daimi üzvləri olan Birləşmiş Ərəb Əmirlikləri və Yaponiya tərəfindən hazırlanmış, habelə 90-dan çox ölkənin birgə səyləri ilə hazırlanan qətnamədə Əfqanıstanda insan hüquqlarına və əsas azadlıqlara “ehtiramın eroziyasının artması” ilə bağlı dərin narahatlıq ifadə olunub. Sənəddə qeyd edilib ki, “Taliban”ın əfqan qadınlarının Əfqanıstanda BMT-də çalışmasını qadağan edən son qərarı təşkilatın bu ölkədəki əməliyyatlarına, o cümlədən ən həssas təbəqələrə yardım və əsas xidmətlərin çatdırılmasına mənfi təsir edəcək. “Taliban” qrupu qadınların BMT-də çalışmasının qadağan edilməsi qərarının “daxili məsələ” olduğunu bildirib. 2021-ci il avqustun 15-də Əfqanıstanda “Taliban”ın hakimiyyətə qayıdışı, ardınca beynəlxalq maliyyə yardımının kəsilməsi bu ölkəni iqtisadi, humanitar və insan haqları böhranlarına sürükləyib. Götürdükləri öhdəliklərə baxmayaraq, hakimiyyətdə olanlar insan hüquqlarına davamlı hücumlar həyata keçiriblər. Qadınlar və qızlar “Taliban” hakimiyyəti altında öz hüquqlarından, o cümlədən təhsil hüququndan məhrum edilib, ictimai həyatdan uzaqlaşıblar. Bunun nəticəsində minlərlə qadın işini itirib və ya dövlət qurumları və özəl sektordan istefa verməyə məcbur olub. ABŞ-ın BMT-dəki nümayəndəsi Linda Tomas-Qrinfild qətnamənin yekdilliklə qəbul edilməsindən sonra verdiyi açıqlamada Şuranın “Taliban”a açıq mesaj göndərdiyini və onların əfqan qadın və qızlarına qarşı repressiyalarını pislədiyini bildirib. O əlavə edib: “Əfqanıstan qadınları və qızları insan hüquqlarından və əsas azadlıqlardan məhrum edilərkən beynəlxalq ictimaiyyət kənarda qalmayacaq. Bu sərt qərarlar yalnız Əfqanıstanın sabitliyə, iqtisadi rifaha və gələcək inkişafa nail olmasına mane olur”.xeber100.com  

İspaniyada aprel ayında havanın hərarəti 38,7 dərəcəyə yüksəlib

İspaniyada aprel ayında ilk dəfə olaraq havanın hərarəti 38,7 dərəcəyə yüksəlib. İlin bu dövrü üçün qeyri-adi isti hava şəraiti Əndəlüsdə və ölkənin digər cənub əyalətlərində qeydə alınıb. Aprelin 27-də yerli vaxtla günorta saat üçdə Kordovada termometrlər 38,7 dərəcəni, Sevilyada isə 37,8 dərəcəni göstərib. Ölkənin meteorologiya agentliyi ehtimal edir ki, bu ay müşahidələr dövrünün ən isti apreli olacaq. Qeyd edək ki, son vaxtlar yay istiləri Avropaya daha erkən gəlməkdədir. İstilərdən əlavə, güclü quraqlıq da kənd təsərrüfatına ciddi zərər vurur.xeber100.com

Express News: Rusiya nefti hesabına təmin olunacağına ümid edir

Pakistan Rusiyadan ilk neft partiyasını bir barelə görə 16-18 dollar endirimlə alacaq. Express News telekanalı xəbər verir ki, 100 min ton neftdən ibarət birinci partiya iyun ayında Kəraçi limanına çatdırılacaq. Pakistan Rusiya ilə yuanla hesablaşacaq və bunun üçün Çin Xalq Bankında hesab açılacaq. Çin valyutasından istifadə Rusiya neftinin idxalına görə Pakistana qarşı Qərb sanksiyalarının təsirinin qarşısını almağa, həmçinin ölkədə dollar çatışmazlığı səbəbindən ödənişlərdə yaranacaq çətinliklərin aradan qaldırılmasına yardımçı olacaq. Pakistan, eyni zamanda, gələcəkdə daxili tələbatın 35 faizinin Rusiya nefti hesabına təmin olunacağına ümid edir.xeber100.com

TEKNOFEST festivalının açılış mərasimi keçirilib

Türkiyədə milli texnologiyanın inkişafında mühüm rol oynayan bir çox təşkilatın tərəfdaşlığı, Türkiyə Texnologiya Komandası Vəqfi ilə Sənaye və Texnologiya Nazirliyinin təşkilatçılığı ilə keçirilən TEKNOFEST festivalı ikinci gününü İstanbul Atatürk Hava Limanında davam etdirir. Anadolu agentliyi xəbər verir ki, dünən keçirilməsi planlaşdırılan, lakin güclü yağış səbəbindən təxirə salınan açılış mərasimi sənaye və texnologiya naziri Mustafa Varankın və çoxlu ziyarətçinin iştirakı ilə bu gün baş tutub. Açılış mərasimində çıxış edən TEKNOFEST İdarə Heyətinin və T3 Vəqfi Mütəxəssislər Şurasının sədri Səlcuk Bayraktar deyib: “İnkişaf etdirdiyimiz texnologiyalar yalnız bəşəriyyətə fayda verdikdə önəm qazanır. İnanıram ki, gənc qardaşlarımız TEKNOFEST çərçivəsində zəlzələ və fəlakətlərə həll yolları təklif edən texnologiyaları daha da inkişaf etdirəcəklər və inşallah, sabahımız daha da təhlükəsiz olacaq. TEKNOFEST dünəndən bu günə qədər beyinlərdə başlayan səssiz bir inqilabın adı oldu. Bu səssiz inqilabın dalğaları ildən-ilə genişlənir”. Selçuk Bayraktar qeyd edib ki, 2018-ci ildə ilk TEKNOFEST festivalı başlayarkən texnologiya yarışlarına qatılmaq üçün 20 min gənc müraciət etmişdi. İndi isə onların sayı bir milyonu ötüb. Açılış mərasimində sənaye və texnologiya naziri Mustafa Varank, müdafiə sənayesi naziri İsmayil Demir və başqaları çıxış ediblər. Çıxışlarda Türkiyənin texnologiyalar sahəsində qazandığı uğurlardan bəhs olunub.xeber100.com

Avropa İttifaqı Ukraynaya 1,5 milyard avro ödəyib

Avropa İttifaqı bu gün Kiyevə 2023-cü il üçün planlaşdırılan 18 milyard avroluq makromaliyyə yardımından 1,5 milyard avro həcmində növbəti tranşı ödəyib. Avropa Komissiyasının sədri Ursula Fon der Lyayen bu barədə özünün tviter səhifəsində yazıb. Onun sözlərinə görə, Aİ Ukrayna institutlarının maliyyələşməsini və vacib islahatların keçirilməsini dəstəkləməyə davam edəcək. Ötən ilin dekabrında Avropa İttifaqı Şurası Ukraynaya 2023-cü il üçün 18 milyard avro həcmində makromaliyyə yardımı ayırmaq barədə qərar qəbul edib. Həmin vəsait 10 illik imtiyazla veriləcək. Ukrayna krediti 2033-cü ildən başlayaraq 35 il ərzində ödəyəcək. Kiyev cari ilin yanvarında 3 milyard avroluq ilk tranşı alıb. Növbəti ödənişlər martdan başlayaraq ayda 1,5 milyard avro olmaqla hissə-hissə ayrılacaq. Bundan öncəki tranş isə martın 21-də həyata keçirilib. Ukrayna bu vəsaitlərin köməyi ilə əməkhaqqlarını, pensiyaları ödəməyə davam edəcək, əsas ictimai müəssisələrin, o cümlədən xəstəxana və məktəblərin fəaliyyətini dəstəkləyəcək. Bundan başqa, Avropa İttifaqının yardımı ölkəyə müharibə zamanı zərər çəkmiş infrastrukturu bərpa etməyə və makroiqtisadi sabitliyi qorumağa imkan verəcək.xeber100.com

İtaliyanın Geofizika və Vulkanologiya İnstitutunun açıqlamasına əsasən…

Malta sahillərində 5,5 bal gücündə zəlzələ qeydə alınıb. İtaliyanın Geofizika və Vulkanologiya İnstitutu (INGV) episentrinin Siciliya adasının cənub-şərqi, İon dənizi olan yeraltı təkanın 10 kilometr dərinlikdə qeydə alındığını açıqlayıb. Zəlzələ Siciliya adasının Raqusa, Sirakuza və Kataniya əyalətlərində hiss edilib. Dağıntılar barədə məlumat verilməyib.xeber100.com

Ramazan bayramı münasibətilə müsəlmanlara təbrik ünvanlanıb

İtaliya Prezidenti Sercio Mattarella Ramazan bayramı münasibətilə ölkə müsəlmanlarına təbrik ünvanlayıb. Sercio Mattarella İtaliyada İslam dininə etiqad edənləri Ramazan ayının başa çatması ilə əlaqədar təbrik edib, onlara xoş arzularını çatdırıb. “İnsanların qarşılıqlı hörmət, plüralizm, inteqrasiya şəraitində yaşaması həyatımızın vacib aspektləridir. İtaliya öz vətəndaşlarına əqidələrini azad şəkildə ifadə etmək hüququnu tanıyan və təmin edən ölkədir. Dini və ya hər hansı digər xarakterli dözümsüzlüyün istənilən formasına qarşı mübarizə ölkəmizin sülhə əsaslanan gələcəyini qurmaq üçün beynəlxalq kontekstdə də qəti öhdəliyidir. İtaliyada İslam dininə inananlara Ramazan ayının dinc və xoşbəxt başa çatmasını diləyirəm”, - deyə Prezident təbrikində qeyd edib.xeber100.com

İrana yardım edən şirkətlərə qarşı sanksiyalar tətbiq edilib

ABŞ İrana yardım edən şirkətlərə qarşı sanksiyalar tətbiq edib. Bu şirkətlərin adları Amerikanın Maliyyə Nazirliyinin rəsmi saytında yerləşdirilib. ABŞ Maliyyə Nazirliyinin rəsmi saytı xəbər verir ki, həmin şirkətlər yeni texnologiyalar əsasında istehsal etdikləri elektron cihazları İrana satıblar. İran isə bu cihazlardan istifadə edərək hərbi yönümlü pilotsuz uçan aparatlar (PUA) istehsal edir. ABŞ-ın 6 iri şirkət və 1 nəfər fiziki şəxsə qarşı tətbiq etdiyi bu sanksiyaya İran hələlik münasibət bildirməyib.xeber100.com

“Financial Times” qəzeti yazır…

Avropa İttifaqı Rusiyaya qarşı yeni sanksiyaların olmayacağını düşünür, çünki yeni məhdudiyyətlər özü ilə daha çox istisnalar gətirəcək. “Financial Times” qəzeti bu barədə öz mənbələrinə istinadla məlumat yayıb. Ekspertlər hesab edir ki, Avropa İttifaqının bir neçə ölkəsi Rusiya iqtisadiyyatının sanksiyalara məruz qalmayan sahələri olmadan mövcudluğunu davam etdirə bilməz. Nəşrin fikrincə, Rusiyaya qarşı yeni məhdudiyyətlərdə çox güman ki, yalnız fiziki şəxslərin siyahısı genişləndiriləcək və artıq qüvvədə olan qadağalar sərtləşdiriləcək. Qeyd edək ki, Avropa Komissiyasının rəhbəri Ursula fon der Lyayen Aİ-nin mart ayındakı sammiti çərçivəsində keçirilən mətbuat konfransda Rusiyaya qarşı 11-ci sanksiyalar paketinin artıq tətbiq olunan məhdudiyyətlərdən yayınma ilə mübarizəyə yönələcəyini bildirib.xeber100.com