COVID-19-la əlaqədar işıqfor xəbərdarlıq sistemi tətbiq ediləcək

Avstriyada koronavirus pandemiyasına qarşı uğurlu nəticələr əldə edildikdən və buna görə də məhdudiyyətlərin əksər qismi aradan qaldırıldıqdan sonra ölkədə yoluxma halları yenidən artmağa başlayıb.Azərtac xəbər verir ki, Avstriyanın Federal Səhiyyə naziri Rudolf Anşober əhalini yoluxma hallarının vəziyyəti ilə bağlı məlumatlandırmaq üçün işıqfor xəbərdarlıq sistemi tətbiq ediləcək. Qış idman növlərinin sevildiyi Alp ölkəsinin sakinləri belə bir sistemi dağlarda qar uçqunları təhlükəsi ilə əlaqədar yaxşı tanıyırlar. Nazir qeyd edib ki, dörd pillədən (yaşıl, sarı, narıncı və qırmızı) ibarət “koronavirus işıqforu" həm ümumölkə səviyyəsində, həm də ayrı-ayrı federal əyalətlər üzrə yoluxmanın vəziyyətini əks etdirəcək. Sentyabr ayınadək tam şəkildə tətbiqi başa çatmalı olan sistem əsasında əhali yoluxma təhlükəsinin harada daha yüksək olduğunu biləcək.R.Anşober payız aylarının pandemiyanın yenidən vüsət götürməsi ilə bağlı həssas dövr olduğunu qeyd edərək, həm işıqfor sisteminin, həm də digər preventiv addımların həmin dövrədək işlək vəziyyətə gətirilməli olduğunu ifadə edib. Hazırda işıqfor sistemi elmi əsaslar və meyarlarla koronavirus infeksiyasının yayılması vəziyyətinə uyğunlaşdırılır. İşıqforun rəngləri, eyni zamanda, rəsmi qurumlara hansı regionda məhdudlaşdırıcı tədbirlərin sərtləşdirilməli və ya yüngülləşdirilməli olduğunda da kömək edəcək.xeber100.com

“Apple” korporasiyası mağazalarını bağlamaqda davam edir

“Apple” korporasiyası ABŞ-dakı mağazalarını bağlamaqda davam edir.Azərtac xəbər verir ki, bu barədə şirkət məlumat yayıb. Bildirilir ki, koronavirusa yoluxma hallarının artması səbəbindən “Apple” Los-Anceles, Las-Veqas, Alabama, Aydaho, Oklahoma, Corciya və Luizianadakı bir neçə mağazasını bağlayacaq.Daha əvvəl Florida, Missisipi, Texas və Yuta ştatlarında mağazalarını bağlayan “Apple”nin bağlanan mağazalarının sayı 77-yə çatıb.“Apple” ilin əvvəlindən ABŞ-da 200-dən çox mağazanı yenidən açmışdı.xeber100.com

“Boeing” kompaniyası MCAS sertifikasiya çərçivəsində

ABŞ-ın Federal Mülki Aviasiya İdarəsi və “Boeing” kompaniyası 737 MAX modelinin MCAS (Maneuvering Characteristics Augmentation System – Manevr xarakteristikasını yaxşılaşdırma sistemi) sertifikasiya çərçivəsində uçuş sınaqlarını başa çatdırıb.Azərtac ABŞ-ın aviasiya tənzimləyicisinin saytına istinadla xəbər verir ki, bu həftə baş tutan üç günlük test zamanı qurumun pilotları və mühəndisləri “Boeing” kompaniyasının təyyarənin uçuşunun avtomatlaşdırılmış idarə sistemi ilə bağlı dəyişikliklərini sınaqdan keçirib.“Sınaq uçuşlarının həyata keçirilməsi əsas mərhələdir, lakin əldə edilən məlumatların qiymətləndirilməsi də daxil olmaqla, bir sıra mühüm məsələyə aydınlıq gətirilməlidir”, - deyə saytda yerləşdirilən bəyanatda bildirilir.Federal Mülki Aviasiya İdarəsinin sınaqların nəticələrini nə vaxt elan edəcəyi məlum deyil. “Boeing 737 MAX” təyyarələrinin istifadəsinə yalnız ekspertlərin laynerin sertifikasiya standartlarına cavab verdiyi barədə rəyindən sonra icazə veriləcək.Xatırladaq ki, “Ethiopian Airlines” aviakompaniyasına məxsus “Boeing 737-MAX” təyyarəsi 2019-cu il martın 10-da qəzaya uğramışdı. Qəza nəticəsində təyyarənin göyərtəsindəki 157 sərnişin, o cümlədən 8 ekipaj üzvü həlak olmuşdu. Bundan bir müddət əvvəl - 2018-ci il oktyabrın 29-da isə İndoneziyanın “Lion Air” aviakompaniyasına məxsus eyni modelli təyyarənin qəzaya uğraması nəticəsində 181 sərnişin və 8 ekipaj üzvü həyatını itirmişdi.“Boeing” kompaniyası qəzaya uğramış hər iki təyyarənin MCAS sisteminin işində nasazlıq olduğunu etiraf edib. Bundan sonra ABŞ və Avropa İttifaqı dövlətləri də daxil olmaqla, bir çox ölkə bu modelli təyyarələrdən istifadəni dayandırıb.xeber100.com

“Microsoft” şirkəti genişmiqyaslı əməkdaşlıq elan edib

"Microsoft" və "Hitachi" şirkətləri genişmiqyaslı əməkdaşlıq elan edib. Yapon şirkəti istehsalçılara öz fabriklərinin işini avtomatlaşdırmaqda və logistikanın səmərəliliyini yüksəltməkdə kömək etmək üçün bu əməkdaşlıq çərçivəsində tərəfdaşının "bulud" xidmətlərini təşviq edəcək.Azərtac xarici KİV-lərə istinadən xəbər verir ki, çoxillik razılaşma "Microsoft" və "Hitachi" şirkətlərinin Asiya və Şimali Amerikadakı müştərək müştəriləri ilə işləmək üçün nəzərdə tutulub."Hitachi" şirkəti "Azure" "bulud" infrastrukturu, "Microsoft 365" və "Dynamics 365" proqramlarından istifadə edərək həmin müştərilər üçün istehsalın məhsuldarlığını, logistikanın optimallaşdırmasını və proqnozlaşdırıcı xidməti təmin edəcək."Biz "Microsoft"la əməkdaşlığımızı genişləndirməkdən, istehsal və logistik şirkətlərini rəqəmli həllərlə təchiz etmək üçün əməliyyat texnologiyaları və IT sahəsindəki nailiyyətləri öz məhsullarımızda tətbiq etməkdən məmnunuq", – deyə"Hitachi" şirkətinin vitse-prezidenti Cun Abe bildirib.xeber100.com

ABŞ-ın Enerji İnformasiya Administrasiyasının məlumatı

ABŞ-ın xam neft ehtiyatları rekord həcmə çatıb.Azərtac xəbər verir ki, bu barədə ABŞ-ın Enerji İnformasiya Administrasiyasının (EIA) məlumatında deyilir. Bildirilir ki, neft məhsullarına tələbatın azalması fonunda ölkədəki neft ehtiyatları 541 milyon barrelə yüksəlib. Bu, 2017-ci il martın sonlarında qeydə alınan əvvəlki rekord göstəricidən 5 milyon barrel çoxdur.xeber100.com

Rixter cədvəli üzrə 5,2 bal gücündə zəlzələ baş verib

Türkiyənin Muğla vilayətində Rixter cədvəli üzrə 5,2 bal gücündə zəlzələ baş verib.Azərtac xəbər verir ki, bu barədə Türkiyə Daxili İşlər Nazirliyinin nəzdindəki Fövqəladə Halların İdarə Olunması Agentliyi (AFAD) məlumat yayıb.Məlumatda qeyd edilir ki, episentri Marmarisdə olan yeraltı təkanlar yerli vaxtla saat 20:43-də (Bakı vaxtı ilə 21:43) qeydə alınıb. Zəlzələ İzmir, Bursa və digər ətraf bölgələrdə də hiss edilib.Təşviş keçirən əhali küçələrə axışıb. Dağıntılar və xəsarət alanlar barədə hələlik məlumat yoxdur.

Qırğızıstan fövqəladə hal rejimini bərpa etmək niyyətindədir

Qırğızıstanın koronavirusla bağlı Respublika Qərargahı pandemiya dövründə ikinci dəfə ölkənin bir sıra şəhər və rayonlarında fövqəladə hal rejimini bərpa etmək niyyətindədir.Azərtac xəbər verir ki, bu barədə Qırğızıstan Səhiyyə nazirinin müavini Madamin Karatayev Bişkekdə keçirdiyi brifinqdə məlumat verib.Nazir müavini deyib ki, hazırda Çuy, Oş vilayətlərində, Bişkek və Oş şəhərlərində virusa yoluxanların sayı kəskin artıb, vəziyyət çox gərgindir və bu ərazilərdə fövqəladə hal rejiminin bərpa olunması zərurətə çevrilib. Bildirilib ki, son 24 saat ərzində ölkədə 228 nəfər virusa yoluxub və xəstələrin sayı 3954 nəfərə çatıb. Yeni yoluxanların 113-ü Bişkek şəhərində qeydə alınıb. Onların 19-u tibb işçisidir. Pandemiya dövründə ölənlərin sayı 43 nəfərə çatıb.xeber100.com

“Orly” beynəlxalq aeroportu fəaliyyətini bərpa edib

Fransanın “Orly” beynəlxalq aeroportu COVID-19 pandemiyası ilə əlaqədar yaranan uzun fasilədən sonra bu gün fəaliyyətini qismən bərpa edib.Interfax agentliyi xəbər verir ki, aeroport hələlik reyslərin çox az hissəsini – sutkada 70 uçuş və eniş həyata keçirir. Koronavirusla bağlı böhrandan öncə reyslərin sayı sutkada 600-dən çox olurdu. Hava limanı sutka ərzində 90 minə yaxın sərnişinə xidmət edirdisə, indi bu həcmin yalnız 10 faizi bərpa olunacaq.“Orly” aeroportunun fəaliyyəti martın 31-də koronavirus infeksiyasının yayılması ilə bağlı məhdudiyyətlər çərçivəsində dayandırmışdı.Qeyd edək ki, martın 11-də Ümumdünya Səhiyyə Təşkilatı yeni koronavirusun yayılmasını pandemiya elan edib. Pandemiyanın statistikasını aparan Worldometer saytının Bakı vaxtı ilə bu gün saat 16:30-a olan məlumatına əsasən, dünyada 9 milyon 385 min 295 yoluxma və 480 min 437 ölüm faktı qeydə alınıb, 5 milyon 73 mindən çox xəstə sağalıb.Fransada koronavirusa yoluxanların sayı 161 min nəfəri ötüb, 29 min 720 nəfər isə xəstəlik səbəbindən həyatını itirib. Hazırda müalicə alan 56 min 676 xəstədən 682 nəfərin vəziyyəti ağır qiymətləndirilir.xeber100.com

Lissabonda karantin rejimi yenidən sərtləşdirilib

Portuqaliya hökuməti koronavirusa yoluxanların sayının artması ilə əlaqədar iyunun 23-dən etibarən Lissabonda, eləcə də şəhərə bitişik olan regionda (Lissabon, Sintra, Amadora, lures və Odivelas) karantin məhdudiyyətlərini yenidən sərtləşdirib.Azərtac xəbər verir ki, Portuqaliyanın Baş Naziri Antonio Koştunun sözlərinə görə, karantin məhdudiyyətlərinin tətbiq edildiyi 15 bələdiyyə ərazisindəki bütün mağazalara, həmçinin xidmət obyektlərinə axşam saat səkkizdən sonra işləməyə icazə verilmir. Yeni məhdudiyyətlərə əsasən 10-dan çox insanın bir yerdə toplaşması qadağan olunur.Rəsmi məlumatlara görə, mayın 21-dən iyunun 21-dək Portuqaliyada koronavirusa yoluxanların sayı 9 min 222 nəfərə çatıb. Ən yüksək yoluxma halları Lissabonda və Teju çayı vadisində müşahidə olunur.Karantin rejimini pozanlar Portuqaliya Respublikasının Cinayət Məcəlləsinə uyğun olaraq bir ilədək müddətə azadlıqdan məhrumetmə ilə cəzalandırıla bilər.xeber100.com

Koronavirusun ikinci dalğasının başlanması elan edilib

Təxminən bir aydan sonra İsrail COVID-19-a minlərlə yeni yoluxma və yüzlərlə ölüm halı ilə qarşılaşa bilər. Bunu pandemiya barədə məlumatı əlaqələndirən hərbi orqanda bəyan ediblər.Azərtac xəbər verir ki, İsraildə koronavirus epidemiyasının ikinci dalğasına başlanıb. İyunun 20-də “The Times of Israel” nəşrinin verdiyi məlumata əsasən, bu barədə COVID-19-la mübarizə üzrə milli məlumat mərkəzinin hesabatında bildirilir. Hərbi Kəşfiyyat İdarəsinin nəzdində yaradılmış bu mərkəz ölkənin Səhiyyə Nazirliyi ilə birgə fəaliyyət göstərir.Kəşfiyyat orqanının fikrincə, epidemiyanın artması ona gətirib çıxaracaq ki, iyul ayında minlərlə yeni yoluxma və yüzlərlə ölüm halı qeydə alınacaq. Hesabat müəllifləri qeyd edirlər ki, xəstəliyin indiki potensial artımı ümummilli karantinin yenidən tətbiqi təhlükəsini yaradır.Hərbi Kəşfiyyat İdarəsində və Səhiyyə Nazirliyində vətəndaşların maska taxmaq və digər koronavirus profilaktikası tədbirlərinə ciddi yanaşmamalarından narahatdırlar.Son günlər sutka ərzində yeni yoluxanların sayı 200-300 arası olur, halbuki may ayında bu göstərici 20-dək azalmışdı.“Ynet” nəşri bildirir ki, ölkənin Səhiyyə Nazirliyi iyunun 21-də bütün ixtisaslaşdırılmış şöbələrin yenidən COVID-19 xəstələrinin qəbulu üçün açılmasına hazır olduqlarını elan edib.“Jerusalem Post” qəzetinin yaydığı məlumatda isə deyilir ki, Baş Nazir Binyamin Netanyahu iyunun 21-də xəbərdar edib: maska taxılması və sosial məsafəyə riayət olunması tələbləri kütləvi şəkildə pozulacağı təqdirdə hökumət tamamilə lokdaun tətbiq etməyə hazırdır.Xatırladaq ki, COVID-19 koronavirus infeksiyası 2019-cu ilin sonunda Çində baş qaldırıb. 2020-ci il martın 11-də Ümumdünya Səhiyyə Təşkilatı koronavirusun yayılmasını pandemiya elan edib.Amerikanın Cons Hopkins Universitetinin məlumatına görə, dünyada bu xəstəliyə yoluxanların ümumi sayı 8,97 milyon nəfəri keçib. Onlardan 468,8 mini vəfat edib.xeber100.com

Monteneqro Albaniya ilə sərhədlərini bağlayıb

Son günlər Albaniyada koronavirusa yoluxmanın artması nəticəsində Monteneqro sözügedən ölkə ilə sərhədlərini yenidən bağlamaq qərarına gəlib. Xəbəri Monteneqro Xarici İşlər Nazirliyi də təsdiqləyib.Azərtac xəbər verir ki, iyunun 21-dən etibarən iki ölkə arasındakı quru sərhədlər bağlanıb. İstisnalar yalnız tranzit hərəkət edən yolçulara aid olunacaq. Sərhədlər statistikada müsbət tendensiyayadək davam edəcək. Tibb işçiləri, yük maşınları, diplomatlar, beynəlxalq təşkilatların nümayəndələri, hərbçilər və humanitar qurumların üzvlərinə vəzifə başında olduqları halda qadağalar şamil olunmayacaq.Monteneqro və Albaniya arasında sərhədlərin bağlı olması ikincidən İtaliyaya səyahət edənlər üçün ciddi narahatlıq yaradır.Son bir sutkada Albaniyada 53 yeni yoluxma faktı aşkarlanıb ki, bu da Monteneqronun ölkəyə giriş üçün qoyduğu sağlamlıq əmsalından çoxdur.xeber100.com

Gürcüstan parlamenti təklif olunan dəyişiklikləri qəbul edib

Gürcüstan parlamenti iyunun 21-də ölkənin seçki sisteminin təkmilləşdirilməsi ilə əlaqədar konstitusiyaya təklif olunan dəyişiklikləri birinci oxunuşda qəbul edib.Azərtac xəbər verir ki, iclasda 136 deputat layihənin lehinə, 5 deputat isə əleyhinə səs verib.Qanun layihəsində bildirilib ki, 2020-ci ilin oktyabrın 31-də reallaşacaq parlament seçkiləri qarışıq sistem üzrə keçiriləcək və qanunverici orqana 120 deputat proporsional, 30 deputat isə majoritar sistem üzrə seçiləcək.Proporsional seçkilər 1 faizlik seçki baryeri ilə keçiriləcək.Sənəddə qeyd olunub ki, seçkilərdə proporsional sistem üzrə 40,54 faizdən az səs toplayan partiya və ya siyasi blok hökumətin formalaşdırılmasında müstəqil olaraq iştirak edə bilməyəcək.Qanun layihəsinə əsasən, parlament seçkilərində iştirak etmək istəyən partiya 5000 seçicinin imzasını təqdim etməlidir.Son parlament və yerli idarəetmə orqanlarına seçkilərdə iştirak edən və proporsional olaraq ən azı 15 min səs qazanan partiya və ya bloklar, həmçinin 2018-ci ildə prezident seçkilərində namizəd irəli sürən və ən azı 15 min səs toplayan partiyalar həmin sayda imza verməkdən azaddır.Sənəddə vurğulanıb ki, 2024-cü ilə qədər növbədənkənar seçkilərin keçiriləcəyi halda, qanun layihəsində nəzərdə tutulan müvəqqəti seçki sistemi qüvvədə olacaq.xeber100.com

Xariсi İşlər nazirləri regional məsələləri müzakirə ediblər

Rusiyanın və Türkiyənin Xariсi İşlər nazirləri regional məsələləri müzakirə ediblər.Azərtac xəbər verir ki, Rusiyanın Xarici İşlər naziri Sergey Lavrov ilə Türkiyənin Xarici İşlər naziri Mövlut Çavuşoğlu arasında telefon danışığı olub.Nazirlər regional məsələləri, o cümlədən Liviyadakı vəziyyət, turizmin inkişafı, koronavirus pandemiyası ilə bağlı problemləri müzakirə ediblər.xeber100.com

ABŞ-da keçiriləcək prezident seçkilərində

“Facebook” kompaniyası ABŞ-da keçiriləcək prezident seçkilərində səsvermə üzrə informasiya mərkəzi yaradacağını elan edib.Kompaniyanın məlumatında deyilir. “Biz milyonlarla insana səsvermə prosesi barədə düzgün məlumat təqdim edəcək, həmçinin seçici qismində qeydiyyatdan keçməyə və səs verməyə yardımçı olacaq yeni informasiya mərkəzi yaradırıq”, - deyə bəyanatda qeyd edilir.Azərtac kompaniyanın bəyanatına istinadla xəbər verir ki, layihənin məqsədi ABŞ-da noyabrın 3-də keçirilməsi nəzərdə tutulan prezident seçkiləri ərəfəsində “Facebook” və “Instagram” sosial şəbəkələrindən istifadə edən 4 milyona yaxın amerikalıya seçici qismində qeydiyyatdan keçməyə yardımçı olmaqdır. Bəyanatda bir çox ştatın seçki prosesinə dəyişikliklər etdiyi pandemiya şəraitində səsvermə barədə informasiyanın daha vacib olduğu vurğulanır.Qeyd edək ki, “Facebook” rəhbərliyi son illər ABŞ hakimiyyəti və Amerika ictimaiyyəti tərəfindən sərt tənqidə məruz qalır. Kompaniyanın administrasiyası əsasən zərərli informasiyanın yayılmasına qarşı tədbirlər görməməkdə ittiham olunur. Həmçinin onun sosial şəbəkə vasitəsilə 2016-cı ildə ABŞ-da keçirilən seçkiöncəsi mübarizəyə təsir göstərildiyi iddia edilir.xeber100.com

Sərnişin qatarlarının hərəkəti bərpa olunub

Gürcüstanda sərnişin qatarlarının hərəkəti iyunun 15-dən bərpa olunub.Azərtac xəbər verir ki, "Gürcüstan Dəmir Yolları" Səhmdar Cəmiyyəti iyunun 10-dan bilet satışına başlayıb.Sərnişin qatarları Tbilisi-Batumi, Tbilisi-Ozurqeti, Tbilisi-Poti, Tbilisi-Zuqdidi və Tbilisi-Kutaisi marşrutlarında günorta saatlarında hərəkət edəcək. Biletlərin qiyməti dəyişməyib.Sərnişinlər qatara daxil olmazdan əvvəl termovizordan keçəcək və əllərini dezinfeksiya edəcəklər. Bütün vaqonlarda dezinfeksiya maddələri olacaq. Sərnişinlər vaqonlarda yenə yanaşı oturacaqlar. Ancaq artıq sərnişinlərin vaqonlarda maskasız olmasına icazə verilməyəcək. Səfər ərzində maska çıxarılmamalıdır. Sərnişinlərə qatarda qəzet, kitab və jurnal paylanması, qulaqcıq verilməsi qadağan edilib.Biletləri ancaq mobil tətbiqlər vasitəsilə əldə etmək mümkündür.Qeyd edək ki, koronavirus pandemiyası ilə əlaqədar Gürcüstanda qatarla sərnişin daşınması martın 31-dən qadağan edilib.Gürcüstanda şəhərlərarası avtobus səfərlərinə iyunun 8-dən icazə verilib.xeber100.com

COVID-19 məhdudiyyətlərinin bir qismi ləğv ediləcək

İyunun 15-dən etibarən Avstriyada COVID-19 məhdudiyyətlərinin bir qismi ləğv ediləcək.Azərtac xəbər verir ki, həmin tarixdən etibarən ticarət obyektlərində, kafe və restoranlarda, eləcə də otellərdə tibbi maskalardan istifadə öhdəliyi aradan qaldırılacaq. İctimai nəqliyyat, səhiyyə obyektləri və apteklərdə, eləcə də sosial məsafənin saxlanması mümkün olmayan yerlərdə (bərbərxana və gözəllik salonları) bu öhdəlik qüvvədə qalacaq. Qastronomiya obyektlərində müştərilər tibbi maskadan azad olsalar da, şəxsi heyət maskadan istifadəni davam etdirməlidir. Eyni zamanda, kafe və restoranların iş saatı da 23:00-dan 01:00-dək uzadılıb.Avstriya Federal Səhiyyə Nazirliyindən bildirilib ki, eyni evdə yaşamayan insanların bundan sonra da aralarında bir metrlik məsafə saxlaması tövsiyə olunur.xeber100.com

Gözlənilən leysan və daşqınlarla əlaqədar xəbərdarlıq

Çinin bir neçə vilayətində leysan, daşqın və sel təhlükəsi ilə əlaqədar əhali növbəti dəfə xəbərdar edilib.Azərtac xəbər verir ki, Çinin Milli Meteorologiya Departamenti Hubey, Hunan, Ciansi, Cıcian, Fucien, Quycou və Heyloncian vilayətlərində, Çunçin şəhərində və Quansi Cuan muxtar bölgəsində şiddətli yağışların iyunun 11-də də davam edəcəyini proqnozlaşdırıb. Həmin bölgələrdə sel və daşqınların olacağı güman edilir. Səlahiyyətli qurumlara vəziyyətə hazır olmaq göstərişi verilib.Qeyd edək ki, Çinin mərkəzi, cənub və şərq bölgələrində iyunun ilk günlərindən güclü yağışlar müşahidə olunur. Yağıntı bəzi yerlərdə sel, daşqın, torpaq sürüşməsi və palçıq axını əmələ gətirib. Binalara, yollara, kommunikasiya xətlərinə ziyan dəyib, əkin sahələrini su basıb. Təbii fəlakət nəticəsində 20-dən çox sakin ölüb və ya itkin düşüb. Ümumilikdə, 2 milyon 630 min nəfər təbii fəlakətdən zərər görüb.xeber100.com

“Türk Hava Yolları” beynəlxalq aviareysləri təxirə salıb

“Türk Hava Yolları” (THY) aviaşirkətinin bu gün yenidən başlaması planlaşdırılan beynəlxalq aviareysləri təxirə salınıb.Azərtac xəbər verir ki, bu barədə şirkət məlumat yayıb. Bildirilib ki, aviareyslərin başlaması üçün həm Türkiyə, həm də səfər ediləcək ölkələrin Mülki Aviasiya idarələrindən lazımi icazələrin hələ də alınmaması uçuşların bərpasını gecikdirir.Xatırladaq ki, iyunun 4-də Türkiyənin Nəqliyyat və İnfrastruktur naziri Adil Karaismailoğlunun verdiyi məlumata əsasən, iyun ayından etibarən mərhələli şəkildə Türkiyədən 40 ölkəyə aviareyslərin keçirilməsi nəzərdə tutulur. Bununla əlaqədar artıq 15 ölkə ilə razılıq əldə olunub. İlk beynəlxalq aviareyslərin isə iyunun 10-da Şimali Kipr Türk Cümhuriyyəti, Bəhreyn, Bolqarıstan, Qətər və Yunanıstana olacağı gözlənilirdi. Türkiyədə ölkədaxili uçuşlar iyunun 1-dən etibarən mərhələli şəkildə bərpa olunub.Qeyd edək ki, THY yeni növ koronavirus səbəbindən beynəlxalq uçuşları bu il martın 28-dən dayandırıb.xeber100.com

Ümumdünya Səhiyyə Təşkilatının məlumatına görə…

Dünyada koronavirusa yoluxanların sayı 6,7 milyon nəfərə çatıb.Azərtac xəbər verir ki, bu barədə Ümumdünya Səhiyyə Təşkilatı (ÜST) bildirib.ÜST-ün məlumatına görə, son sutkada dünyada COVID-19-a 137 minə yaxın yoluxma qeydə alınıb. Bununla yanaşı, pandemiya qurbanlarının ümumi sayı 400 mini ötüb.“Son sutkada dünyada koronavirusa 136 409 yoluxma qeydə alınıb, 4586 nəfər ölüb. Bununla da dünyada koronavirusa yoluxanların sayı 6 799 713 nəfərə çatıb. Pandemiya qurbanlarının ümumi sayı 397 388 nəfər təşkil edir”, - deyə təşkilatın xəbərində bildirilir.Virusa ən çox yoluxma Şimali və Cənubi Amerikada qeydə alınıb. Bu qitədə 3 234 875 nəfərdə təhlükəli virus aşkarlanıb.Xatırladaq ki, koronavirus infeksiyası ötən ilin dekabrında Çinin Vuhan şəhərində yayılmağa başlayıb. Hazırda virus 213 ölkə və bölgədə qeydə alınıb.Ümumdünya Səhiyyə Təşkilatı (ÜST) fevralın 11-də infeksiyanın adını COVID-19 qoyub, martın 11-də isə koronavirusu pandemiya elan edib.xeber100.com

Bəzi bölgələrdə karantin rejimi gücləndiriləcək

Qazaxıstanda bəzi bölgələrdə karantin rejimi gücləndiriləcək.Qazaxıstan Səhiyyə naziri Yeljan Birtanov qeyd edib ki, bəzi regionlarda karantin tədbirlərinin yüngülləşdirilməsi koronavirusa yoluxma hallarının artmasına gətirib çıxarıb.Azərtac xəbər verir ki, bununla əlaqədar Qərbi Qazaxıstan, Qızılorda, Mangistau vilayətlərinin rəhbərliyinə sanitariya-epidemioloji tələblərə əməl olunmasına dair nəzarətin gücləndirilməsi, o cümlədən məhdudlaşdırıcı tədbirlərin həyata keçirilməsi tapşırılıb.Son məlumatlara görə, pandemiya dövründə üç vilayətdə, Qərbi Qazaxıstanda-754, Qızılorda-449, Manqistauda–308 koronavirus hadisəsi qeydə alınıb.Qeyd edək ki, ölkədə ümumilikdə yeni növ koronavirusa yoluxanların sayı 12067-yə çatıb, 6240 nəfər sağalıb, 48 nəfər isə həyatını itirib.xeber100.com