Dünya Səhiyyə Təşkilatının hesablamalarına görə…

Dünya Səhiyyə Təşkilatı (DST) və BMT Uşaq Fondu (UNICEF) tərəfindən bu gün açıqlanmış hesablamalara görə, yeni doğulan körpələr arasında ölüm hallarının ən aşağı səviyyəsi əvvəlki kimi Portuqaliyada müşahidə olunur: 1990-cı ildə yeni doğulan hər min körpədən 12-si öldüyü halda, 2017-ci ildə həmin göstərici üç körpə təşkil edib.Azərtac xəbər verir ki, UNICEF və DST-nin uşaq və ana ölümü ilə bağlı yeni hesablamalarının tərkib hissəsidir. Bu məlumatlara görə, getdikcə daha çox qadın və körpə salamat qalır. Buna baxmayaraq, hələ də hər 11 saniyədən bir qadın və ya bir körpə çox vaxt qarşısı alına biləcək səbəblərdən dünyasını dəyişir.xeber100.com

XVIII Beynəlxalq Avrasiya Cərrahlar Konqresi çərçivəsində

Azərbaycan Tibb Universitetində XVIII Beynəlxalq Avrasiya Cərrahlar və Qastroenteroloqlar Konqresi çərçivəsində “Plastik və Rekonstruktiv Cərrahiyyə” sessiyası keçirilib. Sessiyada yerli və xarici mütəxəssislər iştirak ediblər.Universitetin mətbuat xidmətindən Azərtac-a bildiriblər ki, Azərbaycan Plastik Cərrahlar İctimai Birliyinin sədri, professor Vaqif Qələndərli universitetin bu cür beynəlxalq tədbirlərə ev sahibliyi etməsinin ənənə halını aldığını qeyd edib. O, bildirib ki, dünyanın qabaqcıl mütəxəssislərinin nəzəri və praktiki təcrübələrini bu cür tədbirlərdə paylaşması ölkəmizdə səhiyyənin inkişafının bariz nümunəsidir.Açılışdan sonra konfrans öz işini davam etdirib. Tədbirdə səhiyyə sahəsi üzrə aktuallıq kəsb edən 25 mövzuya dair məruzələr dinlənilib, müzakirələr aparılıb və iştirakçıların sualları cavablandırılıb.

XVIII Beynəlxalq konqresi öz işinə başlayıb

Sentyabrın 11-də Azərbaycan Tibb Universitetində (ATU) Cərrah və Qastroenteroloqların Beynəlxalq Avrasiya Elmi Cəmiyyətinin XVIII Beynəlxalq konqresi öz işinə başlayıb. Tədbir Azərbaycan Cərrah və Qastroenteroloqlar Cəmiyyətinin mərhum sədri, akademik Böyükkişi Ağayevin əziz xatirəsinə həsr olunub.Azərtac xəbər verir ki, Cərrah və Qastroenteroloqların Beynəlxalq Avrasiya Elmi Cəmiyyətinə üzv olan 25 ölkədən 160 elm xadimi və tibb mütəxəssisinin, eləcə də ölkəmizin tibb ictimaiyyətinin nümayəndələrinin iştirak etdikləri tədbirdə səhiyyə nazirinin müavini Elsevər Ağayev Səhiyyə naziri Oqtay Şirəliyevin konqres iştirakçılarına təbrik məktubunu oxuyub. Nazir müavini çıxışında son 15 ildə Azərbaycanın səhiyyə sahəsində qazandığı uğurlardan danışıb.Tədbirdə çıxış edən ATU-nun rektoru, professor Gəray Gəraybəyli bildirib ki, bir çox beynəlxalq əhəmiyyətli tədbirlərin ölkəmizdə keçirilməsi artıq ənənə halını alıb. Bu, Azərbaycanın bütün sahələrdə, o cümlədən səhiyyədə əldə etdiyi uğurlarla bağlıdır. Diqqətə çatdırılıb ki, sentyabrın 14-dək davam edəcək bu beynəlxalq tədbirdə cərrahiyyə və qastroenterologiya sahələrində yeniliklərlə bağlı məruzələr dinləniləcək və müzakirələr aparılacaq. Bu isə ölkələr arasında elmin qarşılıqlı tanınmasında və əlaqələrin qurulmasında böyük əhəmiyyət daşıyır.Konqresdə Cərrah və Qastroenteroloqların Beynəlxalq Avrasiya Elmi Cəmiyyətinin sədri, Ankara Universitetinin rektoru, professor Hasan Özkan çıxış edərək dost və qardaş Azərbaycana xüsusi önəm verdiklərini diqqətə çatdırıb. Qeyd edib ki, Cərrah və Qastroenteroloqların Beynəlxalq Avrasiya Elmi Cəmiyyətinin indiyədək 17 konqresi keçirilib. Bu beynəlxalq tədbirlərin 7-nə Azərbaycan ev sahibliyi edib.H.Özkan məlumat verib ki, rəhbərlik etdiyi cəmiyyətin əsası 1996-cı ildə Antalyada Avropa və Asiyanın türkdilli dövlətlərindən olan alimlərinin milli konqresindəki görüşü zamanı qoyulub. Cərrah və qastroenteroloqların ilk konqresi 1997-ci ildə Bakıda keçirilib. Azərbaycan xalqının ümummilli lideri Heydər Əliyevin dəstəyi ilə keçirilən həmin konqresdə 5 ölkədən 35-ə yaxın alim iştirak edib.Sonra Cərrah və Qastroenteroloqların Beynəlxalq Avrasiya Elmi Cəmiyyətinin XVIII Beynəlxalq konqresi işini sessiyalarda davam etdirib.Sessiyalarda cərrahiyə və qastroenterologiya sahəsindəki son vəziyyət, mövcud problemlər və yeniliklər barədə müzakirələr aparılıb.xeber100.com

Səhiyyə naziri vətəndaşları qəbul edəcək

Səhiyyə naziri Oqtay Şirəliyev avqustun 30-da saat 11:00-da Oğuz Mərkəzi Rayon Xəstəxanasında (MRX) vətəndaşları qəbul edəcək.Səhiyyə Nazirliyinin mətbuat xidmətindən Azərtac-a verilən məlumata görə, nazir Oğuz və Qəbələ rayonları sakinlərinin müraciətlərini, şikayətlərini və fikirlərini dinləyəcək, lazımi tədbirlər görüləcək.Qəbulda iştirak etmək istəyənlər Oğuz MRX-də qeydiyyatdan keçə bilərlər.xeber100.com

Bu gün Beynəlxalq Oftalmoloq Günü kimi qeyd olunur

2004-cü ildən avqustun 8-i Beynəlxalq Oftalmologiya Günü və ya Beynəlxalq Oftalmoloq Günü kimi qeyd olunur.Azərtac xəbər verir ki, həmin günün qeyd edilməsi göz cərrahiyyəsi sahəsində çox böyük uğurlara imza atmış böyük rus oftalmoloqu Svyatoslav Fyodorovun doğum günü ilə əlaqədardır.Professor, mikrocərrah-oftalmoloq Rusiya Tibb Elmləri Akademiyasının akademiki Svyatoslav Fyodorov elmi və təcrübi fəaliyyəti əlaqələndirərək göz xəstəliklərinin müalicəsinə bir sıra yeniliklər gətirməklə bu sahədə uğurlar qazanıb. 1994-cü ildə onu XX əsrin görkəmli oftalmoloqu elan ediblər.Beynəlxalq Oftalmologiya Gününün təsis edilməsi ideyası isə Sankt-Peterburq şəhər Tibb Palatasının prezidenti Tamaz Mçelidzeyə məxsusdur. O, həmin gün rus və xarici ölkə oftalmoloqlarına göz xəstələrinə təmənnasız məsləhətlər vermək, göz nurunu itirənlər və ya görmə qabiliyyəti zəif olanların müalicəsi üçün əməliyyatlar aparmaq barədə müraciət edib. Belə bir tədbirin keçirilməsi məşhur göz cərrahı S.Fyodorovun başladığı xeyriyyə işinin davam etdirilməsi və xatirəsinin yad olunması məqsədi daşıyır. Onun təşəbbüsünə təkcə Rusiyada deyil, Yunanıstan, İtaliya, Çexiya, ABŞ və digər ölkələrdə də tərəfdar çıxıblar.Görmə elə duyğu orqanıdır ki, onun itməsi insan üçün əsl faciədir. Görmə qabiliyyətinin pisləşməsi insanın sosial imkanlarını əhəmiyyətli dərəcədə azaldır, ona fiziki və psixoloji problemlər yaradır. Oftalmoloqlar məhz sağlamlığın bu vacib məsələlərinin həlli ilə məşğul olurlar, hərçənd ki, göz xəstəliklərindən əziyyət çəkənlər heç də az deyil.Müasir oftalmoloji diaqnostika üsulları göz xəstəliklərini erkən mərhələlərdə aşkar etməyə, səmərəli müalicə və profilaktika aparmağa imkan verir, lakin mütəxəssislər onun profilaktikası ilə məşğul olmağı daha vacib hesab edirlər.Həkim və mütəxəssislər zərərli vərdişlərdən uzaq olmağı, gözləri Günəşin ultrabənövşəyi şüalarından qorumaq üçün keyfiyyətli gün eynəklərindən istifadə etməyi, qanda şəkərin, təzyiq və xolesterinin səviyyəsini nəzarətdə saxlamağı, A vitamini, Omeqa-3 və antioksidantlarla zəngin məhsullarla qidalanmağı məsləhət görürlər. Həkimlər xüsusilə uşaqların 3D formatında çəkilmiş filmlərə baxmağını məsləhət görmürlər.xeber100.com

Səhiyyə Nazirliyinin məlumatı əsasında…

Avqustun 4-də “Sədərək” Ticarət Mərkəzində baş verən yanğın zamanı ümumi müraciət edənlərin sayı 16 nəfər olub.Səhiyyə Nazirliyin mətbuat xidmətindən Azərtac-a bildirilib ki, onların altısına hadisə yerində yardım edilib, 10 nəfər isə Kliniki Tibbi Mərkəzə aparılıb.10 nəfərdən biri yanğın baş verən ticarət mərkəzinin əməkdaşıdır, qalanlar yanğının söndürülməsində iştirak edən Fövqəladə Hallar Nazirliyi və Daxili İşlər Nazirliyinin əməkdaşlarıdır.Müraciət edənlərə tibbi yardım göstərildikdən sonra evə buraxılıblar.xeber100.com

Tibb Universitetinin Tədris Cərrahiyyə Klinikasında təlim keçirilib

Azərbaycan Tibb Universitetinin (ATU) Tədris Cərrahiyyə Klinikasında həkimlər üçün pediatrik xəstələrdə və yenidoğulmuşlarda ağciyərlərin mexaniki ventilyasiyanın tətbiqinə dair təlim keçirilib.ATU-nun mətbuat xidmətindən Azərtac-a verilən məlumata görə, Ankara Universitetinin professoru Ömer Erdeve azərbaycanlı həmkarları ilə davamlı olaraq əməkdaşlıq etdiklərini bildirib. O, bir ay əvvəl başladıqları təlimə yenidən tələbat yarandığını və ona görə də kursu davam etdirmək qərarına gəldiklərini söyləyib.Sonra təlim kursuna başlanılıb və türkiyəli mütəxəssislər - dosent Emel Okulu “Tənəffüz fiziologiyası”, “Qeyri-invaziv ventilyasiya”, professor Tanıl Kendirli isə “Uşaqlarda kəskin tənəffüz çatışmazlığı və müalicə” mövzusunda maraqlı məruzələrlə çıxış ediblər. İnteraktivliyi ilə seçilən təlim kursunda iştirakçıların sualları da ətraflı cavablandırılıb.Həkim-nevroloq, davamlı tibbi təhsil üzrə layihə rəhbəri Mərziyyə Məmmədova bildirib ki, ATU-nun Tədris Cərrahiyyə Klinikası, Elmi Tədqiqat Pediatriya İnstitutu, Ankara Universiteti və "Uptodate İn Medicine" şirkəti ilə birgə təşkil edilən təlim Səhiyyə Nazirliyi tərəfindən akkreditasiya olunub və iştirak edən həkimin hər birinə 16 kredit balı veriləcək.xeber100.com  

Təcili Tibbi Yardım briqadalarına 18 müraciət olub

İyulun 19-dan 22-dək XV Avropa Gənclər Yay Olimpiya Festivalı "Bakı-2019" məkanlarında növbətçilik çəkən Təcili Tibbi Yardım briqadalarına ümumilikdə 18 müraciət olub.Səhiyyə Nazirliyinin mətbuat xidmətindən Azərtac-a bildirilib ki, çağırışlardan 4-ü Atletlər Kəndinə, 4-ü qonaqların qaldığı otellərə, 3-ü yarışlar keçirilən idman arenalarına, 2-si Bayraq Meydanına, 3-ü “Baku Crystal Holl”a, biri İdman Akademiyasına, biri FHN-in Hövsandakı İdman-Sağlamlıq Klubuna olub.Müraciət edənlərdən 3-ü Klinik Tibbi Mərkəzə, 1 nəfər 3 saylı Şəhər Klinik Xəstəxanasına çatdırılıb. Qalanlarına yerində yardım göstərilib.Müraciət edənlərin 4-ü xarici ölkə, digərləri isə Azərbaycan vətəndaşlarıdır.xeber100.com

Dünya Səhiyyə Təşkilatı xəbərdarlıq edib

Avropa regionunda ağciyər xərçənginin 90 faizinin qarşısını əhalinin siqaretçəkmə vərdişindən qurtulması ilə almaq mümkündür. Azərtac xəbər verir ki, bu xəbərdarlığı Dünya Səhiyyə Təşkilatı (DST) edib. Təşkilatın Avropa bürosunun ekspertləri regionun bütün əhalisini bu zərərli vərdişdən imtina etməyə çağırıblar.DST mütəmadi olaraq bu sahədə tədbirlər həyata keçirir. Mayın 31-də Dünya Tütünsüz Günü qeyd olunur, lakin təşkilat bu mübarizə tədbirlərini ilboyu davam etdirir.Budapeştdə bu məqsədlə “Üç sağlam nəsil” şüarı altında bütün yaşlardan olan insanlar üçün tədbirlər, o cümlədən rəqslər və idman məşğələləri təşkil edilir. Yaxınlıqda qoyulmuş mobil klinikada isə arzu edən hər kəs tibbi müayinədən keçə bilər. Aşqabadda isə DST-nin dəstəyi ilə tütünün zərəri haqqında informasiyaların yayıldığı interaktiv aksiyalar təşkil olunub, Tbilisidə keçirilən mükafatlandırma mərasimində bu sahədə xidmətləri olan həkimlər və səhiyyə sisteminin digər əməkdaşlarına mükafatlar təqdim edilib. Tütünlə mübarizəyə həsr olunmuş ən parlaq tədbirlərdən biri Kiyevdə keçirilib. “Dünyada sərbəst nəfəs al, tütünsüz nəfəs al” şüarı altında təşkil olunan bu tədbir zamanı küçələrdə kütləvi yoqa məşğələləri aparılıb və onlar yerli KİV-də geniş şəkildə işıqlandırılıb.Bu il Dünya Tütünsüz Günü passiv siqaretçəkməyə həsr olunub. DST-nin məlumatına görə, tütün tüstüsündə 4 mindən çox kimyəvi maddə var və onların ən azı 250-si zərərli, 50-si isə kanserogendir. Siqaret çəkənlərin yanından duran insanlar da tüstünün təsirinə və ciddi sağlamlıq riskinə məruz qalırlar. Passiv siqaretçəkmə ürək-damar, nəfəs yolları və ağciyər xərçəngi xəstəliklərinə səbəb ola bilər.xeber100.com

Səhiyyə Naziri vətəndaşları qəbul edib

Dövlət orqanlarının rəhbərləri bölgələrdə vətəndaşların qəbulunu davam etdirir. Qəbul zamanı vətəndaşların müxtəlif məsələlərlə bağlı müraciətlərinin, ərizə və şikayətlərinin müsbət həll istiqamətində tədbirlər görülür.Səhiyyə Nazirliyinin mətbuat xidmətindən Azərtac-a bildiriblər ki, qəbul cədvəlinə uyğun olaraq Səhiyyə Naziri Oqtay Şirəliyev iyulun 3-də Yardımlı Rayon Mərkəzi Xəstəxanasında Masallı və Yardımlı rayonlarının sakinlərini qəbul edib.Qəbul zamanı vətəndaşların sağlamlıq problemləri, işlə təminat və s. məsələlərlə bağlı müraciətləri dinlənilib.Vətəndaşların müraciətində qaldırılan məsələlər nazirliyin müvafiq qurumlarının əməkdaşlarının iştirakı ilə araşdırılıb, onların bəziləri yerində həllini tapıb.Nazirliyin səlahiyyətlərinə aid olmayan məsələlər aidiyyəti üzrə çatdırılması üçün qeydiyyata alınaraq nəzarətə götürülüb.xeber100.com

Bakı Konqres Mərkəzində beynəlxalq konfrans öz işinə başlayıb

İyunun 27-də Bakı Konqres Mərkəzində “Delta hepatiti” adlı ikigünlük beynəlxalq konfrans öz işinə başlayıb.Azərtac xəbər verir ki, konfrans Azərbaycan Qastroenteroloqlar və Hepatoloqlar İctimai Birliyi tərəfindən təşkil olunub və ilk dəfədir ki, Asiya-Sakit Okean Qaraciyər Tədqiqatları Assosiasiyasının platformasında qurulub.Azərbaycan Qastroenteroloqlar və Hepatoloqlar İctimai Birliyinin sədri, tibb üzrə fəlsəfə doktoru Gülnarə Ağayeva KİV nümayəndələrinə müsahibəsində bildirib ki, tədbirin mövzusu çox nadir, lakin son illər ərzində çox təhlükəli sayılan qaraciyər virusudur: “Beynəlxalq konfransın işində 30-dan artıq ölkədən ümumilikdə 500-dən çox iştirakçı var. Konfransın devizi "Qələbə üçün birləşək" adlanır. Nadir sayılan D hepatitinin çox ağır fəsadları olur. Problemin vacibliyi ondan ibarətdir ki, bu xəstəlik uzun illər heç bir simptomu olmadan inkişaf edir və çox qısa vaxt ərzində qaraciyərin sirrozu ilə nəticələnir. Mövzunun vacibliyini nəzərə alaraq tədbiri həyata keçirmək üçün iki il öncə Birinci vitse-prezident Mehriban Əliyevaya müraciət etdik və dəstək aldıq. Bu, Mehriban xanımın hər zaman olduğu kimi əhalinin sağlamlığına, tibb elminin inkişafına qayğısının təzahürüdür. Məqsədimiz öz həkimlərimizi maarifləndirək, yeni informasiyaları Bakıda və regionlarda da yayaq, insanlara kömək edək. Bunun da nəticəsində həkimlərimiz daha da ixtisaslaşacaq. Konfrans çərçivəsində bu xəstəliyin sosial problemləri də müzakirə olunacaq. Bu sahədə ən təcrübəli mütəxəssislər, professorlar Masao Omata (Yaponiya), Anna Lok, Robert Giş, Cefri Glen (hamısı ABŞ-dan), Sayed Hamid (Pakistan), Abdulkadır Dokmeci, Deniz Balci, Cihan Yurdaydın (hamısı Türkiyədən) və başqaları konfransda çıxış edib, müzakirələr aparacaqlar”.Konfrans məruzələrin dinlənilməsi ilə davam edib.xeber100.com

“Sağlamlıq-2019” beynəlxalq konfransı keçiriləcək

İyulun 20-22-də Türkmənistanda ölkənin səhiyyə və tibb sənayesi işçiləri gününə həsr edilmiş “Sağlamlıq-2019” beynəlxalq sərgi və elmi konfransı keçiriləcək.Azərtac Türkmənistan KİV-lərinə istinadla xəbər verir ki, sərgidə dünyanın 40-dan artıq ölkəsini təmsil edən 200-dən çox şirkətin istehsal etdiyi ixtisaslaşdırılmış avadanlıq və müvafiq məhsulların nümunələri, dərman preparatları, həmçinin Türkmənistan səhiyyəsinin nailiyyətləri nümayiş etdiriləcək.Konfransın işi müasir təbabətin inkişafının müxtəlif perspektiv istiqamətlərinə həsr olunmuş bölmələr üzrə keçiriləcək. Konfransda dünyanın müvafiq profilli 20-dən artıq ali məktəbinin tanınmış alimləri, professor-müəllim heyəti iştirak edəcək.Forumda Türkmənistan Səhiyyə Nazirliyinin bir sıra xarici tibb müəssisələri və sahəvi nazirliklərlə tibb sahəsində əməkdaşlıq haqqında sənəd layihələrinin müzakirəsi nəzərdə tutulur.xeber100.com

“Delta Hepatiti” adlı Beynəlxalq konfrans keçiriləcək

İyunun 27-28-də Bakı Konqres Mərkəzində “Delta Hepatiti” adlı Beynəlxalq konfrans keçiriləcək.Milli Onkologiya Mərkəzindən Azərtac-a bildiriblər ki, konfrans Azərbaycan Respublikası Səhiyyə Nazirliyi tərəfindən akkreditasiya olunub və davamlı tibbi təhsil üzrə 16 kredit vahidi verilib.Konfransda iştirak etmək üçün e-sehiyye.gov.az saytına daxil olaraq konfransa qeydiyyatdan keçmək mütləqdir.Elmi proqram Delta və B hepatitləri üzrə mütəxəssisləşmiş məruzəçilərin təqdimatlarından ibarət olacaq. Konfrans, aparıcı klinik mütəxəssislər və tədqiqatçılarla görüşmək, qarşılıqlı əlaqə yaratmaq və hepatoloqlar üçün ən son məlumatları əldə etmək imkanı yaradacaq.xeber100.com

Tibb Universiteti anlaşma memorandumu imzalayıb

Türkiyənin Dokuz Eylül Universitetinin nümayəndə heyəti Azərbaycan Tibb Universitetinin (ATU) qonağı olub. Görüşün əsas məqsədi ATU ilə Dokuz Eylül Universiteti arasında əməkdaşlığın əsasını qoymaqdan, birgə fəaliyyətə dair anlaşma memorandumunun imzalanmasından ibarət olub.Universitetin mətbuat xidmətindən Azərtac-a verilən xəbərə görə, ATU-nun rektoru, professor Gəray Gəraybəyli bildirib ki, istənilən ali məktəb üçün beynəlxalq əlaqələrin inkişafı mühüm yer tutur: "Biz də dünyamiqyaslı universitetlər ilə əlaqə qurulmasını, birgə elmi iş və tədqiqatlar aparılmasını, məqalələr yazılmasını arzulayırıq. ATU tələbələri və rezidentlərinin Türkiyədə, Avropadakı həmkarları ilə qarşılıqlı araşdırma aparması üçün bütün imkanlarımız var. Bu imkanları genişləndirmək üçün Türkiyə universitetləri ilə münasibətləri sıxlaşdırmaq niyyətindəyik”.Görüşün sonunda Azərbaycan Tibb Universiteti və Türkiyənin Dokuz Eylül Universiteti arasında qarşılıqlı anlaşma memorandumu imzalanıb. Tərəflər qarşılıqlı elmi işlər, araşdırma və tədqiqatlar, birgə tədbirlər keçirilməsinə dair anlaşıblar.xeber100.com

Səhiyyə Nazirliyi gücləndirilmiş iş rejimində çalışacaq

Bu gün paytaxtda keçiriləcək Avropa Liqasının final oyunu ilə əlaqədar Azərbaycan Respublikasının Səhiyyə Nazirliyi gücləndirilmiş iş rejimində çalışacaq.Bu barədə nazirliyin mətbuat xidmətindən Azərtac-a bildirilib.Məlumata görə, nazirlik tərəfindən Təcili və Təxirəsalınmaz Tibbi Yardım Stansiyasının 39 təcili yardım avtomobili azarkeşlərə və komanda heyətlərinə xidmət göstərəcək. Bundan başqa 1 saylı Kliniki Tibbi Mərkəzdə 90, 3 saylı Kliniki Tibbi Mərkəzdə 50, Mərkəzi Neftçilər Xəstəxanasında 25, Respublika Neyrocərrahiyyə Xəstəxanasında 30 çarpayılıq yerlər ayrılıb.Tədbir keçiriləcək müddətdə qeyd olunan xəstəxanalarda təcrübəli mütəxəssislərin (onların arasında ingilis dili bilən olmaqla) növbətçiliyi təşkil olunub. "9103 qaynar xətt" xidməti 24 saat gücləndirilmiş iş rejimində çalışacaq.xeber100.com

Səhiyyə Nazirliyi ölkədə qriplə bağlı son vəziyyəti açıqlayıb

Səhiyyə Nazirliyinin Respublika Gigiyena və Epidemiologiya Mərkəzi (RGEM) ölkədə qriplə bağlı son vəziyyəti açıqlayıb.Mərkəzin direktor müavini Afaq Əliyeva Trend-ə deyib ki, adətən, yazın sonlarında respirator virus infeksiyalarına yoluxma sayı azalır:“Havanın temperaturu getdikcə yüksəldiyi üçün respirator virus infeksiyaları da azalmağa doğru gedir. Hazırda ölkədə qrip xəstəliyi yoxdur”.A.Əliyeva qeyd edib ki, bu payız-qış mövsümü ərzində götürülən müayinə materialları arasında tək-tək hallarda mövsümü qrip virusları aşkarlanıb. Qrip virusuna yoluxanlar arasında ölümlə nəticələnmə baş verməyib:"İnfeksion xəstəliklərin ölkəyə keçməsinin qarşısını almaq üçün lazımi tədbirlər görülür. Hər hansı yüksək temperaturlu şübhəli xəstə olarsa, onların aşkarlanması və izolyasiyası üçün sərhəd məntəqələrində şərait var. Eyni zamanda, yerlərdə də tibb müəssisələri tərəfindən epidemioloji nəzarət tədbirləri aparılır".xeber100.com

Milli Oftalmologiya Mərkəzi tibbi aksiya keçirir

Milli Oftalmologiya Mərkəzinin Səyyar Klinikası mütəmadi olaraq Bakıda və ölkəmizin müxtəlif regionlarında səyyar xidmət göstərir.Mayın 14-də mərkəzin Avtomobil Səyyar Klinikası ADA Universitetində tibbi aksiya təşkil edib.Azərtac xəbər verir ki, aksiya zamanı Səyyar Klinikanın əməkdaşları ADA Universitetində tələbə və müəllimlərə tibbi xidmət göstərir. Tədbirin məqsədi pasiyentlərin səhhətləri ilə bağlı problemlərin həll olunmasına kömək göstərməkdir. Aksiya çərçivəsində aşkar olunan göz xəstəlikləri ilə bağlı monitorinqlər aparılacaq, əldə edilən nəticələr müzakirə olunaraq həll ediləcək. Gözündə ciddi problem aşkar edilən və çətin əməliyyat tələb olunan pasiyentlərin Akademik Zərifə Əliyeva adına Milli Oftalmologiya Mərkəzinə gəlmələrinə şərait yaradılacaq.xeber100.com  

Tibb Universitetində pulsuz kardioloji müayinə kampaniyası keçiriləcək

Azərbaycan Tibb Universitetinin Tədris Terapevtik Klinikasında pulsuz kardioloji müayinə kampaniyası təşkil ediləcək.Universitetin mətbuat xidmətindən Azərtac-a bildiriblər ki, klinikanın kardioloqu Elnur İmanov mayın 10-da saat 09:00-dan 15:00-a qədər uşaqların kardioloji müayinəsini keçirəcək.xeber100.com

V Azərbaycan-Alman-Türk Tibb Konqresi keçiriləcək

Mayın 3-5-də tibbin bir sıra digər sahələrinin aktual problemlərinə həsr olunmuş beynəlxalq səviyyəli V Azərbaycan-Alman-Türk Tibb Konqresi və V Bakı Beynəlxalq Tibbi Treninq Günləri keçiriləcək.M.Topçubaşov adına Elmi Cərrahiyyə Mərkəzinin professoru Q.Müslümovun Azərtac-ın müxbirinə verdiyi məlumata görə, konqres zamanı referent qismində Almaniya, Türkiyə, İsveçrə, Avstriya və Ukraynanın tanınmış universitet klinikalarında çalışan 20-dən çox mütəxəssis tərəfindən oxunulacaq mühazirələrlə yanaşı həm də interaktiv diskussiyalar, ağır kliniki halların müzakirəsi keçiriləcək.Konqreslə yanaşı laparoskopik və açıq cərrahiyyə, ginekologiya, endoskopiya, radiologiyaya həsr olunmuş təqribən 300 nəfərə qədər iştirakçının cəlb ediləcəyi V Bakı Beynəlxalq Tibbi Treninq Günləri keçiriləcək. Treninqlər Avropada Davamlı Tibb Təhsili və Mütəxəssislərin hazırlanması məqsədilə istifadə olunan ən müasir tədris proqramları və treninq protokolları əsasında mulyajlardan və xüsusi simulyatorlardan istifadə edilməklə canlı heyvan orqanları üzərində aparılacaq.Konqres və treninqlərlə yanaşı Milli Onkologiya Mərkəzi, akademik M.A.Topçubaşov adına Elmi Cərrahiyyə Mərkəzi, ET Mama-Ginekologiya İnstitutu və bir sıra digər klinikalarda ginekologiya, radiologiya və endoskopiya sahələri üzrə ustad dərslərinin keçirilməsi də planlaşdırılır.xeber100.com

Azərbaycan Ürək və Damar Cərrahiyyəsi Cəmiyyətinin məlumatı

Azərbaycan Ürək və Damar Cərrahiyyəsi Cəmiyyəti (AÜDCC) iyunun 7-9-da ümummilli lider Heydər Əliyevin xatirəsinə həsr olunmuş “Bakı Ürək Günləri” VI Beynəlxalq Konqresini təşkil edəcək.AÜDCC-dən Azərtrac-a verilən məlumata görə, konqresin keçirilməsində əsas məqsəd Azərbaycanda kardiologiyanın və ürək-damar cərrahiyyəsinin inkişafına töhfə vermək, əcnəbi mütəxəssislərlə birgə fikir mübadiləsi aparmaq və tibb elminin bu sahədəki son yeniliklərini müzakirə etməkdir. “Bakı Ürək Günləri” VI Beynəlxalq Konqresində 400-ə yaxın yerli və əcnəbi kardioloq və kardiocərrahın iştirakı ilə ürək-damar xəstəlikləri və onların müalicəsindəki ən aktual məsələlər müzakirə ediləcək.Bundan başqa “Bakı Ürək Günləri” VI Beynəlxalq Konqresi ilə birgə Avrasiya Ürək və Damar Cərrahları Cəmiyyətinin XV Konfransı da təşkil olunacaq.Azərbaycan Ürək və Damar Cərrahiyyəsi Cəmiyyətinin sədri, professor Kamran Musayev bildirib ki, əvvəlki konqreslərdə olduğu kimi, bu dəfə də Azərbaycandan və xarici ölkələrdən iştirakçılar www.bakuheartdays.az saytında elektron qeydiyyatdan keçə, eyni zamanda məqalə və tezislərini elektron formada göndərə bilər.Gənc mütəxəssislər üçün təşkil ediləcək təcrübə məşğələləri “Bakı Ürək Günləri”nin elmi-praktik əhəmiyyətini daha da yüksəldəcək. Eyni zamanda, konqres azərbaycanlı həkimlərə dünyanın ən qabaqcıl mütəxəssisləri ilə kardioloji elmlərdəki ən son nailiyyətləri müzakirə etmək imkanı yaradacaq. Avrasiya Ürək və Damar Cərrahları Cəmiyyəti ilə əməkdaşlıq çərçivəsində bu təşkilatın XV Konfransı da Bakıda keçiriləcək.Professor Kamran Musayev onu da bildirib ki, Azərbaycan Respublikası Səhiyyə Nazirliyinin Elmi Tibbi Şurasının iclasında “Bakı Ürək Günləri” VI Beynəlxalq Konqresi Davamlı Tibbi Təhsil verən tədbir kimi tanınıb və konqresə 24 Kredit balı verilib. Bu o deməkdir ki, konqresdə və müvafiq kurslarda iştirak etməklə illik tələb olunan 48 Kredit balının 24-nü toplamaq olar.Xatırladaq ki, AÜDCC 2009-cu ildən etibarən hər iki ildən bir “Bakı Ürək Günləri” Beynəlxalq Konqresini təşkil edir.xeber100.com