ABŞ Konqresinin Nümayəndələr Palatası iqtisadi stimullaşdırma planını təsdiqləyib

ABŞ Konqresinin Nümayəndələr Palatası fevralın 27-də pandemiya şəraitində milli iqtisadiyyat artımının təcili stimullaşdırılması tədbirləri barədə 1,9 trilyon dollarlıq qanun layihəsini təsdiq edib.Azərtac xəbər verir ki, Nümayəndələr Palatasının iclası Amerika telekanalları tərəfindən canlı yayımlanıb. Qanun layihəsi praktiki olaraq minimal səs çoxluğu ilə qəbul olunub. Konqresmenlərin 219-u layihəni dəstəkləyib, 212-si isə onun əleyhinə səs verib.ABŞ Prezidenti Cozef Baydenin proqramına əsaslanan sənəd bilavasitə pandemiya ilə mübarizə tədbirlərinə təxminən 400 milyard dolların ayrılmasını nəzərdə tutur. Həmçinin əhaliyə yardım məqsədilə 1 trilyon dollar yönəldiləcək, qalan vəsait isə iqtisadiyyatın stimullaşdırılmasına sərf olunacaq.Demokratlar martın 14-nə qədər qanun layihəsini imzalaması üçün prezidentə göndərməyi planlaşdırır. Lakin sənədin Senatda xeyli prosedur çətinlikləri ilə qarşılaşacağı gözlənilir.Qeyd edək ki, respublikaçılar stimullaşdırma paketinin həddən artıq şişirdildiyini hesab edirlər. Ağ ev isə öz növbəsində 1,9 trilyon dollar həcmindəki proqramın pandemiyanın səbəb olduğu miqyasa daha çox uyğun gəldiyi fikrindədir.xeber100.com

İspaniya hökuməti 11 milyard avro məbləğində yardım ayırıb

İspaniyanın Baş naziri Pedro Sançez Konqresdə turizm sektorunda çalışan şirkətlər, kiçik və orta sahibkarlar üçün nəzərdə tutulan 11 milyard avro məbləğində yeni yardım proqramını elan edib.Azərtac xəbər verir ki, məqsəd COVID-19 pandemiyası dövründə böyük zərər çəkmiş turizm sektorunda çalışan şirkətlərin ödəmə qabiliyyətini artırmaq, həm də onların fəaliyyətini tam gücü ilə bərpa etməyə kömək etməkdir.İspaniya hökuməti iqtisadiyyatı bərpa etmək məqsədilə pandemiyadan ən çox zərər çəkmiş sektorlara dəstək tədbirləri üçün artıq ÜDM-in 20 faizini ayırıb. Bu vəsait pandemiya dövründə məşğulluğun müvəqqəti tənzimlənməsi istiqamətində hökumət tərəfindən irəli sürülmüş tədbirlərin həyata keçirilməsinə yönəldilib.Krallığın iqtisadiyyatının bərpa edilməsinin ümidverici amili koronavirusa qarşı peyvənd olunmaqdır. Daha sonra Aİ-nin Brüssel sammitində razılaşdırılmış Avropa iqtisadiyyatının bərpası fondundan İspaniyaya 140 milyard avro ayrılması prosesi sürətləndiriləcək. Pedro Sançesin sözlərinə görə, bərpa planı keyfiyyətli, davamlı və uzunmüddətli məşğulluq yaratmaq üçün daha ədalətli, daha ekoloji, daha rəqəmsal İspaniyanı nəzərdə tutur.Onun hesablamalarına görə, yaxın illərdə İspaniyada 850 min iş yeri açılacaq.Pandemiyanın dördüncü dalğasından qorunmağı qarşısında məqsəd qoyan İspaniya hökumətinin başçısı, 9 May tarixinədək həyəcan vəziyyətinin saxlanmasını zəruri sayır.xeber100.com

Finlandiyanın turizm sektoru çoxmilyardlı itkilərə məruz qalıb

Finlandiyanın turizm sektoru koronavirus pandemiyası səbəbindən çoxmilyardlı itkilərə məruz qalıb.Azərtac Finlandiya İqtisadiyyat və Məşğulluq Nazirliyinin məlumatlarına istinadla xəbər verir ki, 2020-ci ildə ölkənin turizm sektoru 7 milyard avro itirib.Koronavirus pandemiyası və bununla əlaqədar tətbiq olunan məhdudiyyətlərə görə, vətəndaşların Finlandiya daxilindəki səyahət xərcləri 40 faizdən çox azalıb. Ümumilikdə, 2020-ci ildə yerli və xarici turistlər Finlandiyada 9,3 milyard avro xərcləyib ki, bu da 2019-cu ildə istirahət edənlərin xərclədiyi məbləğdən təxminən 7 milyard avro azdır.Ekspertlərin fikrincə, turizm sahəsində belə əhəmiyyətli dərəcədə geriləmənin əsas səbəbi koronavirusun yayılmasının qarşısını almaq məqsədilə Finlandiya, həm də digər ölkələrdə qəbul edilmiş səyahət siyasəti və məhdudlaşdırıcı tədbirlərlə bağlıdır.Nazirlikdən bildiriblər ki, Finlandiyanın turizm sənayesi, həm də xaricdən gələn qonaqların çatışmazlığından itkilərə məruz qalıb. Bununla birlikdə yay aylarını Finlandiyada keçirməyə üstünlük verən turistlərin sayındakı artım, sektorun əsas maliyyə itkilərini müəyyən dərəcədə kompensasiya edib.xeber100.com

COVID-19 infeksiyasına qarşı vaksinasiya proqramı çərçivəsində

Çində COVID-19 infeksiyasına qarşı vaksinasiya proqramı çərçivəsində paytaxt Pekində əhalinin kütləvi vaksinasiyasına başlanılıb.Azərtac xəbər verir ki, 18-59 yaş arasında olan Pekin sakinləri əvvəlcədən müraciət etməklə növbəlilik əsasında ödənişsiz qaydada peyvənd oluna bilirlər. Bu məqsədlə təşkil olunan yüzlərlə müvəqqəti məntəqədə gözləmə, müayinə, qeydiyyat, peyvəndləmə və müşahidə otaqları fəaliyyət göstərir. Məntəqələr səhər saat 7:30-dan fəaliyyətə başlayır.Peyvənd olunan Pekin sakini Yan Quanhao deyir ki, 2 həftə əvvəl evlər idarəsindən vaksinasiya barədə məlumat alandan sonra heç tərəddüd etmədən peyvənd olunmaq üçün qeydiyyatdan keçib. O, peyvəndin birinci dozasını qəbul etdikdən sonra bədənində heç bir yan təsir olmadığını bildirib.Peyvənd olunan Su Yüton isə valideynləri ilə birlikdə vaksinasiya üçün qeydiyyatdan keçdiyini deyib. O, peyvənd olunduqdan sonra arxayınlıq hissi ilə başqa şəhərlərə səyahət edə biləcəyini də söyləyib.Qeyd edək ki, Çində əhalinin COVID-19 infeksiyasına qarşı vaksinasiyası iki mərhələdə aparılır. İlk mərhələdə tibb işçiləri, xaricdən idxal edilən donmuş ərzaqların qəbulu məntəqələrində, o cümlədən yük limanlarında çalışanlara, gəmi və təyyarə heyəti üzvlərinə, ərzaq və meyvə-tərəvəz satıcılarına, ictimai nəqliyyatda çalışanlara və s. peyvənd vurulur. Bundan başqa, yoluxma sayı çox olan ölkələrə təhsil və iş məqsədilə səfər edənlər də birinci mərhələdə vaksinasiya olunurlar. İkinci mərhələ üzrə vaksinasiya prosesi könüllülük prinsipi əsasında aparılır.Vaksinasiyada Çinin "Sinopharm" və "Sinovac" şirkətlərinin peyvəndlərindən istifadə olunur. Hər 2 şirkətin peyvəndləri təsirsiz hala gətirilmiş (inaktivləşmiş) vaksinlərdir. Onların hazırlanmasında orqanizmdə ciddi xəstəliyə və ya əks-təsirə səbəb olmadan bədənin immunitet sistemini virusa məruz qoymaq üçün öldürülmüş virus hissəciklərindən istifadə olunub. Avropa, Asiya və Latın Amerikası üzrə 40-dan çox ölkə, o cümlədən Türkiyə, Pakistan, Misir, Birləşmiş Ərəb Əmirlikləri, Serbiya, Macarıstan, İndoneziya və Braziliya vaksinasiya prosesi üçün Çinin bu şirkətlərindən peyvənd sifariş ediblər. Yanvarın 18-dən Azərbaycanda COVID-19 virusuna qarı başlayan vaksinasiya prosesində də Çinin "Sinovac" şirkətinin istehsalı olan "CoronaVAC" peyvəndindən istifadə olunur.xeber100.com

“AirBaltic” 5 istiqamətdə uçuş həyata keçirməyi planlaşdırır

Latviyanın “AirBaltic” aviaşirkəti bu həftə Tallindən Amsterdam, London, Riqa, Oslo və Stokholm şəhərləri istiqamətində uçuşlar təşkil edir.Azərtac xəbər verir ki, bu barədə “airBaltic” aviaşirkətinin idarə heyətinin sədri Martin Hauss deyib.O bildirib ki, martın 28-dən etibarən isə yay uçuş cədvəli qüvvəyə minəcək. “AirBaltic” mövsümi cədvələ uyğun olaraq, Tallindən Amsterdam, Berlin, Brüssel, Kopenhagen, London, Malaqa, Oslo, Paris, Stokholm, Vyana və Vilnüs istiqamətində birbaşa uçuşlar təklif edəcək.Qeyd edib ki, epidemioloji vəziyyətlə əlaqədar olaraq cari ilin yanvar ayında Tallin Hava Limanı cəmi 27 min 503 sərnişinə xidmət göstərib ki, bu da ötən ilin müvafiq ayına nisbətən 87 faiz azdır.xeber100.com

5G smartfonlarının istehsalı yanvar ayında 27 milyon 278 min ədəd təşkil edib

Çində 5G smartfonlarının istehsalı yanvar ayında 27 milyon 278 min ədəd təşkil edib.Azərtac Çinin İnformasiya və Kommunikasiya Texnologiyaları Akademiyasına istinadla xəbər verir ki, bu, Çində aylıq rekord göstəricidir. Keçən ay 5G smartfonlarının istehsalı ümumi mobil telefon istehsalının 68 faizini təşkil edib. Akademiyanın hesabatına əsasən, ötən ay Çində 23 növ 5G smartfonu istehsal olunub.Bildirilir ki, ötən ay ölkədə mobil telefon istehsalı əvvəlki ilin eyni dövrü ilə müqayisədə təxminən 2 dəfə artaraq 40 milyon ədədi ötüb. Yerli brendlər isə ümumi istehsalın 84 faizini təşkil edib.Qeyd edək ki, Çin hazırda 5G şəbəkəsinə qoşulmaların sayına görə dünyada liderlik edir. 2019-cu ilin noyabrından etibarən Çinin 3 mobil rabitə operatoru – “China Mobile”, “China Telecom” və “China Unicom” abunəçilərə 5G şəbəkə xidmətləri göstərməyə başlayıb. Çinin mobil rabitə operatorları bu il də daxil olmaqla 5 il ərzində 5G şəbəkəsinə 220 milyard ABŞ dolları sərmayə yatıracaq. Cari il ərzində Çində 600 min 5G baza stansiyasının quraşdırılması planlaşdırılıb.xeber100.com

Yaponiyanın şimal-şərq sahillərində 7,1 bal gücündə zəlzələ baş verib

Fevralın 13-də Yaponiyanın şimal-şərq sahillərində 7,1 bal gücündə zəlzələ baş verib.Azərtac Kyodo agentliyinə istinadla xəbər verir ki, yeraltı təkanlar nəticəsində ərazidəki atom elektrik stansiyalarında anomaliyalar qeydə alınmayıb. Sunami xəbərdarlığı elan edilməyib.Yerli vaxtla saat 23:08 dəqiqədə qeydə alınan zəlzələnin episentri Fukuşima prefekturasının sahillərində, ocağı 59 kilometr dərinlikdə yerləşib.Yeraltı təkanlar paytaxt Tokio ilə yanaşı, daha yeddi prefekturada hiss olunub. Yerli hakimiyyət orqanlarının verdiyi məlumata görə, Miyaqi və Fukuşima prefekturalarında azı 20 nəfər xəsarət alıb.Zəlzələdən dərhal sonra Baş nazirin ofisinin yanında xüsusi işçi qrup yaradılıb. Baş nazir Yoşihide Suqa şəxsən saat 23:28 dəqiqədə ofisə qayıdıb. Baş nazirin əlaqədar nazirliklərə zəlzələnin vurduğu ziyanın dəqiqləşdirilməsi, təcili xilasetmə işlərinə başlanması və ictimaiyyətə lazımi informasiyanın vaxtında çatdırılması barədə göstərişlər verdiyi bildirilir.Nazirlər Kabinetinin baş katibi Katsunobu Katonun verdiyi məlumata görə, zəlzələdən sonra təqribən 950 min ev elektrik enerjisiz qalıb.xeber100.com

ABŞ-ın Enerji İnformasiya Administrasiyasının məlumatı

ABŞ-ın sutkalıq xam neft hasilatı artır.Azərtac ABŞ-ın Enerji İnformasiya Administrasiyasının (EIA) məlumatına istinadla xəbər verir ki, ötən hesabat həftəsində Birləşmiş Ştatların neft istehsalı 99 min barrel artaraq gündəlik orta hesabla 11,5 milyon barrel səviyyəsində olub.Keçən həftə ABŞ-ın neft idxalı əvvəlki həftəyə görə 650 min barrel azalaraq sutkalıq 5,86 milyon barrel, neft ixracı da əvvəlki həftə ilə müqayisədə 866 min barrel geriləyərək gündəlik 2,62 milyon barrel təşkil edib.EIA-nın proqnozuna görə, cari ildə Birləşmiş Ştatların neft hasilatının gündəlik 11 milyon barrel, gələn il isə 11,5 milyon barrel olacağı gözlənilir.Xatırladaq ki, ötən il fevralın 22-28-ni əhatə edən həftədə ABŞ-ın neft hasilatı sutkada orta hesabla 13,1 milyon barrelə çataraq rekord səviyyəyə yüksəlmişdi.ABŞ 2018-ci ilin noyabrında Səudiyyə Ərəbistanı və Rusiyanı geridə qoyaraq dünyanın ən böyük neft istehsalçısı olub.xeber100.com

Türkiyə Böyük Millət Məclisindəki qrup toplantısında

“Cümhur İttifaqı” olaraq yeni Konstitusiya məsələsində eyni fikirdəyik. Cümhuriyyətimizin yüzüncü ildönümünü çevrilişlə qəbul edilmiş Konstitusiya ilə deyil, yeni mülki Konstitusiya ilə qarşılayacağıq.Azərtac xəbər verir ki, bu fikirləri Türkiyənin hakim Ədalət və İnkişaf Partiyasının (AKP) sədri, Prezident Rəcəb Tayyib Ərdoğan partiyasının Türkiyə Böyük Millət Məclisindəki qrup toplantısında deyib.Dövlət başçısı “Gəlin, hamılıqla birlikdə yeni Konstitusiya təkliflərimizi bu il içində hazırlayıb müzakirələrə başlayaq”, - deyə bütün ölkə ictimaiyyətinə çağırış edib. Prezident bildirib ki, tələsmədən, bütün təbəqələrlə lazımlı məsləhətləşmələr apararaq, müasir tələblərə cavab verəcək bir Konstitusiya hazırlamalıyıq.xeber100.com

Qazaxıstan beynəlxalq uçuşların sayını artırır

Qazaxıstan beş ölkə ilə müntəzəm beynəlxalq uçuşların sayını artırır.Azərtac Qazaxısan Mülki Aviasiya Komitəsinə istinadən bildirir ki, koronavirus infeksiyasının yaranmasının və yayılmasının qarşısının alınması üzrə İdarələrarası Komissiya bir sıra müntəzəm beynəlxalq sərnişin reyslərinin artırılmasına və bərpa olunmasına icazə verib. Bunun da nəticəsində Rusiyaya uçuşların sayı hər iki tərəfdən həftədə üçdən 10 dəfəyə qədər artırılıb.Maldiv adaları istiqamətinə Qazaxıstan hava yolları üçün həftədə yeddi uçuşa icazə verilib. Qırğızıstanın Almatı - Bişkek istiqamətinə həftədə üç, Özbəkistana hər iki tərəfdən həftədə yeddi, Ukraynaya istiqamətinə isə həftədə iki uçuş həyata keçiriləcək.Uçuşlar sanitariya və epidemioloji standartlara tam uyğun olaraq və hava yollarının veb-saytlarında dərc olunmuş cədvələ uyğun həyata keçiriləcəkdir. Bu həftədən etibarən “Aeroflot” Moskvadan Almatıya uçuşları bərpa edəcək və Nur-Sultana uçuşların tezliyini artıracaq.xeber100.com

Rusiya-İran parlamentlərarası əlaqələri müzakirə olunub

İran İslam Respublikasının İslam Şurası Məclisinin sədri Məhəmməd Bağer Qalibaf Rusiyada rəsmi səfərdədir.Azərtac xəbər verir ki, İran İslam Respublikasının İslam Şurası Məclisinin sədri Məhəmməd Bağer Qalibaf Rusiyaya səfəri çərçivəsində Rusiya Federasiyası Dövlət Dumasının sədri Vyaçeslav Volodin ilə görüşüb.Görüşdə iki ölkə parlamentlərinin yüksək səviyyədə komissiyasının İranda keçiriləcək iclasına hazırlıq, energetika, kənd təsərrüfatı, nəqliyyat və digər sahələrdə əməkdaşlıq məsələləri müzakirə olunub.Tərəflər bu ilin sonunda Moskvada Rusiya, İran, Türkiyə, Əfqanıstan, Çin və Pakistan nümayəndələrinin iştirakı ilə terrorizmlə mübarizəyə dair konfrans keçirilməsi məsələsini də nəzərdən keçiriblər.İran İslam Şurası Məclisinin sədri Məhəmməd Bağer Qalibaf İranın Ali Rəhbəri Ayətullah Seyid Əli Xameneinin Rusiya Prezidenti Vladimir Putinə ünvanlandığı məktubu V.Volodinə təqdim edib. O, Rusiyadan ölkəsinə koronavirusa qarşı peyvənd preparatlarının ilk partiyasının artıq daxil olduğunu vurğulayıb.Məhəmməd Bağer Qalibafın həmçinin Rusiya Federasiya Şurasının sədri Valentina Matviyenko ilə görüşü olub.Fevralın 9-da İran İslam Şurası Məclisinin sədri Məhəmməd Bağer Qalibaf Rusiyanın xarici işlər naziri Segey Lavrov və Təhlükəsizlik Şurasının katibi Nikolay Patruşev ilə görüşəcək.xeber100.com

Fevralın 6-da Afrika İttifaqının 34-cü sammiti keçirilib

Fevralın 6-da Afrika İttifaqının 34-cü sammiti keçirilib.Azərtac xəbər verir ki, virtual formatda təşkil edilən sammitdə Afrika ölkələrində pandemiya ilə əlaqədar vəziyyət, sosial-iqtisadi böhran, silahlı münaqişələr, əməkdaşlığın perspektivləri müzakirə olunub.Zirvə görüşündə ABŞ Prezidenti Co Baydenin müraciəti də səsləndirilib. Birləşmiş Ştatların yeni dövlət başçısı Afrika İttifaqı ilə daha sıx əməkdaşlıq etməyə hazır olduğunu, Vaşinqtonun pandemiya ilə əlaqədar daha ağır böhran keçirən ölkələrə yardım edəcəyini bildirib.Sammitdə Konqo Demokratik Respublikasının Prezidenti Feliks-Antonie Tsixekedi Tşilombo 2021-ci ildə Afrika İttifaqının sədri seçilib. Ötən il quruma sədrlik edən Cənubi Afrika Respublikasının Prezidenti Siril Ramafoza onu təbrik edərək uğurlar arzulayıb.Musa Faki Mahamat isə yenidən Afrika İttifaqı Şurasının sədri seçilib. O, namizədliyini ikinci müddət üçün dəstəkləyən 54 Afrika ölkəsinin dövlət və hökumət başçılarına cari ildə komissiyanın fəaliyyəti barədə ətraflı məlumat verib.xeber100.com

Böyük Britaniyada peyvəndin ilk dozası vurulub

Böyük Britaniyada 11 milyondan çox insana peyvəndin ilk dozası vurulub.Azərtac yerli KİV-lərə istinadla xəbər verir ki, hökumət fevral ayının ortalarına qədər 15 milyon insana, may ayına qədər isə 50 yaşdan yuxarı hər kəsə peyvəndin vurulmasını hədəfləyib.Həmçinin ölkədə aparılan araşdırma zamanı “Oksford-AstraZeneca” şirkəti tərəfindən hazırlanan peyvəndin Cənubi Afrikada meydana gələn koronavirusun yeni növünə qarşı təsirli olduğu müəyyənləşib.“Pfizer-BioNTech” və “Moderna” şirkətlərinə məxsus peyvəndlərin də ilkin nəticələrinə görə yeni variantlardan qoruduğu açıqlanıb.xeber100.com

ABŞ-a qəbul edilən qaçqın sayını artırmaq barədə fərman imzalanıb

ABŞ Prezidenti Co Bayden gələn ilədək ölkəsinə qəbul edilən qaçqınların sayının 125 min nəfərə çatdırılması haqqında fərman imzalayıb.Azərtac xəbər verir ki, Ağ ev rəhbərinin fərmanında Bayden cari maliyyə ilində Konqreslə müvafiq məsləhətləşmələrdən sonra qaçqınların qəbulunu artırmağı təklif edəcəyi bildirilir.Qeyd edək ki, Prezident vəzifəsində olduğu müddətdə Tramp ABŞ tərəfindən qəbul edilən qaçqın sayını 2017-ci ildə 50 min nəfərə, 2018-ci ildə 45 min nəfərə, 2019-cu ildə 30 min nəfərə, 2020-ci ildə isə 15 min nəfərə çatdıraraq, qaçqınların qəbulu proqramını tədricən azaldırdı.xeber100.com

“Apple” smartfonları təkmilləşdirilmiş kamera sistemi ilə təchiz ediləcək

Yeni “Apple” smartfonları təkmilləşdirilmiş kamera sistemi ilə təchiz ediləcək.Azərtac xarici saytlara istinadla xəbər verir ki, buraxılışı 2021-ci ilə planlaşdırılan “iPhone” modellərinin əsas xüsusiyyəti yeni kamera olacaq. Mütəxəssislər dəqiqləşdirib ki, qurğuların enlibucaqlı obyektivləri təkmilləşdirilmiş (f/2.4-dən f/1.8-dək) apertura ilə təchiz olunacaq.Bildirilir ki, müvafiq yeniləmə qurğunun kamerasına daha çox işıq almağa imkan verəcək ki, bu da pis işıqlandırma şəraitində çəkilən fotoşəkil və videonun keyfiyyətini artıracaq. “Barclays” analitikləri əmindir ki, təkmilləşdirilmiş kameralarla “iPhone 13” seriyalı bütün smartfonlar təchiz ediləcək. Həmçinin “13 Pro” və “13 Pro Max” modellərində teleobyektivlər “f/2.2” aperturasına və 65 millimetr fokuslama məsafəsinə malik olacaq ki, bu da kameranın xüsusiyyətlərini yaxşılaşdıracaq. Komponent hissələrin tədarükü ilə “Cirrus Logic” şirkəti məşğul olacaq.xeber100.com

Yeni hökumətin formalaşdırılması üçün siyasi proses son mərhələyə qədəm qoyub

İtaliyada Baş nazir Cüzeppe Konte istefa verdikdən sonra dövlət başçısı Sercio Mattarella ölkənin aparıcı siyasi düşərgələri ilə yeni hökumətin formalaşdırılması üçün danışıqları yekunlaşdırıb.Azərtac xəbər verir ki, danışıqlar başa çatdıqdan sonra 79 yaşlı dövlət başçısı Parlamentin Aşağı Palatasının sədri Roberto Fikoya parlamentdəki siyasi qruplarla müzakirələr üçün mandat verib. R.Fiko fevralın 2-dək bu danışıqlar çərçivəsində istefa vermiş Baş nazir Cüzeppe Kontenin indiyədək rəhbərlik etdiyi hökuməti dəstəkləyən siyasi qrupların parlamentdə əksər səs çoxluğuna malik olub-olmayacağını müəyyənləşdirməlidir.Ölkə Prezidenti mətbuata verdiyi açıqlamada bildirib ki, onun apardığı üçgünlük danışıqlar əsnasında parlamentdə belə bir imkanın mövcud ola biləcəyi təəssüratı yaranıb. Yanvarın 29-da S.Mattarella C.Konte hökumətinin onurğa sütununu təşkil edən “Beş ulduz hərəkatı”nın təmsilçiləri ilə yanaşı, müxalif düşərgəni özündə birləşdirən mərkəz-sağçı blokun nümayəndələrini qəbul edib.“Beş ulduz hərəkatı“nın nümayəndələri partiyanın C.Kontenin siyasi kursunu dəstəklədiklərini və onu yeni qurulacaq hökumətin başında görmək istədiklərini ifadə ediblər. Partiyanın sədr əvəzi Vito Krimi bildirib ki, C.Konte ölkəni hazırkı mürəkkəb dövrdə idarə edə biləcək yeganə şəxsdir, irəliyə doğru birgə addım atmaq və məsuliyyətli olmaq üçün əsl məqam yetişib. Mərkəz-sağçı blok adından çıxış edən Matteo Salvini isə dövlət başçısından parlamenti buraxmağı və növbədənkənar seçkilərin keçirilməsi imkanını nəzərdən keçirməyi xahiş edib. Blokda təmsil olunan bütün partiyalar köhnə hökumətin yeni formatda fəaliyyətini davam etdirməsini dəstəkləməyəcəklərini elan ediblər.xeber100.com

ABŞ tibbi maska taxılmasının məcburi olması barədə qərar qəbul edib

ABŞ-ın xəstəliklərin nəzarəti və profilaktikası mərkəzləri (CDC) ictimai nəqliyyatda tibbi maska taxılmasının məcburi olması barədə qərar qəbul edib.Azərtac Reuters agentliyinə istinadla xəbər verir ki, koronavirusun yayılmasının qarşısını almaq məqsədi daşıyan qərar bazar ertəsi günü gecə saatlarında qüvvəyə minəcək. Amerikalılar fevralın 1-də yerli vaxtla saat 23:59-dan etibarən ictimai nəqliyyatda, o cümlədən təyyarə və qatarlarda, avtobuslarda və metroda, taksi və gəmilərdə maska taxmalı olacaqlar. Bu məcburiyyət Birləşmiş Ştatlara gələn, həmçinin ölkədən çıxmaq üzrə olan sərnişinlərə də şamil edilir.ABŞ COVID-19 virusundan ən çox əziyyət çəkən ölkədir. Cons Hopkins Universitetinin bu günə olan məlumatına görə, ABŞ-da 26 milyona yaxın yoluxma halı aşkarlanıb, 436,8 minə qədər insan həyatını itirib.xeber100.com

Avropa-Aralıq dənizi Seysmoloji Mərkəzi: Yeni Zelandiyada zəlzələ baş verib

Yanvarın 24-də Yeni Zelandiya sahillərində 5,8 bal gücündə zəlzələ baş verib.Azərtac xəbər verir ki, bu barədə Avropa-Aralıq dənizi Seysmoloji Mərkəzi məlumat yayıb.Yeraltı təkanların episentrinin Blaff şəhərindən 680 kilometr cənub-qərbdə, ocağının 2 kilometr dərinlikdə olduğu bildirilir.Dağıntılar və zərərçəkənlər barədə məlumat verilmir. Sunami xəbərdarlığı elan edilməyib.xeber100.com

Qırğızıstanda növbədənkənar prezident seçkilərində

Qırğızıstanda növbədənkənar prezident seçkilərində dövlət başçısı seçilən Sadır Japarov Baş nazir vəzifəsindən istefa verib, hökumət isə istefaya göndərilib.Azərtac xəbər verir ki, bu barədə jurnalistlərə Qırğızıstan Prezident Aparatının rəhbəri Suynbek Kasmambetov bildirib.O deyib ki, Sadır Japarov hökumət üzvlərindən yeni hökumət formalaşanadək səlahiyyətlərini icra etmələrini xahiş edib. Yeni hökumətin yaxın günlərdə formalaşdırılması nəzərdə tutulur.Xatırladırıq ki, Sadır Japarov prezidentliyə namizədliyini verənədək müvəqqəti olaraq ölkənin Baş naziri və Prezident səlahiyyətlərini icra edib.xeber100.com

İtaliya Parlamentinin Aşağı Palatasında keçirilən səsvermədə

İtaliyada Baş nazir Cüzeppe Konte Parlamentdə keçirilən birinci etimad votumunu qazanıb.Azərtac xəbər verir ki, Parlamentin Aşağı Palatasında keçirilən səsvermədə 321 deputat bitərəf siyasətçini dəstəkləyib, 259 deputat əleyhinə səs verib, 27 deputat isə bitərəf qalıb. Parlamentdə ilk etimad votumunu öz xeyrinə həll edən C.Konte bu gün Senat qarşısına çıxacaq və hazırkı hökumətin fəaliyyətini davam etdirə bilməsi üçün senatorların etimadını qazanmağa çalışacaqdır. Koalisiyalı hökumətdə təmsil olunan “Beş ulduz hərəkatı” və sosial-demokratların (“Partido Democratico”) Aşağı Palata ilə müqayisədə Senatdakı təmsilçilərinin sayı daha azdır və Senatdakı çıxış və müzakirələrin gərgin keçəcəyi gözlənilir.Aşağı Palatadakı çıxışında C.Konte avropayönümlü deputatları onun hökumətinin siyasi kursunu dəstəkləməyə çağırıb. Baş nazir bildirib ki, pandemiyanın hazırkı gərgin mərhələsində İtaliyada hökumət böhranına yer yoxdur.Liberal və mərkəzçi qüvvələrin dəstəyini qazanmaq üçün C.Konte öz çıxışında kabinetin tərkibində dəyişiklik aparılacağını və həmçinin hökumətin fəaliyyət planını yeniləyəcəyini vəd edib. Bildirilib ki, hökumətin əsas hədəfi ölkəni modernləşdirmək və durğunluq keçirən iqtisadiyyatın qısa zamanda dirçəldilməsi üçün tədbirlər planı həyata keçirməkdir.C.Konte hökumət böhranına səbəb olan və ”Viva İtalia” partiyasına rəhbərlik edən Matteo Renzi ilə yeni alyansın qurulacağına dair bütün ehtimal və iddiaları rədd edib.xeber100.com