Beynəlxalq elmi tədqiqat çərçivəsində kliniki sınaqlar aparılacaq

Koronavirusa qarşı peyvəndin hazırlanması üçün aparılan beynəlxalq elmi tədqiqat çərçivəsində Avstriyanın Zaltsburq əyalətində də kliniki sınaqlar aparılacaq.Azərtac xəbər verir ki, bu barədə Zaltsburq əyalət klinikalarının sözçüsü Volfqanq Fürveqer məlumat verib. Qeyd edilib ki, sentyabrın 27-dək 18-55 yaş arasında sağlam şəxslər kliniki sınaqda könüllü iştirak üçün müraciət edə bilərlər.13 aylıq dövrü əhatə edən tədqiqatlar zamanı peyvənd maddəsinin təsir gücü və mümkün yan təsirləri araşdırılacaq. Peyvənd dozası vurulan könüllülər iki həftə nəzarət altında olacaqlar və bu müddətdə peyvəndin təhlükəsizliyi öyrəniləcək. Müddətin sonunda könüllülərin orqanizmində immunitetin səviyyəsi də diqqət mərkəzində olacaq.Bildirilib ki, ABŞ əczaçılıq konsernlərindən birinin təqdim etdiyi peyvənd maddəsi Avstriya ilə yanaşı, ABŞ, Belçika və Fransada da könüllülər üzərində sınaqdan keçiriləcək.xeber100.com

ABŞ məhsullarının əlavə idxal rüsumlarından azad olunması vaxtı uzadılıb

Çin hökuməti bəzi ABŞ məhsullarının əlavə idxal rüsumlarının azad olunması vaxtını daha bir il uzadıb.Azərtac xəbər verir ki, bu barədə Çinin Maliyyə Nazirliyi məlumat yayıb. Əslində ABŞ-ın 16 adda məhsulunun əlavə idxal rüsumlarından azad olunması sentyabrın 16-da başa çatmalı idi. Avqustun sonunda iki ölkənin ticarət danışıqları üzrə nümayəndələrinin telefon danışığı zamanı tərəflər yanvarda imzalanmış ticarət sazişinin birinci fazasına sadiq olduqlarını bəyan ediblər. Sentyabrın əvvəlində isə ABŞ Çindən idxal olunan bəzi məhsulların əlavə rüsumlardan azad olunması müddətini daha bir il müddətinə uzadıb.Qeyd edək ki, COVID-19 pandemiyası beynəlxalq ticarətə ciddi ziyan vurub. Pandemiya Çin ilə ABŞ arasında yanvarda Vaşinqtonda imzalanmış ticarət sazişinin birinci mərhələsinin icrasına da mənfi təsir göstərib. Çin hökumətinin cari il üçün iş planında çətinliklərə baxmayaraq, ABŞ-la ticarət razılaşmasının həyata keçiriləcəyi vurğulanıb.Çin Baş Gömrük Administrasiyasının statistik məlumatına əsasən, ilin 8 ayında iki ölkə arasında ticarət dövriyyəsinin ümumi dəyəri 344 milyard ABŞ dolları təşkil edib ki, bu da əvvəlki ilin eyni dövrü ilə müqayisədə 3,5 faiz azdır.xeber100.com

“Baker Hughes” şirkətinin məlumatı əsasında…

ABŞ-dakı aktiv neft-qaz qazma qurğularının sayı azalıb.Azərtac xəbər verir ki, bu barədə “Baker Hughes” şirkəti məlumat yayıb. Bildirilir ki, ötən hesabat həftəsində ABŞ-dakı aktiv neft və qaz qazma qurğularının sayı 2 ədəd azalaraq 254 olub. Bu, son 4 ilin minimum göstəricisidir. Keçən ilin eyni dövrü ilə müqayisədə ölkədəki aktiv qazma qurğularının sayı 632 ədəd geriləyib.Ötən həftə ABŞ-dakı aktiv neft qazma qurğularının sayı bir ədəd azalaraq 180 olub. Əvvəlki ilin müvafiq dövrünə görə neft qazma qurğularının sayında 553 ədəd azalma qeydə alınıb.Aktiv qaz qazma qurğularının sayı da bir ədəd geriləyərək 71 olub və keçən ilin eyni dövrünə nisbətən ölkədəki qazma qurğularının sayı 82 ədəd azalıb. Üç qazma qurğusu isə müxtəlif təyinatlı olub.Qeyd edək ki, ABŞ-da aktiv neft qazma qurğularının sayı 1981-ci ildə ölkə tarixində maksimuma, yəni 4 min 530-a çatıb. Neftin qiymətinin ucuzlaşması fonunda ölkədəki aktiv neft qazma qurğularının sayı 2016-cı ilin mayında isə minimuma – 316-ya düşüb.xeber100.com

Misirdə Nümayəndələr Palatasına seçkilər oktyabrda keçiriləcək

Misirdə Nümayəndələr Palatasına seçkilər oktyabrın 24-25-də keçiriləcək. Xarici ölkələrdə yaşayan Misir vətəndaşları isə həmin ayın 21-23-də səs verəcəklər.Azərtac xəbər verir ki, bu barədə ölkənin Milli Seçki Komissiyasının (MSK) sədri Ləşin İbrahim keçirdiyi mətbuat konfransında bildirib.Komissiyanın sədri qeyd edib ki, seçkilərin ilkin nəticələri noyabrın 1-də elan ediləcək. Boş qalan yerlərə təkrar seçkilər isə noyabrın 23-24-də keçiriləcək. L.İbrahim ölkə vətəndaşlarını səsvermədə fəal iştirak etməyə çağırıb.MSK-nin sədri bildirib ki, avqustun 19-da parlamentin yuxarı palatasına – Senata keçirilmiş seçkilərin nəticələri elan edilib. Onun sözlərinə görə, səsvermədə 8 milyon 959 seçici iştirak edib və seçici fəallığı 14,23 faiz olub.Misir parlamentinə seçkilərdə 11 siyasi partiya iştirak edəcək. COVID-19 pandemiyası şəraitində keçiriləcək səsvermə zamanı məntəqələrin dezinfeksiyası, seçicilərin sosial məsafəyə riayət etməsi və qoruyucu maskalardan istifadəyə xüsusi diqqət yetiriləcək.xeber100.com

“Apple” şirkəti məhsullarının növbəti təqdimat gününü elan edib

“Apple” şirkəti məhsullarının növbəti təqdimatının sentyabrın 15-də baş tutacağını elan edib.Azərtac xəbər verir ki, mərasimdə 4 ədəd yeni “iPhone 12” modelinin, “Apple Watch”un və “iPad” modelinin təqdim olunacağı təxmin edilir. Bildirilir ki, şirkət 5.4 düym, 6.1 düym (iki model) və 6.7 düym ekranlara sahib “iPhone 12” modellərini təqdim etməlidir. Məlumata əsasən, istifadəçiləri tamamilə yeni dizayn gözləyir.Bununla yanaşı, ehtimal olunur ki, “Pro” və “Pro Max” modellərinin arxa panellərindəki kameraların yanında “LiDAR” skaneri də olacaq.xeber100.com

Böyük Britaniyada qaydalar yenidən sərtləşdirilir

Böyük Britaniyada koronavirusa yoluxma hallarında artım baş verdiyi üçün qaydalar yenidən sərtləşdirilir.Hökumət tərəfindən qəbul edilən yeni qərara görə bazar ertəsindən etibarən 6 nəfərdən artıq insanın bir yerə toplaşması qadağan olunub.Nazirlər Kabinetindən edilən açıqlamada toplaşma qadağasının həm qapalı, həm də açıq məkanları əhatə etdiyi bildirilib.Qaydaya tabe olmayanlar 100 funt sterlinq məbləğində cəzalandırılacaq. Qanun pozuntusu təkrarlanarsa, cərimə əvvəlki ilə müqayisədə iki dəfə artırılacaq.Qadağa bütün yaş qruplarını, ictimai yerləri, pub və restoranlar kimi yerləri əhatə edir.xeber100.com

Koronavirusla əlaqədar müəyyən edilmiş karantin müddəti azaldılıb

Gürcüstanda koronavirusla əlaqədar müəyyən edilmiş karantin müddəti 14 gündən 8 günədək azaldılıb.Azərtac xəbər verir ki, bu barədə qərar Gürcüstanın Səhiyyə Nazirliyi tərəfindən qəbul edilib. Gürcüstan Dövlət Qurumlararası Koordinasiya Şurası qərarı dəstəkləyib.Qərara əsasən, karantin və ya özünütəcrid rejimində olan şəxsin 8 gündən sonra verəcəyi test neqativ çıxarsa, o, karantin zonasını 9-cu gündə tərk edəcək və 12-ci gündə təkrar test verməli olacaq.Qeyd edək ki, Gürcüstanda karantin müddəti 14 gün olub və hökumətin qərarı ilə avqustun 13-də 12 günədək azaldılıb.xeber100.com

Daşınmaz əmlakın qiymətlərində stabillik müşahidə olunur

Macarıstan daşınmaz əmlaka qoyulan qiymətlərin dəyişməsi üzrə Avropa İttifaqına üzv 27 ölkə arasında sonuncu yeri tutur.Azərtac xəbər verir ki, bu barədə Macarıstanın “Budapest Business Journal” (BBJ) işgüzar qəzeti bildirir. Ötən ilin analoji dövrü ilə müqayisədə Macarıstanda daşınmaz əmlak qiymətləri 5,4 faiz aşağı düşüb. Bununla yanaşı, bütün Avropa İttifaqı məkanında kifayət qədər fərqli mənzərə müşahidə olunur. İş orasındadır ki, bu il ölkələrin əksəriyyətində qiymətlərin dəyişən artımı nəzərə çarpır.İllik hesablamada 12,3 faiz göstərici ilə Lüksemburq birincidir. Estoniyada isə ötən ilin analoji dövrü ilə müqayisədə evlərin qiyməti orta hesabla 10 faiz artıb. Macarıstandan başqa qiymətlərin aşağı düşdüyü yeganə ölkə İrlandiyadır.xeber100.com

Pakistan mətbuatının məlumatına görə…

Son sutka ərzində Pakistanda COVID-19 infeksiyasına 513 nəfər yoluxub və xəstələrin sayı 298 min 25 nəfərə çatıb.Pakistan mətbuatı xəbər verir ki, son 24 saatda bu xəstəlikdən daha 5 nəfər ölüb. Ümumilikdə, pandemiya yayılandan bəri 6 min 349 nəfər infeksiya səbəbindən dünyasını dəyişib. Xəstəxanalarda 9 min 132 nəfər müalicə olunur, onlardan 535-nin vəziyyəti ağırdır.İndiyədək virusdan 282 min 553 nəfər sağalıb.xeber100.com

Sentyabrın 6-da İndoneziya sahillərində güclü zəlzələ olub

Sentyabrın 6-da İndoneziya sahillərində 5,9 bal gücündə zəlzələ olub.Azərtac xəbər verir ki, bu barədə ABŞ Geoloji Xidməti məlumat yayıb.Yeraltı təkanların episentrinin Ternate şəhərindən 132 kilometr şimal-şərqdə, ocağının isə 26,6 kilometr dərinlikdə yerləşdiyi bildirilir.Dağıntılar və zərərçəkənlər barədə hələlik məlumat verilmir. Sunami xəbərdarlığı elan edilməyib.xeber100.com  

Rumıniyada parlament seçkiləri keçiriləcək

Rumıniyada dekabrın 6-da parlament seçkiləri keçiriləcək. Bu barədə ölkənin Baş Naziri Lüdovik Orban məlumat verib.O qeyd edib ki, koronavirusla bağlı olan risklərə baxmayaraq, seçkilərin keçirilməsi gözlənilir və ölkə qanunvericiliyinə əsasən ən uyğun vaxt dekabrın 6-dır.Analitiklərin fikrincə, hazırkı Baş Nazir Lüdovik Orbanın başçılıq etdiyi Milli Liberal Partiyası (PNL) parlament seçkilərində qalib gələcək.Qeyd edək ki, koronavirus epidemiyası ilə üzləşmiş Rumıniyanın iqtisadiyyatı 12,3 faiz azalıb. Hökumətin yeni ildə qarşısına qoyduğu vəzifələrdən ən əsası məhz iqtisadi vəziyyəti yaxşılaşdırmaq olacaq.xeber100.com

Koronavirusla əlaqədar yeni məhdudiyyətlər tətbiq olunacaq

Budapeşt koronavirus pandemiyası ilə əlaqədar yeni məhdudiyyətlərin tətbiq olunmasını elan edib. Azərtac xəbər verir ki, Baş Nazirin dəftərxana ofisinin rəhbəri Gergey Quyaş bunun “Avropada ikinci koronavirus dalğasının güclənməsi” ilə əlaqədar olduğunu söyləyib. Onun sözlərinə görə, hətta bugünkü COVID-19-a yoluxanların nisbətən yüksək rəqəmləri hələ o dərəcədə həyəcanverici sayıla bilməz, çünki epidemiya yayılmaqda davam edir. Koronavirus infeksiyası daha çox xaricdən yayılır və ən böyük risk onun iqtisadiyyat, iş yerləri və tədris ilinin başlanması üçün yaratdığı təhlükədir.Gergey Quyaş bildirib ki, operativ qrup, həmçinin sərhəd keçidinə dair tövsiyələrini verib. Macarıstan pandemiyanın birinci dalğasında tətbiq olunmuş qaydalarına qayıdır. Bu aydan etibarən əcnəbilər Macarıstana yalnız “zəruri hallarda” daxil ola biləcək. Xaricdən gələn Macarıstan vətəndaşları üçün 14 günlük ev karantini və ya iki mənfi koronavirus testi məcburi olacaq.xeber100.com

Fransa iqtisadi dirçəlişi təmin etmək məqsədilə yardım ayıracaq

COVID-19 pandemiyasının təsiri nəticəsində yaranmış tənəzzüldən çıxmaq üçün Fransa iqtisadi dirçəlişi təmin etmək məqsədilə 100 milyard avro yardım ayıracaq.Azərtac xəbər verir ki, bu haqda Fransanın Baş naziri Jan Kasteks Nazirlər Şurasının iclasından sonra keçirdiyi mətbuat konfransında deyib.J.Kasteks bildirib ki, bu, Avropa ölkələri arasında ən böyük iqtisadi bərpa planıdır. Planın üç əsas istiqamətdə reallaşdırılacağı qeyd edilib. Belə ki, yardımın 30 milyard avrosu ekoloji keçid, 35 milyard avroluq hissəsi müəssisələrin dəstəklənməsi, 35 milyard avro isə sosial və ərazi birliyinin möhkəmləndirilməsinə ayrılacaq.İqtisadi bərpa planının əsas məqsədi 2022-ci ilədək ölkənin sanitar böhrandan əvvəlki cəlbedicilik səviyyəsini bərpa etmək, eləcə də 2021-ci ilədək 160 min yeni iş yerinin açılmasına nail olmaqdır.xeber100.com

Ukraynanın Nazirlər Kabinetinin qəbul etdiyi qərara əsasən

Ukraynanın Nazirlər Kabinetinin qəbul etdiyi qərara əsasən Ukrayna MDB-nin daha üç sazişində, xüsusilə, Baytarlıq sahəsində, təşkilata üzvü olan dövlətlərin ərazilərinin sanitar mühafizəsi sahəsində əməkdaşlıq haqqında və Bitki Karantini üzrə Koordinasiya Şurasının yaradılması barədə sazişlərdə iştirakını dayandırıb.Azərtac xəbər verir ki, bu qərar hökumətin sentyabrın 2-si keçirilmiş iclasında qəbul edilib.Xatırladaq ki, avqust ayında Ukrayna MDB çərçivəsində yeddi beynəlxalq sazişdən çıxıb.xeber100.com

Özbəkistanın müstəqilliyinin 29-cu ildönümü münasibətilə…

Özbəkistanın müstəqilliyinin 29-cu ildönümü münasibətilə Daşkənddəki “Quksaray” kompleksində bayram tədbiri keçirilib.Azərtac xəbər verir ki, tədbirdə Özbəkistan Prezidenti Şavkat Mirziyoyev, hökumətin, Ali Məclisin və Senatın üzvləri, elm, mədəniyyət və incəsənət xadimləri iştirak ediblər.Prezident Şavkat Mirziyoyev tədbirdə çıxış edərək bayram münasibətilə təbriklərini çatdırıb.Müstəqillik illərində qazanılan uğurlardan danışan Şavkat Mirziyoyev deyib ki, bu il qarşıda duran əsas vəzifələr pandemiya dövründə əhalinin sağlamlığını qorumaq və iqtisadiyyatı tam bərpa etmək, insanlara iş şəraiti yaratmaqdır.xeber100.com

Gürcüstan hökuməti vətəndaşları üçün yeni qaydalar müəyyənləşdirib

Gürcüstan parlamentində ölkə vətəndaşlarının Şengen zonasına daxil olan ölkələrə səfər etmələri ilə bağlı yeni qanun layihəsi bu həftə müzakirəyə çıxarılacaq.Azərtac xəbər verir ki, bu barədə Gürcüstan parlamentindən məlumat verilib.Yeni layihədə Şengen ölkələrinə səfər etmək istəyən Gürcüstan vətəndaşları üçün yeni qaydalar və məhdudiyyətlər nəzərdə tutulub.Yeni qaydalara əsasən, son 10 il ərzində biometrik pasport almayan və pasportunun müddəti getdiyi ölkədən qayıdacağı günədək azı 3 ay müddəti olmayan şəxslər xarici ölkələrə səfər edə bilməyəcəklər.Həmçinin Şengen zonasına daxil olan ölkəyə səfər edən şəxsin geri qayıtmaq üçün təyyarə bileti və ya bu bilet üçün qabaqcadan bildirişi (bron) olmayan, getdiyi ölkədə qalacağı dəqiq ünvan, mehmanxana, dəvət edən şəxsin dəqiq ünvanı tələb olunan sənədlər sırasındadır.Yeni dəyişikliklərdə, həmçinin saxta sənədlər təqdim edən şəxslər və bu sənədləri verən təşkilatlar üçün cinayət məsuliyyəti nəzərdə tutulub.Həmin şəxsləri 2 ildən 6 ilədək, belə faktlar təkrar olduqda isə 3 ildən 8 ilədək azadlıqdan məhrumetmə cəzası gözləyir.Bu qaydalar, əsasən, Gürcüstan vətəndaşlarının xarici ölkələrdə sığınacaq axtarmaları ilə bağlıdır.Qeyd olunur ki, bəzi Avropa İttifaqı ölkələri, o cümlədən Almaniya, Fransa, İsveç və İslandiya bu cür halların qarşısını almaq üçün Gürcüstan hökumətinə müraciət ediblər.Məlumat üçün qeyd edək ki, Gürcüstan vətəndaşlarına Şengen ölkələrinə turist kimi, işgüzar səfərə və ya qonaq getmək üçün 2017-ci ilin mart ayından icazə verilir.Gürcüstan vətəndaşları Şengen zonasına daxil olan ölkələrə 180 gün ərzində cəmi 90 gün səfər edə bilirlər.xeber100.com

30 avqust- Zəfər bayramı və Silahlı Qüvvələr Günüdür

Türkiyədə 30 avqust- Zəfər bayramı və Silahlı Qüvvələr Günüdür.Azərtac xəbər verir ki, bayram münasibətilə Prezident Rəcəb Tayyib Ərdoğan dövlət və hökumət nümayəndələrindən ibarət rəsmi heyətlə birlikdə Türkiyə Respublikasının qurucusu Mustafa Kamal Atatürkün məzarını-Anıtqəbri ziyarət edib.Anıtqəbir önünə əklil qoyulub, Türkiyənin dövlət himni səsləndirilib.Sonra Prezident Rəcəb Tayyib Ərdoğan xatirə kitabına bayram təbriki yazıb.Qeyd edək ki, koronavirusla əlaqədar Zəfər bayramının 98-ci ildönümü münasibətilə təşkil olunan mərasimlər müəyyən məhdudiyyətlərlə keçirilir. İnsanlar maskasız kütləvi tədbirlərə, o cümlədən Anıtqəbir məkanına buraxılmır. Sosial məsafənin qorunması tələb olunur.xeber100.com

Argentinada karantin rejiminin uzadılması elan edilib

Argentina Prezidenti Alberto Fernandes ölkədə karantin rejiminin müddətinin daha 3 həftə - sentyabrın 20-dək uzadılması barədə elan edib.Azərtac xəbər verir ki, martın 20-dən başlayaraq 162 gün davam edən təcriddən sonra sosial yorğunluğu dərk edən Alberto Fernandes mətbuat konfransında iştirak etməməyi üstün tutub və təcrid müddətinin yenidən – artıq 11-ci dəfə uzadılmasını bildirəndə “karantin” terminindən istifadə etməyib.Karantin rejimi müddətinin uzadılması barədə qərarın verilməsinə səbəb ölkədə son 3 gündə COVID-19-a gündəlik yoluxanların sayının 10 mini keçməsi, son 24 saat ərzində tarixi rekordun – 11.717 yeni yoluxma faktının qeydə alınması olub.Hazırkı dövrədək Argentinada 392.009 yoluxma və 8.271 ölüm halı qeydə alınıb.xeber100.com

Rusiya Dövlət Dumasının müzakirəsinə yeni qanun layihəsi təqdim olunub

Rusiya Dövlət Dumasının müzakirəsinə “Nəqliyyat vergisinin ləğvi ilə bağlı Rusiya Federasiyasının Vergi Məcəlləsinə dəyişiklik edilməsi haqqında” qanun layihəsi təqdim olunub.Rusiya KİV-ləri xəbər verir ki, layihə ilə bağlı Maliyyə Nazirliyinin açıqlamasında nəqliyyat vergisinin regional vergi olduğu bildirilib. Həmçinin əlavə edilib ki, bu vergi neft məhsullarından tutulan aksiz vergiləri ilə birlikdə yol fondlarının əsas mənbələrindəndir.Hər bir region bu verginin dərəcəsini, eləcə də yığım qaydalarını və müddətlərini müstəqil şəkildə müəyyənləşdirir. Bununla yanaşı, nəqliyyat vergisinin müəyyənləşdirilməsi zamanı federasiya subyektləri vergi güzəştləri tətbiq edə bilirlər.Açıqlamada qeyd edilib ki, nəqliyyat vergisinin ləğvi yol fondlarının yaradılmasına yönəldilən regional büdcələrə daxilolmaların azalmasına gətirib çıxaracaq ki, bu da federal büdcədən müvafiq kompensasiyaların ayrılmasını tələb edəcək.xeber100.com

Hindistanın Federal Səhiyyə Nazirliyinin açıqlamasında

Hindistanda ötən sutka ərzində COVID-19 infeksiyasına 75 min 760 yoluxma qeydə alınıb. Bu rəqəm COVID-19 infeksiyası Hindistanda yayılmağa başlayandan bəri gündəlik ən yüksək göstəricidir.Azərtac Hindistanın Federal Səhiyyə Nazirliyinin açıqlamasına istinadla xəbər verir ki, ölkədə ümumi yoluxma hallarının sayı 3 milyon 310 min 234 nəfərə çatıb. Ötən sutka ərzində ölkədə COVID-19 səbəbindən 1023 ölüm baş verib. Bununla Hindistanda pandemiya qurbanlarının sayı 60 mini ötüb.Nazirlik hazırda 725 min xəstənin müalicə aldığını açıqlayıb.Qeyd edək ki, Hindistan COVID-19 virusuna yoluxanların sayına görə ABŞ və Braziliyanın ardından üçüncü sıradadır. Ən pis vəziyyət Maharştra və Tamil Nadu ştatlarında, paytaxt Dehlidədir.xeber100.com