Güney Azərbaycanda yeni dərs ili başlayıb

Bu gün, şənbə, 1395-ci günəş ili mehr ayının 3-də (2016-cı il sentyabrın 24-də) bütün İran məktəblərində yeni dərs ili başlanıb. İran İslam Respublikasının Prezidenti Həsən Ruhani bu münasibətlə Tehran məktəblərinin birində olaraq, yeni dərs ilinin başlanması münasibətilə ilk zəngi çalıb. Bu ölkənin təhsil naziri Əli Əsğər Fani deyib ki, yeni dərs ilində 13 milyon 500 min məktəblinin təlim-tərbiyəsi və təhsili ilə 970 min müəllim məşğul olacaq.xeber100.com

Tehran Universitetinin məlumatına görə…

Güney Azərbaycanda Azərbaycan dili və ədəbiyyatı fənni üzrə tədrisə başlanılır. Apa-nın İran bürosunun Tehran Universitetinin məlumatına görə, İranın Təhsil və Qiymətləndirmə Təşkilatı Universitetlərin gələn il qəbul imtahan proqramına Azərbaycan dili və ədəbiyyatı fənnini də əlavə edib. Humanitar fənlər üzrə tələbə qız və oğlanlar 2016-2017-ci il tədris ilində Azərbaycan dili fənni üzrə də təhsil ala biləcəklər. İranın Elm, Təhqiqat və Texnologiya Nazirliyinin icazəsi ilə Azərbaycan dili və ədəbiyyatı fənni universitetlərdə bakalavr pilləsi üzrə tədris olunacaq. Bu fənn ilk dəfə olaraq qəbul imtahanlarında ərəb, fars fənləri ilə yan-yana göstəriləcək. Qeyd edək ki, İran Konstitusiyasının 15 və 19-cu maddələrində ana dilində tədris məsələsi göstərilib, lakin bu iki maddə uzun illər idi ki, icra olunmurdu. Prezident Həsən Ruhaninin hökuməti bu maddələrin icrasına başlayıb. Konstitusiyanın 15-ci maddəsində göstərilir ki, “İran xalqının rəsmi yazı və danışıq dili fars dilidir. Sənədlər, yazışmalar, rəsmi sənədlər və dərsliklər bu dildə olmalıdır. Lakin yerli danışıq dillərindən mətbuatda istifadəsi və məktəblərdə və universitetlərdə fars dili ilə yanaşı həmin dillərin tədrisi azaddır”. Prezident Ruhani hakimiyyətə gəldikdən sonra məktəb və universitetlərdə yerli dillərdə (Azərbaycanca, kürd, bəluç və türkmən) tədrisə icazə verib.xeber100.com

Güney Azərbaycan etiraz səsini ucaltdı

Güney Azərbaycanın Urmiya və Təbriz şəhərlərində azərbaycanlılar izdihamlı aksiyalar keçirib. Sosial şəbəkələrdə yayılan məlumatlara əsasən bir neçə gün əvvəldən gözlənilən etiraz aksiyaları artıq bir neçə saatdır ki, baş tutub və bu dəqiqələrdə davam etməkdədir. Aksiyalarda “Haray, haray, mən türkəm”, “Ölüm olsun farsizmə”, “Azərbaycan milləti, çəkənməz bu zilləti” kimi şüarlar səsləndiriblər. Aksiyaçılar bu günlərdə, İranın “Tərh-i No” adlı qəzetinin 20 iyul tarixli buraxılışında Firdovsinin Şahnamə əsərinin qəhrəmanlarının dili ilə türklərin “bədbəxt”, “irqi pis” kimi təqdim olunmasına etiraz ediblər. Etirazları dəf etmək üçün Urmiya və Təbizdə çoxlu sayda təhlükəsizlik qüvvələri cəlb olunub, saxlanılanlar var. Lakin etirazçılar təhlükəsizlik qüvvələrinə əhəmiyyət vermədən etirazlarına davam edirlər.  Aksiyalar zamanı çoxlu sayda etirazçı saxlanılıb, həbs edilmişdi. Bu günədək həmin etirazlarda iştirak edənlərin həbsi davam etdirilir.xeber100.com  

Güneydə sosial şəbəkə istifadəçilərinin sayı artır

Güney Azərbaycanda əhalinin yarısından çoxu aktiv sosial şəbəkə istifadəçisidir. Bu barədə İran mədəniyyət nazirliyinin informasiya və media mərkəzinin direktoru Murtuza Musəvian məlumat verib. Onun sözlərinə görə, İran əhalisinin 53 faizi, 18-29 yaş qrupu gənclərin isə 72 faizi sosial şəbəkə üzvləridir. Qeyd edək ki, İranda “Facebook”, “twitter” kimi sosial şəbəkələrə giriş qadağandır. Lakin buna baxmayaraq “Proxy”- filter qıran proqramlarla həmin şəbəkələrə daxil olub fəaliyyət göstərilir.xeber100.com

İranda türk millətinin tarixinə dəlalət edən çox saylı abidə sıradan çıxarılıb

Tarixi abidənin təmir olunacağına dair dəfələrlə söz verən hökumət rəsmiləri isə verdikləri vədləri qısa müddətdə unudur. Son aylarda tarixi binanın ətraf ərazisinin ümumi parkingə çevrilməsinə qarşı kəskin etirazlar da heç nəyi dəyişmədi. Aşağıdakı şəkillərdə göründüyü kimi, azərbaycanlıların müqavimət simvollarından biri kimi tanınan Ərk qalası bu gün görənləri təəccübləndirir. Tarixi abidə artıq dağılmaq təhlükəsi ilə üz-üzə qalıb. Bu əzəmətli bina Elxani hökmdarları Sultan Xudabəndənin və Əbu Səidin vəziri olmuş Tacəddin Əlişahın göstərişi ilə hicri-qəməri tarixi ilə 716-724-cü (miladi 1338-1345-ci) illərdə tikilib. Qacarlar dövrünə qədər Ərk qalası dövlət qəsri kimi istifadə edilib, sonralar isə Səttarxan, Bağırxan və digər Təbriz mücahidlərinin sığınacaqlarından biri olub. Ərk qalası bir dəfə zəlzələdən, bir dəfə də çar Rusiyası ordusunun hücumundan xəsarət alıb. Qeyd edək ki, İranda Azərbaycan türk millətinin tarix, dil və mədəniyyətinə dəlalət edən çox saylı abidə artıq sıradan çıxarılıb vəya məhv olmaq üzrədir. Azərbaycan türklərini asimilə etmək məqsədi ilə həyata keçirilən proses Qacarlar dövründən sonra başlayıb.xeber100.com  

“Urmiya gölündə suyun səviyyəsində 10 sm artım müşahidə olunur”…

“İran müxtəlif etnik qruplar üçün qardaşlıq və birlik ölkəsidir”. Bunu İran prezidenti Həsən Ruhani mərkəzi Urmiya şəhəri olan Qərbi Azərbaycan vilayətinə səfəri zamanı deyib. O bildirib ki, İrandakı Azərbaycan vilayətləri, xüsusilə qərbi Azərbaycan vilayəti müsəlman və qeyri-müsəlmanların, şiə və sünnilərin, türk və kürdlərin sülh şəraitində birgə yaşamasının simvoludur: “Bu vilayət Türkiyə, İraq və Azərbaycanla 967 km sərhədə malikdir, bura İranın regiondakı ölkələrə ixracının əsas terminalı olmalıdır”. İran prezidenti Urmiya gölünün quruması və xilası prosesindən də danışıb: “Seçki kampaniyasında söz vermişdim ki, mənim hökumətim Urmiya gölünün xilası üçün işlərə başlayacaq. Mən sözümü yerinə yetirdim. İndi həyata keçirilən layihələr, səylər və insanların köməyi ilə Urmiya gölündə 10 sm su artımı müşahidə olunur”. İran prezidenti bildirib ki, hazırkı səylər effektli olmasaydı, göl 4 ildən sonra bataqlığa çevrilə bilərdi.

“22 may hadisələrindən 10 il sonra”…

21 may 2016-cı il tarixində Beynəlxalq Mətbuat Mərkəzində (BMM) Bütöv Azərbaycan Ocaqlarının (BAO) təşkilatçılığı ilə “22 may hadisələrindən 10 il sonra” mövzusunda geniş dəyirmi masa keçiriləcək. Dəyirmi masada  2006-cı ilmayın 22-də Güney Azərbaycanda şovinist fars rejiminə qarşı baş vermiş kütləvi etiraz aksiyaları, ondan keçən 10 il ərzində Güneydəki ictimai-siyasi hadisələrin inkişafı, mövcud durumda görüləsi zəruri işlər və s. məsələlər müzakirə olunacaq. Tədbirdə ictimai və siyasi xadimlər, ziyalılar, gənc nəslin nümayəndələri, mediya mənsubları və b. iştirak edəcəklər.

20 görkəmli şəxsiyyətinin büstü qoyulacaq

“Təbrizin Elgölü parkında Azərbaycanın 20 görkəmli şəxsiyyətinin büstü qoyulacaq”. Bu barədə Şərqi Azərbaycan Abadlaşdırma Təşkilatının icraçı direktoru Əli Fərruxi məlumat verib. O bildirib ki, “Abadlaşdırma Təşkilatı Azərbaycan mədəniyyəti və ədəbiyyatının görkəmli nümayəndələrini gənc nəsil və xarici turistlərə tanıtdırmaq üçün önəmli qərar verib. Biz 20 tanınmış şəxsiyyətin büstünü hazırlayırıq, işlər başa çatdıqdan sonra büstlər Elgölü parkında müəyyən edilmiş yerlərə  qoyulacaq.” Ə.Fərruxi büstü hazırlanan görkəmli şəxsiyyətlərin bir neçəsinin adını da açıqlayıb. “Sattarxan, Baqirxan, Şeyx Məhəmməd Xiyabani, Ustad Şəhriyar, Pərvin Etisami və s. kimi şəxsiyyətlər bu şəhər üçün böyük zəhmət çəkiblər və bu gün onların büstünü ucaltmaq bizim mənəvi borcumuzdur”- deyə o vurğulayıb. Qeyd edək ki, Güney Azərbaycan və İranın müxtəlif şəhərlərində soydaşlarımızın milli özünüdərk prosesi çoxşaxəli istiqamətlərə yönəlməkdədir. Bu, Azərbaycan Milli Hərəkatının güclənməsi ilə mümkün olub. Prosesə bəzən yerli vəzifəli şəxslər də dəstək verir.

15-ci Yubiley Beynəlxalq “Turizm və Səyahətlər” sərgisi – “AITF 2016”

  “Güney Azərbaycan vilayətləri apreldə Azərbaycan paytaxtı Bakıda keçiriləcək Beynəlxalq Turizm və Səyahətlər Sərgisində iştirak edəcək”. Bu barədə Ərdəbil Vilayəti Mədəni İrs Təşkilatının Turizm üzrə sədr müavini jurnalistlərlə görüşündə məlumat verib. Qadir Tağızadə bildirib ki, aprelin 7-9-da (fərvərdinin 19-21-də) Bakıda keçiriləcək sərgiyə ölkənin şimal vilayətləri qatılacaq. “Planlaşdırmaya görə, sərgidə Şərqi Azərbaycan, Qərbi Azərbaycan və Zəncan vilayətləri ilə yanaşı Araz və Makı azad ticarət məntəqələri də iştirak edə bilər. Adı çəkilən qrupdan bu günə qədər yalnız Şərqi Azərbaycan, Ərdəbil və Makı azad ticarət məntəqəsi sərgiyə qatılacaqlarını elan ediblər”- deyə o qeyd edib. Q.Tağızadə sözlərinin sonunda Bakıda keçiriləcək sərgini, bölgənin turizm potensialını tanıtdırmaq üçün yaxşı bir fürsət kimi qiymətləndirib. Onun sözlərinə görə, bölgənin turizm potensialını əks etdirən braşura, poster, turizm xəritəsi və lövhələr kimi müxtəlif reklam-çap məhsulları Azərbaycan türkcəsində hazırlanacaq. Qeyd edək ki, aprelin 7-9-da Bakıda regionun ən böyük turizm tədbirlərindən biri – 15-ci Yubiley Beynəlxalq “Turizm və Səyahətlər” sərgisi - “AITF 2016” işinə başlayacaq. Hazırda sərginin keçirilməsi üçün hazırlıq işləri aparılır.  

Güney Azərbaycan Qarabağ üçün dəstəyini əsirgəmir

Qarabağda - Ermənistan-Azərbaycan qoşunlarının təmas xəttində gedən şiddətli döyüşlər Azərbaycanın Güneyində də böyük narahatlıqla izlənilir. Bir sıra Güney Azərbaycan kəndlərinin sakinləri Qarabağla sərhəd ərazilərə, Arazboyuna çıxaraq əsgərlərimizlə həmrəyliklərini nümayiş etdiriblər. Ordumuzun qələbəsi üçün dualar ediblər. Bu arada Güney Azərbaycan Milli Azadlıq Cəbhəsi bəyanat yayaraq işğal edilmiş topraqlarımızı Güney Azərbaycan xalqının milli məsələsi olaraq gördüklərini açıqlayıblar. Bəyanatda deyilir: - Güney Azərbaycan milli azadlıq hərəkatı xalqımızın bütün milli məsələlərinə göstərdiyi həssasiyəti və üstləndiyi sorumluluğu eyni dərəcədə tarixi və əbədi Azərbaycan toprağı olan Qarabağ üçün göstərməkdədir. Ermənistan və bölgədəki strateji dəstəkçiləri Bütöv Azərbaycan xalqının varlığını hədəf alıbdır. 30 milyon Güney azərbaycanlının vətəndaşı olduğu İran hökumətinin Ermənistanla davam etdiyi dostluq ilişkiləri Güney azərbaycanlılara qarşı apardığı düşmənçilik siyasətinin sənədidir. Güney Azərbaycan xalqının və milli fəallarının davamlı və cəmi etirazlarına baxmayaraq Ermənistanla dostca əlaqələrinə davam edən İran hökumətini insanlıq və millətimiz adına qınayırıq. Güney Azərbaycan Milli Azadlıq Cəbhəsi olaraq əziz şəhidlərimizin ailələri və yaxınlarına bütöv Azərbaycan millətinə başsağlığı diləyirik Azərbaycan dövləti ordusu və millətinin yanındayıq və ordumuzun İşğal edilmiş torpaqlarımızı Ermənistan silahlı qüvvələrindən təmizləyəcəyinə inanırıq. Xatırladaq ki, təbrizli gənclər küçələrə çıxaraq "Qarabağ bizimdir, bizim olacaq", "Ölüm olsun erməniyə" şüarları ilə yürüş keçiriblər.  

Beynəlxalq Ana Dili Günü

Təbrizdə Beynəlxalq Ana Dili Günü münasibəti ilə ana dildə təhsil tələbini əks etdirən plakatlar asılıb. TURKUSTAN.info xəbər verir ki, üzərində “Türk dilində mədrəsə - Olmalıdır hər kəsə”, “Ey quran, ey islam hanı mənim ana dilim?” kimi sözlər yazılan plakatlara, Təbrizin müxtəlif yerlərində rast gəlinir. Beynəlxalq Ana Dili Günü münasibəti ilə asılan plakatlar Azərbaycan Milli Hərəkat fəalları tərəfindən hazırlanıb. Güney Azərbaycanın Tikantəpə şəhərində də Beynəlxalq Ana Dili Günü ərəfəsində geniş təbliğat həyata keçirilib. Azərbaycanlı fəallar divarlar üzərində ana dildə təhsil tələbi ilə şüar yazmaqla yanaşı, əhali arasında oxşar məzmunla təbliğat kartları yayıblar.