Səhiyyə Nazirliyinin göstərişi ilə xüsusi təlim-treninqlər davam edir

Səhiyyə Nazirliyinin göstərişi ilə Əziz Əliyev adına Azərbaycan Dövlət Həkimləri Təkmilləşdirmə İnstitutunda həkim və orta tibb işçiləri üçün koronavirusla bağlı keçirilən xüsusi təlim-treninqlər davam edir.İnstitutdan Azərtac-a verilən məlumata görə, belə təlimlərdən bir neçəsi Daxili İşlər Nazirliyinin tibb personalı üçün keçirilib. Həmin təlimlərdə nazirliyin Tibb İdarəsində işləyən infeksionistlər, reanimatoloqlar, anestezioloqlar və terapevtlər iştirak ediblər. Təlimdə koronavirusa yoluxmuş xəstələrlə ilk təmas edən həkimlərə və tibb bacılarına xəstəlik, mövcud olan müalicə sxemləri və virusla mübarizə tədbirləri haqqında ən son məlumatlar çatdırılıb, praktik vərdişlər nümayiş etdirilib.Qeyd edək ki, təlimlərin məqsədi koronavirusla mübarizə aparan və ən çox risk altında olan həkim və orta tibb işçilərini virus və ondan qorunma yolları ilə bağlı məlumatlandırmaq, əks-epidemik tədbirlərə hazırlamaqdır.xeber100.com

Səhiyyə nazirliyinin məlumatı əsasında…

Hazırda Azərbaycanda karantində olanların sayı təxminən 1000 nəfərdir. Virusa yoluxanlar əsasən 29-50 yaş arasında olan insanlardır. Virusa yoluxanlardan təxminən 30-u xaricdə virusa yoluxub gələnlərdir, digərləri ölkə daxili yoluxmaya tutulanlardır.Azərtac xəbər verir ki, bu barədə Səhiyyə nazirinin müavini Viktor Qasımov Nazirlər Kabineti yanında Operativ Qərargahın koronavirusla bağlı KİV nümayəndələri üçün keçirdiyi mətbuat konfransında bildirib.Nazir müavini qeyd edib ki, ölkəmizdə virusa qarşı dərman preparatları, əlavə qoruyucu vasitələr alınır. Virusdan qorunmaq üçün, ilk növbədə, şəxsi gigiyenaya önəm vermək lazımdır. Əllər tez-tez yuyulmalı və spirt tərkibli məhlullar vurulmalıdır. Eyni zamanda, vətəndaşlar sosial izolyasiya tədbirlərinə diqqət göstərməlidir.xeber100.com

Dünya Səhiyyə Təşkilatı yeni növ koronavirusla bağlı vəziyyəti açıqlayıb

Dünya Səhiyyə Təşkilatı yeni növ koronavirusla bağlı (COVID-19) martın 18-nə olan vəziyyəti açıqlayıb.Azərtac xəbər verir ki, 2019-cu ilin dekabrında Çində baş qaldırmış yeni koronavirus artıq 166 ölkəyə yayılıb.Dünya üzrə koronavirusa 198 543 nəfər yoluxub (326 yeni yoluxma), 7 988 nəfər ölüb, 82 779 nəfər isə sağalıb (1 100 yeni sağalanlar).xeber100.com

Əmirliklərin Səhiyyə və Profilaktika Nazirliyinin məlumatı

Birləşmiş Ərəb Əmirliklərində (BƏƏ) koronavirusa yoluxmuş daha iki nəfər müalicə edilib. Bu barədə Əmirliklərin Səhiyyə və Profilaktika Nazirliyi məlumat yayıb. Beləliklə, bu ölkədə olan səkkiz xəstədən üçün tam müalicə edilərək xəstəxanadan buraxılıb.Azərtac nazirliyin rəsmi saytına istinadla xəbər verir ki, koronavirus xəstəliyindən tam müalicə olunan ilk pasiyent 73 yaşlı Çin vətəndaşı Lyu Yuytzya olub. Xəstəxanadan tamamilə sağlam vəziyyətdə buraxılan digər şəxslər isə 41 yaşlı çinli və onun səkkiz yaşlı oğludur.“Emirates” informasiya agentliyinin xəbərinə görə, Çinin BƏƏ-də baş konsulu Li Syuxan və Əmirliklərin Səhiyyə və Profilaktika Nazirliyinin beynəlxalq idarəsinin rəhbəri Fatima Əl Əttar sağalmış pasiyentlərlə görüşərək onları təbrik ediblər. Çinli diplomat koronavirusla mübarizədə onun ölkəsi ilə həmrəylik nümayiş etdirdiklərinə görə nazirliyin rəhbərlərinə və həkimlərə minnətdarlıq edib.Fatima Əl Əttar qeyd edib ki, aparılan son tədqiqatlar koronavirus xəstəliyinin 98 faiz müalicə oluna biləcəyini göstərir. O əlavə edib ki, digər 5 xəstənin müalicəsi davam etdirilir.xeber100.com

Dünya Səhiyyə Təşkilatının bəyanatına əsasən…

Dünya Səhiyyə Təşkilatının (DST) baş direktoru Çin Xalq Respublikasında meydana çıxan və digər ölkələrə yayılan yeni koronavirus epidemiyası ilə bağlı yanvarın 30-da ikinci dəfə Beynəlxalq Tibbi Sanitariya Qaydaları (2005) üzrə Fövqəladə Hallar Komitəsinin iclasını keçirib.BMT-nin Azərbaycandakı nümayəndəliyindən Azərtac-a bildirilib ki, iclasda Çin Xalq Respublikasının Səhiyyə Nazirliyinin nümayəndəsi mövcud vəziyyətlə və həyata keçirilən qabaqlayıcı tədbirlərlə bağlı məlumat verib. Artıq ölkə daxilində 7711 təsdiq edilmiş və 12167 şübhəli hal qeydə alınıb. Təsdiq olunmuş hallardan 1370-i ağır dərəcəli olduğu, 170-nin ölüm halları ilə nəticələndiyi bildirilib . 124 nəfər xəstəlikdən müalicə olunaraq, evə buraxılıb. DST-nin Katibliyi digər ölkələrdəki vəziyyətə dair ümumi məlumat verib. Artıq 18 ölkədə 82 yoluxma halı baş verib. Digər ölkələrdə xəstəliyə yoluxanlardan 7-si Çinə səfər etməyib. Çinin xaricində üç ölkədə virusun insandan insana ötürülməsi halı qeydə alınıb. Bu üç haldan biri ağır dərəcəlidir, ölüm halları olmayıb.Komitə Çin hökumət orqanlarının bu məsələdə liderliyini və siyasi öhdəlik götürməsini, şəffaflığını, mövcud epidemiyanın araşdırılması və nəzarətdə saxlanması üçün göstərdiyi səylərini alqışlayıb. Digər ölkələrin sürətli şəkildə diaqnoz qoyması və özlərini qoruya bilməsi üçün Çin, virusu tez bir zamanda müəyyənləşdirib və genetik ardıcıllığını paylaşıb. Bu, diaqnostik alətlər dəstinin tez bir zamanda hazırlanmasına şərait yaradıb.Komitə hesab edir ki, ölkələr xəstəliyin erkən diaqnostikası, təcridi və müalicəsini təmin etməklə, eləcə də təmas yollarının izlənməsi və risklərə uyğun sosial uzaqlaşdırma tədbirlərinin təşviqi ilə virusun yayılmasına müdaxilə etmək mümkündür. İnfeksiyanın yayılması davam etdikcə, onun qarşısını almaq və azaltmaq üçün strateji hədəflər və tədbirlər görüləcəyini qeyd etmək vacibdir. Komitə epidemiyanın hazırda İctimai Səhiyyə sahəsində Beynəlxalq Fövqəladə Vəziyyət meyarlarına cavab verdiyini qəbul edir və Müvəqqəti Tövsiyələr hazırlanmasını məsləhət görür.xeber100.com  

Səhiyyə Nazirliyinin məlumatı əsasında…

Ümumilikdə 2019-cu il ərzində Səhiyyə Nazirliyinin tabeliyində olan tibb müəssisələrinə 47 milyondan çox müraciət olub, 712 min xəstə stasionar müalicəyə cəlb edilib. Cari ildə 8 minə yaxın insan reabilitasiya və sanator xidmətlərindən istifadə edib. 2019-cu ildə uşaqların 91 faizdən çoxu müayinələrə cəlb olunub. Tibbi müayinədən keçirilən uşaqların 4 faizi sağlamlıq vəziyyətinə görə dispanser qeydiyyata götürülüb, 0,9 faizi isə ixtisaslaşdırılmış tibb müəssisələrinə hospitalizasiya olunub. Maddi texniki bazanın inkişaf etdirilməsi, kadrların ixtisas səviyyəsinin yüksəlməsi hesabına bu gün ölkəmizdə bir sıra ağır xəstəliklər müalicə olunur. 2019-cu ildə dövlət hesabına 915 xəstə üzərində kardiocərrahiyyə əməliyyatı icra olunub ki, onlardan 263-ü uşaqlardır.Azərtac xəbər verir ki, bunu Səhiyyə Nazirliyində ilin yekunlarına həsr olunmuş kollegiya iclasında qurumun tibbi yardımın təşkili şöbəsinin müdiri Gülmirzə Poladov deyib.Şöbə müdiri bildirib ki, 2019-cu il ərzində 2 075 xəstəyə angioqrafiya müayinəsi aparılıb və onlardan 680 nəfərə angioplastika əməliyyatı icra edilib: "Səhiyyə Nazirliyinin maliyyə dəstəyi ilə son illərdə 110 uşaq üzərində uğurlu koxlear implantasiya əməliyyatı aparılıb. 10 il öncə cəmi 7 nəfərin üzərində endoprotezləşmə əməliyyatı aparıldığı halda, cari ildə bu əməliyyatların sayı 119-a çatıb".xeber100.com

Azərbaycanda icbari tibbi sığorta sisteminin tətbiqinə başlanılır

2020-ci il yanvarın 1-dən Azərbaycanda mərhələli şəkildə icbari tibbi sığorta sisteminin tətbiqinə başlanılır.Azərtac xəbər verir ki, icbari tibbi sığorta yanvarın 1-dən Naxçıvan Muxtar Respublikasının ərazisində və 20 rayonda (Şəki, Quba, Qusar, Xaçmaz, Şabran, Siyəzən, Xızı, Şamaxı, İsmayıllı, Ağsu, Qobustan, Balakən, Zaqatala, Qax, Oğuz, Qəbələ, Göyçay, Ucar, Zərdab, Kürdəmir) tətbiq olunacaq. Hazırda pilot layihənin həyata keçirildiyi inzibati ərazilərdə (Mingəçevir şəhəri, Yevlax və Ağdaş rayonları) də icbari tibbi sığorta sisteminin tətbiqi 2020-ci il yanvarın 1-dən başlanılır. İlkin mərhələdə ölkə əhalisinin 23.82 faizinə tibbi xidmət göstəriləcək.2017-ci ildən etibarən ölkəmizdə icbari tibbi sığortanın pilot layihə şəklində tətbiqinə başlanılıb. Mingəçevir şəhəri, Yevlax və Ağdaş rayonlarında həyata keçirilən icbari tibbi sığorta çərçivəsində 370 min nəfərə yaxın sığortaolunan baza zərfi əsasında ödənişsiz tibbi xidmətlərlə təmin edilib.Yanvarın 1-də qüvvəyə minən qanuna əsasən əhalinin sığortalanmasına dövlət tərəfindən adambaşına 90 manat olmaqla 900 milyon manat vəsait ayrılacaq.İcbari tibbi sığorta 10 milyon vətəndaşı əhatə edəcək. İcbari tibbi sığortanın tətbiqi mərhələli şəkildə baş tutacaq.İkinci mərhələdə - aprel-iyun aylarında 17 region – Gəncə və Naftalan şəhərləri, Göygöl, Goranboy, Daşkəsən, Samux, Şəmkir, Qazax, Ağstafa, Gədəbəy, Tovuz, Bərdə, Tərtər, Ağdam, Ağcabədi, Füzuli və Beyləqan rayonları sözügedən sistemə qoşulacaq. Belə ki, bu rayonlarda yaşayan ölkə əhalisinin 24.60 faizi icbari tibbi sığortadan yararlanacaq.İyul-sentyabr aylarında, yəni üçüncü mərhələdə 14 regionda - Şirvan şəhəri, Lənkəran, Masallı, Lerik, Yardımlı, Astara, Cəlilabad, Salyan, Neftçala, Biləsuvar, İmişli, Saatlı, Hacıqabul və Sabirabad rayonlarında icbari tibbi sığorta tətbiq olunacaq. Sözügedən regionlarda ölkə əhalisinin 19.53 faizinə sistem çərçivəsində tibbi xidmət göstəriləcək.Dördüncü mərhələdə - oktyabr-dekabr aylarında - Bakı və Sumqayıt şəhərlərinin, habelə Abşeron rayonunun əhalisi icbari tibbi sığorta sistemindən istifadə edəcək. Bu isə ölkə əhalisinin 32.05 faizini təşkil edir.xeber100.com

Azərbaycan Milli Nevroloqlar Assosiasiyasının təşkilatçılığı ilə…

Bakıda Azərbaycan Milli Nevroloqlar Assosiasiyasının təşkilatçılığı ilə Azərbaycan Nevrologiya Həftəsi keçirilir.Azərtac xəbər verir ki, həftə çərçivəsində I Azərbaycan Uşaq Nevroloqları Konfransı, VII Azərbaycan Nevroloqları Konfransı, Türkdilli ölkələrin IV Beynəlxalq Nevrologiya Konqresi və "EPNS" tədris kurslarıın keçirilməsi nəzərdə tutulub.Gənc mütəxəssislər üçün Əziz Əliyev adına Azərbaycan Dövlət Həkimləri Təkmilləşdirmə İnstitutunda, akademik Z.Əliyeva adına Milli Oftalmologiya Mərkəzində, Uşaq Nevroloji Xəstəxanasında və akademik M.Mirqasımov adına Respublika Klinik Xəstəxanasında keçirilən təlim kurslarında ölkəmizin aparıcı mütəxəssisləri “İnsult baş verdikdə nə etməliyəm?”, “Neyrooftalmologiya”,“Genetik xəstəliklərin müasir molekulyar-genetik diaqnostika üsulları”, “Klinik elektroensefaloqrafiyanın təməl aspektləri”, “Müasir elektromioqrafiyanın sinir xəstəliklərinin diaqnostikasında əhəmiyyəti” mövzularını dinləyicilərə izah edərək qarşıya çıxan problemlərin həlli yollarını göstəriblər.Azərbaycan Dövlət Həkimləri Təkmilləşdirmə İnstitutunun nevrologiya və klinik neyrofiziologiya kafedrasının müdiri, Azərbaycan Milli Nevroloqlar Assosiasiyasının sədri, professor Rəna Şirəliyevanın rəhbərliyi ilə kafedra əməkdaşları kursların aparılmasında fəal iştirak edirlər. Kurslara 100-ə yaxın gənc mütəxəssis cəlb olunub.Nevrologiya Həftəsi dekabrın 20-dək davam edəcək.xeber100.com

XIV Hepato Pankreato Beynəlxalq Cərrahiyyə Konqresində

Türkiyənin Antalya şəhərində keçirilən XIV Hepato Pankreato Beynəlxalq Cərrahiyyə Konqresində dünyanın müxtəlif ölkələrindən 300-dən çox həkim-cərrah iştirak edir.Səhiyyə Nazirliyinin mətbuat xidmətindən Azərtac-a verilən məlumata görə, konqresdə ölkəmizi Azərbaycan Tibb Universitetinin I cərrahi xəstəliklər kafedrasının müdiri, AMEA-nın müxbir üzvü Nuru Bayramov, professor Qurbanxan Müslümov, tibb üzrə fəlsəfə doktoru Ruslan Məmmədov, Elvin İsazadə və Niyazi Qənbərli təmsil edirlər.Azərbaycan cərrahları konqresdə 9 mühazirə və poster çıxışında pankreativ cərrahiyyədə yeniliklər, qaraciyər və öd yollarının cərrahiyyəsi sahəsində əldə edilən uğurlar barədə məlumat veriblər.Beynəlxalq konqresdə qaraciyər transplantasiyası, qaraciyər kistası, minimal invaziv cərrahiyyəyə dair videolar nümayiş etdirilib, laparoskopik cərrahiyyə və digər mövzular ətrafında müzakirələr aparılıb. Konqresin yekununda yüksək dəyər verilən ən yaxşı elmi işlər mükafatlandırılacaq.xeber100.com

“İslam ölkələrinin 4-cü beynəlxalq səhiyyə konqresi” keçirilib

Oktyabrın 10-da Tehranda “İslam ölkələrinin 4-cü beynəlxalq səhiyyə konqresi” keçirilib.Azərtac xəbər verir ki, tədbirə Azərbaycan, Türkiyə, Qətər, Küveyt, Əfqanıstan, İndoneziya, Malayziya, Banqladeş və digər dövlətlərin təmsilçiləri qatılıb. Ölkəmizi bu konqresdə “My Travel” şirkətinin icraçı direktoru Elnara Cabbarova təmsil edib.Tədbirdə İslam ölkələrinin turizm və səhiyyə sahəsində əməkdaşlıq əlaqələrinin inkişafı məsələləri müzakirə edilib.Konqres çərçivəsində “Turizm və səhiyyə turizmi sektorunda işgüzar əməkdaşlıq üzrə İran-Azərbaycan görüşü” baş tutub. Görüşdə İslam ölkələrində səhiyyə turizminin inkişafı mərkəzinin direktoru Mehdi Kərimi çıxış edib. Qeyd olunub ki, müasir dövrdə turizmin inkişafı insanların istirahətini təmin etməklə yanaşı, həm də dövlətlərin iqtisadiyyatının inkişafına böyük təkan verir. Turizmin inkişafı dövlətlərə xarici valyuta axınını təmin edən əsas sahələrdən biridir. İslam ölkələrinin böyük turizm potensialı var və bu dövlətlər qarşılıqlı əməkdaşlıq nəticəsində səhiyyə turizmi sahəsini inkişaf etdirə bilərlər.xeber100.com