Birləşmiş Millətlər Təşkilatının Fələstinli Qaçqınlara Yardım Agentliyi xəbərdarlıq edib

Birləşmiş Millətlər Təşkilatının Fələstinli Qaçqınlara Yardım Agentliyi (UNRWA) Qəzza zolağında bağırsaq, dəri və hepatit növlərinin yayılması ilə bağlı xəbərdarlıq edib. UNRWA-nın Qəzza üzrə mətbuat direktoru Adnan Abu Husne mövzu ilə bağlı mətbuata açıqlama verib. Əbu Hüsne əvvəlki günlərlə müqayisədə bölgədə bağırsaq xəstəliklərinin 4 dəfə, dəri xəstəliklərinin isə 3 dəfə artdığını bildirib. BMT rəsmisi təsdiq edib ki, bölgədə vəba epidemiyasına yoluxma hallarının artıb, həmçinin hepatit növləri ilə bağlı bəzi məlumatlar var. UNRWA-nın Qəzza direktoru Tomas Uayt dünən BBC-yə verdiyi açıqlamada Fələstin bölgəsindəki məktəblərindən birində hepatit A epidemiyasının şahidi olduğunu bildirib.xeber100.com

Rusiya paytaxtının aeroportlarında 65 reys təxirə salınıb, 7 reys ləğv edilib

Moskvada son 145 ilin ən güclü qarı yağıb. “Oliver” siklonunun təsiri nəticəsində sutka ərzində Moskva və Moskva vilayətinə aylıq normanın üçdə biri qədər yağıntı düşüb. Bu gecə qar örtüyünün hündürlüyü 30 santimetrə çatıb. Qarlı hava səbəbindən Rusiya paytaxtının aeroportlarında 65 reys təxirə salınıb, 7 reys ləğv edilib. Hidrometeoroloqlar xəbərdarlıq edir ki, güclü qardan sonra Moskvanı Sibir şaxtaları gözləyir. Dekabrın 6-dan həftə sonunadək 15-20 dərəcəyədək şaxta olacağı proqnozlaşdırılır.xeber100.com

İndoneziyanın Şimali Maluku əyaləti sahillərində 6,2 bal gücündə zəlzələ baş verib

İndoneziyanın Şimali Maluku əyaləti sahillərində 6,2 bal gücündə zəlzələ baş verib. TASS agentliyi bildirir ki, bu barədə Avropa-Aralıq dənizi Seysmoloji Mərkəzi məlumat yayıb. Yeraltı təkanların episentri təxminən 10 min nəfər əhalisi olan Tobelo şəhərindən 89 kilometr qərbdə, ocağı isə 103 kilometr dərinlikdə yerləşib. Tələfat və dağıntılar barədə məlumat yoxdur. Sunami təhlükəsi elan olunmayıb.xeber100.com

Böyük Britaniyanın Daxili İşlər Nazirliyi miqrasiya ilə bağlı əlavə tədbirlər görməyi planlaşdırır

Böyük Britaniyanın Daxili İşlər Nazirliyi qanuni miqrasiya ilə bağlı əlavə tədbirlər görməyi planlaşdırır. “Financial Times” qəzeti xəbər verir ki, nazirliyin məlumatına görə, ixtisaslı işçilər əmək vizası ilə bağlı müraciət etmək üçün ildə azı 26,2 min funt-sterlinq (32,8 min dollar), sosial işçilər isə 20,9 min funt-sterlinq (26,2 min dollar) əməkhaqqı almalıdır. Buna baxmayaraq, hakim mühafizəkarlar partiyasından olan deputatlar qanuni mühacirlərə qarşı daha sərt tədbirlərin görülməsini istəyir. Qeyd edək ki, Böyük Britaniyada işçi çatışmazlığı krallığın 2020-ci ildə Avropa İttifaqını tərk etməsindən sonra daha da artıb.xeber100.com

Birləşmiş Ərəb Əmirliklərinin milli aviadaşıyıcısı “Etihad Airways” səhmlərini satır

Birləşmiş Ərəb Əmirliklərinin milli aviadaşıyıcısı “Etihad Airways” Serbiyanın “Air Serbia” aviaşirkətinin ortaq mülkiyyətindən çıxacaq və dövlət milli aviadaşıyıcıya tam sahiblik edəcək. Bunu Serbiyanın maliyyə naziri Sinişa Mali deyib. Nazir bildirib ki, Serbiya dövləti “Etihad Airways”in 18 faizlik səhmlərini tam şəkildə alacaq. Birləşmiş Ərəb Əmirliklərinin milli aviadaşıyıcısının ortaq sahiblikdən çıxması isə şirkətin qərarıdır. “Air Serbia” regionun ən böyük aviaşirkətidir. Biz iflasda olan bu şirkəti dörd qitəyə, çoxlu sayda ölkəyə uçuşlar həyata keçirən lider aviaşirkətə çevirdik. Dövlət “Air Serbia”nı daha da inkişaf etdirmək niyyətindədir. Bundan sonra da təyyarələrin alınması, yeni istiqamətlərə uçuşların həyata keçirilməsi davam etdiriləcək”, - deyə S.Mali bildirib. Qeyd edək ki, “Etihad Airways” 2013-cü ildə Serbiyanın keçmiş Yuqoslaviya dövründən zərərlə işləyən “JAT Airways” aviaşirkətinin səhmlərinin 49 faizini alaraq “Air Serbia”nın rebrendinqini həyata keçirib. 2021-ci ildə isə Serbiya dövləti aviaşirkətdəki payını 51 faizdən 82 faizə yüksəldib, “Etihad”ın payı 49 faizdən 18 faizə enib.xeber100.com

Xarici işlər nazirləri İsrail-Fələstin məsələsini müzakirə ediblər

Türkiyənin xarici işlər naziri Hakan Fidanın indoneziyalı həmkarı Retno Marsudi ilə telefon danışığı olub. Türkiyənin diplomatik qaynaqlarının məlumatına görə, telefon danışığı qarşı tərəfin təklifi ilə həyata keçirilib. Danışıq zamanı İsrail-Fələstin qarşıdurmasında son vəziyyət barədə fikir mübadiləsi aparılıb. Bu münaqişənin həlli istiqamətində beynəlxalq platformada atılması mümkün olan birgə addımlar müzakirə edilib.xeber100.com

İranın cənubunda 4,7 bal gücündə zəlzələ qeydə alınıb

İranın cənubunda 4,7 bal gücündə zəlzələ qeydə alınıb. Bu barədə Avropa-Aralıq dənizi Seysmoloji Mərkəzi məlumat yayıb. Təbii fəlakətin episentri 1,2 milyondan çox insanın yaşadığı Şiraz şəhərindən 46 kilometr qərbdə yerləşib. Zəlzələnin ocağı 10 kilometr dərinlikdə yerləşib. Tələfat və dağıntılar barədə hələlik məlumat yoxdur.xeber100.com

Viza tələblərinin qarşılıqlı ləğvinə dair saziş noyabrın 10-da qüvvəyə minəcək

Qazaxıstan və Çin arasında viza tələblərinin qarşılıqlı ləğvinə dair saziş noyabrın 10-da qüvvəyə minəcək. Bu barədə Qazaxıstan Xarici İşlər Nazirliyinin “Paraqraf” informasiya sistemində dərc olunan məlumatında deyilir. XİN bildirir ki, Qazaxıstan ilə Çin hökumətləri arasında 2023-cü il mayın 17-də Sian şəhərində imzalanmış viza tələblərinin qarşılıqlı ləğvinə dair saziş cari il noyabrın 10-da qüvvəyə minəcək. Müvafiq saziş Qazaxıstan Prezidenti Kasım-Jomart Tokayevin Çinə səfəri zamanı imzalanıb. Sənəd hər iki ölkə vətəndaşlarına dövlət sərhədini keçdiyi andan 30 təqvim günündən və 180 təqvim günü ərzində 90 gündən çox olmayaraq, vizasız səfər imkanı verir.xeber100.com

Avropa İttifaqı “Kəmər və yol” təşəbbüsünün alternativini müzakirə edəcək

Avropa İttifaqı Çinin “Bir kəmər, bir yol” təşəbbüsünə alternativ proqramın hazırlanması üçün oktyabrın 25-26-da Brüsseldə “Global Gateway” forumu keçirəcək. Bloomberg agentliyi bu barədə Brüsseldəki mənbələrinə istinadla məlumat yayıb. Aİ üçün strateji sayılan regionlarda Çinlə rəqabətə yönələn forumda 20-yə yaxın dövlətin prezidentləri və Baş nazirləri iştirak edəcəklər. Artıq Banqladeş, Namibiya, Moldova və Seneqal liderləri tədbirdə iştiraklarını təsdiqləyiblər. Forumda, həmçinin “Orange” və “Telefonica” telekommunikasiya texnologiyası kompaniyaları, “Allianz” sığorta şirkəti, “Siemens” və “Alstom” maşınqayırma korporasiyaları, “Danone” qida sənayesi nümayəndəsi, həmçinin “Enel” energetika şirkəti kimi Avropa İttifaqının böyük kompaniyaları da təmsil olunacaq. Avropa İttifaqı tədbirdə Konqo və Zambiya ilə “kritik xammalın” tədarükü barədə müqavilələr imzalamağı planlaşdırır. Bu sənədlər Afrikada Konqo və Zambiyanı Anqolanın Atlantik okeanı sahilində yerləşən Lobito limanı ilə birləşdirəcək nəqliyyat dəhlizinin inkişafı üzrə Aİ-nin daha geniş proqramının bir hissəsi olacaq.xeber100.com

Beynəlxalq Valyuta Fondu 2023 və 2024-cü il üçün artım proqnozlarını aşağı göstərib

Beynəlxalq Valyuta Fondu (BVF) Çin üçün 2023 və 2024-cü il üçün artım proqnozlarını aşağı göstərib. Xarici KİV-lər xəbər verir ki, BVF-nin iqtisadi hesabatında, dünyanın ən böyük iqtisadiyyatına malik Çini proqnozlarında 5,2 və 4,5 faiz olduğu halda, bu il 5 faiz, gələn il isə 4,2 faiz böyümə gözlənildiyi bildirilib. Hesabatda Çində istehsal sektorunun satınalma menecerləri indekslərinin aprel-avqust aylarında daralma zonasına daxil olması və daşınmaz əmlak sektorundakı şərtlərin daha da zəifləməsi səbəbindən bərpa sürətini itirdiyi bəyan olunub. Bundan başqa, hesabatda Çinin mənzil bazarında uzunmüddətli korreksiyanın yaxın perspektivdə daşınmaz əmlak istehsalçıları arasında daha çox maliyyə stresinə və aktivlərin keyfiyyətinin daha çox pisləşməsinə səbəb olacağı proqnozlaşdırılır.xeber100.com

Prezidentin vəzifəsindən kənarlaşdırılması məsələsinin müzakirəsinə başlanılıb

Gürcüstan parlamentinin plenar iclasında prezidentin impiçment yolu ilə vəzifəsindən kənarlaşdırılması məsələsinin müzakirəsinə başlanılıb. Müzakirələrdə Prezident Salome Zurabişvili də iştirak edir. Plenar iclasda suallar veriləcək və siyasi bəyanatlar səsləndiriləcək. Salome Zurabişvili parlamentin iclas zalına daxil olan zaman müxalifətdən yalnız bir neçə deputat ayağa qalxıb. Parlament çoxluğunun lideri İrakli Kobaxidze prezidentin impiçmenti məsələsi ilə bağlı danışıb. Bu gün müzakirələrdən sonra məsələ səsverməyə çıxarılacaq. Prezidentin impiçmenti üçün 100 səs lazımdır.xeber100.com

Ankara 13 oktyabr 1923-cü ildə Türkiyə Cümhuriyyətinin paytaxtı elan olunub

Qurtuluş Savaşının mərkəzi olan Ankara 1923-cü il oktyabrın 13-də Anadolu düşmən işğalından azad edildikdən sonra gənc Türkiyə Cümhuriyyətinin paytaxtı elan olunub. Birinci Dünya müharibəsinin sonunda Türkiyə işğal edildikdən sonra Qazi Mustafa Kamal Paşa 1919-cu il mayın 19-da Samsuna gələrək Qurtuluş Savaşını başladır. Ankaranın savaşdakı əhəmiyyəti onun Geyve Boğazı, Kütahya və Afyon kimi düşmən işğalı altında olan mövqelərlə dəmir yolu əlaqəsi və kifayət qədər döyüş imkanlarına malik olmasından irəli gəlirdi. Müharibənin uğurunu təmin etmək üçün nizami orduların yaradılması qərarı da məhz Ankarada qəbul edilmişdi. Bu ordular İnönü, Sakarya və Dumlupınarda düşməni məğlub etdi. Qurtuluş Savaşı 1922-ci il avqustun 30-da qazanılan zəfərlə başa çatdı. Bunun ardından 1923-cü il oktyabrın 9-da Türkiyənin xarici işlər naziri İsmət Paşa “Türk dövlətinin inzibati mərkəzi Ankara şəhəridir” ifadəsinin yer aldığı qanun layihəsini parlamentə təqdim edir. Qanun layihəsi həmin il oktyabrın 13-də Parlamentin Ümumi Məclisində səs çoxluğu ilə qəbul olunur. Ankara paytaxt elan olduqdan sonra şəhərdə sürətli tikinti və yenidənqurma işlərinə başlanılır. Xarici mütəxəssislər dəvət edilərək şəhərin gələcək planı hazırlanır. Yenidənqurma işlərində təhsil və mədəniyyət müəssisələrinə üstünlük verilir. Bu gün Türkiyənin paytaxtı elan edilməsinin 100-cü ili qeyd olunan Ankara dünyanın ən qabaqcıl və müasir şəhərlərindən biridir.

İtaliyada ictimai nəqliyyat və aviasiya sənayesinin işçi heyəti milli tətil edib

İtaliyada ictimai nəqliyyat və aviasiya sənayesinin işçi heyəti milli tətil edib. Bu sahədə fəaliyyət göstərən həmkarlar ittifaqlarının qərarı ilə ölkədə bütün ictimai nəqliyyat növləri üzrə işçilər və hava limanlarının yerüstü işçi heyəti 4 saatlıq tətil ediblər. Buna səbəb kimi işçilərin müqavilələrinin yenilənməməsi göstərilir. Paytaxt Romada, eləcə də digər böyük şəhərlərdə avtobus, metro və tramvay xətlərinin hərəkətində fasilələr yaranıb. Bu, sərnişinlər arasında narahatlıq və təşvişə səbəb olub, ictimai nəqliyyatın hərəkətinə mənfi təsir göstərib. Aviasiya sənayesinin işçi heyətinin tətilinə bəzi hava yolu şirkətləri də qoşulub. Nəticədə ölkədəki hava limanlarında yüzlərlə daxili və beynəlxalq aviareys ləğv edilib, uçuşlarda gecikmələr olub.xeber100.com

ABŞ Konqresinin Nümayəndələr Palatası yeni yardımı böyük səs çoxluğu ilə təsdiqləyib

ABŞ Konqresinin Nümayəndələr Palatası Ukraynaya 300 milyon dollar məbləğində yeni yardımı böyük səs çoxluğu ilə təsdiqləyib. Xarici KİV-lər xəbər verir ki, vəsait əvvəlcə Müdafiə Departamentinin 2024-cü maliyyə ili üçün maliyyələşdirmə qanunvericiliyinə daxil edilib və bu, bəzi respublikaçıların etirazına səbəb olub. Bundan əvvəl Nümayəndələr Palatasında Respublikaçılar Partiyasının liderləri Ukraynaya həmin məbləğdə yardımı Pentaqonun maliyyələşdirmə qanun layihəsindən çıxarıblar. Nümayəndələr Palatasında Ukraynaya dəstək qızğın müzakirə olunur, bəzi qanunvericilər Kiyevə yardımı azaltmağa çalışır, digərləri isə ABŞ-ın müttəfiqini dəstəkləməli olduğunu deyir.xeber100.com

Birləşmiş Millətlər Təşkilatının müstəmləkə altında olan 17 ərazini tanıyır

BMT-nin 78-ci Baş Assambleyası çərçivəsində təşkil edilmiş konfransda anti-müstəmləkəçi təşkilatlar Qvadelupanın müstəmləkəsizləşdiriləcək ölkələr siyahısına daxil edilməsini tələb ediblər. BMT müstəmləkə altında olan 17 ərazini tanıyır. Bu siyahıda 2 dənizaşırı ərazi olsa da, Qvadelupanın adı yoxdur. Birləşmiş Millətlər Təşkilatının (BMT) Nyu-Yorkdakı mənzil-qərargahında keçirilən 78-ci Baş Assambleyasına qatılan Qvadelupa nümayəndə heyəti Qvadelupa Milli Alyansı (ANG), Təzminat üçün Beynəlxalq Hərəkatı (MİR), Alternativ Siyasi Layihə Təşəbbüs Komitəsi (CIPPA), Qara Xalqlar Beynəlxalq Komitəsi (CIPN), Qvadelupa Qurtuluş Xalq Birliyi (UPLG), Qvadelupa Milli Azadlıq Cəbhəsi (FKNG) və Qvadelupa Xilas Kollektivi (KSG) kimi yerli siyasi təşkilatların nümayəndələrindən ibarətdir. Qvineya və Martinikdən olan həmkarları da Qvadelupa nümayəndə heyətinə qoşulub. Natali Mintaçi (Nathalie Minatchy, ANG) və Jan-Jakob Bisep (Jean-Jacob Bicep, UPLG) iclasda çıxış edərək, qvadelupalılar adından danışıblar. Qeyd ediblər ki, nümayəndə heyətinin tələbi Qvadelupanın müstəmləkəsizləşdiriləcək ölkələr siyahısına daxil edilməsidir. UPLG-nin baş katibi Jan-Jacob Bicep çıxışında Qvadelupanın BMT-nin müstəmləkəsizləşdiriləcək ölkələr siyahısına daxil edilməsini tələb etməklə yanaşı, təzminat ödənilməsini “dekolonizasiyanın əsas sütunu” kimi təqdim edib. “Dekolonızasyon: Sakit inqılab” adlı tədbirin yekun bəyannaməsi BMT-nin rəhbər orqanlarına göndərilib. Qvadelupanın UPLG siyasi təşkilatı ölkəsinin və Fransanın digər koloniyalarının müstəmləkə vəziyyətini beynəlxalq diqqət mərkəzinə gətirən və onları mövcud təcriddən çıxarmağa kömək edən bu böyük təşəbbüsü alqışlayıb. Xatırladaq ki, BMT-də faktiki olaraq dekolonizasiya üzrə Xüsusi Komitə mövcuddur. O, bütün dünyada öz suverenliyinə can atan və hələ də müstəmləkə altında olan ərazilərin tələblərini dəstəkləmək üçün məsuliyyət daşıyır. Bu günə qədər BMT iki milyona qədər insanın yaşadığı 17 ərazini hələ də müstəmləkədə olan ərazilər hesab edir. Fransanın dənizaşırı müstəmləkəsi olan - Qvineya, Polineziya və Yeni Kaledoniyanın da bu siyahıya əlavə edilməsi tələb olunur.xeber100.com

Almaniya pilotsuz uçan aparatlar tədarük edəcəyini açıqlayıb

Almaniya Müdafiə Nazirliyi Ukraynaya 50 pilotsuz uçan aparat tədarük etmək niyyətində olduğunu bildirib. Bu barədə Bundesverin saytında yerləşdirilən məlumatda qeyd olunub. Cihazların ilk partiyası ən qısa zamanda Ukraynaya göndərilməlidir. Bundan əlavə, Berlin Kiyevə təxminən 400 milyon avro dəyərində geniş dəstək paketi vəd edib. Buraya “Gepard” özüyeriyən zenit qurğusu, IRIS-T orta mənzilli raketləri, hərbi nəqliyyat maşınları üçün ehtiyat hissələri, həmçinin mərmilər, minalar və digər zirehli texnikalar daxildir.xeber100.com  

Sinqapurun Çanqi aeroportu turistlərə pasportsuz səyahət imkanı təqdim edəcək

Dünyanın ən yüklənmiş hava limanlarından biri – Sinqapurun Çanqi aeroportu turistlərə pasportsuz səyahət imkanı təqdim edəcək. “USA Today” qəzeti xəbər verir ki, bu yaxınlarda Sinqapurda 2024-cü ilin ilk yarısında sərnişinlərə pasportsuz səyahət imkanı verən yeni qanun qəbul olunub. Çanqi hava limanında pasport əvəzinə Sinqapurdan uçan sərnişinlərin üzlərini tanıya biləcək biometrik texnologiyalardan istifadə ediləcək. Çanqi aeroportu təkcə avqust ayında 5,15 milyon sərnişinə xidmət göstərib. Yeni terminalın inşası ilə əlaqədar turistlərin sayının artmağa davam edərək pandemiyadan öncəki səviyyəyə çatacağı gözlənilir. Sinqapurun immiqrasiya sistemi ölkənin təhlükəsizliyini təmin etmək şərti ilə gömrük nəzarətini tez bir zamanda həyata keçirərək artan turist axınının öhdəsindən layiqincə gəlməlidir. Artıq Çanqi aeroportunun bəzi nəzarət-buraxılış məntəqələrində üztanıma sistemlərdən istifadə olunur. Biometrik texnologiyalar ABŞ-ın bir sıra aviakompaniyalarında və aeroportlarında da tətbiq edilir. Eyni zamanda, bu il Dubay aeroportlarının turistlərə pasportsuz səyahət imkanı yaratması gözlənilir.xeber100.com  

ABŞ-nin Geoloji Xidməti: Kanada sahilində 5,6 maqnitudalı zəlzələ olub

Kanada sahilində 5,6 maqnitudalı zəlzələ olub. Bu barədə ABŞ-nin Geoloji Xidməti məlumat yayıb. Xidmətin verilənlərinə görə, yeraltı təkanların episentri əhalisi təxminən 2 min nəfər olan Port-Makneyll şəhərindən 228 km qərbdə yerləşib. Zəlzələnin dərinliyi 10 km dərinlikdə olub. Dağıntı və tələfat barədə məlumat verilməyib. Sunami təhlükəsi elan olunmayıb.xeber100.com

“Reuters”: Mərakeşdə 7 bal gücündə zəlzələ olub

Mərakeşdə 7 bal gücündə zəlzələ nəticəsində ölənlərin sayı 2862 nəfərə çatıb. Bu barədə “Reuters” Mərakeş dövlət televiziyasına istinadla məlumat yayıb. Bildirilib ki, yaralananların sayı 2562 nəfərdir. Müxtəlif ölkələrin axtarış-xilasetmə qrupları və təcili yardım xidmətləri binaların dağıntıları altında qalanların axtarışlarını davam etdirir. Sentyabrın 11-də 2681 nəfərin öldüyü, 2501 nəfərin yaralandığı bildirilmişdi. Qeyd edək ki, sentyabrın 8-də Mərakeş Krallığında güclü zəlzələ baş verib. Mərakeş Milli Geofizika İnstitutunun məlumatına görə, yeraltı təkanların episentri El Haouz əyalətində yerləşən İgil bölgəsində olub. Zəlzələ ocağı 8 kilometr dərinlikdə yerləşib.xeber100.com  

Avropa İttifaqı üzvlərinin əksəriyyəti embarqonun uzadılmasına qarşıdır

Avropa İttifaqı (Aİ) ölkələrinin əksəriyyəti sentyabrın 15-dən sonra Ukraynanın kənd təsərrüfatı məhsullarının idxalına qoyulan qadağanın davam etdirilməsinə qarşı çıxıb. Bu barədə “Politico”nun Avropa nəşri yazıb. Qəzet dörd avropalı diplomata istinadən yazıb ki, Aİ üzvlərinin əksəriyyəti Polşa, Macarıstan, Rumıniya, Slovakiya və Bolqarıstanla fikir ayrılığına düşüb. Bu beş ölkə Ukraynanın taxıl idxalına qoyulan yasağın 2023-cü ilin sonunadək uzadılmasının vacibliyində israrlıdır. Bildirilib ki, sentyabrın 6-da Aİ səfirlərinin görüşü baş tutub və orada əksəriyyət ya məhdudiyyətlərin uzadılmasına qarşı çıxıb, ya da təklifə “şübhə ilə yanaşıb”. KİV-in məlumatına görə, idxal qadağası Fransa və Almaniya nümayəndələri tərəfindən ciddi şəkildə tənqid edilib. Avropa səfirləri Ukraynanın taxıl idxalına görə bir sıra ölkələrin üzləşdiyi çətinlikləri nəzərə alırlar, ancaq assosiasiyanın əksər nümayəndələri Avropa Komissiyasından alternativ tədbirlər təklif etməyi istəyirlər.xeber100.com