Milli Kitabxanada kitab sərgisi açılıb

M.F.Axundzadə adına Azərbaycan Milli Kitabxanasında xalq şairi Qabilin anadan olmasının 90 illiyinə həsr olunmuş “Qabil-90” adlı kitab sərgisi açılıb. Milli Kitabxananın verdiyi məlumata görə, sərgidə ustadın poetik istedadını əks etdirən şeir kitabları və seçilmiş əsərləri nümayiş olunub. Belə ki, sərgidə Qabilin “Seçilmiş əsərləri”, “Adsız bulaqlar”, “Qoy danışsın təbiət”, “Təmizlik”, “Rübailər”, “Gülləboran eylədilər”, “Ömür həbləri”, “Nəsimi” və digər kitabları nümayiş etdirilib, şairin yaradıcılığı haqqında oxuculara ətraflı məlumat verilib. Sərgi iştirakçılar tərəfindən maraqla qarşılanıb.xeber100.com

Milli Kitabxanada kitab sərgisi açılıb

Avqustun 8-də M. F. Axundzadə adına Azərbaycan Milli Kitabxanasında şair Əlisa Nicatın anadan olmasının 80 illiyinə həsr olunmuş “Əlisa Nicat-80” adlı kitab sərgisi açılıb. Milli Kitabxananın məlumatına görə, sərgidə qələm adamının poetik istedadını əks etdirən şeir kitabları və seçilmiş əsərləri nümayiş olunub. Qeyd edək ki, Ə. Nicatın bütün külliyyatı 50 cilddən ibarətdir.xeber100.com

Tədqiqatçıların araşdırmasına əsasən…

Alimlərin tövsiyəsinə əsasən, ömrü uzatmaq üçün gündə heç olmasa yarım saat sevimli ədəbiyyatın mütaliəsinə vaxt ayırmaq lazımdır. Kitabsevərlər mütaliə sevgisi hesabına ömürlərini iki il uzadırlar. Yel Universitetinin alimləri bu qənaətə gəliblər.  Azərtac xarici KİV-lərə istinadla xəbər verir ki, təcrübədə yaşı 50-dən yuxarı üç min beş yüz nəfər iştirak edib. Onları mütaliəyə sərf etdikləri vaxtın müddətinə görə fərqlənən üç qrupa ayırıblar. Birinci qrupa mütaliəyə həftədə 3,5 saatdan çox, ikinciyə 3,5 saatdan az vaxt ayıran adamlar daxil olub. Üçüncü qrupdakı adamlarda kitab oxuma vərdişi olmayıb. Tədqiqatçılar əldə olunan məlumatları təhlil edərək bu nəticəyə gəliblər ki, oxu zamanı qazanılan informasiya insanın əhval-ruhiyyəsinə və onun yaşadığı illərin sayına nəzərəçarpacaq dərəcədə təsir edir. Həm də sağlamlıq üçün qəzet və ya jurnal yox, bədii kitablar daha dəyərlidir. Alimlərin fikrincə, kitabsevərlər mütaliəni bəyənməyən adamlardan orta hesabla 23 ay çox yaşayırlar. Ekspertlər əmindirlər ki, uzunömürlülər siyahısına əlavə olunmaq üçün insan sevimli kitablarına gündə azı yarım saat vaxt ayırmalıdır.xeber100.com

Milli Elmlər Akademiyasında təqdimat olub

Azərbaycan Milli Elmlər Akademiyasının (AMEA) Naxçıvan Bölməsində bölmənin elmi işçisi Elxan Yurdoğlu - Məmmədovun “Nakşı-cihan-Nahçıvan” bədii tərcümə kitabının təqdimatı olub. AMEA-dan Azərtac-a bildiriblər ki, tədbirdə bölmənin sədri, akademik İsmayıl Hacıyev nəşrin əhəmiyyətindən danışıb, onun tariximiz üçün dəyərli töhfə olduğunu söyləyib. Qeyd edilib ki, kitabda toplanan və Türkiyə türkcəsinə tərcümə edilən şeir nümunələri Naxçıvanla birbaşa bağlıdır. Bu da naxçıvanlı şairlərin yaşadıqları məkana bağlılıqlarının və sevgilərinin təzahürü kimi son dərəcə qiymətlidir. Sonra bölmənin İncəsənət, Dil və Ədəbiyyat İnstitutunun direktor müavini, filologiya üzrə fəlsəfə doktoru Firudin Rzayevin “Nakşı-cihan-Nahçıvan” kitabında Naxçıvan tarixinin, mədəniyyətinin Türk dünyasına inteqrasiyası” mövzusunda məruzəsi dinlənilib. Qeyd edilib ki, “Nakşı-cihan-Nahçıvan” kitabı Elxan Yurdoğlunun tərcümə sahəsində ilk işi deyil. Naxçıvanda gedən quruculuğun və təkamülün gələcək nəsillərə çatdırılması baxımından kitabda yer alan əsərlərin Türkiyə türkcəsinə tərcüməsi əhəmiyyətlidir. Tədbirdə Naxçıvan Dövlət Universitetinin müəllimi, filologiya üzrə elmlər doktoru Hüseyn Həşimli və bölmənin İncəsənət, Dil və Ədəbiyyat İnstitutunun elmi işçisi Nərgiz İsmayılova çıxış edərək kitab barədə fikirlərini bölüşüb, nəşri yüksək dəyərləndiriblər.xeber100.com

“Kitabxana işinin təşkilində innovasiyaların tətbiqi”…

Respublika Mədəniyyət Müəssisələri İşçilərinin Hazırlıq və İxtisasartırma Mərkəzi Şəki, Zaqatala, Balakən, Oğuz və Qax rayonlarını əhatə edən kitabxana və mədəniyyət müəssisələri işçiləri üçün “Kitabxana işinin təşkilində innovasiyaların tətbiqi” və “Azərbaycan mədəniyyətinin və xalq yaradıcılığının dəstəklənməsində, mədəni irsin qorunmasında mədəniyyət mərkəzinin rolu” mövzularında səyyar seminar-treninqlər təşkil edilib. Milli Kitabxanadan Azərtac-a bildirilib ki, iyulun 30-dək davam edəcək seminarlarda kitabxananın xidmət işləri üzrə direktor müavini Ədibə İsmayılova, elektron kataloqun formalaşdırılması şöbəsinin baş kitabxanaçısı Samirə Şabanova və kitabxanaların metodik təminatı şöbəsinin baş kitabxanaçısı Lamiyə Əhmədova iştirak edirlər. Milli Kitabxananın tədris mərkəzinin trenerləri Şəki, Zaqatala, Balakən, Oğuz və Qax rayonlarından gələn kitabxanaçılara “İnnovasiya texnologiyalarının kitabxanaların işinə tətbiqi”, “ALİSA proqramının tətbiqi və elektron xidmətlərdən istifadə imkanları”, “Milli Kitabxananın innovativ onlayn xidmətləri” mövzularında treninq keçəcəklər.xeber100.com

“Səməd Vurğun sənəti müasir ədəbi-ictimai reallıqlar kontekstində”…

Azərbaycan Milli Elmlər Akademiyasının (AMEA) Nizami adına Ədəbiyyat İnstitutunda bu elm müəssisəsinin təşkilatçılığı ilə Xalq Şairi Səməd Vurğunun 110 illik yubileyinə həsr olunan elmi sessiya keçiriləcək. Ədəbiyyat İnstitutundan Azərtac-a bildiriblər ki, tədbirdə şairin həyat və yaradıcılığından danışılacaq, “Səməd Vurğun sənəti müasir ədəbi-ictimai reallıqlar kontekstində”, “Tənqidin Səməd Vurğun hədəfi”, “Səməd Vurğun dramaturgiyasında müəllif problemi”, “Səməd Vurğun və teatr”, “Səməd Vurğunun dili” mövzularında məruzələr dinləniləcək.xeber100.com

“Eşitdiyim və gördüyüm Yaponiya” adlı yeni kitab işıq üzü görüb

Bu günlərdə “Tuna” nəşriyyatında nəfis tərtibatda “Eşitdiyim və gördüyüm Yaponiya” adlı yeni kitab işıq üzü görüb. Azərtac  xəbər verir ki, tanınmış qələm ustası Novruz Nəcəfoğlunun bu yeni kitabı azərbaycanlı oxucunun qədim və özünəməxsus tarixi olan Yaponiyanı daha yaxından tanımasına vasitəçilik edəcək. Novruz Nəcəfoğlu imzası oxuculara yaxşı tanışdır. Müəllifin indiyə qədər çap olunmuş müxtəlif janrlı əsərləri, kitabları ədəbi ictimaiyyət tərəfindən maraqla qarşılanıb. Oxuculara təqdim edilən “Eşitdiyim və gördüyüm Yaponiya” adlı bu publisistik səfər qeydləri müəllifin bir dövlət məmuru kimi adıçəkilən ölkəyə işgüzar səfəri əsasında bu janrda qələmə aldığı sayca üçüncü kitabdır. Əsərin başlıca məziyyəti ondan ibarətdir ki, Novruz Nəcəfoğlu səfərdə olduğu ölkədə təkcə gördüklərini, təəssüratlarını qələmə almaqla kifayətlənməyib, həm də Yaponiyanın uzaq-yaxın tarixi, mədəniyyəti, adət və ənənələri, bir sözlə yaponlar haqqında apardığı araşdırmalardan əldə etdiyi maraqlı faktları, məlumatları da kitaba daxil etməklə dünyanın bu inkişaf etmiş ölkəsi haqqında zəngin bilgilər verir. Yaponiyanın Azərbaycandakı səfiri Tsuquo Takahaşinin müəllifə ünvanlandığı və kitaba daxil edilən məktubunda bu yeni nəşrin Yaponiya-Azərbaycan ələqələrinin gələcək inkişafına kömək edəcəyi vurğulanır. “2014-cü ilin iyun ayında Azərbaycandan 11 icra hakimiyyəti başçısının Yaponiyaya ezam olunması, 10 gün ərzində Yaponiyanın müxtəlif bölgələrini ziyarət etmələri barədə məlumatlı idim. Nümayəndə heyətinin tərkibində olan Şabran Rayon İcra Hakimiyyətinin başçısı Novruz Nəcəfoğlunun səfər zamanı qeydə aldığı yazıların indi bu şəkildə nəşr edilməsi məni həm Yaponiyanın Azərbaycandakı səfiri kimi, həm də bir yapon vətəndaşı olaraq sevindirir”, - deyə diplomat məktubunda qeyd edib. Bu yeni kitabın çap olunması Azərbaycanın Yaponiyadakı səfiri Gürsel İsmayılzadənin müəllifə ünvanlandığı və nəşrdə yer alan məktubunda da yüksək qiymətləndirilib. Geniş oxucu kütləsi üçün nəzərdə tutulmuş bu nəşr hazırlanarkən Azərtac -ın materiallarından da geniş istifadə edilib. Kitabın elmi məsləhətçisi tarix üzrə fəlsəfə doktoru, II dərəcəli dövlət müşaviri Hüseyn Mövsümov, redaktoru Seyfəddin Hüseynlidir. Azərbaycan, ingilis, yapon və rus dilində mətnlərin yer aldığı kitabdakı fotoşəkillər isə AZƏRTAC-ın Yaponiyadakı xüsusi müxbiri Vüqar Ağayevə məxsusdur. Əminliklə demək olar ki, yüksək poliqrafik məziyyətləri ilə fərqlənən və Yaponiya haqda geniş məlumatları özündə əks etdirən bu kitab gündoğan ölkəni öyrənmək istəyənlər üçün maraqlı məlumat mənbəyi olacaq.xeber100.com

“Açıq kitabxana” layihəsi fəaliyyətini uğurla davam etdirir

Mədəniyyət və Turizm Nazirliyi və M.F.Axundzadə adına Azərbaycan Milli Kitabxanasının təşəbbüsü ilə yaradılan “Açıq kitabxana” layihəsi fəaliyyətini uğurla davam etdirir. Azərtac xəbər verir ki, “Mən oxudum, sən də oxu” devizi ilə paytaxt sakinlərinin istifadəsinə verilən kitabxana oxucuların sərbəst şəkildə mütaliə etməsinə şərait yaradır. Kitab oxumağın yaşı yoxdur. Əsas odur ki, onunla dost olmağı bacarasan. Məhz buna görə də kitabsevərlərin toplandığı “Açıq kitabxana”ya maraq durmadan artır. İstər yaşlı, istərsə də gənc nəslin nümayəndələri günün iyirmi dörd saatı sözügedən bilik ocağının qonağı olurlar. Bu məkanda kimi arzu etdiyi əsəri mütaliə edərək dincəlir, kimi də əlindəki kitabları yenisi ilə dəyişərək şəxsi kitabxanasını yeniləyir. Bir sözlə, kitab oxumağı sevən hər kəs günlər ötdükcə “Açıq kitabxana”nın bir üzvünə çevrilir. İyulun 15-dən fəaliyyətə başlayan “Açıq kitabxana”da kitabların dəyişdirilməsi də mümkündür. Belə ki, istənilən şəxs özünün mütaliə etdiyi əsəri kitabxanaya təhvil verməklə əvəzində oxumadığı kitabı aparmaq şansı qazanır. Bununla ona lazım olmayan kitabların başqa şəxslər tərəfindən də mütaliəsinə şərait yaradır. İsti yay günlərində asudə vaxtını səmərəli keçirmək üçün hər gün kitabxanaya üz tutan, mütaliə etməkdən zövq alan gənclərimiz də az deyil. Buna görə də dünyagörüşünü zənginləşdirmək üçün layihənin rolu çox əhəmiyyətlidir. Növbəti günlərdə isə açıq kitabxanada poeziya gecələri, mütaliə axşamları, yazıçı və şairlərlə görüşlər təşkil olunacaq. Həmçinin kiçik guşədə kitab satışı mərkəzinin də yaradılması nəzərdə tutulur. İstənilən müəllif özünün yeni çap olunan kitabını satış üçün açıq kitabxanaya təqdim edə biləcək.xeber100.com

“Azərbaycanın sehrli abidələri” kitabının təqdimatı keçiriləcək

İyulun 13-də Müasir İncəsənət Muzeyində “Azərbaycanın sehrli abidələri” kitabının təqdimatı keçiriləcək. Muzeydən Azərtac-a bildirilib ki, kitabın müəllifləri: sənətşünaslıq doktoru, Azərbaycan Memarlar İttifaqının məsul katibi Elçin Əliyev və onun oğlu 10-cu sinif şagirdi Naib Əlizadədir. Təqdimat mərasimi “NARGİZ” jurnalı, Ailə, Qadın və Uşaq Problemləri üzrə Dövlət Komitəsi və Azərbaycan Memarlar İttifaqının birgə təşkilatçılığı ilə keçiriləcək. “Azərbaycanın sehrli abidələri” kitabında 40-dan artıq memarlıq abidəsi haqqında maraqlı hekayətlər yer alıb. Uşaqlara ünvanlanan və qədim torpağın memarlıq abidələrindən bəhs edən bu kitab Azərbaycanda dərc edilən ilk unikal nəşrdir.xeber100.com

“Türk Dünyası gənc yazarlarının əsərlərindən ibarət almanaxın nəşri” adlı layihəyə start veriləcək

İyulun 10-14-ü çərçivsində Dünya Gənc Türk Yazarlar Birliyinin (DGTYB) Azərbaycan Prezidenti yanında QHT-lərə Dövlət Dəstəyi Şurasının donorluğu ilə həyata keçirdiyi “Türk Dünyası gənc yazarlarının əsərlərindən ibarət almanaxın nəşri və BAKI TOPLANTISININ KEÇİRİLMƏSİ” adlı 5 aylıq layihə çərçivəsində tədbirlərə start veriləcək. Layihə çərçivəsində Bakıda silsilə tədbirlər (10-14(15) iyul 2016-cı il) düzənlənəcək. Tədbirlərdə Türkiyə, Qazaxıstan, Qırğız Respublikası, Özbəkistan, Başqurdistandan, habelə Təbrizdən və “Türk Dünyasının 2016-cı il Mədəniyyət Paytaxtı” Şəkidən, “Avropanın 2016-cı il Gənclər Paytaxtı” Gəncədən, “Azərbaycanın 2016-cı il Gənclər Paytaxtı” Şəmkirdən, eləcə də, Naxçıvan Muxtar Respublikasından gənc yazarlar, paytaxtımızda fəaliyyət göstərən ədəbi qurumların nümayəndələri, yeni nəsil yazarları iştirak edəcək. Türk dünyası ədəbiyyatının bir qrup gənc nümayəndəsinin Atatürk Mərkəzinin müdiri, AMEAnın müxbir üzvü, millət vəkili Nizami Cəfərov, AYB sədri, Xalq yazıçısı ANAR, AMEA Ədəbiyyat İnstitutunun direktoru, AMEAnın vitse-prezidenti, millət vəkili İsa Həbibbəyli, “Yeni Azərbaycan” qəzetinin baş redaktoru, millət vəkili dos.dr. Hikmət Babaoğlu, Azərbaycan Prezidenti yanında QHT-lərə Dövlət Dəstəyi Şurasının sədri, millət vəkili, dr. Azay Quliyev, millət vəkili, dr. Cavanşir Feyziyevlə, həmçinin "Kaspi" qəzetinin redaksiya heyəti ilə görüşləri nəzərdə tutulur.xeber100.com