Növbəti əmək yarmarkası təşkil olunub

Əmək yarmarkalarının keçirilməsi muxtar respublikada əhalinin məşğulluğunun təmin olunmasında mühüm rol oynayır. Bu tədbirlərin davamı kimi Sədərək rayonunda növbəti əmək yarmarkası təşkil olunub. Azərtac xəbər verir ki, əmək yarmarkasının açılışında çıxış edən rayon Məşğulluq Mərkəzinin direktoru Həsən Nəsirov “2016-2020-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı”nın muxtar respublikada sahibkarlığın inkişaf etdirilməsinə, yeni iş yerlərinin yaradılmasına, regiondakı əmək ehtiyatlarının iqtisadi fəallığının yüksəldilməsinə töhfə verdiyini qeyd edib. Bu proqram əmək ehtiyatlarının əmək bazarına uyğunlaşdırılması və işaxtaranların sosial müdafiəsi üçün yeni imkanlar yaradır.Sədərək Rayon İcra Hakimiyyətinin əməkdaşı Bəxtiyar Mahmudov çıxışında rayonun sosial-iqtisadi inkişafından söz açıb. Sonra tədbir iştirakçıları idarə, müəssisə və təşkilatlar tərəfindən əmək yarmarkasına çıxarılmış boş iş yerləri ilə tanış olublar. 7 təşkilatdan 91 boş iş yerinin çıxarıldığı tədbirdə 11 nəfərə işə göndəriş verilib.xeber100.com

Dövlət Gömrük Komitəsinin sədri vətəndaşları qəbul edəcək

Mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə uyğun olaraq Dövlət Gömrük Komitəsinin sədri Aydın Əliyev iyulun 28-də saat 10:00-da Ağcabədi şəhərində bu bölgədən olan vətəndaşları qəbul edəcək.Dövlət Gömrük Komitəsinin mətbuat xidmətindən Azərtac-a bildirilib ki, qəbul zamanı bölgədə yerləşən Ağcabədi, Beyləqan, Füzuli, İmişli, Laçın rayonlarının sakinlərinin yalnız gömrük məsələləri ilə bağlı müraciətləri dinləniləcək.Dövlət Gömrük Komitəsi vətəndaşların işə qəbulla bağlı çoxsaylı müraciətlərini nəzərə alaraq bildirir ki, gömrük orqanlarına xidmətə qəbul “Gömrük orqanlarında xidmət haqqında” Əsasnamə və Azərbaycan Respublikası Prezidentinin 12 noyabr 2010-cu il tarixli 349 nömrəli Fərmanı ilə təsdiq edilmiş “Gömrük orqanlarına xidmətə qəbul ilə əlaqədar müsabiqənin keçirilməsi qaydaları” əsasında test üsulu ilə həyata keçirilir. Qeyd edilən fərmana uyğun olaraq “Gömrük orqanlarında xidmət haqqında” Əsasnamənin tələblərinə cavab verən Azərbaycan Respublikasının vətəndaşları gömrük orqanlarında xidmətə qəbul üçün Dövlət Gömrük Komitəsinin internet saytına müraciət edərək elektron şəkildə ərizə daxil etməklə, test imtahanlarında iştirak edə bilərlər.xeber100.com

“Azərbaycan üçün öyrət” təhsil proqramı çərçivəsində

İyulun 24-də Qubada "Azərbaycan üçün öyrət" təhsil proqramı çərçivəsində artıq ikinci ildir ki, həyata keçirilən “Təhsil avtobusu–2017” yay məktəbinə start verilib.Azərtac xəbər verir ki, təhsil nümayəndələrinin iştirakı ilə keçirilən açılış mərasimində yay məktəbinin iyulun 24-dən 31-dək davam edəcəyi bildirilib. “Təhsil avtobusu-2017” yay məktəbi Bakı-Quba-Masallı-Sabirabad-Gəncə-Mingəçevir-Zaqatala-İsmayıllı-Bakı marşrutu üzrə səyahət edəcək.Yay məktəbi çərçivəsində ölkənin 8 bölgəsində yaşayan gənclər, eləcə də orta ixtisas və ali təhsil müəssisələrinin tələbələri təlimçi və ekspertlər tərəfindən keçiriləcək karyera, fərdi inkişaf təlimləri və intellektual yarışlara qatılacaqlar.xeber100.com

Növbəti qanvermə aksiyası keçiriləcək

İyulun 20-də Xaçmaz rayonunda hemofiliya, talassemiya və digər qan xəstəliklərindən əziyyət çəkən xəstələrə yardım məqsədilə növbəti qanvermə aksiyası keçiriləcək.Azərtac xəbər verir ki, aksiya Səhiyyə Nazirliyi B.Eyvazov adına Hematologiya, Transfuziologiya İnstitutu nəzdində Mərkəzi Qan Bankı və Xaçmaz Rayon İcra Hakimiyyətinin təşəbbüsü ilə təşkil olunacaq.Mərkəzi Qan Bankının xüsusi tibb briqadasının həkim-hematoloqları mərkəzi rayon xəstəxanasının tibb heyəti ilə birgə könüllü donorları müayinə etdikdən sonra onlardan qan götürəcəklər.Yaşı 18-65 arasında olan sağlam vətəndaşlar Heydər Əliyev adına mədəniyyət sarayında təşkil olunacaq birgünlük aksiyada könüllü iştirak edə bilərlər.Gün ərzində davam edən humanitar aksiya çərçivəsində könüllü donorlardan götürülən qan nümunələri Respublika Mərkəzi Qan Bankına göndəriləcək və irsi qan xəstəliklərinin müalicəsində istifadə olunacaq.xeber100.com

“2017-2022-ci illər üçün Dövlət Proqramı”nın təsdiq edilməsi haqqında

Prezident İlham Əliyev iyulun 14-də “Azərbaycan Respublikasında kənd təsərrüfatı kooperasiyasının inkişafına dair 2017-2022-ci illər üçün Dövlət Proqramı”nın təsdiq edilməsi haqqında” Sərəncam imzalayıb.Azərtac xəbər verir ki, kənd təsərrüfatında kooperasiyanın formalaşmasına və inkişafına dövlət dəstəyi məqsədi ilə “Azərbaycan Respublikasında kənd təsərrüfatı kooperasiyasının inkişafına dair 2017-2022-ci illər üçün Dövlət Proqramı” təsdiq edilib.Kənd Təsərrüfatı Nazirliyinə qurumun aparatında müəyyən olunmuş işçilərin say həddi daxilində kənd təsərrüfatı kooperasiyasının inkişafı məsələləri ilə məşğul olan struktur bölmənin yaradılmasını təmin etmək, kənd təsərrüfatı kooperativlərinin fəaliyyəti sahəsində uğurlu nəticələr əldə etmiş ölkələrin təcrübəsini nəzərə almaqla sistemli və kompleks tədbirlər həyata keçirmək, kənd təsərrüfatı kooperativlərinin və onların ittifaqlarının nümunəvi nizamnamələrinin hazırlanmasını təmin etmək, Dövlət Proqramında nəzərdə tutulan tədbirlərin həyata keçirilməsini əlaqələndirmək tapşırılıb. Həmçinin Dövlət Proqramının icrasının gedişi barədə ildə iki dəfə Azərbaycan Prezidentinə məlumat veriləcək.Dövlət Proqramının icrasına ümumi nəzarəti Azərbaycan Respublikası Prezidentinin Administrasiyası həyata keçirəcək.xeber100.com

Səyyar “ASAN xidmət” vətəndaşlara xidmət göstərəcək

Səyyar ASAN xidmət iyulun 13–27-də Tərtər şəhərində vətəndaşlara səyyar formada xidmət göstərəcək.Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentlikdən Azərtac-a bildiriblər ki, həmçinin səyyar avtobuslar iyunun 29-dan iyulun 28-dək Xaçmaz şəhərində, iyunun 29–dan iyulun 13-dək Abşeron rayonunun Qobu qəsəbəsində, iyulun 7–dən 31-dək İsmayıllı və Lerik rayonlarında, iyulun 10–dan 29-dək Ağstafa, Saatlı və Gədəbəy şəhərlərində, iyulun 10–dan 19-dək Qaradağ rayonunun Ələt qəsəbəsində, səyyar “ASAN qatar” isə iyulun 5–dən 19-dək Balakən şəhərində vətəndaşların xidmətində olacaq.Qeyd edək ki, səyyar “ASAN xidmət”in həyata keçirilməsinin əsas məqsədləri dövlət xidmətlərinin vətəndaşlara daha rahat, yeni və innovativ üsullarla təqdim edilməsi, vətəndaşlar üçün əlçatanlığın təmin edilməsi və vətəndaş məmnunluğuna nail olunmasıdır.xeber100.com

Qanvermə aksiyası keçirilib

Astara Rayon Mərkəzi Xəstəxanasında keçirilən qanvermə aksiyasında 250 könüllü iştirak edib.Azərtac xəbər verir ki, “Hemofiliya və talassemiyadan əziyyət çəkən uşaqlara qayğı” Dövlət Proqramına və Səhiyyə Nazirliyinin təsdiq etdiyi qrafikə uyğun olaraq keçirilən aksiyada rayonda fəaliyyət göstərən idarə, müəssisə və təşkilatların işçiləri və ictimaiyyətin nümayəndələri iştirak ediblər.Qeyd edək ki, xeyriyyə aksiyasının keçirilməsində məqsəd talassemiyalı və hemofiliyalı xəstələrə yardım etməkdir.xeber100.com

“Müasir İran mədəniyyətinin görkəmli nümayəndələri” adlı sərgi açılıb

Naxçıvan Muxtar Respublikası Rəssamlar Birliyində rejissor Paşa Hadianın “Müasir İran mədəniyyətinin görkəmli nümayəndələri” adlı fərdi foto sərgisi açılıb.Azərtac xəbər verir ki, sərgiyə baxışdan əvvəl sənətşünas Nizami Alıyev çıxış edərək, sərginin təşkilinin sənət adamları üçün əlamətdar hadisə olduğunu deyib. Bildirilib ki, sərgidə fotoqrafın 65 əsəri yer alıb.İran İslam Respublikasının Naxçıvandakı Baş konsulu Mənsur Ayrom, konsulluğun mədəniyyət atteşesi Hüseyn Ağazadə və Türkiyə Respublikasının Naxçıvan Muxtar Respublikasındakı Baş konsulu Nihat Erşen çıxış edərək, ölkələr arasında siyasi, iqtisadi əlaqələrlə yanaşı, mədəni əlaqələrin inkişafının vacibliyini də qeyd ediblər.xeber100.com

“Kapital Bank” yeni layihəsi çərçivəsində…

"Kapital Bank" filial şəbəkəsinin optimallaşdırılması layihəsi çərçivəsində Masallı şəhəri, M.Talışxanov prospektində yerləşən "ASAN Həyat" Kompleksi daxilində yeni şöbəsini istifadəyə verib.Bankdan Azərtac-a bildiriblər ki, müştərilər, eyni zamanda həm "ASAN Xidmət" mərkəzində, həm də "ASAN Həyat" Kompleksi daxilində yerləşən yeni konsepsiya əsasında təmir edilən şöbədə müasir bank xidmətlərindən faydalana bilərlər."Kapital Bank"ın yeni şöbəsi müştərilərə hesablaşma-kassa əməliyyatları, əmanətlər, plastik kartlar, pul köçürmələri, kommunal, rabitə və digər xidmətlərin ödənişləri, valyuta mübadiləsi və sair bank xidmətlərini təklif edir.Qeyd edək ki, "Kapital Bank" filial şəbəkəsinin transformasiyası istiqamətində müəyyən tədbirlər həyata keçirir. 2017-ci ildə yeni "Bravo" və "Nərimanov Kart Mərkəzi" filialları, "Buzovna", "Dəmiryol" və "Lökbatan" şöbələri fəaliyyətə başlayıb, "Həzi Aslanov", "Qubadlı" və "Göyçay" filialları yeni ünvana köçürülüb. Bankın yenilənmiş filiallarında vahid korporativ interyer dizayn standartları tətbiq edilib.xeber100.com

Əmlak Məsələləri Dövlət Komitəsinin sədri vətəndaşları qəbul edəcək

Əmlak Məsələləri Dövlət Komitəsinin (ƏMDK) sədri Kərəm Həsənov iyulun 14-də Şəmkir rayonunda vətəndaş qəbulu keçirəcək. Heydər Əliyev Mərkəzində saat 12:00-da təşkil olunacaq qəbulda Şəmkir ilə yanaşı, Gədəbəy, Tovuz, Ağstafa, Qazax rayonlarından olan vətəndaşların müraciətlərinə baxılacaq.ƏMDK-dan Azərtac-a bildirilib ki, Kərəm Həsənov komitənin fəaliyyət istiqaməti üzrə, o cümlədən daşınmaz əmlakın qeydiyyatı sahəsinə aid olan müraciətlər, dövlət əmlakının özəlləşdirilməsi, hərraclarda iştirak, icarə əsasında istifadə edilən dövlət obyekti və ya torpaq sahəsinin özəlləşdirilməsi, torpaqların təyinatının qanunsuz dəyişdirilməsi, təyinatına zidd istifadəsi, torpaqların texniki parametrlərinin və koordinatlarının müəyyənləşdirilməsi, ünvan məsələləri ilə bağlı vətəndaşları qəbul edəcək.Qəbulda Şəmkir, Gədəbəy, Tovuz, Ağstafa, Qazax rayonlarından olan vətəndaşlar iştirak edə bilər və yalnız komitənin fəaliyyət sahələrinə aid olan müraciətlərə baxılacaq.xeber100.com