Səhiyyə Nazirliyinin təşkilatçılığı ilə…

Naxçıvan Muxtar Respublikası Səhiyyə Nazirliyinin təşkilatçılığı ilə Bakı şəhərində fəaliyyət göstərən yüksəkixtisaslı həkim briqadalarının dəvət olunaraq muxtar respublikaya gəlməsi və aztəminatlı ailələrdən olan xəstələrin başqa ünvanlara üz tutmadan müayinəsinin və cərrahiyyə əməliyyatlarının təşkili davam etdirilir.Azərtac xəbər verir ki, Milli Oftalmologiya Mərkəzinin səyyar klinikası may ayı ərzində ikinci dəfə Naxçıvanda humanitar tibbi aksiya keçirib.Həkim-oftalmoloq və anestezioloqlardan ibarət səyyar briqada 150-dən çox müayinə, 10 göz əməliyyatı aparıb, pasiyentlərə tibbi məsləhət və tövsiyələr verilib. Səyyar aksiyada göstərilən xidmətlərdən yaşlı nəslin nümayəndələri ilə yanaşı, gənclər də istifadə edib.Xatırladaq ki, Milli Oftalmologiya Mərkəzinin səyyar klinikası mayın 6-8-də də Naxçıvan Muxtar Respublika Xəstəxanasında humanitar tibbi aksiya keçirib, 170-dən çox müayinə, 18 göz əməliyyatı aparıb.xeber100.com

Kənd təsərrüfatı naziri vətəndaşları qəbul edəcək

Azərbaycan Respublikasının kənd təsərrüfatı naziri Heydər Əsədov mayın 26-da Yevlax şəhər Kənd Təsərrüfatı İdarəsinin inzibati binasında Yevlax, Goranboy, Göygöl, Samux və Daşkəsən rayonlarının sakinlərini qəbul edəcək.Nazirlikdən Azərtac-a bildiriblər ki, qəbulda iştirak etmək istəyənlər Kənd Təsərrüfatı Nazirliyinə (012-493-51-64; 050-352-06-27) və Yevlax şəhər Kənd Təsərrüfatı İdarəsinə (050-435-06-06) müraciət edə bilərlər.Qəbula yazılmaq üçün, həmçinin Kənd Təsərrüfatı Nazirliyinin Çağrı mərkəzi (1652) və elektron poçtu ([email protected]) vasitəsi ilə də qeydiyyatdan keçmək olar.xeber100.com

Dövlət Statistika Komitəsinin məlumatına görə…

017-ci ilin yanvar-aprel ayları üzrə kənd təsərrüfatının ümumi məhsulunun faktiki qiymətlərlə dəyəri 1087,0 milyon manat təşkil edib.Dövlət Statistika Komitəsindən Azərtac-a verilən məlumata görə, onun 1036,1 milyon manatı heyvandarlıq, 50,9 milyon manatı isə bitkiçilik məhsullarının payına düşür.Əvvəlki ilin müvafiq dövrü ilə müqayisədə kənd təsərrüfatının istehsalı 3,2 faiz, o cümlədən heyvandarlıq məhsulları üzrə 2,6 faiz, bitkiçilik məhsulları üzrə isə 15,8 faiz artıb.xeber100.com

İqtisadiyyat naziri vətəndaşları qəbul edib

Mərkəzi icra hakimiyyəti orqanlarının rəhbərləri tərəfindən bölgələrdə vətəndaşların qəbulu davam etdirilir.İqtisadiyyat Nazirliyinin mətbuat xidmətindən bildirilib ki, mayın 20-də nazir Şahin Mustafayev Goranboyda Gəncə, Naftalan, Xocalı şəhərləri və Goranboy rayonundan olan vətəndaşları qəbul edib.Nazirliyin aidiyyəti struktur bölmələrinin rəhbərlərinin iştirakı ilə keçirilən qəbulda nazir Şahin Mustafayev qəbula gələn vətəndaşların müraciətlərini dinləyib, müraciətlərdə qaldırılan məsələlərin bir hissəsi yerindəcə öz həllini tapıb, digərlərinin operativ araşdırılması və həlli üçün nazirliyin müvafiq struktur bölmələrinə konkret tapşırıqlar verib.İqtisadiyyat Nazirliyinin səlahiyyətlərinə aid olmayan məsələlərlə bağlı müraciətlər barədə vətəndaşlara ətraflı izahat verilib, aidiyyəti strukturlara çatdırılması üçün qeydiyyata alınıb.xeber100.com

Kütləvi pulsuz tibbi müayinə aksiyası başa çatıb

Əhalinin kütləvi pulsuz tibbi müayinə aksiyası başa çatıb.Azərtac xəbər verir ki, aksiya Şəki rayonunda  yekunlaşıb. Rayon Mərkəzi Xəstəxanası baş həkiminin müavini Knyaz Məmmədovun verdiyi məlumata görə, üç ay davam edən müayinə tədbirləri zamanı 84 min əhalidən 80,5 min nəfəri həkim baxışından keçib. Bu, rayon əhalisinin 95,5 faizinin pulsuz tibbi müayinədən yararlanması deməkdir. Müayinələr zamanı 3500 nəfərin sağlamlığında müəyyən problemlərin olduğu aşkar edilib. Şikayətlər əsasən ürək-damar, tənəffüs sistemi, endokrinoloji və oftalmoloji xəstəliklərlə əlaqədar olub.Müayinə tədbirləri başa çatsa da, bağça və məktəblərdə uşaqların icbari dispanzerizasiyası davam etdirilir.xeber100.com

Əmlak Məsələləri Dövlət Komitəsinin sədri vətəndaşları qəbul edəcək

Əmlak Məsələləri Dövlət Komitəsinin sədri Kərəm Həsənov mayın 26-da Balakən rayonunda vətəndaşları qəbul edəcək.Komitədən Azərtac-a bildiriblər ki, qəbul saat 11:00-da Balakən Rayon Mədəniyyət Evində keçiriləcək. Qəbulda Balakən ilə yanaşı Zaqatala rayonundan olan vətəndaşların müraciətlərinə baxılacaq.Komitə sədri qəbul zamanı komitənin fəaliyyət istiqaməti üzrə, o cümlədən daşınmaz əmlakın qeydiyyatı sahəsinə aid olan müraciətlər, dövlət əmlakının özəlləşdirilməsi, hərraclarda iştirak, icarə əsasında istifadə edilən dövlət obyekti və ya torpaq sahəsinin özəlləşdirilməsi, torpaqların təyinatının qanunsuz dəyişdirilməsi, təyinatına zidd istifadəsi, torpaqların texniki parametrlərinin və koordinatlarının müəyyənləşdirilməsi, ünvan məsələləri və bu sahədə bölgələrdə əhalini maraqlandıran digər məsələlərlə bağlı vətəndaşları qəbul edəcək.Qəbulda yuxarıda qeyd olunmuş Zaqatala və Balakən rayonlarından olan vətəndaşlar iştirak edə bilər və yalnız komitənin fəaliyyət sahələrinə aid olan müraciətlərə baxılacaq.xeber100.com

İslam Kolleci fəaliyyətə başlayacaq

Lənkəranda yeni tədris ilində daha bir yeni təhsil müəssisəsi - İslam Kolleci fəaliyyətə başlayacaq.Azərtac xəbər verir ki, Lənkəran İslam Kolleci Azərbaycanda ilk dəfə dövlət qeydiyyatına alınmış yeddi İslam Kollecindən biridir.Qafqaz Müsəlmanları İdarəsinin cənub bölgəsi üzrə səlahiyyətli nümayəndəsi Hacı Sədi Axundzadə “İslam Həmrəyliyi İli” ərəfəsində belə kolleclərin yaradılmasının bütün dindarlara töhfə olduğunu bildirib. O qeyd edib ki, kollecdə təhsil müddəti dörd ildir. İlkin mərhələdə burada 15 tələbə təhsil alacaq.Burada tədris alacaq qonşu rayonların tələbələri üçün yataqxana da nəzərdə tutulub. Kollecə qəbul qaydaları və dərs proqramları isə yay aylarında açıqlanacaq.Qeyd edək ki, respublikamızda Lənkəran İslam Kolleci ilə yanaşı, daha 6 yeni İslam kolleci - Heydər İslam Kolleci, Zaqatala İslam Kolleci, Gəncə İslam Kolleci, Quba İslam Kolleci, Nardaran İslam Kolleci və Bibiheybət İslam Kolleci Dini Qurumlarla İş üzrə Dövlət Komitəsində qeydiyyatdan keçib.xeber100.com

18 may – Beynəlxalq Muzeylər Günü ilə əlaqədar…

18 may - Beynəlxalq Muzeylər Günü ilə əlaqədar Bərdə Rayon Tarix-Diyarşünaslıq Muzeyində “açıq qapı” günləri keçirilir.Azərtac xəbər verir ki, rayon sakinləri, məktəblilər, şəhərin qonaqları muzeyi ziyarət edir, Bərdənin tarixini, mədəniyyətini, etnoqrafiyasını, məişətini, adət-ənənəsini əks etdirən eksponatlarla tanış olurlar. Şəhərin VII-IX əsrlər dövrünü əks etdirən maket isə muzey ziyarətçilərinin daha çox diqqətini çəkir.Beynəlxalq Muzeylər Günü münasibətilə keçirilən “Tariximizi qoruyaq” adlı tədbirdə muzeyin eksponatları, məktəblilərin çəkdikləri rəsmlər, kitablar, turizm informasiya mərkəzinin Bərdənin qədim tarixini və müasir inkişafını əks etdirən guşə sərgilənib.xeber100.com

Bölgələrdə vətəndaşların qəbulu davam edir

Mərkəzi icra hakimiyyəti orqanlarının rəhbərləri tərəfindən bölgələrdə vətəndaşların qəbulu davam edir.Dini Qurumlarla İş üzrə Dövlət Komitəsinin sədri Mübariz Qurbanlı mayın 23-də Ağdam rayonunun Quzanlı qəsəbəsində Ağcabədi, Tərtər və Ağdam rayonlarının sakinlərini qəbul edəcək.Komitədən Azərtac-a bildiriblər ki, qəbul Quzanlı qəsəbəsindəki Heydər Əliyev Mərkəzində saat 10:00-da keçiriləcək.Qəbula gəlmək istəyən vətəndaşlardan Dövlət Komitəsinin Ağcabədi bölgəsi üzrə şöbəsinə müraciət etmələri xahiş olunur.xeber100.com  

“MSXƏEBM 60: Mədəni irsi qorumaq naminə” adlı treninq-seminar keçirilib

Muzey Sərvətləri və Xatirə Əşyalarının Elmi Bərpa Mərkəzinin təşkilatçılığı ilə Sabirabad Rayon Mədəniyyət Mərkəzində “MSXƏEBM 60: Mədəni irsi qorumaq naminə” adlı treninq-seminar və fotosərgi keçirilib.Mərkəzdən Azərtac-a bildirilib ki, seminarda Sabirabad, Saatlı, Şirvan, Hacıqabul rayonlarının muzey, mərkəz və qalereyalarının əməkdaşları iştirak edib.Tədbirdə qeyd edilib ki, Cənubi Qafqazda yeganə olan Muzey Sərvətləri və Xatirə Əşyalarının Elmi Bərpa Mərkəzi artıq beynəlxalq bərpaçılıq məkanında yüksək professional vərdişlərin nümayişi ilə özünə layiqli mövqe qazana bilib. Burada yarım əsr müddətində bu çətin peşənin nəsillərdən–nəsillərə ötürmək ənənəsi uğurla həyata keçirildiyindən bu sahənin taleyinin gələcəkdə də etibarlı əllərdə olacağına inam və zəmin yaradır. Bu günədək Elmi Bərpa Mərkəzində 15 mindən artıq müxtəlif muzey eksponatları bərpa və konservasiya olunub və muzeylərə qaytarılıb.xeber100.com