Dövlət Bayrağı Günü münasibətilə tədbir keçirilib

Noyabrın 4-də Tovuz Rayon İcra Hakimiyyətinin iclas zalında Dövlət Bayrağı Günü münasibətilə tədbir keçirilib. Azərtac xəbər verir ki, tədbirdə çıxış edən rayon icra hakimiyyətinin başçısı dövlət bayrağının hər bir dövlətin suverenliyinin rəmzi olduğunu bildirib. Qeyd edib ki, dövlət bayrağımız ilk dəfə 1918-ci il noyabrın 9-da Azərbaycan Xalq Cümhuriyyəti Nazirlər Şurası tərəfindən təsdiq olunub. Xatırladaq ki, ölkə başçısının 2009-cu il noyabrın 17-də Dövlət Bayrağı Gününün təsis edilməsi haqqında imzaladığı Sərəncama əsasən, hər il noyabrın 9-u Azərbaycanda Dövlət Bayrağı Günü kimi qeyd olunur.xeber100.com

Kitabxanaların fəaliyyəti müzakirə olunub

Muxtar respublikadakı təhsil ocaqlarında şagird, tələbə və müdavimlərin kitabxanalara cəlbi istiqamətində ardıcıl iş aparılır. Məktəblərarası və siniflərarası bədii qiraət günləri, kitab müzakirələri, viktorinalar və kitabxana günləri keçirilir. Azərtac xəbər verir ki, Naxçıvan Muxtar Respublikası Təhsil Nazirliyinin təşkilatçılığı ilə Naxçıvan şəhərindəki Heydər Əliyev Uşaq-Gənclər Yaradıcılıq Mərkəzində “Məktəb kitabxanalarının fəaliyyətinin gücləndirilməsi” mövzusunda keçirilən konfransda bu barədə danışılıb, məktəb kitabxanalarının fəaliyyəti müzakirə olunub.xeber100.com

“Lamborghini” üçün yeni avtomobil dizaynı hazırlanıb

Cəlilabadlı gənc dünyanın ən qabaqcıl avtomobil şirkətlərindən olan “Lamborghini” üçün yeni avtomobil dizaynı hazırlayıb. Azərtac xəbər verir ki, rayon sakini 31 yaşlı Elçin Quliyev ilk dəfə 2010-cu ildə “Cadillac ats” avtomobilinin yeni dizaynını işləyib və eskizi şirkətin Moskva filialına göndərib. Eskiz şirkət nümayəndələrinin diqqətini cəlb edib və avtomobilin 3D formatında şəklini istəyiblər. Amma Elçin kompüter proqramını bilmədiyindən eskizi 3D formatında işləyə bilməyib. Bu yaxınlarda isə o, kartondan yeni dizaynda “Lamborghini” avtomobili hazırlayıb. Dörd aya ərsəyə gətirdiyi avtomobil dizaynı motor həcmi 6.7 litr olmaqla, 700 at gücünə hesablanıb. Hətta o, avtomobilinə ad da verib - “VİSİYON AS 70”. Əsasən “SPEED CAR” modellərini işləməyə üstünlük verən Elçin digər avtomobillərin də yeni dizaynı üzərində çalışır. Dizayner yaxın günlərdə müəllif hüququ almaq üçün Müəllif Hüquqları Agentliyinə müraciət edəcək. Sonra hazırladığı modeli “Lamborghini” avtomobil şirkətinə göndərəcək. Şirkətdən müsbət cavab alacağına inanan Elçinin ən böyük arzusu Azərbaycanı Avropada avtomobil dizaynı üzrə müsabiqələrdə təmsil etməkdir.xeber100.com

Gənclər Fondunun maliyyə dəstəyi ilə…

Gənclər Fondunun maliyyə dəstəyi ilə Oğuz rayonunda “Bölgənin sözü” adlı layihənin icrasına başlanılıb. Layihə əyalətdə yaşayan gənc yazarların tanıdılmasına xidmət edəcək. Üç ay davam edəcək layihənin məqsədi Oğuz və Şəkidə yaşayan gənc yazarlar arasında əlaqəni gücləndirmək, onları oxucuya və ədəbi mühitə təqdim etməkdən ibarətdir. Layihə çərçivəsində Oğuz və Şəki şəhərində tədbirlər keçiriləcək, “Bölgənin sözü” adlı almanax çap ediləcək.xeber100.com

“Müasir fotoqrafiyanın əsasları” mövzusunda treninq keçirilib

Masallı rayonu “ASAN həyat” kompleksindəki Heydər Əliyev İncəsənət Məktəbində “Müasir fotoqrafiyanın əsasları” mövzusunda treninq keçirilib. Azərtac xəbər verir ki, region gəncləri və ali məktəb tələbələri üçün təşkil olunan treninqdə tanınmış rejissor-operator, ssenarist, prodüser İsrafil Ağazadə fotoçəkilişin sirləri barədə danışıb. Treninqin əsas məqsədi gəncləri fotoqrafiya sənətinin əsasları ilə yaxından tanış etmək, onların gələcəkdə peşəkar fotoqraf olmaq arzularının reallaşmasına dəstək göstərməkdir.xeber100.com

Sahibkarlar üçün növbəti treninq keçirilib

Azərbaycan Respublikası Prezidentinin investisiyaların təşviqi ilə bağlı imzaladığı fərman və sərəncamlarda nəzərdə tutulmuş tədbirlərin icrası İqtisadiyyat Nazirliyi tərəfindən davam etdirilir. Nazirlikdən Azərtac-a bildirilib ki, Şirvan şəhərində sahibkarlıq subyektləri üçün növbəti interaktiv treninq keçirilib. Treninqdə iştirakçılara ölkəmizdə investisiya fəaliyyətinin genişləndirilməsi, biznes mühitinin yaxşılaşdırılması və sənaye istehsalının artırılması üçün mühüm əhəmiyyət daşıyan investisiya təşviqi sənədi və təsdiqedici sənəd, onların sahibkarlar üçün yaratdığı üstünlüklər barədə geniş məlumat verilib, bu sənədlərin alınması üçün qanunvericiliyin tələbləri izah edilib, praktiki məşğələlər vasitəsilə nümunələr göstərilib. Tədbirdə sahibkarları maraqlandıran suallar cavablandırılıb. Qeyd edək ki, indiyədək 64 sahibkarlıq subyektinə 67 investisiya təşviqi sənədi, 42 sahibkarlıq subyektinə isə 115 təsdiqedici sənəd verilib. Ümumi investisiya dəyəri 827,9 milyon manat təşkil edən bu layihələr çərçivəsində 5 mindən çox iş yerinin açılması nəzərdə tutulur.xeber100.com

Oftalmologiya Mərkəzi əhaliyə səyyar xidmət göstərib

Akademik Zərifə Əliyeva adına Milli Oftalmologiya Mərkəzinin həkimləri “Gözlərə nur verək” devizi altında Tovuzda sakinlərə səyyar xidmət göstərib. Azərtac xəbər verir ki, müraciət edən vətəndaşlar profilaktik yoxlamadan keçirilərək, onlara diaqnoz qoyulub və müalicə təyin olunub. Əməliyyata ehtiyacı olanlardan isə laborator analizlər götürüldükdən sonra cərrahiyyə əməliyyatı aparılıb. Aksiya iştirakçılarında daha çox katarakt, refraksiya patologiyası kimi göz xəstəlikləri aşkar olunub. Onlardan 20-sinin gözündə kataraktın ekstraksiyası əməliyyatı aparılıb. Səyyar xidmət zamanı mümkün olmayan əməliyyatlar Milli Oftalmologiya Mərkəzində aparılması üçün qeydə alınıb. İki gün davam edən sağlamlıq aksiyasında 300-ə yaxın sakin müayinə olunub. Aksiyanın ölkəmizin digər regionlarında da keçirilməsi nəzərdə tutulur.xeber100.com

“Gənclərə vətənpərvərlik ruhunun aşılanması” layihəsinin icrasına başlanılıb

Azərbaycan Respublikasının Prezidenti yanında Gənclər Fondunun maliyyə dəstəyi ilə Oğuz rayonunda “Gənclərə vətənpərvərlik ruhunun aşılanması” layihəsinin icrasına başlanılıb. Azərtac xəbər verir ki, üç ərzində həyata keçiriləcək layihənin əsas məqsədi gənclər arasında vətənpərvərlik ideyalarını təbliğ etmək, onları işğal altındakı torpaqlarımızın azad olunması uğrunda mübarizəyə mənəvi cəhətdən hazırlamaq, Vətənimizin azadlığının və təhlükəsizliyinin hər bir gəncin ölkəsinə bağlılığından, xalqına sevgisindən asılı olduğu düşüncəsini aşılamaqdır.xeber100.com  

Səhiyyə Nazirliyinin təşkilatçılığı ilə…

Səhiyyə Nazirliyinin təşkilatçılığı ilə Sabirabadda 105 çarpayılıq yeni xəstəxana kompleksi tikilir. Azərtac xəbər verir ki, rayonun Qalaqayın kəndində inşa olunan dördmərtəbəli tibb müəssisəsinin tikintisinə 2013-cü ildə başlanılıb. Xəstəxana kompleksi 5 korpus və yardımçı tikililərdən ibarətdir. Artıq dəmir-beton konstruksiyaların quraşdırılması işləri və üç mərtəbədə divar hörgüsü başa çatdırılıb. Hazırda hörgü, suvaq işləri aparılır, pəncərələr quraşdırılır və digər inşaat işləri görülür. Kompleksin gələn ilin iyul-avqust aylarında istifadəyə verilməsi nəzərdə tutulur.xeber100.com

Məcburi köçkünlərin müraciətləri dinlənilib

Laçınlı məcburi köçkünlərin problemlərinin öyrənilməsi və vaxtında həll olunması daim diqqət mərkəzində saxlanılır. Laçın rayon rəhbərliyi tərəfindən köçkünlərin məskunlaşdıqları şəhər və rayonlarda mütəmadi olaraq görüşlər keçirilir, əhalini narahat edən məsələlərin həlli məqsədilə lazımi tədbirlər görülür. Azərtac xəbər verir ki, növbəti görüş rayon İcra Hakimiyyəti Aparatının məsul işçilərinin, idarə, müəssisə, təşkilat rəhbərlərinin, ərazi icra nümayəndələrinin iştirakı ilə Qaradağ rayonunun Ümid qəsəbəsində keçirilib. Tədbirdə çıxış edən Laçın Rayon İcra Hakimiyyətinin başçısı Aqil Nəzərli məcburi köçkünlərə göstərilən dövlət qayğısından, onların problemlərinin həlli, sosial rifah və mənzil-məişət şəraitlərinin yaxşılaşdırılması istiqamətində həyata keçirilən tədbirlərdən danışıb. Laçın Rayon İcra Hakimiyyətinin rəhbərliyi məcburi köçkünlərin müraciətlərini dinləyib, problemləri ilə maraqlanıb. Qəbul-görüşdə 94 məcburi köçkün iştirak edib, 16 nəfərin müraciəti dinlənilib. Qaldırılan məsələlərə baxılması üçün aidiyyəti üzrə müvafiq tapşırıqlar verilib. Məcburi köçkünlər göstərilən diqqət və qayğıya görə dövlətimizin başçısına minnətdarlıqlarını bildiriblər.xeber100.com