Stolüstü tennis üzrə respublika birinciliyi keçirilib

Şərur Olimpiya-İdman Kompleksində 18 yaşadək sağlamlıq imkanları məhdud uşaqlar arasında stolüstü tennis idman növü üzrə Naxçıvan Muxtar Respublika birinciliyi keçirilib. Azərtac xəbər verir ki, birincilik Naxçıvan Muxtar Respublikası Gənclər və İdman Nazirliyinin və Naxçıvan Muxtar Respublikası Paralimpiya Federasiyasının birgə təşkilatçılığı ilə reallaşıb. Yarışdan əvvəl Naxçıvan Muxtar Respublikası Paralimpiya Federasiyasının əməkdaşı Vüqar Məmmədov və Naxçıvan Muxtar Respublikası Gənclər və İdman Nazirliyinin şöbə müdiri Taleh İbrahimov çıxış edərək yarışın keçirilmə qaydaları haqqında məlumat verib, idmançılara uğurlar arzulayıblar. Sonra yarışa start verilib. Naxçıvan, Babək, Şərur və Culfa komandalarının tərkibində sağlamlıq imkanları məhdud 15 uşağın iştirak etdiyi yarışda I yerə Şərur rayon komandasının üzvü Allahverən Səfərov, II yerə Şərur rayon komandasının Veysəl Zöhrablı, III yerə isə Culfa rayon komandasının üzvü Azər Səfərov layiq görülüblər. Qaliblərə Naxçıvan Muxtar Respublikası Paralimpiya Federasiyası tərəfindən diplomlar, fərqlənən idmançılara isə fəxri fərmanlar təqdim olunub.xeber100.com

Azərbaycan Cüdo Federasiyasının təşkilatçılığı ilə…

Azərbaycan Cüdo Federasiyasının təşkilatçılığı ilə regionlarda silsilə yarışların keçirilməsi davam etdirilir. azərtac xəbər verir ki, Bərdədə keçirilən Aran bölgəsi birinciliyində 109 cüdoçu medallar uğrunda mübarizə aparır. 2000-2002-ci il təvəllüdlü cüdoçular arasında 7, 2003-2005-ci il təvəllüdlülərin mübarizəsində isə 9 çəki dərəcəsində qaliblər müəyyənləşəcək. Turnirdə Ağdam, Ağcabədi, Bərdə, Beyləqan, Goranboy, Laçın (Taxta körpü), Ucar, Yevlax və Zərdabın cüdo məktəblərinin yetirmələri qüvvələrini sınayırlar.xeber100.com

Tələbə Qəbulu üzrə Dövlət Komissiyası seminar keçirib

Tələbə Qəbulu üzrə Dövlət Komissiyası (TQDK) Gəncədə seminar keçirib. Azərtac xəbər verir ki, seminar iştirakçıları əvvəlcə ulu öndər Heydər Əliyevin abidəsini ziyarət edərək, önünə gül dəstələri qoyublar. Seminarda TQDK-nın Gəncə regional bölməsinin əhatə etdiyi rayonlardan olan müəllimlər iştirak ediblər. Gəncə Şəhər İcra Hakimiyyəti başçısının müavini Sevda Qurbanəliyeva çıxış edərək, təhsilin aktual problemlərinin müzakirə olunduğu seminarın əhəmiyyətindən söz açıb. Dövlət İmtahan Mərkəzi Direktorlar Şurasının sədri Məleykə Abbaszadə Azərbaycan dili və riyaziyyat fənlərinə həsr olunan seminarda 2017-ci ildə 9 illik təhsil bazasından buraxılış imtahanlarının yeni qaydaları haqqında məruzə ilə çıxış edib. Bildirilib ki, IX sinifdə oxuyan şagirdlər doqquz ildir yeni proqram əsasında tədris alırlar. Birinci sinifdən onlara kurikulum tətbiq olunub. Direktorlar Şurasının sədri deyib: “Biz onların bilik və bacarığını qiymətləndirmək üçün yeni alətlər hazırlamışıq. Bu şagirdlərin buraxılış imtahanları iki mərhələdə keçiriləcək. Birinci mərhələ fevral-mart aylarını əhatə edəcək, Azərbaycan dili və riyaziyyat fənlərindən açıq test tapşırıqları tətbiq olunacaq. Test tapşırıqlarının nümunələri çap edilib. Bu il, həmçinin IX sinfə aid olan nümunələr “Abituriyent” jurnalında qaydalarla və proqramla birgə dərc ediləcək”.xeber100.com

“Zəka” intellektual bilik yarışı keçirilib

Masallı şəhərindəki Gənclər Mərkəzində rayon gənclər və idman idarəsi, təhsil şöbəsinin birgə təşkilatçılığı ilə ümumtəhsil məktəblərinin IX-XI sinif şagirdləri arasında “Zəka” intellektual bilik yarışı üzrə rayon birinciliyi keçirilib. Azərtac xəbər verir ki, tədbirdə çıxış edən Masallı rayon Gənclər və İdman İdarəsinin rəisi Camal Manafov ölkəmizdə dövlət gənclər siyasətinin icrası istiqamətində görülən işlərdən danışaraq, gənclərin bu siyasətin həyata keçirilməsində fəal iştirak etdiyini, onların hərtərəfli inkişafı üçün lazımi şəraitin yaradıldığını diqqətə çatdırıb. Bilik yarışında məktəblilər üç mərhələdə qalib adı uğrunda mübarizə aparıblar. Rayon birinciliyində rəqiblərindən daha üstün oyun nümayiş etdirən Bədəlan kənd tam orta məktəbinin komandası bütün mərhələləri uğurla başa vuraraq, yarışın birincisi olub. Türkoba kənd tam orta məktəbinin komandası ikinci, Qodman kənd tam orta məktəbinin komandası isə üçüncü yerləri tutublar.xeber100.com

Sosial-iqtisadi inkişafın yekunları müzakirə olunub

Astara rayonunda sosial-iqtisadi inkişaf sahəsində uğurlu nəticələr müzakirə edilib. İqtisadi və sosial inkişafın əsas göstəricisi olan ümumi məhsul istehsalı və xidmətlərin həcmi keçən ilin müvafiq dövrü ilə müqayisədə 13,5 faiz artaraq, 145,9 milyon manata çatıb. Azərtac xəbər verir ki, bu barədə Astara Rayon İcra Hakimiyyəti başçısı yanında şuranın geniş iclasında ilin doqquz ayının yekunlarına həsr olunmuş hesabat yığıncağında məlumat verilib. Çıxış edən rayon icra hakimiyyətinin başçısı Qəzənfər Ağayev oktyabrın 7-də Prezident İlham Əliyevin sədrliyi ilə Nazirlər Kabinetinin 2016-cı ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında dövlətimizin başçısının nitqindən irəli gələn vəzifələri diqqətə çatdırıb.xeber100.com

“Terrorçuluğa və dini ekstremizmə qarşı mübarizə”…

Bərdə rayonu 5 nömrəli tam orta məktəbdə Dini Qurumlarla İş üzrə Dövlət Komitəsi, Bərdə Rayon İcra Hakimiyyəti və Dövlət Təhlükəsizliyi Xidmətinin rayon şöbəsinin birgə təşkilatçılığı ilə “Terrorçuluğa və dini ekstremizmə qarşı mübarizə” mövzusunda konfrans keçirilib. Azərtac xəbər verir ki, konfransda Dini Qurumlarla İş üzrə Dövlət Komitəsinin Yevlax bölgəsinin, Bərdə Rayon İcra Hakimiyyətinin və hüquq-mühafizə orqanlarının əməkdaşları, dini icma sədrləri, dindarlar, təhsil, mədəniyyət və səhiyyə işçiləri iştirak ediblər. Bərdə Rayon İcra Hakimiyyəti başçısının birinci müavini, dini işlər üzrə komissiyanın sədri Vahid Qarayev tədbiri açaraq, mövzunun əhəmiyyətindən danışıb. Konfransda Dini Qurumlarla İş üzrə Dövlət Komitəsinin Yevlax bölgəsi üzrə şöbəsinin baş məsləhətçisi Rahib İbrahimov “Dini ekstremizmə və dini radikalizmə qarşı mübarizədə dini qurumların rolu” mövzusunda çıxış edib. Rahib İbrahimov Azərbaycanda multikulturalizm ənənələrindən, ölkəmizdə İslami dəyərlərlə tolerant dəyərlərin mükəmməl səviyyədə uzlaşdırılmasından bəhs edib. O, Dini Qurumlarla İş üzrə Dövlət Komitəsinin ekstremizmə qarşı apardığı mübarizə çərçivəsində həyata keçirdiyi tədbirlər barədə məlumat verib və dini icmaların bu sahədə müvafiq dövlət orqanları ilə əməkdaşlığının önəmini vurğulayıb.xeber100.com

“Elektron hökumət” mövzusunda seminarlar keçiriləcək

Cəbhəyanı rayonlarda yaşayan əhali üçün "Elektron hökumət" mövzusunda seminarlar keçiriləcək. Rabitə və Yüksək Texnologiyalar Nazirliyindən (RYTN) Azərtac-a bildirilib ki, oktyabrın 21-22-də Bərdə və Tərtər, noyabrın 4-5-də isə Ağdam və Goranboy rayonlarında baş tutacaq seminarların keçirilməsində məqsəd "Elektron hökumət", elektron xidmətlər barədə region əhalisinə məlumat vermək, əhalini bu sahədə həyata keçirilən islahatlardan faydalanmağa dəvət etməkdir. RYTN Məlumat Hesablama Mərkəzinin, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının birgə dəstəyi ilə “Vətənpərvər Maarifçi Gənclər” İctimai Birliyi tərəfindən təşkil olunan seminarlar məmur-vətəndaş təmasının maksimum azaldılmasına, şəffaflığın və rüşvətxorluğun aradan qaldırılmasına istiqamətlənən dövlət siyasətinə ictimai dəstək məqsədi daşıyır.xeber100.com  

Baş prokuror vətəndaşları qəbul edəcək

Bölgələrdə vətəndaşların qəbulu cədvəlinə uyğun olaraq, baş prokuror Zakir Qaralov oktyabrın 28-də saat 10:00-da Beyləqan Rayon Prokurorluğunun inzibati binasında Beyləqan, İmişli, Ağcabədi, Tərtər, Ağdam, Füzuli, Laçın və Xocavənd rayonlarında yaşayan vətəndaşların qəbulunu keçirəcək. Baş Prokurorluğun mətbuat xidmətindən Azərtac-a bildiriblər ki, qəbulda vətəndaşların prokurorluq orqanlarının səlahiyyətlərinə aid müraciətlərə baxılacaq.xeber100.com

Maarifləndirmə tədbiri keçirilib

“Sağlam Həyat” Ana və Uşaqlara Qayğı İctimai Birliyi (İB) Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə “Uşaqlar və gənclər arasında “Zorakılıqsız həyat naminə” devizi ilə aksiyaların keçirilməsi” adlı layihəsi çərçivəsində Füzuli rayonunda maarifləndirmə tədbiri keçirib. İB-dən Azərtac-a bildirilib ki, tədbirdə uşaqlar, valideynlər, müəllimlər, o cümlədən yeni salınmış qəsəbələrdə məskunlaşmış məcburi köçkünlər iştirak ediblər. Layihə rəhbəri Aytən Səfixanlı çıxış edərək belə bir aktual məsələyə həsr olunmuş tədbirin yüksək səviyyədə təşkilinə görə Füzuli Rayon İcra Hakimiyyətinə təşəkkürünü bildirib. Qeyd edib ki, layihənin məqsədi paytaxtda və regionlarda məktəblilər, valideynlər və uşaqlarla işləyən şəxslər arasında zorakılığın yolverilməzliyi ilə bağlı maarifləndirmə tədbirlərinin təşkil edilməsi və uşaqlar arasında rəsm müsabiqəsinin keçirilməsidir.xeber100.com

“Uşaqlar üçün ədliyyə mexanizmlərindən istifadənin dəstəklənməsi”…

Gənclər üçün Təhsil Mərkəzi Qarabağ regional ofisi, "Xəzər Qayğıkeşlik Layihəsi" Humanitar İctimai Birliyi və “Azercell”in Mobil Göz klinikası tərəfindən Ağcabədi rayonunda aztəminatlı və əlilliyi olan uşaqlar üçün təmənnasız göz müayinəsi təşkil olunub. Azərtac xəbər verir ki, layihə çərçivəsində 6-12 yaş arası ümumilikdə 40-dan çox uşaq və yeniyetmə həkimlər tərəfindən profilaktiki yoxlamadan keçirilib və onlar üçün müayinə kursu təyin olunub. "Azərbaycanda uşaqlar üçün ədliyyə mexanizmlərindən istifadənin dəstəklənməsi" proqramı çərçivəsində həyata keçirilən layihənin məqsədi BMT tərəfindən qəbul edilmiş Uşaq Hüquqları Konvensiyasına uyğun olaraq, uşaqların inkişaf, sağlamlıq və müdafiə hüquqlarının qorunmasının təşkilidir. Bundan başqa, uşaqlar üçün məktəbəqədər tədris metodikası tətbiq olunaraq onların intellektual, fiziki və psixoloji inkişafına şərait yaradılacaq. Qeyd edək ki, Gənclər üçün Təhsil Mərkəzinin, UNICEF-in Azərbaycandakı ofisinin, Avropa İttifaqının, Azərbaycan hökumətinin, “Hüquq Dünyası” Hüquqi Təbliğat İctimai Birliyinin və Azərbaycanın İnsan Hüquqları üzrə Müvəkkilinin birgə reallaşdırdığı "Azərbaycanda uşaqlar üçün ədliyyə mexanizmlərindən istifadənin dəstəklənməsi" layihəsinin əsas məqsədi regionlarda yuvenal ədliyyə sistemini inkişaf etdirməkdir.xeber100.com