Elm və Tədris Mərkəzi yaradılıb

Sumqayıt Dövlət Universiteti (SDU) və AMEA-nın Polimer Materialları İnstitutu (PMİ) arasında uzun illər aparılan elmi əməkdaşlığın səviyyəsini, səmərəliliyini artırmaq məqsədilə SDU-da Elm və Tədris Mərkəzi açılıb. SDU-nun mətbuat xidmətindən Azərtac–a bildirilib ki, bu münasibətlə keçirilən tədbirdə universitetin rektoru, professor Elxan Hüseynov və AMEA-nın müxbir üzvü, PMİ-nin direktor vəzifəsini icra edən Bəxtiyar Məmmədov mərkəzin açılışını edərək, əməkdaşlıq müqaviləsi imzalayıblar. Bildirilib ki, mərkəzin yaradılmasında məqsəd SDU-da tədris prosesinin elmi-tədqiqatla əlaqələndirilməsi, elm və təhsilin istehsalatla inteqrasiyasının gücləndirilməsi, tələbə və magistrantlarda tədqiqatçılıq və peşə fəaliyyəti üçün zəruri olan təcrübi bilik, bacarıq və vərdişlərin formalaşdırılması, kimya və ekologiya sahələrində istehsalat və elmi yeniliklərin, innovasiyaların tədris prosesinə cəlb edilməsi, birgə elmi-tədqiqatların aparılması, universitet və institut arasında elmi-tədqiqat və kadr hazırlığı sahəsində əməkdaşlığın yaradılması və inkişaf etdirilməsindən ibarətdir.xeber100.com

Daxili işlər naziri vətəndaşları qəbul edəcək

Azərbaycan Respublikasının daxili işlər naziri, general-polkovnik Ramil Usubov oktyabrın 29-da saat 10:00-da Gəncə Şəhər Baş Polis İdarəsində Gəncə, Göygöl, Samux, Kəlbəcər, Şəmkir, Ağstafa, Tovuz, Gədəbəy, Qazax, Daşkəsən şəhər və rayonlarının sakinlərini qəbul edəcək. Daxili İşlər Nazirliyinin mətbuat xidmətindən Azərtac-a bildiriblər ki, vətəndaşlar daxili işlər orqanlarının əməkdaşlarının fəaliyyətinə və nazirliyin səlahiyyətlərinə aid məsələlərlə bağlı müraciət etməklə qəbula yazıla bilərlər. Qəbula gələnlər şəxsiyyət vəsiqəsini təqdim etməlidirlər.xeber100.com

Yeni tibb məntəqəsi yaradılıb

Beyləqan rayonunun Baharabad kəndində yeni tibb məntəqəsinin açılışı keçirilib. ABŞ-ın Azərbaycandakı səfirliyindən apa-ya verilən məlumata görə, tədbirdə səfirin müavini Vilyam Gil, İqtisadiyyat və Səhiyyə nazirliklərinin, yerli İcra Hakimiyyəti və bələdiyyənin, ABŞ Beynəlxalq İnkişaf Agentliyinin (USAID) nümayəndələri iştirak ediblər. Layihə USAID və Azərbaycan hökuməti tərəfindən birgə maliyyələşdirilib və Şərq-Qərb İdarəetmə İnstitutu (EWMI) tərəfindən icra olunub. “Amerika Birləşmiş Ştatları Azərbaycanla tərəfdaşlıq etməyə sadiqdir. Birgə işləyərək biz sabitliyə, demokratik tərəqqiyə və iqtisadi firavanlığa nail ola bilərik”, - deyə V. Gil qeyd edib.xeber100.com

“Qorunan tarix müasir gəncliyin gözündə”…

Azərbaycan Respublikasının Prezidenti yanında Gənclər Fondunun maliyyə, Gəncə şəhər Gənclər və İdman İdarəsi və Gənclər üçün Təhsil Mərkəzi Gəncə Regional Ofisinin təşkilati dəstəyi ilə “Qorunan tarix müasir gəncliyin gözündə” layihəsinə start verilib. Azərtac xəbər verir ki, layihənin əsas məqsədi gənclərin boş vaxtlarını səmərəli keçirmələrinə kömək etmək, qədim və müasir tariximizi gənclərə daha ətraflı və dolğun şəkildə çatdırmaqdan ibarətdir. Layihə çərçivəsində dekabrın 1-dək “Gənclərin maraq klublarının təşkili”, “Aksiyalar” və s. maarifləndirici görüşlər təşkil olunacaq.xeber100.com

“Kapital Bank” yeni filialını istifadəyə verib

"Kapital Bank" filial şəbəkəsinin transformasiyası layihəsi çərçivəsində "Qax" filialının yenilənmiş ofisini istifadəyə verib. Bankdan Azərtac-a bildiriblər ki, yeni konsepsiya əsasında təmir edilən filial Qax rayonu, Ü.Hacıbəyli 10 ünvanında (Bazarın yaxınlığında) yerləşir. Artıq Qax şəhəri və ətraf qəsəbələrin sakinləri yeni filialda müasir bank xidmətlərindən istifadə edə bilərlər. Filial müştərilərə hesablaşma-kassa əməliyyatları, əmanətlər, müxtəlif növ kreditlər, plastik kartlar, pul köçürmələri, kommunal, rabitə və digər xidmətlərin ödənişləri, valyuta mübadiləsi və sair bank xidmətlərini təklif edir. Qeyd edək ki, "Kapital Bank" filial şəbəkəsinin transformasiyası istiqamətində müəyyən tədbirlər həyata keçirir. Cari il ərzində 3 şəhər (Şuşa, 28 May və Binəqədi) və 3 region (Şabran, Lerik və Qax) filialı yeni konsepsiyaya uyğun əsaslı təmir olunub, yeni "Gənclik Mall" filialı açılıb. Bundan əlavə, ilin sonunadək daha 3 şəhər və 5 region filialının yeni konsepsiyaya uyğun əsaslı təmir olunaraq istifadəyə verilməsi planlaşdırılır. Bankın yenilənmiş filiallarında vahid korporativ interyer dizayn standartları tətbiq edilib və bu proses hazırda davam edir.xeber100.com

“Vətənin müdafiəsinə hazıram” mövzusunda tədbir keçirilib

Səfərbərlik və Hərbi Xidmətə Çağırış üzrə Dövlət Xidməti Qazax Rayon İcra Hakimiyyəti ilə birgə “Vətənin müdafiəsinə hazıram” mövzusunda tədbir keçirib. Azərtac xəbər verir ki, Səfərbərlik və Hərbi Xidmətə Çağırış üzrə Dövlət Xidmətinin rəis müavini Novruzəli Orucov gənclərin vətənpərvərlik tərbiyəsində belə tədbirlərin önəmini qeyd edib. N.Orucov ölkəmizin müstəqilliyini bərpa etdikdən sonra bütün sahələrdə olduğu kimi, ordu quruculuğunda da aparılan məqsədyönlü işlərdən danışıb, Azərbaycan Silahlı Qüvvələrinin artan qüdrətindən söz açıb. Bildirilib ki,  ölkə başçısının rəhbərliyi ilə ordumuzun ən müasir silahlarla təmin olunası, şəxsi heyətin peşəkar hazırlığı ərazilərimizin bütövlüyünün tezliklə təmin olunacağına əminlik yaradır.xeber100.com  

“Gənclik və dövlət müstəqilliyi: gələcəyə baxış”…

Gənclər və İdman Nazirliyinin təşkilatçılığı ilə sentyabrın 29-da Şəkidə “Gənclik və dövlət müstəqilliyi: gələcəyə baxış” mövzusunda regional forum keçiriləcək. Tədbirdə Şəki-Zaqatala iqtisadi rayonunu təmsil edən fəal gənclər müzakirələr aparacaqlar. Nazirlikdən Azərtac-a bildiriblər ki, forumda gənclər arasında vətənpərvərlik, azərbaycançılıq, dövlətçilik, dünyəvilik ideyalarının təbliği, vətəndaş cəmiyyətinin inkişafında gənclərin iştirakı və s. məsələlər müzakirə olunacaq.xeber100.com

Tarix-Memarlıq Muzey Kompleksində festival keçiriləcək

Sentyabrın 30-da “Naxçıvanqala” Tarix-Memarlıq Muzey Kompleksində “Plov” və “Yallı” festivalları keçiriləcək. Azərtac xəbər verir ki, festivallarda milli mətbəximizin incisi olan plov nümunələri nümayiş etdiriləcək, qədim yallılarımız ifa olunacaq. “Ən dadlı plov” müsabiqəsinin qalibləri və “Ən yaxşı yallı” kollektivləri mükafatlandırılacaqlar. “Plov” və “Yallı” festivalları muxtar respublikanın mədəni həyatında əlamətdar hadisə olmaqla, regionun bölgələrinə xas müxtəlif çeşidli plov növlərinin və onların hazırlanması qaydalarının nümayişi, xalqımızın ən qədim folklor nümunələrindən olan, birlik və mübarizlik rəmzi sayılan yallılarımızın təbliği baxımından mühüm tədbirdir. Qeyd edək ki, plov Şərq xalqlarının süfrə mədəniyyətinə aid yeməkdir. Ölkəmizdə plovun 200-dən çox növü var. Festivalda nümayiş olunacaq müxtəlif plov növləri peşəkar və həvəskar aşpazlar tərəfindən hazırlanacaq. Milli mətbəximizin incisi plov sayıldığı kimi, xalqımızın zəngin folklorunu yaşadan da yallılarımız hesab olunur. Yaşı min illərlə ölçülən yallı haqqında təsvirlərə və məlumatlara Qobustan və muxtar respublikadakı Gəmiqaya qayaüstü rəsmlərində, “Kitabi-Dədə Qorqud” dastanlarında və ədəbiyyatımızda Nizaminin “Xosrov və Şirin” poemasında rast gəlinir. Bu gün muxtar respublikada 40-dan çox yallı oynanılır. Yallını xoreoqrafik məzmununa görə 2 növə – süjetli və rəqs yallılarına ayırırlar. Süjetli yallılar teatrlaşmış xalq oyunları olduğu üçün oyun yallısı adlanır. Rəqs yallılarında isə qəhrəmanlıq motivləri, xalqımızın əhval-ruhiyyəsi, çeviklik, cəsarət əks olunur.xeber100.com  

İqtisadiyyat Nazirliyinin təşkilatçılığı ilə treninq keçirilib

Sentyabrın 27-də İqtisadiyyat Nazirliyinin Bakı Biznes Tədris Mərkəzinin Gəncə nümayəndəliyinin təşkilatçılığı ilə Gəncə şəhər 3 saylı peşə liseyində gənclər üçün treninq keçirilib. İqtisadiyyat Nazirliyinin mətbuat xidmətindən Azərtac-a bildiriblər ki, "Biznes ideyanı yarat" və "Öz biznesinə başla" mövzularında keçirilən treninqdə gənclərə biznes-ideyanın yaradılması və həyata keçirilməsi yolları, marketinq araşdırmalarının aparılması, bu sahədə beynəlxalq təcrübə, prioritet biznes istiqamətləri, yeni biznes subyektlərinin yaradılması qaydaları və s. barədə ətraflı məlumat verilib. Bununla yanaşı, treninq iştirakçıları İqtisadiyyat Nazirliyi tərəfindən göstərilən elektron xidmətlər barədə məlumatlandırılıblar. Tədbir çərçivəsində mövzular üzrə təqdimatlar keçirilib, iştirakçılara Bakı Biznes Tədris Mərkəzi tərəfindən hazırlanmış metodiki vəsaitlər paylanılıb, onları maraqlandıran suallar cavablandırılıb.xeber100.com

Ənənəvi bayrama hazırlıq başlayıb

Qubada ənənəvi olaraq hər il keçirilən Alma bayramına hazırlıq işlərinə başlanılıb. Azərtac xəbər verir ki, bu il Alma bayramı oktyabrın 8-də şəhərin Heydər Əliyev adına mədəniyyət və istirahət parkında təşkil olunacaq. 2012-ci ildən etibarən ənənəvi olaraq hər il keçirilən Alma bayramına xarici ölkə nümayəndələri, respublikamızdan kənarda yaşayan qubalı iş adamları, görkəmli elm və mədəniyyət xadimləri qatılacaqlar. Hazırda Alma bayramına hazırlıq işləri aparılır. Bayram mərasimində adət-ənənələrimizi əks etdirən kompozisiyalar, milli rəqslər, rayonda becərilən alma sortları, bu meyvədən hazırlanan şirniyyatlar və içkilər nümayiş etdiriləcək. Tədbir çərçivəsində qonaqlara rayonda yaşayan azsaylı xalqların mətbəxlərini və həyat tərzini əks etdirən stendlər təqdim olunacaq. Alma bayramında Azərbaycanın tanınmış incəsənət nümayəndələri ilə yanaşı, xarici ölkələri təmsil edən rəqs qrupları da iştirak edəcək. Bayram çərçivəsində ən böyük alma və digər nominasiyalar üzrə qaliblər mükafatlandırılacaq.xeber100.com