IV Bakı Beynəlxalq Teatr Konfransı keçiriləcək

Noyabrın 7-8-də Azərbaycan Respublikası Mədəniyyət və Turizm Nazirliyinin təşkilatçılığı ilə IV Bakı Beynəlxalq Teatr Konfransı keçiriləcək. Konfrans “Azərbaycan teatrı 2009-2019-cu illərdə” Dövlət Proqramının icrası çərçivəsində təşkil ediləcək. Azərtac xəbər verir ki, bu barədə məlumat Beynəlxalq Teatr Tədqiqatları Federasiyasının (IFTR) saytında yer alıb. Beynəlxalq teatr konfransının əsas məqsədi dünyanın hər yerindən aparıcı nəzəriyyəçilər, alimlər, rejissorlar və prodüserlərə müasir teatrın imkanlarını və qarşılaşdığı problemləri müzakirə etmək üçün platforma yaratmaqdır. Builki konfransın əsas mövzusu “Multikulturalizm və teatr” olacaq. Konfransın işçi dilləri ingilis, rus və Azərbaycan dilləridir. Noyabrın 6-da və 9-da isə beynəlxalq ekspertlər tərəfindən ustad dərsləri və treninqlər keçiriləcək.xeber100.com

Opera və Balet Teatrı mövsümü başa vurmağa hazırlaşır

İyunun 29-da Azərbaycan Dövlət Akademik Opera və Balet Teatrı görkəmli Azərbaycan bəstəkarı Q.Qarayevin “Don Kixot” və “Leyli və Məcnun” baletlərinin tamaşası ilə 107-ci mövsümünü başa vuracaq. Teatrın mətbuat xidmətindən Azərtac-a bildirilib ki, mövsüm başa çatsa da, yaradıcı kollektiv iyul ayı ərzində yeni mövsümə hazırlıqla əlaqədar yaradıcılıq məşqlərini davam etdirəcək. Bundan əlavə, teatrın simfonik orkestri isə çox məsul bir qastrol səfərinə hazırlaşacaq. Belə ki, teatrın orkestr heyəti artıq 9-cu dəfə Almaniyada keçiriləcək Qut-İmmlinq Beynəlxalq Opera Sənəti Festivalında iştirak etmək üçün dəvət alıb. Orkestr festivala 60 nəfərlik heyətlə qatılacaq. Mədəniyyət və Turizm Nazirliyinin dəstəyi ilə baş tutacaq qastrol səfəri avqustun 1-dən 9-dək davam edəcək. Orkestr avqustun 7-də festivalın əsas tədbiri olan – “Qrand” final konsertində çıxış edəcək. 32 ölkənin qatıldığı festivalda, həmçinin dünya bəstəkarlarının operalarından ariya və duetlər səsləndiriləcək. Konsertdə görkəmli bəstəkarlar Üzeyir Hacıbəyli, Qara Qarayev, Fikrət Əmirov, Niyazi və Polad Bülbüloğlunun musiqi əsərlərindən ibarət kompozisiyaların də ifa olunacağı nəzərdə tutulur. “Qrand” final konsertində orkestri Qut-İmmlinq festivalının musiqi rəhbəri və dirijoru Korneliya fon Kerssenbrok, Xalq Artisti, professor Cavanşir Cəfərov, dirijorların beynəlxalq müsabiqələrinin laureatı Əyyub Quliyev və gənc dirijor Murtuza Məmmədov idarə edəcəklər.xeber100.com

Musiqili Teatrın yaradıcı heyəti qastrola hazırlaşır

Azərbaycan Dövlət Musiqili Teatrının yaradıcı heyəti Şamaxı rayonuna qastrol səfərə gedəcək. Teatrın mətbuat xidmətindən Azərtac-a bildirilib ki, qastrol səfəri iyunun 22-də baş tutacaq. Sənət ocağının yaradıcı kollektivi Şamaxıda teatrsevərlərə Faiq Sücəddinov və Tamara Vəliyevanın “Mən dəyərəm min cavana” iki hissəli musiqili komediyasını təqdim edəcək. Gözlənilməz və maraqlı situasiyalarla zəngin olan tamaşanın quruluşçu rejissoru Yusif Əkbərov, quruluşçu-dirijoru Əməkdar İncəsənət Xadimi Nazim Hacıəlibəyov, quruluşçu rəssamı Əməkdar Rəssam İsmayıl Məmmədovdur. Səhnə əsərində rolları Xalq Artisti, İlham Namiq Kamal, Əməkdar artistlər Ələkbər Əliyev, Nahidə Orucova, Səidə Şərifəliyeva, Əkbər Əlizadə, aktyorlar Ülviyyə Əliyeva, Gülçöhrə Abdullayeva, Elçin İmanov, Gültac Əlili, Elxan İsmayılov, Elnarə Nağdəliyeva və Ruslan Mürsəlov ifa edəcəklər.xeber100.com

Ustadların yubileyləri qeyd olunacaq

İyunun 24-də Cəfər Cabbarlı adına Azərbaycan Dövlət Teatr Muzeyində Xalq artistləri, Gənc Tamaşaçılar Teatrının ustadları- Ağaxan Salmanlı və Yasin Qarayevin yubileyləri münasibətilə tədbir keçiriləcək. Teatrın mətbuat xidmətindən Azərtac-a bildirilib ki, tədbirdə Ağaxan Salmanlının 75, Yasin Qarayevin isə 70 yaşı qeyd olunacaq. Teatr Muzeyi və Gənc Tamaşaçılar Teatrının birgə təşkilatçılığı ilə baş tutacaq tədbirdə yubilyarların ömür yolu və yaratdıqları obrazlar haqqında fikirlər səsləndiriləcək, onların rol aldıqları tamaşalardan parçalar nümayiş olunacaq.xeber100.com

“Leyli və Məcnun” poemasının motivləri əsasında eyniadlı tamaşa hazırlanır

Azərbaycan Dövlət Gənc Tamaşaçılar Teatrında yeni tamaşanın məşqlərinə start verilib. Teatrın mətbuat xidmətindən  verilən məlumata görə, Məhəmməd Füzulinin “Leyli və Məcnun” poemasının motivləri əsasında hazırlıq işlərinə başlanan eyniadlı tamaşanın quruluşçu rejissoru və səhnələşdirmə müəllifi əməkdar artist Nicat Kazımovdur. Quruluşçu rəssamı Elnur Axundov, musiqi tərtibatçısı Həmid Kazımzadə olan yeni səhnə əsərində tryukların quruluşçusu İsa Əsədov, rejissoru Müşfiq Əliyev, rejissor assistenti Günay Qasımovadır. Yeni tamaşada obrazları əməkdar artistlər Naibə Allahverdiyeva, Leyli Vəliyeva, Nəsibə Eldarova, Nicat Kazımov, Nofəl Vəliyev, Elşən Rüstəmov, aktyorlar Rəzzaq Məmmədov, Rövşən Abbasov, Elnur Kərimov və başqaları ifa edəcəklər. Yeni səhnə əsərinin premyerasının 89-cu teatr mövsümünün əvvəllərində keçirilməsi nəzərdə tutulur.xeber100.com

“Vaqif” dramının motivləri əsasında hazırlanmış eyniadlı tamaşa nümayiş olunub

Sabit Rəhman adına Şəki Dövlət Dram Teatrı Bakıda Musiqili Teatrın səhnəsində Səməd Vurğunun “Vaqif” dramının motivləri əsasında hazırlanmış eyniadlı tamaşa nümayiş etdirib. Azərtac xəbər verir ki, səhnə əsərinə Şəki Teatrının keçmiş rejissoru, hazırda Moskvada fəaliyyət göstərən "Dərviş" Teatrının rəhbəri Mərdan Feyzullayev quruluş verib. Tamaşanın nəsrlə olan hissələrini Mərdan Feyzullayev, nəzmlə olan parçalarını isə şair Vaqif Aslan yazıb. Səhnə əsərində Vaqif obrazını Əməkdar Artist Əbülfət Salahov, Qacar obrazını isə Əməkdar Artist Xanlar Həşimzadə ifa edib. Tamaşanın maraqlı cəhətlərindən biri əsərdə heç bir qadın personajının olmamasıdır. Bütün obrazları ancaq kişilərdən ibarət olan tamaşada Təlxək obrazını Əməkdar Artist İqrar Salamov canlandırır. Hazırda Bakıda qastrol səfərində olan Şəki Teatrının məqsədi bu tamaşanı nümayiş etdirmək və paytaxt sakinləri qarşısında hesabat verməkdir.xeber100.com

Gənc Tamaşaçılar Teatrı beynəlxalq tədbirlərdə uğurla qazanıb

Azərbaycan Dövlət Gənc Tamaşaçılar Teatrının iki ayrı-ayrı heyəti beynəlxalq tədbirlərdən uğurla geri dönüb. Rusiya Federasiyası Orenburq vilayətində keçirilmiş “Qostinıy dvor” VIII Beynəlxalq Teatr Festivalında kollektiv L.Nurenin “Mən gəldim qızlar” (“Müharibə”) tamaşası ilə müvəffəqiyyətlə çıxış edib. Teatrın mətbuat xidmətindən Azərtac-a bildirilib ki M.Fayzi adına Orenburq Dövlət Tatar Dram Teatrında nümayiş etdirilən tamaşadan sonra festivalın münsiflər heyətinin müzakirəsi keçirilib. Müzakirədə hər bir münsiflər heyətinin üzvü tamaşa haqqında yüksək fikirlər səsləndirib. M.Qorki adına Orenburq Dövlət Dram Teatrının 160 illik yubileyi ərəfəsində həyata keçirilmiş festivalda bir sıra ölkələrin teatr kollektivlərinin dram və komediya janrlarında olan 10 tamaşa nümayiş etdirilib. Festivalın münsiflər heyətinə sənətşünaslıq doktoru, professor, Rusiyanın Əməkdar Elm Xadimi, Rusiya Teatr İncəsənəti İnstitutunun xarici teatr tarixi fakültəsinin rəhbəri Aleksey Bartoşeviç rəhbərlik edib. Münsiflər heyətinin üzvləri isə Rusiyanın Əməkdar İncəsənət Xadimləri, nüfuzlu teatr mükafatlarının laureatları, məşhur teatr tənqidçiləri Konstantin Şerbakov, Nina Karpova, Andrey Yastrebov, Marina Korçak və başqaları olublar. K.Şerbakov çıxışında qeyd edib ki, XXI əsr Azərbaycan teatrı dedikdə ilk növbədə göz önünə Azərbaycan Dövlət Gənc Tamaşaçılar Teatrı və onun zəngin repertuarı gəlir. Azərbaycan Respublikası Mədəniyyət və Turizm Nazirliyinin dəstəyi ilə Londona səfər edən ikinci heyət də Vətənə dönüb. Teatrın direktoru, Əməkdar İncəsənət Xadimi Mübariz Həmidov başda olmaqla kollektiv Böyük Britaniyada fəaliyyət göstərən “UMUD Ltd Company” şirkətinin dəvəti ilə həyata keçirilən qastrol səfərində milli dramaturgiyamızın banisi M.F.Axundzadənin “Hekayəti xırs quldurbasan” tamaşasını nümayiş etdirib. Tamaşa Londonun mədəniyyət mərkəzlərindən biri olan “Logan Hall”da göstərilib. Tamaşanın nümayişindən əvvəl çıxış edən teatrın direktoru Mübariz Həmidov Azərbaycan mədəniyyətinin artıq bütün dünyada tanındığını və bu sahədə ölkə rəhbərliyinin, eləcə də Heydər Əliyev Fondunun müstəsna xidmətləri olduğunu qeyd edib. M.F.Axundzadənin yaradıcılığı haqqında ətraflı məlumat verən direktor dramaturqun əsərlərinin insanı güldürərək düşündürdüyünü söyləyib. Bütün bu uğurlarla yanaşı, Moskva vilayətinin Lobnya şəhərində keçirilən “Rus klassikası” Beynəlxalq Teatr Festivalında teatrın Əməkdar Artisti Şövqi Hüseynov N.V.Qoqolun “Dəlinin qeydləri” mono-tamaşası ilə ölkəmizi layiqincə təmsil edib. İstedadlı aktyor “Festivalda iştiraka görə” diplomu ilə yanaşı, “Ən yaxşı mono-tamaşa” və Azərbaycan teatr mədəniyyətinin rus klassikası ilə parlaq əlaqələri” nominasiyaları üzrə diplomlara və mükafata layiq görülüb.xeber100.com

Beynəlxalq Pantomima Teatrı Festivalı başlayıb

Azərbaycan Dövlət Pantomima Teatrı Tbilisidə keçiriləcək Beynəlxalq Pantomima Teatrı Festivalında iştirak edəcək. Mayın 20-dən 24-dək davam edəcək festival Gürcüstan Dövlət Pantomima Teatrının yaranmasının 50 illiyinə həsr edilib. Pantomima Teatrının direktoru Elman Rəfiyev  bildirib ki, festivalda teatrın kollektivi ölkəmizi Xalq Artisti Bəxtiyar Xanızadə və Bəhruz Əhmədlinin “Son ştrix” tamaşası ilə təmsil edəcək. Tamaşada Əməkdar Artist Elman Rəfiyev, aktyorlar Bəhruz Əhmədli, Ceyhun Dadaşov, Elnur İsmayılov, Nurlan Rüstəmov və Rafiz Mehdizadə çıxış edəcək. Festivalda Azərbaycan teatrı ilə yanaşı, Polşa, Yaponiya və Gürcüstan Dövlət Pantomima teatrlarının tamaşaları nümayiş olunacaq.Qeyd edək ki, Azərbaycan və Gürcüstan Pantomima teatrları dünyada dövlət statusuna malik teatrlardır. Bu iki teatrın əməkdaşlığı 1996-cı ildən başlayıb.xeber100.com

YUĞ Dövlət Teatrı təqdim edir…

YUĞ Dövlət Teatrı İngiltərənin ALOFF Teatrı ilə birgə Norveç yazıçısı Henrik İbsenin pyesi əsasında “Oyuncaq ev” tamaşasını hazırlayıb.Teatrın mətbuat xidmətindən  verilən məlumata görə, səhnə əsərinin quruluşçu rejissoru Metyu Zak Paneş, rəssamı Olqa Yaroş, prodüseri Sənan Əliyevdir. Edinburq Festivalının İdarə heyətinin üzvü olan M. Zak Paneş rejissor, aktyor, yazıçı kimi fəaliyyət göstərir. O, həmçinin PBH Free Fringe festivalının bədii rəhbəridir. İbsenin məşhur əsəri Azərbaycana adaptasiya olunub. Adaptasiyanın və yeni səhnə redaksiyasının müəllifi Nik Audedir. N. Aude pyesdə baş verən hadisələri XIX əsrin Norveçindən Bakıya - yeni qurulmuş Azərbaycan Sovet Sosialist Respublikasının paytaxtına köçürüb. Tamaşada baş verən hadisələr dünyanın ilk neft bumu mərkəzlərindən biri olmuş şəhər üçün əlamətdar dəyişikliklər ili olan 1927-ci ildə Bakıda cərəyan edir. Pyesi Azərbaycan dilinə Aloff Teatrının direktoru Sənan Əliyev çevirib.“Oyuncaq evi” tamaşasında Yuğ Dövlət Teatrının aktyorları Natəvan Qeybani, Oktay Mehtiyev, Amid Qasımov, Elgün Həmidov və Könül Cəfərzadə çıxış edirlər. Tamaşanın premyerası mayın 20-də YARAT Müasir İncəsənət Mərkəzində keçiriləcək.xeber100.com

“Rus klassikası” Beynəlxalq Teatr Festivalı…

Azərbaycan Dövlət Gənc Tamaşaçılar Teatrı Moskva vilayətinin Lobnya şəhərində keçirilən “Rus klassikası” Beynəlxalq Teatr Festivalında iştirak edəcək.Teatrın mətbuat xidmətindən verilən məlumata görə, mayın 21-dən 29-dək davam edəcək festivalda ölkəmizi əməkdar artist Şövqi Hüseynov N.V.Qoqolun “Dəlinin qeydləri” mono-tamaşası ilə təmsil edəcək. Tamaşanın quruluşçu rejissoru xalq artisti Cənnət Səlimovadır. Festivalda Azərbaycanla yanaşı, Almaniya, ABŞ, İspaniya, İsrail və Rusiyanın  müxtəlif şəhərlərindən olan teatr kollektivlərinin tamaşaları nümayiş etdiriləcək. Qeyd edək ki, 1995-ci ildən keçirilən festivalın əsas məqsədi klassik Rus ədəbiyyatı, musiqi və xoreoqrafiyasını əhatə edən Rus teatr incəsənətinə gənc auditoriyanın marağını daha da artırmaq, uşaqların tərbiyə olunması və inkişafında yeni teatr metodlarından geniş istifadə etməkdir.xeber100.com