“Qaçqınlar və miqrantlar problemi” mövzusunda konfrans başlayıb

Noyabrın 5-də İstanbulda Asiya Siyasi Partiyalarının Beynəlxalq Konfransı (ICAPP) və Ədalət və İnkişaf Partiyasının (AKP) birgə təşkilatçılığı ilə “Qaçqınlar və miqrantlar problemi” mövzusunda beynəlxalq konfrans işə başlayıb. Konfransda ölkəmizi Milli Məclisin Yeni Azərbaycan Partiyasından olan deputatları Məlahət İbrahimqızı və Sahibə Qafarova təmsil edirlər. Əvvəlcə bu ilin iyulunda Türkiyədə baş vermiş dövlət çevrilişinə cəhd hadisələrini, həmçinin dünyadakı qaçqın və miqrant problemlərini əks etdirən sənədli filmlər göstərilib. Konfransın rəsmi açılışında AKP-nin sədri, Türkiyənin Baş naziri Binəli Yıldırım, ICAPP-ın baş katibi Çanq Eui-Yonq və digər rəsmi şəxslər çıxış ediblər. Çıxışlarda dünyanın ayrı-ayrı ölkələrində, xüsusilə Yaxın Şərq bölgəsində mövcud olan münaqişələrin, silahlı qarşıdurmaların və terror aktlarının normal insan həyatına göstərdiyi mənfi təsir, bu problemlər səbəbindən qaçqınların sayının artması, miqrantların qarşılaşdığı çətinliklər və digər məsələlər haqqında danışılıb. Konfrans çərçivəsində keçirilən panel iclasda çıxış edən YAP Nəsimi rayon təşkilatının sədri, deputat Məlahət İbrahimqızı təcavüzkar Ermənistanın Azərbaycana qarşı işğalçılıq siyasətinin ağır nəticələri barədə məlumat verib. O deyib ki, Azərbaycan qaçqın və məcburi köçkün problemindən ən çox əziyyət çəkən ölkələrdəndir. Ermənistanın Azərbaycana qarşı hərbi təcavüzü nəticəsində bu günədək 54 uşaq və 323 qadının teleyindən xəbər yoxdur və işğalçı tərəf beynəlxalq hüquqa zidd olaraq həmin insanlar barədə heç bir məlumat vermir. M.İbrahimqızı, həmçinin Ermənistanın işğalçı siyasəti nəticəsində bir milyondan çox azərbaycanlının öz yurdundan qaçqın və məcburi köçkün düşməsi, bu qəbildən olan insanların yerləşdirilməsi üçün dövlətimizin həyata keçirdiyi tədbirlər barədə danışıb.xeber100.com

Silahlı Qüvvələrin 2016-cı il üçün hazırlıq planına uyğun olaraq…

Silahlı Qüvvələrin 2016-cı il üçün hazırlıq planına uyğun olaraq, tank və piyadaların döyüş maşınları heyətlərinin hazırlıq səviyyələri yoxlanılır. Müdafiə Nazirliyinin mətbuat xidmətindən Azərtac-a bildiriblər ki, cəbhə bölgəsində yerləşən hərbi poliqonlarda keçirilən təlim məşqlərinin əsas məqsədi tank və digər zirehli texnika bölmələrinin döyüş qabiliyyətlərinin artırılması, şəxsi heyətin döyüş vərdişlərinin təkmilləşdirilməsi, döyüş ruhu və mənəvi-psixoloji durumun yüksəldilməsindən ibarətdir. Gündüz və gecə vaxtlarında döyüş vəziyyətinə maksimal uyğunlaşdırılmış şəraitdə keçirilən təlim məşqlərində bölmələr birbaşa təyinatları üzrə qarşıya qoyulan tapşırıqları icra etməklə zirehli texnikalardan praktiki atışları yerinə yetirirlər. Heyət üzvlərində düşmənin döyüş texnikası barədə real təəssüratlar yaratmaq məqsədilə müxtəlif məsafələrdə quraşdırılmış hədəflər sırasında aprel döyüşləri zamanı məhv edilmiş erməni tanklarının korpuslarından da hədəf kimi istifadə olunur.xeber100.com

“MDB-nin 25 illiyi: qarşılıqlı anlaşma, əməkdaşlıq, inkişaf”…

Noyabrın 9-10-da Moskvada “MDB-nin 25 illiyi: qarşılıqlı anlaşma, əməkdaşlıq, inkişaf” mövzusunda Açıq Beynəlxalq Forum keçiriləcək. Media tərəfdaşlarından biri Azərtac olan bu forumun təşkilatçısı Müstəqil Dövlətlər Birliyi, Xaricdə Yaşayan Həmvətənlər və Beynəlxalq Humanitar Əməkdaşlıq Məsələləri üzrə Federal Agentlikdir (“Rossotrudniçestvo”). Forumda birgə humanitar layihələrin səmərəsinin artırılması, elmi dairələrin, təhsil və biznes dairələrinin rolunun gücləndirilməsi, habelə MDB üzvü olan dövlətlərin çoxtərəfli humanitar əməkdaşlığı ilə əlaqədar qarşıda duran digər məsələlərin panel diskussiyaları, tematik konfranslar, “dəyirmi masa”lar və layihə seminarları çərçivəsində müzakirə edilməsi planlaşdırılır.xeber100.com

Silahlı Qüvvələrdə irimiqyaslı təlimlər keçiriləcək

Ölkə başçısının təsdiq etdiyi plana əsasən, noyabrın 12-dən 18-dək səhra şəraitində qoşunların və silahların idarəolunması sisteminin yoxlanılması məqsədilə Silahlı Qüvvələrdə irimiqyaslı təlimlər keçiriləcək. Müdafiə Nazirliyinin mətbuat xidmətindən Azərtac-a bildiriblər ki, təlimlərə 60 mindən çox şəxsi heyət, 50-dən çox təyyarə və helikopter, 150-dən artıq tank və zirehli texnika, eləcə də raket və artilleriya qoşunlarının 700-dək sistemi cəlb ediləcək.xeber100.com

Atəşkəs rejimi 26 dəfə pozulub

Ermənistan silahlı bölmələri cəbhənin müxtəlif istiqamətlərində 60 millimetrlik minaatanlardan, qumbaraatanlardan, həmçinin iriçaplı pulemyotlardan da istifadə etməklə, sutka ərzində atəşkəs rejimini ümumilikdə 26 dəfə pozub. Müdafiə Nazirliyinin mətbuat xidmətindən Azərtac-a bildirilib ki, Ermənistanın İcevan rayonunun Berkaber kəndində yerləşən mövqelərdən Qazax rayonunun Qızılhacılı kəndində yerləşən mövqelərimiz atəşə tutulub. Tərtər rayonunun işğal altında olan Göyarx, Ağdam rayonunun Qaraqaşlı kəndləri yaxınlığında, həmçinin Goranboy, Füzuli və Cəbrayıl rayonları ərazisindəki adsız yüksəkliklərdə yerləşən mövqelərdən də Silahlı Qüvvələrimizin mövqeləri atəşə tutulub.xeber100.com

Milli Məclisin məlumatı…

Milli Məclisin deputatları Cavanşir Feyziyev, Çingiz Qənizadə və Elşad Həsənov noyabrın 3-dən 6-dək Bosniya və Herseqovinada səfərdə olacaqlar. Milli Məclisin mətbuat xidmətindən Azərtac-a bildiriblər ki, deputatlarımız Sarayevo şəhərində olacaq, ölkə parlamentinin sədri, Azərbaycanla dostluq qrupunun üzvləri, müvafiq komitələrin rəhbərləri, ictimaiyyət nümayəndələri ilə görüşlər keçirəcəklər.xeber100.com

Yardım Fonduna 77 milyondan çox vəsait yığılıb

Azərbaycan Respublikasının Silahlı Qüvvələrinə Yardım Fonduna cari il noyabrın 1-dək 77 milyon 501 min 135,23 manat, 212 min 373,88 ABŞ dolları, 4793,69 avro və 5000 rubl vəsait yığılıb. Bu barədə Azərtac-a Müdafiə Nazirliyinin mətbuat xidmətindən məlumat verilib. Silahlı Qüvvələrə Yardım Fondu Azərbaycan Prezidentinin 2002-ci il 17 avqust tarixli Fərmanı ilə yaradılıb. Fond Azərbaycan Respublikası Silahlı Qüvvələrinin müasir tələblər səviyyəsində inkişafını təmin etmək, onun maddi-texniki bazasını möhkəmləndirmək və zəruri sosial tədbirləri maliyyələşdirmək məqsədilə yaradılıb. Fondun maliyyə mənbəyi Azərbaycan Respublikası Silahlı Qüvvələrinin maddi-texniki və sosial bazasının möhkəmləndirilməsinə maliyyə köməyi məqsədilə Azərbaycanın ərazisində fəaliyyət göstərən hüquqi və fiziki şəxslərdən könüllülük əsasında daxil olan maliyyə vəsaiti və qanunvericiliklə qadağan edilməyən digər daxilolmalardır. Fondun əsas vəzifəsi Azərbaycan Respublikasının etibarlı müdafiəsi üçün Silahlı Qüvvələrin inkişafını və onun maddi-texniki bazasının möhkəmləndirilməsini, həmçinin hərbi qulluqçuların sosial müdafiəsinin daha da gücləndirilməsini təmin etməkdir.xeber100.com

Müdafiə Nazirliyinin məlumatına görə…

Ermənistan silahlı bölmələri cəbhənin müxtəlif istiqamətlərində qumbaraatanlardan da istifadə etməklə, sutka ərzində atəşkəs rejimini ümumilikdə 39 dəfə pozub. Müdafiə Nazirliyindən Azərtac-a bildirilib ki, Ermənistan Respublikası İcevan rayonunun Vazaşen kəndində yerləşən mövqelərdən Qazax rayonu ərazisindəki adsız yüksəkliklərdə yerləşən mövqelərimiz atəşə tutulub. İşğal altında olan Ağdam rayonunun Nəmirli, Xocavənd rayonunun Kuropatkino, Füzuli rayonunun Horadiz, Qorqan, Qaraxanbəyli kəndləri yaxınlığında, həmçinin Tərtər, Füzuli və Cəbrayıl rayonları ərazisindəki adsız yüksəkliklərdə yerləşən mövqelərdən də Silahlı Qüvvələrimizin mövqeləri atəşə tutulub.xeber100.com

Atəşkəs rejiminin pozulması ilə əlaqədar açıqlama…

Azərbaycan Respublikasının Müdafiə Nazirliyi oktyabrın 30-da axşam saatlarından başlayaraq, Ermənistan silahlı qüvvələrinin cəbhə xəttində minaatanlardan və qumbaraatanlardan istifadə edərək atəşkəs rejimini pozması ilə əlaqədar açıqlama yayıb. Nazirliyin mətbuat xidmətindən Azərtac-a bildiriblər ki, açıqlamada deyilir: “Oktyabrın 30-da axşam saatlarından başlayaraq, Ermənistan silahlı qüvvələrinin bölmələri cəbhənin şimal-qərb istiqamətində yerləşən bölmələrimizin mövqelərini 60 millimetrlik minaatanlardan, qumbaraatanlardan, həmçinin “AQS-17” tipli avtomatik qumbaraatanlardan və iriçaplı pulemyotlardan atəşə tutub. Qəti cavab tədbirləri nəticəsində düşmən susdurulub. Müdafiə Nazirliyi bir daha xəbərdar edir ki, qoşunların qarşıdurma xəttində vəziyyətin gərginləşməsinə görə bütün məsuliyyət Ermənistan rəhbərliyinin üzərinə düşür”.xeber100.com

Hava Qüvvələrinin döyüş hazırlığının yoxlanılması məqsədilə…

Hərbi Hava Qüvvələrinin döyüş hazırlığının yoxlanılması məqsədilə müdafiə naziri general-polkovnik Zakir Həsənov hərbi aviasiya bazalarından birində olub. Müdafiə Nazirliyinin mətbuat xidmətindən Azərtac-a bildiriblər ki, Zakir Həsənov uçuş və texniki heyətlə görüş keçirib, hərbi aviasiyanın döyüşə hazırlığının səviyyəsini, onun imkanları və effektiv istifadəsini, uçuş-enmə zolaqlarını, trenajor siniflərini, yardımçı bina və tikililərin mövcud vəziyyətini yoxlayıb. Zabit heyəti ilə keçirilən görüşdə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən ordu quruculuğu sahəsində qarşıya qoyulan vəzifələr bir daha diqqətə çatdırılıb. Müdafiə nazirinə yerli istehsal olan yeni növ pilotsuz uçuş aparatlarının döyüş qabiliyyəti, praktiki uçuşları, heyətlərin hazırlığı və yerüstü idarəetmə stansiyasının imkanları nümayiş etdirilib. Zakir Həsənov hərbi pilotların uçuş praktikası, onların təlim-məşq hazırlığının plana müvafiq şəkildə həyata keçirilməsi ilə bağlı Hərbi Hava Qüvvələrinin komandanlığı qarşısında tapşırıqlar qoyub.xeber100.com