Rusiya-Azərbaycan münasibətlərinə daha bir dəstək

Azərbaycanda “Multikulturalizm ili” xalqların yaxınlaşmasına və qonşu ölkələr arasında dostluğun möhkəmlənməsinə kömək edir. Rusiya-Azərbaycan Parlamentlərarası Dostluq Qrupunun məlumatında qeyd edilir ki, Azərbaycan multikulturalizmi tədricən dünya fenomeni kimi şöhrət qazanır. Təəccüblü deyil ki, tolerantlığın vətəni sayılan Avropada müxtəlif mədəniyyətlərin bərabərhüquqlu, dinc yanaşı mövcudluğu ideyasının ölüb getməsi barədə söhbətlərin çoxaldığı bir vaxtda müsəlman ölkəsində multikulturalizm məktəblərdə və universitetlərdə tədris edilir, bu ölkədə yaşayan bütün xalqların bir-birinə münasibətdə dözümlülük və hüquq bərabərliyi dövlət siyasətinin əsasına çevrilir. Azərbaycanda milli və ya dini zəmində münaqişələrin nə demək olduğunu əsla bilmirlər. Dostluq qrupunun rəhbəri Dmitri Savelyev deyir: “Rus diasporunun həyatı və rus dilinə münasibət həqiqi multikulturalizm nümunəsidir. Burada pravoslav məbədləri bərpa olunur, məktəblərdə rus şairlərinin yaradıcılığı üzrə olimpiadalar və müsabiqələr keçirilir, rus mədəniyyəti bütün çoxmillətli Azərbaycan mədəniyyətinin tərkib hissəsi sayılır. Rus icmasının üzvləri ölkə həyatının bütün aspektlərində iştirak edirlər, onlar öz vətənlərinin tamhüquqlu vətəndaşlarıdır. Postsovet məkanında nadir hala çevrilmiş bu cür beynəlmiləlçilik həm respublika daxilində əmin-amanlığa, həm də Rusiya ilə Azərbaycan arasında mövcud dostluq münasibətlərinin möhkəmlənməsinə xidmət edir”. Maraqlıdır ki, hələ 20 il bundan əvvəl Azərbaycanda rusiyalı həmvətənlərin ictimai təşkilatlarının əlaqələndirmə şurası yaradılıb. Şura öz sıralarında ictimai fəalları, dini konfessiyaların, ziyalıların nümayəndələrini, kütləvi informasiya vasitələri təmsilçilərini birləşdirir. Bu yaxınlarda onlar hamısı Bakıda keçirilmiş tematik ölkə konfransında iştirak ediblər. Bu tədbir multikulturalizmin yayılmasında və inkişafında – həm ölkələr arasında, həm də respublika daxilində qarşılıqlı əməkdaşlığın, millətlərarası münasibətlərin genişlənməsində və dərinləşməsində, mədəni əlaqələrin tənzimlənməsində rusiyalı həmvətənlərin rolu məsələsinə həsr edilib. Rusiyanın Azərbaycandakı səfiri Viktor Doroxin bu mühüm tədbirin açılışında deyib: “Azərbaycanda müxtəlif xalqların, o cümlədən rusdilli sakinlərin dil və mədəniyyət ənənələrinin qorunub saxlanmasına yönəlmiş işlər rəğbətlə qarşılanır və dəstəklənir, bu tədbirlər dövlət siyasəti dərəcəsinə yüksəldilib. Mənim fikrimcə dünyada bütün ili multikulturalizm adlandırmaq üçün mənəvi haqqı olan dövlətlər çox deyil”. Azərbaycanın belə hüquqa malik olmasına şübhə etməmək olar. Bunun üçün ölkənin təhsil həyatında baş verən hadisələrin təqviminə nəzər salmaq kifayətdir. Bu təqvimdə əsas hadisələrdən biri iyunun 6-da Aleksandr Sergeyeviç Puşkinin doğum günündə rus dili və ədəbiyyatı üzrə VIII Respublika olimpiadasına yekun vurulması mərasimidir. Builki müsabiqədə rekord sayda şagird iştirak edib. Onlar hətta Azərbaycanın ən ucqar guşələrini də təmsil edirdi. Rusiya İnformasiya-Mədəniyyət Mərkəzində bildiriblər ki, birinci olimpiadada cəmi 40 məktəbli iştirak edirdisə, bu il keçirilmiş VIII müsabiqəyə 1300-dən çox yeniyetmə qoşulub. Ölkənin təhsil nazirinin müavini Ceyhun Bayramov deyir ki, bu, qürur duymaq üçün əsas verir: olimpiadada iştirak edən şagirdlərin sayının artması azərbaycanlıların rus dilinə marağını bir daha nümayiş etdirir. Biz multikulturalizmin həyat tərzinə çevrildiyi tolerant və qonaqpərvər Azərbaycanla fəxr edirik. Olimpiadanın keçirilməsi yaxşı bir ənənəyə çevrilib. Mən bu tədbirdə iştirak edən və yüksək nəticələr göstərən uşaqların fəallığına görə fəxr edirəm. Rus dilinin millətlərarası ünsiyyət dili kimi qorunub saxlanması Azərbaycanın Rusiya ilə yaxınlaşmasına kömək edir, vaxtilə bir ölkənin tərkibində yaşamış millətlərin ortaq mədəni kodunu qoruyur. Multikulturalizm siyasəti çoxmillətli Rusiyaya çox yaxındır. Burada yaxşı başa düşürlər ki, ölkənin ruhunu qoruyub saxlamaq üçün bütün ənənələrə hörmət bəsləmək, bütün mədəniyyətləri qoruyub saxlamaq lazımdır. Bu məqsədlə Rusiyada çoxsaylı beynəlxalq seminarlar, federal və regional səviyyəli konfranslar keçirilir. Belə tədbirlərdən biri bu yaxınlarda Ufada keçirilmiş türk gənclərin musiqi yaradıcılığının XVIII müsabiqə-festivalı oldu. “Ural mono-2016” adlı bu festivalda bir sıra türkdilli ölkələri, o cümlədən Azərbaycanı da təmsil edən 50-dən çox ifaçı və yaradıcı kollektiv böyük uğurla iştirak edib. Gənc vokalçı Nicat Rəhimov xüsusi təltifə - Abay adına diploma layiq görülüb.xeber100.com

MDB Hökumət Başçıları Şurasının yubiley iclası keçirilib

İyunun 7-də Bişkekdəki “Ala-Arça” Dövlət iqamətgahında Qırğızıstanın sədrliyi ilə MDB Hökumət Başçıları Şurasının yubiley iclası keçirilib. İclasda Rusiya, Qırğızıstan, Qazaxıstan, Belarus, Moldova, Tacikistanın Baş nazirləri Dmitri Medvedev, Sooronbay Jeenbekov, Kərim Məsimov, Andrey Kobyakov, Pavel Filipp, Koxir Rasulzoda, Azərbaycanın Baş nazirinin müavini Yaqub Eyyubovun rəhbərliyi ilə nümayəndə heyətləri iştirak ediblər. Özbəkistan və Türkmənistan iclasda Baş nazirlərin müavinlərinin rəhbərlik etdikləri nümayəndə heyətləri ilə təmsil olunublar. İclasda MDB İcraiyyə Komitəsinin sədri Sergey Lebedev də iştirak edib. Ukrayna nümayəndə heyəti iclasa gəlməyib. İclası Qırğızıstanın Baş naziri Sooronbay Jeenbekov açaraq qonaqları salamlayıb, MDB çərçivəsində əlaqələrin daha da genişləndirilməsi, MDB və Avrasiya İqtisadi Birliyinin üzvü olan ölkələr arasında ticarət-iqtisadi sahədə əməkdaşlığın dərinləşdirilməsinin və azad ticarət zonası rejiminin formalaşdırılmasının vacibliyinə toxunub. Baş nazir qonaqları bu ilin sentyabrında İssık-Kul gölünün sahillərində keçiriləcək ikinci Dünya Köçəri Oyunlarına baxmağa dəvət edib. Onun sözlərinə görə, bu, yalnız idman yarışı deyil, həm də dünya xalqları və mədəniyyətləri arasında dialoqdur. Hökumət başçıları azad ticarət zonalarının fəaliyyətinin səmərəliliyinin artırılması, elektrik enerjisi sahəsində innovativ əməkdaşlıq, qarşılıqlı fəaliyyətin dərinləşdirilməsi, radioaktiv mənbələrin yerdəyişməsi, aqrobiomüxtəlifliyin saxlanılması məsələlərini nəzərdən keçiriblər. Şuranın iclasında ərazilərin minalardan təmizlənməsi sahəsində silahlı qüvvələr üçün mütəxəssislərin hazırlanması, kimya sahəsində kadrların ixtisasının artırılması, habelə hərbi metrologiya problemlərinin tədqiqi və nəqliyyat kompleksinin inkişafının elmi-texniki təminatı üzrə baza təşkilatları statusunun verilməsi haqqında qərar layihələri də müzakirə edilib. İclasda 2020-ci ilə qədər MDB ölkələrində əhalinin siyahıya alınmasının keçirilməsi, Birlik ölkələrinin gənclərlə iş, gənclər arasında sahibkarlığın inkişaf etdirilməsi, səhiyyə sahəsində əməkdaşlıq haqqında bir sıra məsələlər müzakirə edilib. Hökumət başçıları Birlik ölkələrinin mədəniyyət və incəsənət sahəsindəki uğurları ilə əlaqədar humanitar əməkdaşlığın möhkəmlənməsinə yönələn “ART EXPO” beynəlxalq sərgisinin keçirilməsi məsələlərini də müzakirə ediblər. Ümumiyyətlə iclasda iyirmidən çox məsələ müzakirə edilib ki, bunun da əksəriyyəti iqtisadi sahəni əhatə edir. İclasda Şuranın növbəti görüşünün bu ilin oktyabrında Minsk şəhərində keçirilməsi barədə qərar qəbul edilib. Sergey Lebedev iclasın yekunları ilə əlaqədar keçirdiyi brifinqdə bildirib ki, görüşdə MDB çərçivəsində inteqrasiya proseslərinin gücləndirilməsi üçün 16 sənəd imzalanıb. İclasda MDB-nin icraiyyə orqanlarının fəaliyyətinin təkmilləşdirilməsi və təşkilatın səmərəliliyinin artırılması üçün qərar qəbul olunub. Deyilib ki, iclasda qəbul edilən qərarlar bu ilin sentyabrında Qırğızıstanda keçiriləcək MDB Dövlət Başçıları Şurası iclasının gündəliyinə salınacaq.xeber100.com

Azərbaycan-Gürcüstan parlamentlərarası əlaqələr

Milli Məclisin deputatı, Mətbuat Şurasının sədri Əflatun Amaşov Azərbaycan-Gürcüstan parlamentlərarası əlaqələr üzrə işçi qrupunun rəhbəri kimi Gürcüstanda bir sıra görüşlər keçirib. Ə.Amaşov öncə gürcüstanlı soydaşımız, jurnalist və şair mərhum Fikrət Mursaqulovun rus dilində çapdan çıxmış “Uteshenie” (Təsəlli) şeirlər kitabının təqdimat mərasiminə qatılıb. F.Mursaqulovu tələbəlik illərindən parlaq istedada malik yaradıcılıq adamı kimi tanıdığını vurğulayan Ə.Amaşov onun qısa müddətli həyat yolunda əsl mübarizlik keyfiyyətləri nümayiş etdirdiyini bildirib.  “Bu keyfiyyətlər Fikrəti cəmiyyətə, insanlara yaxınlaşdırırdı. Tanıyanların hamısı ona rəğbətlə yanaşırdı. Şerləri daim yaşamaq ruhlu idi. Üslub və dil xüsusiyyətləri baxımdan olduqca səlist və ahəngdar yazırdı. Bacarığı ilə təəccübləndirirdi. Ən əsası isə Fikrət məhrum olduğu göz işığını şerlərinə daşıyaraq sanki nur saçırdı”, - deyən Ə.Amaşov F.Mursaqulovun əziz xatirəsinə ehtiram əlaməti olaraq çapdan çıxmış kitabın məziyyətlərindən də söz açıb. Çıxış edənlərdən yazıçı-publisist Binnət Əlioğlu, professor Mahmud Hacıxəlilov, şair Abbas Əli və başqaları F.Mursaqulovun şeirlərində Vətənə, xalqa, millətə, torpağa məhəbbətin tərənnüm olunduğunu vurğulayıblar, mərhum şairi xarakterizə edən cəhətləri yada salıblar, onunla bağlı xatirələrini bölüşüblər. Təqdimat mərasiminə toplaşanlar belə tədbirlərin Gürcüstan azərbaycanlıları arasında ictimai mühitin zənginləşməsinə böyük töhfə olduğunu da dilə gətiriblər.  Mərasimdən sonra iştirakçılar F.Mursaqulovun məzarını ziyarət ediblər. Qeyd edək ki, F.Mursaqulov 1955-ci il iyulun 10-da Marneuli rayonunda anadan olub. Bakı Dövlət Universitetinin Jurnalistika fakültəsini bitirdikdən sonra Bakıda qalıb işləyib, gözdən əlil insanlar üçün nəzərdə tutulmuş mətbu orqanın redaktoru olub. O, 33 yaşında dünyasını dəyişib. xeber100.com  

Azərbaycanın Silahlı Qüvvələrinin nümayəndələri beynəlxalq tədbirlərdə

Azərbaycanın Silahlı Qüvvələrinin nümayəndələri beynəlxalq tədbirlərdə iştirak edir. Müdafiə Nazirliyi xəbər verir ki, iyunun 6-dan 10-dək Tbilisi şəhərində (Gürcüstan) mobil təlim qrupunun əsas əlaqələndirici zabitləri üçün “NATO-da informasiya və psixoloji əməliyyatlar” mövzusunda, eləcə də Avropa İttifaqının Şərq Tərəfdaşlığı dövlətləri üçün ümumi təhlükəsizlik və müdafiə siyasəti üzrə tanışlıq kursları, Kanzas ştatında (Amerika Birləşmiş Ştatları) “Saber Guardian 2016” təliminə hazırlıq tədbiri, Oberammerqau şəhərində (Almaniya Federativ Respublikası) döyüş hazırlığı qiymətləndirmə kursu, iyunun 6-dan 24-dək Kəraçi şəhərində (Pakistan) standart əməliyyat taktikası kursu keçirilir.Tədbirlərdə Azərbaycan Respublikası Silahlı Qüvvələrinin nümayəndələri iştirak edirlər.İyun 6-dan 12-dək Türkiyə Respublikasında Çoxmillətli birgə xüsusi təyinatlı qüvvələr təlimi keçirilir.Təlimdə Azərbaycan Respublikası Silahlı Qüvvələrinin nümayəndələri ilə yanaşı, Türkiyə, Bolqarıstan və Gürcüstan hərbçiləri də iştirak edir.xeber100.com

Azərbaycan və CAR arasında ikitərəfli əməkdaşlıq

Afrika qitəsinin iqtisadi mərkəzi hesab edilən CAR- ın Cohanesburq şəhərində Azərbaycan-Cənubi Afrika Ticarət Palatasının təsisi münasibətilə təqdimat mərasimi keçirilib. Azərbaycanın Cənubi Afrika Respublikasındakı səfirliyindən APA-ya verilən məlumata görə, tədbirdə CAR-ın dövlət strukturları, biznes nümayəndələri, iş adamları, şirkət üzvləri ilə yanaşı, diplomatik korpusun üzvləri də iştirak edib. Tədbirdə çıxış edən səfir Elxan Poluxov Azərbaycan hökuməti tərəfindən iqtisadiyyatın şaxələndirilməsi, eləcə də yeni bazarların müəyyənləşdirilməsi sahəsində həyata keçirilən islahatlar kontekstində Palatanın önəmli layihələr reallaşdıraraq müsbət nəticələrə imza atacağına ümidvar olduğunu bildirib. Azərbaycan və CAR arasında ikitərəfli münasibətlərin hərəkətverici qüvvəsinin iqtisadi əməkdaşlıq təşkil etdiyini bildirən səfir Azərbaycanda əlverişli biznes mühiti, həmçinin sərmayələrin qoyuluşu üçün münbit şərait yaradıldığını qeyd edib. Tədbirdə həmçinin Ticarət Palatasının sədri Mayls Çambers çıxış edərək, iki dövlət arasında güclü diplomatik əlaqələr fonunda Ticarət Palatasının iqtisadi münasibətlərdə sabit yüksəlişin genişləndirilməsi, təşviqi və irəlilədilməsinə xidmət edəcəyini vurğulayıb. M. Çambers Ticarət Palatasının Cənubi Afrika və Azərbaycanın biznes dairələrinin hər iki ölkədə mövcud imkanlardan faydalanmağa yardım göstərəcəyini və bu xüsusda qarşılıqlı səfərlərin həyata keçirilməsinin planlaşdırıldığını əlavə edib. Tədbirdə həmçinin AZPROMO tərəfindən çap edilmiş Azərbaycanın iqtisadi mühiti, investisiya layihələri və Azərbaycanda istehsal olunan məhsullara dair materiallar və Ticarət Palatasının broşürları nümayiş etdirilib.xeber100.com

Magistr və doktorantlara möhlət hüququnun verilməsi təşəbbüsü…

Prezident İlham Əliyev tərəfindən Milli Məclisin Müdafiə, təhlükəsizlik və korrupsiya ilə mübarizə komitəsinə magistrlərə hərbi xidmətdən möhlət hüququnun verilməsi ilə bağlı qanun layihəsi təqdim olunub. Komitə üzvü Zahid Oruc Apa-ya açıqlamasında bildirib ki, ölkə başçısı Milli Məclisə təhsildə fasiləsizliyi təmin etmək və ixtisaslı kadrların hazırlanmasına nail olmaq məqsədilə “Hərbi xidmət və hərbi vəzifə haqqında” qanuna dəyişiklik təklif edir. Təklifə əsasən, qüvvədə olan qanunvericilik aktının 21.1.4 cü maddəsində təkcə bakalavr təhsili alanlara deyil, magistr və doktorantlara da hərbi xidmətdən möhlət hüququnun verilməsi nəzərdə tutulur: “Azərbaycanda elmin və təhsilin fundamental problemlərindən biri olan bu məsələnin həllini tapması cənab prezidentin yeni təhlükəsizlik siyasətinin tərkib hissəsidir. Ordu peşəkarlardan ibarət olmaqla bərabər, alimlər də elm səngərində döyüşə hazılanmalıdılar. Hər il daha çox qocalan elm adamlarımızın orta yaşı 55-dən yuxarı idi. Nəhayət, dövlət rəhbəri tərəfindən belə bir əhəmiyyətli addım atıldı. Milli Məclis gələn həftə layihəyə baxacaq. Ümidvarıq ki, qanunun yeni variantından artıq bu ildən yararlanmaq mümkün olacaq”.xeber100.com

“VyetnamPlus” yazır…

“VyetnamPlus” internet qəzetində Ermənistan silahlı qüvvələrinin təmas xəttinə yaxın ərazilərdə mülki əhalini və mülki obyektləri kimyəvi silahlardan atəşə tutması ilə bağlı məqalə dərc olunub. Məqalədə Azərbaycanın beynəlxalq ictimaiyyəti Ermənistan hərbi qüvvələrinin ağ fosfor (P4) kimyəvi tərkibli silahlardan istifadə etməsini pisləməyə çağırdığı vurğulanır. Azərbaycan Xarici İşlər Nazirliyinin bəyanatına istinad olunan yazıda qeyd edilir ki, Ermənistan silahlı qüvvələri tərəfindən atılan sursat D-4 (tüstülü mərmi) tipli 122 millimetrlik top mərmisidir. Daxilində 3,6 kiloqram P-4 (ağ fosforun kimyəvi kodu) tərkibli maddə olan mərminin ümumi çəkisi 27,7 kiloqramdır. Qeyd olunan faktın Azərbaycan Respublikası Ərazilərinin Minalardan Təmizlənməsi üzrə Milli Agentliyi tərəfindən aşkar olunduğu məqalədə əksini tapıb. “VyetnamPlus” internet qəzeti Ermənistanın beynəlxalq humanitar hüquq və insan haqları üzrə üzərinə götürdüyü öhdəlikləri kobud şəkildə pozduğunu vurğulayıb. Məqalədə Ermənistan tərəfinin həmin məsələ ilə bağlı mövqe bildirməməsi də qeyd olunub.xeber100.com

“Gənc diplomatların üçüncü təlim proqramı”nın bağlanış mərasimi keçirilib

Türkdilli Dövlətlərin Əməkdaşlıq Şurasının (TDƏŞ) “Gənc diplomatların üçüncü təlim proqramı”nın başa çatması ilə əlaqədar iyunun 1-də Astanada, Nazarbayev Universitetində tədbir keçirilib. Türk Şurasından  Azərtac-a bildiriblər ki, bağlanış mərasimində çıxış edən TDƏŞ-in baş katibi, səfir Ramil Həsənov gənc diplomatların gələcəkdə peşəkarlıqlarının artırılmasında bu proqramın əhəmiyyətini xüsusi vurğulayıb. Baş katib mühüm mövzuları əhatə edən proqramın uğurla icra olunduğunu qeyd edib. R.Həsənov proqramın icrasında əməyi olanlara, xüsusən Qazaxıstan Xarici İşlər Nazirliyinə və Nazarbayev Universitetinə təşəkkürünü bildirib. Gənc diplomatlara uğurlar arzulayan Türk Şurasının baş katibi növbəti proqramın da uğurla keçiriləcəyinə əminliyini ifadə edib. Qazaxıstan xarici işlər nazirinin müavini Akılbek Kamaldinov, Nazarbayev Universitetinin prezidenti Şigeo Katsu və Beynəlxalq Türk Akademiyasının prezidenti Darxan Kıdırali proqram iştirakçılarını təbrik edib, onlara uğurlar arzulayıblar. Çıxış edənlər gələcəkdə ölkələr arasında münasibətlərin inkişafına töhfə verməsi və Türk Şurası çərçivəsində münasibətlərin daha da genişləndirilməsində mühüm rol oynaması baxımından belə layihə və proqramların önəmini xüsusi vurğulayıblar. Çıxışlardan sonra baş katib Ramil Həsənov və nazir müavini Akılbek Kamaldinov proqrama qatılan gənc diplomatlara sertifikatlar verərək onlara müvəffəqiyyətlər diləyiblər. Proqramın mövzularından olan “Səfirlər toplantısı”nda Macaristanın Qazaxıstandakı səfiri Andras Baranyi və Qırğız Respublikası səfirliyinin birinci katibi Çolpanai Adjimatova peşəkar təcrübələrini gənc diplomatlarla bölüşüblər. Toplantıda Azərbaycanın və Türkiyənin Qazaxıstandakı səfirləri Rəşad Məmmədov və Nevzat Uyanık da iştirak ediblər. Bağlanış mərasimindən sonra gənc diplomatlar Çimkent, Türküstan və Almatıda təşkil olunacaq mədəni proqrama qatılacaqlar. Proqram iyunun 5-də Almatıda başa çatacaq.xeber100.com

“Azərbaycan Respublikasının 2015-ci il dövlət büdcəsinin icrası haqqında” qanun layihəsi müzakirə olunub

Azərbaycan Respublikası Milli Məclisinin növbəti iclası keçirilib. Əvvəlcə Milli Məclisin sədri Oqtay Əsədov gündəliyi təqdim edib. Sonra H.Q.Səlimovun Şəki Apellyasiya Məhkəməsinin hakimi vəzifəsindən azad edilməsi haqqında məsələyə baxılıb. İclasda, həmçinin “Azərbaycan Respublikasının 2015-ci il dövlət büdcəsinin icrası haqqında" qanun layihəsi müzakirə olunub.Deputatlar “Antidempinq, kompensasiya və mühafizə tədbirləri haqqında" Azərbaycan Respublikası qanununun layihəsini üçüncü oxunuşda müzakirə ediblər. Milli Məclis, həmçinin Cəzaların İcrası, Cinayət, Mülki məcəllələrində, “Hərbi vəzifə və hərbi xidmət haqqında”, "Məlumat azadlığı haqqında", "Terrorçuluğa qarşı mübarizə haqqında", "Dövlət qulluğu haqqında", "Məhkəmələr və hakimlər haqqında” qanunlarda dəyişiklik edilməsi barədə qanun layihələrinə də baxıblar. Bundan başqa deputatlar "Kənd təsərrüfatı kooperasiyası haqqında" qanun layihəsini ikinci oxunuşda müzakirə ediblər.xeber100.com

“Anadolu Qartalı – 2016”…

Türkiyə Respublikasının Konya şəhərində “Anadolu Qartalı – 2016” beynəlxalq təlimi keçirilir. Müdafiə Nazirliyinin mətbuat xidmətindən Azərtac-a bildiriblər ki, mayın 30-dan başlayan təlimlərdə 7 ölkənin (Türkiyə, Azərbaycan, Avstraliya, Niderland, İtaliya, Pakistan və Səudiyyə Ərəbistanı) quru qoşunları, hərbi hava və hərbi dəniz qüvvələri bölmələri, o cümlədən NATO qərargahının nümayəndələri iştirak edirlər. Azərbaycan təlimlərdə Hərbi Hava Qüvvələrinin 3 pilotu ilə təmsil olunur. Plana uyğun olaraq, real müharibə şəraitinə yaxın təşkil edilən təlimdə iştirakçıların bilik və bacarıqlarının səviyyəsi yoxlanılacaq, eləcə də təcrübə mübadiləsi həyata keçiriləcək. Təlim iyunun 10-dək davam edəcək.xeber100.com