Milli Məclisin növbəti iclası iyunun 12-də keçiriləcək

Milli Məclisin növbədənkənar sessiyasının növbəti iclası iyunun 12-də keçiriləcək.Parlamentdən Azərtac-a verilən məlumata görə, iclasın gündəliyinə 7 məsələ daxil edilib.xeber100.com

Raket və artilleriya birləşmələrinin döyüş atışlı təlimləri keçirilib

Azərbaycan Respublikası Müdafiə nazirinin təsdiq etdiyi 2020-ci ilin döyüş hazırlığı planına uyğun olaraq, raket və artilleriya birləşmələrinin döyüş atışlı təlimləri keçirilib.Müdafiə Nazirliyinin mətbuat xidmətindən Azərtac-a bildiriblər ki, təlimlərdə artilleriya bölmələri marşları icra edib, cəmləşmə rayonlarına çıxıb və atəş mövqelərini tutaraq döyüş atışlarını yerinə yetiriblər.xeber100.com

Gənc əsgərlərin andiçmə mərasimi keçirilib

Müdafiə nazirinin tapşırığına əsasən, iyunun 7-də Azərbaycan Ordusunun təlim hissə və bölmələrində gənc əsgərlərin andiçmə mərasimi keçirilib.Müdafiə Nazirliyinin mətbuat xidmətindən Azərtac-a bildirilib ki, mərasimlər Azərbaycan Respublikasının dövlət himninin səslədirilməsi ilə başlayıb. Gənc əsgərlər təntənəli surətdə hərbi andı qəbul edərək Vətənə sadiq olacaqlarına söz veriblər.Sonra Müdafiə Nazirliyinin nümayəndələri və hərbi hissələrin komandanlığı gənc əsgərləri hərbi andı qəbul etmələri münasibətilə təbrik edib, xidmətlərində nizam-intizamlı, vicdanlı və cəsarətli olmağı, həvalə edilmiş silah və texnikanı dərindən öyrənməyi, Vətənə olan əsgəri borcunu ləyaqətlə yerinə yetirməyi arzulayıblar.Yekunda şəxsi heyət təntənəli marşla tribuna önündən keçib.xeber100.com

Bu gün Səhiyyə komitəsinin növbəti iclası keçirilib

İyunun 4-də Milli Məclisin Səhiyyə komitəsinin növbəti iclası keçirilib.Azərtac xəbər verir ki, komitənin sədri Əhliman Əmiraslanov əvvəlcə koronavirus (COVİD-19) pandemiyasının Azərbaycanda geniş yayılmasının qarşısının alınması, bu sahədə həyata keçirilən tədbirlər barədə danışıb. Bu sahədə Tibbi Ərazi Bölmələrini İdarəetmə Birliyinin (TƏBİB) fəaliyyətini yüksək qiymətləndirən komitə sədri ölkə vətəndaşları tərəfindən karantin rejiminin yumşaldılmasından sui-istifadənin yolverilməz olduğunu vurğulayıb. Sonra iclasda “İnsan orqan və toxumalarının donorluğu və transplantasiyası haqqında” qanun layihəsi birinci oxunuşda müzakirə edilib. Əhliman Əmiraslanov sənədi ətraflı şərh edib.Gündəliyin ikinci məsələsini təqdim edən Milli Məclis Aparatının İqtisadi və sosial qanunvericilik şöbəsinin müdiri Məhəmməd Bazıqov “Sanitariya-epidemioloji salamatlıq haqqında”, “Yerin təki haqqında” və “Ətraf mühitin mühafizəsi haqqında” qanunlara təklif olunan dəyişiklikləri diqqətə çatdırıb və bildirib ki, bu dəyişikliklər ekoloji təhlükəsizliyin qorunması məqsədi daşıyır.İclasda gündəliyin üçüncü məsələsinin - “Dövlət rüsumu haqqında” Qanuna təklif olunan dəyişikliklərin (birinci oxunuş) mahiyyətini açıqlayan Məhəmməd Bazıqov diqqətə çatdırıb ki, “Əhalinin sağlamlığının qorunması haqqında” Qanunda dəyişiklik edilməsi barədə” 2019-cu il 27 iyun tarixli Qanunda tibb müəssisələrinin akkreditasiyası nəzərdə tutulub. Ətraflı müzakirələrdən sonra hər üç qanun layihəsi Milli Məclisin plenar iclasına tövsiyə edilib.xeber100.com

Cəbhənin müxtəlif istiqamətlərində atəşkəs rejimi 23 dəfə pozulub

Ermənistan silahlı qüvvələrinin bölmələri cəbhənin müxtəlif istiqamətlərində sutka ərzində atəşkəs rejimini 23 dəfə pozub.Müdafiə Nazirliyinin mətbuat xidmətindən Azərtac-a bildiriblər ki, Ermənistan Respublikasının Berd rayonunun Çinari kəndində yerləşən mövqelərdən Tovuz rayonunun Muncuqlu kəndində yerləşən mövqelərimiz atəşə tutulub.Tərtər rayonunun işğal altında olan Göyarx, Ağdam rayonunun Yusifcanlı, Xocavənd rayonunun Kuropatkino, Füzuli rayonunun Aşağı Veysəlli, Horadiz kəndləri yaxınlığında, həmçinin Goranboy və Tərtər rayonları ərazisindəki adsız yüksəkliklərdə yerləşən mövqelərdən də ordumuzun mövqeləri atəşə tutulub.xeber100.com

Milli Məclisin növbədənkənar sessiyasının növbəti iclası keçirilib

İyunun 2-də Milli Məclisin növbədənkənar sessiyasının növbəti iclası keçirilib.Azərtac xəbər verir ki, iclası açan Milli Məclisin Sədri Sahibə Qafarova gündəliyi təqdim edib. Bildirilib ki, iclasın gündəliyinə 3 məsələ daxil edilib.Gündəliyin təsdiqindən sonra deputatlar cari məsələləri müzakirə ediblər.Milli Məclis Sədrinin müavini, Gənclər və idman komitəsinin sədri Adil Əliyev və komitə sədrləri ölkə gündəmindəki önəmli məsələlərdən də söz açıblar. Çıxışlarda aqrar sahədə vəziyyət, kənd təsərrüfatının inkişafına dəstəyin artırılması, suvarma sistemlərinin yenilənməsi, qanunların icrasına nəzarət mexanizmlərinin gücləndirilməsi, sosial şəbəkələrdəki mövcud qanunsuzluqların aradan qaldırılması barədə fikirlər səsləndirilib.Sonra gündəliyə daxil edilən İnzibati Xətalar Məcəlləsində dəyişiklik edilməsi haqqında qanun layihəsinin (üçüncü oxunuş) müzakirəsinə başlanılıb.xeber100.com

Azərbaycan ilə Türkiyə arasında Ticarət Sazişi təsdiqlənib

Milli Məclisin mayın 31-də keçirilən plenar iclasında “Azərbaycan Respublikası Hökuməti ilə Türkiyə Respublikası Hökuməti arasında Preferensial Ticarət Sazişinin təsdiq edilməsi haqqında” qanun layihəsi müzakirə edilib.Azərtac xəbər verir ki, Azərbaycan Respublikası Hökuməti ilə Türkiyə Respublikası Hökuməti arasında Preferensial Ticarət Sazişinin məqsədi mallar üzrə tariflərin azaldılması və ya ləğv olunması, para-tariflərin və qeyri-tarif maneələrinin ləğv olunması, iqtisadi əlaqələrin harmonik inkişafı vasitəsilə ticarətin genişləndirilməsi və təşviq edilməsi, ədalətli rəqabət üçün əlverişli şərtlərin yaradılması, ticarətin davamlı artımı üçün proqnozlaşdırıla bilən və təhlükəsiz mühitin yaradılmasıdır.Sənədə əsasən, tərəflərin nümayəndələrindən ibarət Birgə Komitə təsis edilir.xeber100.com

Cəbhənin müxtəlif istiqamətlərində atəşkəs rejimi pozulub

Ermənistan silahlı qüvvələrinin bölmələri sutka ərzində cəbhənin müxtəlif istiqamətlərində snayper tüfənglərindən də istifadə etməklə atəşkəs rejimini 29 dəfə pozub.Müdafiə Nazirliyinin mətbuat xidmətindən Azərtac-a bildiriblər ki, Ermənistan Respublikasının Berd rayonunun Çinari kəndində və Krasnoselsk rayonu ərazisindəki adsız yüksəkliklərdə yerləşən mövqelərdən Azərbaycan Respublikasının Tovuz rayonunun Koxanəbi və Gədəbəy rayonunun Qaravəlilər kəndlərində yerləşən mövqelərimiz atəşə tutulub.Tərtər rayonunun işğal altında olan Göyarx, Çiləbürt, Ağdam rayonunun Mərzili, Füzuli rayonunun Qaraxanbəyli, Horadiz kəndləri yaxınlığında, həmçinin Tərtər, Ağdam və Füzuli rayonları ərazisindəki adsız yüksəkliklərdə yerləşən mövqelərdən də ordumuzun mövqelərinə atəş açılıb.xeber100.com

MDB ölkələrinin videokonfrans formatında iclası keçirilib

Mayın 29-da MDB Hökumət Başçıları Şurasının videokonfrans formatında iclası keçirilib. İclasda Azərbaycan Respublikasının Baş Naziri Əli Əsədov iştirak edib.Azərbaycan Respublikasının Nazirlər Kabinetinin mətbuat xidmətindən Azərtac-a bildirilib ki, MDB hökumət başçıları iqtisadi və humanitar sahələrdə əməkdaşlığın aktual məsələlərini müzakirə ediblər, 2030-cu ilədək Birliyin iqtisadi inkişaf Strategiyası layihəsini nəzərdən keçiriblər. Şura üzvləri, həmçinin koronavirus (COVID-19) infeksiyasının yayılmasına qarşı mübarizədə birgə səylərə dair fikir mübadiləsi aparıblar.İclasda çıxış edən Azərbaycanın Respublikasının Baş Naziri Əli Əsədov gündəliyə daxil edilmiş məsələlərin əhəmiyyətinə toxunub. Baş Nazir koronavirus infeksiyasının yayılmasının qarşısının alınması, mövcud vəziyyətdə iqtisadiyyatın sabitliyinə mümkün təsirlərin aradan qaldırılması, əhalinin sosial rifahının qorunması və iqtisadi inkişafın davamlılığının təmin edilməsi məqsədilə ölkəmizdə görülən təxirəsalınmaz tədbirlərdən danışıb. Bu xüsusda MDB-yə üzv dövlətlər tərəfindən pandemiyaya qarşı birgə səylərə dair qəbul ediləcək qərarın önəmini vurğulayıb.xeber100.com    

“Milliyet” qəzeti 28 May – Respublika Günündən yazır…

28 May - Respublika Günü ilə əlaqədar Türkiyənin nüfuzlu “Milliyet” qəzetində analitik məqalə dərc olunub.Azərtac  xəbər verir ki, “Mərmərə Qrupu” Strateji və Sosial Araşdırmalar Vəqfinin sədri Akkan Suverin qələmə aldığı “Azərbaycan Respublikası 102 yaşında” sərlövhəli məqalədə Azərbaycan Xalq Cümhuriyyətinin yaranması və müasir Azərbaycan dövləti barədə müfəssəl məlumatlar yer alıb.Məqalədə XX əsrin əvvəllərində beynəlxalq aləmdəki mürəkkəb ictimai-siyasi proseslərə, o cümlədən erməni silahlı birləşmələrinin Azərbaycan xalqına qarşı törətdiyi tarixi cinayətlərə və Qafqaz İslam Ordusunun xilaskarlıq missiyasına toxunulur. Diqqətə çatdırılır ki, Azərbaycan xalqının azadlıq ideyalarını yüksək dəyərləndirən görkəmli ziyalılar dövlət müstəqilliyimizi elan edib və respublikamızın qurulması üçün böyük səylər göstəriblər. Nəticədə demokratik təsisatlar yaradılıb, parlament qurulub, ilk dəfə qadınlara seçib-seçilmək hüququ verilib, milli ordu və universitet yaradılıb.Müəllif yazır ki, cümhuriyyətimizin quruluşundan 75 il sonra siyasi hakimiyyətə gələn müasir dövlətimizin memarı ümummilli lider Heydər Əliyev Azərbaycan Xalq Cümhuriyyətinin ideyalarının, eləcə də müstəqilliyimiz üçün tarixi missiya həyata keçirən ziyalılarımızın arzu və istəklərinin, həmçinin atributlarımızın yaşamasını təmin etməklə “Bir dəfə yüksələn bayraq bir daha enməz!” şüarının tarixi həqiqət olduğunu təsdiq edib.xeber100.com