Tələbələr üçün növbəti elan sessiyası başlayacaq

Fevralın 1-dən “Maarifçi” Tələbə Kredit Fondu təhsil krediti almaq istəyən tələbələr üçün növbəti elan sessiyasına başlayacaq.Təhsil Nazirliyindən Azərtac-a bildiriblər ki, kreditlər üçün müraciət edən tələbələr müəyyən tələblərə cavab verməlidirlər. Belə ki, fonda Azərbaycan Respublikasının vətəndaşı olan, müvafiq təsisçi universitetlərin birində təhsil alan və təhsilini davam etdirmək üçün maliyyə yardımına ehtiyac duyan tələbələr müraciət edə bilərlər.Qeyd edək ki, fondun əsas missiyası təhsil haqqını ödəməkdə çətinlik çəkən aztəminatlı ailələrdən olan tələbələrə uzunmüddətli güzəştli kreditlər verilməsi vasitəsilə onlara ali təhsil almaqda bərabər imkanların yaradılmasıdır.Müraciətlər martın 15-dək davam edəcək.xeber100.com

2017/2018-ci tədris ili üçün təqaüd proqramı elan edilib

İslam İnkişaf Bankı (İİB) 2017/2018-ci tədris ili üçün təqaüd proqramı elan edir.Təhsil Nazirliyindən Azərtac-a bildirilib ki, proqram İİB-in üzvü olan ölkələrin vətəndaşlarına dünyanın bir sıra qabaqcıl universitetlərində doktorantura təhsili almaq və doktoranturadan sonra tədqiqat işi aparmaq imkanı verəcək.xeber100.com

Əhməd Dərviş Şərqşünaslıq fakültəsində mühazirə oxuyub

Misir Ərəb Respublikası Qahirə Universitetinin professoru Əhməd Dərviş Bakı Dövlət Universitetinin (BDU) Şərqşünaslıq fakültəsində olub.BDU-dan Azərtac-a bildiriblər ki, ərəb filologiyası kafedrasının professor və müəllimlərinin, ərəb ölkələri üzrə regionşünaslıq ixtisası üzrə təhsil alan tələbələrin iştirak etdikləri görüşdə fakültənin dekanı Elxan Əzizov misirli alimin pedaqoji fəaliyyəti, elmi əsərləri, ərəb ədəbiyyatşünaslığına dair apardığı araşdırmalar haqqında ətraflı məlumat verib.Sonra Əhməd Dərvişin ərəb ədəbiyyatının dövrləri və əsas nəzəri məsələləri barədə mühazirəsi dinlənilib və tələbələrin sualları cavablandırılıb.xeber100.com

Növbədənkənar kollegiya iclası keçirilib

Təhsil Nazirliyində növbədənkənar kollegiya iclası keçirilib.Nazirlikdən Azərtac-a bildiriblər ki, kollegiyada Qafqaz Universitetinin ləğvetmə komissiyasının təqdim etdiyi təkliflər əsasında tələbə kontingentinin digər universitetlərdə yerləşdirilməsi məsələsi müzakirə olunub.Müzakirələr nəticəsində irəli sürülmüş bir neçə təklif əsasında qış imtahan sessiyasından sonra bütün tələbələrin bir universitetdə - Azərbaycan Respublikası Prezidentinin 2016-cı il 8 noyabr tarixli Sərəncamı ilə dövlət universiteti statusunda yaradılmış Bakı Mühəndislik Universitetində öz ixtisasları üzrə yerləşdirilməsi variantı qəbul edilib. Qərarda, həmçinin tələbələrin təhsil aldıqları tədris dilinin saxlanılması da vurğulanır.xeber100.com

Beynəlxalq elmi-praktik konfrans işə başlayıb

Yanvarın 30-da İqtisad Universitetində  “Təhsilin sosial–iqtisadi inkişafda rolu” mövzusunda beynəlxalq elmi-praktik konfrans işə başlayıb.Azərtac xəbər verir ki, tədbirdə dövlət qurumlarının, nüfuzlu beynəlxalq təşkilatların nümayəndələri və tanınmış ictimai xadimlər iştirak edirlər.Yanvarın 31-dək davam edəcək konfrans çərçivəsində “Təhsil və sosial-iqtisadi inkişaf”, “Təhsil sektorunun inkişafı: qlobal meyillər, mütərəqqi təcrübələr və islahatlar”, “Tədrisin keyfiyyətinin idarə edilməsinə yeni yanaşma” mövzularında panellər təşkil ediləcək. İclaslarda yerli və xarici ekspertlərin məruzələri dinləniləcək.xeber100.com

Bakı Dövlət Universitetinin məlumatı

Türkiyənin “Elm və Ədəbiyyat Əsəri Sahibləri” İctimai Birliyinin (İLESAM) sədri Mehmet Nuri Parmaksız Bakı Dövlət Universitetinin (BDU) Filologiya fakültəsinin qonağı olub.BDU-dan Azərtac-a bildiriblər ki, görüşdə fakültənin dekanı Elçin Məmmədov Azərbaycan ilə Türkiyə əlaqələrinin əhəmiyyətindən danışıb, İLESAM-ın fəaliyyəti ilə bağlı fikirlərini bölüşüb.Şairin həyat və yaradıcılığından bəhs edən videoslayd göstərilib.Mehmet Nuri iki qardaş ölkə arasında mədəni, ədəbi əlaqələrin daha da genişləndirilməsinin, elm, sənət adamlarının irsinin qarşılıqlı şəkildə təbliğ edilməsinin vacibliyini vurğulayıb, İLESAM-ın fəaliyyəti barədə məlumat verib. O bildirib ki, Bakı Dövlət Universiteti ilə də bir çox layihələrin həyata keçirilməsi planlaşdırılıb.xeber100.com  

Elmi-texniki əməkdaşlığa dair müqavilə imzalanıb

Azərbaycan Milli Elmlər Akademiyasının (AMEA) Radiasiya Problemləri İnstitutu ilə Azərbaycan Texniki Universiteti (AzTU) arasında elmi-texniki əməkdaşlığa dair beşillik müqavilə imzalanıb.Müqaviləyə əsasən AzTU-nun müəllimləri ilə Radiasiya Problemləri İnstitutu əməkdaşları arasında tədris və elmi-texniki işlər sahəsində geniş təcrübə mübadiləsinin aparılması nəzərdə tutulur. Əməkdaşlıq çərçivəsində bakalavriat və magistratura səviyyələrində təhsildə fərqlənən tələbələrin institutda aparılan elmi-tədqiqat işlərinə cəlb edilmələri və gələcəkdə həmin elm müəssisəsində işlə təmin olunmaları da həyata keşiriləcək.xeber100.com

Beynəlxalq elmi-praktiki konfrans keçiriləcək

Yanvarın 30-31-də İqtisad Universitetində “Təhsilin sosial–iqtisadi inkişafda rolu” mövzusunda beynəlxalq elmi-praktiki konfrans keçiriləcək.UNEC-dən Azərtac-a bildirilib ki, tədbirdə dövlət qurumlarının, nüfuzlu beynəlxalq təşkilatların nümayəndələri və tanınmış ictimai xadimlər iştirak edəcəklər.Konfransın işi “Təhsil və sosial-iqtisadi inkişaf”, “Təhsil sektorunun inkişafı: qlobal meyillər, mütərəqqi təcrübələr və islahatlar”, “Tədrisin keyfiyyətinin idarə edilməsinə yeni yanaşma” mövzularında panellər üzrə təşkil ediləcək, iclaslarda yerli və xarici ekspertlərin məruzələri dinləniləcək.xeber100.com

Vergi orqanlarında işləmək istəyənlər üçün test imtahanı təşkil ediləcək

Dövlət İmtahan Mərkəzi (DİM) Vergilər Nazirliyi ilə birgə yanvarın 28-də “Dövlət vergi orqanlarına işə qəbul olunmaq üçün namizədlərin müsabiqəsinin keçirilməsi haqqında” əsasnaməyə müvafiq olaraq vergi orqanlarında işləmək istəyənlər üçün test imtahanı təşkil edəcək.DİM-dən Azərtac-a bildiriblər ki, namizədlər “İmtahana buraxılış vərəqəsi”ni yanvarın 25-dən etibarən Vergilər Nazirliyinin inzibati binasından əldə edə bilərlər.xeber100.com

“2015-2017-ci illər üzrə İş Proqramı” çərçivəsində…

“Azərbaycan Respublikası Təhsil Nazirliyi və Macarıstan İnsan Resursları Nazirliyi arasında 2015-2017-ci illər üzrə İş Proqramı” çərçivəsində Macarıstanda bu ölkənin büdcəsi hesabına təhsil üçün sənəd qəbulu elan edilir.Təhsil Nazirliyindən Azərtac-a bildiriblər ki, proqrama əsasən tam bakalavriat və magistratura üzrə kənd təsərrüfatı, su idarəetməsi, təbiət elmləri, davamlı inkişaf, tibb elmləri, turizm, mühəndislik, informasiya texnologiyaları, texnologiyalar, iqtisadiyyat, biznes və idarəetmə elmləri, doktorantura təhsili üzrə istənilən maraq dairəsi çərçivəsində təqaüdlər təklif olunur.Ayrılan kvota çərçivəsində təhsil ödənişsizdir. Universitet yataqxanasında yaşayış, tibbi sığorta, aylıq təqaüd Macarıstan tərəfindən qarşılanır.Macarıstan ali təhsil müəssisələrində kvota çərçivəsində təhsil alacaq tələbələrin seçimi Azərbaycan Respublikası Təhsil Nazirliyi, tələbələrin ali təhsil müəssisələrinə yerləşdirilməsi isə Macarıstan tərəfindən həyata keçirilir.Təqaüd proqramı çərçivəsində təhsilə dair əlavə məlumatlarla Təhsil Nazirliyinin internet saytında tanış olmaq mümkündür.xeber100.com