Tibb Universitetinin məlumatına görə…

Azərbaycan Tibb Universitetində (ATU) rezidentlərin yekun attestasiyasının təşkilinə dair geniş müzakirələr aparılıb. Universitetin mətbuat xidmətindən Azərtac-a bildirilib ki, tədbirdə çıxış edən rektor Gəray Gəraybəyli rezidentlərin yekun attestasiyasının təşkili ilə bağlı müvafiq hazırlıq işlərinin görüldüyünü açıqlayıb. Qeyd edilib ki, səhiyyə naziri Oqtay Şirəliyev rezidentlərin yekun attestasiyasının keçirilməsi barədə əmr imzalayıb. Qaydalara uyğun olaraq, yekun attestasiya 2 mərhələdə aparılır. Bunlardan birincisi – test, ikincisi isə praktiki vərdişlərin mənimsənilməsinə ğörə müxtəlif kliniki halların araşdırılması mərhələsidir. Əmrə əsasən, yekun attestasiyanın birinci mərhələsi oktyabrın 25-də, ikinci mərhələsi isə 27-də və 28–də keçirilməlidir. Tədbirdə qeyd olunub ki, rezidenturaya ilk qəbul 2011-ci ildə başlayıb. 2013-cü ildə təhsil müddəti 2 il olan ixtisaslar üzrə, 2014-cü ildə təhsil müddəti 2 və 3 il olan ixtisaslar üzrə, 2015-ci ildə təhsil müddəti 2, 3 və 4 il olan ixtisaslar üzrə yekun attestasiyası keçirilib. Bu il isə əlavə olaraq təhsil müddəti 5 il olan cərrahi yönümlü ixtisaslar üzrə də yekun attestasiyası keçiriləçək. Bu il bütün ixtisaslar üzrə Bakı şəhərində olan bazalardan 356 nəfər yekun attestasiyasına buraxılıb ki, onların da ayrı-ayrı ixtisaslar üzrə sayı təhsil müddəti 2 il olan 8 ixtisas üzrə 68 nəfər, təhsil müddəti 3 il olan 9 ixtisas üzrə 81 nəfər, təhsil müddəti 4 il olan 12 ixtisas üzrə 110 nəfər, təhsil müddəti 5 il olan 9 ixtisas üzrə 55 nəfərdir. Bunlardan 115 nəfəri ATU-nun məzunlarıdır. Bundan əlavə, 2015-ci ildə attestasiyaya buraxılmayan 16 nəfər və attestasiyanın I və ya II mərhələlərindən keçə bilməyən 13 nəfər də bu il rezidentlərin yekun attestasiyasında iştirak edəcəklər.xeber100.com

“Birləşmiş Krallıqda təhsil” sərgisi açılıb

Oktyabrın 22-də Bakıda “British Council-Azərbaycan” təşkilatı tərəfindən yeddinci “Birləşmiş Krallıqda təhsil” sərgisi açılıb. Azərtac  xəbər verir ki, sərginin açılış mərasimində Böyük Britaniya və Şimali İrlandiya Birləşmiş Krallığının Azərbaycandakı səfiri xanım Kerol Krofts ölkələrimiz arasında təhsil əlaqələrinin əhəmiyyətindən danışıb. Böyük Britaniyanın universitetləri, digər təhsil ocaqları barədə məlumat verən K.Krofts dünyanın ən nüfuzlu təhsil müəssisələri arasında onların layiqli yer tutduğunu diqqətə çatdırıb. Səfir Böyük Britaniya universitetlərində müxtəlif ölkələrdən olan gənclərlə yanaşı, azərbaycanlı tələbələrin də təhsil aldıqlarını söyləyib. Qeyd edilib ki, hər il təxminən 600 min gənc ingilis dilini mükəmməl öyrənmək üçün Böyük Britaniyaya gəlir. “British Council” təşkilatının Azərbaycan üzrə rəhbəri xanım Elizabet Vayt xaricdə təhsil imkanlarının ilbəil artdığını diqqətə çatdırıb. E.Vayt tədbirin keçirilməsinin məqsədi və əhəmiyyətindən bəhs edib. Oktyabrın 23-də başa çatacaq sərgidə Birləşmiş Krallığın 17 universitet, məktəb və kolleci iştirak edir. Təhsil müəssisələrinin nümayəndələri Böyük Britaniyada ali təhsil pillələri, kollec və orta məktəb təhsili, qısa və uzunmüddətli ingilis dili kursları, yay məktəbləri barədə iştirakçılara məlumat veriblər.xeber100.com

“Məktəb seminarları” layihəsi çərçivəsində ikinci təlim-seminar təşkil olunub

Bakı Şəhəri üzrə Təhsil İdarəsi (BŞTİ) tərəfindən “Təhsili dəyərə çevirək” devizi altında reallaşdırılan “Məktəb seminarları” layihəsi çərçivəsində ikinci təlim-seminar Xəzər rayonunda təşkil olunub. BŞTİ-dən Azərtac-a bildirilib ki, paytaxtın ümumtəhsil məktəblərini əhatə edən layihənin məqsədi keyfiyyətli tədrisi, təhsil sahəsindəki yenilikləri və digər məsələləri təbliğ etməkdən ibarətdir. Xəzər rayonundakı 234 nömrəli tam orta məktəbdə təşkil olunmuş təlim-seminarda çıxış edən BŞTİ-nin müdiri Məhəbbət Vəliyeva “Keyfiyyətə nəzarət işinin təşkili və təlim keyfiyyətinin artırılması istiqamətində səmərəli yanaşmalar və BŞTİ-nin mühüm istiqamətlər üzrə fəaliyyətinin təhlili” mövzusunda çıxış edib. Təlim-seminarda BŞTİ-nin inkişaf layihələri sektorunun müdiri Lamiyə Şərəfxanova rayonlar üzrə məktəblərin keyfiyyət göstəriciləri ilə bağlı məlumat verib. Layihə çərçivəsində təşkil edilən sessiyalarda mövzular ətrafında fikir mübadiləsi aparılıb və suallar cavablandırılıb. Qeyd edək ki, “Məktəb seminarları” layihəsi çərçivəsində təşkil olunan təlim-seminarlar Bakının 12 inzibati rayonu üzrə təşkil olunacaq.xeber100.com

“Education UK-Birləşmiş Krallıqda təhsil” sərgisi keçiriləcək

Oktyabrın 22-23-də “British Council-Azərbaycan” təşkilatı Bakıda növbəti “Education UK-Birləşmiş Krallıqda təhsil” sərgisini keçirəcək. “British Council” təşkilatından Azərtac-a bildiriblər ki, sərgidə Böyük Britaniyanın bir sıra ali məktəbləri təmsil olunacaq. İki gün davam edəcək sərginin açılış mərasimində səfirliklərin, “British Council” təşkilatının və Təhsil Nazirliyinin nümayəndələrinin iştirakı gözlənilir.xeber100.com

“Məktəb seminarları” layihəsi çərçivəsində ilk təlim-seminar keçirilib

Bakı Şəhəri üzrə Təhsil İdarəsi (BŞTİ) Pirallahı rayonundakı 186 nömrəli tam orta məktəbdə “Təhsili dəyərə çevirək” devizi altında reallaşdırılan “Məktəb seminarları” layihəsi çərçivəsində ilk təlim-seminar keçirib. BŞTİ-dən Azərtac-a bildiriblər ki, tədbirdə bu qurumun rəhbəri Məhəbbət Vəliyeva layihənin məqsədlərindən və gözlənilən nəticələrdən danışıb. Bildirilib ki, “Məktəb seminarları” layihəsi 2015-2016-cı tədris ilində təhsildə uğurlu nəticələr əldə edən məktəblərin nailiyyətlərinin müzakirəsi və idarəetmə sahəsindəki uğurlu təcrübənin bölüşdürülməsi məqsədilə həyata keçirilən “Nəzəriyyədən təcrübəyə” adlı “Açıq qapı” layihəsinin davamıdır.xeber100.com

“Narkomaniyanın insan orqanizminə neqativ təsirləri” mövzusunda tədbir keçirilib

Oktyabrın 19-da Azərbaycan Dillər Universitetində (ADU) “Narkomaniya və digər zərərli vərdişlərin insan orqanizminə neqativ təsirləri və yaratdığı sosial problemlər” mövzusunda tədbir keçirilib. ADU-dan Azərtac-a bildiriblər ki, tədbirdə Daxili İşlər Nazirliyinin Baş Narkotiklərlə Mübarizə İdarəsinin polis polkovnik-leytenantı E.Məmmədli dövrümüzün müasir sosial bəlasına çevrilmiş, cəmiyyətin məhvinə yönələn narkomaniyanın ağır fəsadlarından danışıb. Regional Psixologiya Mərkəzinin psixoloqu M.Qafarova tədbirin tələbələri narkomaniyanın fəsadları barədə məlumatlandırmaq baxımından çox faydalı olduğunu bildirib. Səhiyyə Nazirliyinin nümayəndəsi Ş.Mirzəzadə narkomaniyanın insanların səhhətində, gündəlik həyat və iş fəaliyyətində ağır fəsadlar törətdiyini vurğulayıb.xeber100.com

Dünya Elm Günü münasibətilə…

Dünya Elm Günü münasibətilə Azərbaycan Dövlət İqtisad Universitetində (UNEC) “Elm aylığı”na başlanılıb. UNEC-dən Azərtac-a bildirilib ki, bununla bağlı, geniş tədbirlər planı təsdiqlənib. Plana uyğun olaraq, oktyabr ayının 10-dan silsilə tədbirlərin keçirilməsinə başlanılıb. Azərbaycanın tanınmış elm xadimlərinin və iqtisadçılarının da qatılacağı tədbirlərdə elmi seminarlar, dəyirmi masalar keçiriləcək, müzakirələr və diskussiyalar təşkil olunacaq. “Elm aylığı”nda “Elmin insan inkişafında rolu”, “Elmi tədqiqatlarda İKT-nin rolu”, “Elm və təhsil vəhdətinin yeni dizaynı”, “UNEC-də elmi və pedaqoji kadrların hazırlığı məsələləri” və digər mövzularda müzakirələr aparılacaq. “Elm və təhsilin vəhdəti” mövzusunda TEDx beynəlxalq konfransın keçirilməsi də UNEC-də təşkil olunan “Elm aylığı”na daxil edilib. Dünya Elm Günü münasibətilə noyabrın 10-da keçiriləcək son toplantıda “Elm aylığı”na yekun vurulacaq və müvafiq komissiya tərəfindən dəyərləndirilən elmi məqalələr müsabiqəsinin qalibləri mükafatlandırılacaq.xeber100.ccom

Tələbə Qəbulu Üzrə Dövlət Komissiyası

Oktyabrın 22-də Gəncədə Tələbə Qəbulu Üzrə Dövlət Komissiyası (TQDK) tərəfindən Azərbaycan dili və riyaziyyat fənləri üzrə 2017-ci ildə 9 illik təhsil bazasından buraxılış imtahanlarının yeni qaydalarına dair müzakirələrə həsr olunan seminarlar keçiriləcək. TQDK-dan Azərtac-a bildiriblər ki, seminarlarda, həmçinin 2016-cı ildə ali təhsil müəssisələrinə keçirilmiş qəbul imtahanlarında istifadə edilmiş test tapşırıqları, yeni təhsil proqramları (kurikulum) əsasında hazırlanmış dərsliklər müzakirə olunacaq.xeber100.com

“Wiley online kitabxana platformasından istifadə qaydaları”…

Oktyabrın 18-də Bakı Dövlət Universitetində (BDU) “Wiley online kitabxana platformasından istifadə qaydaları”na həsr olunan seminar keçiriləcək. BDU-dan Azərtac-a bildiriblər ki, seminarda “Wiley”nin region üzrə satış meneceri Conathan Vinne və Azərbaycan, Türkiyə, Özbəkistan üzrə satış meneceri Duygu Pacalin məruzə ilə çıxış edəcəklər. Eyni zamanda, “Azərbaycan elmi dünya çapında”, “Azərbaycan elminə “Wiley” tərəfindən baxış”, “Wiley online kitabxana platformasından istifadə qaydaları” və digər mövzular ətrafında müzakirələr aparılacaq.xeber100.com  

Müəllimlərin bilik və bacarıqlarının diaqnostik qiymətləndirilməsi keçiriləcək

Cari ilin noyabr-dekabr aylarında ölkənin 26 rayon və şəhərində dövlət ümumi təhsil müəssisələrində çalışan müəllimlərin bilik və bacarıqlarının diaqnostik qiymətləndirilməsi keçiriləcək. Təhsil Nazirliyindən Azərtac-a bildiriblər ki, diaqnostik qiymətləndirmədə Lənkəran, Astara, Lerik, Yardımlı, Biləsuvar, Salyan, Neftçala, Qusar, Quba, Siyəzən, Şabran, Xızı, Qobustan, Şamaxı, İsmayıllı, Ağsu, Kürdəmir, Ucar, Zərdab, Ağcabədi, Şəmkir, Göygöl, Daşkəsən, Samux, Gədəbəy və Şuşanın ümumi təhsil müəssisələrində müddətsiz və müddətli müqavilə ilə çalışan müəllimlər və gənclərin çağırışaqədərki hazırlıq rəhbərləri iştirak edəcəklər. Diaqnostik qiymətləndirmənin nəticələrinə əsasən müəllimlərin bilik və bacarıq səviyyələri müəyyənləşdiriləcək, onların dərs yükü norması və əməkhaqqı artırılmaqla maddi rifahı yaxşılaşdırılacaq, eləcə də həmin müəllimlər inkişafyönümlü təlimlərə cəlb ediləcəklər. Ötən il diaqnostik qiymətləndirilmə keçirilən rayon və şəhərlərdə çalışan və müxtəlif səbəblərdən qiymətləndirmədə iştirak edə bilməyən və ya işə yeni qəbul olunan müəllimlərə də qiymətləndirmədə iştirak üçün şərait yaradılacaq.