“Wiley online kitabxana platformasından istifadə qaydaları”…

Oktyabrın 18-də Bakı Dövlət Universitetində (BDU) “Wiley online kitabxana platformasından istifadə qaydaları”na həsr olunan seminar keçiriləcək. BDU-dan Azərtac-a bildiriblər ki, seminarda “Wiley”nin region üzrə satış meneceri Conathan Vinne və Azərbaycan, Türkiyə, Özbəkistan üzrə satış meneceri Duygu Pacalin məruzə ilə çıxış edəcəklər. Eyni zamanda, “Azərbaycan elmi dünya çapında”, “Azərbaycan elminə “Wiley” tərəfindən baxış”, “Wiley online kitabxana platformasından istifadə qaydaları” və digər mövzular ətrafında müzakirələr aparılacaq.xeber100.com  

Müəllimlərin bilik və bacarıqlarının diaqnostik qiymətləndirilməsi keçiriləcək

Cari ilin noyabr-dekabr aylarında ölkənin 26 rayon və şəhərində dövlət ümumi təhsil müəssisələrində çalışan müəllimlərin bilik və bacarıqlarının diaqnostik qiymətləndirilməsi keçiriləcək. Təhsil Nazirliyindən Azərtac-a bildiriblər ki, diaqnostik qiymətləndirmədə Lənkəran, Astara, Lerik, Yardımlı, Biləsuvar, Salyan, Neftçala, Qusar, Quba, Siyəzən, Şabran, Xızı, Qobustan, Şamaxı, İsmayıllı, Ağsu, Kürdəmir, Ucar, Zərdab, Ağcabədi, Şəmkir, Göygöl, Daşkəsən, Samux, Gədəbəy və Şuşanın ümumi təhsil müəssisələrində müddətsiz və müddətli müqavilə ilə çalışan müəllimlər və gənclərin çağırışaqədərki hazırlıq rəhbərləri iştirak edəcəklər. Diaqnostik qiymətləndirmənin nəticələrinə əsasən müəllimlərin bilik və bacarıq səviyyələri müəyyənləşdiriləcək, onların dərs yükü norması və əməkhaqqı artırılmaqla maddi rifahı yaxşılaşdırılacaq, eləcə də həmin müəllimlər inkişafyönümlü təlimlərə cəlb ediləcəklər. Ötən il diaqnostik qiymətləndirilmə keçirilən rayon və şəhərlərdə çalışan və müxtəlif səbəblərdən qiymətləndirmədə iştirak edə bilməyən və ya işə yeni qəbul olunan müəllimlərə də qiymətləndirmədə iştirak üçün şərait yaradılacaq.  

Neft və Sənaye Universitetində sərgi təşkil edilib

Azərbaycan Dövlət Neft və Sənaye Universitetində (ADNSU) Azərbaycanın müstəqilliyinin bərpasının 25 illiyi münasibətilə sərgi təşkil edilib. ADNSU-dan Azərtac-a bildiriblər ki, sərgidə dövlət müstəqilliyinin bərpasından sonra Azərbaycanın inkişaf yollarından, ölkədə qazanılan nailiyyətlərdən bəhs edən kitablar, qəzet və jurnal materialları nümayiş olunur. Eyni zamanda, sərgidə ADNSU-nun müəllimlərinin, mütəxəssislərin müxtəlif elm sahələrinə aid kitabları, dərslik və dərs vəsaitləri yer alıb.xeber100.com

Təhsil İdarəsi işləmək arzusunda olanları əməkdaşlığa dəvət edir

Bakı Şəhəri üzrə Təhsil İdarəsi (BŞTİ) könüllü əsaslarla işləmək arzusunda olan gənc oğlan və qızları əməkdaşlığa dəvət edir. BŞTİ-dən Azərtac-a bildirilib ki, gənclər idarənin müxtəlif sektorlarında üç ay təcrübə keçmək imkanı qazanacaqlar. İntizamlı, xoşrəftar, kollektivdə çalışmaq istəyi olan, kompyuterdə işləməyi bacaran, xarici dil biliklərinə malik, ali təhsilli və ya təhsil müəssisələrinin son kursunda oxuyan gənclər könüllü fəaliyyət göstərmək üçün müraciət edə bilərlər. Maraqlananlar tərcümeyi-hallarını[email protected] elektron poçtuna göndərməlidirlər. Müraciətlər insan resursları, ictimaiyyətlə əlaqələr, ümumi təhsil, məktəbdənkənar fəaliyyətin təşkili, informasiya təminatı, maliyyə və mühasibatlıq, inkişaf layihələri və digər sektorlar üzrə qəbul olunur. Sonda gənclərə sertifikatlar veriləcək. Qeyd edək ki, artıq könüllülük proqramı əsasında 40 gənc BŞTİ-də ixtisaslarına uyğun sektorlarda üç ay təcrübə keçib.xeber100.com

“Elektron universitet” layihəsinin tətbiqinə başlanılıb

Oktyabrın 12-də Azərbaycan Dövlət Neft və Sənaye Universitetində (ADNSU) “Elektron universitet” layihəsinin tətbiqinə başlanılıb. ADNSU-dan Azərtac-a bildiriblər ki, “Elektron universitet” sisteminin (“Unibook”) təqdimat mərasimində bu ali məktəbin İnformasiya Texnologiyaları Departamentinin direktoru Elnur Səfərli interaktiv lövhədə sistemin iş prinsipləri və istifadə qaydaları ilə tələbələri tanış edib. Bildirilib ki, “Elektron universitet” sistemi vasitəsilə tələbələr tədris strukturlarını, avtomatlaşdırılmış alt sistemləri özündə birləşdirən vahid informasiya mühitində istənilən fənn üzrə materiallar əldə edəcək, müəllimlərin mühazirələri ilə tanış ola biləcəklər.xeber100.com  

“İnformasiya-kommunikasiya texnologiyalarının tətbiqi”…

Bakıda keçirilən “İnformasiya-kommunikasiya texnologiyalarının tətbiqi” (“AICT 2016”) mövzusunda X beynəlxalq konfrans işini Bakı Dövlət Universitetində (BDU) davam etdirir. Azərtac xəbər verir ki, müxtəlif ölkələrdən olan nümayəndələrin iştirak etdikləri tədbirdə BDU-nun prorektoru, professor Aydın Kazımzadə universitetin fəaliyyəti barədə məlumat verib. Bildirilib ki, BDU-nun 17 fakültəsində ümumilikdə 20 minədək tələbə təhsil alır. Ölkəmizdə informasiya-kommunikasiya texnologiyalarının tətbiqi sahəsində reallaşdırılan tədbirlərdən bəhs edən A.Kazımzadə konfransın əhəmiyyətini diqqətə çatdırıb. Sonra müxtəlif mövzularda məruzələr dinlənilib, müzakirələr aparılıb. Konfrans Təhsil Nazirliyi, Rabitə və Yüksək Texnologiyalar Nazirliyi, Qafqaz Universiteti, Bakı Dövlət Universiteti, Bakı Ali Neft Məktəbi, M.V.Lomonosov adına Moskva Dövlət Universitetinin Bakı filialı, Azərbaycan Texniki Universiteti, Malayziya Sabah Universiteti, Azərbaycan Milli Elmlər Akademiyasının İnformasiya Texnologiyaları və İdarəetmə Sistemləri institutları, UNESCO-nun Təhsildə İnformasiya Texnologiyaları İnstitutu və İqtisadi Əməkdaşlıq Elm Fondunun (ECOSF) təşkilatçılığı, ABŞ-ın Elektrotexnika və Elektronika Mühəndisləri İnstitutu (IEEE) və onun Azərbaycan şöbəsinin texniki, “Nar Mobile” və “DELL EMC” şirkətlərinin maliyyə dəstəyi ilə keçirilir.xeber100.com

“Akare İnternational Education Fairs” şirkətinin təşkilatçılığı ilə…

Oktyabrın 15-də Bakıda Türkiyənin məşhur “Akare İnternational Education Fairs” şirkətinin təşkilatçılığı ilə beynəlxalq təhsil sərgisi açılacaq. Azərtac xəbər verir ki, iki gün davam edəcək sərgidə 50-dən çox xarici ali təhsil müəssisəsi təmsil olunacaq. “Park İnn Hotel”də keçiriləcək sərgidə Türkiyə, Şimali Kipr, Avstraliya, İngiltərə, İsveç, Rumıniya, ABŞ və başqa ölkələrin universitetləri iştirak edəcək. Sərgi çərçivəsində təhsil müəssisələrinin nümayəndələri təmsil etdikləri universitet və dil məktəblərində təhsil, həyata keçirilən proqramlar, tələbələr üçün yaradılan şərait, üstünlüklər və digər məsələlərlə bağlı sualları cavablandıracaqlar. Sərgidə təhsil sahəsində beynəlxalq təcrübə proqramları haqqında məlumat verilməsi də nəzərdə tutulur.xeber100.com

V Beynəlxalq elmi-praktik konfrans keçirilib

Azərbaycan Memarlıq və İnşaat Universitetində (AzMİU) bu ali təhsil müəssisəsinin fizika kafedrasının müdiri, fizika-riyaziyyat elmləri doktoru, professor Tahir Pənahovun 80 illik yubileyinə həsr olunmuş V Beynəlxalq elmi-praktik konfrans keçirilib. AzMİU-dan Azərtac-a bildiriblər ki, AzMİU-nun rektoru, professor Gülçöhrə Məmmədova alimin fəaliyyəti barədə geniş məlumat verib. T.Pənahovu metal və ərintilər sahəsində yeni istiqamət yaratmış qabaqcıl alim kimi qiymətləndirən rektor eyni zamanda, onun gözəl mütəxəssis, tələbə və alimlər yetişdirən əsl ziyalı olduğunu vurğulayıb. G.Məmmədova professorun təkcə respublikamızda deyil, onun hüdudlarından kənarda da tanındığını qeyd edib. Sonra alimin həyat yolunu və elmi fəaliyyətini əks etdirən film nümayiş olunub.xeber100.com

Vətəndaşların müraciətləri dinləniləcək

Azərbaycan Dövlət İqtisad Universitetində (UNEC) “Açıq qapı” günləri keçiriləcək. Tədbirdə UNEC-in rektoru, professor Ədalət Muradov vətəndaşları qəbul edəcək. UNEC-dən Azərtac-a bildirilib ki, noyabrın 5-də keçiriləcək “Açıq qapı”ya artıq qeydiyyat başlanıb. Qeyd edək ki, UNEC-də “Açıq qapı” günü hər ayın birinci şənbə günü keçirilir.xeber100.com

Baku Ekspo Mərkəzində təhsil sərgisi açılıb

Oktyabrın 7-də Baku Ekspo Mərkəzində 10-cu Azərbaycan Beynəlxalq təhsil sərgisi açılıb. Azərtac xəbər verir ki, tədbirdə təhsil nazirinin müavini Ceyhun Bayramov ölkəmizdə onuncu dəfə təşkil edilən sərginin əhəmiyyətini vurğulayıb. Bildirilib ki, bugünkü yubiley tədbiri Təhsil Nazirliyinin rəsmi dəstəyi, “Caspian Event Organisers” (“CEO”) şirkətinin təşkilatçılığı ilə reallaşdırılıb. Sərgidə Dövlət Neft və Sənaye, Texniki, İqtisad, Bakı Biznes, Memarlıq və İnşaat, Texnologiya, Gəncə Dövlət universitetləri və ölkəmizin digər ali məktəbləri stendləri ilə təmsil olunur. Həmçinin “EduGuide” Azer-baijan və “CELT Colleges” şirkətləri xaricdə təhsil proqramını təqdim edəcəklər. Təhsil Nazirliyinin stendlərində “Maarifçi”, “SABAH”, “Azərbaycan üçün öyrət” və “Bir könüllü” layihələri barədə məlumat verilir. Bu il təhsil sərgisində Azərbaycan, Almaniya, Latviya, Litva, Polşa, Macarıstan, İordaniya ali təhsil müəssisələrinin, kollec və başqa təhsil təşkilatlarının nümayəndələri tədbir iştirakçılarını təhsil proqramları ilə tanış edəcəklər. Qeyd olunub ki, sərgidə milli stendlərlə Türkiyə (Study in Turkey), Polşa (“Go Poland”) və Litva (“Study in Lithuania”) çıxış edəcək. Sərgi çərçivəsində iştirakçılara bakalavriat, magistratura, aspirantura, eləcə də ikinci ali təhsil və MBA proqramları, o cümlədən işgüzar xarici dil kursları, təcrübə və treninqlər üzrə proqramları təqdim olunub. Təhsil sərgisi oktyabrın 9-dək davam edəcək.xeber100.com