İxtisas seçimi internet vasitəsilə aparılacaq

Bu gündən ali təhsil müəssisələrinin boş qalan (vakant) plan yerlərinə ixtisas seçimi başlayıb. Apa-nın xəbərinə görə, ali təhsil müəssisələrinin boş qalan (vakant) plan yerlərinə ixtisas seçimi avqustun 15-dən 19-dək internet vasitəsilə aparılacaq. Ali təhsil müəssisələrinin boş qalan (vakant) plan yerlərinin siyahısı “Abituriyent” jurnalının 8-ci sayında dərc olunacaq. Qeyd edək ki, ali təhsil müəssisələrinə I mərhələdə qəbul olmayan abituriyentlər orta ixtisas təhsili müəssisələrinə də ərizə təqdim ediblərsə, onlar öz elektron ərizələrində ali təhsil müəssisələrinin boş qalan yerləri ilə yanaşı orta ixtisas təhsili müəssisələrinin də ixtisaslarını göstərə bilərlər.xeber100.com

Abituriyentlərin nəzərinə…

Bakı Dövlət Universitetinə  2016-2017-ci tədris ilində qəbul olmuş abituriyentlər müvafiq sənədləri təqdim etməklə qeydiyyatdan keçməlidirlər. Təqdim edilməli olan sənədlərin siyahısı BDU-nun saytında yerləşdirilib. BDU-dan Azərtac-a bildiriblər ki, sənəd qəbulu zamanı abituriyent öz ərizəsini təsdiq etmək üçün iş nömrəsini və şifrəsini təqdim etməklə mütləq elektron qeydiyyatdan keçməlidir..xeber100.com

Beynəlxalq Təhsil Sərgisi təşkil olunacaq

Beynəlxalq Təhsil Sərgisinin məlumatına görə, dünyanın ən qabaqcıl universitetlərinin iştirak edəcəyi sərgidə iştirakçılar ən nüfuzlu universitetlərin nümayəndələri ilə görüşmək imkanı əldə edəcəklər. “Fairmont Baku” otelində keçiriləcək sərgi 17 ölkədə fəaliyyət göstərən 200-dən çox universitetin rəsmi nümayəndəsi olan “IGEC” şirkətinin təşkilatçılığı ilə baş tutacaq. Sərgi çərçivəsində təhsil müəssisələrinin nümayəndələri təmsil etdikləri universitetlərlə bağlı verilən sualları cavablandıracaqlar. Sərgidə, həmçinin dünyada təcrübə proqramları haqqında məlumatların verilməsi də nəzərdə tutulub.xeber100.com

Tələbə Qəbulu üzrə Dövlət Komissiyasının məlumatına əsasən…

Tələbə Qəbulu üzrə Dövlət Komissiyası (TQDK) 2016/2017-ci tədris ili üçün Azərbaycan Respublikasının ali təhsil müəssisələrinə yerləşdirmənin nəticələrini avqustun 11-də elan edib. Komissiyadan Azərtac-a bildiriblər ki, abituriyentlər müsabiqənin nəticələrini TQDK-nın internet səhifəsindən və ya mobil telefonla iş nömrələrini 7727 nömrəsinə göndərməklə öyrənə bilərlər. Ali təhsil müəssisələrinə qəbul olmuş abituriyentlərin siyahısı avqustun 12-də “Abituriyent” jurnalının 7-ci sayında dərc olunacaq. Tələbə adı qazanmış şəxslər 2016-cı il avqustun 15-dən 25-dək sənədlərini daxil olduqları təhsil müəssisəsinə təqdim etməklə qeydiyyatdan keçməlidirlər. Müəyyən olunmuş müddətdə qeydiyyatdan keçməmək abituriyentin müvafiq ixtisasa yerləşdirilmədən imtina etməsi kimi qiymətləndiriləcək və onun qəbul haqqında əmri ali məktəbə göndərilməyəcək.xeber100.com      

Abituriyentlərin nəzərinə…

Azərbaycan Dövlət İqtisad Universitetinə (UNEC) qəbul olan abituriyentlər müəyyən edilən müddətdə qeydiyyatdan keçməlidirlər. UNEC-dən Azərtac-a bildirilib ki, dövlət sifarişi və ödənişli əsaslarla qəbul olan abituriyentlər qeydiyyat üçün müvafiq sənədləri - attestatın əslini, şəxsiyyət vəsiqəsinin 3 ədəd, ilkin hərbi qeydiyyata alınma haqqında vəsiqənin 2 ədəd və əmək kitabçasının surətlərini, həmçinin 3×4 ölçüdə 5 fotoşəkili (ağ fonda) (işləyənlər üçün) təqdim etməlidirlər. Sənədlər avqustun 15-dən 25-dək (şənbə və bazar günləri istisna olmaqla) hər gün saat 10-dan 18-dək qəbul olunur. Müəyyən olunmuş müddətdə qeydiyyatdan keçməmək abituriyentin müvafiq ixtisasa yerləşdirilmədən imtina etməsi kimi qiymətləndiriləcək və onun qəbul haqqında əmri Tələbə Qəbulu üzrə Dövlət Komissiyası tərəfindən ali məktəbə göndərilməyəcək.xeber100.com  

Abituriyentlər üçün ixtisas seçimi davam edir

2016-2017-ci tədris ilində Xəzər Universitetinə qəbul olmaq istəyən abituriyentlər üçün ixtisas seçimi davam edir. Universitetdən Azərtac-a bildirilib ki, ixtisas seçimi iyulun 29-dan avqustun 10-dək internet vasitəsilə aparılır. Xəzər Universitetinə qəbul olan tələbələrin siyahısı avqustun 15-də məlum olacaq. Qəbul olan tələbələrin ali məktəbdə qeydiyyatı isə avqustun 15-dən 25-dək aparılacaq.xeber100.com

Valideynlərin ümumi təhsil müəssisələrinin həyatında yaxından iştirakı məqsədilə…

Təhsil Nazirliyi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən təhsilin idarəedilməsinin təkmilləşdirilməsi, valideynlərin ümumi təhsil müəssisələrinin həyatında daha yaxından iştirakı məqsədilə “Məktəb müşavirləri xidməti” pilot layihəsinin icrasına başlanılıb. Təhsil Nazirliyindən Azərtac-a bildiriblər ki, məktəb müşavirlərinin ilkin seçim mərhələsi “ASAN xidmət”də həyata keçiriləcək. Məktəb müşavirinin əsas vəzifələri müəllim və şagirdlər üçün təhlükəsiz mühit yaratmaq, ilk tibbi və psixoloji yardım göstərmək, mütəmadi olaraq şagird, valideyn, müəllim, təlim-tərbiyə müəssisələrinin kollektivi və rəhbərliyi ilə maarifləndirmə və diaqnostik işlərin aparılması olacaq.xeber100.com

İnklüziv təhsil haqqında seminar keçiriləcək

Azərbaycan Respublikası Təhsil Problemləri İnstitutunda sentyabrın 28-də “İnklüziv təhsil: reallıqlar və miflər” mövzusunda seminar keçiriləcək. İnstitutdan Azərtac-a bildiriblər ki, seminarın əsas məqsədi inklüziv təhsil haqqında ictimaiyyət arasında yaranmış bəzi şübhə və yanlış fikirləri aradan qaldırmaq, dünya təcrübəsinə istinad edərək inklüziv təhsilin real mahiyyəti haqqında məlumat verməkdir.xeber100.com

Tələbə Qəbulu Üzrə Dövlət Komissiyasının məlumatına əsasən…

Ali təhsil müəssisələrinin müsabiqəsində iştirak etmək hüququ olan abituriyentlərin ixtisas seçimi davam edir. TQDK-dan Azərtac-a bildiriblər ki, 10 avqust saat 11:30-a olan məlumata görə 37700 abituriyent qəbul olmaq istədiyi ixtisasları öz elektron ərizəsinə daxil edərək təsdiqləyib. 640 abituriyent isə ixtisasları qeyd etməsinə baxmayaraq, ərizəsini təsdiq etməyib. V ixtisas qrupu üzrə qabiliyyət imtahanından müvəffəq qiymət almış abituriyentlər də elektron ərizələrinə daxil olub ixtisas seçimini həyata keçirməlidirlər. Xatırladaq ki, ixtisas seçimi bu gün saat 23:59-da başa çatır. Abituriyentlər müsabiqədə iştirak etmək üçün göstərilən vaxta qədər öz ixtisas seçimi ərizəsini təsdiqləməlidirlər. Əks təqdirdə onlar müsabiqədə iştirak edə bilməyəcəklər.xeber100.com

“Salam, Rusiya!” layihəsi çərçivəsində…

Avqustun 11-dən 18-dək azərbaycanlı məktəblilərin böyük bir qrupu Sankt-Peterburq şəhərində tədris-maarifləndirmə səfərində olacaq. Səfər Rusiyanın Azərbaycandakı səfirliyinin və “Rossotrudniçestvo” Agentliyinin ölkəmizdəki nümayəndəliyinin təşkil etdiyi “Salam, Rusiya!” layihəsi çərçivəsində reallaşacaq. İştirakçıların hamısı rus dili, Rusiya tarixi və mədəniyyəti üzrə müxtəlif layihə və müsabiqələrin qalibləridir. Azərtac Rusiya İnformasiya və Mədəniyyət Mərkəzinin saytına istinadla xəbər verir ki, Bakıda səfərə hazırlıq çərçivəsində artıq məktəblilər və onların valideynləri ilə təşkilati məsələlərə dair görüş keçirilib. İştirakçılar nümayəndə heyətinin rəhbərləri, səfərdə iştirak qaydaları və proqramla tanış olublar. Sankt-Peterburqda məktəbliləri maraqlı ekskursiya və görüşlər gözləyir. Onlar Rusiya və “şimal paytaxtı” haqqında yeni məlumatlar əldə edəcəklər.xeber100.com