İqtisad Universitetində 2015/2016-cı tədris ili üçün iclas keçirilib

Azərbaycan Dövlət İqtisad Universitetində (UNEC) elmi şuranın 2015/2016-cı tədris ili üçün sonuncu iclası keçirilib. Əvvəlcə elmi şuranın iki yeni üzvü – UNEC-də yeni seçilən tələbə rektor Şahin Həsənov və tələbə elmi cəmiyyətinin (TEC) sədri Əvəzağa Məlikov iclas iştirakçılarına təqdim edilib. UNEC-dən Azərtac-a bildirilib ki, bu ali məktəbin rektoru, professor Ədalət Muradov tələbə rektorun işinin strukturunu reallaşdırmaq üçün tədbirlər həyata keçirməyə ehtiyac olduğunu bildirib. TEC-in gələcəyindən söz açan rektor qeyd edib ki, iqtisad elmi üzrə intellektual yarışların özəyi UNEC olmalıdır. Ə.Muradov yeni tədris ilindən bu sahədə respublika olimpiadasına hazırlıqların başlanmasına dair göstəriş verib. UNEC-in təcrübə və işədüzəltmə şöbəsinin müdiri Fuad Əliyev “Ali təhsilin bakalavr pilləsi üzrə IV kurs əyani və V kurs qiyabi şöbədə təhsil alan tələbələrin diplomqabağı təcrübəsinin yekunları və III kurs əyani şöbə tələbələrinin yay istehsalat təcrübəsi haqqında” məruzə ilə çıxış edib. Yay istehsalat təcrübəsinin təşkilindən söz açan şöbə müdiri bu tədris ilində 28 ixtisas kafedrası üzrə 3126 tələbənin təcrübəyə göndəriləcəyini bildirib. Onların istehsalat təcrübəsinin daha mütəşəkkil və keyfiyyətli təşkili, qarşıya çıxacaq problemləri operativ həll olunması məqsədilə yay istehsalat təcrübəsi üzrə “Qaynar xətt”in (146-1-3) açılmasını təklif edib. Rektor müvafiq quruma təklifin icrası ilə bağlı göstəriş verib.xeber100.com

Ərəb dili kursları təşkil edilib

Azərbaycan Turizm və Menecment Universitetində (ATMU) inzibati və pedaqoji heyət üzvlərinin xarici dilləri bilmək səviyyəsini yüksəltməkdən ötrü xüsusi kursların təşkilinə böyük önəm verilir. Ali təhsil müəssisəsində ingilis və italyan dili kursları öz fəaliyyətini başa çatdırıb. ATMU-nun mətbuat xidmətindən Azərtac-a bildirilir ki, bu günlərdə Bakıdakı Misir Mədəniyyət və Təhsil Əlaqələri Mərkəzinin dəstəyi ilə universitetin inzibati-pedaqoji heyət üzvləri üçün fəaliyyəti 3-5 ay nəzərdə tutulan ərəb dili kursu təşkil olunub. Ərəb dili kursu doktor Əşrəf Əbdülqadir Fərəq Mohamed tərəfindən aparılır. Qeyd edək ki, Misir Ərəb Respublikasının Azərbaycandakı səfirliyi tərəfindən Bakıya dəvət olunan Əşrəf Əbdülqadir Fərəq Mohamed ölkəsinin maliyyə yardımı ilə Bakı Dövlət, ADA, Avrasiya universitetlərində, həmçinin Misir Mədəniyyət və Təhsil Əlaqələri Mərkəzində ərəb dilini tədris edir. O, ərəb dili və ədəbiyyatına dair bir sıra məqalələrin müəllifidir.xeber100.com

27 məzun qəbul imtahanlarında 600-dən yuxarı bal toplayıb

Sumqayıt Təbiət Elmləri Təmayüllü Gimnaziyanın 27-i məzunu ali məktəblərə qəbul imtahanlarında 600-dən yuxarı bal toplayıb. Gimnaziyanın direktoru, Əməkdar Müəllim Nizami Əhmədov Azərtac-a bildirib ki, gimnaziyada iki buraxılış sinfi olub. Təhsil müəssisəsini bu il təbiət fənləri üzrə 17, texniki fənlər üzrə isə 25 şagird bitirib. Onlardan 27-si ali məktəblərə qəbul imtahanlarında 600-dən yuxarı bal toplayıb. O cümlədən 8 abituriyent 650-dən yuxarı nəticə göstərib. “Bu şagirdlər gimnaziyada çalışqan olmaları, dərsə davamiyyətləri, aldıqları yüksək qiymətlərlə seçiliblər. Ona görə də, belə uğurlu nəticəni gözləyirdik”, - deyə N.Əhmədov deyib.xeber100.com

Qəbulla bağlı müraciətlərin qeydə alınması artıq başa çatıb

Fransız-Azərbaycan Universitetinə (UFAZ) qəbulla bağlı müraciətlərin qeydə alınması artıq başa çatıb. Apa-nın xəbərinə görə, qəbul imtahanında 500 və daha çox bal toplayan 303 tələbə 4 ixtisas üzrə 160 yer uğrunda mübarizə aparacaq. UFAZ-a qeydiyyat 18-23 iyul tarixlərində həyata keçirilib. Qeydiyyatdan keçən abituriyentlər 25-26 iyulda sənədlərini Azərbaycan Dövlət Neft və Sənaye Universitetindən (ADNSU) götürə bilərlər. Qeydiyyata alınmış abituriyentlər 27 iyul saat 10.00-da ADNSU-da keçiriləcək imtahanda iştirak edəcəklər. Qeyd edək ki, 2016-2017-ci tədris ilindən etibarən Azərbaycan Dövlət Neft və Sənaye Universiteti ilə Fransanın Strasburq Universitetinin birgə hazırladığı 4 ixtisas üzrə tədris başlanacaq. Tədris tamamilə qeyd olunan fransız proqramına əsaslandığına görə UFAZ-ın məzunları sonda müvafiq olaraq iki diplomla təmin olunacaqlar. Bütün ixtisaslar üzrə tədris 4 il (1 il hazırlıq + 3 il əsas tədris müddəti) olmaqla tamamilə ingilis dilində aparılacaq. Tədrisin tamamilə ADNSU-da aparılması nəzərdə tutulur. Semestr ərzində yaxşı nəticə göstərən tələbələrin Fransada yay məktəblərində və bir mübadilə semestrində iştirak etməsi mümkündür. 2016-2017-ci tədris ili üçün UFAZ-da hər bir ixtisası üzrə 30 dövlət sifarişli və 10 ödənişli olmaqla 160 tələbənin təhsil alması nəzərdə tutulur.xeber100.com

Tələbə Qəbulu üzrə Dövlət Komissiyasının məlumatı…

Azərbaycanda ali məktəblərə II və III ixtisas qrupları üzrə qəbul imtahanı başa çatıb. Tələbə Qəbulu üzrə Dövlət Komissiyasından (TQDK) Apa-ya verilən məlumata görə, imtahan respublikanın11 şəhərində - Bakı, Naxçıvan, Gəncə, Sumqayıt, Mingəçevir, Şəki, Ağcabədi, Göyçay, Şirvan, Lənkəran və Xaçmaz şəhərlərində, ümumilikdə 55 binada aparılıb.İmtahan prosesinin idarə olunması üçün TQDK-da operativ qərargah fəaliyyət göstərib, müntəzəm olaraq imtahanın keçirildiyi binalarla əlaqə saxlanılıb və imtahan prosesinin gedişi nəzarətdə olub. Bütün binalarda imtahan təlimata uyğun şəkildə keçirilib, abituriyentlərin öz bilik səviyyələrini nümayiş etdirmələri üçün zəruri şərait yaradılıb. Dəfələrlə xəbərdarlıq edildiyinə baxmayaraq, bəzi abituriyentlər sənədlərini gətirmədikləri üçün imtahana buraxılmayıblar. Həmçinin imtahana köməkçi vasitələr, o cümlədən mobil telefon gətirən, imtahanın gedişi zamanı köçürməyə cəhd edən, imtahan qaydalarına zidd hərəkətlərə yol verən abituriyentlər imtahandan xaric olunub və nəticələri ləğv edilib. İmtahanda istifadə olunmuş test tapşırıqlarının düzgün cavabları isə TQDK-nın internet saytında və facebook səhifəsində yerləşdiriləcək. İyulun 24-dən etibarən komissiyada imtahan protokollarının və cavab kartlarının emalı aparılacaq. Nəticələrin yaxın günlərdə elan edilməsi nəzərdə tutulur.xeber100.com

Tələbə Qəbulu üzrə Dövlət Komissiyasının məlumatına görə…

Xəbər verdiyimiz kimi, iyulun 23-də Tələbə Qəbulu üzrə Dövlət Komissiyası (TQDK) 2016/2017-ci tədris ili üçün Azərbaycan Respublikasının ali təhsil müəssisələrinə qəbul olmaq istəyən cari ilin məzunlarının iştirakı ilə II və III ixtisas qrupları üzrə qəbul imtahanı keçirəcək. Azərtac xəbər verir ki, Xaçmaz şəhərində keçiriləcək qəbul imtahanlarında şimal bölgəsindən olan 1006 məzunun iştirakı nəzərdə tutulub. İmtahanlar iki mərkəzdə - akademik Zərifə Əliyeva adına 8 saylı məktəb-liseydə və Əzizəddin Tahirov adına Köhnə Xaçmaz tam orta məktəbində təşkil olunacaq. TQDK-nın Xaçmaz Regional Bölməsindən bildirilib ki, imtahanlara 97 nəzarətçi müəllim, o cümlədən 4 imtahan rəhbəri cəlb ediləcək. Hər iki mərkəzdə imtahanların keçirilməsi üçün lazımi şərait yaradılıb. İmtahan Xaçmazla yanaşı, respublikanın daha 10 şəhər və rayonunda, ümumilikdə, 55 binada aparılacaq. İmtahan bütün binalarda eyni vaxtda – saat 11:00-da başlanacaq və 3 saat davam edəcək. Abituriyentlər imtahana gələrkən özləri ilə şəxsiyyəti təsdiq edən sənədin əslini və “İmtahana buraxılış vərəqəsi”ni götürməlidirlər. İmtahan vermiş abituriyentlərin cavab kartlarının emalı başa çatdıqdan sonra nəticələr və hər bir abituriyentin cavab kartının qrafik təsviri TQDK-nın internet saytında yerləşdiriləcək. Abituriyentlər imtahan nəticələri barədə məlumatı, həmçinin mobil telefonla iş nömrələrini 7727 nömrəsinə göndərməklə öyrənə biləcəklər.xeber100.com

İqtisad Universitetində test mərhələsinə başlanıb

Ümumi təhsil müəssisələrinə mərkəzləşdirilmiş qaydada keçirilən müəllimlərin işə qəbulu üzrə müsabiqənin test mərhələsinə başlanıb. Avqustun 3-dək aparılacaq imtahanlar Azərbaycan Dövlət İqtisad Universitetinin 2-ci tədris binasında keçirilir. Təhsil Nazirliyindən Azərtac-a bildiriblər ki, namizədlərə ixtisaslarına uyğun olaraq ümumtəhsil məktəblərinin fənn proqramının məzmunu üzrə 40, metodika, təlim strategiyaları üzrə 10 və məntiq üzrə 10 sual olmaqla ümumilikdə 60 sualı cavablandırmaq üçün 90 dəqiqə vaxt verilir. İmtahan bitdikdən sonra namizədlər topladıqları balı öyrənə biləcəklər. Qeyd edək ki, vakant yerlərin seçimi test imtahanı nəticəsində zəruri keçid balını toplamış namizədlər tərəfindən aparılacaq. Müsabiqədə iştirak etmək üçün müraciət edənlərdən 31 min 779 nəfərinin elektron ərizəsi təsdiqlənib. Hazırda respublikanın ümumtəhsil müəssisələrində olan 3 min 346 vakansiya müsabiqəyə çıxarılıb. Müsabiqədə iştirak üçün müraciət edənlər arasında ibtidai sinif, Azərbaycan dili və ədəbiyyatı, ingilis dili müəllimi olmaq istəyən namizədlər üstünlük təşkil edir.xeber100.com

Turizm İnstitutu Plagiat.pl şirkəti ilə əməkdaşlıq edir

Azərbaycan Turizm və Menecment Universiteti (ATMU) yarandığı gündən bütün sahələrdə olduğu kimi plagiatlıq hallarının qarşısının alınması istiqamətində də gördüyü işlərlə birincilər sırasında olub. Plagiat.pl” şirkətinin regional direktoru Əli Təhməzov da universitet rəhbərliyi ilə görüşü zamanı bildirib ki, Azərbaycan Turizm və Menecment Universiteti Plagiat.pl şirkəti ilə əməkdaşlıq edən ilk universitetdir. Universitetdən Azərtac-a bildirilib ki, 2015-2016 tədris ilində universiteti bitirən 336 məzundan 90-ı təhsil aldıqları müddət ərzində yüksək bilik nümayiş etdirdiklərinə görə buraxılış işi yazıb. Yazılan işlərin hər biri antiplagiat proqramında yoxlanılaraq, oxşarlıq hesabatları çıxarılıb və mətnlərdə oxşarlıq həddi aşağı olan və ya ümumiyyətlə olmayan işlər müdafiəyə buraxılıb. Az sayda tələbələrin işində oxşarlıq yüksək həddə olub ki, həmin işlərdə yenidən işlənmə üçün müəlliflərə geri qaytarılıb. Azərbaycan Turizm və Menecment Universiteti bu istiqamətdə işləri gələcəkdə daha da genişləndirmən niyyətindədir.xeber100.com

BDU-nin məlumatına əsasən…

Bakı Dövlət Universitetinin (BDU) ekologiya və torpaqşünaslıq fakültəsinin yer quruluşu və kadastr ixtisası üzrə təhsil alan III kurs tələbələri iyulun 19-dan avqustun 1-dək tədris təcrübələrini Azərbaycan Respublikası Əmlak Məsələləri üzrə Dövlət Komitəsinin müvafiq strukturlarında davam etdirəcəklər. Universitetdən Azərtac-a bildirilib ki, tələbələr BDU-nun Quba Tədris-Təcrübə və İstirahət Bazasında çöl-tədris təcrübələrində olub, ətraf ərazilərin müxtəlif landşaft komplekslərinin tədqiqi baxımından torpaqların münbitliyinin öyrənilməsi və səmərəli istifadəsi üzrə uğurlu tədqiqatlar aparıblar.xeber100.com

Tələbə Qəbulu üzrə Dövlət Komissiyasının məlumatına görə…

Tələbə Qəbulu üzrə Dövlət Komissiyasının iyunun 15-də keçirdiyi imtahanda I və IV qruplar üzrə 6 nəfər 700 bal toplayıb ki, onlardan biri də Xırdalan şəhəri 5 saylı orta məktəbin məzunu Rəvan Nəzərəliyevdir. Əkiz qardaşlar olan Rəvan və Nurlan Nəzərəliyevlər bu imtahanlarda müvafiq olaraq 700 və 685 bal toplayıblar. Sınaqda 700 bal topladığını və imtahanda da belə yüksək nəticəyə inandığını söyləyən Rəvan deyib: “Yüksək nəticə üçün inam, səbirlə çalışmaq əsas şərtdir. Dərslərə sistemli çalışmaq lazımdır. Mən bu cür hazırlaşdım və yüksək nəticə göstərdim. Fürsətdən istifadə edib, orta məktəb müəllimlərimə və ən yüksək nəticə göstərməyimdə zəhməti olan hər kəsə sonsuz minnətdarlığımı bildirirəm”. Rəvanın atası maşın ustasıdır, anası riyaziyyat müəllimidir. Ailədə üç qardaşdırlar. Rəvan ailədə yüksək bal toplayan ilk uşaq deyil. Böyük qardaşları Rəşad 2013-cü ildə 677 balla Bakı Ali Neft Məktəbinə daxil olub.xeber100.com