Azərbaycan Respublikasının Prezidenti yanında Bilik Fondu və Şəmkirdəki Heydər Əliyev Mərkəzi arasında imzalanmış niyyət protokolu çərçivəsində mayın 23-də mərkəzin inzibati binasında Bilik Evinin açılış mərasimi keçirilib. Şəmkir Heydər Əliyev Mərkəzinin təşəbbüsü və Bilik Fondunun dəstəyi ilə fəaliyyətə başlayacaq Bilik Evinin açılış mərasimində fondun icraçı direktoru Oqtay Səmədov, Şəmkir Rayon İcra Hakimiyyətinin başçısı Alimpaşa Məmmədov, Şəmkir Heydər Əliyev Mərkəzinin direktoru, Milli Məclisin deputatı Sona Əliyeva, Yeni Azərbaycan Partiyası Şəmkir rayon təşkilatının sədri Fəxrəddin Vəliyev, Şəmkir rayon Rus İcmasının sədri Valeriya İvanova, müxtəlif dini icma, yerli təhsil şöbəsi, mərkəzi xəstəxana, mədəniyyət şöbəsi, polis şöbəsi, tarix və diyarşünaslıq muzeyi, Gənclər və İdman İdarəsi, Gənc Müəllimlər Birliyi, Gənc Həkimlər Birliyi, "Qarabağ Müharibəsi Əlilləri, Veteranları və Şəhid Ailələri” İctimai Birliyi, “Şəmkir Regional Qeyri-Hökumət Təşkilatlarının Resurs və Təlim Mərkəzi” İctimai Birliyi, Bakı Oksford Məktəbinin Şəmkir filialı, “Zəka” Gənclərin İntellektual İnkişaf və Yaradıcılıq Mərkəzi, “Kids Academy” uşaq bağçasının rəhbərləri və nümayəndələri, Bilik Fondunun əməkdaşları iştirak ediblər. Bilik Fondundan Azərtac-a bildiriblər ki, açılış mərasimindən əvvəl qonaqlar mərkəzlə yaxından tanış olub, Heydər Əliyev irsinin qorunması, tədqiqi, təbliği istiqamətində və gənclərin maarifləndirilməsi sahəsində mərkəzin gördüyü işlər, həyata keçirilməsi nəzərdə tutulan gələcək layihələr barədə qonaqlara geniş məlumat verilib. Şəmkir Bilik Evinin açılış mərasimində Milli Məclisin deputatı Sona Əliyeva rəhbərlik etdiyi mərkəzin və Bilik Fondunun birgə təşkilatçılığı ilə Bilik Evinin yaradılmasının əhəmiyyətindən danışıb, bu qurumun həm Şəmkir rayonunda, həm də ətraf bölgələrdə böyük uğurlara imza atacağına əminliyini bildirib. Bilik Fondunun icraçı direktoru Oqtay Səmədov bir neçə bölgədə Bilik Evinin açıldığını xatırladıb, onların fəaliyyətindən söz açıb. İcraçı direktor deyib ki, fondun bütün bölgələr üzrə təyin olunan nümayəndələri bilik evləri ilə birgə mütəmadi tədbirlər keçirir və qarşılıqlı dəstəyin nəticəsində böyük nailiyyətlərə imza atılır. O.Səmədov həm Nardaranda, həm də Şəmkirdə Bilik Evinə Milli Məclisin deputatlarının rəhbərlik etdiyini vurğulayaraq, bu hadisəni fondun uğuru kimi dəyərləndirib: "Ev” deyəndə adamın düşüncəsinə isti ocaq, rahatlıq, səmimiyyət, doğmalıq kimi gözəl hisslər hakim kəsilir. Əminik ki, Bilik Evi də doğma ocağınız qədər isti ocağa çevriləcək”. Şəmkir Rayon İcra hakimiyyətinin başçısı Alimpaşa Məmmədov bilikləndirmə missiyası daşıyanlara Şəmkir rayonunun bütün sakinlərinin dəstək verməyə hazır olduğunu deyib. İcra başçısı bildirib ki, Bilik Evinin rayonun hərtərəfli və sürətli inkişafına güclü təkan olacağına inanır: “Bütün şəmkirlilər Bilik Evinə məbəd kimi baxmalıdırlar. Bilik Evi məbəd içərisində məbəddir. Şəmkir Heydər Əliyev Mərkəzi böyük həvəslə öz qapılarını Bilik Fondunun Bilik Evinə açdı. Biz buna çox sevinirik və bu hadisəyə görə hamınızı təbrik edirəm”. Şəmkir rayon Rus İcmasının sədri Valeriya İvanovna əsrlərdir multikultural dəyərlərini qoruyan və tətbiq edən Azərbaycanın vətəndaşı olmaqdan qürur duyduğunu söyləyib, Şəmkirdə yaşayan bütün xalqların nümayəndələrinin ölkənin inkişafına yönəlmiş işlərdə yaxından iştirak etdiklərini vurğulayıb. V.İvanova Bilik Evinin layihələrinə məmnuniyyətlə qoşulmağa hazır olduqlarını bildirib. Digər çıxış edənlər də Şəmkir Bilik Evinin fəaliyyətinə uğurlar arzulayıb, bu ocağın ixtisaslı, bacarıqlı kadrların yetişməsində baza rolu oynayacağına əminliklərini bildiriblər. Daha sonra Bilik Evinin ilk “dəyirmi masa”sı keçirilib. Bilik Fondunun nümayəndələri Şəmkirdə fəaliyyət göstərən Gənc müəllimlər və Gənc Həkimlər birliklərinin üzvləri ilə “Sağlam bədən, sağlam ruh, sağlam düşüncə” mövzusunda müzakirələr aparıblar. Hazırda Qax və Oğuz rayonlarında, Nardaran qəsəbəsində Bilik Fondunun Bilik Evi fəaliyyət göstərir. Astara və İsmayıllı rayonlarında da Bilik Evinin açılması planlaşdırılır.xeber100.com
