Anlaşma Memorandumu hazırlanıb

Azərbaycan Turizm və Menecment Universiteti (ATMU) və Gürcüstanın İlia Dövlət Universiteti arasında əməkdaşlığa dair Anlaşma Memorandumu işlənib hazırlanıb. ATMU-dan Azərtac-a bildirilib ki, bu barədə Almaniyanın Vilhelmshaven şəhərində Avropa İttifaqının “Davamlı turizmin idarə olunması sahəsində beynəlxalq bakalavr və magistr proqramları üçün yeni modulların hazırlanması” (SuToMa) layihəsi çərçivəsində keçirilən yekun konfransda bildirilib. Tədbirdə ATMU-nu tədqiqat və inkişaf şöbəsinin əməkdaşları Şəlalə Məmmədova və Kazım Quliyev təmsil ediblər. Layihə tərəfdaşları görülən işlər və nəticələrə dair hesabatla çıxış ediblər. Layihə rəhbərliyi, Yade Tətbiqi Elmlər Universitetinin vitse-prezidenti, professor Uve Vaythoner və beynəlxalq əlaqələr şöbəsinin rəhbəri Andrea Menn layihənin hazırlanmasında və icra olunmasında ATMU-nun rolunu xüsusi qeyd ediblər. Tədbirin sonunda gələcək əməkdaşlıq üçün yeni fikirlər səsləndirilib. Həmçinin ATMU və Gürcüstanın İlia Dövlət Universiteti arasında əməkdaşlıq barəsində Anlaşma Memorandumu işlənib hazırlanıb.xeber100.com  

“Valideynləri dinləyək, əməkdaşlığı gücləndirək” layihəsinə başlanılıb

Azərbaycan Valideyn-Müəllim Assosiasiyası İctimai Birliyinin (AVMA İB) təşkilatçılığı və Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirilən, qeyri-formal şəraitdə valideyn dinləmələri, məktəb iştirakçılarının təhsil müzakirələri və yay təlim-istirahətinin təşkilinə həsr olunan “Valideynləri dinləyək, əməkdaşlığı gücləndirək” layihəsinə başlanılıb. AVMA İB-dən Azərtac-a bildiriblər ki, layihənin məqsədi qeyri-formal şəraitdə valideynlərin pedaqoji maariflənməsinə, valideyn dinləmələri keçirməklə onların problemlərinin öyrənilməsinə şərait yaratmaq, təhsilin keyfiyyətinin yüksəldilməsi üçün məktəb-valideyn əməkdaşlığının təkmilləşdirlməsi modellərini ortaya qoymaqdır. Layihə çərçivəsində may-iyun aylarında Şəmkir, İmişli, Astara və Bakıda valideyn, şagird və müəllimlərin iştirakı ilə valideyn dinləmələri və sorğular keçiriləcək, qeyri-formal şəraitdə təlimlər və istirahətlər təşkil ediləcək. Həmçinin Astarada təhsil mütəxəssisləri və məktəb kollektivinin iştirakı ilə təhsilin aktual problemlərinə dair əlaqələndirmə şurasının iclası keçiriləcək, iştirakçıların istirahəti və ekskursiyaları təşkil ediləcək. Ekskursiyalar zamanı layihə iştirakçılar mədəniyyət abidələri və qeyri-formal təhsil yaradıcı mərkəzlərlə tanış olacaqlar. Media və təhsil nümayəndələrinin iştirakı ilə layihənin yekununa dair mətbuat konfransının keçirilməsi də nəzərdə tutulur.xeber100.com  

“Ödənişli yay təcrübəsi” proqramı üzrə sənəd qəbulu başlayıb

SOCAR 2016-cı il üzrə “Ödənişli yay təcrübəsi” proqramına sənəd qəbulu elan edib. SOCAR neft ixtisasları üzrə təhsil alan tələbələrin yay tətillərinin səmərəli təşkilini, onların neft-qaz sənayesi üzrə təcrübi biliklərinin artırılmasını, habelə şirkətin müəssisələrində real iş şəraiti ilə yaxından tanış olmalarını diqqət mərkəzində saxlayır və bu məqsədlə 2010-cu ildən etibarən hər il Azərbaycan Respublikasının və xarici ölkələrin müxtəlif ali məktəblərində neft-qaz mühəndisliyi, qazma, geofizika, geologiya, istehsalatın avtomatlaşdırılması, kompyuter, inşaat, ekologiya, neft-kimya və kimya mühəndisliyi, energetika, proqramçı və digər ixtisaslar üzrə təhsil alan, Azərbaycan vətəndaşı olan tələbələr üçün “Ödənişli yay təcrübəsi” proqramını həyata keçirir. SOCAR-ın mətbuat xidmətindən Azərtac-a bildirilib ki, proqramda bakalavr pilləsinin əyani şöbəsinin 3 və 4-cü, magistraturanın 1 və 2-ci kurslarında təhsil alan tələbələrin iştirak etməsi üçün imkanlar yaradılır. Proqramın şərtlərinə əsasən, avqust və sentyabr aylarını əhatə edən təcrübə müddətində tələbələrlə müvəqqəti əmək müqaviləsi bağlanılır və onlar minimal dərəcə ilə mütəxəssis vəzifəsinə işə qəbul olunurlar. Təcrübəçilərə işlədikləri müddətə və vəzifələrinə uyğun əməkhaqqı ödənilir. Proqrama müraciət etmək istəyənlər mayın 30-dək www.socar.az/tehsil veb-səhifəsindən “Ödənişli yay təcrübəsi” proqramının suallar və şərtlər bölməsi ilə tanış olduqdan sonra elektron müraciət formasını dolduraraq qeydiyyatdan keçməlidirlər.xeber100.com

Məktəblərarası videoçarx müsabiqəsinə başlanılıb…

“Məktəb icma qurumlarının təşkili” layihəsi çərçivəsində məktəb icmalarının bütün iştirakçıları üçün Təhsil Nazirliyi, Bakı Şəhəri üzrə Təhsil İdarəsi (BŞTİ) və Community.az portalı müsabiqə elan edib. BŞTİ-dən Azərtac-a bildiriblər ki, mayın 31-dək keçiriləcək məktəblərarası “Məktəbini tanıt” mövzusunda videoçarx müsabiqəsində bu qurumun tabeliyində olan ümumtəhsil məktəbləri iştirak edəcəkdir. Beş nominasiya üzrə elan olunan müsabiqədə hazırlanılan videoçarxlar mayın 31-dək Community.az portalında yerləşdirilməlidir. Müsabiqənin yekununda hər nominasiya üzrə qaliblərin mükafatlandırılması mərasimi keçiriləcək.xeber100.com

Son zəng iyunun 14-də çalınacaq…

Bu il son zəng iyunun 14-də çalınacaq. Bu barədə Təhsil Nazirliyinin mətbuat xidmətinin rəhbəri Cəsarət Valehov məlumat verib. Onun sözlərinə görə, mövcud qanunvericiliyə uyğun olaraq və dünya təcrübəsini nəzərə alaraq dərs ilinin müddəti bu ildən etibarən iyun ayının 14-dək uzadıldığına görə, son zəng də həmin gün çalınacaq. Nazirlər Kabineti dərs ilinin artırılması ilə bağlı “Ümumtəhsil məktəbinin nümunəvi nizamnaməsi”nə hələ 2014-cü ildə dəyişiklik edib. Bu dəyişiklik bu ildən etibarən məktəblərə tətbiq olunub. Dəyişikliyə əsasən ümumtəhsil məktəblərində dərslər sentyabrın 15-də başlayıb iyunun 14-də başa çatacaq. Dərs ili iki yarımilə bölünüb, birinci yarım il sentyabrın 15-dən yanvarın 26-na kimi, ikinci yarımil fevralın 1-dən iyunun 14-nə kimi davam edəcək. Dərs ili ərzində tətillərin tarixi aşağıdakı kimidir: Payız tətili – 16 noyabr 20 noyabr Qış tətili – 27 yanvar 31 yanvar Bundan əlavə ibtidai siniflər üçün 5 günlük əlavə yaz tətili müəyyənləşdiriləcək. Bu tətil mayın 1-dən 5-nə kimi olacaq. Təhsil Nazirliyindən verilən məlumata görə, bu müddət ərzində materialların tədrisi nisbətən məktəbdə asanlaşacaq. Bu da uşaqların xeyrinə olan bir məsələdir.xeber100.com

“Cavid gecəsi” mövzusunda açıq dərs keçirilib

Bakı Dövlət Universitetinin (BDU) nəzdində fəaliyyət göstərən “Gənc istedadlar” liseyində “Cavid gecəsi” mövzusunda açıq dərs keçirilib.Liseyin rus dili və ədəbiyyatı müəllimi, filologiya üzrə fəlsəfə doktoru Səmayə Kərimova böyük şair, dramaturq Hüseyn Cavidin Azərbaycan ədəbiyyatında önəmli yerindən və rolundan bəhs edib. BDU-nun jurnalistika fakültəsinin radio və televiziya kafedrasının dosenti, cavidşünas Sevil Həsənova Cavid ədəbi məktəbinin Azərbaycan publisistikasındakı əhəmiyyətli rolundan danışıb, ədibin şeirlərini səsləndirib. Sonra liseyin 11-ci sinif şagirdlərinin böyük mütəfəkkirin yaradıcılığına həsr olunmuş çıxışları dinlənilib, “İblis”, “Qız məktəbində”, “Hüseyn Cavid” simfoniyası, “Cavid ömrü” filminin treyleri” əsərlərindən ibarət videoçarx təqdim olunub. Sonda BDU-nun humanitar fakültələr üzrə rus dili kafedrasının müdiri, dosent Ədibə Paşayeva çıxış edərək tədbirin təşkilini yüksək dəyərləndirib. O, bu cür tədbirlərin keçirilməsinin, rus bölmələrində Azərbaycan ədəbiyyatının tədris edilməsinin vacibliyini vurğulayıb.Tədbirdə BDU-nun təbiət elmləri üzrə rus dili kafedrasının müdiri, professor Mikayıl Cəfərov, rus dilçiliyi kafedrasının baş müəllimi Firavan Məmmədbəyli, Bakı Slavyan Universitetinin dosenti Sevinc Məmmədova, akademik Zərifə Əliyeva adına liseyin direktoru, filologiya üzrə fəlsəfə doktoru Mehriban Vəliyeva və Heydər Əliyev adına Müasir Təhsil Kompleksinin müəllimi Boquş Darya iştirak ediblər.xeber100.com

Qəbul qaydalarında dəyişiklik olmayacaq

"Hazırda biz qəbul imtahanlarına hazırlaşırıq. Bütün qəbul qaydaları yanvar ayında çap olunub. Qəbul qaydalarına əsasən imtahanlar aparılacaq".Apa-nın xəbərinə görə, bunu Dövlət İmtahan Mərkəzinin Direktorlar Şurasının sədri Məleykə Abbaszadə jurnalistlərə açıqlamasında deyib. O bildirib ki, bu il üçün qəbul qaydalarında heç bir dəyişiklik olmayacaq: "İmtahanların keçirilmə və başlama tarixləri TQDK-nın rəsmi səhifəsində yerləşdirilib". M. Abbaszadə onu da əlavə edib ki, V ixtisas qrupuna daxil olan ixtisaslar sırf qabiliyyət tələb edənlərdir: "V qrup ixtisaslarının müsabiqəsində iştirak etmək üçün builki məzunlar buraxılış imtahanlarını verməli, əvvəlki illərin məzunları isə buraxılış imtahanları səviyyəsində olan imtahanları verir və ümumi müsabiqəyə qoşulurlar".xeber100.com

“Professorlar klubu” təsis edilib

Azərbaycan Dövlət İqtisad Universitetində (ADİU) “Professorlar klubu” təsis edilib. ADİU-dan AZƏRTAC-a bildirilib ki, klubun məqsədi klassik və müasir elmlərin nailiyyətləri ilə bağlı fikir mübadiləsi üçün toplantılar keçirmək, istedadlı gənc alimlərə hərtərəfli dəstək vermək, respublikada və xaricdə müxtəlif elmi, mədəni-kütləvi tədbirlərdə təmsil olunmaqdır. Kluba üzvlük könüllüdür və nəzərdə tutulan məqsədlərə həmrəy olan hər bir professor və elmlər doktorları kluba qoşula bilər. “Professorlar klubu” maliyyə və maliyyə institutları kafedrasının müdiri, iqtisad elmləri doktoru Əvəz Ələkbərovun təşəbbüsü ilə yaradılıb.xeber100.com

Qarabağ tarixinə həsr olunan tədbir keçirilib

Azərbaycan Dillər Universitetində (ADU) bu ali məktəbin tələbə gənclər təşkilatının nəzdində fəaliyyət göstərən tarix klubunun təşkilatçılığı ilə Qarabağ tarixinə həsr olunan tədbir keçirilib. Universitetdən AZƏRTAC-a bildiriblər ki, tədbirdə ADU-nun dosenti Xanməmməd İbrahimov Azərbaycanın qədim tarixindən söz açıb. O, xalqımızın Prezident İlham Əliyevi və onun apardığı siyasəti daim dəstəklədiyini bildirib, gənc nəslin vətənpərvər ruhda yetişməsinin vacibliyini vurğulayıb. Professorlar Atamoğlan Məmmədli və Ramil Rüstəmov ermənilərin Azərbaycan xalqına qarşı əsrlər boyu qırğınlar törətməsindən, əsassız ərazi iddialarından, törətdikləri vəhşiliklərdən, onların tarixi saxtalaşdırmaq cəhdlərindən, real faktlara əsaslanan hadisələrdən danışıblar. İşğal olunmuş torpaqların təbii sərvətləri, zəngin təbiəti və coğrafi baxımdan strateji əhəmiyyətindən söz açan natiqlər Azərbaycan dövlətinin və onun güclü ordusunun torpaqlarımızın hər qarışını geri qaytaracağına əminliklərini ifadə ediblər. Sonra tələbələrin sualları cavablandırılıb.xeber100.com

“Ən yaxşı təqdimat” müsabiqəsi başa çatıb

Məktəblilər arasında ümummilli lider Heydər Əliyevin anadan olmasının 93-cü ildönümünə həsr edilən “Ən yaxşı təqdimat” müsabiqəsi başa çatıb. Mayın 5-də “Gülüstan” Sarayında müsabiqə qaliblərinin mükafatlandırılması mərasimi olub. Azərtac xəbər verir ki, tədbir iştirakçıları əvvəlcə Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə gül dəstələri qoyublar. Görkəmli oftalmoloq alim, akademik Zərifə xanım Əliyevanın da xatirəsi yad olunub, məzarı üstünə gül dəstələri düzülüb. Dövlət qurumlarının nümayəndələrinin, Milli Məclisin deputatlarının, alimlərin, ali məktəb rektorlarının, təhsil işçilərinin iştirak etdikləri tədbir Azərbaycanın Dövlət himninin səslənməsi ilə başlanıb. Tədbirdə çıxış edən təhsil naziri Mikayıl Cabbarov ulu öndər Heydər Əliyevin təhsilə daim böyük önəm verdiyini, Ümummilli Liderin siyasi xəttinin Prezident İlham Əliyev tərəfindən uğurla davam etdirildiyini vurğulayıb. Nazir təhsil sahəsində həyata keçirilən proqram və layihələrdən, bu sahədə qazanılan nailiyyətlərdən, qarşıda duran vəzifələrdən danışıb. Eyni zamanda, məlumat verilib ki, ümumtəhsil məktəblərinin IX-XI sinif şagirdləri arasında keçirilən müsabiqə Heydər Əliyev Fondu, Yeni Azərbaycan Partiyası, Təhsil, Rabitə və Yüksək Texnologiyalar nazirlikləri, Azərbaycan Təhsil İşçiləri Azad Həmkarlar İttifaqları Respublika Komitəsi tərəfindən birgə təşkil olunub. Baş nazirin müavini, Yeni Azərbaycan Partiyası sədrinin müavini-icra katibi Əli Əhmədov, Azərbaycan Təhsil İşçiləri Azad Həmkarlar İttifaqları Respublika Komitəsinin sədri, Milli Məclisin deputatı Səttar Mehbalıyev və digər çıxış edənlər müsabiqənin əhəmiyyətini diqqətə çatdırıblar. Sonra müsabiqənin nəticələri barədə məlumat verilib, qaliblərə diplom və mükafatlar təqdim olunub.xeber100.com