Utancverici statistika…

Ötən ilin buraxılış imtahanlarının utancverici statistikası açıqlandı 2015-ci ildə keçirilmiş buraxılış imtahanlarında 9-cu və 11-ci sinif şagirdləri arasında nəinki tədris proqramını minimum mənimsəməyənlər, hətta oxumağı və yazmağı bacarmayanlar da aşkar olunub. TQDK-nın mətbuat xidmətindən verilən məlumata görə, belələri 11-ci sinif şagirdləri arasında 24 nəfər, 9-cu sinif şagirdləri arasında isə 76 nəfər təşkil edib.  Bu statistika imtahan rəhbərlərinin protokolları əsasında ortaya çıxıb. 11-ci siniflər üzrə oxumağı və yazmağı bacarmayan şagirdlər sırasında Sabirabad rayonundan 6 nəfər, Lənkəran rayonundan 4 nəfər, Hacıqabul rayonundan 3 nəfər, Tovuz rayonundan 2 nəfər, Daşkəsən, Gədəbəy, Qazax, Goranboy, İmişli, Astara, Lerik, Yardımlı və Masallı rayonlarının hərəsindən isə 1 nəfər olub. 9-cu siniflər üzrə isə oxumağı və yazmağı bacarmayan şagirdlərdən 12-si Astara, 9-u Sabirabad, 8-i Lerik rayonundan olub. Gədəbəy, Tovuz, Cəlilabad və Masallı rayonlarının hərəsindən 4 nəfər, Qazax, Goranboy və Bərdə rayonlarının hərəsindən 3 nəfər, Daşkəsən, Şəmkir, Ağstafa, Ağcabədi, Ağdaş, Yardımlı və Hacıqabul rayonlarının hərəsindən 2 nəfər, Qax, Kəlbəcər, Qəbələ, Ordubad, Xızı, Ağdam, Xaçmaz və Cəbrayıl rayonlarının hərəsindən isə 1 nəfərin də oxuyub-yaza bilməiyi aşkarlanıb.    

Növbəti mərhələ aprel ayında baş tutacaq

Məktəb direktorlarının işə qəbulu ilə bağlı elektron ərizələrin qeydiyyatı davam edir. Təhsil Nazirliyi sisteminə daxil olan ümumi təhsil müəssisələrinə direktor vəzifəsinə təyin olunmaq üçün elektron ərizələrin qeydiyyatına martın 18-dən başlanılıb. Martın 28-ə qədər 600 vakant yerə 1700 nəfər elektron ərizə ilə müraciət edib. Ərizələrin qəbulu martın 31-dək davam edəcək. Ərizəsi təsdiq olunmuş namizədlər üçün növbəti mərhələ aprel ayında baş tutacaq. Nazirlikdən verilən məlumata görə, yeni qaydalara əsasən, direktor vəzifəsinin tutulması üzrə müsabiqədə pedaqoji və ya idarəetmə sahəsi üzrə ali təhsili olan, azı 5 il pedaqoji staja malik hər bir şəxs iştirak edə biləcək. Qeyd olunan göstəricilərə malik olan şəxslər müsabiqədə iştirak üçün qeydiyyatda olduğu və ya faktiki yaşadığı rayon (şəhər) məktəblərinin vakant olan direktor vəzifəsini seçə bilərlər. Qeydiyyatdan keçmək istəyən şəxslər bu səhifəyə daxil olmalıdırlar. "Ümumi təhsil müəssisələrində rəhbər vəzifələrə namizədlərin müəyyənləşdirilməsi üzrə təlim kursları”nın əhatə etdiyi rayon və şəhərlərdə direktorların işə qəbulu üzrə müsabiqəyə bu kursları bitirərək "Uğur sertifikatı” əldə etmiş şəxslər müraciət edə bilərlər. "Uğur sertifikatı” olan şəxslər müsabiqənin üçüncü mərhələsindən (imtahan) azad edilərək, birbaşa dördüncü mərhələyə (müsahibə) keçirlər.

Təhsillə bağlı qanunvericilikdə dəyişiklik ediləcək

"Təhsil Nazirliyində 12 illik ümumi təhsilə keçidlə bağlı müzakirələr davam etdirildiyindən və bu sahədə gələcəkdə qanunvericilikdə dəyişikliklərin olduğu halda hərbi xidmətə çağırışla əlaqədar "Hərbi xidmət haqqında” əsasnaməyə yenidən baxıla bilər". Bunu Müdafiə Nazirliyinin Döyüş Hazırlığı və Hərbi Təhsil Baş İdarəsinin rəisi, polkovnik Murad Həmidov "12 illik ümumi təhsilə keçidlə bağlı hərbi xidmətə çağırış yaşı dəyişdirilə bilərmi” sorğusuna cavab olaraq bildirib. Qeyd edək ki, Təhsil Nazirliyində 12 illik ümumi təhsilə keçidin strukturu, məzmunu və bu məsələnin cəmiyyətə çatdırılması yolları barədə müzakirələr aparılır. Eyni zamanda, Təhsil Problemləri İnstitutunun direktoru Qulu Novruzov bildirib ki, Azərbaycanda 12 illik təhsilə keçidlə bağlı qanunvericilikdə dəyişiklik ediləcək

İxtisasların təsnifatında dəyişikliklər

Azərbaycan Nazirlər Kabineti "Ali təhsilin magistratura səviyyəsi üzrə ixtisasların (ixtisaslaşmaların) Təsnifatı"nda dəyişikliklər edib. LiderXeber.az xəbər verir ki, qərarı baş nazir Artur Rasi-zadə imlazalayıb. Dəyişiklik ali təhsilin magistratura səviyyəsi üzrə ixtisasların artırılması ilə bağlıdır. Dəyişikliyə əsasən, təsnifatın "Humanitar və sosial ixtisaslar qrupu"nun Jurnalistika bölməsinə Media və kommunikasiya sistemləri və Televiziya və radio yayımları menecmenti ixtisasları əlavə edilib. "Mədəniyyət və incəsənət ixtisasları qrupu"nun Xoreoqrafiya sənəti bölməsinə isə Rəqs sənəti üzrə müəllim-tədqiqatçı ixtisası artırılıb. Bundan başqa, "Texniki və texnoloji ixtisaslar qrupu"nun Kosmik texnika və texnologiyalar mühəndisliyi bölməsinə Kosmik infokommunikasiya texnologiyaları və Kosmik aparatlar və idarəetmə sistemləri ixtisasları əlavə olunub. "Ali təhsilin bakalavriat səviyyəsi ixtisaslarının (proqramlarının) Təsnifatı"nın təsdiq edilməsi haqqında" qərarda da dəyişikliklər edilib. Qərara əsasən, "110. 050632 İnformasiya texnologiyaları və sistemləri mühəndisliyi" hissəsi ləğv olunub, əvəzində İnformasiya Texnologiyaları, Sistem mühəndisliyi ixtisasları əlavə edilib.

TGDK-dan açıqlama

"Bu il qəbul və buraxılış imtahanlarında hansısa dəyişiklik olmayacaq və imtahanlar mövcud qaydalar əsasında aparılacaq. Həmin qaydalar da yaxın günlərdə həmişəki kimi çap olunaraq kitabça şəkilində təqdim olunacaq". Xezerxeber.com xəbər verir ki, Tələbə Qəbulu üzrə Dövlət Komissiyasının sədri Məleykə Abbaszadə bildirib ki, qəbul imtahanları qaydalarına dəyişiklik gələn ildən etibarən edilə bilər. Hazırda Təhsil Nazirliyi ilə müzakirələr aparılır.

Təhsildə struktur islahatları

  "Ali təhsil müəssisələri muxtariyyətə malik olduğundan orada struktrur islahatlarının aparılması onların öz səlahiyyətlərinə aiddir". Bu barədə APA-nın sorğusuna cavab olaraq Təhsil Nazirliyinin mətbuat xidmətindən bildirilib. O da bildirilib ki, ali təhsil müəssisələrinin dünya təhsil sisteminə inteqrasiyasını və təhsilin  keyfiyyətinin yüksəldilməsini təmin etmək məqsədilə ali təhsil müəssisələrində struktur islahatları daima aparılıb və hazırda da bu istiqamətdə işlər aparılmaqdadır. Qeyd edək ki, Bakı Slavyan Universitetində 7 kafedra, 5 şöbə, 2 elmi-tədqiqat laboratoriya, Azərbaycan Dövlət Neft və Sənaye Universitetində isə bir neçə kafedra birləşdirilib.  

Yeni qanun layihəsi qəbul oluna bilər

Azərbaycanda “Orta ixtisas təhsili” haqqında ayrıca qanun layihəsi qəbul oluna bilər. Milli Məclisin Elm və təhsil komitəsinin sədr müavini Bəxtiyar Əliyev Trend-ə bildirib ki, bu gün iqtisadiyatın bütün sahələrində və sahibkarlığın inkişaf etdirilməsi üçün ixtisaslı fəhlə kadrlarına çox böyük ehtiyac var. Onun sözlərinə görə, müxtəlif dövlət qurumları orta ixtisas təhsili məktəbləri yaradıb və yaxşı olardı ki, özəl müəssisələr, böyük şirkətlər də bu işə qoşulsun. B.Əliyev deyib ki, bu sahədə ayrıca qanunvericilik bazasının olmasına böyük ehtiyac var: “Ona görə də Elm və təhsil komitəsi Təhsil Nazirliyi, digər əlaqədar qurumlarla, o cümlədən özəl şirkətlərlə birlikdə işçi qrupu yaradaraq belə bir qanunun hazırlanmasına böyük zərurət olduğunu hesab edir. Məqsədimiz odur ki, yaz sessiyası müddətində bu işçi qrupu yaradılsın və orta ixtisas təhsili ilə bağlı qanun layihəsi üzərində sürətli iş getsin”.

“The Ranking Web” son siyahısını açıqlayıb

Dünyanın ali təhsil müəssisələrinin ən nüfuzlu reytinqlərindən olan "The Ranking Web" və ya "Webometrics" son siyahısını açıqlayıb. Bu barədə UNEC-dən məlumat verilib. Məlumata görə, Azərbaycan Dövlət İqtisad Universitetində (UNEC) ötən ilin iyul ayında tutduğu 4469-cı pillədən 4137 pilləyə yüksəlib. Webometrics göstəricilərinə əsasən, UNEC ən böyük çəki əmsalına malik olan təsir meyarı üzrə liderliyi qorumaqla bərabər açıqlıq sahəsində iki dəfədən çox irəliləyib, yüksək keyfiyyət meyarı üzrə isə 51 pillə yüksəlib. Bu irəliləyişə əsasən, UNEC Mərkəzi və Şərqi Avropa regionu üzrə 3117 ali təhsil müəssisəsi arasında 340-cı, Avropa qitəsi üzrə 6055 universitet arasında 1244-cü, Avrasiya qitəsi üzrə isə 14994 ali məktəb arasında 2643-cı yerdədir. UNEC bu göstəricilər üzrə Azərbaycan ali təhsil müəssisələri arasında yeganə universitetdir. Qeyd edək ki, "Webometrics" reytinq sistemi internet saytı olan universitetlərin məlumat bazası əsasında onların reytinqini müəyyən edir. 2004-cü ildən başlayaraq Webometrics ildə iki dəfə yanvar və iyul aylarında universitetlərin reytinqini hazırlayır. Bu iki ayın ilk 10 günü məlumatlar əldə edilir və ayın 28-dən tez olmayaraq ayın sonunda reytinq müəyyənləşir. Webometrics reytinq sistemi digər reytinq sistemlərindən kəskin fərqlənir. Burada heç bir universitetdən müraciət qəbul olunmur, qəbul forması da yoxdur, hətta əlaqə saxlamaq üçün e-mail ünvanı bele göstərilməyib. Sistem sırf internet üzərinden xüsusi indikatorlarla veb sistemdə olan universitetlərin məlumatlarını analiz edərək onlara reytinq verir.

Multikulturalizm Azərbaycanda həyat tərzi kimi

Fevralın 8-də Bakı Beynəlxalq Multikulturalizm Mərkəzi, Azərbaycan Respublikasının Prezidenti yanında Bilik Fondu və Bakı Slavyan Universitetinin birgə təşkilatçılığı ilə “Multikulturalizm Azərbaycanda həyat tərzi kimi: öyrən, araşdır, paylaş-2016” adlı Beynəlxalq Multikulturalizm qış məktəbi fəaliyyətə başlayıb. Bakı Beynəlxalq Multikulturalizm Mərkəzinin mətbuat xidmətindən verilən məlumata görə, qış məktəbi ötən ilin yayında keçirilən Beynəlxalq Multikulturalizm yay məktəbinin müsbət nəticələrinə və nailiyyətlərinə əsaslanaraq təşkil edilib. Məktəbin təşkilində əsas məqsəd Azərbaycana marağı sevgiyə çevirmək və bu sevgini ömür boyu ürəklərdə yaşatmaqdır. Xarici ölkə universitetlərindəki tələbələrin, mütəxəssislərin “Azərbaycan multikulturalizmi” fənni ilə tanış olduqdan sonra Azərbaycana gəlmələri, fənn vasitəsilə öyrəndiklərini əyani şəkildə öz gözləri ilə görmələri, həmyaşıdları ilə ünsiyyət qurmaları, bu ünsiyyəti sonralar davam etdirmələri çox vacibdir. 2015-ci ilin yaz və payız semestrlərində “Azərbaycan multikulturalizmi” və “Multikulturalizmə giriş” fənlərinin tədris olunduğu xarici və yerli universitetlərdə təhsil alan tələbələrin, nüfuzlu elm adamlarının qatıldığı Beynəlxalq Multikulturalizm qış məktəbi fevralın 15-dək Bakıda, Qubada, Xaçmazda və Qusarda işini davam etdirəcək.   Məktəbə Rusiya, İsveçrə, Ukrayna, Türkiyə, İtaliya, Portuqaliya, Polşa, Çexiya, Gürcüstan, Belarus, Bolqarıstan, Litva, İndoneziya, Yaponiya və Almaniyanın ali təhsil ocaqlarından 43 nəfər, Azərbaycanın yerli universitetlərindən 12 nəfər olmaqla, ümumilikdə 55 nəfər tələbə, eləcə də yerli və xarici mütəxəssislər qatılıb.      

AZİİ-İTClub təsis edilib

Azərbaycan Dövlət Neft və Sənaye Universiteti informasiya texnologiyaları profilli ixtisaslar üzrə təhsil alan tələbələrin biliklərinin beynlxalq tələblərə uyğunlaşdırılması, bu sahədə resursların əhatə dairəsinin genişləndirilməsi məqsədilə bir sıra yeniliklərin həyata keçirilməsinə başlayıb. 2015-2016 tədris ilinin əvvəlindən bu istiqamətdə fəaliyyətə başlayan universitet AİSTGroup şirkətinin dəstəyi ilə ötən ilin son günlərində prosesin ilkin mərhələsi olaraq Oracle Academy, Cisco Academy və Microsoft Academy kimi qeydiyyat prosesini tamamlayıb. Trend-in məlumatına görə, eyni zamanda, mühəndislik sahəsində təhsil alan tələbələrin rəsmi lisenziyaya malik proqram təminatlarından faydalanması məqsədilə universitet tərəfindən Autodesk Academic Resource Center qeydiyyatdan keçirilib və nəticədə resurslardan rəsmi istifadə imkanı təmin edilib. Əlavə olaraq universitet tərəfindən akademiyalar çərçivəsində nəzərdə tutulmayan istiqamətlər üzrə imkanları genişləndirmək, bu sahə üzrə fəallığın artırılması, tələbələr arasında informasiya mübadiləsinin aparılması məqsədilə AZİİ-İTClub təsis edilib.