Dövlət İmtahan Mərkəzi tərəfindən müsabiqə üzrə müsahibə davam edir

Ümumilikdə 46 dövlət orqanında 379 vakant vəzifənin (B növü üzrə) tutulması üçün Dövlət İmtahan Mərkəzi (DİM) tərəfindən avqustun 5-də elan olunmuş müsabiqə üzrə müsahibə davam edir.Azərtac DİM-in noyabrın 3-ü saat 14:20-yə olan göstəricilərinə əsasən xəbər verir ki, müsahibədə 116 nəfər uğur qazanıb. Onlardan 65-i Təhsil Nazirliyində, 16-sı Maliyyə Nazirliyində, 9-u Bakı şəhəri Yasamal Rayon Məhkəməsində, 7-si Dini Qurumlarla İş üzrə Dövlət Komitəsində, 7-si Milli Arxiv İdarəsində, 3-ü Əqli Mülkiyyət Agentliyində, yerdə qalanlar isə digər dövlət orqanlarında müxtəlif vəzifələrə uyğun bilinib.Qeyd edək ki, müsahibədə iştirak üçün 5304 nəfər sənəd verib. Müsahibə 2021-ci il yanvarın 29-da başa çatacaq.xeber100.com

Dövlət İmtahan Mərkəzində işçi qruplarının iclasları keçirilib

Dövlət İmtahan Mərkəzində (DİM) biologiya və tarix fənləri üzrə işçi qruplarının iclasları keçirilib.DİM-dən Azərtac-a bildirilib ki, iclaslarda hər iki fənn üzrə ali təhsil müəssisələrinə qəbul imtahanının proqramı müzakirə olunub. Müzakirələrdən öncə qüvvədə olan 6-11-ci sinif dərslikləri əvvəlki illərin nəşrləri ilə müqayisə edilərək fərqlər müəyyən olunub. Qəbul proqramlarında bununla bağlı müvafiq təkmilləşdirmələr aparılıb.Müzakirələr oktyabrın 29-dək davam etdiriləcək.xeber100.com

Bakı Dövlət Universitetinin Dağlıq Qarabağ münaqişəsi ilə bağlı müraciəti

Bakı Dövlət Universitetinin (BDU) rektoru Elçin Babayev bu ali təhsil müəssisəsinin əməkdaşlıq etdiyi xarici ölkə universitetlərinin rektorlarına Ermənistan-Azərbaycan Dağlıq Qarabağ münaqişəsi ilə bağlı məktub ünvanlayıb.Bu barədə Azərtac-a BDU-dan məlumat verilib. Bildirilib ki, məktubun məqsədi dünya universitetlərinin diqqətini Azərbaycanda gedən Vətən müharibəsinə yönəltməkdir. Məktubda deyilir:“Tarixboyu Azərbaycan torpaqlarına göz dikən mənfur qonşularımızın doğma yurdumuza təcavüzündən artıq 30 il ötür. Azərbaycanın Dağlıq Qarabağ bölgəsi və ətrafındakı yeddi rayonun Ermənistan tərəfindən işğalı nəticəsində bir milyondan çox azərbaycanlı öz doğma torpaqlarından didərgin düşüb. Ermənistan qoşunlarının Dağlıq Qarabağ və ətraf rayonları qeyd-şərtsiz tərk etməsi barədə BMT Təhlükəsizlik Şurasının qəbul etdiyi 822, 853, 874 və 884 nömrəli qətnamələri icra edilməyib.Sentyabrın 27-dən etibarən Ermənistan ölkəmizə növbəti hərbi təcavüz törətdiyi üçün Azərbaycan Ordusu əks-hücum əməliyyatına başlayıb. Əməliyyatlar Azərbaycan Respublikasının beynəlxalq aləmdə tanınan və Azərbaycan ərazisi olan torpaqlarda aparılır. Ermənistan ordusu 1949-cu il Cenevrə Konvensiyasına zidd olaraq, münaqişə zonasından uzaqda yerləşən və Azərbaycanın ikinci ən böyük şəhəri olan Gəncə şəhərini, Qafqazın ən böyük su-elektrik stansiyası olan Mingəçevir su anbarını və digər əraziləri atəşə tutur. Bütün bunlar Ermənistanın regionun təhlükəsizliyinə böyük təhdid olduğunun daha bir nümunəsidir. Hücum zamanı hərbi qulluqçularla yanaşı, uşaqların, qadın və qocaların hədəf alınması erməni vəhşiliyinin bariz sübutudur.Azərbaycan bu müqəddəs savaşda öz torpaqlarının və əhalisinin müdafiəsinə qalxıb. Rəşadətli Azərbaycan Ordusu düşmən tapdağından azad etdiyi ərazilər ilə öz qüdrətini bütün dünyaya sübut edir.Münaqişənin təfərrüatları ilə bağlı daha dolğun faktlara söykənən məlumat məktuba əlavə edilib.Sizi baş verən hadisələr ilə bağlı rəsmi mənbələrdən məlumat almağa və xalqınızı Azərbaycan xalqının şərəfli mübarizəsi ilə tanış etməyə səsləyirəm”.xeber100.com

Bakı Şəhəri üzrə Təhsil İdarəsinin təşəbbüsü ilə…

Bakı Şəhəri üzrə Təhsil İdarəsinin (BŞTİ) təşəbbüsü ilə ümumi təhsil müəssisələrinin direktoru vəzifəsinə işə qəbul olmaq istəyən şəxslər üçün təlimlərə başlanılıb.Bu barədə Azərtac-a Təhsil İdarəsindən məlumat verilib. Bildirilib ki, mövcud karantin rejimi qaydalarına uyğun olaraq 9 təlimçi tərəfindən ayrı-ayrı qruplar üzrə keçirilən təlimlərdə 5 il pedaqoji stajı olan, hazırda ümumi təhsil müəssisələrində direktor müavini və ya müəllim vəzifəsində çalışan şəxslər iştirak edir.İdarəetmə bacarıqları, əmək və təhsil qanunvericiliyi ilə bağlı qısamüddətli təlimlər direktor vəzifəsinə işə qəbul üzrə müsabiqədən uğurla keçərək hazırda çalışan məktəb direktorları tərəfindən aparılır.Təlimlərdə təhsil müəssisələrinin idarəetməsi üzrə fəal və səriştəli kadrlar öz təcrübələrini bölüşür, tədrisin və idarəçiliyin təşkilində həm pedaqoq, həm də rəhbər kimi müvafiq düşüncələrini təlim iştirakçılarına çatdırır. Həmçinin təlimlərdə məktəbin əsas hədəfləri və özünəməxsusluğu haqqında pedaqoji və ictimai-fəlsəfi baxımdan idarəedənin yanaşması haqqında müvafiq məlumatlar verilir.Qeyd edək ki, ictimai əsaslarla (ödənişsiz) keçirilən təlimlərin əsas məqsədi direktor vəzifəsinə işə qəbul üzrə müsabiqənin nəticələrinin daha da yaxşılaşdırılması, namizədlərin sözügedən müsabiqənin test imtahanı və müsahibə mərhələlərinə hazırlıq səviyyəsinin yüksəldilməsindən ibarətdir.xeber100.com

“Qarabağ Azərbaycandır” layihəsinin icrasına başlanılır

Bakı Xoreoqrafiya Akademiyasının professor-müəllim və tələbə heyətinin iştirakı ilə “Qarabağ Azərbaycandır” layihəsinin icrasına başlanılır.Akademiyadan Azərtac-a bildirilib ki, layihə çərçivəsində vətənpərvərlik mövzusunda xoreoqrafik kompozisiyalar vasitəsilə videoçarxların hazırlanması, fləşmob və onlayn videoseminarların keçirilməsi nəzərdə tutulub. Arıtq Bakı Xoreoqrafiya Akademiyasının Milli rəqs kafedrasının dosenti, Xalq artisti Yusif Qasımovun quruluşu ilə hazırlanan xoreoqrafik kompozisiyanın məşqlərinə başlanılıb. Qısa vaxtda milli vətənpərvərlik ruhunda hazırlanan bu rəqs kompozisiyasının videoçəkilişləri aparıldıqdan sonra kütləvi informasiya vasitələri və sosial şəbəkələr vasitəsilə geniş ictimaiyyətə təqdim olunacaq.xeber100.com

Azərbaycan Texniki Universiteti bəyanat yayıb

Azərbaycan Texniki Universiteti (AzTU) Ermənistanın hərbi təxribatına qarşı bəyanat yayıb.Bu barədə Azərtac-a AzTU-dan məlumat verilib.Bəyanatda deyilir: “Sentyabrın 27-də saat 06:00 radələrindən başlayaraq Ermənistan silahlı qüvvələri genişmiqyaslı təxribat törədərək cəbhəboyu zonada yerləşən Azərbaycan Ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif çaplı artilleriya qurğularından intensiv atəşə tutmaqda davam edir.Nəticədə mülki əhali arasında həlak olan və yaralananlar var.Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında qoşunlarımızın bütün cəbhəboyu əks-hücum əməliyyatı başlaması barədə qərar verilib.Beynəlxalq hüququn norma və prinsiplərini kobud şəkildə pozan işğalçı Ermənistanın təxribatlarını sərt şəkildə pisləyirik.Torpaqlarımızın işğaldan azad olunması uğrunda gedən haqq mübarizəsində Azərbaycan dövlətinin, Silahlı Qüvvələrin Ali Baş Komandanının və Ordumuzun yanında olduğumuzu bəyan edirik. Hazırda cəbhədə gedən döyüşlərdə ordumuzun zəfərindən qürur duyuruq, əsgərlərimizlə fəxr edirik.Bildirmək istəyirik ki, şəhid və Milli Qəhrəman məzunlarının sayına görə öndə olan AzTU Prezident İlham Əliyevin siyasətini dəstəkləyir. Hər bir məzunumuz Silahlı Qüvvələrin Ali Baş Komandanının bu sözlərini əsas götürərək istənilən an döyüşə hazırdır: “Biz haqq yolundayıq. Bizim işimiz haqq işidir. Biz zəfər çalacağıq! Qarabağ bizimdir, Qarabağ Azərbaycandır!”xeber100.com

İqtisad Universitetində yeni kafedra və laboratoriyalar yaradılacaq

Azərbaycan Dövlət İqtisad Universitetində (UNEC) yeni kafedra və laboratoriyalar yaradılacaq.Bu barədə Elmi şuranın növbəti iclasında qərar verilib.UNEC-dən Azərtac-a bildirilib ki, Mühəndislik fakültəsi nəzdində Mühəndislik və tətbiqi elmlər kafedrası yaradılacaq. Sənaye, material, maşın, ekologiya, elektrik və elektronika, qida mühəndisliyi ixtisasları kafedranın nəzdinə daxil ediləcək. Rəqəmsal iqtisadiyyat fakültəsinin nəzdində isə Rəqəmsal texnologiyalar və tətbiqi informatika kafedrası yaradılacaq. İnformasiya texnologiyaları, kompüter elmləri, informasiya təhlükəsizliyi, kommunikasiya sistemləri mühəndisliyi ixtisasları həmin kafedranın nəzdində olacaq. Mühəndislik və rəqəmsal iqtisadiyyat fakültələrinin nəzdində laboratoriyaların işinin təşkili mərkəzləri açılacaq.UNEC-də qida kimyası və biokimya, qida texnologiyaları, qida mikrobiologiyası, ekologiya, elektrotexnika, materialşünaslıq və s. laboratoriyalarla yanaşı, 2 kompüter laboratoriyası fəaliyyət göstərəcək. Dizayn kafedrasının bazasında isə UNEC Dizayn Məktəbi yaradılacaq.xeber100.com

Azərbaycan Dövlət İqtisad Universitetinə sənəd qəbulu davam edir

Təhsil Nazirliyi və Azərbaycan Dövlət İqtisad Universiteti (UNEC) tərəfindən 2020/2021-ci tədris ilində elan olunan müvafiq ixtisaslar üzrə ödənişli əsaslarla təkrar ali təhsil almaq üçün sənəd qəbulu davam edir.UNEC-dən Azərtac-a bildirilib ki, oktyabrın 15-dək davam edəcək sənəd qəbulu iqtisadiyyat, maliyyə, mühasibat uçotu və audit, statistika, menecment, dövlət və bələdiyyə idarəetməsi, informasiya texnologiyaları, biznesin idarə edilməsi, sənayenin təşkili və idarə olunması, marketinq, ekologiya, kommersiya, istehlak mallarının ekspertizası və marketinqi, qida məhsulları, dizayn, çoxişlənən malların texnologiyası, texnoloji maşın və avadanlıqlar, metrologiya, standartlaşdırma və sertifikasiya mühəndisliyi ixtisasları üzrə aparılır.Təkrar ali təhsilə sənəd qəbulu elektron qaydada kabinet.unec.edu.az internet linki vasitəsilə həyata keçirilir. Müvafiq ixtisaslara qəbul olmaq istəyənlər tələb olunan sənədləri elektron qaydada təqdim edir və tələblərə cavab verdikləri halda təkrar ali təhsil almaq hüququ qazanırlar. Təkrar ali təhsil almaq hüququ qazanacaq şəxslər üçün vəziyyət nəzərə alınmaqla tədrisin distant formada təşkili istisna edilmir.Qeyd edək ki, 1993-cü ildən sonra xarici ölkələrdə ali təhsil almış şəxslər yalnız diplomları mövcud qaydada Təhsil Nazirliyi tərəfindən tanındıqdan sonra universitetdə təkrar ali təhsil ala bilərlər.xeber100.com

Bakı Şəhəri üzrə Təhsil İdarəsinin məlumatı əsasında…

Yeni dərs ilinə hazırlıq tədbirləri çərçivəsində paytaxtda bir sıra məktəb binaları, tədris korpusları inşa olunub, əsaslı və cari təmir işləri aparılıb.Bu barədə Azərtac-a Bakı Şəhəri üzrə Təhsil İdarəsindən (BŞTİ) məlumat verilib. Bildirilib ki, BŞTİ-nin tabeliyindəki 8 ümumi təhsil müəssisəsində tikinti və əsaslı təmir işləri aparılıb. Həmçinin ehtiyac olan ərazilərdə 6 yeni məktəb binası inşa olunub. Yeni dərs ilinə hazırlıq çərçivəsində 205 nömrəli tam orta məktəbin bütövlükdə sökülərək yenidən tikintisi, 90 və 97 nömrəli tam orta məktəblərin əsas korpuslarının əsaslı təmiri, köhnə korpuslarının sökülərək yenidən tikintisi, 122 nömrəli tam orta məktəbin əsaslı təmiri, idman zalı, kitabxana və əlavə sinif otaqlarının tikintisi, 155 nömrəli tam orta məktəbin köhnə korpusunun sökülərək yenidən tikintisi aparılıb.Həmçinin 154 nömrəli tam orta məktəbin bütövlükdə sökülərək yenidən tikintisi, 251 nömrəli tam orta məktəb üçün əlavə korpusun tikintisi, 216 nömrəli tam orta məktəb üçün digər ərazidə yeni binanın tikintisi yerinə yetirilib. Eləcə də ehtiyac olan bütün təhsil müəssisələrində cari təmir və mühəndis-kommunikasiya işləri həyata keçirilib. Bundan əlavə, yeni dərs ili ilə əlaqədar ümumi təhsil müəssisələrində sanitar-epidemioloji vəziyyətə nəzarət gücləndirilib. Mövcud vəziyyətlə əlaqədar məktəblərdə dezinfeksiya işləri və müvafiq qabaqlayıcı tədbirlər həyata keçirilir.xeber100.com

Bakı Dövlət Universitetinin məlumatı əsasında…

Bakı Dövlət Universitetində (BDU) Müqayisəli Hüquq Araşdırmaları Mərkəzi yaradılacaq.BDU-dan Azərtac-a bildiriblər ki, Mərkəzin yaradılması Bakı Dövlət Universitetinin Almaniyanın Martin Lüter adına Halle-Vittenberq Universiteti ilə ikili diplom proqramları sistemində mövcud əlaqələrinin genişləndirilməsi məqsədini daşıyır. Birgə fəaliyyətin innovativliyini nəzərdə tutan Mərkəz BDU ilə Almaniyanın nüfuzlu hüquq məktəbləri arasında əlaqələrinin və ikili diplom proqramlarının miqyasını genişləndirəcək, birgə doktorant, magistr hazırlığını daha da gücləndirərək, elmi mübadiləni inkişaf etdirəcək. Həmçinin Mərkəzdə magistr və doktorantların tədqiqat imkanlarının genişləndirilməsi, tədqiqat fəaliyyətlərinin təkmilləşdirilməsi kimi məsələlərin reallaşdırılması nəzərdə tutulur.Müqayisəli Hüquq Araşdırmaları Mərkəzinin yaradılması ilə bağlı təklifi Almaniyanın Martin Lüter adına Halle-Vittenberq Universiteti verib. Mərkəzin müvafiq kitab və avadanlıqlarla təchizi və digər texniki təminatı Halle-Vittenberq Universiteti tərəfindən həyata keçiriləcək.xeber100.com