Təhsil Nazirliyinin məlumatına əsasən…

Hökumətlərarası Təqaüd proqramları çərçivəsində 2018-2019-cu tədris ili üçün Rumıniya təhsil təqaüd proqramının nəticələri açıqlanıb.Təhsil Nazirliyindən Azərtac-a bildiriblər ki, bu qurum ilə Rumıniyanın Gənclər, Tədqiqat və Təhsil Nazirliyi arasında uğurlu əməkdaşlığın nəticəsi olaraq dörd Azərbaycan vətəndaşı 2018-2019-cu tədris ili üzrə Rumıniyanın universitetlərində təhsil almaq imkanı qazanıb.Seçim barədə Rumıniya tərəfindən verilən yekun qərar nəticəsində dörd nəfər “University of Bucharest”, “Babeș-Bolyai University”, “Universitatea „Alexandru Ioan Cuza din Iași” və “Oil & Gas University of Ploiești” ali təhsil müəssisələrində mühəndislik, biologiya və biznes ixtisasları üzrə magistratura (üç nəfər) və doktorantura (bir nəfər) səviyyələri üzrə təhsil almaq hüququ əldə edib.Qeyd edək ki, müvafiq təqaüd proqramı barədə elan fevralın 1-də verilib.xeber100.com

Təhsil Nazirliyinin məlumatına görə…

Avqustun 13-də müəllimlərin işə qəbulu üzrə müsabiqənin yekun - müsahibə mərhələsinə başlanılıb.Təhsil Nazirliyindən Azərtac-a bildiriblər ki, avqustun 18-dək davam edəcək bu mərhələdə Azərbaycan dili və ədəbiyyatı, Azərbaycan dili, ibtidai sinif, fiziki tərbiyə, informatika, kimya, fizika, texnologiya, alman dili, fransız dili, rus dili və ədəbiyyatı, rus dili, biologiya, riyaziyyat, coğrafiya, ingilis dili, tarix, musiqi və təsviri incəsənət fənləri üzrə keçiriləcək müsahibələrdə 4 min 337 namizədin iştirakı nəzərdə tutulub.Müsahibə zamanı namizədlərin ixtisası üzrə bilik və bacarıqları, psixoloji durumları və ümumi dünyagörüşləri yoxlanılacaq. Eyni zamanda, namizədlər ixtisasları üzrə əvvəlcədən elan olunmuş mövzulardan birini açıq dərs formatında müsahibə komissiyası üzvlərinə təqdim etməlidirlər. Həmin mövzu proqram təminatı tərəfindən təsadüfi seçim əsasında müəyyən ediləcək.Müəllimlərin işə qəbul müsabiqəsində namizədlərin topladığı bal iki təqvim ili qüvvədədir və onlar növbəti tədris ili üçün keçirilən müsabiqə zamanı birbaşa vakansiya seçimi mərhələsində iştirak edə bilərlər.xeber100.com

Dövlət İmtahan Mərkəzinin məlumatı əsasında…

İxtisas seçimi avqustun 13-dək internet vasitəsilə aparılır.Dövlət İmtahan Mərkəzindən Azərtac-a bildiriblər ki, avqustun 8-i saat 10.30-a olan məlumata görə, 32 min 184 abituriyent qəbul olmaq istədiyi ixtisasları öz elektron ərizəsinə daxil edərək təsdiqləyib. 4 min 23 abituriyent isə ixtisasları qeyd etməsinə baxmayaraq, ərizəsini təsdiq etməyib.Abituriyentlər müsabiqədə iştirak etmək üçün göstərilən vaxta qədər öz ixtisas seçimi ərizəsini təsdiqləməlidirlər. Əks təqdirdə onlar müsabiqədə iştirak edə bilməyəcəklər.xeber100.com

Təhsil naziri vətəndaşları qəbul edəcək

Təhsil naziri Ceyhun Bayramov avqustun 13-də saat 10.00-da Qazax şəhərindəki Ədəbiyyat Muzeyində mərkəzi icra hakimiyyəti orqanları rəhbərlərinin 2018-ci ilin avqust ayında şəhər və rayonlarda vətəndaşların qəbulu cədvəlinə uyğun olaraq, Qazax, Ağstafa, Tovuz, Şəmkir, Gədəbəy rayonlarının sakinlərini qəbul edəcək.Təhsil Nazirliyindən Azərtac-a bildiriblər ki, qəbulda həmin rayonlarda müvəqqəti məskunlaşmış məcburi köçkünlər də iştirak edə bilərlər.Qəbula gəlmək istəyən vətəndaşlar avqustun 6-dan 9-dək bu qurumun Telefon Məlumat Mərkəzinin 146 nömrəli telefonuna (“Qaynar xətt” xidməti) zəng etməklə və ya nazirliyin rəsmi saytının “Vətəndaşların qəbulu” bölməsinə daxil olmaqla  elektron qeydiyyatdan keçə bilərlər.Qeydiyyatdan keçmiş vətəndaşlardan qəbula gələrkən aidiyyəti məsələləri dolğun ifadə edən ərizə ilə müraciət etmələri xahiş olunur.xeber100.com

Vətəndaşlara göstərilən xidmətlərlə bağlı statistika açıqlanıb

Bakı Şəhəri üzrə Təhsil İdarəsinin (BŞTİ) Telefon Məlumat Mərkəzinə daxil olan zənglərlə və Vətəndaşların Qəbulu Mərkəzində iyul ayında vətəndaşlara göstərilən xidmətlərlə bağlı statistika açıqlanıb.BŞTİ-dən Azərtac-a bildiriblər ki, həmin müddətdə hər iki mərkəzə daxil olan 7 min 91 müraciətin əksəriyyəti dərhal cavablandırılıb və operativ şəkildə həll edilib.Telefon Məlumat Mərkəzində 2 min 771 zəng qəbul edilib. Vətəndaşların Qəbulu Mərkəzinə isə bu dövrdə 1 754 vətəndaş müraciəti daxil olub. 197 vətəndaş sorğularına uyğun olaraq elektron qaydada BŞTİ-nin müvafiq məsul şəxslərinin qəbuluna yazılıb.Vətəndaşların Qəbulu Mərkəzində 1 907 sənəd (vətəndaşlar tərəfindən 627 ərizə, Təhsil Nazirliyindən 209, digər qurumlardan 165, məktəblərdən 246 məktub, 36 strukturdaxili yazışma və 624 kadr ərizəsi) qəbul olunub və qeydiyyata alınıb. Həmçinin 462 elektron müraciətə baxılıb.Daxil olan müraciətlər daha çox müxtəlif məsələlərin tənzimlənmə qaydalarının öyrənilməsi, birinci sinfə uşaqların qəbulu, təhsilin keyfiyyətinin yüksəldilməsi, məktəblərdə sağlam və yaradıcı mühitin təmin olunması, informasiya təminatı, işə qəbul və digər məsələləri əhatə edib.xeber100.com

Abituriyent və valideynlər “açıq qapı” günlərinə dəvət edilir

Azərbaycan Universiteti abituriyent və valideynləri avqustun 13-ü saat 10.00-dan 16.00-dək “açıq qapı” günlərinə dəvət edir.Universitetdən Azərtac-a bildiriblər ki, “açıq qapı” günlərində iştirak etmək üçün əvvəlcədən qeydiyyatdan keçmək tələb olunmur. Abituriyent və valideynlər Azərbaycan Universitetinin Bakı şəhəri, Nəsimi rayonu, Ceyhun Hacıbəyli 71 ünvanında yerləşən tədris binasında fəaliyyət göstərən “Abituriyent məsləhət mərkəzi”nə şəxsiyyət vəsiqələrini təqdim etməklə məlumat sessiyasında və infoturda iştirak edə bilərlər.Qeyd edək ki, Azərbaycan Universitetində abituriyentlərə kömək məqsədilə Dövlət İmtahan Mərkəzinin “Abituriyent məsləhət mərkəzi” fəaliyyət göstərir. Mərkəzini xüsusi təlim keçmiş əməkdaşları müraciət edənlərə ixtisas seçimi zamanı diqqət yetirilməli olan vacib məsələlər haqqında məsləhət xidməti və texniki dəstək göstərirlər. Mərkəz həftənin beş günü (şənbə və bazar günləri istisna olmaqla) saat 10.00-dan 17.00-dək ödənişsiz əsaslarla fəaliyyət göstərir.xeber100.com

Bakı Şəhəri üzrə Təhsil İdarəsinin məlumatı əsasında…

Paytaxt məktəbliləri üçün təşkil olunan yay məktəbinin ikinci mərhələsinə start verilib.Bakı Şəhəri üzrə Təhsil İdarəsindən Azərtac-a bildiriblər ki, yay məktəbi şagirdlərin yay tətili günlərinin səmərəli, maraqlı və əyləncəli təşkil edilməsi məqsədi daşıyır. Ödənişsiz qaydada VII-VIII sinif şagirdləri üçün nəzərdə tutulan yay məktəbi Bakı şəhəri üzrə “Məktəblinin dostu” layihəsinin tətbiq olunduğu 12 məktəbi əhatə edir.Yay məktəbində minə yaxın şagird üçün təlim, seminar və informativ sessiyalar keçirilir, müxtəlif idman yarışları, əyləncəli saatlar təşkil olunur.Qeyd edək ki, “Məktəblinin dostu” pilot layihəsi Təhsil Nazirliyi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə tərəfdaşlığı ilə Bakı şəhərindəki 32 ümumtəhsil müəssisəsini əhatə edir. Layihənin əsas məqsədi məktəblərdə səmərəli mühitin formalaşması işinə töhfə vermək, tədris ocaqlarında tam təhlükəsiz mühit yaratmaq, fövqəladə hal baş verdikdə ilk tibbi və psixoloji yardım göstərmək, mütəmadi olaraq şagird, valideyn, təlim-tərbiyə müəssisələrinin kollektivi ilə maarifləndirmə, diaqnostik işlər aparmaqdır.xeber100.com

Dövlət İmtahan Mərkəzinin məlumatına görə…

Üçüncü ixtisas qrupu üzrə imtahan verən və jurnalistika ixtisasına qəbul olmaq istəyən abituriyentlər avqustun 1‑dək qeydiyyatdan keçməlidirlər.Dövlət İmtahan Mərkəzindən Azərtac-a bildiriblər ki, qeydiyyatdan keçən abituriyentlər test imtahanının nəticələrinə əsasən müvafiq müsabiqə şərtlərini (ümumi balı 200-dən, hər hansı bir imtahan fənni istisna olmaqla qalan dörd imtahan fənninin hər biri üzrə ayrılıqda topladığı nisbi balı 10-dan az olmayan, dövlət sifarişi əsasında ayrılan yerlər üzrə ümumi balı 300-dən və hər bir imtahan fənni üzrə ayrılıqda topladığı nisbi balı 10-dan az olmayan) ödədikləri halda, təqdim olunan mövzu üzrə yazı işi (inşa) yerinə yetirirlər.Ali təhsil müəssisələrinə tələbə qəbulu ilə bağlı imtahanda iştirak üçün ilk dəfə müraciət edən və xüsusi qabiliyyət tələb edən ixtisaslar üzrə qeydiyyatdan keçməyən Azərbaycan Respublikası vətəndaşlarının cari ildə jurnalistika ixtisası üzrə yazı işində iştirakı dövlət büdcəsinin vəsaiti hesabına olacaq. Digər abituriyentlər qeydiyyatdan keçərkən tələb olunan məbləği şəxsi kabinetindəki hesabına əlavə etməlidirlər.Jurnalistika ixtisasına qəbul olmaq istəyən abituriyentlərin qabiliyyət imtahanı avqustun 6-da keçiriləcək. Bu mərhələdən uğurla keçən abituriyentlər ixtisas seçimi zamanı digər ixtisaslarla yanaşı, jurnalistika ixtisasını da seçə bilərlər.xeber100.com

Abituriyentlər üçün ixtisas seçimi elan edilib

Dövlət İmtahan Mərkəzi (DİM) Azərbaycan Respublikasının ali təhsil müəssisələrinə bütün qruplar üzrə müsabiqə şərtini ödəmiş abituriyentlər üçün ixtisas seçimi elan edir.DİM-dən Azərtac-a bildirilib ki, ixtisas seçimi iyulun 30-dan avqustun 13-dək internet vasitəsilə aparılır. Abituriyentlər qəbul olmaq istədikləri ixtisasları “Abituriyent” jurnalının 4-cü nömrəsindən seçib onların kodlarını DİM-in saytının müvafiq səhifəsində “Abituriyentin elektron ixtisas seçimi ərizəsi”nə daxil edib təsdiqləməlidirlər. Abituriyentlər ali təhsil müəssisələrinin imtahan verdiyi ixtisas qrupuna aid olan 15-dək ixtisas kodunu qeyd edə bilərlər. I, II, III, IV ixtisas qruplarından hər hansı biri və V ixtisas qrupu üzrə DİM-in müəyyən etdiyi tələbləri ödəyən abituriyentlər hər iki qrupun ixtisaslarını seçə bilərlər. Həmçinin I-IV ixtisas qruplarından iki müxtəlif ixtisas qrupu üzrə imtahan verən abituriyent müvafiq müsabiqə şərtlərini ödədiyi halda, hər iki ixtisas qrupu üzrə müsabiqədə iştirak edə bilər. Eyni ixtisas qrupu (I-IV qruplardan biri) üzrə iki dəfə imtahan verən abituriyentlər isə müsabiqədə hansı imtahanın nəticəsi ilə iştirak edəcəyini seçməlidirlər.xeber100.com    

“Azərbaycan üçün öyrət” təhsil proqramı çərçivəsində

“Azərbaycan üçün öyrət” təhsil proqramı çərçivəsində həyata keçirilən “Təhsil avtobusu–2018” yay məktəbi başa çatıb.Təhsil Nazirliyindən Azərtac-a bildiriblər ki, iyulun 17-dən başlanan layihə çərçivəsində Bakı-Quba-Masallı-Şəmkir-Şəki-Qəbələ-Bakı marşrutu üzrə səyahət edilib və yay məktəbində 5 bölgənin 18 kənd, 17 şəhər məktəbindən dərs göstəricisi orta və zəif olan ümumilikdə 140-a yaxın şagird iştirak edib. Bu məktəblər sırasında ucqar kəndlərdə tikilən modul tipli məktəblər də olub.Yay məktəbi müddətində şagirdlər “Mənim uğurlu karyeram”, “Kommunikasiya”, “Robotlarla iş”, “Sığorta” adlı təlimlərdə iştirak ediblər və “Nə? Harada? Nə zaman?” intellektual oyunu, “Code Tusi” komanda oyununa qatılıblar. Həmçinin hər bir bölgədə şagirdlər üçün “Ekspo 2025 Bakı” layihəsinin təqdimatı keçirilib.“Azərbaycan Respublikasında təhsilin inkişafı üzrə Dövlət Strategiyası”na uyğun reallaşdırılan layihə keyfiyyətli təhsil üçün bərabər imkanların yaradılmasına xidmət edən təhsil proqramıdır.Qeyd edək ki, 2016 və 2017-ci ildə keçirilən “Təhsil avtobusu” yay məktəbləri çərçivəsində 16 gün ərzində 4 min kilometr yol qət edilib. Yay məktəbinə Bakı və 10 rayonun (Lənkəran, Quba, Gəncə, Şəki, Masallı, Cəlilabad, Sabirabad, Mingəçevir, İsmayıllı, Zaqatala) 12 şəhər və 13 kənd-qəsəbə məktəbi, 22 ali və orta ixtisas təhsili müəssisəsinin 400-dən çox şagird və tələbəsi cəlb olunub. Təlimçi və ekspertlər tərəfindən 150 akademik saatdan çox həcmdə təhsil proqramları və komanda-öyrədici oyunları keçirilib.Yay məktəbi Təhsil Nazirliyinin təşkilatçılığı, “Engin” LTD MMC, “Kapital Bank”, “Ekspo 2025 Bakı” layihəsinin əsas dəstəyi, “Bakcell”, “GoldenPay”, “Microsoft Azərbaycan” və “PAŞA Sığorta” şirkətlərinin dəstəyi, “1news.az”, “Azərbaycan İntellektual Klublar Assosiasiyası”, “ARB TV”, “ASAN xidmət”, “Bir” Tələbə-Könüllü proqramı, “Code Tusi”, “Edumap” Təhsil portal, “Edutainment.az”, “Engineering For Kids”, “SABAH” qrupları, “Şərq-Qərb” ASC, “Təhsil TV və “Youth Inc.” Sahibkarlıq Proqramının tərəfdaşlığı ilə reallaşdırılır.Layihənin rəsmi informasiya dəstəkçiləri “1news.az”, “ARB TV” və “Təhsil TV”-dir.xeber100.com