“Bakı Marafonu 2018”in təqdimatı olub

Azərbaycan Dövlət Pedaqoji Universitetində (ADPU) mayın 13-də keçiriləcək “Bakı Marafonu 2018”in təqdimatı olub.ADPU-dan Azərtac-a bildiriblər ki, Təhsil Nazirliyinin “Bir” Tələbə-Könüllü proqramının dəstəyi ilə keçirilən təqdimatın məqsədi tələbələri marafon barədə məlumatlandırmaqdır.Tədbirdə məlumat verilib ki, Heydər Əliyev Fondunun təşəbbüsü ilə təşkil olunan “Bakı Marafonu” yarışları artıq ənənəyə çevrilib. Marafon Bakıda ilk dəfə 2016-cı ildə keçirilib. Minlərlə iştirakçının qoşulduğu bu yarışda Təhsil Nazirliyinin tabeliyindəki təhsil müəssisələrinin tələbələri də iştirak edərək yüksək nəticələr göstəribər. Bu il üçüncü dəfə “Bakı Marafonu-2018”in keçirilməsi planlaşdırılır.xeber100.com  

Qərbi Kaspi Universiteti robototexnika təlimləri keçirəcək

Qərbi Kaspi Universiteti Texnoparkı aprel ayından başlayaraq hər həftə ölkənin müxtəlif rayonlarında məktəblilər üçün robototexnika təlimləri keçirəcək.Universitetdən Azərtac-a bildiriblər ki, “Məktəbli mühəndislər” layihəsi çərçivəsində keçiriləcək təlimlərin məqsədi texnologiya mühəndisliyi ixtisaslarının məktəblilər arasında təbliği və robototexnika mühəndisliyinə marağı olan şagirdlərdə baza bilik və bacarıqlarını formalaşdırmaqdır.Layihə çərçivəsində Robototexnika Klubunun üzvləri müəllimləri ilə birgə bölgələrdə yerləşən məktəblərə gedərək orada şagirdlərə təlim keçəcək, eləcə də praktik olaraq LEGO robotları üzərində işləməyə şərait yaradacaqlar.Tədrisin keyfiyyətinin və praktik yönümünün gücləndirilməsinə yönəlmiş tədbirlər, eyni zamanda, infrastruktur layihələri həyata keçirən Qərbi Kaspi Universitetində bu tədris ilindən Yüksək Texnologiyalar və İnnovativ Mühəndislik Məktəbi, eləcə də Yüksək Texnologiyalar Parkı (Texnopark) fəaliyyət göstərir. Texnoparkda biznes-inkubasiya mərkəzi, texnoloji transfer ofisi, mexatronika və robototexnika laboratoriyası, ideya bankı və başqa mərkəzlər var. Texnoparkdan sərbəst istifadə imkanı yaradılıb. Belə ki, ideyası olan tələbələr və şagirdlər texnoparka müraciət edərək dəstək ala bilirlər. Texnopark orta məktəb şagirdlərini də müxtəlif layihələrə, praktik çalışmalara cəlb edir.xeber100.com

Dövlət İmtahan Mərkəzinin məlumatına görə…

Dövlət İmtahan Mərkəzi (DİM) tərəfindən fevralın 7-si və 8-də elan edilmiş dövlət qulluğuna qəbul üçün müsabiqənin müsahibə mərhələsi üzrə qeydiyyatdan keçmiş namizədlərlə ötən gün müsahibələr keçirilib.DİM-dən  Azərtac-a bildirilib ki, müsahibələr Bakı şəhəri, həmçinin qurumun Gəncə, Lənkəran, Şəki, Şirvan, Göyçay, Bərdə regional bölmələri, Xaçmaz şəhərində incəsənət muzeyi də daxil olmaqla 16 müxtəlif yerdə təşkil edilib.Gün ərzində keçirilməsi nəzərdə tutulan 129 müsahibədən 73-ü reallaşıb, 56 namizədlə müsahibə isə onların gəlməməsi səbəbindən baş tutmayıb. Namizədlərdən 30-u iddia etdiyi vəzifəyə uyğun hesab edilib.Müsahibələrin təşkili və keçirilməsi üçün DİM və dövlət orqanları tərəfindən kifayət qədər vəsait və resurslar sərf olunur. Müsahibələr regionlarda da keçirilir və bu məqsədlə DİM və dövlət orqanlarının nümayəndələri bu bölgələrə ezam olunurlar.Namizədlərin müsahibədə iştirak etməmələri üzrlü hal kimi qəbul edilmir, namizədlərin məsuliyyətsizliyi kimi xarakterizə edilir və belə hallar DİM-in məlumat bazasında qeydiyyata alınır.Namizədlərlə müsahibələrin keçirilməsi mayın 15-dək davam edəcək.xeber100.com

Növbəti sınaq imtahanına qeydiyyat başlayıb

I-IV ixtisas qrupları üzrə ali təhsil müəssisələrinə qəbul olunmaq istəyən abituriyentlərə kömək məqsədi ilə aprelin 29-da keçiriləcək növbəti sınaq imtahanına qeydiyyat başlayıb.Dövlət İmtahan Mərkəzindən (DİM) Azərtac-a bildirilib ki, imtahanlar bir növbə üzrə keçirilir və bütün binalarda saat 11:00-da başlayır. Sınaq imtahanına qeydiyyat aprelin 24-dək aparılacaq.Sınaq imtahanının 12 şəhər və rayonda keçirilməsi nəzərdə tutulur. İştirak etmək istəyən şəxslər ekabinet.dim.gov.az saytındakı “Şəxsi kabinet”in “Hesab” bölməsində “Sınaq imtahanına yazılmaq üçün ödəmə kartı” > “Sınaq imtahanının növü” > “Bakalavriat səviyyəsi üzrə sınaq imtahanı” ardıcıllığı vasitəsilə ödəmə kartını əldə edib eservices.dim.gov.az/sinaq səhifəsində YENİ İSTİFADƏÇİ kimi qeydiyyatdan keçməlidirlər. Sınaq imtahanında iştirak haqqı 20 AZN-dir.Qeydiyyatdan keçmiş istifadəçilər istədiyi zaman yeni ödəmə kartı əldə edib hesablarının balansını artıra bilərlər. İstifadəçilər balanslarındakı vəsaitdən istifadə edib sınaq imtahanlarına istənilən şəxsləri yazdıra bilərlər.xeber100.com

Bakı Şəhəri üzrə Təhsil İdarəsinin məlumatı

Birinci sinfə elektron sistem vasitəsilə ərizələrin qeydiyyatı prosesində valideynlərə saytda rəsmi müraciət etmək imkanı yaradılıb.Bakı Şəhəri üzrə Təhsil İdarəsindən Azərtac-a bildiriblər ki, indiyədək mektebeqebul.edu.az saytının “Əlaqə” bölməsində valideynlər yalnız qısa suallara cavab ala bilirdilərsə, artıq bu bölməyə yazılan müraciətlər rəsmi müraciət kimi qəbul edilir və müvafiq müddət ərzində cavablandırılır. Bu yenilik valideynlərin vaxt itkisinin qarşısının alınması, ənənəvi yazılı (məktub) müraciətlərin cavablandırılması zamanı meydana çıxa bilən obyektiv ləngimələrin aradan qaldırılması və müraciətlərin daha operativ cavablandırılması məqsədilə tətbiq olunub.Odur ki, valideynlərə birinci sinfə online qeydiyyat prosesində onları maraqlandıran məsələlərə daha operativ cavab almaq üçün elektron sistemin “Əlaqə” bölməsi vasitəsilə müraciət etmələri tövsiyə olunur.Təhsil Nazirliyinin birbaşa tabeliyindəki lisey və gimnaziyalara, eləcə də BŞTİ-nin tabeliyindəki ümumtəhsil müəssisələrinə birinci sinfə şagird qəbulu valideynin (qanuni nümayəndənin) elektron ərizəsinin mektebeqebul.edu.az saytında qeydiyyatı yolu ilə həyata keçirilir. Fevralın 22-dən sentyabrın 15-dək elektron ərizələrin qeydiyyatı prosesində valideynlər məktəbi, təlim dilini və müəllimi seçməlidirlər.xeber100.com

Turizm sahəsinin inkişaf etdirilməsinə dair təlimlər keçirilir

Turizm sahəsinin inkişaf etdirilməsində beynəlxalq təcrübənin öyrənilməsi əsas strateji hədəflərdəndir. Belə ki, Azərbaycan Turizm və Menecment Universitetində (ATMU) keçirilən növbəti təlimin əsas məqsədi turizm sahəsində çalışan işçiləri və universitet tələbələrini geniş fikir mübadiləsinə cəlb etməklə yanaşı, Azərbaycan və Türkiyənin timsalında beynəlxalq təcrübi bilik qazanmalarına zəmin yaratmaq olub.ATMU-dan Azərtac-a bildirilib ki, bu ali təhsil ocağının biznes idarəçiliyi fakültəsinin dekanı, iqtisad üzrə fəlsəfə doktoru Anar Mirzəyev ötən dövr ərzində turizm sənayesində həyata keçirilən tədbirlər nəticəsində Azərbaycanda bu sektorun inkişafı üçün münbit şəraitin yaradıldığını diqqətə çatdırıb.Tədbirin əlaqələndiricisi, ATMU-nun marketinq kafedrasının baş müəllimi Günel Teymurova Türkiyənin təcrübəsindən və strateji hədəflərindən danışıb.“Skype” proqramı vasitəsilə təlimə qoşulan, Türkiyənin Atatürk Universitetinin professoru Kərəm Karabulut, turizm məslək liseyinin müdiri Zekeriyə Bingöl və Azad İstehlakçılar Birliyinin sədri Eyyub Hüseynov, eləcə də sənaye təmsilçiləri Tərlan Quliyev və Rauf Səfərov təqdimatlarla çıxış ediblər.xeber100.com

Dövlət İmtahan Mərkəzinin məlumatına görə…

Aprelin 4-dən Dövlət İmtahan Mərkəzində (DİM) yeni təhsil proqramları (kurikulumlar) əsasında Azərbaycan dili, rus dili, ingilis dili, riyaziyyat, kimya, fizika, biologiya, tarix və coğrafiya fənlərindən buraxılış və qəbul imtahanlarında istifadəsi planlaşdırılan qiymətləndirmə vasitələrinin hazırlanması və onların meyarlar üzrə yoxlanılmasına dair hazırlıq kursları fəaliyyətə başlayacaq.DİM-dən Azərtac-a bildiriblər ki, kurslarda müvafiq fənlər üzrə qeydiyyatdan keçmiş şəxslər iştirak edəcəklər. Hazırlıq kursları müvafiq qrafik üzrə fəaliyyət göstərəcək. Həmin qrafik DİM-in saytında verilib.Hazırlıq kursları Abdulvahab Salamzadə küçəsi, 28 ünvanında yerləşən Asiya Universitetinin binasında keçiriləcək.xeber100.com

Abituriyentlər üçün sınaq imtahanı keçirilib

Bu gün I-IV ixtisas qrupları üzrə ali təhsil müəssisələrinə qəbul olmaq istəyən abituriyentlər üçün respublikanın 18 şəhər və rayonunda sınaq imtahanı keçirilib.Dövlət İmtahan Mərkəzinin (DİM) mətbuat xidmətindən Apa-ya verilən məlumata görə, imtahanda iştirak etmək üçün 23579 abituriyent qeydiyyatdan keçib. İmtahanların idarə olunması üçün DİM-də operativ qərargah fəaliyyət göstərib, gün ərzində imtahan mərkəzləri ilə müntəzəm əlaqə saxlanılıb və imtahan prosesinin gedişinə nəzarət olunub. İmtahan iştirakçılarına öz bilik və bacarıqlarını nümayiş etdirmələri üçün imtahan mərkəzlərində zəruri şərait yaradılıb.Aprelin 2-dən etibarən DİM-də imtahan protokollarının və cavab kartlarının emalı aparılacaq. İmtahanın nəticələrinin yaxın günlərdə elan edilməsi nəzərdə tutulur.xeber100.com

Dövlət qulluğuna qəbul üçün test imtahanı keçiriləcək

Dövlət İmtahan Mərkəzi (DİM) tərəfindən martın 31-də dövlət qulluğunda inzibati vəzifələrin A növünə (inzibati rəhbər (idarəetmə) vəzifələr) aid olan AA, AB və AC qruplarına uyğun vəzifələr üzrə dövlət qulluğuna qəbul üçün test imtahanı keçiriləcək.DİM-dən Azərtac-a bildiriblər ki, imtahana qeydiyyat martın 6-dan 30-dək aparılıb və bu müddətdə 72 namizəd qeydiyyatdan keçib.Qeyd edək ki, test imtahanından müvəffəqiyyətlə keçən namizədə altqruplara daxil olan vəzifələrə uyğun sertifikat veriləcək. Sertifikatın qüvvədəolma müddəti beş ildir. İnzibati vəzifələrin müvafiq altqrupu üzrə sertifikatı olan şəxs sertifikatda nəzərdə tutulmuş vəzifə, habelə həmin altqrupun aid edildiyi qrup daxilində daha aşağı altqruplara uyğun vəzifə üzrə keçirilən müsahibələrə qatıla bilər.xeber100.com  

31 mart soyqırımına həsr olunan elmi konfrans keçirilib

Martın 30-da Azərbaycan Milli Elmlər Akademiyasının (AMEA) Fəlsəfə İnstitutunda “Ermənilərin azərbaycanlılara qarşı törətdiyi soyqırımının səbəbləri və nəticələri” mövzusunda elmi-nəzəri konfrans keçirilib.İnstitutdan Azərtac-a bildirilib ki, əvvəlcə soyqırımı qurbanlarının xatirəsi bir dəqiqəlik sükutla yad edilib.Sonra Fəlsəfə İnstitutunun direktoru İlham Məmmədzadə çıxış edərək bildirib ki, 1918-ci il martın 30-dan aprelin 3-dək Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə erməni silahlı dəstələrinin azərbaycanlılara qarşı törətdikləri soyqırımı nəticəsində minlərlə azərbaycanlı qətlə yetirilib, on minlərlə insan itkin düşüb.Konfransda Fəlsəfə İnstitutunun direktor müavini Eynulla Mədətlinin “Azərbaycanlılara qarşı ermənilərin törətdikləri soyqırımların səbəbləri və hədəfləri”, fəlsəfə üzrə fəlsəfə doktoru Əhməd Qəşəmoğlunun “Soyqırımı hadisəsinin və ondan xilas yollarının sistemli yanaşma yönündən təhlili”, fəlsəfə üzrə fəlsəfə doktoru Rövşən Hacıyevin “Azərbaycanlıların 31 mart soyqırımı günü: tariximizə daha bir baxış” və fəlsəfə üzrə fəlsəfə doktoru Şöhlət Zeynalovun “1918-ci il mart soyqırımı: tarixi fəlsəfi yanaşma” mövzusunda məruzələri dinlənilib.xeber100.com