Dövlət İmtahan Mərkəzinin məlumatı

Dövlət İmtahan Mərkəzi (DİM) tərəfindən elan edilmiş inzibati icraçı (B növ) vəzifələr üzrə dövlət qulluğuna qəbul üçün müsabiqənin müsahibə mərhələsinə qeydiyyat başa çatıb.DİM-dən Azərtac-a bildirilib ki, müsahibəyə inzibati vəzifələrin 5-7-ci təsnifatlarına uyğun 1126 vakant inzibati icraçı vəzifə (B növ) təqdim olunub. Yekun məlumata əsasən, 77 dövlət orqanında olan vakant vəzifələr üzrə 1925 müraciət qeydə alınıb.Bəzi vəzifələr üzrə müsabiqə vəziyyəti çox yüksəkdir. Bu da həmin vəzifələrin tutulmasında rəqabətin yüksək olacağını göstərir. Mingəçevir regional “Asan xidmət” mərkəzində aparıcı məsləhətçi, Quba “Asan xidmət” mərkəzində aparıcı məsləhətçi, Mingəçevir regional “Asan xidmət” mərkəzində böyük məsləhətçi, Quba “Asan xidmət” mərkəzində böyük məsləhətçi, İqtisadiyyat Nazirliyində məsləhətçi, Əmlak Məsələləri Dövlət Komitəsində məsləhətçi vəzifələrinin hər biri üçün 30-dan yuxarı müraciət qeydə alınıb.Lakin 77 dövlət orqanından 31-də vakant olan vəzifələr üzrə heç bir namizəd qeydiyyatdan keçməyib. Müsahibəyə ən çox vakansiya təqdim etmiş Kənd Təsərrüfatı Nazirliyində də vəzifələr üzrə müsabiqə vəziyyəti aşağıdır.Namizədlərlə müsahibələrin keçirilmə qrafiki və nəticələri DİM-in internet portalında elan ediləcək. Müraciət olunmayan vakant vəzifələrin, eləcə də digər vakant vəzifələrin tutulması üçün yaxın günlərdə yenidən müsahibə elanları veriləcək. Artıq sertifikat əldə edən, həmçinin fevralın 18-də dövlət qulluğunda inzibati icraçı (B növü) vəzifələr üzrə müsabiqənin test imtahanından uğur qazananlar bu müsahibələrdə iştirak üçün qeydiyyatdan keçə biləcəklər.xeber100.com

İqtisad Universitetinin məlumatı əsasında…

Azərbaycan Dövlət İqtisad Universitetində (UNEC) qış məktəbi başa çatıb.UNEC-dən Azərtac-a bildiriblər ki, akademik heyətinin elmi və pedaqoji potensialının yüksəldilməsi məqsədilə keçirilən qış məktəbində universitetin ictimai nəzarət şurasının üzvi, professor Şahlar Əsgərov “Biliyin qiymətləndirilməsinin fəlsəfəsi” və “Ekonofizika” mövzusunda məruzələrlə çıxış edib.Məruzələrdə biliyin qiymətləndirilməsinin mahiyyətini açıqlanıb, Avropa ölkələrində ekonofizikanın bir fənn kimi tədris edildiyi vurğulanıb. Qış məktəbinin təşkilini yüksək qiymətləndirən professor deyib ki, bu bir çox cəhətdən faydalı olub. Dünyanın çox nüfuzlu alimləri burada maraqlı mövzularla çıxış ediblər. UNEC-in yüzdən çox müəlliminin qatıldığı təlimlər birbaşa təhsilin keyfiyyətinin yüksəldilməsinə və peşəkar mütəxəssis hazırlığına xidmət edir.Müzakirədə fəal iştirak edən müəllimlərə Ş.Əsgərovun “Kamilləşən bəşəriyyət” kitabı hədiyyə olunub.Qış məktəbində təlimçi qismində çıxış edən ABŞ-ın Lehi Universitetinin professoru Cill Sperandio UNEC-in akademik heyəti ilə fikir mübadiləsinin çox faydalı olduğunu diqqətə çatdırıb.Fransanın Lion Universitetinin müəllimi Cennifer Veylon da öz təəssüratlarını bölüşüb. “Azərbaycanda, UNEC-də keçirdiyim bir həftə tədris təcrübəm üçün ən dəyərli günlər idi”, - deyən C.Veylon qış məktəbində böyük təcrübə keçdiyini bildirib. O, yenidən bu kollektivlə bir araya gələcəyi günü səbirsizliklə gözlədiyini, UNEC-lə bundan sonra da əməkdaşlıq etməkdən məmnun olacağını söyləyib.Qış məktəbində UNEC ictimai nəzarət şurasının üzvləri də iştirak ediblər.xeber100.com

Bakı Ali Neft Məktəbinin məlumatı

Bakı Ali Neft Məktəbində (BANM) cari ildən etibarən biznesin idarə edilməsi (MBA) ixtisası üzrə magistratura proqramı tədris olunacaq.BANM-dən Azərtac-a bildirilib ki, hazırda magistratura pilləsində neft-qaz mühəndisliyi və kimya mühəndisliyi ixtisasları üzrə yüksək səviyyəli mütəxəssislər hazırlayan BANM 2018/2019-cu tədris ili üçün MBA proqramı və proseslərin avtomatlaşdırılması mühəndisliyi ixtisası üçün də qəbul elan edib.Qeyd edək ki, bu ali məktəb MBA proqramı üzrə qəbula cəmi 30 yer ayırıb. Proqram işləyən mütəxəssislər üçün də çox əlverişlidir. Belə ki, dərslər axşam saatlarında keçiriləcək. İkiillik MBA proqramı BANM-in digər ixtisaslarında olduğu kimi ingilis dilində tədris ediləcək. Tədris BANM-in yüksəkixtisaslı yerli və əcnəbi müəllimləri tərəfindən aparılacaq. MBA proqramında idarəetmə və təşkilati davranış, maliyyənin idarə olunması, biznes və iqtisadiyyat üçün statistika, marketinq konsepsiyaları, menecerlər üçün mühasibat, istehsalın və əməliyyatların idarə olunması, strateji idarəetmə, insan resurslarının idarə olunması, idarəetmənin iqtisadiyyatı, informasiya texnologiyalarının idarə olunması, kapital qoyuluşu və maliyyə strategiyaları, bazarın öyrənilməsi və beynəlxalq biznes kimi aktual fənlərin tədrisi nəzərdə tutulub.Mühəndislik sahəsində ixtisasları və kadr hazırlığı beynəlxalq səviyyədə qəbul olunan, dünyanın tanınmış universitetlərinin təcrübəsinə əsaslanaraq tədrisdə ən son texnoloji nailiyyətləri həyata keçirən BANM-də MBA proqramının tətbiqi gənclər üçün idarəetmə sahəsində yeni bilik və bacarıqların əldə edilməsinə böyük imkanlar yaradacaq.xeber100.com

Magistraturaya sənəd qəbulu davam edir

2018/2019-cu tədris ili üçün ali təhsil müəssisələrinin və Azərbaycan Milli Elmlər Akademiyasının magistraturalarına sənəd qəbulu davam edir.Dövlət İmtahan Mərkəzindən (DİM) Azərtac-a bildirilib ki, fevralın 8-i saat 14:00-a olan məlumata əsasən, Azərbaycan bölməsi üzrə 4 min 657, rus bölməsi üzrə 555, ümumilikdə 5 min 212 nəfər elektron ərizəsini təsdiqləyib.Qəbul imtahanında iştirak üçün bakalavrların ərizələrinin qəbulu internet vasitəsilə aparılır. Bakalavr fevralın 12-dək “Şəxsi kabinet” yaratdıqdan sonra ərizə vermək üçün tələb olunan məbləği “Şəxsi kabinet”indəki hesabına əlavə etməlidir. Hesaba məbləği əlavə etmək üçün ödəniş üsulları ilə payment.dim.gov.az internet səhifəsində tanış olmaq mümkündür.xeber100.com

Milli Elmlər Akademiyasının növbəti iclası keçirilib

Fevralın 7-də Azərbaycan Milli Elmlər Akademiyası (AMEA) Rəyasət Heyətinin növbəti iclası keçirilib.Azərtac xəbər verir ki, əvvəlcə AMEA-nın prezidenti Akif Əlizadə gündəlikdəki məsələləri diqqətə çatdırıb.Sonra AMEA-nın Humanitar Elmlər Bölməsinin akademik-katibi Teymur Kərimlinin bölmənin 2017-ci ildəki elmi və elmi-təşkilati fəaliyyəti haqqında məruzəsi dinlənilib. Bildirilib ki, ötən il bölmə üzrə 33 problemin 83 mövzusu, 363 işin 186 mərhələsi üzrə tədqiqat işləri aparılıb. İlin sonunda 122 işin 109 mərhələsinin başa çatdığını deyən akademik bölmənin elmi müəssisələri tərəfindən səkkiz respublika və dörd beynəlxalq miqyaslı tədbirin keçirildiyini söyləyib. Qeyd edilib ki, yeddisi xaricdə olmaqla 129 kitab, səkkizi xaricdə olmaqla 101 monoqrafiya, 234-ü xaricdə olmaqla 2.108 məqalə və 35-i xaricdə olmaqla 168 tezis çap edilib. 2017-ci ildə bölmə əməkdaşlarının impakt faktorlu jurnallarda 24 məqaləsi dərc edilib, bu elmi əsərlərə 76 dəfə istinad olunub.İclasda bir sıra elmi-təşkilati və kadr məsələlərinə də baxılıb.xeber100.com

Təhsil sahəsində əməkdaşlıq məsələləri müzakirə edilib

Azərbaycanın Tacikistandakı səfiri Həsən Məmmədzadə bu ölkənin elm və təhsil naziri Nurullo Said ilə görüşüb.Azərtac xəbər verir ki, görüşdə Azərbaycan və Tacikistan arasında Təhsil Müəssisələri Assosiasiyanın yaradılması, qurumlar arasında illik kvotaların ayrılmasına dair Protokolun imzalanması, M.S.Osimi adına Tacikistan Texniki Universiteti ilə Azərbaycan Dövlət Neft və Sənaye Universiteti arasında Memorandumun imzalanması və ikitərəfli əhəmiyyət kəsb edən digər məsələlər müzakirə olunub.Nazir Azərbaycanın təhsil sahəsində böyük təcrübəyə malik olduğunu, iki ölkə arasında Hökumətlərarası Komissiyanın Protokolunda Azərbaycan ilə Tacikistan arasında təhsil sahəsində əməkdaşlıq barədə müvafiq bəndin olduğunu diqqətə çatdırıb.Görüşdə Tacikistanda 39 ali təhsil müəssisəsinin fəaliyyət göstərdiyi və imzalanan sazişə əsasən Azərbaycan universitetləri tərəfindən ayrılmış kvotaya uyğun olaraq tacik tələbələrinin ölkəmizə göndəriləcəyi bildirilib. Tacikistan universitetlərində azərbaycanlı tələbələrin təhsil alması üçün kvota ayrılacağı diqqətə çatdırılıb.xeber100.com

Bakı Şəhəri üzrə Təhsil İdarəsinin məlumatı

Bakı Şəhəri üzrə Təhsil İdarəsi (BŞTİ) tərəfindən “Xocalı soyqırımının iyirmi altıncı ildönümünün keçirilməsi barədə” əmr imzalanıb.BŞTİ-dən Azərtac-a bildiriblər ki, müvafiq əmr ilə təsdiqlənmiş “Xocalı soyqırımının iyirmi altıncı ildönümünün keçirilməsi barədə Tədbirlər Planı”nda “Xocalıya gedən yol” mövzusunda mühazirə, toplantı, “dəyirmi masa”, xüsusi dərs, məşğələ və konfransların təşkili nəzərdə tutulur.Bundan əlavə, “Xocalı faciəsi uşaq yaradıcılığında” mövzusunda bədii qiraət gecələri, məktəblilərin esse və inşa yazılarının təqdimatı, əl işlərindən ibarət sərgiləri təşkil olunacaq. “Xocalı harayı” mövzusunda ədəbi-bədii kompozisiyalar hazırlanacaq, sənədli və bədii filmlər nümayiş etdiriləcək. Xocalı soyqırımından bəhs edən, elmi kitabların və nəşrlərin sərgisi, divar qəzetləri, bülleten, fotostendlər və guşələr hazırlanacaq.Təhsil müəssisələrinin internet resurslarına Xocalı soyqırımını əks etdirən materiallar yerləşdiriləcək, keçirilən tədbirlər kütləvi informasiya vasitələri və televiziya kanallarında işıqlandırılacaq.Eyni zamanda, təhsil müəssisələrinin müəllim və şagird kollektivi soyqırımı şahidləri ilə görüşəcək, “Ana fəryadı” abidəsini ziyarət edəcəklər.Ümumtəhsil müəssisələrində tədbirlərin keçirilməsi ölkəmizin müstəqilliyi uğrunda mübarizədə canlarını qurban vermiş vətən övladlarını yad etmək, böyüməkdə olan nəsildə doğma Vətənə sevgi, məhəbbət hissləri aşılamaq, məktəblilər arasında milli vətənpərvərlik ruhunu yüksəltmək və Xocalı soyqırımı haqqında həqiqətləri çatdırmaq məqsədlərinə xidmət edir.xeber100.com

Magistraturaya qəbul imtahanı üzrə sınaq imtahanı keçirilib

Dövlət İmtahan Mərkəzi (DİM) ali təhsil müəssisələrinin və Azərbaycan Milli Elmlər Akademiyasının (AMEA) magistratura pilləsinə qəbul imtahanının birinci mərhələsi üzrə sınaq imtahanı keçirib.DİM-dən Azərtac-a bildirilib ki, imtahan Bakı, Naxçıvan və Gəncə şəhərlərində, ümumilikdə dörd binada təşkil olunub. İştirakçılara biliklərini yoxlamaq üçün zəruri şərait yaradılıb.İmtahan bütün binalarda eyni vaxtda – saat 10:00-da başlanıb və 2 saat 30 dəqiqə davam edib. İmtahan prosesinin idarə olunması üçün DİM-də operativ qərargah fəaliyyət göstərib, imtahan keçirilən mərkəzlərlə mütəmadi əlaqə saxlanılıb. İmtahan bütün binalarda təlimata uyğun keçirilib.İmtahan nəticələrinin yaxın günlərdə elan edilməsi nəzərdə tutulur.Qeyd edək ki, sınaq imtahanının keçirilməsinin məqsədi bakalavrlara münasib vaxtda qapalı və açıq formalı test tapşırıqları vasitəsilə onların verbal və riyazi məntiqini, fəza təfəkkürünü, İKT və xarici dil üzrə bilik, bacarıq və vərdişlərini yoxlamaqdır. Həmçinin bakalavrların həm imtahan texnologiyalarına alışmaları, həm də imtahana hazırlıq səviyyələrini yoxlamaları üçün şərait yaratmaqdır.xeber100.com

Əməkdaşlığa dair müqavilə imzalanıb

Azərbaycan Universiteti ilə Bakı Dövlət Universitetinin nəzdində Konfutsi İnstitutu arasında əməkdaşlığa dair müqavilə imzalanıb. Sənədi Azərbaycan Universitetinin rektoru Səadət Əliyeva və Konfutsi İnstitutunun direktoru Oqtay Cəlilbəyli imzalayıblar.Universitetdən Azərtac-a bildiriblər ki, müqavilənin imzalanmasının əsas məqsədi Azərbaycan ilə Çin arasında əlaqələrin inkişafına töhfə verilməsi istiqamətində birgə tədbirlərin həyata keçirilməsi və təhsil əlaqələrinin inkişaf etdirilməsidir.Sənəddə tərəflərin Azərbaycan Universiteti ilə Çinin aparıcı universitetləri arasında tələbə mübadiləsinin aparılması, bu ali məktəbin tələbələri üçün Çin dili kursu üzrə yay və qış məktəblərinin təşkil edilməsi planlaşdırılır. Eyni zamanda Çin dilinin Azərbaycan Universitetinin tədris planına ikinci xarici dil kimi daxil edilməsi, tələbələrə Çin dili üzrə HSK (Hanyu Shuiping Kaoshi) və HSKK (Hanyu Shuiping Kouyu Kaoshi) imtahanlarına hazırlıqda kömək göstərilməsi və digər sahələrdə əməkdaşlıq nəzərdə tutulub.xeber100.com

Dövlət İmtahan Mərkəzinin məlumatı

İnzibati vəzifələrin B növünə (inzibati icraçı vəzifələr) aid olan vəzifə qrupları üzrə dövlət qulluğuna qəbul üçün 2017-ci il dekabrın 17-də keçirilən test imtahanında uğur qazanan namizədlərə sertifikatların verilməsinə başlanılıb. Bu barədə Azərtac-a Dövlət İmtahan Mərkəzindən məlumat verilib.Test imtahanından müvəffəqiyyətlə keçən namizədlər müvafiq sertifikatı almaq üçün Dövlət İmtahan Mərkəzinə (Gənclik binası, AZ1110, Bakı şəhəri, K.Rəhimov küçəsi, 874-cü məhəllə) müraciət edə bilərlər. Həmin şəxslər sertifikatı almaq üçün şəxsiyyət vəsiqəsini təqdim etməlidirlər.xeber100.com