Bakı şəhəri üzrə ümumtəhsil məktəblərinin VI və VII sinif şagirdləri arasında fənn müsabiqələrinin final mərhələsi keçirilib.Bakı Şəhəri üzrə Təhsil İdarəsindən Azərtac-a bildiriblər ki, fizika, kimya, biologiya, riyaziyyat və informatika fənləri üzrə keçirilən fənn müsabiqələrinin final mərhələsində paytaxt üzrə 815 şagird iştirak edib. Onlardan 196-sı riyaziyyat, 140-ı kimya, 175-i fizika, 159-u biologiya, 145-i isə informatika fənni üzrə müsabiqəyə qatılıb Müsabiqədə VI sinif şagirdləri riyaziyyat fənni, VII sinif şagirdləri digər fənlər üzrə biliklərini nümayiş etdiriblər.Fənn müsabiqələrinin finalı fizika, riyaziyyat və informatika fənləri üzrə fizika, riyaziyyat və informatika təmayüllü respublika liseyində, kimya və biologiya fənləri üzrə isə kimya-biologiya təmayüllü respublika liseyində təşkil olunub.Yarışmaların ilkin mərhələsində şagirdlərə fənlər üzrə müsabiqə tarixinədək keçdikləri məktəb proqramına uyğun tapşırıqlarla yanaşı, məntiqi təfəkkürü, analiz qabiliyyətini və qeyri-standart düşünməni tələb edən suallar təqdim edilib. Qırx sualın cavablandırılması üçün şagirdlərə iki saat yarım vaxt verilib.Müsabiqələrin keçirilməsinin əsas məqsədi istedadlı uşaqların aşkara çıxarılması, məktəblilər arasında sağlam rəqabət mühitinin yaradılması, aşağı sinif şagirdlərinin müxtəlif fənlərə marağının artırılması və onlarla məqsədyönlü işlərin aparılmasıdır.xeber100.com
