Fiziklərin və kimyaçıların yaradıcılıq müsabiqələri keçiriləcək

Bakı Şəhəri üzrə Təhsil İdarəsinin (BŞTİ) tabeliyindəki ümumtəhsil məktəbləri və uşaq-gənclər inkişaf mərkəzlərinin şagirdləri arasında gənc fiziklərin və kimyaçıların yaradıcılıq müsabiqələri keçiriləcək.BŞTİ-dən Azərtac-a bildiriblər ki, müsabiqələrin keçirilməsinin əsas məqsədi məktəblilərin fizika və kimya fənlərinə olan marağının daha da artırılması, onların bu sahədə nəzəri və təcrübi biliklərinin təkmilləşdirilməsi və istedadlı şagirdlərin aşkara çıxarılmasıdır.Müsabiqələr üç mərhələdə IX-XI sinif şagirdləri arasında keçiriləcək. Hər iki müsabiqənin birinci mərhələsi noyabrın 21-dən 30-dək təhsil müəssisələrində təşkil olunacaq. Məktəbdaxili yarışmada qalib gələn komandalar növbəti mərhələdə iştirak hüququ qazanacaq. Gənc fiziklərin yaradıcılıq müsabiqəsinin ikinci mərhələsi dekabrın 1-2-də, gənc kimyaçıların yaradıcılıq müsabiqəsinin ikinci mərhələsi isə dekabrın 4-5-də olacaq. İkinci mərhələdə hər rayon üzrə birinci yeri tutan qalib komanda növbəti mərhələyə vəsiqə qazanacaq. Üçüncü mərhələ isə hər iki müsabiqə üzrə dekabrın 6-dan 11-dək keçiriləcək. Bakı şəhəri üzrə final mərhələsində (üçüncü mərhələdə) hər rayondan bir komanda, ümumilikdə 12 komanda iştirak edəcək və ilk üç yeri tutan komandalar qalib hesab olunacaq.Komandalar üç nəfərdən (IX sinif-1 nəfər, X sinif-1 nəfər, XI sinif-1 nəfər) ibarət olmalıdır.Müsabiqələrin əsasnaməIərinə görə, birinci və ikinci mərhələdə iştirakçılar iki akademik saat ərzində ümumtəhsil və uşaq-gənclər inkişaf mərkəzlərinin proqramlarına uyğun olaraq otuz sualdan ibarət test tapşırığını, iki məsələni, final mərhələsində isə həmin vaxt ərzində test və məsələ ilə yanaşı, bir təcrübə işini yerinə yetirməlidirlər.Test tapşırıqlarının hər birinin doğru cavablandırılması bir balla, məsələ və təcrübə işi beş balla qiymətləndiriləcək. Ən çox bal toplayan komanda qalib sayılacaq.Qaliblər ekspert qrupu tərəfindən müəyyənləşdiriləcək.xeber100.com

Dövlət qulluğuna qəbul olunmaq istəyənlərin diqqətinə…

Dövlət İmtahan Mərkəzində (DİM) dövlət qulluğuna qəbul olunmaq istəyənlərin müsabiqənin test imtahanı mərhələsinə daha da səmərəli hazırlaşmalarına kömək məqsədilə növbəti sınaq imtahanları keçiriləcək.DİM-dən Azərtac-a bildiriblər ki, sınaq imtahanları AA, AB, AC, BA, BB qrupları üzrə noyabrın 15, 22 və 29-da, dekabrın 2, 6 və 13-də aparılacaq. Namizədlər imtahanı mərkəzin Nəsimi rayonu, Abdulvahab Salamzadə küçəsi, 28 ünvanında yerləşən binasında xüsusi ayrılmış zallarda kompüter vasitəsilə elektron formada verəcəklər.xeber100.com

Bakı Şəhəri üzrə Təhsil İdarəsinin məlumatı

Bakı Şəhəri üzrə Təhsil İdarəsinin (BŞTİ) müvafiq əmrinə əsasən, dekabrın 26-27-də paytaxtdakı 258 nömrəli tam orta məktəbdə əvvəlki illərdə ümumtəhsil məktəblərində oxuyub ümumi orta təhsil səviyyəsini (IX) bitirə bilməyən vətəndaşlar üçün eksternat qaydasında imtahanlar keçiriləcək.BŞTİ-dən Azərtac-a bildiriblər ki, sərbəst (eksternat) təhsilalma formasının tətbiqi müxtəlif səbəblərdən ümumi orta təhsil səviyyəsini başa vura bilməyən şəxslərə həmin səviyyə üzrə buraxılış imtahanı verib müvafiq təhsil sənədi almaq üçün şərait yaratmaq məqsədi daşıyır.Qeydiyyat və sənəd qəbulu dekabrın 1-dən 20-dək BŞTİ-də aparılacaq.Eksternat imtahanlarında 16 yaşı tamam olmuş şəxslər iştirak edə bilərlər.Ümumi orta təhsil proqramı üzrə eksternat qaydasında imtahanlarda iştirak üçün tələb olunan sənədlərin siyahısı və imtahan fənləri barədə əlavə məlumat veriləcək.xeber100.com

Dövlət İmtahan Mərkəzinin məlumatı

Dövlət qulluğuna qəbul üçün yeni test bankı hazırlanıb.Azərtac xəbər verir ki, bunu Dövlət İmtahan Mərkəzinin (DİM) icraçı direktoru Vəfadar Misirov noyabrın 14-də dövlət qulluğuna qəbula dair keçirdiyi mətbuat konfransında bildirib.Vəzifə qrupları üzrə 20 yeni test proqramının hazırlandığını bildirən V.Misirov deyib: “Əvvəlki qəbul imtahanlarından fərqli olaraq, yeni modeldə dünyagörüşü bloku ləğv edilib, onun yerinə Azərbaycan dili bloku salınıb. Test imtahanı modeli kifayət qədər mürəkkəbləşdirilsə də bir o qədər çevikləşib. Yeni modelin yoxlanılması məqsədilə artıq oktyabrın 5-dən dövlət qulluğuna qəbul olunmaq istəyənlər üçün sınaq imtahanları keçirilib”.V.Misirov əlavə edib ki, test imtahanlarının məzmununda da yeniliklər var. Əvvəlki imtahanlardan fərqli olaraq, test imtahanları vakant vəzifələr üzrə deyil, vəzifə qrupları üzrə keçirilir. Həmçinin dövlət qulluğunda yüksəliş üçün ümumi müsahibə də nəzərdə tutulub.Mərkəzin icraçı direktoru vurğulayıb ki, DİM-in bazasında ləğv olunmuş dövlət orqanlarında çalışmış 333 namizəd ehtiyat kadr kimi saxlanılır. Ehtiyatda olanlardan artıq 44 nəfər vəzifəyə təyinat alıb.xeber100.com

Test imtahanı mərhələsinin nəticələri açıqlanıb

Bakı Şəhəri üzrə Təhsil İdarəsi (BŞTİ) tərəfindən ümumi təhsil müəssisələrində direktorun təlim-tərbiyə işləri üzrə müavini, direktorun tərbiyə işləri üzrə müavini (təşkilatçı), psixoloq və kitabxanaçı vəzifələrinə işə qəbul üzrə elan edilmiş müsabiqənin test imtahanı mərhələsinin nəticələri açıqlanıb. Nəticələrə əsasən, imtahanda iştirak edən 498 namizəddən 134-ü keçid balından yüksək nəticə göstərib. İmtahan nəticələri barədə məlumatlar artıq namizədlərin şəxsi səhifələrinə göndərilib.BŞTİ-dən Azərtac-a bildiriblər ki, keçid balından yüksək nəticə göstərən namizədlər vakansiyalar üzrə seçimlərini etdikdən sonra müsahibə mərhələsinə dəvət olunacaqlar.Təhlil edilən nəticələrə əsasən, vəzifələr üzrə müvafiq keçid balı müəyyənləşdirilib. Direktorun təlim-tərbiyə işləri üzrə müavini, direktorun tərbiyə işləri üzrə müavini (təşkilatçı) vəzifələri üzrə keçid balı 24, psixoloq vəzifəsi üzrə keçid balı 28, kitabxanaçı vəzifəsi üzrə keçid balı 17 olub.Qeyd edək ki, noyabrın 3-4-də keçirilmiş test imtahanında direktorun təlim-tərbiyə işləri üzrə müavini, direktorun tərbiyə işləri üzrə müavini (təşkilatçı) və psixoloq vəzifələri üzrə müsabiqəyə qatılanlar 40 sualdan ibarət test tapşırığını bir saat, kitabxanaçı vəzifəsi üzrə müsabiqəyə qatılan şəxslər isə 30 sualdan ibarət test tapşırığını 45 dəqiqə ərzində cavablandırıblar.xeber100.com

Bakı Şəhəri üzrə Təhsil İdarəsinin məlumatı

Bakı Şəhəri üzrə Təhsil İdarəsi (BŞTİ) tərəfindən həyata keçirilən beşinci könüllülük proqramı çərçivəsində 34 könüllü fəaliyyətə başlayıb.BŞTİ-dən Azərtac-a bildiriblər ki, beşinci könüllülük proqramında iştirak etmək üçün yüz nəfər elektron qaydada sənəd verib. Müvafiq meyarlar əsasında müsahibəyə çağırılan 57 nəfərdən 34-ü müsbət nəticə əldə edib. Seçimlərin nəticələrinə uyğun olaraq, 31 nəfər BŞTİ–nin müvafiq sektorlarında, ikisi xidmət bölmələrində, biri isə Təlimə Dəstək Mərkəzində fəaliyyətə başlayıb.Müsahibədən uğurla keçənlər BŞTİ-nin müxtəlif sektorlarında, xidmət bölmələrində və Təlimə Dəstək Mərkəzində üç ay təcrübə keçmək imkanı qazanacaqlar.Könüllü kimi fəaliyyətə başlayan gənclərə üç ay təcrübə keçdikdən sonra BŞTİ tərəfindən müvafiq arayış veriləcək.Qeyd edək ki, BŞTİ artıq dörd ildir könüllü əsaslarla çalışmaq arzusunda olan gənclərlə əməkdaşlıq edir. Bu günədək BŞTİ tərəfindən həyata keçirilmiş ilk könüllülük proqramında 15, ikinci proqramda 26, üçüncü könüllülük proqramında 35, dördüncü könüllülük proqramında isə 42 nəfər müxtəlif sektorlarda və xidmət bölmələrində fəaliyyət göstəriblər. Onlardan 17-si hazırda BŞTİ-nin əməkdaşı kimi çalışır.xeber100.com

Bakı Dövlət Universitetinin məlumatı

Bakı Dövlət Universitetində (BDU) “Türk sivilizasiyasının dünya mədəniyyətinə verdiyi töhfələr” mövzusunda tədbir təşkil olunub.BDU-dan Azərtac-a bildiriblər ki, tədbirdə türkoloq alim, türkologiya kafedrasının müdiri, professor Ramiz Əsgər, türk xalqları tarixi kafedrasının müdiri, professor Əsməd Muxtarova və digər alimlər mövzu ilə bağlı fikirlərini söyləyiblər.Çıxış edənlər türk xalqlarının tarixi inkişafı, türk dünyasının yerləşdiyi coğrafi ərazinin əhəmiyyəti, türklərin sahib olduqları milli dövlətçilik ənənəsi, tarixdə mövcud olmuş türk dövlətləri barədə danışıblar.Vurğulanıb ki, türk xalqları ümumbəşəri mədəniyyətə böyük töhfələr veriblər.Mövzu ilə bağlı müzakirələr aparılıb.xeber100.com

Əməkdaşlığa dair anlaşma memorandumu imzalanıb

Azərbaycan Milli Elmlər Akademiyasının akademik Y.Məmmədəliyev adına Neft-Kimya Prosesləri İnstitutu (NKPİ) Misir Neft Tədqiqatları İnstitutu (MNTİ) ilə elm və təhsil sahəsində əməkdaşlıq edəcək. Bu məqsədlə NKPİ-də təşkil olunan görüşdə tərəflər arasında əməkdaşlığa dair anlaşma memorandumu imzalanıb.NKPİ-dən Azərtac-a bildiriblər ki, sənəddə neft-kimya və neft emalı, yüksək molekullu birləşmələr, üzvi sintez, kimyəvi kinetika və kataliz, korroziyadan müdafiə vasitələri, yaşıl kimya və onun tətbiqi, yeni və bərpa olunan enerji, alternativ yanacaqlar tədqiqatı, nanotexnologiya sahələrində iş birliyinin möhkəmləndirilməsi, bu istiqamətdə layihə və inkişaf proqramlarının həyata keçirilməsi, o cümlədən tərəflər arasında doktorantların hazırlanması nəzərdə tutulur.Görüşdə NKPİ-nin direktoru, akademik Vaqif Abbasov anlaşma memorandumunun iki qurum arasındakı əlaqələrin qurulması və davamlı inkişafı, həmçinin elm və təhsilin inteqrasiyası baxımından əhəmiyyətini qeyd edib. O, qonaqlara institutun şöbə və laboratoriyalarının əsas elmi fəaliyyət istiqamətləri barədə geniş məlumat verib.xeber100.com

“Payız məktəbi” proqramına qeydiyyat başlanıb

Təhsil İşçilərinin Peşəkar İnkişafı İnstitutunda (TİPİİ) reallaşdırılan “Payız məktəbi” proqramına qeydiyyat başlanıb.TİPİİ-dən Azərtac-a bildirilib ki, noyabrın 16-dan 20-dək keçiriləcək “Payız məktəbi”ndə emosional zəkanın (intellektin) inkişafı, təlim məqsədlərinin emosional təsnifatı, emosional zorakılıq və onun profilaktikası, peşəkar yanma sindromu ilə mübarizədə oyun və art-terapiya kimi təlimlər təşkil olunacaq.“Payız məktəbi”ndə bütün fənn müəllimləri, tələbələr, gələcəkdə müəllim işləmək istəyənlər, valideynlər iştirak edə bilərlər.xeber100.com

Bakı Şəhəri üzrə Təhsil İdarəsinin məlumatına görə…

Bakı Şəhəri üzrə Təhsil İdarəsinin (BŞTİ) tabeliyindəki 244 nömrəli tam orta məktəbdə şagirdlərdən ibarət komandalar arasında stolüstü tennis yarışı keçirilib.BŞTİ-dən Azərtac-a bildiriblər ki, yarışın nəticələrinə əsasən, 267 nömrəli məktəb-liseyin komandası birinci, 244 və 143 nömrəli tam orta məktəblərin komandaları isə müvafiq olaraq ikinci və üçüncü yerləri tutublar.Stolüstü tennis üzrə yarış Binəqədi rayonunun ümumtəhsil müəssisələrini əhatə edib.xeber100.com