Noyabrın 8-də Azərbaycan Memarlıq və İnşaat Universiteti (AzMİU) ilə “AzerGold” Qapalı Səhmdar Cəmiyyəti (QSC) arasında əməkdaşlıq memorandumu imzalanıb. Bu barədə Azərtac-a universitetdən məlumat verilib.İmzalanma mərasimində AzMİU-nun rektoru, professor Gülçöhrə Məmmədova təhsilin inkişafının dövlətin təhsil siyasətinin prioriteti olduğunu vurğulayıb. O, “AzerGold” QSC ilə əməkdaşlığın hər iki tərəfə böyük xeyir verəcəyinə ümidvar olduğunu bildirib, bunun həm universitet, həm də tələbələr üçün böyük əhəmiyyət daşıdığını deyib. Bildirib ki, bu əməkdaşlıq tələbələrin nəzəri biliklərinin praktikada möhkəmlənməsinə, eyni zamanda, onların karyera qurmaq istiqamətində axtarışlarına təkan verəcək.“AzerGold” QSC-nin idarə heyətinin sədri Zakir İbrahimov vurğulayıb ki, ölkəmizin ali təhsil müəssisələri içərisində müasir baxışları və tədrisin keyfiyyəti ilə seçilən AzMİU ilə əməkdaşlıqda maraqlıdırlar. O qeyd edib ki, bu əməkdaşlığın məqsədi gələcək mütəxəssislərin ixtisas biliklərinin artırılması, istiqamətləndirilmiş təhsil, elm, istehsalat və birgə təhsil proqramları sahəsində qarşılıqlı maraq doğuran fəaliyyətin yaradılmasıdır.Qeyd olunub ki, bu əməkdaşlıq ölkəmizdə dağ-mədən hasilatı sahəsinin inkişafına müsbət təsir göstərəcək. Razılaşmaya əsasən, universitet “AzerGold” QSC üçün mədənçıxarma sənayesinin inkişafına və bu sənaye ilə əlaqədar infrastruktur layihələrin icrasına cəlb olunacaq müasir tələblərə cavab verən ixtisaslı mütəxəssislərin hazırlanmasına dəstək göstərəcək. Bunun üçün universitetin təhsil prosesinə QSC mütəxəssislərinin cəlb edilməsi, birgə simpozium və konfransların təşkili, müvafiq ixtisas üzrə təhsil alan 2-ci və 4-cü kurs tələbələrinin “yay məktəbi” proqramı çərçivəsində “AzerGold” QSC-də təlimlər keçməsi və s. nəzərdə tutulub.xeber100.com
