Azərbaycanın “Konstitusiya və Suverenlik İli”nə həsr olunan açıq dərs keçirilib

Türkiyədəki səfirliyimizin nəzdində fəaliyyət göstərən Azərbaycan Mədəniyyət Mərkəzinin layihəsi ilə Qazi Universitetində yaradılmış Azərbaycan dilinin Tədrisi Ocağında tariximizə dair ilk açıq dərs “Konstitusiya və Suverenlik İli”nə həsr olunub. Tədbirdə Qazi Universitetinin və Mədəniyyət Mərkəzinin nümayəndələri, Azərbaycan dili kurslarının tələbələri və ziyalılar iştirak ediblər. Əvvəlcə Azərbaycanın suverenliyinin təmin edilməsi, 44 günlük Vətən müharibəsi, qazanılan zəfərə dair qısa sənədli film nümayiş etdirilib. Açıq dərsdə Türkiyəli tələbələr Oğuzhan Arslan və Zuhal Çelikkesenin “Konstitusiya və Suverenlik İli”nə həsr edilmiş təqdimatları dinlənilib. Tədbirdə çıxış edən Türkiyədəki Azərbaycan Mədəniyyət Mərkəzinin direktoru Samir Abbasov müstəqil və suveren dövlətə sahib olmaq üçün Azərbaycanın keçdiyi çətin və şərəfli yoldan danışıb. O, ölkəmizin müstəqilliyin ilk illərində yaşadığı çətinliklər, 1993-cü ildə xalqın tələbi ilə yenidən hakimiyyətə qayıtmış Azərbaycan xalqının Ümummilli Lideri Heydər Əliyevin böyük xilaskarlıq missiyası sayəsində ölkəmizdə ictimai-siyasi sabitliyin təmin edildiyini və dövlətçiliyimizin, müstəqilliyimizin əbədi olaraq möhkəmləndirildiyini vurğulayıb. Digər natiqlər Qazi Universiteti Təhsil fakültəsinin dekanı professor Ferudin Sezgin, Azərbaycan dili kursunun pedaqoqu, Qazi Universitetinin doktorantı Şehla İbişova, Türkiyədə Azərbaycanlı Tələbə Gənclər Təşkilatının sədri Elçin Cəfərli Konstitusiya və suverenliyin hər bir azad dövlət üçün müstəqil yaşamın əsas göstəricisi olduğunu söyləyərək, Prezident İlham Əliyevin 2025-ci ili “Konstitusiya və Suverenlik İli” elan etməsini müstəqillik tariximizdə önəmli hadisə kimi səciyələndiriblər.xeber100.com

Ümumdünya Kitab və Müəlliflik Hüququ Gününə həsr olunmuş kitab sərgisi keçiriləcək

Bakı Dövlət Universiteti (BDU) və “Azərbaycan Nəşriyyatları Assosiasiyası” İctimai Birliyinin birgə təşkilatçılığı ilə 23 Aprel - Ümumdünya Kitab və Müəlliflik Hüququ Gününə həsr olunmuş kitab sərgisi keçiriləcək. Bu barədə BDU-dan məlumat verib. Sərginin keçirilməsində məqsəd kitabların insan həyatındakı böyük rolunu, müəlliflik hüququnun mədəni irsin yaranması və qorunub saxlanmasında əhəmiyyətini vurğulamaq, gənc nəslin diqqətini mədəni irsin və adət-ənənələrimizin qorunub saxlanmasına yönəltməkdir. BDU-nun həyətində keçiriləcək sərgidə ölkənin tanınmış nəşriyyatları və kitab mağazaları iştirak edəcək.xeber100.com

31 Mart – Azərbaycanlıların Soyqırımı Gününə həsr olunmuş sərgi təşkil edib

Bakı Dövlət Universitetinin (BDU) Elmi Kitabxanası 31 Mart - Azərbaycanlıların Soyqırımı Gününə həsr olunmuş sərgi təşkil edib. BDU-dan bildirilib ki, sərgidə kitabxananın fondlarında mühafizə olunan, ermənilərin Azərbaycan türklərinin başına gətirdikləri dəhşətli qırğınlardan bəhs edən, Azərbaycan, ingilis və rus dillərində 50-yə yaxın kitab nümayiş olunur. XX əsrdə Ermənistanın Azərbaycana qarşı əsassız ərazi iddiaları və separatizm tarixinin obyektiv təhlilini özündə əks etdirən, çoxsaylı arxiv sənədləri və materialları əsasında qələmə alınmış nəşrlər tariximizin bu dövrünü tədqiq edənlər üçün mühüm mənbə rolunu oynayacaq.xeber100.com

Bakı Dövlət Universitetinin yubileyi ilə əlaqədar tədbirlər planı hazırlanacaq

Bakı Dövlət Universitetinin (BDU) 105 illik yubileyi ilə əlaqədar tədbirlər planı hazırlanacaq. BDU-dan bildirilib ki, bu barədə Elmi şuranın bugünkü iclasında qərar qəbul edilib. İclasda bildirilib ki, 1919-cu il sentyabrın 1-də Azərbaycan Xalq Cümhuriyyətinin Parlamenti tarixi qərara imza ataraq, Bakı Dövlət Universitetinin təsisi haqqında qanun qəbul edib. BDU 105 il ərzində xalqımızın maariflənməsində, milli düşüncənin inkişafında, yüksəkixtisaslı kadrların yetişməsində mühüm rol oynayıb. BDU-nun inkişafında yeni və mühüm mərhələ 1969-cu ildə Ümummilli Lider Heydər Əliyevin ölkəyə rəhbərlik etməsi ilə başlanıb. Universitetin elm və təhsil flaqmanı kimi şöhrətlənməsi məhz bu tarixdən sonra gerçəkləşib. Azərbaycan dövlət müstəqilliyini bərpa etdikdən sonra BDU Ulu Öndər Heydər Əliyevin diqqət və qayğısı sayəsində inkişafının yeni və daha parlaq mərhələsinə qədəm qoyub. Bu gün isə həmin tarixi missiyanı Azərbaycan Respublikasının Prezidenti İlham Əliyev davam etdirir. Prezident İlham Əliyevin Sərəncamı ilə 2019-cu ildə universitetin 100 illik yubileyinin təntənəli şəkildə qeyd olunması, əməkdaşların ali dövlət mükafatları ilə təltif edilməsi BDU ailəsinin hər bir üzvü tərəfindən ehtiramla xatırlanır. 105 il əvvəl 2 fakültə, 44 nəfərlik professor-müəllim heyəti və 1094 tələbə ilə fəaliyyətə başlayan universitet hazırda 16 fakültə, 120 kafedra, 2 elmi-tədqiqat institutu, Tədqiqat, İnkişaf və İnnovasiyalar üzrə Mükəmməllik Mərkəzi, 4 elmi-tədqiqat mərkəzi və 21 elmi-tədqiqat laboratoriyası, 2 milyondan çox kitab fondu olan Elmi Kitabxana, 5 muzey, 5 beynəlxalq institut və mərkəz, 1 filial, 1 kollec və 1 liseylə müqəddəs yola davam edir.xeber100.com

Yanvarın 27-də 2023-2024-cü tədris ili üzrə qış tətili başlayacaq

Yanvarın 27-dən ümumi təhsil müəssisələrində 2023-2024-cü tədris ili üzrə qış tətili başlayacaq. Məktəbəqədər və Ümumi Təhsil üzrə Dövlət Agentliyindən bildirilib ki, qış tətili yanvarın 27-dən 31-dək (5 gün) olacaq. Fevralın 1-i ikinci yarımilin ilk dərs günüdür.xeber100.com

Bakı Dövlət Universitetində payız semestrinin qış imtahan sessiyası davam edir

Bakı Dövlət Universitetində (BDU) 2023-2024-cü tədris ilinin payız semestrinin qış imtahan sessiyası davam edir. Yanvarın 15-də bakalavriatura səviyyəsində 279 qrup üzrə 5620 tələbə, magistratura səviyyəsində isə 200 ixtisaslaşmada 660 gənc imtahan verir. Bu barədə BDU-dan məlumat verilib. İmtahanlar iki növbədə (bakalavriatura səviyyəsi üzrə yazılı imtahanlar saat 10.00-13.00-dək, şifahi və magistratura səviyyəsi üzrə imtahanlar saat 14.00-17.00-dək) keçirilir. Sessiya zamanı üzrlü və üzrsüz səbəblərdən imtahanda iştirak etməyən təhsilalanlara həmin fənlərdən imtahan vermək üçün fevral ayının 5-dən 14-dək şərait yaradılacaq. Sessiyanın gedişinə operativ nəzarət, tələbələrin biliyinin qiymətləndirilməsində şəffaflığı təmin etmək məqsədilə İmtahan Qərargahı və Apellyasiya Komissiyası yaradılıb. Komissiya sessiya müddətində imtahanların gedişi ilə əlaqədar ərizə, təklif, Elm və Təhsil Nazirliyinin "Qaynar xətt"i vasitəsilə daxil olmuş şikayətlərin araşdırılmasını təmin edəcək.xeber100.com

Bakı Şəhəri üzrə Təhsil İdarəsi: Şahmat idman növü üzrə turnir keçirilib

Paytaxt məktəbliləri arasında şahmat idman növü üzrə turnir keçirilib. Bu barədə Bakı Şəhəri üzrə Təhsil İdarəsindən məlumat verilib. Bildirilib ki, Bakı şəhəri 216 nömrəli tam orta məktəbdə keçirilən yarış Ümummilli Lider Heydər Əliyevin 100 illiyinə həsr olunub. Bakı Şəhər Gənclər və İdman İdarəsinin Xəzər rayon gənclər və idman sektoru və 216 nömrəli tam orta məktəbin birgə təşkilatçılığı ilə baş tutan yarışda Xəzər rayonundakı məktəblərin şahmatçı şagirdləri mübarizə aparıblar. Turnirdə 149 nömrəli tam orta məktəbin komandası I, 26 nömrəli tam orta məktəbin komandası II, 234 nömrəli tam orta məktəbin komandası isə III yerə layiq görülüb. Qaliblərə medal və diplomlar təqdim olunub.xeber100.com

VII qrant müsabiqəsi çərçivəsində intellektual yarış layihəsi öz işini davam etdirir

Elm və Təhsil Nazirliyinin Təhsildə inkişaf və innovasiyalar üzrə VII qrant müsabiqəsi çərçivəsində ümumtəhsil məktəbləri kateqoriyası üzrə qalib gəlmiş “Sən elə bir Zirvəsən-100” məktəblilərarası intellektual yarış layihəsi öz işini davam etdirir. Bu barədə 189-190 nömrəli tam orta məktəbdən məlumat verilib. Bildirilib ki, icra planına əsasən layihə rəhbəri, 189-190 nömrəli tam orta məktəbin direktoru Fayaz Hüseynov, layihənin aparıcısı və təlimçi Rifah Zeynalov, eksperti Elnarə Nərimanova və yarışda iştirak edəcək 16 məktəbin təşkilatçı rəhbərləri ilə görüş keçirilib, onlara yarışın qaydaları barədə məlumat verilib. Fayaz Hüseynov layihənin məktəblər arasında əməkdaşlığa, şagirdlərdə liderlik bacarığının formalaşdırılmasında böyük rolu olacağını söyləyib. Qeyd edək ki, 16 komanda 2 qrupa bölünərək yarış keçirilib və yarımfinal turunun qalibləri bəlli olub. Yarışda A qrupunda 2 texniki-humanitar liseyin “DDK” komandası, 7 nömrəli məktəb liseyin “Versus”, 8 nömrəli tam orta məktəbin “Zirvə”, 16 nömrəli texniki-humanitar liseyin “Dəmir yumruq”, 18 nömrəli tam orta məktəbin “Batalyon”, 49 nömrəli tam orta məktəbin “Qarabağ”, 53 nömrəli tam orta məktəbin “Xudafərin”, 60 nömrəli tam orta məktəbin “Flaqman” komandaları mübarizə aparır. B qrupunda isə 20 nömrəli məktəb-liseyin “Triumf”, 50 nömrəli məktəbin “Gənc Heydərçilər”, 147 nömrəli tam orta məktəbin “Mübarizlər”, 160 nömrəli tam orta məktəbin “ 160%”, 167 nömrəli tam orta məktəbin “Xarıbülbül” komandası, 175 nömrəli tam orta məktəbin “Xəyal”,189-190 nömrəli tam orta məktəbin “Clever”, 236 nömrəli tam orta məktəbin “Zəfər” komandaları qalibiyyət uğrunda bilik yarışında mübarizə aparırlar. Yarışmaya aid foto və videolar daim layihənin feysbuk səhifəsində paylaşılır.xeber100.com

Əlyazmalar İnstitutunun 2023-cü il ərzində elmi və elmi-təşkilati fəaliyyətinə dair hesabatında

Bu ilin yanvar-noyabr ayları ərzində XVII-XX əsrlərə aid 53 yeni əlyazma abidəsi AMEA-nın Məhəmməd Füzuli adına Əlyazmalar İnstitutunun fonduna daxil edilib. Bundan başqa, müəssisənin saxlanclarında mühafizə olunan 2302 nüsxənin elektron versiyası yaradılıb, 65 əlyazma kitabı və 8000 vərəq arxiv materialı bərpa edilərək xəzinəyə qaytarılıb. Bu, Əlyazmalar İnstitutunun 2023-cü il ərzində elmi və elmi-təşkilati fəaliyyətinə dair hesabatında əks olunub. Qeyd olunub ki, bu müddətdə 25 yeni kitab, o cümlədən monoqrafiyalar nəşr etdirilib, ölkədə və xaricdə 100-dən çox elmi məqalə, 90-dan artıq konfrans materialı işıq üzü görüb, 2 elmlər doktoru, 5 fəlsəfə doktoru dissertasiya işi müdafiə edilib. Həmçinin aparıcı beynəlxalq əlyazma mərkəzləri, muzey və kitabxanalarla münasibət qurulub, bir neçəsi ilə əməkdaşlıq müqavilələri imzalanıb, institut əməkdaşları ölkədə və xaricdə təşkil olunan beynəlxalq tədbirlərdə iştirak ediblər. Bütövlükdə hesabat Elmi şura üzvləri tərəfindən yüksək qiymətləndirilib və yekdilliklə qəbul olunub.xeber100.com

Dövlət İmtahan Mərkəzi noyabr ayında göstərilmiş xidmətlərin statistikasını açıqlayıb

Dövlət İmtahan Mərkəzi (DİM) tərəfindən noyabr ayında göstərilmiş xidmətlərin statistikası açıqlanıb. DİM-dən bildirilib ki, noyabr ayında keçirilmiş imtahanlarda 6581 nəfər iştirak edib. Mərkəzin elektron xidmətlərindən istifadə sayı 76 min 945 olub. Noyabr ayı ərzində 1409 vətəndaş qəbul edilib. Beynəlxalq imtahanlarda 202 nəfər iştirak edib. Çağrı Mərkəzi vasitəsilə 6456, elektron poçt vasitəsilə 1800-ə yaxın, sosial şəbəkələr vasitəsilə 2000-ə yaxın müraciət cavablandırılıb. Çatbota daxilolma sayı 2127 olub.xeber100.com

“Maarifçi” tələbə-məzun təcrübə proqramına qeydiyyat prosesi davam edir

Elm və Təhsil Nazirliyi və Təhsilin İnkişafı Fondunun təşəbbüsü ilə həyata keçirilən “Maarifçi” tələbə-məzun təcrübə proqramına qeydiyyat prosesi davam edir. Nazirlikdən bildirilib ki, elm və təhsil sahəsində karyera qurmağı hədəfləyən, təhsil sahəsinə dair müasir yanaşmaları öyrənmək və təhsil islahatları prosesinin iştirakçısı olmaq istəyən şəxslər “Maarifçi” proqramına qoşulmaqla Elm və Təhsil Nazirliyində, həmçinin qurumlarında təcrübə keçmək imkanı əldə edəcəklər. Proses dekabrın 15-dək davam edəcək.xeber100.com  

Alexandru İoan Cuza İasi Universiteti tələbələrin müraciətlərini qəbul edir

Rumıniyanın Alexandru İoan Cuza İasi Universiteti 2023-2024-cü tədris ili üçün “Erasmus” beynəlxalq müəllim-tələbə mübadilə proqramı çərçivəsində tələbələrin (bakalavr, magistrant, doktorant) və akademik heyətin müraciətlərini qəbul edir. Bu barədə Bakı Dövlət Universitetindən məlumat verilib. Akademik heyət üçün tələb olunan sənədlər: CV, motivasiya məktubu, elmi əsərlərin siyahısı, iş yerindən arayış. Tələbələr üçün tələb olunan sənədlər: CV, motivasiya məktubu, akademik transkript. İxtisaslar: fizika, kimya, biologiya Bu il noyabrın 3-dək müraciət etmək olar. Sənədlər kağız (BDU-nun Beynəlxalq əlaqələr şöbəsinə - əsas bina, 2-ci mərtəbə) və elektron formada (erasmus@bsu.edu.az) təqdim olunmalıdır.xeber100.com

Dilçilik İnstitutunda fəlsəfə və elmlər doktoru hazırlığı üzrə doktoranturaya qəbul imtahanı keçirilib

Sentyabrın 22-də Azərbaycan Milli Elmlər Akademiyası Nəsimi adına Dilçilik İnstitutunda fəlsəfə və elmlər doktoru hazırlığı üzrə doktoranturaya qəbul imtahanı keçirilib. İnstitutdan bildirilib ki, imtahan prosesi Ali Attestasiya Komissiyasının tələblərinə uyğun olaraq təşkil edilib. Müvafiq ixtisaslar üzrə komissiya üzvləri imtahan prosesini izləyib. Komissiyanın sədri, elmi müəssisənin baş direktoru professor Nadir Məmmədli gənclərə uğurlar diləyib. Təhsil şöbəsinin müdiri filologiya üzrə fəlsəfə doktoru, dosent Rasim Heydərov 2023-cü tədris ili üçün Azərbaycan dili, dil nəzəriyyəsi, german dilləri və tətbiqi dilçilik ixtisaslarından elmlər doktoru və fəlsəfə doktorluğu hazırlığı üzrə doktorantura və dissertanturaya sənədləri qəbul edilmiş şəxslər barədə məlumat verib. Xarici dil və fəlsəfə imtahanlarından uğurla keçən iddiaçılar Azərbaycan dili və dil nəzəriyyəsi ixtisasları üzrə təqdim olunan imtahan biletlərini verilən vaxt ərzində cavablandırıblar. İddiaçıların imtahan nəticələri komissiya üzvləri tərəfindən “yaxşı” və “əla” qiymətləndirilib.xeber100.com

Bakı Dövlət Universitetində əsaslı təmir işləri başa çatmaq üzrədir

Bakı Dövlət Universitetinin (BDU) 2 saylı korpusunda əsaslı təmir işləri başa çatmaq üzrədir. Bu barədə universitetdən məlumat verilib. Bildirilib ki, binanın zirzəmisindən damına qədər bütün mərtəbələri, auditoriyalar, inzibati otaqlar, laboratoriyalar, sanitar qovşaqlar, liftlər müasir standartlara uyğun şəkildə yenidən qurulub, bütün kommunikasiya xətləri, yanğınsöndürmə sistemi yenilənib. Geniş auditoriyalar proyektor, kondisioner və mebellərlə təzhiz olunub. Qazanxana və drenaj sistemi yenilənib. Korpusda təhsilalanların dərsdənkənar və asudə vaxtlarının keçirilməsi üçün də xüsusi şərait yaradılıb. Korpusun həyətində xüsusi abadlıq işləri həyata keçirilib. Ən müasir standartlara cavab verən korpus yeni tədris ilindən müəllim və tələbələrin ixtiyarına veriləcək. Əsaslı təmir işləri mərhələli şəkildə BDU-nun digər tədris korpuslarında da davam etdiriləcək.xeber100.com

Qəbul imtahanlarında 1206 nəfər 500 baldan yuxarı nəticə göstərib

Bu il ali məktəblərə keçirilən qəbul imtahanlarında dördüncü ixtisas qrupu üzrə 1206 nəfər 500-dən yuxarı bal toplayaraq müsabiqədə iştirak etmək hüququ qazanıb. Bu barədə Dövlət İmtahan Mərkəzindən məlumat verilib. Bildirilib ki, bu il IV qrup üzrə müsabiqəyə (həm dövlət sifarişi əsasında, həm də ödənişli əsaslarla qəbul aparılan yerlər üzrə) ümumi balı 200-dən, imtahanın ikinci mərhələsi üzrə balı 100-dən az olmayan abituriyentlər buraxılırlar. Xatırladaq ki, ali təhsil müəssisələrinə tələbə qəbulu müsabiqəsində iştirak etmək üçün ixtisas seçimi davam edir. İxtisas seçimi bütün qruplar üzrə avqustun 28-i saat 23:59-dək internet vasitəsilə aparılır. İxtisas seçmək hüququ olan abituriyentlər (o cümlədən subbakalavrlar) müsabiqə şərtini ödədikləri ixtisas qrupuna (qruplarına), o cümlədən altqrupuna (altqruplarına) aid olan 15-dək ixtisasın kodunu qeyd edə bilərlər.xeber100.com

Dövlət İmtahan Mərkəzinin məlumatı əsasında…

2023/2024-cü tədris ili üçün respublika ali təhsil müəssisələrinin IV ixtisas qrupuna Azərbaycan və rus bölmələri, hər iki bölmənin birgə müsabiqəsi üzrə tələbə qəbulu planı və dövlət sifarişi üzrə yerlərin sayını təqdim edilib. Dövlət İmtahan Mərkəzindən (DİM) bildirilib ki, 2023/2024-cü tədris ili üçün ali təhsil müəssisələrinin IV ixtisas qrupunda Azərbaycan bölməsi üzrə 3165, rus bölməsi üzrə 365, hər iki bölmənin birgə müsabiqəsi üzrə 570 olmaqla cəmi 4 min 100 plan yeri nəzərdə tutulur. 3045 yer üzrə qəbul isə dövlət sifarişi əsasında aparılır. Qeyd edək ki, psixologiya və kimya ixtisaslarının hər biri üçün dövlət sifarişi üzrə ayrılmış 25 yerin müsabiqəsində M.V.Lomonosov adına Moskva Dövlət Universitetinin Bakı filialına qəbul üçün sənəd vermiş abituriyentlər də iştirak edirlər. Tibb ixtisası üçün dövlət sifarişi üzrə ayrılmış 85 yerin müsabiqəsində İ.M.Seçenov adına Birinci Moskva Dövlət Tibb Universitetinin Bakı filialına qəbul üçün sənəd vermiş abituriyentlər də iştirak edirlər. Xatırladaq ki, ali təhsil müəssisələrinə tələbə qəbulu müsabiqəsində iştirak etmək üçün ixtisas seçimi davam edir. İxtisas seçimi bütün qruplar üzrə avqustun 28-i saat 23:59-dək internet vasitəsilə aparılır. İxtisas seçmək hüququ olan abituriyentlər (o cümlədən subbakalavrlar) müsabiqə şərtini ödədikləri ixtisas qrupuna (qruplarına), o cümlədən altqrupuna (altqruplarına) aid olan 15-dək ixtisasın kodunu qeyd edə bilərlər.

İxtisas seçimi bu ayın 28-də saat 23.59-da yekunlaşacaq

Ali təhsil müəssisələrinə qəbul olmaq üçün abituriyentlərin avqustun 16-dan başlanan ixtisas seçimi davam edir. İxtisas seçimi bu ayın 28-də saat 23.59-da yekunlaşacaq. İxtisas seçmək hüququ olan abituriyent müsabiqə şərtini ödədiyi ixtisas qrupuna (qruplarına), o cümlədən altqrupuna (altqruplarına) aid olan 15-dək ixtisasın kodunu qeyd edə bilər. Dövlət İmtahan Mərkəzindən (DİM) verilən məlumata görə, saat 10:55-dək bakalavriat səviyyəsi üzrə ali təhsil müəssisələrinə elektron ixtisas seçimi ərizələrinin ümumi sayı 56278 təşkil edib. İxtisas seçənlər arasında say çoxluğu I qrupa aiddir (16774 nəfər). Sonrakı yerdə 16326 nəfərlə III qrup gəlir. II qrupda 13089 abituriyent, IV qrupda isə 4381 abituriyent elektron ərizəsini təsdiqləyib. V qrupda ərizəsini təsdiqləyən abituriyentlərin sayı 8045 nəfərdir.xeber100.com

Bakı Dövlət Universitetində elmi konfrans keçiriləcək

Dekabrın 4-5-də Bakı Dövlət Universitetində (BDU) İnformasiya və sənəd menecmenti fakültəsinin təşkilatçılığı ilə Xalq yazıçısı Anarın 85 illik yubileyinə həsr olunmuş “Mütaliə mədəniyyəti və oxucu məmnunluğu” mövzusunda Respublika elmi konfransı keçiriləcək. Bu barədə BDU-dan məlumat verilib. Konfransda müasir oxucu, onun tipologiyası, informasiya tələbatının ödənilməsi sistemi, mütaliə vərdişlərinin formalaşmasına təsir edən amillər araşdırılacaq. İnformasiya mədəniyyətinin əsas missiyası, mütaliə prosesinin davamlılığı, oxucu məmnunluğunun meyarları kimi aktual istiqamətlər elmi müstəvidə tədqiq ediləcək. Tədbirdə sənəd və informasiya menecmenti, informasiya logistikası, mütaliə mədəniyyəti, kitabşünaslıq, kitabxanaşünaslıq, biblioqrafiyaşünaslıq, redaktə etmə, kitab sənayesi, müəlliflik hüququ və əlaqəli hüquqlar kimi sahələr üzrə məruzələr dinləniləcək, müzakirələr aparılacaq.xeber100.com  

Dövlət İmtahan Mərkəzi: Müsabiqənin nəticələri elan olunub

Azərbaycan Respublikasının ali təhsil müəssisələrinin magistraturalarının boş qalan plan yerləri ilə bağlı müsabiqənin nəticələri Dövlət İmtahan Mərkəzinin (DİM) saytında yerləşdirilib. DİM-dən bildirilib ki, bakalavrlar müsabiqənin nəticələri haqqında məlumatı mobil operatorlar (Azercell, Bakcell, Nar, Naxtel) vasitəsilə “iş nömrəsi”ni 7727 nömrəsinə göndərməklə də öyrənə bilərlər. Magistraturanın boş qalan plan yerlərinin müsabiqəsində iştirak etmək üçün 2900 bakalavr müraciət edib. Müsabiqə nəticəsində onlardan 1055 nəfər (o cümlədən 150 nəfər dövlət sifarişi əsasında) magistraturaya qəbul olub. Qəbul olan bakalavrların siyahısı, müsabiqə nəticəsində formalaşmış keçid balları “Magistr” jurnalının 7-ci sayında veriləcək. Jurnalın elektron versiyasını (PDF formatında) sabah günün ikinci yarısından etibarən DİM saytının "Elektron xidmətlər" bölməsində "DİM nəşrlərinin elektron versiyalarının onlayn satışı" xidməti vasitəsilə ödəniş etməklə də əldə edə bilərsiniz.xeber100.com

Dövlət İmtahan Mərkəzində TOEFL iBT imtahanı keçirilib

Avqustun 23-də Dövlət İmtahan Mərkəzində (DİM) TOEFL iBT imtahanı keçirilib. İmtahan DİM-in Nəsimi rayonu, Ə.Salamzadə küçəsi, 28 ünvanında yerləşən binasında təşkil olunub. DİM-dən bildirilib ki, imtahanda 20 nəfər iştirak edib. İştirakçılar imtahanın nəticələrini ETS-in saytında yaradılmış şəxsi hesab vasitəsilə 6 gün sonra onlayn şəkildə öyrənə bilərlər. Növbəti TOEFL iBT imtahanının sentyabrın 6-da keçirilməsi nəzərdə tutulur. Qeydiyyatdan keçmək qaydaları haqqında ətraflı məlumat DİM-in saytında yerləşdirilib.xeber100.com