İran Silahlı Qüvvələri: Hörmüz boğazını keçməyə cəhd edən hücuma məruz qalacaq

Hörmüz boğazına yaxınlaşan və ya onu keçməyə cəhd edən ABŞ-nin bütün hərbi gəmiləri hücuma məruz qalacaq. Əl-Cəzirə telekanalının məlumatına görə, bu barədə İran Silahlı Qüvvələrinin bəyanatında deyilir. Bəyanatda bildirilir ki, boğaz İran Silahlı Qüvvələrinin nəzarətindədir və istənilən vəziyyətdə təhlükəsiz keçid və naviqasiya Tehranla əlaqələndirilərək həyata keçirilməlidir. Tehran, həmçinin bütün ticarət gəmilərinə və tankerlərə İran Silahlı Qüvvələri ilə əlaqə saxlamadan Hörmüz boğazında hər hansı bir tranzit hərəkətlərindən çəkinməyə çağırıb.xeber100.com

OPEC+ könüllü ölkələrinin növbəti görüşü keçiriləcək

OPEC+ könüllü ölkələrinin növbəti görüşü bu il iyunun 7-də - alyansın nazirlərinin görüşü ilə eyni gündə keçiriləcək. Bu tədbirdə 2027-ci il üçün kvotaların hesablanacağı maksimum dayanıqlı istehsal gücü (MSC) razılaşdırıla bilər. Xarici media xəbər verir ki, bundan əvvəl neft hasilatını müəyyən edilmiş kvotalardan kənara çıxaraq könüllü azaldan yeddi OPEC+ ölkəsi 2026-cı ilin iyun ayında istehsal həcmlərinin tədricən bərpasını davam etdirmək qərarına gəlib. Bu qərar videokonfrans vasitəsilə keçirilən görüşdə razılaşdırılıb. Bu ölkələr Səudiyyə Ərəbistanı, Rusiya, İraq, Küveyt, Qazaxıstan, Əlcəzair və Omandır. Bu koalisiya əvvəllər “Səkkizlik qrupu” kimi tanınırdı, lakin Birləşmiş Ərəb Əmirlikləri 1 may 2026-cı il tarixindən etibarən müstəqil istehsal siyasəti yürütmək niyyətində olduğunu bildirərək OPEC və OPEC+-dan çıxıb. BƏƏ-nin bu addımı nəzərə alınıb və hasilatın bərpa sürəti tənzimlənib. Ölkələr aprel və may aylarında bazara gündəlik 206 min barel neft çıxarsalar da, iyun ayında bu rəqəm sutkalıq 188 min barel olacaq. Nəticədə könüllü ölkələrin ümumi hasilatı gündə 30.447 milyon barelə çatacaq. Əvvəllər azaldılmış həcmlərin (gündəlik 1.65 milyon barel) bərpası 2025-ci ilin oktyabr ayında başlayıb. 2026-cı ilin birinci rübündə mövsümi amillər səbəbindən proses müvəqqəti olaraq dayandırılıb, daha sonra yazda yenidən sürətlənib. OPEC-in Kommünikesində ölkələrin neft bazarının sabitliyini təmin etməyə sadiq qaldığı, tələb və təklifdəki dəyişikliklərə çevik reaksiya verməyə hazır olduqları vurğulanır. Bazar şəraitindən asılı olaraq, hasilatın daha çox artırılması, fasilə və ya əlavə məhdudiyyətlərə qayıtma variantları da mümkündür.xeber100.com  

Pakistan Xarici İşlər Nazirliyinin açıqlamasına əsasən…

Pakistan XİN-in bazar ertəsi, mayın 4-də dərc olunan rəsmi açıqlamasında bildirilir ki, bu ölkənin baş diplomatı İshaq Dar İslamabadın davam edən Yaxın Şərq münaqişəsinin danışıqlar yolu ilə həlli üçün ABŞ və İran arasında birbaşa danışıqları canlandırmaq səylərinin bir hissəsi olaraq iranlı həmkarı Abbas Araqçi ilə telefon danışığı aparıb. Pakistan Xarici İşlər Nazirliyinin açıqlamasına istinadla xəbər verir ki, nazirlər “regional vəziyyət və Pakistanın regionda sülh və sabitlik üçün davam edən diplomatik səyləri” ətrafında fikir mübadiləsi aparıblar. Abbas Araqçi konstruktiv roluna və iki tərəf arasında səmimi vasitəçilik səylərinə görə Pakistana minnətdarlıq edib. Bəyanatda əlavə edilib ki, Dar Pakistanın konstruktiv əməkdaşlığı təşviq etmək öhdəliyini bir daha təsdiqləyib, dialoq və diplomatiyanın münaqişənin sülh yolu ilə həlli, regionda və ondan kənarda davamlı sülh və sabitliyə nail olmaq üçün yeganə mümkün vasitə olaraq qaldığını vurğulayıb. Bu telefon danışığı İran Xarici İşlər Nazirliyinin Tehranın müharibəyə son qoymaq üçün yenidən işlənmiş 14 maddəlik təklifi ilə bağlı ABŞ-nin cavabını nəzərdən keçirdiyini bildirməsindən bir neçə saat sonra baş tutub. İran nüvə məsələsinin son təklifinin bir hissəsi olmadığını bildirib və iki tərəf arasında daimi atəşkəs əldə edildikdən sonra çətin məsələnin danışıqların ikinci mərhələsində müzakirə edilməsi variantını irəli sürüb. Vasitəçiliklə tanış olan Pakistan mənbələri Anadolu agentliyinə bildiriblər ki, ABŞ İslamabad vasitəsilə İrana verdiyi cavabda İranın nüvə proqramı ilə bağlı razılaşmanı daimi atəşkəslə birləşdirib. Mənbələrə görə, İranın yenidən işlənmiş təklifində atəşkəsin müharibənin daimi sonuna çevrilməsi və nüvə məsələsinin sonrakı mərhələyə təxirə salınması təklif olunmuşdu. Pakistan 11-12 aprel tarixlərində Vaşinqton və Tehran arasında danışıqların birinci mərhələsinə ev sahibliyi edib, lakin müharibəyə son qoymaq üçün razılıq əldə olunmayıb. Danışıqlar aprelin 8-də Pakistanın vasitəçiliyi ilə əldə edilən və daha sonra ABŞ Prezidenti Donald Tramp tərəfindən uzadılmış ikihəftəlik atəşkəsdən sonra baş tutub.xeber100.com

Müdafiə sənayesi müəssisələrində istehsal olunan hərbi məhsulların tədarükü davam edir

Serbiya, həmçinin Bosniya və Herseqovinadan üçüncü ölkələr vasitəsilə Ukraynaya hərbi texnika və sursat göndərilir. TASS agentliyi bu barədə mənbələrinə istinadla məlumat yayıb. Məlumata görə, Serbiya, həmçinin Bosniya və Herseqovinanın müdafiə sənayesi müəssisələrində istehsal olunan hərbi məhsulların üçüncü ölkələr vasitəsilə Ukraynaya tədarükü davam edir. İndiyədək Serbiyanın heç bir şirkəti təchizata görə cəzalandırılmayıb. “Görünür, onlar bu tədbirlərin tamamilə formal olduğu və bunun heç bir praktik nəticəyə səbəb olmayacağı qənaətinə gəliblər”, - deyə mənbə bildirib.xeber100.com

TASS agentliyi: Avropaya qaz ixracı 7 faiz artaraq 6,2 milyard kubmetrə çatıb

Rusiyanın Avropa Qaz Ötürücü Sistemi Operatorları Şəbəkəsinin (ENTSOG) məlumatlarına əsaslanan TASS agentliyinin hesablamalarına görə, yanvar-aprel aylarında “Türk axını” boru kəməri ilə Avropaya qaz ixracı 7 faiz artaraq 6,2 milyard kubmetrə çatıb. Agentliyin məlumatına görə, bu kəmər vasitəsilə Avropaya qaz ixracı cari ilin birinci rübündə 10 faiz artıb. Aprel ayında bu marşrutla Avropaya Rusiya qazının ixracı mart ayı ilə müqayisədə 28 faiz, 2025-ci ilin aprel ayı ilə müqayisədə isə 2 faiz azalaraq 1,23 milyard kubmetr olub. Aprel ayında “Türk axını” boru kəmərinin Avropa istiqamətində orta gündəlik tutumu (41 milyon kubmetr) 2025-ci ilin aprel ayı ilə müqayisədə 2 faiz, mart ayı ilə müqayisədə isə 26 faiz az olub. Beləliklə, boru kəməri ötən ay 72 faiz işlək vəziyyətdə olub. Daha əvvəl TASS ENTSOG məlumatlarına istinadla bildirmişdi ki, 2025-ci ildə “Türk axını” qaz kəməri ilə Avropaya tədarük 8,3 faiz artaraq rekord həddə - 18,1 milyard kubmetrə çatıb. Rusiya, həmçinin 2025-ci ilə qədər Türkiyəyə boru kəməri ilə qaz tədarükünü bir qədər artıraraq 21,2 milyard kubmetrə çatdırıb. Bu tədarük Qara dəniz üzərindən keçən iki boru kəməri – “Mavi axın” və “Türk axını” vasitəsilə həyata keçirilir.xeber100.com  

YLE telekanalı: Finlandiyanın dövlət maliyyəsi təzyiq altındadır

Finlandiya bu il üçün iqtisadi artım proqnozunu aşağı salıb və davam edən Yaxın Şərq böhranını bərpa və inflyasiyaya təsir edən əsas qeyri-müəyyənlik mənbəyi kimi göstərib. Finlandiyanın YLE telekanalının məlumatına istinadla xəbər verir ki, Maliyyə Nazirliyinin rəhbəri Mikko Spolander bildirib: “Yaxın Şərqdəki böhran qeyri-sabitliyi və qeyri-müəyyənliyi artırır, iqtisadi artıma əngəl törədir və bu il Finlandiyada inflyasiyaya səbəb olur”. Spolander qeyd edib ki, düzəliş gözləniləndən daha zəif bərpa şərtlərini və qismən Yaxın Şərqdəki inkişaflarla əlaqəli artan xarici qeyri-müəyyənliyi əks etdirir. Onun sözlərinə görə, iqtisadi göstəricilər üzrə hər hansı bir irəliləyiş böhranın necə və nə vaxt həll olunmasından çox asılı olacaq. Nazir, həmçinin xəbərdarlıq edib ki, Finlandiyanın dövlət maliyyəsi təzyiq altındadır, habelə ümumi dövlət kəsirinin yüksək səviyyədə qalması və gələn il ərzində potensial olaraq genişlənməsi gözlənilir.xeber100.com    

Hörmüz boğazında “müdafiə” beynəlxalq dəniz missiyası fəaliyyətə başlayacaq

Fransanın Xarici İşlər Naziri cümə günü bildirib ki, şərait imkan verdikdən sonra Hörmüz boğazında “müdafiə” beynəlxalq dəniz missiyası fəaliyyətə başlayacaq. Fransız mediası xəbər verir ki, Fransa XİN-in rəhbəri Jan Noel Baro jurnalistlərə bildirib: “Hörmüz boğazının blokadası dayandırılmalıdır. Boğazda heç bir şantaj, blokada və ya heç bir zərər ola bilməz”. O, boğazlardan keçidin beynəlxalq hüquqla tənzimləndiyini və heç bir halda maneə törədilə bilməyəcəyini vurğulayıb. Baro yanacaq qiymətlərinin güclü şəkildə hiss olunduğunu bildirib. O əlavə edib ki, Fransa böhranın başlanğıcından bəri ev təsərrüfatlarını və müəssisələri artan enerji qiymətlərindən qorumaq üçün tədbirlər görür. Nazir yanacaq qiymətlərinin artmasına ən çox məruz qalan sektorlar, o cümlədən balıqçılıq, kənd təsərrüfatı, nəqliyyat və ağır yol istifadəçiləri üçün şokun bir hissəsini aradan qaldırmağa kömək etmək üçün hədəflənmiş dəstəyin tətbiq olunduğunu deyib. Onun sözlərinə görə, Fransa gələcək böhranlara məruz qalma ehtimalını məhdudlaşdırmaq məqsədilə nəqliyyat və istilik sistemlərində elektrikləşdirmə səyləri vasitəsilə karbohidrogenlərdən asılılığı azaltmaq planına start verib. Baronun sözlərinə görə, missiyanın məqsədi şərait imkan verdikdən sonra müşayiət və minatəmizləmə əməliyyatları vasitəsilə dəniz nəqliyyatının mümkün qədər tez bərpa olunmasına şərait yaratmaqdır. xeber100.com  

Çin Xalq Respublikası Ticarət Nazirliyinin bəyanatında…

ABŞ telekommunikasiya sektoruna yeni məhdudiyyətlər tətbiq edərsə, Çin buna qarşı zəruri cavab tədbirləri görəcək. Bu barədə Çin Xalq Respublikası (ÇXR) Ticarət Nazirliyinin bəyanatında bildirilib. Pekin Vaşinqtonu belə səhv təcrübələrdən dərhal əl çəkməyə, bazar qaydalarına hörmətlə yanaşmağa və müvafiq qərarları ləğv etməyə çağırıb. Nazirlik vurğulayıb ki, ABŞ Federal Rabitə Komissiyası texnoloji neytrallıq prinsipindən üz çevirir və milli təhlükəsizlik konsepsiyasından sui-istifadə edir. ÇXR-in iddiasına görə, yeni tədbirlər qlobal elektronika bazarında təchizat zəncirlərinin sabitliyini poza bilər. Qeyd edək ki, bir müddət öncə ABŞ-nin tənzimləyici qurumu Birləşmiş Ştatlarla qarşılıqlı tanınma sazişi olmayan dövlətlərin test və sertifikatlaşdırma qurumlarının ölkə ərazisində fəaliyyətinə icazə verilmədiyi barədə yeni qaydaları açıqlayıb. Sənəd, həmçinin “qara siyahı”ya salınan qurumların ABŞ ərazisində telekommunikasiya xidmətləri göstərmək hüququnu da ləğv edir.

İranın Xarici İşlər Naziri ABŞ-ni müharibənin maliyyətini təhrif etməkdə ittiham edib

İranın Xarici İşlər Naziri Abbas Araqçi cümə günü ABŞ-ni müharibənin maliyyətini təhrif etməkdə ittiham edib. O, rəsmi rəqəmlərin maliyyə yükünü əhəmiyyətli dərəcədə azaltdığını bildirib. “X” sosial media platformasında paylaşım edən Araqçi Pentaqonun müharibənin dəyəri barədə Yanlış məlumat verdiyini və maliyyətin artıq 100 milyard dollara çatdığını qeyd edib. O əlavə edib ki, müharibə ABŞ-yə iddia ediləndən dörd dəfə baha başa gəlib. Araqçi ABŞ vergi ödəyiciləri üçün dolayı xərclərin daha yüksək olduğunu iddia edib. O bildirib: “Amerikada hər bir ailə üçün aylıq izafi ödəniş 500 dollardır və bu məbləğ sürətlə artır”. Bundan əvvəl Pentaqon rəsmisi Kuls Hörst Konqresdə ifadə verərkən İrana qarşı hərbi əməliyyatları indiyə qədər təxminən 25 milyard dollara başa gəldiyini bildirib.xeber100.com

İranın Ali rəhbəri Müctəba Xamenei xalqa müraciət edib

Bu gün bölgədə qlobal quldurların hücum kampaniyasının başlanmasından iki ay və Amerikanın rüsvayçı məğlubiyyətindən sonra Fars (Bəsrə) körfəzi və Hörmüz boğazında yeni dövr başlayır. Medialoq xəbər verir ki, bunu İranın Ali rəhbəri Müctəba Xamenei xalqa müraciətində deyib. İran lideri iddia edib ki, Bəsrə körfəzi ABŞ-siz işıqlı gələcəyə sahib olacaq. “İran Hörmüz boğazına nəzarəti özündə saxlamaqla körfəz regionunun təhlükəsizliyini təmin edəcək və düşmənlərin sui-istifadə imkanlarını aradan qaldıracaq. Boğazda yeni qaydaları və idarəetmə regionun bütün xalqlarına sabitlik və rifah gətirəcək”, – Xamenei bildirib. İranın Ali Rəhbəri əlavə edib ki, “müqavimət” və “güclü İran” strategiyaları sayəsində əldə olunmuş “bu qələbələr zənciri” regionda və dünyada yeni bir nizamın başlanğıcı olacaq.xeber100.com  

Yaponiyada hökumətin yeni tərkibi açıqlanıb

Liberal Demokrat Partiyasının (LDP) sədri Sanae Takaiçinin fevralın 18-də parlamentin hər iki palatasında yenidən Baş nazir vəzifəsinə seçilməsindən sonra Yaponiyada hökumətin yeni tərkibi açıqlanıb. Yaponiya mediası xəbər verir ki, Baş nazir Sanae Takaiçi əvvəlki komandası ilə hökuməti davam etdirməyə qərar verib. Qeyd edək ki, fevralın 8-də növbədənkənar parlament seçkisində Sanae Takaiçinin rəhbərlik etdiyi LDP-nin koalisiya bloku Nümayəndələr Palatasında çoxluq qazanıb. Liberal demokratlar tarixi rekord nəticə göstərərək palatadakı 465 yerdən 316-nı qazanıb. Onun koalisiya tərəfdaşı olan İnnovasiya Partiyası isə 36 mandat əldə edib. Qələbə Baş nazir Sanae Takaiçiyə Konstitusiya dəyişiklikləri də daxil olmaqla, siyasi təşəbbüslərini irəli aparmaq üçün geniş imkanlar yaradır. Müdafiə və təhlükəsizliklə bağlı sərt fikirləri ilə tanınan Sanae Takaiçinin "məsuliyyətli, lakin aqressiv" maliyyə siyasətini həyata keçirmək və qida məhsullarına istehlak vergisini 2 il müddətinə dayandırmaq barədə planı var. Yüksək ictimai dəstəyə əsaslanan Baş nazir bundan başqa, LDP-nin uzun müddətdir hədəfi olan Yaponiyanın pasifist konstitusiyasına düzəliş etməklə, ölkənin müdafiə qabiliyyətini gücləndirmək niyyətindədir.xeber100.com

“Reuters” agentliyi: Bolqarıstanda parlament seçkiləri keçiriləcək

Aprelin 19-da Bolqarıstanda növbədənkənar parlament seçkiləri keçiriləcək. “Reuters” agentliyi xəbər verir ki, bu barədə çərşənbə günü ölkə Prezidenti İliana Yotova bildirib. Prezident ötən həftə Bolqarıstan Milli Bankının sədr müavini Andrey Qyurovu Aİ və NATO üzv dövlətində cəmi beş il ərzində səkkizinci parlament seçkisinə hazırlıq vəzifəsi daşıyan müvəqqəti hökumətə rəhbər təyin edib. Əvvəlki hökumət iqtisadi siyasətinə görə həftələrlə davam edən etirazlardan və korrupsiya ilə mübarizədə uğursuzluqdan sonra istefaya göndərilib. Yotova çərşənbə günü müvəqqəti hökumətin üzvlərini təqdim edən Qyurovla görüşdükdən sonra mətbuat konfransında bildirib ki, aprelin 19-da növbədənkənar seçkilərin keçirilməsi barədə fərman imzalayacaq. Yanvarın 1-də avro zonasına qoşulan Bolqarıstan uzun müddətdir davam edən siyasi qeyri-sabitliklə üzləşir, partiyalar parçalanmış parlamentdə sabit hakim koalisiyalar yarada bilmir.xeber100.com

Qazaxıstanın Kazinform informasiya agentliyinin məlumatına görə…

2026-cı il yanvarın 1-nə Qazaxıstanın əhalisi 20,5 milyon nəfər olub. Qazaxıstanın Kazinform informasiya agentliyinə istinadla xəbər verir ki, son bir ildə ölkə əhalisi 212 min nəfər artıb. Məlumatda qeyd edilib ki, ən çox əhali Almatı şəhərində (2,35 milyon nəfər) və Türkistan vilayətindədir (2,15 milyon nəfər). Ən az əhali Ulıtau vilayətindədir və 219 min nəfər təşkil edir. Ölkə əhalisinin 13 milyonu şəhərlərdə, 7,5 milyonu kənd yerlərində yaşayır. xeber100.com

Türkiyə-Qazaxıstan Birgə Strateji Planlaşdırma Qrupunun iclası keçirilir

Fevralın 2-də, bazar ertəsi günü Ankarada Xarici işlər nazirləri Hakan Fidan və Yermek Koşerbayevin sədrliyi ilə Türkiyə-Qazaxıstan Birgə Strateji Planlaşdırma Qrupunun səkkizinci iclası keçirilir. Müzakirələr iki ölkə arasında, xüsusən də ticarət, investisiya, enerji, nəqliyyat, müdafiə sənayesi, təhsil, humanitar və mədəni əlaqələr kimi sahələrdə əməkdaşlığın gücləndirilməsi üçün atılan addımlara yönəlib. Ankara dəfələrlə Astana ilə çoxtərəfli platformalarda, xüsusən də Türk Dövlətləri Təşkilatı (TDT) çərçivəsində əməkdaşlığın gücləndirilməsinin vacibliyini vurğulayıb. Gündəlikdə duran daha bir məsələ Orta Dəhliz boyunca nəqliyyat və logistika infrastrukturunun təkmilləşdirilməsidir. Tərəflər ticarət dövriyyəsini ildə 15 milyard dollara çatdırmağı hədəfləyir. İclasdan əvvəl xarici işlər nazirlərinin ikitərəfli görüşü keçirilib.xeber100.com

Böyük Misir Muzeyinin təntənəli açılış mərasimi keçiriləcək

Noyabrın 1-də Böyük Misir Muzeyinin təntənəli açılış mərasimi keçiriləcək. Açılış mərasimində ümumilikdə 79 dövlətin rəsmi nümayəndə heyətləri, o cümlədən 39 ölkənin dövlət və hökumət başçıları, eləcə də beynəlxalq təşkilatların rəhbərləri iştirak edəcək. Tədbirin keçiriləcəyi Gizada muzeyin ətrafındakı küçələr möhtəşəm hadisəyə hazır vəziyyətinə gətirilib. Açılış mərasimində iştirak edəcək ölkələrin bayraqları Misir bayrağı ilə yanaşı yolboyu dalğalanır. Gizada piramidalardan cəmi iki kilometrlik məsafədə yerləşən Böyük Misir Muzeyinin təməli 2002-ci ildə qoyulub. Muzeyin ümumi sahəsi 500 min kvadrat metrə yaxındır. Mədəniyyət müəssisəsində 100 mindən çox tarixi və arxeoloji eksponat saxlanılır. Tarixdə ilk dəfə olaraq firon Tutanxamonun kolleksiyası burada tam şəkildə nümayiş olunur. Misir il ərzində muzeyə 5 milyon ziyarətçinin gələcəyini gözləyir.xeber100.com

Moldovada Prezident Sarayında andiçmə mərasimi olub

Moldovanın Baş naziri Aleksandru Muntyanunun rəhbərlik etdiyi Moldovanın yeni kabinetinin Prezident Maya Sandu və parlamentin sədri İqor Qrosunun iştirakı ilə Prezident Sarayında andiçmə mərasimi olub. Muntyanunun hökumətinə 14 nazirlik və Baş nazirin beş müavini daxildir. Hökumətin tərkibinə həm yeni üzvlər, həm də əvvəlki kabinetdəki vəzifələrini qoruyanlar daxil edilib. Aleksandru Muntyanu bəyan edib ki, bu, Moldova Respublikasını yaxın illərdə Avropa İttifaqına üzv olmağa hazırlamağa qadir peşəkar komandadır. Moldova hökumətinin yeni üzvləri and içdikdən sonra Prezident Maya Sandu çıxış edərək ölkənin iqtisadi inkişafına və Avropaya inteqrasiyasına dair mesajlar verib.xeber100.com  

“Altay – Türk dünyasının qızıl beşiyi” beynəlxalq festivalı keçirilir

Şərqi Qazaxıstan vilayətinin Katon-Qaraqay rayonunda “Altay – Türk dünyasının qızıl beşiyi” beynəlxalq festivalı keçirilir. Festivalın ilk gününün tədbirlərindən biri respublika elmi-praktik konfransı olub. Ölkənin hər yerindən gələn şair və yazıçılar, görkəmli ədəbiyyat və elm xadimləri festivalın Qazaxıstanın milli birliyinin möhkəmləndirilməsinə və mənəvi dirçəlişinə verdiyi töhfəni yüksək qiymətləndiriblər. Onların sözlərinə görə, Katon-Qaraqayın mənəvi turizm mərkəzinə çevrilməsi üçün hər cür əsas var. “Altay Türk sivilizasiyasının ürəyi, onun qızıl mədənidir. Türk dünyasının tarixi məhz buradan başlayır, buna görə də Altay bütün türk xalqları üçün əvəzsiz sərvətdir. “Mənəvi turizm” anlayışı artıq gündəlik həyata daxil olub: hara getməyimizdən asılı olmayaraq - Azərbaycana, Türkiyəyə, Özbəkistana - ziyalılar və sadə sakinlər Altayı əcdadlarının mənəvi Vətəni adlandırırlar. Bizim əsas vəzifəmiz bu mənəvi dəyəri bütün Türk dünyasına tanıtmaqdır”, - deyə Məclisin deputatı Yerlan Sairov vurğulayıb. Elmi görüş ideya və fikir mübadiləsi meydanına çevrilib. Şərqi Qazaxıstan Vilayət Dram və Operetta Teatrı yazıçının ömür yolunu bədii obrazlar vasitəsilə nümayiş etdirdiyi “Didaxmet Aşimxanuluya ithaf” kompozisiyasını təqdim edib. “Bu konfrans böyük mənəviyyat məktəbidir. O, bizi şair və yazıçılarımızın əsərlərini yenidən oxumağa vadar etdi. Katon-Qaraqay təkcə təbiəti ilə deyil, həm də mədəni irsi ilə fəxr edir”, - deyə Topqayın kənd Kəlixan İskak adına tam orta məktəbin direktoru Aydın Saylauxanulı qeyd edib. Festivalın ilk gününün yekun tədbiri “Böyük Altay Kəlixanı və Didaxmeti tərənnüm edir” adlı respublika poeziya festivalı olub. Tədbiri “Altay” folklor-etnoqrafik ansamblı, “Bərkıtbel” etnoansamblı, “Ən.Sal.Dar”, “Nazkonur”, “Daraboz” qruplarının kompozisiyaları bəzəyib.xeber100.com  

Türkiyə Təhlükəsizlik Şurasının iclası keçirilib

İsraillə İran arasında artan gərginliklə bağlı Türkiyənin Təhlükəsizlik Şurasının iclası keçirilib. Toplantı ilə bağlı Türkiyə Prezidenti Administrasiyasının İctimaiyyətlə Əlaqələr Departamenti açıqlama yayıb. Məlumata əsasən, iclasda İsrailin İran ərazisinə qarşı başladığı əməliyyat nəticəsində yaranmış vəziyyət bütün aspektləri ilə müzakirə olunub. Regionda baş verən hadisələr, o cümlədən qarşıdurmaların dayandırılması istiqamətində göstərilən diplomatik səylər, gərginliyin qlobal və regional təhlükəsizliyə təsirləri, bununla bağlı görülə biləcək tədbirlər, eləcə də Türkiyənin ehtimal olunan ssenarilərə uyğun hazırlığı dəyərləndirilib. Prezident Rəcəb Tayyib Ərdoğanın sədrliyi ilə keçirilən iclasda Türkiyənin xarici işlər naziri Hakan Fidan, milli müdafiə naziri Yaşar Gülər, Milli Kəşfiyyat Təşkilatının rəhbəri İbrahim Kalın və ölkənin hakim Ədalət və İnkişaf Partiyasının (AK Parti) sədr müavini Ömer Çelik iştirak ediblər.xeber100.com

Avropa-Aralıq dənizi Seysmoloji Mərkəzinin məlumatına görə…

Çilidə 5,7 bal gücündə zəlzələ baş verib. Bu barədə Avropa-Aralıq dənizi Seysmoloji Mərkəzi məlumat yayıb. Məlumata görə, zəlzələnin episentri 143 min nəfərin yaşadığı Kalama şəhərindən 158 km cənub-şərqdə yerləşib. Yeraltı təkanların ocağı 126 km dərinlikdə qeydə alınıb. Hadisə nəticəsində xəsarət alanlar və dağıntılar barədə məlumat verilməyib.xeber100.com  

NATO ölkələri hərbi arsenallarına 650 ədəd F-35 qırıcısı əlavə etməyi planlaşdırır

NATO ölkələri qarşıdakı beş il ərzində hərbi arsenallarına 650 ədəd F-35 qırıcısı, azı 50 gəmi və sualtı qayıq əlavə etməyi planlaşdırır. “The New York Times” nəşri xəbər verir ki, bunu ABŞ prezidentinin milli təhlükəsizlik üzrə müşaviri Ceyk Sallivan deyib. “Növbəti beş ildə NATO müttəfiqlərimiz hərbi arsenallarını modernləşdirmək üçün 650-dən çox beşinci nəsil F-35 qırıcıları, 1000-dən çox hava hücumundan müdafiə sistemi, 50-yə yaxın döyüş gəmisi və sualtı qayıq, 1,2 min tank, 11,3 min döyüş maşını və 2 minə yaxın artilleriya sistemi istehsal edəcək”, - deyə Sallivan qeyd edib. Onun sözlərinə görə, Hind-Sakit okean regionundakı yaxın tərəfdaşlar da hərbi xərclərini artırırlar. Yaponiya 2027-ci ilədək milli təhlükəsizliyin maliyyələşdirilməsini iki dəfə artırmağı, Cənubi Koreya isə yaxın beş ildə müdafiəyə 260 milyard dollar yönəltməyi, yəni müdafiə xərclərini ildə orta hesabla 6,8 faiz artırmağı planlaşdırır. Sallivan əlavə edib ki, Avstraliya 2025-ci ildə hərbi ehtiyaclara 37 milyard dollar xərcləyəcək.xeber100.com