“Dağlıq Qarabağda müharibə riski çox böyükdür”…

“Dağlıq Qarabağ münaqişəsi zonasında eskalasiya təhlükəsi çox böyükdür”. Bu barədə ATƏT-in fəaliyyətdə olan sədri, Almaniyanın xarici işlər naziri Frank-Valter Ştaynmayer ATƏT Parlament Assambleyasının Tiflisdə keçirilən 25-ci sessiyasında çıxışı zamanı deyib. Onun sözlərinə görə, belə vəziyyətdə dialoq və əməkdaşlığın möhkəmləndirilməsi üçün ATƏT və onun vasitələri lazımdır: “Bu münaqişə ilə bağlı “dondurulmuş” deyə bəhs etmək doğru deyil. Mən Ermənistan və Azərbaycandan gəlirəm. Söhbət Qarabağ münaqişəsi zonasında yenidən eskalasiyanın baş verməsindən gedir. Artıq 20 ildir yüz minlərlə insan qaçqın vəziyyətdə yaşayır”. F. Ştaynmayer Qarabağda sabitliyi bərpa etməyə çalışdıqlarını qeyd edib. “Biz təklifləri nəzərə alırıq və danışıqların mürəkkəbləşməsinə imkan verməməyə cəhd edirik”, – deyə o bildirib.xeber100.com

Fransa parlamenti qanun layihəsində dəyişiklik edib

Fransa Milli Assambleyası (parlamentin aşağı palatası) iyulun 1-də hökumət tərəfindən “Bərabərlik və vətəndaşlıq” qanun layihəsinə təklif olunan və uydurma “erməni soyqırımı”nı inkar edənlərin cəzalandırılmasını nəzərdə tutan düzəlişi qəbul edib. Düzəliş bəşəriyyətə qarşı baş vermiş cinayətləri inkar edənlərə və ya onun əhəmiyyətini azaltmaq istəyənlərə münasibətdə cəza tətbiqini nəzərdə tutur. Qanun layihəsində xüsusi olaraq “erməni soyqırımı” da bu cinayətlər sırasına aid edilib. Düzəlişə əsasən qanunu pozanları 1 illik həbs cəzası və ya 45 min avro məbləğində cərimə gözləyir. Qanun layihəsi baxılmaq üçün Senata göndəriləcək. Xatırladaq ki, 2012-ci ilin fevralında analoji qanun layihəsini ölkənin Konstitusiya Şurası rədd etmişdi. Yeni düzəlişin təşəbbüskarı Fransa prezidenti Fransua Ollanddır.xeber100.com

“Avrasiya tərəfdaşlığı” proqramı çərçivəsində dalğıc hazırlığı keçirilir

Rumıniyanın Konstanta şəhərində “Avrasiya tərəfdaşlığı” proqramı çərçivəsində dalğıc hazırlığı keçirilir. Müdafiə Nazirliyinin mətbuat xidmətindən Azərtac-a bildiriblər ki, iyulun 10-dək keçiriləcək tədbirdə Azərbaycan Respublikası Silahlı Qüvvələrinin nümayəndələri iştirak edirlər.xeber100.com

Dağlıq Qarabağ münaqişəsinin nizamlanması məsələsi müzakirə edilib

Rusiya Prezidenti Vladimir Putin və Fransa Prezidenti Fransua Olland arasında Dağlıq Qarabağ münaqişəsinin nizama salınmasına dair telefon söhbəti olub. Bu barədə Kremlin mətbuat xidməti məlumat yayıb. Məlumatda deyilir: “Vladimir Putin ATƏT-in Minsk qrupunun həmsədr dövlətinin başçısı kimi Fransua Ollandı Azərbaycan Prezidenti İlham Əliyevin və Ermənistan Prezidenti Serj Sarkisyanın iyunun 20-də Sankt-Peterburqda keçirilən üçtərəfli görüşünün yekunları barədə məlumatlandırıb”. Rusiya və Fransa liderləri ümidvar olduqlarını bildiriblər ki, bu görüşdə əldə olunan nəticələr sülh prosesinin inkişafına kömək edəcək. Bu vacib istiqamətdə birgə fəaliyyəti ATƏT-in Minsk qrupu çərçivəsində fəal surətdə davam etdirmək barədə razılıq əldə olunub.xeber100.com

“Avropa İttifaqının xarici və təhlükəsizlik siyasəti üzrə Qlobal Strategiya”…

“Avropa İttifaqı gələcəkdə də Şərq Tərəfdaşlığı ölkələrində həlli uzanan münaqişələrin həllində iştirak edəcək". Apa-nın məlumatına görə, bu barədə Avropa İttifaqının xarici siyasət idarəsinin açıqladığı "Avropa İttifaqının xarici və təhlükəsizlik siyasəti üzrə Qlobal Strategiya" sənədində deyilir. Bildirilir ki, ölkələrin suverenliyi, müstəqilliyi və ərazi bütövlüyü, sərhədlərin toxunulmazlığı və münaqişələrin sülh yolu ilə həlli Avropa təhlükəsizliyinin aparıcı elementləridir: "Bu prinsiplər həm Aİ daxilində, həm də Aİ sərhədlərindən kənardakı ölkələrə tətbiq edilir".xeber100.com

“Qafqaz regionunda geosiyasi dəyişikliklər” mövzusunda konfrans işə başlayıb

İyunun 28-də Tbilisidə “Qafqaz regionunda geosiyasi dəyişikliklər” mövzusunda konfrans işə başlayıb. ABŞ-ın Karnegi Fondunun Gürcüstan hökuməti ilə birgə təşkil etdiyi tədbirin məqsədi Cənubi Qafqazdakı geosiyasi vəziyyəti müzakirə etmək və qiymətləndirməkdir. İki gün davam edəcək tədbirdə aparıcı beynəlxalq qurumların nümayəndələrinin Cənubi Qafqaz ölkələrindəki vəziyyətə dair məruzələri dinləniləcək. Karnegi Fondunun direktoru Eugene Rumer çıxışında regionda həyata keçirilən irimiqyaslı layihələrə, o cümlədən Bakı-Tbilisi-Ceyhan neft kəmərinin əhəmiyyətinə toxunub. O deyib: “Azərbaycanın mərhum Prezidenti Heydər Əliyevin möhkəm siyasi iradəsi və uzaqgörənliyi sayəsində reallaşan Bakı-Tbilisi-Ceyhan neft kəməri layihəsi bu gün Qafqazın inkişafında xüsusi rol oynayır. Məhz Heydər Əliyev kimi bir siyasi xadimin gərgin əməyinin nəticəsidir ki, Cənubi Qafqaz dünyaya inteqrasiya edir”. E.Rumer regionda həyata keçirilən Bakı-Tbilisi-Ərzurum qaz kəməri, Bakı-Tbilisi–Qars dəmir yolu layihələrinin də əhəmiyyətini qeyd edib. Konfransda regiondakı münaqişələrə də toxunulub. Qeyd olunub ki, Gürcüstanın və Azərbaycanın ərazilərinin işğal olunması bu regionun inkişafına ciddi maneə törədir. İşğal altında olan ərazilər azad edilməli, münaqişələr ədalətli həllini tapmalıdır. Məhz bundan sonra regionun tam inkişafından və dünyaya inteqrasiyasından danışmaq mümkündür. Tədbirdə iştirak edən İqtisadi və Sosial İnkişaf Mərkəzinin sədri Vüqar Bayramov çıxış edərək neftin qiymətinin aşağı düşməsi fonunda Azərbaycan iqtisadiyyatının inkişaf istiqamətləri barədə məlumat verib. O, jurnalistlərə açıqlamasında deyib ki, konfransdakı çıxışında Azərbaycan Prezidentinin praqmatik siyasəti nəticəsində ölkə iqtisadiyyatının neftdən asılılığının azaldılması və qeyri-neft sektorunun inkişafı istiqamətində görülən mühüm işlər barədə məlumat verib. Konfrans işini iyunun 29-da panel iclaslarda davam etdirəcək.xeber100.com

“Fərdi tərəfdaşlıq üzrə əməkdaşlıq proqramı”…

Azərbaycan Müdafiə Nazirliyinin NATO ilə 2016-cı il üçün “Fərdi tərəfdaşlıq üzrə əməkdaşlıq proqramı”na əsasən, Silahlı Qüvvələrin Hərbi Akademiyasında NATO-nun Brunssumda yerləşən Birləşmiş Qüvvələr Komandanlığının mobil təlim qrupu tərəfindən “Strateji kommunikasiya və ictimai əlaqələr” mövzusunda təlim kursu keçirilir. Müdafiə Nazirliyinin mətbuat xidmətindən Azərtac-a bildiriblər ki, kurs müddətində NATO-nun nümayəndə heyəti tərəfindən şəxsi heyətə “NATO-nun hərbi strukturu”, “NATO-da hərbi tərəfdaşlıq”, “İctimai əlaqələr üzrə əməliyyatlar”, “Strateji kommunikasiyanın hədəf auditoriyası”, “İctimai əlaqənin nəticələri və vasitələri”, “Strateji kommunikasiya və ictimai əlaqələr üzrə planın hazırlanması” və digər mövzulara dair mühazirələr oxunur. Bundan başqa, işçi qruplarda müzakirələr və fikir mübadilələri aparılır. Kurs iyulun 1-dək davam edəcək.xeber100.com

“Erməni terroru və Azərbaycan multikulturalizmi”…

İyunun 28-də Bakı Beynəlxalq Multikulturalizm Mərkəzində (BBMM) bu qurumun, Azərbaycan Milli Elmlər Akademiyası (AMEA), Azərbaycan Respublikasının Prezidenti yanında Bilik Fondu, Dini Qurumlarla İş üzrə Dövlət Komitəsi, Azərbaycan Respublikasının Prezidenti yanında Elmin İnkişafına Dəstək Fondu, Diasporla İş üzrə Dövlət Komitəsi və Müəllif Hüquqları Agentliyinin birgə təşkilatçılığı ilə “Terror multikulturalizmə qarşı” layihəsi çərçivəsində “Erməni terroru və Azərbaycan multikulturalizmi” mövzusunda birinci beynəlxalq “dəyirmi masa” keçirilib. Bakı Beynəlxalq Multikulturalizm Mərkəzi Azərbaycan xalqının, eləcə də bir çox xalqların məruz qaldığı dəhşətli erməni terrorunun acı nəticələrini dünya ictimaiyyətinin diqqətinə bir daha çatdırmaq və beynəlxalq səviyyədə terrora qarşı mübarizənin vacibliyini önə çəkmək məqsədilə müxtəlif ölkələrdə “Terror multikulturalizmə qarşı” layihəsi çərçivəsində silsilə konfranslar və “dəyirmi masa”lar keçirmək təşəbbüsü ilə çıxış edir. “Erməni terroru və Azərbaycan multikulturalizmi” mövzusunda birinci beynəlxalq “dəyirmi masa” adıçəkilən geniş layihə çərçivəsində baş tutan ilk tədbirdir. “Erməni terroru: mahiyyəti və tarixi”, “Erməni terroru Azərbaycan multikulturalizminə qarşı”, “Erməni terroru və Azərbaycan kürdləri”, “Erməni terrorunun hüquqi və mənəvi ölçüləri”, “Erməni terroru yeni nəşrlərdə (Kitabların təqdimatı)” mövzusunda panellərdə öz işini davam etdirən birinci beynəlxalq “dəyirmi masa”da yerli mütəxəssislərlə yanaşı, xarici elm adamları, erməni terrorunun araşdırmaçıları - ABŞ-ın Tennesi Texnologiyalar Universitetinin sosiologiya və siyasi elmlər fakültəsinin professoru Maykl Günter, Rusiyadan tarix elmləri üzrə fəlsəfə doktoru, siyasi analitik Oleq Kuznetsov, fransalı mütəxəssis Cefri Jan Yves Ernest, Özbəkistandan tarixçi Şöhrət Salamov və hüquqşünas Məmmədrza Allahverdiyev iştirak ediblər.xeber100.com

26 iyun – Silahlı Qüvvələr Günü münasibətilə qəbul keçirilib

Azərbaycanın İrandakı səfirliyində 26 iyun - Silahlı Qüvvələr Günü münasibətilə qəbul keçirilib. Qəbulda İran İslam Respublikası Silahlı Qüvvələrinin və Müdafiə Nazirliyinin yüksək rütbəli zabitləri, xarici ölkələrin Tehrandakı səfirliklərinin hərbi attaşeləri, səfirlər və ictimaiyyət nümayəndələri iştirak ediblər. Əvvəlcə Azərbaycanın və İranın dövlət himnləri səsləndirilib. Tədbirdə çıxış edən hərbi attaşe Emin Əzimzadə deyib ki, ulu öndər Heydər Əliyevin 1998-ci il mayın 22-də imzaladığı Fərmana əsasən, Əlahiddə Azərbaycan Korpusunun yarandığı gün – 26 iyun Azərbaycan Respublikasının Silahlı Qüvvələri Günü elan olunub. Hər il bu tarix rəsmi dövlət bayramı kimi təntənə ilə qeyd edilir. Bildirilib ki, müasir Azərbaycan Ordusunun yaradılması xalqımızın ümummilli lideri Heydər Əliyevin misilsiz xidmətlərindəndir. Ulu Öndərin ordu quruculuğu sahəsində həyata keçirdiyi işlərin Prezident, Ali Baş Komandan İlham Əliyev tərəfindən uğurla davam etdirilməsi nəticəsində Azərbaycan bu gün Qafqaz regionunda ən güclü orduya malikdir. Qeyd edilib ki, Ali Baş Komandan İlham Əliyev müdafiə məsələlərini daim diqqət mərkəzində saxlayır. Dövlətimizin başçısının cəbhə bölgəsinə tez-tez səfər etməsi, hərbi hissələrdə əsgər və zabitlərlə görüşlər keçirməsi orduda yüksək əhval-ruhiyyə yaradır, şəxsi heyətin qələbə əzmini möhkəmləndirir. Bu gün Azərbaycan Ordusu işğalçı Ermənistanın silahlı birləşmələrini hər an Dağlıq Qarabağdan və zəbt edilmiş digər ərazilərindən çıxarmaq iqtidarındadır. Lakin Azərbaycan humanizm prinsiplərini əsas tutaraq münaqişənin qan tökülmədən, sülh yolu ilə həll edilməsini istəyir. Əgər sülh danışıqları fayda verməsə Azərbaycan Ordusu öz sözünü deyəcək. Çıxışlardan sonra tədbir bədii proqramla davam edib. Qəbulda Azərbaycanın İrandakı səfiri Bünyad Hüseynov da iştirak edib.

AŞPA-nın Türkiyə ilə bağlı mövqeyi tənqid olunub

İyunun 22-də Avropa Şurası Parlament Assambleyasının səhər sessiyasında Türkiyə ilə bağlı məruzə ətrafında müzakirələr aparılıb. Müzakirələr zamanı Azərbaycanın AŞPA-dakı nümayəndə heyətinin rəhbəri Səməd Seyidov çıxış edərək Türkiyədəki vəziyyətdən danışıb. O, Türkiyədə demokratik təsisatların funksiyasından bəhs edən məruzənin əsas məqamlarına toxunaraq verilən tövsiyələrə, qiymətləndirməyə və digər məsələlərə görə məruzəçiyə təşəkkür edib. Səməd Seyidov bu gün mövcud vəziyyət çərçivəsində Türkiyənin mümkün olan bütün imkanlardan istifadə edərək əlindən gələni etdiyini bildirib. O, Türkiyənin təkcə Suriya və regionun digər ölkələrindən gələn qaçqın və miqrantlara 10 milyard dollar xərclədiyini vurğulayıb. Nümayəndə heyətinin rəhbəri müxtəlif şəhərlərində və bölgələrində terror aktları, partlayışlar ilə üzləşən Türkiyədəki bu mürəkkəb vəziyyətin heç bir Avropa ölkəsində olmadığını, olsa belə həmin ölkələrdə demokratik təsisatların fəaliyyətini bu gün Türkiyədəki səviyyədə təmin etməyin mümkün olmayacağını diqqətə çatdırıb. Səməd Seyidov deyib ki, məruzədə Türkiyəyə yenidən monitorinq prosedurları tətbiq etməyin lazım olduğu bildirilir. Bu gün Türkiyəyə sanksiya tətbiq etmək yox, ona kömək etmək lazımdır. Türkiyənin terrorizmə qarşı apardığı mübarizə təkcə özü üçün deyil, həmçinin Avropa üçündür. Ölkənin bu vəziyyətini nəzərə almalıyıq.xeber100.com