Respublika Günü münasibətilə rəsmi qəbul təşkil olunub

Azərbaycanın Argentinadakı səfirliyi tərəfindən Respublika Günü ilə bağlı rəsmi qəbul təşkil edilib. Xarici İşlər Nazirliyinin mətbuat xidmətindən Azərtac-a bildiriblər ki, qəbulda Argentina hökumətinin, parlamentinin, ölkədə akkreditə olunan diplomatik korpusun, elmi-akademik-analitik və işgüzar dairələrin, kütləvi informasiya vasitələrinin və Argentina ictimaiyyətinin nümayəndələri iştirak ediblər. İştirakçılar arasında Argentina hökuməti adından əsas qonaqlar qismində müdafiə nazirinin strateji və hərbi məsələlər üzrə müavini Anxel Pablo Telyo, Xarici İşlər və Etiqad Nazirliyinin xarici siyasət üzrə dövlət katibinin müavini Qustavo Rodolfo Zlauvinen, Argentina Parlamentindən yüksək vəzifəli şəxs kimi isə Deputatlar Palatasının ikinci vitse-prezidenti Patrisia Ximenez, habelə çoxsaylı parlament üzvləri iştirak ediblər. Tədbirdə çıxış edən müvəqqəti işlər vəkili Rəşad Aslanov 1918-ci ildə elan edilən və 23 ay ömrü olan Azərbaycan Xalq Cümhuriyyətinin müsəlman aləmində ilk demokratik dövlət olduğunu vurğulayıb. 1991-ci ildə müstəqilliyin bərpasından sonra Azərbaycanın üzləşdiyi problemlərdən danışan Rəşad Aslanov bildirib ki, beynəlxalq hüquq normalarını kobud şəkildə pozan Ermənistanın Azərbaycana qarşı hərbi təcavüzü nəticəsində torpaqlarımızın 20 faizi işğal edilib. Ümummilli lider Heydər Əliyevin ölkəmizin müstəqilliyinin qorunub saxlanılması uğrunda əvəzsiz xidmətləri, onun gələcəyə hesablanmış inkişaf strategiyası barədə məlumat verən müvəqqəti işlər vəkili Prezident İlham Əliyevin rəhbərliyi ilə ölkəmizin son illərdə əldə etdiyi iqtisadi və siyasi uğurlardan, Azərbaycanın artan geosiyasi önəmi və regional proseslərdə oynadığı mühüm roldan, ölkəmizin Avropanın enerji təhlükəsizliyindəki rolundan, dövlətçiliyimizin daha da gücləndirilməsi üçün atılan addımlardan danışıb. R.Aslanov Azərbaycanda müxtəlif dinlərə etiqad edən və mədəniyyətlərə mənsub olan insanların birgə yaşadığını, tolerantlıq ənənələrinin mövcud olduğunu vurğulayaraq, dövlətimizin başçısı tərəfindən bu ilin ölkəmizdə "Multikulturalizm ili" elan olunduğunu qeyd edib. Həmçinin ölkəmizin zəngin turizm potensialına malik olduğu bildirən müvəqqəti işlər vəkili 2016-ci ildə Azərbaycanda keçiriləcək beynəlxalq idman tədbirləri barədə danışıb. Azərbaycan-Argentina əlaqələrinə toxunan R.Aslanov ölkələrimiz arasında müxtəlif sahələrdə həyata keçirilən əməkdaşlıqdan və əlaqələrin möhkəmləndirilməsi istiqamətində görülən işlərdən bəhs edib. Tədbir zamanı Azərbaycanın mədəniyyəti, tarixi, sosial-iqtisadi inkişafı və turizm imkanları barədə, həmçinin bu il ölkəmizdə keçiriləcək "Formula 1" yarışı və Şahmat Olimpiadası ilə bağlı videoçarxlar nümayiş etdirilib, ziyafət zamanı qonaqlara Azərbaycan milli mətbəxinin nümunələri təqdim olunub.xeber100.com

İkitərəfli əməkdaşlıq…

İsrail və Azərbaycan arasında əməkdaşlıq istiqamətlərin ən geniş spektri üzrə olduqca dinamik inkişaf edir. Bunu İsrailin yeni müdafiə naziri Aviqdor Liberman xarici KİV-ə ilk olaraq Trend-ə müsahibəsində deyib. Onun sözlərinə görə, münasibətlərin səviyyəsi həqiqətən də çox yüksəkdir və iki ölkə üçün onların əhəmiyyətini qiymətləndirmək çətindir: "Bütün sahələrdə ikitərəfli qarşılıqlı fəaliyyətin genişləndirilməsi dövlətlərimizin maraqlarına cavab verir və mənə oldquca perspektivli görünür". Terrorçuluqla mübarizə sahəsində Azərbaycanla əməkdaşlığa toxunarkən nazir qeyd edib ki, hazırda terrorçuluqla mübarizə məsələsi İsrail üçün həyati önəmə malikdir: "Dövlətin əsası qoyulduğu andan etibarən bütün tarix boyunca terrorçuların mütəmadi, davamlı hücumlarına qarşı durmaq məcburiyyətində qalmışıq. Beynəlxalq terrorun qarşısını almaq üçün azad dünyanın bütün ölkələri öz səylərini birləşdirməlidir".xeber100.com

Azərbaycan-NATO iclası keçiriləcək

Xarici işlər naziri Elmar Məmmədyarov mayın 31-də NATO-nun mənzil-qərargahında keçiriləcək Azərbaycan-NATO iclasında iştirak etmək üçün Brüsselə səfər edib. Xarici İşlər Nazirliyinin mətbuat xidmətindən Trend-ə verilən məlumata görə, E.Məmmədyarov NATO-nun ali orqanı olan Şimali Atlantika Şurasında çıxış edəcək və bir sıra ikitərəfli görüşlər keçirəcək. Səfər çərçivəsində E.Məmmədyarovun Brüsseldə ATƏT Minsk Qrupunun həmsədrləri ilə görüşü də nəzərdə tutulub.xeber100.com

Fransada 28 May-Respublika Günü münasibətilə rəsmi qəbul təşkil olunub

Parisdə fəaliyyət göstərən Azərbaycan Mədəniyyət Mərkəzində ölkəmizin Fransadakı səfirliyi və UNESCO yanında daimi nümayəndəliyinin birgə təşkilatçılığı ilə 28 May-Respublika Günü münasibətilə rəsmi qəbul keçirilib. Tədbirdə Fransanın yüksək vəzifəli rəsmiləri, Xarici İşlər, Müdafiə nazirliklərinin əməkdaşları, senatorlar, Milli Assambleyanın deputatları, ölkədə akkreditə olunmuş diplomatik korpusun, eləcə də işgüzar dairələrin nümayəndələri, Azərbaycanın Dostları Assosiasiyasının üzvləri, diaspor təmsilçiləri, bu ölkədə yaşayan soydaşlarımız və tələbələr iştirak ediblər. Mərasimdə Azərbaycan Xalq Cümhuriyyətinin yaranması və fəaliyyəti barədə ətraflı məlumat verilib. Diqqətə çatdırılıb ki, Azərbaycan müstəqilliyini bərpa edəndən sonra bir sıra çətinliklərlə qarşılaşıb, Ermənistanın hərbi təcavüzü nəticəsində ərazisinin 20 faizi işğal edilib. Bunlara baxmayaraq, Azərbaycan sürətlə inkişaf edərək bölgənin lider dövlətinə çevrilib, regionun enerji və nəqliyyat təhlükəsizliyini təmin edən bir sıra mühüm layihələr həyata keçirib. Rəsmi qəbul ziyafətlə davam edib.xeber100.com

Senator Vanino Kitinin başçılıq etdiyi nümayəndə heyəti Şəhidlər xiyabanını ziyarət edib

İtaliya Respublikası Senatının Avropa İttifaqının siyasəti daimi komissiyasının sədri, senator Vanino Kitinin başçılıq etdiyi nümayəndə heyəti mayın 26-da Fəxri xiyabanda xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini yad edib, məzarı önünə gül dəstələri qoyub. Azərtac xəbər verir ki, görkəmli oftalmoloq alim, akademik Zərifə xanım Əliyevanın da xatirəsi anılıb, məzarı üzərinə tər güllər düzülüb. Sonra Şəhidlər xiyabanına gedən qonaqlar Azərbaycanın müstəqilliyi, ərazi bütövlüyü uğrunda mübarizədə canlarından keçmiş qəhrəman Vətən övladlarının məzarlarını və “Əbədi məşəl” abidəsini ziyarət ediblər. Bakının ən hündür nöqtəsindən Azərbaycan paytaxtının mənzərəsini seyr edən nümayəndə heyətinə Şəhidlər xiyabanının tarixi və şəhərdə görülən abadlıq-quruculuq işləri barədə məlumat verilib.xeber100.com

Respublika Günü Təbrizdə qeyd olunub

28 May-Respublika Günü Təbrizdə Azərbaycanın bu şəhərdəki baş konsulluğunun təşkilatçılığı ilə keçirilən təntənəli tədbirlə qeyd olunub. Azərbaycanın və İranın dövlət himnləri səsləndikdən sonra baş konsul əvəzi Şahin Əhmədov çıxış edib. O deyib ki, 1918-ci il mayın 28-də Azərbaycan Şərqdə ilk dəfə olaraq öz müstəqilliyini elan edib və demokratik dövlət qurub. Bu dövlət cəmi 23 ay yaşasa da tarixdə mühüm izlər buraxıb. Azərbaycan xalqı bütün dünyaya göstərib ki, müstəqil və demokratik dövlət qurub onu inkişaf etdirməyə qadirdir. Azərbaycan-İran əlaqələrindən danışan Ş.Əhmədov bildirib ki, hər iki ölkənin prezidentləri siyasi iradə nümayiş etdirərək əlaqələri inkişaf etdirmək və xalqların maraqlarını təmin etmək qərarını veriblər. Məhz prezidentlərin siyası addımları nəticəsində bu gün münasibətlər yüksələn xətlə inkişaf edir. Qarşılıqlı səfərlər və imzalanan sənədlərin icrası iqtisadi, siyasi, mədəni əlaqələrin yaxınlaşmasına səbəb olub. Tədbirdə iştirak edən Azərbaycan Respublikası Dini Qurumlarla İş üzrə Dövlət Komitəsinin sədri Mübariz Qurbanlı çıxışında Azərbaycan Xalq Cümhuriyyətinin yaranması, fəaliyyəti və tarixi əhəmiyyəti haqqında danışıb. O, XX əsrin sonunda Azərbaycan xalqının 70 illik əsarətdən sonra yenidən müstəqilliyə qovuşduğunu, bu müstəqilliyin ümummilli lider Heydər Əliyevin sayəsində qorunub saxlanıldığını bildirib. Ulu Öndərin əsasını qoyduğu hüquqi və dünyəvi dövlət quruculuğu siyasətinin bu gün Prezident İlham Əliyev tərəfindən uğurla davam etdirildiyi, Azərbaycanın ictimai-siyasi, sosial-iqtisadi, elmi-mədəni həyatında və beynəlxalq əlaqələrində böyük nailiyyətlər əldə olunduğu vurğulanıb. Komitə sədri Ermənistan–Azərbaycan, Dağlıq Qarabağ münaqişəsinin həlli ilə bağlı aparılan danışıqlar prosesi haqqında da məlumat verərək bildirib ki, işğalçı dövlətin qeyri-konstruktiv mövqeyi, beynəlxalq vasitəçilərin ikili standartlardan çıxış etməsi təəssüf doğurur. Azərbaycan nəyin bahasına olursa-olsun, öz ərazi bütövlüyünü bərpa edəcək. İranın Şərqi Azərbaycan vilayətinin valisinin müavini Səid Şəbüstəri Xiyabanı İran-Azərbaycan əlaqələrinin əhəmiyyətindən, ortaq dəyərlərimizdən söhbət açıb. O, İran tərəfinin təbriklərini Azərbaycan rəhbərliyinə və xalqına çatdırıb. Sonra Milli Məclisin mədəniyyət komitəsinin sədri Rafael Hüseynov çıxış edərək Azərbaycan və İran xalqlarının ortaq tarixi və mədəniyyəti haqqında tədbir iştirakçılarına məlumat verib. Çıxışlardan sonra Azərbaycanın sosial-iqtisadi inkişafını, turizm potensialını, mədəniyyətini və İranla dostluq münasibətlərini əks etdirən film nümayiş olunub. Tədbirdə İranın dövlət rəsmiləri, Türkiyə Respublikasının Təbrizdəki baş konsulu, kütləvi informasiya vasitələrinin və şəhər ictimaiyyətinin nümayəndələri iştirak ediblər.xeber100.com

Türkiyə, Azərbaycan, Gürcüstan birgə hərbi təlimlər keçirə bilər?!

2017-ci ilin yayında Gürcüstanın ərazisində Türkiyə, Azərbaycan və Gürcüstan birgə hərbi təlimlər keçirə bilər. RİA Novosti-nin verdiyi məlumata görə, bunu Gürcüstan Silahlı Qüvvələrinin Baş Qərargah rəisi Vaxtanq Kapanadze deyib. Onun sözlərinə görə, təlimlər irimiqyaslı olacaq: "Təlimlərdə ən əsası antiterror və təhlükəsizlik məsələləri yer alacaq".

Montevideo şəhərində Respublika Günü qeyd olunub

Azərbaycanın Uruqvay Şərq Respublikasındakı diplomatik missiyası tərəfindən Montevideo şəhərində 28 may Respublika Günü münasibətilə qəbul keçirilib. Azərbaycan XİN-dən Trend-ə verilən məlumata görə, tədbirdə Uruqvay Şərq Respublikasının xarici işlər nazirinin müavini Xose Luis Kansela, Uruqvay Parlamentinin Senat və Nümayəndələr Palatasının çoxsaylı üzvləri, digər dövlət qurumlarının, siyasi partiyaların, diplomatik korpusun, elmi-akademik, işgüzar dairələrin, mədəniyyət, o cümlədən KİV-lərin nümayəndələri iştirak ediblər. Tədbir zamanı çıxış edən Azərbaycanın Argentinadakı müvəqqəti işlər vəkili Rəşad Aslanov Azərbaycanın son illərdə əldə etdiyi uğurlar, ölkəmizin inkişaf strategiyası, regional proseslərdə və beynəlxalq siyasətdə rolu, Azərbaycan torpaqlarının Ermənistan silahlı qüvvələri tərəfindən işğalı barədə danışıb. Ölkəmizdə təşkil olunan beynəlxalq səviyyəli tədbirlər barədə də danışan Azərbaycan diplomatı növbəti illərdə Azərbaycanın digər beynəlxalq idman yarışlarına ev sahibliyi edəcəyinə toxunub. Çıxışının ardınca Azərbaycanın mədəniyyəti, tarixi, iqtisadi inkişafı, regional enerji və infrastruktur layihələri, o cümlədən ölkəmizdə mövcud olan tolerantlıq və dinlərarası dialoq haqqında videoçarx nümayiş etdirilib.xeber100.com

Azərbaycan və Avstraliya əməkdaşlıq məsələləri müzakirə olunub

Bu gün Avstraliya-Azərbaycan parlamentlərarası dostluq qrupunun sədri Xanlar Fətiyev və Milli Məclisin Beynəlxalq münasibətlər komitəsinin üzvü Asim Mollazadənin daxil olduğu Azərbaycan Milli Məclisinin nümayəndə heyətinin Avstraliyaya səfəri çərçivəsində Sterlinq şəhərinin meri Covanni İtaliano ilə görüş keçirilib. Görüşdə iqtisadiyyat, qarşılıqlı investisiyalar sahələrində əməkdaşlıq məsələləri müzakirə olunub. Qeyd edilib ki, hazırda Azərbaycanda iqtisadiyyatın inkişafının perspektivli istiqamətləri sırasında qeyri-neft sektoru və Avstraliya ilə bu sahədə təcrübə və texnologiya mübadiləsi hər iki ölkə üçün çox faydalı ola bilərdi. Bununla yanaşı, görüş zamanı ölkələr arasında humanitar, mədəniyyət, turizm, təhsil və digər sahələrdə əməkdaşlıq müzakirə olunub. Həmçinin, Qərbi Avstraliya parlamentinin deputatı Con Makqrat ilə görüş baş tutub. C. Makqrat Ermənistan-Azərbaycan, Dağlıq Qarabağ münaqişəsi, Ermənistanın işğalçı siyasəti, bir milyondan çox azərbaycanlı qaçqının olması, Xocalı soyqrımı barədə məlumatlandırılıb. Görüşdə Azərbaycan və Avstraliya arasında əməkdaşlıq məsələləri də müzakirə olunub.xeber100.com

İndoneziyada Respublika Günü münasibətilə rəsmi qəbul təşkil edilib

Azərbaycanın İndoneziyadakı səfirliyi ölkəmizin milli bayramı - Respublika Günü münasibətilə rəsmi qəbul təşkil edib. Tədbirdə İndoneziyanın hökumət və parlament üzvləri, dövlət qurumlarının nümayəndələri, diplomatik korpusun rəhbərləri, bir sıra QHT-lərin, kütləvi informasiya vasitələrinin təmsilçiləri, iş adamları və digər qonaqlar iştirak ediblər. Səfir Tamerlan Qarayev tədbirdə çıxış edərək Azərbaycan Xalq Cümhuriyyətinin tarixi barədə məlumat verib. Bildirib ki, bu il xalqımız 1918-ci ildə Şərqdə ilk demokratik respublikanın yaranmasının 98-ci ildönümünü qeyd edir. Azərbaycanın müstəqilliyin bərpasının ilk dövrlərində Ermənistan tərəfindən hərbi təcavüzə məruz qaldığını qeyd edən səfir bunun nəticəsində bir milyon soydaşımızın qaçqın və məcburi köçkünə çevrildiyini və erməni təcavüzünün hələ də davam etdiyini bildirib. Ermənistan silahlı qüvvələrinin aprel təxribatlarına toxunan diplomat qeyd edib ki, Azərbaycanın dinc əhalisinə və mülki obyektlərinə qarşı yönəldilmiş məqsədyönlü təxribatlar nəticəsində ermənilər tərəfindən uşaqlar da daxil olmaqla, azərbaycanlı mülki şəxslər öldürülüb, yüzlərlə ev, məktəb, məscid, mülki infrastruktur obyektləri dağıdılıb, böyük maddi ziyan vurulub. Ermənistan artilleriyası fosfor tərkibli kimyəvi sursatlardan istifadə edib. Bütün bunlar Ermənistanın beynəlxalq humanitar, insan hüquqları üzrə qanun, norma və prinsipləri kobudcasına pozmasıdır və hərbi cinayətdir. Azərbaycan beynəlxalq ictimaiyyəti Ermənistanı beynəlxalq hüququ nümayişkaranə şəkildə pozduğuna görə pisləməyə çağırır. Ermənistan silahlı qüvvələrinin ərazilərimizdən dərhal, tamamilə və qeyd-şərtsiz çıxarılmasını tələb edən BMT Təhlükəsizlik Şurasının 822, 853, 874 və 884 saylı qətnamələrinin həyata keçirilməsini tələb edir. Ermənistan-Azərbaycan, Dağlıq Qarabağ münaqişəsi yalnız Azərbaycanın beynəlxalq miqyasda tanınmış sərhədləri çərçivəsində, ərazi bütövlüyü və suverenliyi əsasında sülh yolu ilə həll oluna bilər. Səfir vurğulayıb ki, hazırda bütün göstəricilərə görə regionda lider dövlətə çevrilən Azərbaycan öz sürətli inkişafı, qlobal inteqrasiyası, multikulturalizmi, tolerantlıq və müxtəlifliyi ilə dünyanın diqqətini cəlb edir. Bu istiqamətdə Azərbaycanın qazandığı uğurlardan danışan diplomat bir neçə gündən sonra paytaxt Bakıda Formula 1 yarışlarının başlayacağını, ötən il ölkəmizin birinci Avropa Oyunlarını yüksək səviyyədə təşkil etdiyini, 2017-ci ildə isə İslam Həmrəylik Oyunlarının Azərbaycanda keçiriləcəyini bildirib, qonaqları bu möhtəşəm tədbirlərə qatılmağa dəvət edib. Azərbaycan-İndoneziya əlaqələrindən bəhs edən diplomat ölkələrimiz arasında siyasi münasibətlərin yüksək səviyyədə olduğunu bildirib. Eyni zamanda, digər sahələrdə ikitərəfli əməkdaşlığın inkişafı üçün böyük potensialın olduğunu vurğulayıb. Tədbirdə çıxış edən İndoneziyanın sənaye naziri Saleh Husin Azərbaycan xalqını milli bayram münasibətilə təbrik edib. İkitərəfli əlaqələrin inkişafı ilə bağlı gələcək plan və layihələrdən danışan nazir qeyd edib ki, Azərbaycan İndoneziya üçün Avropaya tranzit yolu ola bilər. İştirakçılara Azərbaycan haqqında müxtəlif nəşrlər, həmçinin “İRS” jurnalının ingilis və İndoneziya dillərinə tərcümə olunmuş versiyaları paylanılıb.xeber100.com