2017/2018-ci tədris ili üçün qəbul imtahanlarının nəticələri açıqlanıb

Dövlət İmtahan Mərkəzinin 2017/2018-ci tədris ili üçün ali təhsil müəssisələrinə keçirdiyi qəbul imtahanlarının nəticələri açıqlanıb. Abituriyentlərdən 7-si birinci qrup üzrə ən yüksək bal toplayıb. Yüksək bal toplayan abituriyentlər əsasən Bakı Ali Neft Məktəbini (BANM) seçiblər.BANM-dən Azərtac-a bildirilib ki, 700 bal toplayan 6 gənc - Türkiyə Dəyanət Vəqfi Bakı Türk Liseyinin məzunu Qabil Əliyev, Bakı şəhəri 220 saylı məktəbinin məzunu Xalidə Əliyeva, İsmayıllı rayonu Lahıc qəsəbə tam orta məktəbinin məzunu Vahab Cəbrayılov, Bakı şəhəri 162 saylı məktəbinin məzunu Mahirə Əsədzadə, akademik Zərifə Əliyeva adına Liseyin məzunu Elmir Əhmədov, Gəncədəki “İstək” liseyinin məzunu Abdulla Əsgərzadə ixtisas seçimi zamanı BANM-i seçiblər.Abituriyentlər bunu BANM-in tələbələrə geniş imkanlar yaratması və yaxşı təhsil verməsi ilə izah ediblər. Bildiriblər ki, BANM tələbələr üçün böyük şanslar verir və yüksəkixtisaslı mütəxəssislər hazırlayır.Qeyd edək ki, bu ali məktəb tələbələr üçün yaratdığı şərait və geniş karyera imkanları ilə seçilir.xeber100.com

Təhsil Nazirliyinin məlumatına görə…

Təhsil Nazirliyinə iyul ayında daxil olan zənglərlə və vətəndaşlara göstərilən xidmətlərlə bağlı statistika açıqlanıb.Nazirlikdən Azərtac-a bildirilib ki, ötən ay Təhsil Nazirliyinin vətəndaşlarla iş bölməsinə ümumilikdə 27 min 993 müraciət daxil olub. Bu dövrdə Telefon Məlumat Mərkəzində 22 848 zəng qəbul edilib. Vətəndaşların Qəbulu Mərkəzində isə 5 145 vətəndaşa xidmət göstərilib.Əsasən sorğu xarakterli olan müraciətlərin əksəriyyəti dərhal cavablandırılaraq operativ həll edilib.Daxil olan müraciətlər daha çox müəllimlərin işə qəbulu və yerdəyişməsi, ali təhsil sənədlərinin (diplomların) tanınması (nostrifikasiya), tələbələrin yerli ali təhsil müəssisələrinə köçürülməsi və bərpası, uşaqların ümumtəhsil məktəblərinin birinci siniflərinə qəbulu, xüsusi istedada malik uşaqların vaxtından əvvəl birinci sinfə qəbulu və müəllimlərin diaqnostik qiymətləndirilməsi ilə bağlı məsələləri əhatə edib.xeber100.com

Bakı Şəhəri üzrə Təhsil İdarəsinin məlumatı

Paytaxt məktəbliləri Gürcüstanın Batumi şəhərində idmanın döyüş növləri üzrə keçirilən beynəlxalq turnirdə yüksək nəticələr əldə ediblər.Bakı Şəhəri üzrə Təhsil İdarəsindən (BŞTİ) Azərtac-a bildiriblər ki, yarışın final mərhələsində paytaxt məktəblilərindən üçü fəxri kürsünün ilk pilləsinə qalxıb, biri isə üçüncü yeri tutub.Turnirdə BŞTİ-nin tabeliyindəki 246 nömrəli məktəb-liseyin XI sinif şagirdi Ramazan Abdullayev K-1 qaydaları üzrə keçirilən döyüşlərdə birinci yerə layiq görülüb. O, 55 kiloqram çəki dərəcəsində ardıcıl olaraq iki erməni idmançısını vaxtından əvvəl məğlub edib. Kikboksinq idman növü üzrə həmin məktəb-liseyin V sinif şagirdi Miryəhya Seyidov 35, 205 nömrəli tam orta məktəbin VIII sinif şagirdi Vüqar Ramazanov 51 kiloqram çəki dərəcəsində birinci yerə sahib olub. Onlar da Ermənistandan olan həmyaşıdları üzərində qələbə qazanıblar. “Kaspi” liseyinin VII sinif şagirdi Sənan Seyidov isə kikboksinq idman növü üzrə 50 kiloqram çəki dərəcəsində Gürcüstan təmsilçisi ilə qarşılaşmanı üçüncü yerlə kifayətlənərək başa vurub.Qaliblərə medal və diplomlar verilib.xeber100.com

Ümumtəhsil müəssisələrinə test mərhələsi davam edir

Ümumtəhsil müəssisələrinə mərkəzləşdirilmiş qaydada müəllimlərin işə qəbulu üzrə keçirilən müsabiqənin test mərhələsi davam edir.Təhsil Nazirliyindən Azərtac-a bildiriblər ki, iyulun 25-dən başlayan imtahanlarda indiyədək 30 minədək namizəd iştirak edib. Namizədlər 90 dəqiqə ərzində ixtisaslarına uyğun olaraq ümumtəhsil məktəblərinin fənn proqramının məzmunu üzrə 40, metodika, təlim strategiyaları üzrə 10 və məntiq üzrə 10 sual olmaqla ümumilikdə 60 sualı cavablandırıblar.Qeyd edək ki, müsabiqədə iştirak etmək üçün 47 min nəfərə yaxın şəxsin elektron ərizəsi təsdiq edilib. İmtahanda iştirak edəcək müəllimlər www.miq.edu.az saytına daxil olmaqla “Şəxsi səhifə” bölməsindən imtahanların keçiriləcəyi tarix və saat barədə məlumat əldə edə bilərlər.İmtahana gələrkən müəllimlərdən özləri ilə şəxsiyyəti təsdiq edən sənədin əslini və bildirişi gətirmələri xahiş olunur.İmtahanlar avqustun 5-dək davam edəcək. Müəllimlərin işə qəbulu üzrə müsabiqə 4 mərhələdə (elektron ərizədəki göstəricilərin qiymətləndirilməsi, test imtahanı, vakant yerlərin seçilməsi və müsahibə) təşkil edilir. Namizədlər müsabiqənin test mərhələsindən sonra vakansiya seçimi edə biləcəklər.xeber100.com  

Dövlət İmtahan Mərkəzinin məlumatına görə…

Bu il ali məktəblər üçün 42 min 806 vakant yer təqdim olunub. Ötən illə müqayisədə bu il plan yerlərinin sayı iki faiz artıb. Hətta ola bilər ki, müəyyən yerlər boş qalsın.Azərtac xəbər verir ki, bunu Dövlət İmtahan Mərkəzinin (DİM) Direktorlar Şurasının sədri Məleykə Abbaszadə deyib.Onun sözlərinə görə, I qrupda bu göstərici bir faiz, II qrupda beş faiz artıb, III qrupda demək olar ki, eyni qalıb, IV qrupda 3,5 faiz azalma, V qrupda isə təxminən səkkiz faiz artım müşahidə olunub.DİM sədri xatırladıb ki, avqustun 10-da ixtisas seçimi başa çatandan sonra xüsusi proqram təminatı vasitəsilə yerləşdirilmə aparılacaq. O deyib: “Toplanan bala və ixtisas seçiminə görə nəticələr elan olunacaq. Bundan sonra boş qalan yerlər elan ediləcək. Bu da avqustun 15-dən sonra olacaq. Bunun üçün sənəd qəbulunun avqustun 15-dən 19-dək həyata keçirilməsini nəzərdə tutmuşuq. Nəticələri elan etdikdən sonra avqustun 20-dən 30-dək ali məktəblərə qeydiyyat aparılacaq. Birinci mərhələnin qeydiyyatı avqustun 15-dən 25-dək aparılacaq reallaşdırılacaq”.xeber100.com

2017-2018-ci tədris ili üzrə “ASAN peşə” layihəsi çərçivəsində

Avqustun 1-dən 2017-2018-ci tədris ili üzrə “ASAN peşə” layihəsi çərçivəsində ilk peşə-ixtisas təhsili müəssisələrinə sənəd qəbulu başlayıb.Azərtac xəbər verir ki, ilk peşə-ixtisas təhsili müəssisələrinə ərizə qəbulu avqustun 1-dən 22-dək “ASAN xidmət” mərkəzlərində və müvafiq təhsil müəssisələrində sənəd qəbulu komissiyalarında aparılacaq. Ərizə qəbulu üçün şəxsiyyət vəsiqəsi və təhsil haqqında sənəd (şəhadətnamə və ya attestat) tələb olunur.Bakı və Gəncə şəhərlərində yerləşən dövlət ilk peşə-ixtisas təhsili müəssisələrinə həm dövlət, həm də ödənişli əsaslarla qəbul “ASAN xidmət” tərəfindən aparılacaq. Sumqayıt, Abşeron, Bərdə, Masallı, Sabirabad, Qəbələ şəhər və rayonları üzrə qəbul “ASAN xidmət” mərkəzləri ilə yanaşı, ilk peşə-ixtisas təhsil müəssisələri tərəfindən də həyata keçiriləcək. “ASAN xidmət” mərkəzlərinin fəaliyyət göstərmədiyi şəhər və rayonlarda yerləşən dövlət ilk peşə-ixtisas təhsili müəssisələrinə sənəd vermək istəyən şəxslər istənilən “ASAN xidmət”ə və müvafiq təhsil müəssisələrinə müraciət edə bilərlər.İlk peşə-ixtisas təhsili müəssisələrinə sənəd vermiş şəxslər 10 ixtisas seçmək hüququna malikdirlər. Şagird qəbulu şəhadətnamə və attestat üzrə müvafiq fənlərin orta balı nəzərə alınmaqla həyata keçirilir. Sənəd qəbulu komissiyalarında müraciət edənlərin sərbəst seçimi əsasında ilk peşə-ixtisas təhsili müəssisələri, onların ixtisasları müəyyən edilir və istədikləri ardıcıllıqla təsdiqlənir.xeber100.com

Təhsil Nazirliyinin məlumatı

“Azərbaycan üçün öyrət” təhsil proqramı çərçivəsində həyata keçirilən “Təhsil avtobusu – 2017” yay məktəbi layihəsi başa çatıb.Təhsil Nazirliyindən Azərtac-a bildiriblər ki, iyulun 24-dən başlayan layihə çərçivəsində Bakı, Gəncə, Mingəçevir şəhərlərində, Quba, Masallı, Sabirabad, Zaqatala və İsmayıllı rayonlarında tələbələr üçün yay məktəbləri təşkil olunub. Yay məktəblərində 200-ə yaxın tələbə iştirak edib. Tələbələr “Biznesə necə başlamalı?”, “İKT karyerası”, “My Future is STEAM”, "Sığortalanan gələcək” adlı təlimlərdə iştirak ediblər, həmçinin “Nə? Harada? Nə zaman?” intellektual oyununa qatılıblar.Qeyd edək ki, “Azərbaycan Respublikasında təhsilin inkişafı üzrə Dövlət Strategiyası”na uyğun həyata keçirilən layihə keyfiyyətli təhsil üçün bərabər imkanların yaradılmasına xidmət edən təhsil proqramıdır. Yay məktəbi Təhsil Nazirliyi, “Engin” LTD MMC, “Kapital Bank”ın təşkilatçılığı, “Bakcell”, “Qala Express” MMC, “GoldenPay”, “Microsoft Azərbaycan” və “PAŞA Sığorta” şirkətlərinin dəstəyi, Azərbaycan İntellektual Klublar Assosiasiyası,“ARB TV”, “ASAN xidmət”, “Bir” tələbə-könüllü proqramı, “Edutainment.az”, “İstək” liseyi, “SABAH” qrupları, “Şərq-Qərb” Nəşriyyat və Poliqrafiya Evi, “Təhsil TV” və “Youth Inc.” Sahibkarlıq Proqramının tərəfdaşlığı ilə keçirilir.xeber100.com

Dövlət İmtahan Mərkəzinin məlumatına əsasən…

Dövlət İmtahan Mərkəzi (DİM) I ixtisas qrupunda müsabiqədə iştirak etmək hüququ qazanmış abituriyentlər üçün “İxtisas seçimi zamanı nələrə diqqət yetirməli?” adlı kitabça nəşr etdirib.DİM-dən Azərtac-a bildiriblər ki, “Abituriyent” jurnalının xüsusi buraxılışı olan bu kitabçada I ixtisas qrupunda müsabiqədə iştirak etmək hüququ qazanmış abituriyentlərin imtahan ballarının paylanması, ali təhsil müəssisələrinə ixtisas qrupu üzrə qəbul planı, dövlət sifarişi üzrə yerlərin sayı, müsabiqə şərtləri və digər zəruri məlumatlar təqdim olunur.Kitabçanı Bakı şəhəri, Nəsimi rayonu, A.Salamzadə küçəsi,28; Bakı şəhəri, Yasamal rayonu, Mikayıl Müşfiq küçəsi, 1M ünvanlarında yerləşən “Abituriyent” satış köşklərindən, həmçinin kitab mağazalarından almaq və ya www.abiturient.az saytından sifariş etmək olar.xeber100.com

2017/2018-ci tədris ili üçün elektron qeydiyyatı başlayacaq

Avqustun 1-dən etibarən Bakı şəhərinin ümumtəhsil müəssisələrində məktəbəhazırlıq qruplarına 2017/2018-ci tədris ili üçün uşaqların elektron qeydiyyatı başlayacaq.Azərtac xəbər verir ki, bunu paytaxtın ümumtəhsil müəssisələrində məktəbəhazırlıq qruplarına 2017/2018-ci tədris ili üçün uşaqların elektron qeydiyyatının başlanması ilə bağlı keçirilən mətbuat konfransında Bakı Şəhəri üzrə Təhsil İdarəsinin (BŞTİ) informasiya təminatı sektorunun müdiri İlhamə Abdullayeva deyib.İ.Abdullayeva diqqətə çatdırıb ki, elektron qeydiyyat mektebeqebul.edu.az saytı vasitəsilə həyata keçiriləcək. O deyib: “Bu proses avqustun 1-dən sentyabrın 18-dək elektron sistemdə ərizələrin online qeydiyyatı vasitəsilə aparılacaq. Məktəbəhazırlıq qruplarına məktəblərdə sənəd qəbulu isə avqustun 15-dən sentyabrın sonunadək həyata keçiriləcək. BŞTİ-nin tabeliyində 266 ümumi təhsil müəssisəsində 936 məktəbəhazırlıq qrupu fəaliyyət göstərəcək. Məktəbəhazırlıq qruplarında məşğələlər oktyabrın 2-də başlayacaq. Səkkiz ay davam edən məşğələlər mayın 31-də başa çatacaq. Yeni tədris ili üçün paytaxtın ətraf qəsəbələrində yerləşən ümumtəhsil müəssisələrindəki məktəbəhazırlıq qruplarına daha çox uşağın cəlb edilməsi planlaşdırılır. Yeni tədris ilində məktəbəhazırlıq qruplarına ümumilikdə 25 mindən çox uşağın cəlb olunması nəzərdə tutulur”.xeber100.com

Milli Günəş Rəsədxanasının məlumatı

ABŞ-ın Milli Günəş Rəsədxanasının yaydığı məlumata görə, avqust ayında tam Günəş tutulması baş verəcək.AMEA-nın saytı xəbər verir ki, tədqiqatçıların sözlərinə görə, Günəş tacı əvvəlki tutulmalarla müqayisədə bir neçə dəfə böyük olacaq. Tutulma müddəti 2 dəqiqə 40 saniyə, yer səthində Ayın kölgəsinin eni isə 115 kilometr təşkil edəcək.Qismən Qərbi Avropa və Cənubi Amerikanı əhatə edəcək bu nadir təbiət hadisəsini yalnız ABŞ sakinləri müşahidə edə biləcək.Növbəti Günəş tutulması isə 2035-ci ilin sentyabr ayının 2-də baş verəcək.xeber100.com