Bakı Şəhəri üzrə Təhsil İdarəsinin məlumatı

Paytaxtın ümumi təhsil məktəblərində 2017-2018-ci dərs ili üçün I sinfə şagird qəbulunun ilk mərhələsi yekunlaşıb.Bakı Şəhəri üzrə Təhsil İdarəsindən Azərtac-a bildirilib ki, elektron sənəd qəbulunun II mərhələsinə iyunun 20-dən start veriləcək. İndiyədək I sinfə şagird qəbulu ilə bağlı elektron sistem vasitəsilə 44 000-dən çox uşaq qeydiyyatdan keçib.Hazırda I sinfə qəbul prosesində birinci mərhələdə elektron qeydiyyata alınmış ərizələrin emalı prosesi gedir. Emal zamanı birinci mərhələdə qeydiyyatdan keçmiş, amma sənədlərini iyunun 14-nə kimi məktəbə təqdim etməyən şəxslərin sorğuları sistemdən silinir.İkinci mərhələdə valideynlər müvafiq qaydalara uyğun olaraq, mektebeqebul.edu.az elektron sistemi vasitəsilə I sinfə qəbul üzrə sorğu yerləşdirə bilərlər. Bundan sonra valideynlər övladlarının sənədlərini iyunun 20-dən sentyabrın 18-dək (iyul ayı istisna olmaqla) məktəbə təqdim etməlidirlər.Məktəb tərəfindən sənədlər hər həftənin V-VI günləri (bayram günləri istisna olmaqla) saat 11:00-dan 16:00-dək qəbul edilir. Sənədlər qəbul edildikdən sonra valideynə (qanuni nümayəndəyə) bu barədə qəbz verilir.Həmçinin hər hansı səbəbdən özü elektron qeydiyyatdan keçə bilməyən şəxslər Bakı şəhərinin hər inzibati rayonunda I sinfə elektron sistem vasitəsilə ərizələrin qeydiyyatı məsələlərində vətəndaşlara kömək məqsədilə 50 məktəbdə yaradılmış alternativ qeydiyyat mərkəzlərinə müraciət edə bilərlər. Birinci sinfə şagird qəbulu prosesində qeydiyyat və sənəd qəbulu prosesində araşdırmaya ehtiyac olan məsələlərin həlli məqsədilə Bakı şəhəri üzrə 6 ümumi təhsil müəssisəsində Apelyasiya Komissiyası fəaliyyət göstərir.xeber100.com

Təhsil Nazirliyinin məlumatına əsasən…

2016-2017-ci tədris ilində respublikanın ümumtəhsil məktəblərinin IX siniflərini 110 min 638 nəfər, XI siniflərini 84 min 88 nəfər, qiyabi (axşam) ümumtəhsil məktəblərini isə 723 nəfər şagird bitirəcək.2017-2018-ci tədris ilində birinci sinfə 164 min 945 şagirdin qəbul olunacağı gözlənilir.Təhsil Nazirliyindən Azərtac-a bildiriblər ki, nazir Mikayıl Cabbarovun əmrinə əsasən, “Son zəng” tədbiri iyunun 14-də yalnız ümumi təhsil müəssisələrinin ərazisində təşkil olunur.xeber100.com

“Beynəlxalq Təhsil Həftəsi-2017” simpoziumu keçirilir

Bakıda “Beynəlxalq Təhsil Həftəsi-2017” simpoziumu keçirilir.Azərtac xəbər verir ki, iyunun 13-də “ADA” Universitetində simpoziumun rəsmi açılışı olub.Açılış mərasimində “ADA” Universitetinin Təhsil İnstitutunun dekanı Vəfa Kazdal simpoziumun Azərbaycanda təhsilin davamlı inkişafına dəstək məqsədilə keçirildiyini bildirib. O, simpozium çərçivəsində innovativ və müasir təhsil üsulları mövzusunda yerli və ABŞ mütəxəssislərinin təcrübə mübadiləsi aparacaqlarını qeyd edib. V.Kazdal qısa müddətdə böyük nüfuz və hörmət qazanmış “ADA” Universitetində dünyanın aparıcı universitetləri ilə əməkdaşlıq layihələrinin həyata keçirildiyini diqqətə çatdırıb.Təhsil nazirinin müavini Ceyhun Bayramov “Azərbaycan Respublikasında təhsilin inkişafı üzrə Dövlət Strategiyası” çərçivəsində aparılan islahatlardan, əldə olunan nəticələrdən bəhs edib. Ümumi təhsil müəssisələrində çalışan müəllimlərin diaqnostik qiymətləndirilməsindən danışan nazir müavini son üç ildə müəllimlərin maaşlarının təxminən 30 faiz artdığını deyib.BP Azərbaycan şirkətinin vitse-prezidenti Bəxtiyar Aslanbəyli qeyd edib ki, təhsilə qoyulan sərmayə gələcəyə yönəlmiş ən səmərəli yatırım sayılır. BP Azərbaycan şirkətinin fəaliyyət göstərdiyi müddətdə təhsil sisteminə təxminən 72 milyon ABŞ dolları məbləğində sərmayə yatırdığını deyən B.Aslanbəyli bu istiqamətdə səylərin davam etdiriləcəyini bildirib.ABŞ səfirliyinin müşaviri Uilyam Gill ikitərəfli münasibətlərdə təhsil sahəsində əməkdaşlığın vacibliyini vurğulayıb. U.Gill ABŞ mübadilə proqramları üzrə təhsil almış təxminən 6 min azərbaycanlı məzunun təhsil sektorunun inkişafında yeniliklər tətbiq etdiklərini diqqətə çatdırıb.İyunun 16-dək davam edəcək simpozium günlərində tədris üzrə mütəxəssislər və təhsil idarəçiləri praktiki seminarlar keçirəcəklər. Müzakirələr əsasən təhsilin müxtəlif idarəetmə mərhələlərinin təhlili, statistik göstəricilərə əsaslanan qiymətləndirmə və hesabatların hazırlanması, tədqiqatların qiymətləndirilməsi və STEAM (Elm, Texnologiya, Mühəndislik, İncəsənət, Riyaziyyat) təhsilinə fərqli yanaşma istiqamətlərində aparılacaq.xeber100.com

Dövlət İmtahan Mərkəzində Apelyasiya Komissiyası yaradılıb

Ali və orta ixtisas təhsili müəssisələrinə qəbul olmaq istəyən rus bölməsi abituriyentləri üçün bu il iyunun 11-də “Azərbaycan dili” fənni üzrə keçirilmiş imtahan ilə əlaqədar müraciətlərə baxılması üçün Dövlət İmtahan Mərkəzində (DİM) Apelyasiya Komissiyası yaradılıb.DİM-dən Azərtac-a bildiriblər ki, Apelyasiya Komissiyası Bakı Asiya Universitetinin binasında (ünvan: Bakı şəhəri, Nəsimi rayonu, A. Salamzadə küçəsi 28) fəaliyyət göstərir.Abituriyentlər Apelyasiya Komissiyasına iyunun 13 və 14-də saat 10.00-dan 17.00-dək şəxsiyyəti təsdiq edən sənədin əslini və surətini təqdim etməklə şəxsən müraciət edə bilərlər.xeber100.com

Bakı Şəhəri üzrə Təhsil İdarəsinin məlumatı

2016-2017-ci tədris ilində Bakı Şəhəri üzrə Təhsil İdarəsinin tabeliyindəki ümumi təhsil məktəblərinin IX sinfini 27.708, XI sinfini 19.525 nəfər bitirəcək.BŞTİ-dən Azərtac-a bildiriblər ki, paytaxtda 45.321 nəfər birinci sinfi, 599 nəfər XII sinfi (əyani-qiyabi tam orta məktəb və qiyabi siniflərdə) başa vuracaq.Cari tədris ilində BŞTİ-nin tabeliyində fəaliyyət göstərən ümumi təhsil məktəblərində 387.373, xüsusi ümumi orta məktəblərdə (xüsusi siniflərdə) 2.327, əyani-qiyabi axşam məktəblərində (qruplarında) isə 2.603 nəfər olmaqla, ümumilikdə 392.303 şagird təhsil alıb.2016-2017-ci tədris ilində məktəbəhazırlıq qruplarını 261 ümumi təhsil məktəbində 839 qrupda 23.130 uşaq bitirib. Növbəti ildən isə 25 mindən çox uşağın məktəbəhazırlıq qruplarına cəlb edilməsi nəzərdə tutulur.Birinci sinfə şagird qəbulu ilə bağlı hazırda elektron sistem vasitəsilə 44 mindən çox uşaq qeydiyyatdan keçib ki, onlardan 40.805-i ümumi təhsil məktəblərinə, 3.359 nəfəri isə lisey və gimnaziyalara sorğu yerləşdirib. Bu göstərici paytaxtdakı dövlət ümumi təhsil müəssisələrinin birinci sinfinə şagird qəbulu proqnozunun təxminən 95 faizindən çoxdur.Qeyd edək ki, BŞTİ-nin tabeliyində 307 ümumi təhsil məktəbi, üç xüsusi ümumi orta məktəb və yeddi əyani-qiyabi axşam məktəbi olmaqla, cəmi 317 məktəb fəaliyyət göstərir.BŞTİ-nin tabeliyindəki ümumi təhsil məktəblərində ümumilikdə 28.165 müəllim fəaliyyət göstərir.xeber100.com

Təhsil Nazirliyinin məlumatına əsasən…

Təhsil Nazirliyi “Məktəbəqədər təhsilin kurikulumu” sənədinin layihəsini ictimai müzakirəyə təqdim edir.Təhsil Nazirliyindən Azərtac-a bildiriblər ki, sənəd “Azərbaycan Respublikasında təhsilin inkişafı üzrə Dövlət Strategiyası”nın həyata keçirilməsi ilə bağlı Fəaliyyət Planının icrasını təmin etmək məqsədi ilə hazırlanıb.İctimai müzakirədə iştirak etmək istəyənlər Təhsil Nazirliyinin internet saytının “Sənədlər” bölməsində həmin sənədlə tanış ola bilərlər.xeber100.com

I-IV ixtisas qrupları üzrə sınaq imtahanları keçirilir

İyunun 11-də Dövlət İmtahan Mərkəzi (DİM) I-IV ixtisas qrupları üzrə ali təhsil müəssisələrinə qəbul olmaq istəyən abituriyentlər üçün respublikanın 11 şəhərində sınaq imtahanları keçirir.İmtahanlar Bakı, Sumqayıt, Abşeron, Naxçıvan, Gəncə, Şəki, Bərdə, Göyçay, Şirvan, Lənkəran, Xaçmaz şəhərlərində ümumilikdə 30 binada təşkil olunacaq.İmtahanda iştirak etmək üçün yazılış internet vasitəsilə aparılıb və 15 min 274 abituriyent qeydiyyatdan keçib.Sınaq imtahanları bir növbə üzrə keçirilir və bütün binalarda saat 11.00-da başlanacaq.İmtahanların idarə edilməsi üçün 91 imtahan rəhbəri, 929 nəzarətçi-müəllim ayrılıb.xeber100.com

Bakı Dövlət Universitetində “Açıq qapı” günü təşkil olunub

İyunun 7-də Bakı Dövlət Universitetində (BDU) bu ali məktəbin rektorluğu yanında İctimai Nəzarət və Məsləhət Şurasının təşəbbüsü, valideynlər, ictimaiyyət nümayəndələri, qeyri–hökumət təşkilatlarının iştirakı ilə 2016–2017-ci tədris ilinin yay imtahan sessiyası ilə əlaqədar “Açıq qapı” günü keçirilib.Azərtac xəbər verir ki, tədbirdə BDU-nun rektoru, akademik Abel Məhərrəmov rəhbərlik etdiyi ali məktəbin fəaliyyəti barədə ətraflı məlumat verib. Müasir dünyada təhsilin mühüm rolunu qeyd edən rektor BDU–da bu sahənin inkişafı ilə bağlı reallaşdırılan tədbirlərdən, qazanılan uğurlardan danışıb.Sonra müəllim–koordinatorların bölgüsünə qatılan müşahidəçilər imtahanın gedişini universitetin Tədris Elektron Mərkəzindən izləyib, auditoriyalarda olublar. Universitetdə imtahanlar əsasən yazılı formada aparılır.“Açıq qapı” günü iştirakçıları imtahanların müşahidə kameraları quraşdırılmış xüsusi auditoriyalarda keçirilməsini yüksək qiymətləndiriblər. Bildirilib ki, BDU–da imtahanların obyektiv və şəffaf şəkildə keçirilməsi üçün bütün lazımi şərait yaradılıb.xeber100.com

Beynəlxalq elmi konfrans keçiriləcək

Milli Elmlər Akademiyasının Məhəmməd Füzuli adına Əlyazmalar İnstitutunda noyabr ayında İslam ölkələrinin mədəniyyəti, ədəbiyyatı və tarixinə dair əlyazma abidələrinin tədqiqinə həsr olunmuş “Azərbaycan əlyazmaları dünya kitabxanalarında” mövzusunda ikinci beynəlxalq elmi konfransın keçirilməsi nəzərdə tutulur.İnstitutdan Azərtac-a bildiriblər ki, tədbir əlyazma üzrə tədqiqatçıların diqqətinin Azərbaycana yönəlməsində və ölkəmizin beynəlxalq aləmdə elm və mədəniyyət ocağı kimi tanınmasında mühüm rol oynayacaq.Konfransda iştirak etmək istəyənlər sentyabrın 1-dək məruzələrinin mətnlərini institutun elektron ünvanına göndərə bilərlər.Beynəlxalq tədbirdən sonra məruzələr toplusunun nəşri nəzərdə tutulur.xeber100.com

Ədliyyə orqanlarında işləmək istəyən namizədlərin diqqətinə…

İyunun 10-da Dövlət İmtahan Mərkəzi (DİM) Ədliyyə orqanlarında işləmək istəyən namizədlər üçün test imtahanı keçirəcək.DİM-dən Azərtac-a bildiriblər ki, imtahan saat 10.00-da vahid auditoriyada – Bakı İdman Sarayında (Bakı şəhəri, Neftçilər prospekti 26A ünvanında) təşkil olunacaq. Buraxılış rejiminin vaxtında həyata keçirilməsi üçün namizədlər imtahana buraxılış vərəqəsində göstərilən vaxtda gəlməlidirlər.Namizədlər "İmtahana buraxılış vərəqəsi”ni iyunun 8 və 9 –da saat 9.00-dan 18.00-dək şəxsiyyət vəsiqəsini təqdim etməklə Ədliyyə Nazirliyinin inzibati binasından (Bakı şəhəri, İnşaatçılar prospekti 1) götürməlidirlər. İmtahana gələrkən namizədlər “İmtahana buraxılış vərəqəsi”ni və şəxsiyyət vəsiqəsini mütləq gətirməlidirlər. Göstərilən sənədlərdən biri olmadıqda namizəd imtahana buraxılmayacaq.Sənədlərin qəbulu Azərbaycan Respublikası Ədliyyə Nazirliyi tərəfindən aparılıb və 640 nəfərin namizədliyi qeydə alınıb.xeber100.com